般若部第31卷（ཁྲི་བརྒྱད་ག་པ་བཞུགས་སོ། །）

ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ།

བམ་པོ་བཞི་བཅུ་རྩ་ལྔ་པ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བགྱི།

ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བགྱི།

ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བགྱི་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་གཟུགས་ཞི་བ་དང་།

གཟུགས་ཡ་མ་བརླ་དང་།

གཟུགས་གསོག་དང་།

གཟུགས་སྙིང་པོ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་ཞི་བ་དང་།

རྣམ་པར་ཤེས་པ་ཡ་མ་བརླ་དང་།

རྣམ་པར་ཤེས་པ་གསོག་དང་།

རྣམ་པར་ཤེས་པ་སྙིང་པོ་མེད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

གང་ཡང་འདི་སྐད་དུ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བགྱི་ཞེས་ཟེར་བ་ནི།

ནམ་མཁའ་ལྟར་སྟོང་པ་ཉིད་མངོན་པར་སྒྲུབ་པས་ཤེས་རབ་ཀྱི་ཕ་

རོལ་ཏུ་ཕྱིན་པ་མངོན་པར་བསྒྲུབ་པར་བྱའོ།

གང་ཡང་འདི་སྐད་དུ་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བགྱི།

ཞེས་ཟེར་བ་ནི་ནམ་མཁའ་ལྟར་སྟོང་པ་ཉིད་སྒོམ་པས།

ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བྱའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡུན་རིང་པོ་ཇི་སྲིད་ཅིག་ཏུ་སྤྱད་ན།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་སེམས་དང་པོ་བསྐྱེད་པ་ནས་བཟུང་སྟེ།

བྱང་ཆུབ་ཀྱི་སྙིང་པོ་ལ་འདུག་གི་བར་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

དེ་ལྟར་མངོན་པར་བསྒྲུབ་པར་བྱའོ།

དེ་ལྟར་བསྒོམ་པར་བྱའོ།

གསོལ་པ།

བཅོམ་ལྡན་འདས་ཅི་སེམས་ཀྱི་རྒྱུན་མ་ཆད་ཅིང་།

མ་བྲལ་བར་རྗེས་སུ་འབྲེལ་བས་སྤྱད་པར་བགྱི་ལགས་སམ།

བཀའ་སྩལ་པ།

རབ་འབྱོར་ཡིད་ལ་བྱེད་པ་གཞན་དག་གི་གོ་སྐབས་མི་དབྱེ་བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱེད་པ་མི་དོར་བར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱ་ཞིང་།

ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པར་བྱ།

ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ།

ཅི་ནས་ཀྱང་སེམས་དང་སེམས་ལས་བྱུང་བའི་ཆོས་རྣམས་མི་རྒྱུ་བ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

དེ་ལྟར་མངོན་པར་བསྒྲུབ་པར་བྱའོ།

དེ་ལྟར་བསྒོམ་པར་བྱའོ།

གསོལ་པ།

བཅོམ་ལྡན་འདས་ཅི་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་རྣམ་

པ་ཐམས་ཅད་མཁྱེན་པ་ཉིད་ཐོབ་པར་འགྱུར་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་མ་བསྒོམས་པས་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་བསྒོམས་ཀྱང་བསྒོམས་ལ།

མ་བསྒོམས་ཀྱང་མ་བསྒོམས་པས་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་བསྒོམས་པ་ཡང་མ་ལགས།

མ་བསྒོམས་པ་ཡང་མ་ལགས་པས་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ཇི་ལྟར་རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་ལགས།

བཀའ་སྩལ་པ།

རབ་འབྱོར་དེ་བཞིན་ཉིད་ཇི་ལྟ་བ་བཞིན་དུའོ།

གསོལ་པ།

དེ་བཞིན་ཉིད་ཇི་ལྟ་བུ་ལགས།

བཀའ་སྩལ་པ།

ཡང་དག་པའི་མཐའ་ཇི་ལྟ་བ་བཞིན་ནོ།

གསོལ་པ།

ཡང་དག་པའི་མཐའ་ཇི་ལྟ་བུ་ལགས།

བཀའ་སྩལ་པ།

ཆོས་ཀྱི་དབྱིངས་ཇི་ལྟ་བ་བཞིན་ནོ།

གསོལ་པ།

ཆོས་ཀྱི་དབྱིངས་ཇི་ལྟ་བུ་ལགས།

བཀའ་སྩལ་པ།

བདག་གི་ཁམས་ཇི་ལྟ་བ་དང་།

སེམས་ཅན་གྱི་ཁམས་ཇི་ལྟ་བ་དང་།

སྲོག་གི་ཁམས་ཇི་ལྟ་བ་དང་།

གང་ཟག་གི་ཁམས་ཇི་ལྟ་བ་བཞིན་ནོ།

གསོལ་པ།

བཅོམ་ལྡན་འདས་བདག་གི་ཁམས་དང་།

གང་ཟག་གི་ཁམས་ཀྱི་བར་དག་ཇི་ལྟ་བུ་ལགས།

བཀའ་སྩལ་པ།

རབ་འབྱོར་འདི་ཇི་སྙམ་དུ་སེམས།

བདག་གམ།

སེམས་ཅན་དག་དམིགས་སུ་ཡོད་སྙམ་འམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་བ་དག་གམ།

སེམས་ཅན་དམིགས་སུ་མེད་ན།

ཇི་ལྟར་སེམས་ཅན་གྱི་ཁམས་གདགས་པར་བྱ་སྟེ།

རབ་འབྱོར་དེ་ལྟར་སེམས་ཅན་དུ་འདོགས་པར་མི་བྱེད།

ཤེས་རབ་ཀྱི་ཕ་རོལ་ཏུ་ཕྱིན་པར་ཡང་འདོགས་པར་མི་བྱེད།

ཆོས་ཐམས་ཅད་དུ་ཡང་འདོགས་པར་མི་བྱེད།

རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ།

གསོལ་པ།

བཅོམ་ལྡན་འདས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་གདགས་སུ་མ་མཆིས་པ་

ལགས་སམ།

བསམ་གཏན་གྱི་ཕ་རོལ་ཏུ་ཕྱིན་པ་དང་།

བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་ཕ་རོལ་ཏུ་ཕྱིན་པ་དང་།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡང་གདགས་སུ་མ་མཆིས་པ་ལགས་སམ།

སྦྱིན་པའི་ཕ་རོལ་ཏུ་ཕྱིན་པ་ཡང་གདགས་སུ་མ་མཆིས་པ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་གདགས་སུ་མེད་པ་ཡིན་ནོ།

འདུས་བྱས་སམ།

འདུས་མ་བྱས་སམ།

ཉན་ཐོས་ཀྱི་ཆོས་སམ།

རང་སངས་རྒྱས་ཀྱི་ཆོས་སམ།

ཆོས་ཐམས་ཅད་ཀྱི་བར་དག་ཀྱང་གདགས་སུ་མེད་པ་ཡིན་ནོ།

གསོལ་པ།

བཅོམ་ལྡན་འདས་གལ་ཏེ་ཆོས་ཐམས་ཅད་གདགས་སུ་མ་མཆིས་པ་ལགས་ན།

བཅོམ་ལྡན་འདས་ཅིའི་སླད་དུ་སེམས་ཅན་དམྱལ་བ་གདགས་སུ་མཆིས་པར་གྱུར།

དུད་འགྲོའི་སྐྱེ་གནས་གདགས་སུ་མཆིས་པར་གྱུར།

གཤིན་རྗེའི་འཇིག་རྟེན་གདགས་སུ་མཆིས་པར་གྱུར།

མི་དང་ལྷ་གདགས་སུ་མཆིས་པར་གྱུར།

རྒྱུན་ཏུ་ཞུགས་པ་དང་།

དགྲ་བཅོམ་པ་ཉིད་ཀྱི་བར་དང་།

རང་སངས་རྒྱས་དང་།

བླ་ན་མེད་པ་ཡང་དག་པར་རྫོགས་པའི་སངས་རྒྱས་གདགས་སུ་མཆིས་པར་གྱུར་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་འདི་ཇི་སྙམ་དུ་སེམས།

སེམས་ཅན་དུ་གདགས་པ་དམིགས་སུ་ཡོད་སྙམ་འམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཀའ་སྩལ་པ།

རབ་འབྱོར་སེམས་ཅན་དམིགས་སུ་མེད་ན།

སེམས་ཅན་དམྱལ་བ་དང་།

དུད་འགྲོའི་སྐྱེ་གནས་དང་།

གཤིན་རྗེའི་འཇིག་རྟེན་དང་།

ལྷ་དང་།

མི་དང་།

རྒྱུན་ཏུ་ཞུགས་པ་དང་།

དགྲ་བཅོམ་པའི་བར་དང་།

རང་སངས་རྒྱས་དང་།

ཡང་དག་པར་རྫོགས་པའི་སངས་རྒྱས་ཀྱི་བར་དག་ཇི་ལྟར་གདགས་པར་བྱ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས།

དེ་ལྟར་གདགས་སུ་མེད་པའི་ཆོས་རྣམས་ལ་བསླབ་པར་བྱའོ།

གསོལ་པ།

བཅོམ་ལྡན་འདས་འོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས།

གཟུགས་ལ་བསླབ་པར་བགྱི་ལགས་སམ།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་

ཤེས་པ་ལ་བསླབ་པར་བགྱི་ལགས་སམ།

རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་བསླབ་པར་བགྱི་ལགས་སམ།

བཀའ་སྩལ་པ།

རབ་འབྱོར་གཟུགས་ལ་དོར་བ་མེད་པ་དང་།

བསྣན་པ་མེད་པར་བསླབ་པར་བྱའོ།

རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་དོར་བ་མེད་པ་དང་།

བསྣན་པ་མེད་པར་བསླབ་པར་བྱའོ།

གསོལ་པ།

བཅོམ་ལྡན་འདས་ཇི་ལྟར་དོར་བ་མ་མཆིས་པ་དང་།

བསྣན་པ་མ་མཆིས་པར་རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་བསླབ་པར་བགྱི་ལགས།

བཀའ་སྩལ་པ།

རབ་འབྱོར་སྐྱེ་བ་མེད་པ་དང་།

འགག་པ་མེད་པར་བསླབ་པར་བྱའོ།

གསོལ་པ།

བཅོམ་ལྡན་འདས་ཇི་ལྟར་གཟུགས་ལ་སྐྱེ་བ་མ་མཆིས་པ་དང་།

འགག་པ་མ་མཆིས་པར་བསླབ་པར་བགྱི།

བཅོམ་ལྡན་འདས་ཇི་ལྟར་རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་སྐྱེ་བ་མ་མཆིས་པ་དང་།

འགག་པ་མ་མཆིས་པར་བསླབ་པར་བགྱི་ལགས།

བཀའ་སྩལ་པ།

མངོན་པར་འདུ་བྱ་བ་མེད་པར་ཏེ།

འདུ་བྱེད་རྣམས་བསྒོམ་པར་ཡང་མི་བྱ།

གཞིག་པར་ཡང་མི་བྱ་བར་བསླབ་པར་བྱའོ།

གསོལ་པ།

བཅོམ་ལྡན་འདས་ཇི་ལྟར་མངོན་པར་འདུ་བགྱི་བ་མ་མཆིས་པར་བསླབ་པར་བགྱི་ལགས།

བཀའ་སྩལ་པ།

རབ་འབྱོར་ཆོས་རྣམས་རང་གི་མཚན་ཉིད་ཀྱིས་སྟོང་པར་མཐོང་བས་མངོན་པར་འདུ་བྱ་བ་མེད་པ་ལ་བསླབ་པར་བྱའོ།

གསོལ་པ།

བཅོམ་ལྡན་འདས་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་ཇི་ལྟར་བསླབ་པར་བགྱི་ལགས།

བཀའ་སྩལ་པ།

གཟུགས་ནི་གཟུགས་ཀྱིས་སྟོང་པར་བལྟའོ།

ཚོར་བ་ནི་ཚོར་བས་སྟོང་པར་བལྟའོ།

འདུ་ཤེས་ནི་འདུ་ཤེས་ཀྱིས་སྟོང་པར་བལྟའོ།

འདུ་བྱེད་རྣམས་ནི་འདུ་བྱེད་རྣམས་ཀྱིས་སྟོང་པར་བལྟའོ།

རྣམ་པར་ཤེས་པ་ནི་རྣམ་པར་ཤེས་པས་སྟོང་པར་བལྟའོ།

མིག་གི་བར་ནི་མིག་གིས་སྟོང་པར་བལྟའོ།

ཡིད་ཀྱི་བར་ནི་ཡིད་ཀྱིས་སྟོང་པར་བལྟའོ།

ནང་སྟོང་པ་ཉིད་ནི་ནང་སྟོང་པ་ཉིད་ཀྱིས་སྟོང་པར་བལྟའོ།

རང་གི་མཚན་ཉིད་སྟོང་པ་ཉིད་ཀྱི་བར་ནི་རང་གི་མཚན་ཉིད་སྟོང་པ་ཉིད་ཀྱིས་སྟོང་པར་བལྟའོ།

བསམ་གཏན་རྣམས་ནི་བསམ་གཏན་རྣམས་ཀྱིས་སྟོང་པར་བལྟའོ།

འགོག་པའི་སྙོམས་པར་འཇུག་པའི་བར་ནི་འགོག་པའི་སྙོམས་པར་འཇུག་པས་སྟོང་

པར་བལྟའོ།

དྲན་པ་ཉེ་བར་གཞག་པ་རྣམས་ནི་དྲན་པ་ཉེ་བར་གཞག་པ་རྣམས་ཀྱིས་སྟོང་པར་བལྟའོ།

བྱང་ཆུབ་ཀྱི་བར་ནི་བྱང་ཆུབ་ཀྱི་བར་གྱིས་སྟོང་པར་བལྟ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རང་གི་མཚན་ཉིད་ཀྱིས་སྟོང་པའི་ཆོས་ཐམས་ཅད་ལ་བསླབ་པར་བྱའོ།

གསོལ་པ།

བཅོམ་ལྡན་འདས་གལ་ཏེ་གཟུགས་ནི་གཟུགས་ཀྱིས་སྟོང་།

བྱང་ཆུབ་ཀྱི་བར་ཡང་བྱང་ཆུབ་ཀྱིས་སྟོང་ལགས་ན།

བཅོམ་ལྡན་འདས་འོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་ཇི་ལྟར་འགྱུར་ལགས།

བཀའ་སྩལ་པ།

རབ་འབྱོར་སྤྱོད་པ་མེད་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ།

གསོལ་པ།

བཅོམ་ལྡན་འདས་ཅིའི་སླད་དུ་སྤྱོད་པ་མ་མཆིས་པ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལགས།

བཀའ་སྩལ་པ།

རབ་འབྱོར་འདི་ལྟར་དེས་ཤེས་རབ་ཀྱི་ཕ་རོལ་ཏུ་ཕྱིན་པ་མི་དམིགས།

བྱང་ཆུབ་སེམས་དཔའ་ཡང་མི་དམིགས།

སྤྱོད་པ་ཡང་མི་དམིགས།

གང་ལ་སྤྱོད་པ་དང་།

གང་གིས་སྤྱོད་པ་དང་།

གང་དུ་སྤྱོད་པ་དེ་ཡང་མི་དམིགས་ཏེ།

རབ་འབྱོར་དེ་གང་ལ་སྤྲོས་པ་དེ་དག་ཐམས་ཅད་མི་དམིགས་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ།

གསོལ་པ།

བཅོམ་ལྡན་འདས་གལ་ཏེ་སྤྱོད་པ་མ་མཆིས་པ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལགས་ན།

བཅོམ་ལྡན་འདས་འོ་ན་ལས་དང་པོ་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་སྤྱད་པར་བགྱི།

བཀའ་སྩལ་པ།

རབ་འབྱོར་འདི་ལ་ལས་དང་པོ་པའི་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་དང་པོ་བསྐྱེད་པ་ནས་བཟུང་སྟེ།

དེ་ལྟར་མི་དམིགས་པའི་ཚུལ་གྱིས་ཆོས་ཐམས་ཅད་ལ་བསླབ་པར་བྱ་ཞིང་།

དེས་སྦྱིན་པ་སྦྱིན་པ་ན།

མི་དམིགས་པའི་ཚུལ་གྱིས་སྦྱིན་པ་སྦྱིན་པར་བྱའོ།

ཚུལ་ཁྲིམས་སྲུང་བ་ན།

མི་དམིགས་པའི་ཚུལ་གྱིས་ཚུལ་ཁྲིམས་བསྲུང་བར་བྱའོ།

བཟོད་པ་སྒྲུབ་པ་ན།

མི་དམིགས་པའི་ཚུལ་གྱིས་བཟོད་པ་བསྒྲུབ་པར་བྱའོ།

བརྩོན་འགྲུས་རྩོམ་པ་ན་མི་དམིགས་པའི་ཚུལ་གྱིས་བརྩོན་འགྲུས་

བརྩམ་པར་བྱའོ།

ཏིང་ངེ་འཛིན་ལ་སྙོམས་པར་འཇུག་པ་ན་མི་དམིགས་པའི་ཚུལ་གྱིས་ཏིང་ངེ་འཛིན་ལ་སྙོམས་པར་འཇུག་པར་བྱའོ།

ཤེས་རབ་སྒོམ་པ་ན་མི་དམིགས་པའི་ཚུལ་གྱིས་ཤེས་རབ་བསྒོམ་པར་བྱ་སྟེ།

རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་དེ་བཞིན་ནོ།

གསོལ་པ།

བཅོམ་ལྡན་འདས་ཇི་ཙམ་གྱིས་ན་མི་དམིགས་པར་འགྱུར།

ཇི་ཙམ་གྱིས་ན་དམིགས་པར་འགྱུར་ལགས།

བཀའ་སྩལ་པ།

ཇི་ཙམ་དུ་གཉིས་ཡོད་པ་དེ་ཙམ་དུ་དམིགས་པ་སྟེ།

གཉིས་སུ་མེད་པ་ནི་མི་དམིགས་པའོ།

གསོལ་པ།

བཅོམ་ལྡན་འདས་གཉིས་ཞེས་བགྱི་བ་གང་ལགས།

བཀའ་སྩལ་པ།

མིག་དང་གཟུགས་ཀྱི་བར་དང་།

ཡིད་དང་ཆོས་ཀྱི་བར་དང་།

བྱང་ཆུབ་དང་།

སངས་རྒྱས་ཀྱི་བར་དུ་སྟེ།

རབ་འབྱོར་དེ་ནི་གཉིས་སོ།

གསོལ་པ།

བཅོམ་ལྡན་འདས་གཉིས་སུ་མ་མཆིས་པ་གང་ལགས།

བཀའ་སྩལ་པ།

མིག་དང་གཟུགས་ཀྱི་བར་དུ་མེད་པ་དང་།

ཡིད་དང་ཆོས་རྣམས་ཀྱི་བར་དུ་མེད་པ་དང་།

བྱང་ཆུབ་དང་སངས་རྒྱས་ཀྱི་བར་དུ་མེད་པ་སྟེ།

རབ་འབྱོར་དེ་ནི་གཉིས་སུ་མེད་པའོ།

གསོལ་པ།

བཅོམ་ལྡན་འདས་ཀྱི་དམིགས་སུ་མ་མཆིས་པ་མི་དམིགས་ལགས་སམ།

འོན་ཏེ་གཉིས་སུ་མཆིས་པ་མི་དམིགས་ལགས།

བཀའ་སྩལ་པ།

རབ་འབྱོར་དམིགས་སུ་ཡོད་པས་མི་དམིགས་པ་ཡང་མ་ཡིན།

དམིགས་སུ་མེད་པས་མི་དམིགས་པ་ཡང་མ་ཡིན་མོད་ཀྱི།

རབ་འབྱོར་འོན་ཀྱང་དམིགས་སུ་ཡོད་པ་དང་།

དམིགས་སུ་མེད་པ་མཉམ་པ་ཉིད་ནི་དམིགས་སུ་མེད་པ་ཡིན་ཏེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་དམིགས་པ་དང་།

དམིགས་པ་མེད་པ་མཉམ་པ་ཉིད་ལ་བསླབ་པར་བྱའོ།

དེ་ལྟར་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དམིགས་པ་མེད་པར་འགྱུར་རོ།

གསོལ་པ།

བཅོམ་ལྡན་འདས་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ།

དམིགས་པ་ལ་མི་ཆགས་ཤིང་།

མི་དམིགས་པ་ལ་ཡང་མི་ཆགས་པ་ལགས་ན།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས།

ཇི་ལྟར་ས་ནས་ས་ཡོངས་སུ་རྫོགས་པར་བགྱི།

ས་ནས་ས་ཡོངས་

སུ་རྫོགས་པར་བགྱིས་ནས་ཀྱང་ཇི་ལྟར་རྣམ་པ་ཐམས་ཅད་མཁྱེན་པ་ཉིད་ཐོབ་པར་བགྱི་ལགས།

བཀའ་སྩལ་པ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ནི་དམིགས་པ་ལ་གནས་ཤིང་ས་ནས་ས་ཡོངས་སུ་རྫོགས་པར་མི་བྱེད་དེ།

བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས།

དམིགས་པ་ལ་གནས་ནས།

ས་ནས་ས་ཡོངས་སུ་རྫོགས་པར་བྱེད་མི་ནུས་སོ།

དེ་ཅིའི་ཕྱིར་ཞེ་ན།

རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དམིགས་སུ་མེད་ལ།

བྱང་ཆུབ་ཀྱང་དམིགས་སུ་མེད་ཅིང་།

གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེ་ཡང་དམིགས་སུ་མེད་པའི་ཕྱིར་ཏེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ།

གསོལ་པ།

བཅོམ་ལྡན་འདས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དམིགས་སུ་མ་མཆིས།

བྱང་ཆུབ་ཀྱང་དམིགས་སུ་མ་མཆིས།

གང་བྱང་ཆུབ་ཀྱི་སླད་དུ་སྤྱོད་པ་དེ་ཡང་དམིགས་སུ་མ་མཆིས་ལགས་ན།

འོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པས་ངོ་བོ་ཉིད་དང་བྲལ་བའི་ཆོས་ཐམས་ཅད་ལ་འདི་ནི་གཟུགས་སོ།།

འདི་ནི་ཚོར་བའོ།

འདི་ནི་འདུ་ཤེས་སོ།

འདི་ནི་འདུ་བྱེད་རྣམས་སོ།

འདི་ནི་རྣམ་པར་ཤེས་པའོ།

འདི་ནི་བྱང་ཆུབ་ཀྱི་བར་རོ་ཞེས་ཇི་ལྟར་རབ་ཏུ་རྣམ་པར་དབྱེ་བར་བགྱི་ལགས།

བཀའ་སྩལ་པ།

རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཇི་ལྟར་བྱས་པས་གཟུགས་དམིགས་པ་དང་།

རྣམ་པར་ཤེས་པའི་བར་དུ་དམིགས་པ་དང་།

བྱང་ཆུབ་ཀྱི་བར་དུ་དམིགས་པར་འགྱུར་བ་དེ་ལྟར་ཆོས་རྣམས་ལ་རབ་ཏུ་རྣམ་པར་འབྱེད་པར་མི་བྱེད་དོ།

གསོལ་པ།

བཅོམ་ལྡན་འདས་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ།

གཟུགས་ཀྱང་མི་དམིགས།

རྣམ་པར་ཤེས་པའི་བར་དུ་ཡང་མི་དམིགས།

བྱང་ཆུབ་ཀྱི་བར་དུ་ཡང་མི་དམིགས་ལགས་ན།

འོ་ན་ཇི་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱིས་ཤིང་།

བྱང་ཆུབ་སེམས་དཔའི་སྐྱོན་མ་མཆིས་པར་འཇུག་པར་འགྱུར།

བྱང་ཆུབ་སེམས་དཔའི་སྐྱོན་མ་མཆིས་པར་ཞུགས་ནས་ཀྱང་སངས་རྒྱས་ཀྱི་ཞིང་ཡོངས་སུ་དག་པར་བགྱིད་པར་འགྱུར་ལགས།

སངས་རྒྱས་ཀྱི་ཞིང་ཡོངས་སུ་དག་པར་བགྱིས་ནས་ཀྱང་།

སེམས་ཅན་རྣམས་ཡོངས་སུ་སྨིན་པར་བགྱིད་པར་འགྱུར་ལགས།

སེམས་ཅན་རྣམས་ཡོངས་སུ་སྨིན་པར་བགྱིས་ནས་ཀྱང་རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་ལགས།

རྣམ་པ་ཐམས་ཅད་མཁྱེན་པ་ཉིད་རྗེས་སུ་ཐོབ་ནས་ཀྱང་།

ཆོས་ཀྱི་འཁོར་ལོ་བསྐོར་བར་འགྱུར་ལགས།

ཆོས་ཀྱི་འཁོར་ལོ་བསྐོར་ནས་ཀྱང་།

སངས་རྒྱས་ཀྱི་མཛད་པ་བགྱིད་པར་འགྱུར་ལགས།

སངས་རྒྱས་ཀྱི་མཛད་པ་བགྱིས་ནས་ཀྱང་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བགྱིད་པར་འགྱུར་ལགས།

བཀའ་སྩལ་པ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གཟུགས་ཀྱི་ཆེད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་སྤྱོད་དོ།

བྱང་ཆུབ་ཀྱི་བར་གྱི་ཆེད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་སྤྱོད་དོ།

གསོལ་པ།

བཅོམ་ལྡན་འདས་འོ་ན་གང་གི་ཆེད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ལགས།

བཀའ་སྩལ་པ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་གང་གི་ཆེད་དུ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་མི་བྱེད་དོ།

དེ་ཅིའི་ཕྱིར་ཞེ་ན།

རབ་འབྱོར་འདི་ལྟར་ཆོས་ཐམས་ཅད་ནི་མ་བྱས་པ།

ཆོས་ཐམས་ཅད་ནི་འགྱུར་བ་མེད་པ་སྟེ།

ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡང་མ་བྱས་པ་དང་འགྱུར་བ་མེད་པ་ཡིན་ལ།

བྱང་ཆུབ་ཀྱང་མ་བྱས་པ་དང་།

འགྱུར་བ་མེད་པ་ཡིན་ཞིང་།

བྱང་ཆུབ་སེམས་དཔའ་ཡང་མ་བྱས་པ་དང་།

འགྱུར་བ་མེད་པ་ཡིན་པའི་ཕྱིར་ཏེ།

རབ་འབྱོར་དེ་ལྟར་བྱང་ཆུབ་སེམས་དཔའ་ཆེན་པོས་མ་བྱས་པ་དང་།

འགྱུར་བ་མེད་པའི་ཚུལ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

གསོལ་པ།

བཅོམ་ལྡན་འདས་གལ་ཏེ་ཆོས་ཐམས་ཅད་མ་བགྱིས་པ་དང་།

འགྱུར་བ་མ་མཆིས་པ་ལགས་ན།

བཅོམ་ལྡན་འདས་འོ་ན་ཇི་ལྟར་ཐེག་པ་གསུམ་པོ་ཉན་ཐོས་ཀྱི་ཐེག་པ་དང་།

རང་སངས་རྒྱས་ཀྱི་ཐེག་པ་དང་།

སངས་རྒྱས་ཀྱི་ཐེག་པ་འདི་དག་རྣམ་པར་དགོད་པར་འགྱུར་ལགས།

བཀའ་སྩལ་པ།

རབ་འབྱོར་མ་བྱས་པ་དང་།

འགྱུར་

བ་མེད་པའི་ཆོས་རྣམས་ལ་ནི་རྣམ་པར་དགོད་པ་གང་ཡང་དམིགས་སུ་མེད་དེ་མངོན་པར་འདུས་བྱས་པ་དང་།

མངོན་པར་བསགས་པའི་ཆོས་རྣམས་ལ་ནི་རྣམ་པར་དགོད་པ་དམིགས་སུ་ཡོད་དོ།

དེ་ཅིའི་ཕྱིར་ཞེ་ན།

འདི་ལྟར་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ནི་ཕུང་པོ་ལྔ་ལ་མངོན་པར་ཞེན་ཏེ།

གཟུགས་ཀྱི་ཕུང་པོ་ལ་མངོན་པར་ཞེན་པར་བྱེད།

རྣམ་པར་ཤེས་པའི་ཕུང་པོའི་བར་ལ་མངོན་པར་ཞེན་པར་བྱེད།

རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་མངོན་པར་ཞེན་པར་བྱེད།

གཟུགས་ལ་རློམ་སེམས་སུ་བྱེད།

གཟུགས་ལ་དམིགས་པར་བྱེད།

བྱང་ཆུབ་ཀྱི་བར་ལ་རློམ་སེམས་སུ་བྱེད།

བྱང་ཆུབ་ཀྱི་བར་དུ་དམིགས་པར་བྱེད་པའི་ཕྱིར་ཏེ།

དེ་འདི་སྙམ་དུ་བདག་ནི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

བདག་གིས་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བྱའོ་སྙམ་དུ་སེམས་སོ།

དེ་ཅིའི་ཕྱིར་ཞེ་ན།

རབ་འབྱོར་འདི་ལྟར་གཟུགས་དང་།

བྱང་ཆུབ་ཀྱི་བར་གང་ཡིན་པ་དག་ནི་སངས་རྒྱས་རྣམས་ཀྱི་སྤྱན་ལྔས་ཀྱང་མ་དམིགས་ན་སྐྱེས་བུ་བླུན་པོ་སངས་རྒྱས་ལ་སྐུར་པ་འདེབས་པ་དེ་དག་ནི་སེམས་ཅན་རྣམས་འཁོར་བ་ལས་ཡོངས་སུ་ཐར་བར་བྱ་བར་འདོད་པའི་ཕྱིར་རོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་གལ་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྤྱན་ལྔས་ཀྱང་སེམས་ཅན་གང་དག་འཁོར་བ་ལས་ཡོངས་སུ་ཐར་བར་བགྱི་བ་དག་མ་དམིགས་ལགས་ན།

འོ་ན་ད་བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཇི་ལྟར་སེམས་ཅན་རྣམས་ཡང་དག་པ་ཉིད་དུ་ངེས་པ་དང་།

ལོག་པ་ཉིད་དུ་ངེས་པ་དང་།

མ་ངེས་པའི་ཕུང་པོ་གསུམ་དུ་ལུང་བསྟན་པར་མཛད་ལགས།

བཀའ་སྩལ་པ།

རབ་འབྱོར་ངས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡང་དག་པ་ཉིད་དུ་ངེས་པ་འམ།

ལོག་པ་ཉིད་དུ་ངེས་པ་འམ།

མ་ངེས་པའི་སེམས་ཅན་འགའ་ཡང་མ་དམིགས་མོད་ཀྱི།

རབ་འབྱོར་འོན་ཀྱང་སེམས་ཅན་རྫས་མེད་པ་ལ་རྫས་སུ་འདུ་ཤེས་པ་འདི་དག་ངས་འཇིག་རྟེན་གྱི་ཐ་སྙད་དུ་ཡང་དག་པ་མ་ཡིན་པ་ལ་འཛིན་པ་དེ་

ལས་བཟློག་གི་དོན་དམ་པར་ནི་མ་ཡིན་ནོ།

གསོལ་པ།

བཅོམ་ལྡན་འདས་དེ་བཞིན་གཤེགས་པས་དོན་དམ་པ་ལ་བཞུགས་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

འོ་ན་རྫུ་འཕྲུལ་གྱི་རྣམ་གྲངས་ལ་བཞུགས་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་གལ་ཏེ་དོན་དམ་པ་ལ་བཞུགས་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཡང་མ་ལགས་ལ།

རྫུ་འཕྲུལ་གྱི་རྣམ་གྲངས་ལ་བཞུགས་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཡང་མ་ལགས་ན།

བཅོམ་ལྡན་འདས་འོ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའམ།

གཅིག་ཏུ་མི་འགྱུར་ལགས་གྲང་།

བཀའ་སྩལ་པ།

རབ་འབྱོར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་པ་མ་ཡིན་ཏེ།

རབ་འབྱོར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་མོད་ཀྱི།

དེ་ནི་འདུས་བྱས་ཀྱི་ཁམས་སམ།

འདུས་མ་བྱས་ཀྱི་ཁམས་གང་ལ་ཡང་གནས་པ་མ་ཡིན་ནོ།

རབ་འབྱོར་འདི་ལྟ་སྟེ།

དཔེར་ན།

དེ་བཞིན་གཤེགས་པའི་སྤྲུལ་པ་ནི་འདུས་བྱས་ཀྱི་ཁམས་སམ།

འདུས་མ་བྱས་ཀྱི་ཁམས་གང་ལ་ཡང་མི་གནས་མོད་ཀྱི།

འོན་ཀྱང་དེ་བཞིན་གཤེགས་པའི་སྤྲུལ་པ་དེ་འགྲོ་བ་དང་།

འོང་བ་དང་།

སྡོད་པ་དང་།

འདུག་པ་ཡང་ཡོད་ལ།

དེ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་དང་།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་ཕ་རོལ་ཏུ་ཕྱིན་པ་དང་།

བརྩོན་

འགྲུས་ཀྱི་ཕ་རོལ་ཏུ་ཕྱིན་པ་དང་།

བསམ་གཏན་གྱི་ཕ་རོལ་ཏུ་ཕྱིན་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དང་།

བསམ་གཏན་བཞི་བསྒྲུབས་ཏེ་གནས་པ་དང་།

ཚད་མེད་པ་བཞི་དང་།

གཟུགས་མེད་པའི་སྙོམས་པར་འཇུག་པ་བཞི་དང་།

མངོན་པར་ཤེས་པ་ལྔ་དང་།

དྲན་པ་ཉེ་བར་གཞག་པ་བཞི་དང་།

འཕགས་པའི་ལམ་ཡན་ལག་བརྒྱད་པའི་བར་ལ་བསྒོམ་པ་དང་།

སྟོང་པ་ཉིད་ཀྱི་ཏིང་ངེ་འཛིན་དང་།

མཚན་མ་མེད་པའི་ཏིང་ངེ་འཛིན་དང་།

སྨོན་པ་མེད་པའི་ཏིང་ངེ་འཛིན་དང་།

ནང་སྟོང་པ་ཉིད་དང་།

རང་གི་མཚན་ཉིད་སྟོང་པ་ཉིད་ཀྱི་བར་དང་།

རྣམ་པར་ཐར་པ་བརྒྱད་དང་།

མཐར་གྱིས་གནས་པའི་སྙོམས་པར་འཇུག་པ་དགུ་དང་།

དེ་བཞིན་གཤེགས་པའི་སྟོབས་བཅུ་དང་།

མི་འཇིགས་པ་བཞི་དང་།

སོ་སོ་ཡང་དག་པར་རིག་པ་བཞི་དང་།

སྙིང་རྗེ་ཆེན་པོ་ལ་སྒོམ་ཞིང་།

ཆོས་ཀྱི་འཁོར་ལོ་བསྐོར་བར་གྱུར་ལ།

སྤྲུལ་པ་དེས་ཀྱང་སེམས་ཅན་དཔག་ཏུ་མེད་པ་དག་སྤྲུལ་ནས།

ཕུང་པོ་གསུམ་དུ་ལུང་བསྟན་པར་གྱུར་ན།

རབ་འབྱོར་འདི་ཇི་སྙམ་དུ་སེམས།

སྤྲུལ་པ་དེས་སེམས་ཅན་འགའ་ཡང་ཕུང་པོ་གསུམ་དུ་ལུང་བསྟན་པ་ཡོད་སྙམ་འམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཀའ་སྩལ་པ།

རབ་འབྱོར་དེ་བཞིན་དུ་དེ་བཞིན་གཤེགས་པས་ཆོས་ཐམས་ཅད་སྤྲུལ་པ་ལྟ་བུར་མཁྱེན་ཏེ།

སྤྲུལ་པ་དེ་ལྟ་བུར་མཁྱེན་ནས་སེམས་ཅན་གང་ཡང་བཏུལ་བ་མེད་དོ།

རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་སྤྲུལ་པ་ཇི་ལྟ་བ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བྱའོ།

གསོལ་པ།

བཅོམ་ལྡན་འདས་གལ་ཏེ་ཆོས་ཐམས་ཅད་སྤྲུལ་པ་ལྟ་བུ་ལགས་ན།

བཅོམ་ལྡན་འདས་དེ་བཞིན་གཤེགས་པ་དང་།

སྤྲུལ་པ་ལ་བྱེ་བྲག་ནི་ཅི་མཆིས།

ཐ་དད་དུ་བགྱི་བ་ནི་ཅི་མཆིས།

དགོངས་པ་ནི་གང་ལགས།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ།

རབ་འབྱོར་དེ་བཞིན་གཤེགས་པ་དང་།

དེ་བཞིན་གཤེགས་པའི་སྤྲུལ་པ་ནི་བྱེ་བྲག་ཅི་ཡང་མེད་དེ།

ཐ་དད་དུ་བྱ་བ་ཅི་ཡང་མི་དམིགས་སོ།

རབ་འབྱོར་དེ་བཞིན་གཤེགས་པ་དང་།

དེ་བཞིན་གཤེགས་པའི་

སྤྲུལ་པ་ནི་བྱེ་བྲག་མེད་དོ།

དེ་ཅིའི་ཕྱིར་ཞེ་ན།

འདི་ལྟར་དེ་བཞིན་གཤེགས་པ་ཕྲིན་ལས་གང་མཛད་པ་དེ་ནི་སྤྲུལ་པའང་བྱེད་པའི་ཕྱིར་རོ།

གསོལ་པ།

བཅོམ་ལྡན་འདས་ཀྱི་དེ་བཞིན་གཤེགས་པ་མི་བཞུགས་ན།

དེ་བཞིན་གཤེགས་པའི་སྤྲུལ་པ་སུག་ལས་བགྱིད་ལགས་སམ།

བཀའ་སྩལ་པ།

རབ་འབྱོར་བྱེད་དོ།

གསོལ་པ།

བཅོམ་ལྡན་འདས་དེ་བཞིན་གཤེགས་པ་མི་བཞུགས་ན།

དེ་བཞིན་གཤེགས་པའི་སྤྲུལ་པ་སུག་ལས་ཅི་ལྟར་བགྱིད་ལགས།

བཀའ་སྩལ་པ།

རབ་འབྱོར་འདི་ལྟ་སྟེ་དཔེར་ན།

དེ་བཞིན་གཤེགས་པ་བློ་གྲོས་ཞི་བས་བྱང་ཆུབ་སེམས་དཔའ་མ་དམིགས་ནས།

སྤྲུལ་པ་སྤྲུལ་ནས་ཡོངས་སུ་མྱ་ངན་ལས་འདས་སོ།

སྤྲུལ་པ་དེས་ཀྱང་ཕྱི་ན་བསྐལ་པ་ལས་ལྷག་པར་སངས་རྒྱས་ཀྱི་བྱ་བ་བྱས་ཏེ།

དེས་ཕྱིས་བྱང་ཆུབ་སེམས་དཔའ་ལུང་བསྟན་ནས་ཡོངས་སུ་མྱ་ངན་ལས་འདའོ།

ཞེས་སྐྱེ་བོ་རྣམས་ཀྱིས་ཀུན་ཏུ་ཤེས་ཀྱང་སྤྲུལ་པ་ལ་ནི་སྐྱེ་བ་མེད།

ཡོངས་སུ་མྱ་ངན་ལས་འདས་པ་ཡང་མེད་དེ།

རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟ་སྟེ།

ཆོས་ཐམས་ཅད་སྤྲུལ་པ་ལྟ་བུར་མོས་པར་བྱ་ཞིང་།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

གསོལ་པ།

བཅོམ་ལྡན་འདས་གལ་ཏེ་སྤྲུལ་པ་དང་།

དེ་བཞིན་གཤེགས་པ་ལ་བྱེ་བྲག་མ་མཆིས་ན།

སྦྱིན་པ་ཡོངས་སུ་སྦྱང་བར་ཡང་ཇི་ལྟར་འགྱུར་ལགས།

བཅོམ་ལྡན་འདས་སེམས་ཅན་གང་དག་གིས་དེ་བཞིན་གཤེགས་པ་ལ་ཡོན་ཕུལ་བ་དེ་དག་ནི་ཕུང་པོའི་ལྷག་མ་མ་མཆིས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པར་གྱུར་གྱི་བར་དུ་ནམ་ཡང་བས་པར་མི་འགྱུར་ལགས་ན།

བཅོམ་ལྡན་འདས་དེ་བཞིན་དུ་སེམས་ཅན་གང་དག་གིས་སྤྲུལ་པ་ལ་ཡོན་ཕུལ་བ་དེ་དག་ཀྱང་ཕུང་པོའི་ལྷག་མ་མ་མཆིས་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པར་གྱུར་གྱི་བར་དུ་ནམ་ཡང་བས་པར་མི་འགྱུར་བ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་ཆོས་ཉིད་གང་གིས་དེ་བཞིན་གཤེགས་པ་ལྷ་དང་བཅས་པའི་འཇིག་རྟེན་གྱི་སྦྱིན་པའི་གནས་སུ་གྱུར་པའི་ཆོས་ཉིད་དེ་ཉིད་ཀྱིས་སྤྲུལ་པ་ཡང་ལྷ་དང་བཅས་པའི་འཇིག་

རྟེན་གྱི་སྦྱིན་པའི་གནས་སུ་གྱུར་པ་ཡིན་ནོ།

རབ་འབྱོར་དེ་བཞིན་གཤེགས་པ་ལ་ཡོན་ཕུལ་བ་ལྟའང་ཞོག །

དེ་བཞིན་གཤེགས་པའི་སྤྲུལ་པ་ལ་ཡོན་ཕུལ་བ་ལྟའང་ཞོག་གི།

རབ་འབྱོར་རིགས་ཀྱི་བུའམ།

རིགས་ཀྱི་བུ་མོ་གང་ལ་ལ་ཞིག་གིས་བྱམས་པ་དང་ལྡན་པས་དེ་བཞིན་གཤེགས་པ་ཡིད་ལ་བྱེད་ན།

དེ་དག་ཐམས་ཅད་ནི་དགེ་བའི་རྩ་བ་དེའི་མཐར་མ་ཕྱིན་པར་སྡུག་བསྔལ་གྱི་མཐར་ཕྱིན་པར་འགྱུར་རོ།

རབ་འབྱོར་བྱམས་པ་དང་ལྡན་པའི་ཡིད་ལ་བྱེད་པ་ལྟའང་ཞོག་གི །

རིགས་ཀྱི་བུའམ།

རིགས་ཀྱི་བུ་མོ་གང་ལ་ལ་ཞིག་གིས་དེ་བཞིན་གཤེགས་པ་ཡིད་ལ་བྱས་ཤིང་ནམ་མཁའ་ལ་མེ་ཏོག་སྙིམ་པས་གཏོར་ན།

དེ་དག་ཐམས་ཅད་ཀྱང་དགེ་བའི་རྩ་བ་དེའི་མཐར་མ་ཕྱིན་པར་སྡུག་བསྔལ་གྱི་མཐར་ཕྱིན་པར་འགྱུར་རོ།

རབ་འབྱོར་བྱམས་པ་དང་ལྡན་པས་ཡིད་ལ་བྱེད་པ་ལྟའང་ཞོག །

ནམ་མཁའ་ལ་མེ་ཏོག་སྙིམ་པས་གཏོར་བ་ལྟའང་ཞོག་གི།

རབ་འབྱོར་རིགས་ཀྱི་བུའམ།

རིགས་ཀྱི་བུ་མོ་གང་ལ་ལ་ཞིག་སངས་རྒྱས་ལ་ཕྱག་འཚལ་བར་བྱེད་ན།

དེ་དག་ཐམས་ཅད་ཀྱང་རིམ་གྱིས་སྡུག་བསྔལ་གྱི་མཐར་ཕྱིན་པར་འགྱུར་ཏེ།

རབ་འབྱོར་དེ་ལྟར་དེ་བཞིན་གཤེགས་པ་ལ་ཡོན་ཕུལ་བ་ནི་དེ་ལྟར་མཐུ་ཆེ་བ་དང་།

དེ་ལྟར་ཕན་ཡོན་ཆེ་བ་ཡིན་ཏེ།

རབ་འབྱོར་རྣམ་གྲངས་དེས་ན་འདི་ལྟར་ཆོས་རྣམས་ཀྱི་ཆོས་ཀྱི་མཚན་ཉིད་ཚད་མར་བྱས་ན་དེ་བཞིན་གཤེགས་པ་དང་།

དེ་བཞིན་གཤེགས་པའི་སྤྲུལ་པ་ལ་བྱེ་བྲག་ཆུང་ཟད་ཀྱང་མེད་པར་རིག་པར་བྱ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

ཆོས་རྣམས་ཀྱི་ཆོས་ཉིད་ལ་ཞུགས་ནས།

ཆོས་ཉིད་དེ་ཡང་རྣམ་པར་དཀྲུགས་པར་མི་བྱ་སྟེ།

འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ།

འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཉིད་དོ་ཞེས་རྣམ་པར་དཀྲུགས་པར་མི་བྱའོ།

ཆོས་ཐམས་ཅད་ཀྱི་བར་དག་ལ་ཡང་དེ་བཞིན་དུ་སྦྱར་བར་བྱའོ།

གསོལ་པ།

བཅོམ་ལྡན་འདས་གལ་ཏེ་ཆོས་རྣམས་ཀྱི་ཆོས་ཉིད་རྣམ་པར་དཀྲུགས་པར་མི་བགྱི་ལགས་ན།

བཅོམ་ལྡན་འདས་གང་གི་སླད་དུ་དེ་བཞིན་གཤེགས་པས་འདི་ནི་གཟུགས་སོ།

འདི་ནི་རྣམ་པར་ཤེས་པའི་བར་རོ་ཞེས་བགྱི་བ་དང་།

དེ་བཞིན་དུ་

ནང་དང་ཕྱིའི་ཆོས་རྣམས་ཀྱང་བཀའ་སྩལ།

དེ་བཞིན་དུ་དགེ་བ་དང་།

མི་དགེ་བ་དང་།

ཟག་པ་དང་བཅས་པ་དང་།

ཟག་པ་མ་མཆིས་པ་དང་།

འཇིག་རྟེན་པ་དང་།

འཇིག་རྟེན་ལས་འདས་པ་དང་།

ཐུན་མོང་དང་།

ཐུན་མོང་མ་ལགས་པ་དང་།

འདུས་བྱས་དང་།

འདུས་མ་བྱས་ཀྱི་ཆོས་རྣམས་ཀྱང་བཀའ་སྩལ་ཏེ།

རྣམ་པར་དཀྲུགས་པར་མཛད་ན།

དེའི་སླད་དུ།

བཅོམ་ལྡན་འདས་ཀྱིས་ཆོས་རྣམས་ཀྱི་ཆོས་ཉིད་རྣམ་པར་དཀྲུགས་པར་མ་གྱུར་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ཏེ།

ངས་ནི་ཇི་ལྟར་གཞན་དག་གིས་ཁོང་དུ་ཆུད་པར་འགྱུར་ཞེས་མིང་དང་མཚན་མས་ཆོས་རྣམས་ཀྱི་ཆོས་ཉིད་བསྟན་ཏེ།

ཆོས་རྣམས་བརྗོད་པར་ཟད་ཀྱི།

ཆོས་རྣམས་ཀྱི་ཆོས་ཉིད་རྣམ་པར་དཀྲུགས་པ་ནི་མ་ཡིན་ནོ།

གསོལ་པ།

བཅོམ་ལྡན་འདས་གལ་ཏེ་གཞན་དག་གིས་ཁོང་དུ་ཆུད་པར་བགྱི་བའི་སླད་དུ།

བཅོམ་ལྡན་འདས་ཀྱིས་མིང་དང་མཚན་མས་ཆོས་རྣམས་ཀྱི་ཆོས་ཉིད་བསྟན་ཏེ།

ཆོས་རྣམས་བརྗོད་པ་མཛད་ན།

བཅོམ་ལྡན་འདས་མིང་མ་མཆིས་པ་དང་།

མཚན་མ་མ་མཆིས་པའི་ཆོས་རྣམས་ཇི་ལྟར་མིང་དང་མཚན་མས་བརྗོད་པ་མཛད་ལགས།

བཀའ་སྩལ་པ།

རབ་འབྱོར་བརྗོད་པ་ནི་མིང་དང་མཚན་མ་ལ་མངོན་པར་ཞེན་པ་མ་ཡིན་གྱི།

རབ་འབྱོར་གཞན་དུ་ན་སྡུག་བསྔལ་ཉིད་བརྗོད་པར་ཟད་དེ།

མིང་དང་མཚན་མ་ལ་མངོན་པར་ཞེན་པ་མེད་དོ།

རབ་འབྱོར་དེ་བཞིན་གཤེགས་པ་དང་།

དེ་བཞིན་གཤེགས་པའི་ཉན་ཐོས་ནི་མིང་དང་མཚན་མ་ལ་མངོན་པར་ཞེན་པ་མེད་དོ།

རབ་འབྱོར་གལ་ཏེ་མིང་ལ་མིང་མངོན་པར་ཞེན་པར་འགྱུར་རམ།

མཚན་མ་ལ་མཚན་མ་མངོན་པར་ཞེན་པར་འགྱུར་ན་ནི།

སྟོང་པ་ཉིད་ཀྱང་སྟོང་པ་ཉིད་ལ་མངོན་པར་ཞེན་པར་འགྱུར་ལ།

མཚན་མ་མེད་པ་ཡང་མཚན་མ་མེད་པ་ལ་མངོན་པར་ཞེན་པར་འགྱུར།

སྨོན་པ་མེད་པ་ཡང་སྨོན་པ་མེད་པ་ལ་མངོན་པར་ཞེན་པར་འགྱུར།

དེ་བཞིན་ཉིད་ཀྱང་དེ་བཞིན་ཉིད་ལ་མངོན་པར་ཞེན་པར་འགྱུར།

ཡང་དག་པའི་མཐའ་ཡང་ཡང་དག་པའི་མཐའ་ལ་མངོན་པར་ཞེན་པར་འགྱུར།

ཆོས་ཀྱི་དབྱིངས་ཀྱང་ཆོས་ཀྱི་དབྱིངས་ལ་མངོན་པར་ཞེན་པར་འགྱུར།

འདུས་མ་བྱས་ཀྱང་འདུས་མ་བྱས་ལ་

མངོན་པར་ཞེན་པར་འགྱུར་བ་ཞིག་ན།

རབ་འབྱོར་འདི་ལྟར་ཆོས་ཐམས་ཅད་ནི་མིང་ཙམ་དུ་ཟད་པས།

དེ་དག་མིང་ཙམ་ལ་གནས་པར་མི་འགྱུར་ཏེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་མིང་དང་མཚན་མ་ཙམ་ལགས་ཏེ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱ་ཞིང་།

དེ་ལ་ཡང་མངོན་པར་ཞེན་པར་མི་བྱའོ།

གསོལ་པ།

བཅོམ་ལྡན་འདས་གལ་ཏེ་ཆོས་ཐམས་ཅད་མིང་དང་མཚན་མ་ཙམ་དུ་བས་པ་ལགས་ན།

འོ་ན་བྱང་ཆུབ་སེམས་དཔའ་སེམས་དཔའ་ཆེན་པོས་གང་གི་ཆེད་དུ་བྱང་ཆུབ་ཏུ་སེམས་སྐྱེད་པར་བགྱིད་ཅིང་།

བྱང་ཆུབ་ཏུ་སེམས་བསྐྱེད་ནས་ཀྱང་འདུ་བྱེད་སྣ་ཚོགས་རྣམ་པ་དུ་མ་ཉམས་སུ་མྱོང་བར་འགྱུར་བ་དང་།

བྱང་ཆུབ་སེམས་དཔའི་སྤྱད་པ་སྤྱོད་ཅིང་སྦྱིན་པ་རྩོལ་བ་དང་།

ཚུལ་ཁྲིམས་སྲུང་བ་དང་།

བཟོད་པ་སྒྲུབ་པ་དང་།

བརྩོན་འགྲུས་རྩོམ་པ་དང་།

ཏིང་ངེ་འཛིན་ལ་སྙོམས་པར་འཇུག་པ་དང་།

ཤེས་རབ་སྒོམ་པ་དང་།

སྟོང་པ་ཉིད་ལ་སྒོམ་པ་དང་།

བསམ་གཏན་དང་།

ཚད་མ་མཆིས་པ་དང་།

གཟུགས་མ་མཆིས་པའི་སྙོམས་པར་འཇུག་པ་རྣམས་ལ་གནས་པ་དང་།

དྲན་པ་ཉེ་བར་གཞག་པ་རྣམས་ལ་གནས་པ་དང་།

ཡང་དག་པར་སྤོང་བ་རྣམས་ལ་གནས་པ་དང་།

རྣམ་པར་ཐར་པའི་སྒོ་སྟོང་པ་ཉིད་དང་།

མཚན་མ་མ་མཆིས་པ་དང་།

སྨོན་པ་མ་མཆིས་པ་ལ་གནས་པ་དང་།

དེ་བཞིན་གཤེགས་པའི་སྟོབས་བཅུ་ལ་གནས་པ་དང་།

སྙིང་རྗེ་ཆེན་པོའི་བར་དག་ཡོངས་སུ་རྫོགས་པར་བགྱིད་པ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་ཁྱོད་གང་འདི་སྐད་དུ་གལ་ཏེ་ཆོས་ཐམས་ཅད་མིང་དང་མཚན་མ་ཙམ་དུ་བས་ན།

འོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་གི་ཆེད་དུ་བྱང་ཆུབ་སེམས་དཔའི་སྤྱད་པ་སྤྱོད་པར་བགྱིད་ཅེས་ཟེར་བ་ནི།

རབ་འབྱོར་འདི་ལྟར་འདུས་བྱས་འདི་དག་ཐམས་ཅད་མིང་དང་མཚན་མ་ཙམ་དུ་ཟད་ལ།

མིང་དང་མཚན་མ་དེ་དག་ཀྱང་མིང་དང་མཚན་མས་སྟོང་སྟེ།

དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་ཅིང་།

རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་དོ།

རྣམ་པ་ཐམས་ཅད་མཁྱེན་པ་ཉིད་ཐོབ་ནས་ཀྱང་།

ཆོས་ཀྱི་འཁོར་ལོ་སྐོར་བར་བྱེད་ལ།

ཆོས་ཀྱི་

འཁོར་ལོ་བསྐོར་ནས་ཀྱང་།

སེམས་ཅན་རྣམས་ཐེག་པ་གསུམ་པོ་དག་གིས་ཡོངས་སུ་མྱ་ངན་ལས་འདའ་བར་བྱེད་ཀྱང་།

མིང་དང་མཚན་མ་དེ་དག་སྐྱེ་བ་ཡང་མེད།

འཇིག་པ་ཡང་མེད།

གནས་པ་ཡང་མེད།

གནས་པ་ལས་གཞན་དུ་འགྱུར་བ་ཡང་མེད་ཅིང་མི་དམིགས་སོ།

གསོལ་པ།

བཅོམ་ལྡན་འདས་རྣམ་པ་ཐམས་ཅད་མཁྱེན་པ་ཉིད་ལ་རྣམ་པ་ཐམས་ཅད་མཁྱེན་པ་ཉིད་ཅེས་གསུང་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ལ་རྣམ་པ་ཐམས་ཅད་མཁྱེན་པ་ཉིད་ཅེས་ང་སྨྲའོ།

གསོལ་པ།

བཅོམ་ལྡན་འདས་དེ་བཞིན་གཤེགས་པས་ཐམས་ཅད་ཤེས་པ་ཉིད་ཀྱང་བཀའ་སྩལ་ཅིང་།

དེ་བཞིན་གཤེགས་པས་ལམ་གྱི་རྣམ་པ་ཤེས་པ་ཉིད་ཅེས་མདོར་ཡང་བཀའ་སྩལ་ལ།

དེ་བཞིན་གཤེགས་པས་རྣམ་པ་ཐམས་ཅད་མཁྱེན་པ་ཉིད་ཀྱང་བཀའ་སྩལ་ལགས་ན།

བཅོམ་ལྡན་འདས་ཐམས་ཅད་མཁྱེན་པ་ཉིད་གསུམ་པོ་འདི་དག་ལ་བྱེ་བྲག་ནི་ཅི་མཆིས་ཐ་དད་དུ་བགྱི་བ་ནི་ཅི་མཆིས་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་ཐམས་ཅད་ཤེས་པ་ཉིད་ནི་ཉན་ཐོས་དང་།

རང་སངས་རྒྱས་ཐམས་ཅད་ཀྱིའོ།

རབ་འབྱོར་ལམ་གྱི་རྣམ་པ་ཤེས་པ་ཉིད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིའོ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིའོ།

གསོལ་པ།

བཅོམ་ལྡན་འདས་ཅིའི་སླད་དུ་རྣམ་པ་ཐམས་ཅད་མཁྱེན་པ་ཉིད་ནི་དེ་བཞིན་གཤེགས་པ་རྣམས་ཀྱི་ལགས།

ཅིའི་སླད་དུ་ལམ་གྱི་རྣམ་པ་ཤེས་པ་ཉིད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལགས།

ཅིའི་སླད་དུ་ཐམས་ཅད་ཤེས་པ་ཉིད་ནི་ཉན་ཐོས་དང་།

རང་སངས་རྒྱས་རྣམས་ཀྱི་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་ཕྱི་ནང་གི་ཆོས་གང་དག་ཇི་སྙེད་པ་དེ་དག་ཐམས་ཅད་ནི་ཉན་ཐོས་དང་།

རང་སངས་རྒྱས་རྣམས་ཀྱིས་ཀྱང་ཤེས་ལ།

ལམ་ཐམས་ཅད་དང་།

རྣམ་པ་ཐམས་ཅད་ནི་མ་ཡིན་པའི་ཕྱིར་རོ།

རབ་འབྱོར་གང་ཡང་ཁྱོད་འདི་སྐད་དུ།

བཅོམ་ལྡན་འདས་ཅིའི་

སླད་དུ་ལམ་གྱི་རྣམ་པ་ཤེས་པ་ཉིད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ལགས་ཞེས་ཟེར་བ་ནི།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་ནི་ལམ་ཐམས་ཅད་བསྐྱེད་པར་བྱ་ཞིང་།

ལམ་ཐམས་ཅད་ཤེས་པར་བྱ་དགོས་ཏེ།

ཉན་ཐོས་དང་།

རང་སངས་རྒྱས་ཀྱི་ལམ་གང་ཡིན་པ་དང་།

བྱང་ཆུབ་སེམས་དཔའི་ལམ་གང་ཡིན་པའི་ལམ་དེ་དག་ཀྱང་ཡོངས་སུ་རྫོགས་པར་བྱ་དགོས་ལ།

ལམ་དེ་དག་གིས་ལམ་གྱི་བྱ་བ་བྱེད་ཀྱང་ཡང་དག་པའི་མཐའ་རྟོགས་པར་ནི་མི་བྱེད་དོ།

གསོལ་པ།

བཅོམ་ལྡན་འདས་ཅི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ལམ་ཡོངས་སུ་རྫོགས་པར་མི་འགྱུར་ཞིང་།

དེས་ཡང་དག་པའི་མཐའ་ཡང་མངོན་སུམ་དུ་མི་བགྱིད་ལགས་སམ།

བཀའ་སྩལ་པ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་སངས་རྒྱས་ཀྱི་ཞིང་ཡོངས་སུ་དག་པར་མ་བྱས་ཤིང་།

སེམས་ཅན་རྣམས་ཡོངས་སུ་སྨིན་པར་མ་བྱས་པར་ཡང་དག་པའི་མཐའ་མངོན་སུམ་དུ་མི་བྱའོ།

གསོལ་པ།

བཅོམ་ལྡན་འདས་ཅི་བྱང་ཆུབ་སེམས་དཔའ་སེམས་དཔའ་ཆེན་པོས་ལམ་ལ་གནས་ཏེ།

ཡང་དག་པའི་མཐའ་མངོན་སུམ་དུ་བགྱིད་ལགས་སམ།

བཀའ་སྩལ་པ།

དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ལམ་མ་ལགས་པ་ལ་གནས་ཏེ་ལགས་སམ།

བཀའ་སྩལ་པ།

དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ལམ་དང་ལམ་མ་ལགས་པ་ལ་གནས་ཏེ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ལམ་ཡང་མ་ལགས།

ལམ་མ་ལགས་པ་ཡང་མ་ལགས་པ་ལ་གནས་ཏེ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་དག་པའི་མཐའ་མངོན་སུམ་དུ་བགྱི་ལགས།

བཀའ་སྩལ་པ།

རབ་འབྱོར་འདི་ཇི་སྙམ་དུ་སེམས།

ཁྱོད་ལམ་ལ་གནས་ཏེ།

ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་སྙམ་འམ།

རབ་འབྱོར་གྱིས་གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཀའ་སྩལ་པ།

འོ་ན་ལམ་མ་ཡིན་པ་ལ་གནས་ཏེའམ།

རབ་འབྱོར་གྱིས་གསོལ་པ།

དེ་ནི་མ་ལགས་སོ།

བཀའ་སྩལ་པ།

འོ་ན་ལམ་དང་།

ལམ་མ་ཡིན་པ་ལ་གནས་ཏེའམ།

རབ་འབྱོར་གྱིས་གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཀའ་སྩལ་པ།

འོ་ན་ཁྱོད་ལམ་ཡང་མ་ཡིན།

ལམ་མ་ཡིན་པ་ཡང་མ་ཡིན་པ་ལ་གནས་ཏེ།

ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལམ།

རབ་འབྱོར་གྱིས་གསོལ་པ།

བཅོམ་ལྡན་འདས་དེ་ནི་མ་ལགས་ཏེ།

བཅོམ་ལྡན་འདས་བདག་ནི་གང་ལ་གནས་ཏེ་ཡང་ཟག་པ་རྣམས་ལས་སེམས་རྣམ་པར་གྲོལ་བ་མ་ལགས་ཀྱི།

བཅོམ་ལྡན་འདས་བདག་གི་སེམས་ནི་ཇི་ལྟར་གང་ལ་ཡང་མི་གནས་པས་སེམས་རྣམ་པར་གྲོལ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་ཅི་ལ་ཡང་མི་གནས་པར་ཡང་དག་པའི་མཐའ་མངོན་སུམ་དུ་བྱའོ།

རབ་འབྱོར་གང་ཡང་རྣམ་པ་ཐམས་ཅད་མཁྱེན་པ་ཉིད་རྣམ་པ་ཐམས་ཅད་མཁྱེན་པ་ཉིད་ཅེས་བྱ་བ་ནི་རྣམ་པ་གཅིག་གིས་རྣམ་པ་ཐམས་ཅད་མཁྱེན་པ་ཉིད་ཅེས་བྱ་སྟེ་འདི་ལྟར་ཞི་བའི་རྣམ་པས་སོ།

རབ་འབྱོར་ཡང་རྣམ་པ་གང་དག་དང་།

རྟགས་གང་དག་དང་།

མཚན་མ་གང་དག་གིས་ཆོས་རྣམས་སྟོང་ཞེས་བྱ་བར་བརྗོད་པའི་རྣམ་པ་དེ་དག་དང་།

རྟགས་དེ་དག་དང་།

མཚན་མ་དེ་དག་ཐམས་ཅད་དེ་བཞིན་གཤེགས་པས་ཐུགས་སུ་ཆུད་པས།

དེའི་ཕྱིར་རྣམ་པ་ཐམས་ཅད་མཁྱེན་པ་ཉིད་ཅེས་བྱའོ།

གསོལ་པ།

བཅོམ་ལྡན་འདས་ཐམས་ཅད་ཤེས་པ་ཉིད་དང་།

ལམ་གྱི་རྣམ་པ་ཤེས་པ་ཉིད་དང་།

རྣམ་པ་ཐམས་ཅད་མཁྱེན་པ་ཉིད་གང་ལགས་པའི་ཐམས་ཅད་མཁྱེན་པ་ཉིད་གསུམ་པོ་འདི་དག་ལས་འདིའི་སྤང་བ་ནི་ལྷག་མ་དང་བཅས་པའོ།

འདིའི་སྤོང་བ་ནི་ལྷག་མ་མ་མཆིས་པའོ་ཞེས་བགྱི་བར་ཉོན་མོངས་པ་སྤང་བ་ལ་ཐ་དད་དུ་བགྱི་བ་མཆིས་ལགས་སམ།

བཀའ་སྩལ་པ།

རབ་འབྱོར་ཉོན་མོངས་པ་སྤང་བ་ལ་ནི་ཐ་དད་པ་མེད་མོད་ཀྱི།

དེ་བཞིན་གཤེགས་པ་ནི་བག་ཆགས་ཀྱི་མཚམས་སྦྱོར་བ་ཐམས་ཅད་སྤངས་པ་ཡིན་ནོ།

ཉན་

ཐོས་དང་།

རང་སངས་རྒྱས་ནི་བག་ཆགས་ཀྱི་མཚམས་སྦྱོར་བ་ཐམས་ཅད་སྤངས་པ་མ་ཡིན་ནོ།

གསོལ་པ།

བཅོམ་ལྡན་འདས་རྣམ་པ་ཐམས་ཅད་མཁྱེན་པ་ཉིད་མ་ཐོབ་པར་ཉོན་མོངས་པ་སྤངས་པ་འདུས་མ་བགྱིས་ལགས་སམ།

བཀའ་སྩལ་པ།

རབ་འབྱོར་དེ་དེ་བཞིན་ནོ།

གསོལ་པ།

བཅོམ་ལྡན་འདས་འདུས་མ་བགྱིས་ལ་བྱེ་བྲག་དམིགས་སུ་མཆིས་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་ནི་མ་ཡིན་ཏེ།

འདུས་མ་བྱས་ལ་ནི་བྱེ་བྲག་དམིགས་སུ་མེད་དོ།

གསོལ་པ།

བཅོམ་ལྡན་འདས་གལ་ཏེ་འདུས་མ་བགྱིས་ལ་བྱེ་བྲག་དམིགས་སུ་མ་མཆིས་ན།

ཅིའི་སླད་དུ་བཅོམ་ལྡན་འདས་ཀྱིས་འདི་སྐད་དུ་འདི་ནི་བག་ཆགས་ཀྱི་མཚམས་སྦྱོར་བ་སྤངས་པ་ཡིན་ནོ།

འདི་ནི་བག་ཆགས་ཀྱི་མཚམས་སྦྱོར་བ་སྤངས་པ་མ་ཡིན་ནོ་ཞེས་བཀའ་སྩལ་ལགས།

བཀའ་སྩལ་པ།

རབ་འབྱོར་བག་ཆགས་ཀྱི་མཚམས་སྦྱོར་བ་ནི་ཉོན་མོངས་པ་མ་ཡིན་ཏེ།

ཉན་ཐོས་དང་།

རང་སངས་རྒྱས་དེ་དག་ལ་འདོད་ཆགས་དང་།

ཞེ་སྡང་དང་།

གཏི་མུག་དང་བྲལ་བ་ཡང་ཡོད་མོད་ཀྱི།

ལུས་ཀྱི་འགྱུར་བ་ཡང་འབྱུང་སྟེ།

དེ་དག་ནི་བྱིས་པ་སོ་སོའི་སྐྱེ་བོ་རྣམ་ལ་ཡང་གནོད་པར་མི་འགྱུར་ལ།

ཉན་ཐོས་རྣམས་ལ་ཡང་མ་ཡིན་ཏེ།

དེ་དག་ནི་དེ་བཞིན་གཤེགས་པ་ལ་མི་མངའོ།

དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་གལ་ཏེ་ལམ་ཡང་དངོས་པོ་མ་མཆིས་ལ།

མྱ་ངན་ལས་འདས་པ་ཡང་དངོས་པོ་མ་མཆིས་ན།

ཅིའི་སླད་དུ་འདི་ནི་རྒྱུན་ཏུ་ཞུགས་པའོ།

འདི་ནི་ལན་ཅིག་ཕྱིར་འོང་བའོ།

འདི་ནི་ཕྱིར་མི་འོང་བའོ།

འདི་ནི་དགྲ་བཅོམ་པའོ།

འདི་ནི་རང་སངས་རྒྱས་སོ་ཞེས་བཤད་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་རྒྱུན་ཏུ་ཞུགས་པ་གང་ཡིན་པ་དང་།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བར་གང་ཡིན་པ་དེ་དག་ཐམས་ཅད་ནི་འདུས་མ་བྱས་ཀྱིས་རབ་ཏུ་ཕྱེ་བ་ཡིན་ནོ།

གསོལ་པ།

བཅོམ་ལྡན་འདས་ཇི་འདུས་མ་བགྱིས་དེ།

འདི་ནི་རྒྱུན་དུ་ཞུགས་པའོ།

འདི་ནི་དེ་བཞིན་གཤེགས་པ་དགྲ་བཅོམ་པ་ཡང་

དག་པར་རྫོགས་པའི་སངས་རྒྱས་ཀྱི་བར་དག་ལགས་སོ་ཞེས་རབ་ཏུ་འབྱེད་པར་བགྱིད་ལགས་སམ།

བཀའ་སྩལ་པ།

རབ་འབྱོར་འདུས་མ་བྱས་ནི་རབ་ཏུ་འབྱེད་པར་མི་བྱེད་མོད་ཀྱི་འོན་ཀྱང་འཇིག་རྟེན་གྱི་ཐ་སྙད་ཚད་མར་བྱས་ཏེ་བརྗོད་པར་ཟད་ཀྱི།

དོན་དམ་པར་ནི་རབ་ཏུ་དབྱེ་བར་མི་ནུས་སོ།

དེ་ཅིའི་ཕྱིར་ཞེ་ན།

འདི་ལྟར་དེ་ལ་ཚིག་གི་ལམ་གྱིས་གདགས་སུ་མེད་པའི་ཕྱིར་རོ།

གསོལ་པ།

བཅོམ་ལྡན་འདས་ཕྱི་མའི་མཐའ་ཇི་ལྟར་གདགས་ལགས།

བཀའ་སྩལ་པ།

རབ་འབྱོར་འཇིག་རྟེན་གྱི་ཐ་སྙད་ཚད་མར་བྱས་ཏེ།

གང་དང་གང་དག་གིས་མཐའ་ཆད་པ་དེ་དང་དེ་དག་ལ་ཕྱི་མའི་མཐའ་གདགས་ཀྱི།

དོན་དམ་པར་ནི་མ་ཡིན་ནོ།

གསོལ་པ།

བཅོམ་ལྡན་འདས་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པ་ལ་སྔོན་གྱི་མཐའ་ཡང་མི་དམིགས་ལགས་ན།

ཕྱི་མའི་མཐའ་ལྟ་སྨོས་ཀྱང་ཅི་འཚལ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

ཆོས་ཐམས་ཅད་རང་གི་མཚན་ཉིད་ཀྱིས་སྟོང་པ་ལ་སྔོན་གྱི་མཐའ་ཡང་མི་དམིགས་ན།

ཕྱི་མའི་མཐའ་ལྟ་སྨོས་ཀྱང་ཅི་དགོས་ཏེ།

དེ་ནི་གནས་མེད་དོ།

རབ་འབྱོར་འོན་ཀྱང་སེམས་ཅན་གང་དག་གིས་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་མི་ཤེས་པ་དེ་དག་ལ་འདི་ནི་སྔོན་གྱི་མཐའོ།

འདི་ནི་ཕྱི་མའི་མཐའོ།

ཞེས་བསྟན་པར་ཟད་ཀྱི།

རབ་འབྱོར་རང་གི་མཚན་ཉིད་ཀྱིས་སྟོང་པའི་ཆོས་རྣམས་ལ་ནི་སྔོན་གྱི་མཐའ་དང་།

ཕྱི་མའི་མཐའ་དམིགས་སུ་མེད་དེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རང་གི་མཚན་ཉིད་ཀྱིས་སྟོང་པའི་ཆོས་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

རང་གི་མཚན་ཉིད་ཀྱིས་སྟོང་པའི་ཆོས་རྣམས་ལ་སྤྱོད་པ་ནི་ནང་ངམ།

ཕྱིའམ།

འདུས་བྱས་སམ།

འདུས་མ་བྱས་སམ།

ཉན་ཐོས་ཀྱི་ཆོས་རྣམས་སམ།

རང་སངས་རྒྱས་ཀྱི་ཆོས་རྣམས་སམ།

གང་ལ་ཡང་མངོན་པར་ཞེན་པར་མི་འགྱུར་རོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བགྱི་ན།

བཅོམ་ལྡན་འདས་ཅིའི་སླད་དུ་ཤེས་རབ་

ཀྱི་ཕ་རོལ་ཏུ་ཕྱིན་པ་ཞེས་བགྱི་ལགས།

བཀའ་སྩལ་པ།

རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་ཐམས་ཅད་ཀྱི་ཕ་རོལ་དམ་པ་སྟེ།

དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ།

རབ་འབྱོར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ཉན་ཐོས་དང་།

རང་སངས་རྒྱས་ཐམས་ཅད་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དང་།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཆོས་ཐམས་ཅད་ཀྱི་ཕ་རོལ་ཏུ་སོན་པས་ན།

དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ།

རབ་འབྱོར་ཡང་དོན་དམ་པར་ཆོས་ཐམས་ཅད་དབྱེར་མེད་པའི་དོན་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་དེ་བཞིན་གཤེགས་པ་རྣམས་ཀྱིས་མངོན་པར་རྫོགས་པར་སངས་རྒྱས་ཏེ།

དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ།

རབ་འབྱོར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་དེ་བཞིན་ཉིད་ཀྱང་ཆུད།

ཡང་དག་པའི་མཐའ་ཡང་ཆུད།

ཆོས་ཀྱི་དབྱིངས་ཀྱང་ཆུད་པས།

དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ།

རབ་འབྱོར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་གང་དང་ཡང་ལྡན་པ་ཡང་མ་ཡིན།

མི་ལྡན་པ་ཡང་མ་ཡིན།

བསྟན་དུ་ཡོད་པའམ།

བསྟན་དུ་མེད་པའམ།

ཐོགས་པ་དང་བཅས་པའམ།

ཐོགས་པ་མེད་པ་ཡང་མ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཟུགས་མེད་པ།

བསྟན་དུ་མེད་པ།

ཐོགས་པ་མེད་པ་སྟེ།

འདི་ལྟར་མཚན་ཉིད་མེད་པར་མཚན་ཉིད་གཅིག་པའི་ཕྱིར་རོ།

རབ་འབྱོར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་ཐམས་ཅད་ལ་སྤྱོད་པར་བྱེད་ཅིང་།

སྤོབས་པ་ཐམས་ཅད་དང་།

སྣང་བ་ཐམས་ཅད་སྦྱིན་པར་བྱེད་པ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་བདུད་དམ།

བདུད་ཀྱི་རིས་ཀྱི་ལྷ་རྣམས་དང་།

ཉན་ཐོས་དང་།

རང་སངས་རྒྱས་ཀྱི་ཐེག་པ་པའི་གང་ཟག་རྣམས་ཀྱིས་མི་ཆོད་དེ།

ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཞན་མུ་སྟེགས་ཅན་ཕྱིར་རྒོལ་བའི་བར་དག་གིས་ཀྱང་ཆོད་པར་མི་ནུས་སོ།

དེ་ཅིའི་ཕྱིར་ཞེ་ན།

རབ་འབྱོར་

འདི་ལྟར་གཅོད་པར་བྱེད་པ་གང་ཡིན་པ་དང་།

གང་གི་གཅད་པ་དང་།

གཅད་པ་གང་ཡིན་པ་དེ་དག་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་དམིགས་པའི་ཕྱིར་ཏེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་སྤྱད་པར་བྱའོ།

རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་འདི་ལྟར་སྤྱད་པར་བྱ་སྟེ།

འདི་ལྟ་སྟེ་མི་རྟག་པའི་དོན་ལ་སྤྱད་པར་བྱའོ།

སྡུག་བསྔལ་གྱི་དོན་ལ་སྤྱད་པར་བྱའོ།

བདག་མེད་པའི་དོན་ལ་སྤྱད་པར་བྱའོ།

སྡུག་བསྔལ་ཤེས་པའི་དོན་དང་།

ཀུན་འབྱུང་བ་ཤེས་པའི་དོན་དང་།

འགོག་པ་ཤེས་པའི་དོན་དང་།

ལམ་ཤེས་པའི་དོན་དང་།

ཟད་པ་ཤེས་པའི་དོན་དང་།

མི་སྐྱེ་བ་ཤེས་པའི་དོན་ལ་སྤྱད་པར་བྱའོ།

ཆོས་ཤེས་པའི་དོན་དང་།

རྗེས་སུ་རྟོགས་པ་ཤེས་པའི་དོན་དང་།

ཀུན་རྫོབ་ཤེས་པའི་དོན་དང་།

ཡོངས་སུ་འདྲིས་པ་ཤེས་པའི་དོན་དང་།

སྒྲ་ཇི་བཞིན་ཤེས་པའི་དོན་དང་།

ཡང་དག་པ་ཇི་ལྟ་བ་བཞིན་ཤེས་པའི་དོན་ལ་སྤྱད་པར་བྱ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་དོན་དང་ཚུལ་གྱིས་སྤྱད་པར་བྱའོ།

དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་དོན་དང་།

དོན་མ་ལགས་པ་དམིགས་སུ་མ་མཆིས་པ་ལགས་ན།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་སྤྱད་པར་བགྱི།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་དོན་ལ་སྤྱོད་པས་འདི་ལྟར་སྤྱད་པར་བྱ་སྟེ།

འདོད་ཆགས་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

ཞེ་སྡང་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

གཏི་མུག་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

འདོད་ཆགས་དང་།

ཞེ་སྡང་དང་།

གཏི་མུག་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

ལོག་པར་ལྟ་བ་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

ལྟ་བར་གྱུར་པ་ཐམས་ཅད་ཀྱི་བར་དུ་བདག་གི་དོན་ཅེའམ།

བདག་ལ་གནོད་པ་ཞེས་བྱ་བར་སྤྱད་པར་མི་བྱའོ།

དེ་ཅིའི་ཕྱིར་ཞེ་ན།

འདོད་ཆགས་དང་།

ཞེ་སྡང་དང་།

གཏི་མུག་གི་དེ་བཞིན་ཉིད་ནི་གང་ལ་ཡང་དོན་ཀྱང་མི་བྱེད་ལ།

གནོད་པ་ཡང་མི་བྱེད་པ་དང་།

ལྟ་བའི་རྣམ་པའི་དེ་བཞིན་ཉིད་ཀྱང་གང་ལ་ཡང་དོན་ཀྱང་མི་བྱེད་ལ།

གནོད་པ་ཡང་མི་བྱེད་པའི་ཕྱིར་རོ།

གཟུགས་བདག་གི་དོན་ཅེས་སྤྱད་པར་མི་བྱའོ།

གཟུགས་བདག་ལ་གནོད་པ་ཞེས་སྤྱད་པར་མི་བྱའོ།

རྣམ་པར་ཤེས་པའི་བར་དུ་བདག་གི་དོན་ཅེས་སྤྱད་པར་མི་བྱའོ།

རྣམ་པར་ཤེས་པ་བདག་ལ་གནོད་པ་ཞེས་སྤྱད་པར་མི་བྱའོ།

དེ་བཞིན་དུ་སྦྱར་ཏེ།

བྱང་ཆུབ་ཀྱི་བར་དུ་བདག་གི་དོན་ཅེས་སྤྱད་པར་མི་བྱའོ།

བྱང་ཆུབ་བདག་ལ་གནོད་པ་ཞེས་སྤྱད་པར་མི་བྱའོ།

དེ་ཅིའི་ཕྱིར་ཞེ་ན།

རབ་འབྱོར་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གང་དོན་ཏམ་གནོད་པ་འགའ་ཡང་མ་དམིགས་པའི་ཕྱིར་རོ།

རབ་འབྱོར་གཞན་ཡང་དེ་བཞིན་གཤེགས་པ་རྣམས་བྱུང་ཡང་རུང་།

དེ་བཞིན་གཤེགས་པ་རྣམས་མ་བྱུང་ཡང་རུང་སྟེ།

ཆོས་རྣམས་ཀྱི་ཆོས་ཉིད་དང་།

ཆོས་གནས་པ་ཉིད་དང་།

ཆོས་སྐྱོན་མེད་པ་ཉིད་དང་།

ཆོས་ཀྱི་དབྱིངས་གནས་པ་འདི་ནི་གང་ལ་ཡང་དོན་ཏམ།

གནོད་པ་ཅི་ཡང་མི་བྱེད་དེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་དོན་དང་།

གནོད་པ་རྣམ་པར་སྤངས་ཏེ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་ཅིའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་དོན་ཀྱང་མི་བགྱིད།

གནོད་པ་ཡང་མི་བགྱིད་པ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་འདུས་བྱས་དང་།

འདུས་མ་བྱས་ཀྱི་ཆོས་གང་ཡང་མི་བྱེད་པས།

རབ་འབྱོར་དེའི་

ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་གང་ལ་ཡང་དོན་དང་གནོད་པ་མི་བྱེད་དོ།

གསོལ་པ།

བཅོམ་ལྡན་འདས་འདུས་མ་བགྱིས་ནི་སངས་རྒྱས་རྣམས་དང་།

སངས་རྒྱས་ཀྱི་ཉན་ཐོས་འཕགས་པ་ཐམས་ཅད་ཀྱི་དོན་མ་ལགས་སམ།

བཀའ་སྩལ་པ།

རབ་འབྱོར་འདུས་མ་བྱས་ནི་སངས་རྒྱས་རྣམས་དང་།

སངས་རྒྱས་ཀྱི་ཉན་ཐོས་འཕགས་པ་རྣམས་ཀྱི་དོན་ཡིན་མོད་ཀྱི།

གང་ལ་ཡང་ཕན་པའམ།

གནོད་པར་ཉེ་བར་གནས་པ་ཡང་མ་ཡིན་ནོ།

རབ་འབྱོར་འདི་ལྟ་སྟེ།

དཔེར་ན་ནམ་མཁའི་དེ་བཞིན་ཉིད་ནི་གང་ལ་ཡང་ཕན་པའམ་གནོད་པ་ཉེ་བར་གནས་པ་མ་ཡིན་ནོ།

རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་གང་ལ་ཡང་ཕན་པའམ་གནོད་པར་ཉེ་བར་གནས་པ་མ་ཡིན་ནོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་འདུས་མ་བྱས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབས་ནས།

རྣམ་པ་ཐམས་ཅད་མཁྱེན་པ་ཉིད་ཐོབ་པར་མི་འགྱུར་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོས་འདུས་མ་བྱས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་བསླབས་ནས།

རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་ཏེ།

གཉིས་ཀྱི་ཚུལ་གྱིས་ནི་མ་ཡིན་ནོ།

གསོལ་པ།

བཅོམ་ལྡན་འདས་ཀྱི་གཉིས་སུ་མཆིས་པའི་ཆོས་ཀྱིས་གཉིས་སུ་མཆིས་པའི་ཆོས་འཐོབ་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་གཉིས་སུ་མ་མཆིས་པའི་ཆོས་ཀྱིས་གཉིས་སུ་མ་མཆིས་པའི་ཆོས་འཐོབ་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་གཉིས་སུ་མ་མཆིས་པའི་ཆོས་ཀྱིས་གཉིས་སུ་མཆིས་པའི་ཆོས་ཐོབ་ལགས་སམ།

བཀའ་སྩལ་པ།

རབ་འབྱོར་དེ་ནི་མ་ཡིན་ནོ།

གསོལ་པ།

བཅོམ་ལྡན་འདས་འོ་ན་ཇི་ལྟར་འཐོབ་པར་འགྱུར་ལགས།

བཀའ་སྩལ་པ།

རབ་འབྱོར་གང་གི་ཕྱིར་གཉིས་ཀྱི་ཆོས་སམ།

གཉིས་སུ་མེད་པའི་ཆོས་ཀྱང་མི་

དམིགས་ན།

དེ་ལྟར་དམིགས་སུ་མེད་པའི་ཚུལ་གྱིས་རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ།

ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས་ཆོས་གཉིས་ཀྱི་ཞུ་བ་མང་པོའི་ལེའུ་ཞེས་བྱ་བ་སྟེ་དྲུག་ཅུ་རྩ་གསུམ་པའོ།།

ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ།

བམ་པོ་བཞི་བཅུ་དྲུག་པ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཟབ་ལགས་སོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་དེ་དག་ནི་སེམས་ཅན་ཡང་མི་དམིགས་ལ།

སེམས་ཅན་དུ་གདགས་པ་ཡང་མི་དམིགས་པར་སེམས་ཅན་རྣམས་ཀྱི་ཆེད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པས་དཀའ་བ་བགྱིད་པ་ལགས་སོ།

བཅོམ་ལྡན་འདས་འདི་ལྟ་སྟེ།

དཔེར་བགྱི་ན་མི་ལ་ལ་ཞིག་གིས་ནམ་མཁའ་རྟེན་མ་མཆིས་པ་ལ་ཡལ་ག་འགེལ་བ་བསྐྱེད་པར་འཚལ་བ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་རྣམས་ཀྱི་ཆེད་དུ་རྣམ་པ་ཐམས་ཅད་མཁྱེན་པ་ཉིད་ཐོབ་པར་འཚལ་བ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

བྱང་ཆུབ་སེམས་དཔའ་གང་སེམས་ཅན་རྣམས་ཀྱི་ཆེད་དུ་རྣམ་པ་ཐམས་ཅད་མཁྱེན་པ་ཉིད་ལ་འཇུག་ཅིང་།

རྣམ་པ་ཐམས་ཅད་མཁྱེན་པ་ཉིད་དེ་རྟོགས་ནས་ཀྱང་།

སེམས་ཅན་ཐམས་ཅད་ཆགས་པ་ལས་ཡོངས་སུ་གྲོལ་བར་བྱེད་པ་དེ་དག་ནི་དཀའ་བ་བྱེད་པ་ཡིན་ནོ།

རབ་འབྱོར་དཔེར་ན་མི་ཞིག་ཡལ་ག་འགེལ་བ་བསྐྱེད་པར་འདོད་ལ།

མི་དེས་ཡལ་ག་འགེལ་བ་དེའི་རྩ་བ་ཡང་མི་ཤེས།

ཡལ་གའི་མདོ་དང་།

ལོ་མ་དང་།

མེ་ཏོག་ཀྱང་མི་ཤེས་བཞིན་དུ།

དེས་ཡལ་ག་འགེལ་བ་དེའི་སྡོང་བུ་བསྐྱེད་དེ།

བསྐྱེད་ནས་ཀྱང་དུས་དུས་སུ་སྲུང་ཞིང་ཆུས་བྲན་ཏེ།

རིམ་གྱིས་སྡོང་བུ་དེའི་ཡལ་ག་ཡང་ཕུན་སུམ་ཚོགས་པར་གྱུར།

ལོ་མ་ཡང་ཕུན་སུམ་ཚོགས་པར་གྱུར།

མེ་ཏོག་ཀྱང་ཕུན་སུམ་

ཚོགས་པར་གྱུར།

འབྲས་བུ་ཡང་ཕུན་སུམ་ཚོགས་པར་གྱུར་ནས།

དེ་སྡོང་བུ་དེའི་ལོ་མ་རྣམས་ལ་སྤྱོད་དོ།

རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ཀྱི་ཆེད་དུ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཞུགས་པ་དེ་ཡང་རིམ་གྱིས་ཕ་རོལ་ཏུ་ཕྱིན་པ་དྲུག་པོ་དག་ལ་སྤྱོད་ཅིང་།

རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་ཏེ།

ལོ་མ་དང་།

མེ་ཏོག་དང་།

འབྲས་བུ་ལྟ་བུར་སེམས་ཅན་ཐམས་ཅད་ཀྱི་འཚོ་བར་འགྱུར་རོ།

རབ་འབྱོར་དེ་ལ་བྱང་ཆུབ་སེམས་དཔའི་ལོ་མ་ལྟ་བུ་ལ་བརྟེན་ནས་སེམས་ཅན་རྣམས་ངན་སོང་གསུམ་པོ་དག་ལས་ཡོངས་སུ་གྲོལ་བར་འགྱུར་རོ།

བྱང་ཆུབ་སེམས་དཔའི་མེ་ཏོག་ལྟ་བུ་ལ་བརྟེན་ནས་སེམས་ཅན་རྣམས་རྒྱལ་རིགས་ཤིང་སཱ་ལ་ཆེན་པོ་ལྟ་བུ་དག་དང་།

བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དག་དང་།

ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་དག་དང་།

རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེ་བ་ནས།

འདུ་ཤེས་མེད།

འདུ་ཤེས་མེད་མིན་སྐྱེ་མཆེད་ཀྱི་བར་གྱི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ།

དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་ཐོབ་ནས།

སེམས་ཅན་དེ་དག་རྒྱུན་ཏུ་ཞུགས་པའི་འབྲས་བུ་ལ་འགོད་པར་བྱེད་དོ།

ལན་གཅིག་ཕྱིར་འོང་བའི་འབྲས་བུ་ལ་འགོད་པར་བྱེད་དོ།

ཕྱིར་མི་འོང་བའི་འབྲས་བུ་ལ་འགོད་པར་བྱེད་དོ།

དགྲ་བཅོམ་པ་ཉིད་ལ་འགོད་པར་བྱེད་དོ།

རང་བྱང་ཆུབ་ལ་འགོད་པར་བྱེད་དོ།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་བརྟེན་ནས།

རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ།

རྣམ་པ་ཐམས་ཅད་མཁྱེན་པ་ཉིད་ཐོབ་ནས་ཀྱང་།

ལོ་མ་དང་།

མེ་ཏོག་དང་།

འབྲས་བུ་ལྟ་བུར་སེམས་ཅན་ཐམས་ཅད་ཀྱི་འཚོ་བར་འགྱུར་རོ།

གང་དག་དེ་ལ་ཡོན་འབུལ་བ་དེ་དག་ཐམས་ཅད་ཀྱང་ཐེག་པ་གསུམ་པོ་འདི་ལྟ་སྟེ།

ཉན་ཐོས་ཀྱི་ཐེག་པའམ།

རང་སངས་རྒྱས་ཀྱི་ཐེག་པའམ།

ཐེག་པ་ཆེན་པོས་རིམ་གྱིས་ཡོངས་སུ་མྱ་ངན་ལས་འདའ་བར་འགྱུར་ཞིང་།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་

རྫོགས་པར་འཚང་རྒྱ་བར་འགྱུར་ཏེ།

དེ་ལ་སེམས་ཅན་ཡང་མི་དམིགས་ཤིང་སེམས་ཅན་དུ་གདགས་པ་ཡང་མེད་ལ།

སེམས་ཅན་དེ་དག་ཀྱང་བདག་ཏུ་འཛིན་པ་ལས་ཡོངས་སུ་གྲོལ་བར་བྱེད་དེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་གང་དག་གི་ཆེད་དུ་བདག་གིས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱ་བའི་སེམས་ཅན་ནམ།

སེམས་ཅན་དུ་གདགས་པ་ཅི་ཡང་འདི་ན་མི་དམིགས་སོ་ཞེས་དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པ་ཉིད་ལགས་པར་རིག་པར་བགྱིའོ།

དེ་ཅིའི་སླད་དུ་ཞེ་ན།

བཅོམ་ལྡན་འདས་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བརྟེན་ནས་སེམས་ཅན་དམྱལ་བ་ཐམས་ཅད་རྒྱུན་ཆད་པར་འགྱུར།

དུད་འགྲོའི་སྐྱེ་གནས་ཐམས་ཅད་རྒྱུན་ཆད་པར་འགྱུར།

གཤིན་རྗེའི་འཇིག་རྟེན་ཐམས་ཅད་རྒྱུན་ཆད་པར་འགྱུར།

མི་ཁོམ་པ་ཐམས་ཅད་རྒྱུན་ཆད་པར་འགྱུར།

དབུལ་པོ་ཐམས་ཅད་རྒྱུན་ཆད་པར་འགྱུར།

དམན་པའི་འགྲོ་བ་ཐམས་ཅད་རྒྱུན་ཆད་པར་འགྱུར།

འདོད་པའི་ཁམས་ཐམས་ཅད་རྒྱུན་ཆད་པར་འགྱུར།

གཟུགས་ཀྱི་ཁམས་ཐམས་ཅད་རྒྱུན་ཆད་པར་འགྱུར།

གཟུགས་མེད་པའི་ཁམས་ཐམས་ཅད་རྒྱུན་ཆད་པར་འགྱུར་བའི་སླད་དུའོ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པ་ཉིད་ཡིན་པར་རིག་པར་བྱའོ།

དེ་ཅིའི་ཕྱིར་ཞེ་ན།

རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་མ་ཞུགས་ན།

འདས་པ་དང་།

མ་བྱོན་པ་དང་།

དེ་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ཞིང་།

རང་སངས་རྒྱས་རྣམས་འཇིག་རྟེན་དུ་འབྱུང་བར་མི་འགྱུར།

དགྲ་བཅོམ་པ་རྣམས་འཇིག་རྟེན་དུ་འབྱུང་བར་མི་འགྱུར།

རྒྱུན་དུ་ཞུགས་པའི་

བར་དག་འཇིག་རྟེན་དུ་འབྱུང་བར་མི་འགྱུར།

སེམས་ཅན་དམྱལ་བའི་བར་དག་རྒྱུན་ཆད་པར་མི་འགྱུར།

འདོད་པའི་ཁམས་དང་།

གཟུགས་ཀྱི་ཁམས་དང་།

གཟུགས་མེད་པའི་ཁམས་ཀྱི་བར་དག་རྒྱུན་ཆད་པར་མི་འགྱུར་བའི་ཕྱིར་རོ།

རབ་འབྱོར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པ་ཉིད་ལགས་པར་རིག་པར་བགྱིའོ་ཞེས་གང་སྨྲས་པ་ནི།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པ་ཉིད་ཡིན་པར་རིག་པར་བྱའོ།

དེ་ཅིའི་ཕྱིར་ཞེ་ན།

རབ་འབྱོར་དེ་བཞིན་ཉིད་གང་གིས་དེ་བཞིན་གཤེགས་པར་གདགས་པའི་དེ་བཞིན་ཉིད་དེ་ཉིད་ཀྱིས་རང་སངས་རྒྱས་སུ་གདགས་པ་དང་།

དེ་བཞིན་ཉིད་དེ་ཉིད་ཀྱིས་འཕགས་པ་ཐམས་ཅད་གདགས་པ་དང་།

དེ་བཞིན་ཉིད་དེ་ཉིད་ཀྱིས་གཟུགས་སུ་གདགས་པ་དང་།

དེ་བཞིན་ཉིད་དེ་ཉིད་ཀྱིས་རྣམ་པར་ཤེས་པའི་བར་དུ་གདགས་པ་དང་།

དེ་བཞིན་ཉིད་དེ་ཉིད་ཀྱིས་འདུས་བྱས་ཀྱི་ཁམས་དང་།

འདུས་མ་བྱས་ཀྱི་ཁམས་ཀྱི་བར་དུ་གདགས་པ་དང་།

དེ་བཞིན་ཉིད་དེ་ཉིད་ཀྱིས་སེམས་ཅན་ཐམས་ཅད་ཀྱི་དེ་བཞིན་ཉིད་དང་།

དེ་བཞིན་གཤེགས་པའི་དེ་བཞིན་ཉིད་གདགས་པའི་ཕྱིར་རོ།

རབ་འབྱོར་ཅིའི་ཕྱིར།

དེ་བཞིན་ཉིད་དེ་བཞིན་ཉིད་ཅེས་བྱ་ཞེ་ན།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་ཉིད་འདི་ལ་གནས་ནས།

རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་ཏེ།

དེ་བས་ན་དེ་བཞིན་ཉིད་ཅེས་བྱའོ།

རབ་འབྱོར་རྣམ་གྲངས་དེས་ན་དེ་བཞིན་ཉིད་ཚད་མར་བྱས་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་བཞིན་གཤེགས་པ་ཉིད་ཡིན་པར་རིག་པར་བྱ་སྟེ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་བསླབ་པར་བྱའོ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབས་ན།

སེམས་ཅན་ཐམས་ཅད་ཀྱི་དབང་པོ་ལ་མཁས་པར་འགྱུར་ཞིང་།

དབང་པོ་ཡོངས་སུ་རྫོགས་པར་བྱ་བ་ལ་མཁས་པ་ཐོབ་པར་འགྱུར་རོ།

སེམས་ཅན་རྣམས་ཀྱི་ལས་བདག་གིར་བྱ་བ་ཡང་ཤེས་པར་འགྱུར་རོ།

སེམས་ཅན་རྣམས་ཀྱི་ལས་

བདག་གིར་བྱ་བ་ཤེས་ན།

སྨོན་ནས་ཤེས་པ་ཡོངས་སུ་རྫོགས་པར་འགྱུར་རོ།

སྨོན་ནས་ཤེས་པ་ཡོངས་སུ་རྫོགས་ན་དུས་གསུམ་ཤེས་པ་རྣམ་པར་དག་པར་བྱེད་པར་འགྱུར་རོ།

དུས་གསུམ་ཤེས་པ་རྣམ་པར་སྦྱངས་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་།

སེམས་ཅན་རྣམས་ཀྱི་དོན་བྱེད་པར་འགྱུར་རོ།

སེམས་ཅན་རྣམས་ཀྱི་དོན་བྱེད་ན།

སངས་རྒྱས་ཀྱི་ཞིང་ཡོངས་སུ་དག་པར་བྱེད་པར་འགྱུར་རོ།

སངས་རྒྱས་ཀྱི་ཞིང་ཡོངས་སུ་སྦྱངས་ན་རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ།

རྣམ་པ་ཐམས་ཅད་མཁྱེན་པ་ཉིད་ཐོབ་ན་ཆོས་ཀྱི་འཁོར་ལོ་སྐོར་བར་འགྱུར་རོ།

ཆོས་ཀྱི་འཁོར་ལོ་བསྐོར་ནས་སེམས་ཅན་རྣམས་ཐེག་པ་གསུམ་པོ་དག་ལ་འགོད་པར་འགྱུར་རོ།

སེམས་ཅན་རྣམས་ཐེག་པ་གསུམ་པོ་དག་ལ་བཀོད་ནས།

ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་ཟློ་བར་འགྱུར་ཏེ།

རབ་འབྱོར་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཡོན་ཏན་དང་།

ཕན་ཡོན་ཐམས་ཅད་མཐོང་བས་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ་ཞིང་།

གཞན་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་གཞུག་པར་བྱའོ།

དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཇི་སྐད་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་སྤྱོད་པ་དེ་དག་ནི་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བགྱི་བའི་གནས་ལགས་སོ།

བཀའ་སྩལ་པ།

རབ་འབྱོར་དེ་དེ་བཞིན་ཏེ།

དེ་དེ་བཞིན་ནོ།

ཇི་སྐད་སྨྲས་པ་བཞིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཇི་སྐད་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལ་སྤྱོད་པ་དེ་དག་ནི་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱ་བའི་གནས་ཡིན་ནོ།

གསོལ་པ།

བཅོམ་ལྡན་འདས་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་ཅན་ཐམས་ཅད་ཀྱི་ཆེད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བ་དེ་

བསོད་ནམས་ཇི་ཙམ་ཞིག་བསྐྱེད་པར་འགྱུར་ལགས།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ།

རབ་འབྱོར་སྟོང་གི་འཇིག་རྟེན་གྱི་ཁམས་ན།

སེམས་ཅན་ཇི་སྙེད་པ་དེ་དག་ཐམས་ཅད་ཉན་ཐོས་ཀྱི་ས་ལ་གནས་པར་གྱུར་ཏམ།

རང་སངས་རྒྱས་ཀྱི་ས་ལ་གནས་པར་གྱུར་ན།

ཅི་སེམས་ཅན་དེ་དག་བསོད་ནམས་མང་དུ་བསྐྱེད་དམ།

གསོལ་པ།

བཅོམ་ལྡན་འདས་མང་ལགས་སོ།

བདེ་བར་གཤེགས་པ་མང་ལགས་སོ།

བཅོམ་ལྡན་འདས་དཔག་ཏུ་མ་མཆིས་ལགས་སོ།

བདེ་བར་གཤེགས་པ་ཚད་མ་མཆིས་ལགས་སོ།

བཀའ་སྩལ་པ།

རབ་འབྱོར་སྟོང་གི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཉན་ཐོས་ཀྱི་ཐེག་པ་པའམ།

རང་སངས་རྒྱས་ཀྱི་ཐེག་པ་པ་རྣམས་ཀྱི་བསོད་ནམས་བྱ་བའི་དངོས་པོ་གང་ཡིན་པ་དང་།

སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་བསོད་ནམས་བྱ་བའི་དངོས་པོ་གང་ཡིན་པ་འདི་གཉིས་ལ་སྟོང་གི་འཇིག་རྟེན་གྱི་ཁམས་ཀྱི་ཉན་ཐོས་ཀྱི་ཐེག་པ་པའམ།

རང་སངས་རྒྱས་ཀྱི་ཐེག་པ་པ་རྣམས་ཀྱི་བསོད་ནམས་བྱ་བའི་དངོས་པོ་དེ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་བསོད་ནམས་བྱ་བའི་དངོས་པོ་དེའི་བརྒྱའི་ཆར་ཡང་ཉེ་བར་མི་འགྲོ་བ་ནས་བྱེ་བ་ཕྲག་འབུམ་གྱི་བར་གྱི་ཆར་ཡང་ཉེ་བར་མི་འགྲོའོ།

དེ་ཅིའི་ཕྱིར་ཞེ་ན།

ཉན་ཐོས་དང་།

རང་སངས་རྒྱས་ཀྱི་ཐེག་པ་པ་རྣམས་ནི་བྱང་ཆུབ་སེམས་དཔའ་ལས་བྱུང་བ་ཡིན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཉན་ཐོས་དང་།

རང་སངས་རྒྱས་ལས་བྱུང་བ་མ་ཡིན་པའི་ཕྱིར་རོ།

དེ་བཞིན་དུ་སྦྱར་ཏེ།

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཉན་ཐོས་དང་།

རང་སངས་རྒྱས་ཀྱི་ཐེག་པ་པ་ཇི་སྙེད་པ་དེ་དག་ཐམས་ཅད་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་བསོད་ནམས་ཀྱི་ཆའི་བར་དུ་ཡང་ཉེ་བར་མི་འགྲོའོ།

རབ་འབྱོར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཉན་ཐོས་དང་།

རང་སངས་རྒྱས་ཀྱི་ཐེག་པ་པ་རྣམས་ལྟ་ཞོག་གི །

རབ་འབྱོར་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན།

སེམས་ཅན་གང་དག་འཁོད་པ་དེ་དག་ཐམས་ཅད་དཀར་པོ་རྣམ་པར་མཐོང་བའི་ས་ལ་གནས་པར་གྱུར་ཀྱང་དེ་དག་གི་བསོད་

ནམས་གང་ཡིན་པ་དེ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་བསོད་ནམས་ཀྱི་བྱེ་བ་ཕྲག་འབུམ་གྱི་ཆའི་བར་དུ་ཡང་ཉེ་བར་མི་འགྲོའོ།

དཀར་པོ་རྣམ་པར་མཐོང་བའི་ས་ལ་གནས་པ་རྣམས་ལྟ་ཞོག་གི།

གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་དེ་དག་ཐམས་ཅད་རིགས་ཀྱི་ས་ལ་གནས་པར་གྱུར་ཀྱང་།

དེ་དག་གི་བསོད་ནམས་གང་ཡིན་པ་དེ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་བསོད་ནམས་ཀྱི་བྱེ་བ་ཕྲག་འབུམ་གྱི་ཆའི་བར་དུ་ཡང་ཉེ་བར་མི་འགྲོའོ།

དེ་བཞིན་དུ་སྦྱར་ཏེ།

བརྒྱད་པའི་ས་དང་མཐོང་བའི་ས་དང་བསྲབས་པའི་ས་དང་།

འདོད་ཆགས་དང་བྲལ་བའི་ས་དང་།

བྱས་པ་རྟོགས་པ་ཅན་གྱི་ས་དང་།

རང་སངས་རྒྱས་ཀྱི་སའི་བར་དུ་ཞུགས་པར་གྱུར་ཀྱང་།

དེ་དག་གི་བསོད་ནམས་གང་ཡིན་པ་དེ་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་བསོད་ནམས་ཀྱི་བྱེ་བ་ཕྲག་འབུམ་གྱི་ཆའི་བར་དུ་ཡང་ཉེ་བར་མི་འགྲོའོ།

རབ་འབྱོར་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་དག་འཁོད་པ་དེ་དག་ཐམས་ཅད་བྱང་ཆུབ་སེམས་དཔའི་སྐྱོན་མེད་པ་ལ་ཞུགས་པར་གྱུར་ཀྱང་།

དེ་དག་གི་བསོད་ནམས་གང་ཡིན་པ་དེ་ནི་བྱང་ཆུབ་ལ་ཞུགས་པའི་བྱང་ཆུབ་སེམས་དཔའི་བསོད་ནམས་ཀྱི་བྱེ་བ་ཕྲག་འབུམ་གྱི་ཆའི་བར་དུ་ཡང་ཉེ་བར་མི་འགྲོའོ།

རབ་འབྱོར་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གང་དག་འཁོད་པ་དེ་དག་ཐམས་ཅད་བྱང་ཆུབ་ལ་ཞུགས་པར་གྱུར་ཀྱང་དེ་དག་གི་བསོད་ནམས་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསོད་ནམས་ཀྱི་བྱེ་བ་ཁྲག་ཁྲིག་ཕྲག་འབུམ་གྱི་ཆའི་བར་དུ་ཡང་ཉེ་བར་མི་འགྲོ་ཞིང་རྒྱུ་དང་དཔེའི་བར་དུ་ཡང་ཉེ་བར་མི་འགྲོའོ།

གསོལ་པ།

བཅོམ་ལྡན་འདས་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ཞིག་ཡིད་ལ་བགྱི་ལགས།

བཀའ་སྩལ་པ།

རབ་འབྱོར་སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱའོ།

གསོལ་པ།

བཅོམ་ལྡན་

འདས་རྣམ་པ་ཐམས་ཅད་མཁྱེན་པ་ཉིད་ཀྱི་དངོས་པོ་ནི་ཅི་ལྟ་བུ་ཞིག་ལགས།

དམིགས་པ་ནི་ཅི་ཞིག་ལགས།

དབང་བགྱིད་པ་ནི་གང་ལགས།

རྣམ་པ་ནི་ཅི་ཞིག་ལགས།

མཚན་ཉིད་ནི་གང་ལགས།

བཀའ་སྩལ་པ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ཅེས་བྱ་བ་ནི་དངོས་པོ་མེད་པ།

མཚན་ཉིད་མེད་པ།

མཚན་མ་མེད་པ།

ལྷུན་གྱིས་གྲུབ་པ།

སྐྱེ་བ་མེད་པ།

འབྱུང་བ་མེད་པའོ།

རབ་འབྱོར་ཁྱོད་ཀྱིས་འདི་སྐད་དུ།

རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་ཅི་ཞིག་ལགས།

དབང་བགྱིད་པ་ནི་གང་ལགས།

རྣམ་པ་ནི་ཅི་ཞིག་ལགས།

མཚན་ཉིད་ནི་གང་ལགས་ཞེས་ཟེར་བ་ལ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་དངོས་པོ་མེད་པའོ།

དབང་བྱེད་པ་ནི་དྲན་པའོ།

རྣམ་པ་ནི་ཞི་བའོ།

མཚན་ཉིད་ནི་མཚན་ཉིད་མེད་པ་སྟེ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་དེ་ཡིན་ནོ།

དབང་བྱེད་པ་ནི་དེ་ཡིན་ནོ།

རྣམ་པ་ནི་དེ་ཡིན་ནོ།

མཚན་ཉིད་ནི་དེ་ཡིན་ནོ།

གསོལ་པ།

བཅོམ་ལྡན་འདས་ཀྱི་རྣམ་པ་ཐམས་ཅད་མཁྱེན་པ་ཉིད་ཁོ་ན་དངོས་པོ་མ་མཆིས་པ་ལགས་སམ།

འོན་ཏེ་གཟུགས་ཀྱང་དངོས་པོ་མ་མཆིས་ཤིང་།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་ཡང་དངོས་པོ་མ་མཆིས་པ་ལགས་སམ།

དེ་བཞིན་དུ་ནང་དང་ཕྱིའི་ཆོས་རྣམས་ཀྱང་དངོས་པོ་མ་མཆིས་པ་ལགས་སམ།

བསམ་གཏན་བཞི་དང་།

ཚད་མེད་པ་བཞི་དང་།

གཟུགས་མེད་པའི་སྙོམས་པར་འཇུག་པ་བཞི་དང་།

དྲན་པ་ཉེ་བར་གཞག་པ་བཞི་དང་།

ཡང་དག་པར་སྤོང་བ་བཞི་དང་།

རྫུ་འཕྲུལ་གྱི་རྐང་པ་བཞི་དང་།

དབང་པོ་ལྔ་དང་།

སྟོབས་ལྔ་དང་།

བྱང་ཆུབ་ཀྱི་ཡན་ལག་བདུན་དང་།

འཕགས་པའི་ལམ་ཡན་ལག་བརྒྱད་པ་དང་།

སྟོང་བ་ཉིད་ཀྱི་ཏིང་ངེ་འཛིན་དང་།

མཚན་མ་མེད་པའི་ཏིང་ངེ་འཛིན་དང་།

སྨོན་པ་མེད་པའི་ཏིང་ངེ་འཛིན་དང་།

རྣམ་པར་ཐར་པ་བརྒྱད་དང་།

མཐར་གྱིས་གནས་པའི་སྙོམས་པར་འཇུག་པ་དགུ་དང་།

དེ་བཞིན་གཤེགས་པའི་སྟོབས་བཅུ་དང་།

མི་འཇིགས་པ་བཞི་དང་།

སོ་སོ་ཡང་དག་པར་རིག་པ་བཞི་དང་།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་།

བྱམས་པ་ཆེན་པོ་དང་།

སྙིང་རྗེ་ཆེན་པོ་དང་།

དགའ་བ་ཆེན་པོ་དང་།

བཏང་སྙོམས་ཆེན་པོ་དང་།

མངོན་པར་ཤེས་པ་དང་པོ་དང་།

མངོན་པར་ཤེས་པ་གཉིས་པ་དང་།

གསུམ་པ་དང་།

བཞི་པ་དང་།

ལྔ་པ་དང་།

དྲུག་པ་དང་།

འདུས་བྱས་ཀྱི་ཁམས་དང་།

འདུས་མ་བྱས་ཀྱི་ཁམས་ཀྱང་དངོས་པོ་མ་མཆིས་པ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་ཀྱང་དངོས་པོ་མེད་དོ།

གཟུགས་དང་།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་ཡང་དངོས་པོ་མེད་དོ།

འདུས་བྱས་ཀྱི་ཁམས་དང་།

འདུས་མ་བྱས་ཀྱི་ཁམས་ཀྱི་བར་དུ་ཡང་དངོས་པོ་མེད་དོ།

དེ་ཅིའི་ཕྱིར་ཞེ་ན།

རབ་འབྱོར་རྣམ་པ་ཐམས་ཅད་མཁྱེན་པ་ཉིད་དེ་ལ་ནི་ངོ་བོ་ཉིད་མེད་དོ།

རབ་འབྱོར་གང་ལ་ངོ་བོ་ཉིད་མེད་པ་དེ་ནི་དངོས་པོ་མེད་པའི་ཕྱིར་རོ།

གསོལ་པ།

བཅོམ་ལྡན་འདས་ཅིའི་སླད་དུ།

རྣམ་པ་ཐམས་ཅད་མཁྱེན་པ་ཉིད་ངོ་བོ་ཉིད་མ་མཆིས་པ་ལགས།

བཀའ་སྩལ་པ།

རབ་འབྱོར་འདུས་པ་ལས་བྱུང་བའི་ངོ་བོ་ཉིད་མེད་དེ།

གང་ལ་འདུས་པ་ལས་བྱུང་བའི་ངོ་བོ་ཉིད་མེད་པ་དེ་དངོས་པོ་མེད་པའོ།

རབ་འབྱོར་རྣམ་གྲངས་དེས་ན།

ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དོ།

རབ་འབྱོར་ཡང་ཆོས་ཐམས་ཅད་ནི་སྟོང་པའི་ངོ་བོ་ཉིད་དོ།

ཆོས་ཐམས་ཅད་ནི་མཚན་མ་མེད་པ་དང་།

སྨོན་པ་མེད་པའི་ངོ་བོ་ཉིད་དོ།

རབ་འབྱོར་ཡང་ཆོས་ཐམས་ཅད་ནི་དེ་བཞིན་ཉིད་ཀྱི་ངོ་བོ་ཉིད་དོ།

ཆོས་ཐམས་ཅད་ནི་ཡང་དག་པའི་མཐའི་ངོ་བོ་ཉིད་དོ།

ཆོས་ཐམས་ཅད་ནི་ཆོས་ཀྱི་དབྱིངས་ཀྱི་ངོ་བོ་ཉིད་དོ།

རབ་འབྱོར་རྣམ་གྲངས་དེས་ཀྱང་ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་དུ་དེ་ལྟར་རིག་པར་བྱའོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་གལ་ཏེ་ཆོས་ཐམས་ཅད་དངོས་པོ་མ་མཆིས་པའི་ངོ་བོ་ཉིད་ལགས་ན།

སེམས་དང་པོ་བསྐྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པས་གང་དང་ལྡན་པས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་།

སངས་རྒྱས་ཀྱི་ཞིང་ཡང་ཡོངས་སུ་དག་པར་བགྱིད་ལ།

སེམས་ཅན་རྣམས་ཀྱང་ཡོངས་སུ་སྨིན་པར་བགྱིད།

ཇི་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་

ཕ་རོལ་ཏུ་ཕྱིན་པ་དང་།

བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་།

བསམ་གཏན་གྱི་ཕ་རོལ་ཏུ་ཕྱིན་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་དང་།

བསམ་གཏན་དང་པོ་ནས་བསམ་གཏན་བཞི་བའི་བར་དང་།

བྱམས་པ་ནས་བཏང་སྙོམས་ཀྱི་བར་དང་།

ནམ་མཁའ་མཐའ་ཡས་སྐྱེ་མཆེད་ནས་འདུ་ཤེས་མེད།

འདུ་ཤེས་མེད་མིན་སྐྱེ་མཆེད་ཀྱི་བར་གྱི་སྙོམས་པར་འཇུག་པ་དང་།

ནང་སྟོང་པ་ཉིད་ནས་རང་གི་མཚན་ཉིད་སྟོང་པ་ཉིད་ཀྱི་བར་དང་།

དྲན་པ་ཉེ་བར་གཞག་པ་རྣམས་ནས་འཕགས་པའི་ལམ་ཡན་ལག་བརྒྱད་པའི་བར་དང་།

སྟོང་པ་ཉིད་ཀྱི་ཏིང་ངེ་འཛིན་དང་།

མཚན་མ་མེད་པའི་ཏིང་ངེ་འཛིན་དང་།

སྨོན་པ་མེད་པའི་ཏིང་ངེ་འཛིན་དང་།

རྣམ་པར་ཐར་པ་བརྒྱད་དང་།

མཐར་གྱིས་གནས་པའི་སྙོམས་པར་འཇུག་པ་དགུ་དང་།

དེ་བཞིན་གཤེགས་པའི་སྟོབས་བཅུ་དང་།

མི་འཇིགས་པ་བཞི་དང་།

སོ་སོ་ཡང་དག་པར་རིག་པ་བཞི་དང་།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་།

བྱམས་པ་ཆེན་པོ་དང་།

སྙིང་རྗེ་ཆེན་པོ་དང་།

རྣམ་པ་ཐམས་ཅད་མཁྱེན་པ་ཉིད་ལ་སྤྱོད་ཅིང་།

སངས་རྒྱས་ཀྱི་ཞིང་ཡང་ཡོངས་སུ་དག་པར་བགྱིད་ལ།

སེམས་ཅན་རྣམས་ཀྱང་ཡོངས་སུ་སྨིན་པར་བགྱིད་པ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དངོས་པོ་མེད་པའི་ངོ་བོ་ཉིད་ཀྱི་ཆོས་རྣམས་ལ་ཡོངས་སུ་འདྲིས་པར་བྱེད་ཅིང་།

སངས་རྒྱས་ཀྱི་ཞིང་ཡང་ཡོངས་སུ་དག་པར་བྱེད་ལ།

སེམས་ཅན་རྣམས་ཀྱང་ཡོངས་སུ་སྨིན་པར་བྱེད་དེ།

སངས་རྒྱས་ཀྱི་ཞིང་དེ་དང་།

སེམས་ཅན་དེ་དག་ཀྱང་དངོས་པོ་མེད་པའི་ངོ་བོ་ཉིད་དུ་ཤེས་པ་གང་ཡིན་པ་དེ་ནི།

བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་པར་རིག་པར་བྱ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

བཟོད་པའི་ཕ་རོལ་ཏུ་ཕྱིན་པ་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

བསམ་

གཏན་གྱི་ཕ་རོལ་ཏུ་ཕྱིན་པ་ལ་སྤྱོད་ཅིང་བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་དོ།

དེ་བཞིན་དུ་སྦྱར་ཏེ།

རྣམ་པ་ཐམས་ཅད་མཁྱེན་པ་ཉིད་ཀྱི་བར་ལ་སྤྱོད་ཅིང་།

བྱང་ཆུབ་ཀྱི་ལམ་ཡོངས་སུ་འདྲིས་པར་བྱེད་ལ།

བྱང་ཆུབ་ཀྱི་ལམ་དེ་ཡང་དངོས་པོ་མེད་པའི་ངོ་བོ་ཉིད་དུ་ཤེས་པར་བྱའོ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་དུ་ཕྱིན་པ་དྲུག་པོ་དག་ལ་སྤྱོད་པ་དེ་ཇི་སྲིད་དུ་དེ་བཞིན་གཤེགས་པའི་སྟོབས་བཅུ་དང་།

མི་འཇིགས་པ་བཞི་དང་།

སོ་སོ་ཡང་དག་པར་རིག་པ་བཞི་དང་།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་།

བྱམས་པ་ཆེན་པོ་དང་།

སྙིང་རྗེ་ཆེན་པོ་དང་།

རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་དང་ལྡན་པར་མ་གྱུར་པ་དེ་སྲིད་དུ་བྱང་ཆུབ་ཀྱི་ལམ་ཡོངས་སུ་འདྲིས་པར་མི་བྱེད་དོ།

རབ་འབྱོར་འདི་དག་ནི་བྱང་ཆུབ་ཀྱི་ལམ་ཡིན་ཏེ།

དེ་བྱང་ཆུབ་ཀྱི་ལམ་འདི་དག་གིས་ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་བྱེད་དོ།

ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་བྱས་ནས།

སྐད་ཅིག་གཅིག་དང་ལྡན་པའི་ཤེས་རབ་ཀྱིས་རྣམ་པ་ཐམས་ཅད་མཁྱེན་པ་ཉིད་ཐོབ་པར་འགྱུར་རོ།

དེའི་ཚེ་དེའི་བག་ཆགས་དང་མཚམས་སྦྱོར་བ་དང་།

ཉོན་མོངས་པ་ཐམས་ཅད་ནི་མི་སྐྱེ་བའི་སྤོང་པས་སྤོང་བར་འགྱུར་རོ།

དེས་སངས་རྒྱས་ཀྱི་སྤྱན་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་རྣམ་པར་བལྟས་ནས་དངོས་པོ་མེད་པར་ཡང་མི་དམིགས་ན།

དངོས་པོར་ལྟ་ཅི་སྨོས།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་དངོས་པོ་མེད་པའི་ངོ་བོ་ཉིད་ཀྱི་ཆོས་ཐམས་ཅད་ལ།

ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ།

རབ་འབྱོར་དངོས་པོ་ཡང་མི་དམིགས་ན།

དངོས་པོ་མེད་པ་ལྟ་ཅི་སྨོས་ཏེ།

དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་ནོ།

རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་སྦྱིན་པ་སྦྱིན་པར་བྱེད་དེ།

དེ་སྦྱིན་པ་སྦྱིན་པ་ན།

རྣམ་པར་མི་རྟོག་ཅིང་མཚན་མར་མི་བྱེད་དེ།

དངོས་པོ་དང་དངོས་པོ་མེད་པའི་ཚུལ་དུ་ཡིད་ལ་མི་བྱེད་དོ།

ལེན་པ་

པོར་ཡང་རྣམ་པར་མི་རྟོག་ཅིང་མཚན་མར་མི་བྱེད་དེ།

དངོས་པོ་དང་དངོས་པོ་མེད་པའི་ཚུལ་དུ་ཡིད་ལ་མི་བྱེད་དོ།

སྦྱིན་པ་པོར་ཡང་རྣམ་པར་མི་རྟོག་ཅིང་མཚན་མར་མི་བྱེད་དེ།

དངོས་པོ་དང་དངོས་པོ་མེད་པའི་ཚུལ་དུ་ཡིད་ལ་མི་བྱེད་དོ།

བྱང་ཆུབ་ཀྱི་སེམས་དེ་ཡང་མི་དམིགས་ཤིང་མཚན་མར་མི་བྱེད་ལ།

དམིགས་པར་མི་བྱེད་དེ་ཡང་དག་པར་རྗེས་སུ་མི་མཐོང་ངོ་།

ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡང་དངོས་པོ་དང་དངོས་པོ་མེད་པའི་ཚུལ་དུ་རྣམ་པར་མི་རྟོག་ཅིང་།

མཚན་མར་མི་བྱེད་དོ།

རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་དངོས་པོ་དང་དངོས་པོ་མེད་པའི་ཚུལ་དུ་ཡིད་ལ་མི་བྱེད་ཅིང་།

རྣམ་པར་མི་རྟོག་ལ་ཡིད་ལ་མི་བྱེད་དོ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་དམིགས་པར་མི་བྱེད་ཅིང་།

མཚན་མར་མི་བྱེད་དོ།

གང་མངོན་པར་རྫོགས་པར་འཚང་རྒྱ་བའམ།

གང་མངོན་པར་རྫོགས་པར་འཚང་རྒྱ་བར་བྱ་བའམ།

གང་གིས་མངོན་པར་རྫོགས་པར་འཚང་རྒྱ་བ་དེ་ཡང་དངོས་པོ་དང་དངོས་པོ་མེད་པའི་ཚུལ་གྱིས་ཡོངས་སུ་རྟོག་པར་མི་བྱེད་དོ།

དེ་ཅིའི་ཕྱིར་ཞེ་ན།

འདི་ལྟར་ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་དེ།

དངོས་པོ་མེད་པ་དེ་ཡང་སངས་རྒྱས་རྣམ་དང་།

ཉན་ཐོས་རྣམས་དང་།

རང་སངས་རྒྱས་རྣམས་ཀྱིས་མ་བྱས་ཤིང་།

ཆོས་ཐམས་ཅད་ནི་འགྱུར་བ་མེད་པ་སྟེ།

བྱེད་པ་པོ་དང་བྲལ་བའི་ཕྱིར་རོ།

གསོལ་པ།

བཅོམ་ལྡན་འདས་ཆོས་རྣམས་ཆོས་རྣམས་ཉིད་དང་བྲལ་བ་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

རབ་འབྱོར་དེ་དེ་བཞིན་ནོ།

དེ་དེ་བཞིན་ཏེ།

ཆོས་རྣམས་ནི་ཆོས་རྣམས་དང་བྲལ་བ་ཡིན་ནོ།

གསོལ་པ།

བཅོམ་ལྡན་འདས་གལ་ཏེ་ཆོས་རྣམས་ཁོ་ན་ཆོས་རྣམས་དང་བྲལ་བ་ལགས་ན།

བྲལ་བའི་ཆོས་ཀྱིས་བྲལ་བའི་ཆོས་དངོས་པོ་མཆིས་པའམ།

དངོས་པོ་མ་མཆིས་པར་ཇི་ལྟར་འཚལ་བར་རུང་སྟེ།

དངོས་པོ་མ་མཆིས་པའི་ཆོས་ཀྱིས་ཀྱང་།

དངོས་པོ་མཆིས་པའི་ཆོས་འཚལ་བར་མི་རུང་ལ།

དངོས་པོ་མཆིས་པའི་ཆོས་ཀྱིས་ཀྱང་།

དངོས་པོ་མ་མཆིས་པའི་ཆོས་འཚལ་བར་མི་རུང་།

དངོས་པོ་མ་མཆིས་པའི་ཆོས་ཀྱིས་ཀྱང་།

དངོས་པོ་མ་མཆིས་པའི་ཆོས་འཚལ་བར་མི་རུང་ལ།

དངོས་པོ་མཆིས་པའི་ཆོས་ཀྱིས་ཀྱང་།

དངོས་པོ་

མཆིས་པའི་ཆོས་འཚལ་བར་མི་རུང་ལགས་ན།

དེ་ལྟར་མ་འཚལ་བའི་ཆོས་ཐམས་ཅད་ལ་དངོས་པོ་མཆིས་ཞེས་བགྱི་བའམ།

དངོས་པོ་མ་མཆིས་ཞེས་བགྱི་བར་བྱང་ཆུབ་སེམས་དཔའ་སེམས་དཔའ་ཆེན་པོ་སྟོན་པར་ལྟ་ག་ལ་འགྱུར།

བཅོམ་ལྡན་འདས་ཀྱིས་བཀའ་སྩལ་པ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་འཇིག་རྟེན་གྱི་ཀུན་རྫོབ་བཟུང་སྟེ།

དངོས་པོ་ཡོད་པ་ཞེས་བྱ་བའམ།

དངོས་པོ་མེད་པ་ཞེས་བྱ་བ་སྟོན་གྱི།

དོན་དམ་པར་ནི་མ་ཡིན་ནོ།

གསོལ་པ།

བཅོམ་ལྡན་འདས་ཅི་འཇིག་རྟེན་གྱི་ཀུན་རྫོབ་ཀྱང་གཞན་ཞིག་ལགས་ལ།

དོན་དམ་པ་ཡང་གཞན་ཞིག་ལགས་སམ།

བཀའ་སྩལ་པ།

རབ་འབྱོར་འཇིག་རྟེན་གྱི་ཀུན་རྫོབ་ཀྱང་གཞན་མ་ཡིན་ལ།

དོན་དམ་པ་ཡང་གཞན་མ་ཡིན་ཏེ།