寶積部第39卷（དཀོན་བརྩེགས་ཀ་བཞུགས་སོ། །）

རྒྱ་གར་སྐད་དུ།

ཨཱ་རྱ་མ་ཧཱ་རཏྣ་ཀཱུ་ཊ་དྷ་རྨ་པརྱཱ་ཡ་ཤ་ཏ་སཱ་ཧ་སྲི་ཀ་གྲན་ཐེ་ཏྲི་སམྦ་ར་ནི་ར་དེ་ཤ་པ་རི་བརྟ་ནན་ནཱམ་མ་ཧཱ་ཡ་ན་སཱུ་ཏྲ།

བོད་སྐད་དུ།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་སྟོང་ཕྲག་བརྒྱ་པ་ལས་སྡོམ་པ་གསུམ་བསྟན་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བཞུགས་ཏེ།

རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ནི་མཐོ་བ།

ཟླུམ་པ།

གནམ་འཕང་དང་རྒྱར་ཡངས་པ།

ལོ་ཏོག་ཐམས་ཅད་ཀྱི་ས་འཛིན་པ།

མེ་ཏོག་དང་།

ཕྲེང་བ་དང་།

སྤོས་རྣམ་པ་སྣ་ཚོགས་དང་ལྡན་པ།

མི་འམ་ཅི་དང་།

སྐྱེས་བུ་འམ་ཅིའི་ཚོགས་རྣམ་པར་རྒྱུ་བ།

གནོད་སྦྱིན་དང་།

སྲིན་པོ་དང་།

ཤ་ཟ་རྣམ་པ་མང་པོའི་གནས་སོ།

རི་དགས་ཀྱི་ཚོགས་ཀྱང་རྣམ་པར་རྒྱུ་བ་ལ་འདི་ལྟ་སྟེ།

སེང་གེ་དང་།

སྟག་དང་།

གླང་པོ་ཆེ་དང་།

བསེ་དང་།

དོམ་དང་།

དྲེད་དང་།

གཟིག་དང་།

མ་ཧེ་དང་།

ཤ་བཀྲ་དང་།

བསེ་ཁ་སྒོ་དང་།

བ་ལང་ཁ་ཞོ་སྔོན་པོ་དང་།

བ་ལང་དང་།

ཤ་བ་དང་།

ཤན་མར་དང་།

སྤྲེའུའི་ཚོགས་རྣམ་པར་རྒྱུ་བའོ།

དེ་ན་བྱ་རྣམ་པ་མང་པོ་བརྒྱ་སྟོང་གནས་པ་འདི་ལྟ་སྟེ།

ནེ་ཙོ་དང་།

རི་སྐེགས་དང་།

ཁུ་བྱུག་དང་།

ཤང་ཤང་ཏེའུ་དང་།

ངང་པ་དང་།

ཁྲུང་ཁྲུང་དང་།

རྨ་བྱ་དང་།

གྷུ་གྷུ་སྟ་ཀ་དང་།

ཀ་ཌ་ཀ་དང་།

ཐིང་རིལ་དང་།

ཡིད་འོང་ངང་བ་དང་།

གོང་མ་སྲེག་དང་།

ཨེ་ད་ནུ་མ་ཀཱ་ཀ་དྷེ་ནུ་དང་།

དན་དྷ་ཞེས་བྱ་བ་དང་།

ཀ་ད་རུ་ཧ་དང་།

མོ་ར་དང་།

ངུར་པ་དང་།

བི་ར་བ་ཏ་དང་།

རྡོ་རྗེ་མཆོག་དང་།

ཀ་རན་ད་བ་དང་།

ངང་སྐྱ་དང་།

ཀུག་ཀུ་ཧ་དང་།

ནོར་སྐྱོང་དང་།

ཤ་མ་དང་།

ཤི་ཁན་ཤི་ལ་དང་།

བྱ་གག་དང་།

ཕུག་རོན་དང་།

ཀག་ཀ་བ་དང་།

ཀུ་ར་ཏ་དང་།

བྱ་རྒོད་དང་།

བཱན་ཏཱ་ཤཱ་ཀ་དང་།

ཙད་ཙ་ལ་དང་།

གསེར་བུ་དང་།

འོལ་བ་དང་།

ཁྲ་དང་།

ཁྲ་སེམས་ཤེས་དང་།

འུག་པ་དང་།

སྲེག་པ་དང་།

ཀ་པིན་ཏ་ཀ་དང་།

པཎ་ཊི་ཀ་དང་།

ཙ་ཏི་ཀ་དང་།

ན་བ་ཙ་ཏི་ཀ་དང་།

ཙ་ཤ་དང་།

ཙ་ཀོ་ར་དང་།

བྱ་གག་རྒོད་དང་།

རྒྱགས་བྱེད་རི་སྐེགས་དང་།

ཀ་ཏ་མ་ཀ་དང་།

ཀ་ཙ་རུ་ཙ་ཀ་དང་།

ཀ་ར་རུ་བེ་ཀ་དང་།

དེ་དག་ལ་སོགས་པ་བྱའི་ཚོགས་རྣམས་གནས་ཏེ།

དེ་དག་ཀྱང་སངས་རྒྱས་ཀྱི་མཐུས་འདོད་ཆགས་ཀྱི་གནོད་པ་མེད་དོ།

ཞེ་སྡང་དང་།

གཏི་མུག་གི་གནོད་པ་མེད་དོ།

གཅིག་ལ་གཅིག་མི་ཟའོ།

དེ་དག་གཅིག་ལ་གཅིག་ཕ་མར་འདུ་ཤེས་ཤིང་གནས་སོ།

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་ཤིང་གི་ཚོགས་བརྒྱ་སྟོང་དུ་མ་ཡལ་ག་སྟུག་ཅིང་ལོ་མ་རྒྱས་ལ་འདབ་ན་དྲང་སྲོང་གནས་པ་དག་ཡོད་པ་ལ་འདི་ལྟ་སྟེ།

ཐང་ཤིང་དང་།

པླག་ཤ་དང་།

ཨ་ཤྭད་ཐ་དང་།

པི་པི་ལིང་གི་ཤིང་དང་།

རྒྱ་སྐྱེགས་ཤིང་དང་།

ཧ་རི་ཏ་དང་།

ཨ་རུ་རའི་ཤིང་དང་།

སྐྱུ་རུ་རའི་ཤིང་དང་།

བ་རུ་རའི་ཤིང་དང་།

སཱ་ལ་དང་།

ཏཱ་ལ་དང་།

ནག་ཏམ་ལ་དང་།

དོང་ཀའི་ཤིང་དང་།

ཨ་མྲ་དང་།

འཛམ་བུའི་ཤིང་དང་།

ཁམ་ཤིང་དང་།

ཀ་པིད་ཐ་དང་།

རྒྱ་ཤུག་གི་ཤིང་དང་།

སེང་ལྡེང་དང་།

མ་ཏུ་ལུང་ག་དང་།

བལ་པོ་སེའུ་ཤིང་དང་།

སྟ་རྒ་ཤིང་དང་།

ཏིན་ཏུ་ཀ་དང་།

ཀུད་ཛ་ཀ་དང་།

དྷ་བ་ཀ་དང་།

དྷ་བ་ཀ་དང་།

ས་ར་ལ་དང་།

ཨེ་ལ་དང་།

ཀྵུ་པ་དང་།

ནྱ་གྲོ་དྷ་དང་།

དྲྀ་ཌྷ་ནི་མ་དང་།

འབྲ་གོ་དང་།

ཀམ་པི་ལ་དང་།

པ་ལ་ཤ་དང་།

ནི་ཡ་མ་དང་།

ཀ་ཀེ་རི་ཡ་དང་།

ནིད་ཏྱ་པི་ལོ་དི་དང་།

པོག་དཀར་པོའི་ཤིང་དང་།

སྲ་ཙི་པོག་གི་ཤིང་དང་།

ཤིང་ཀུན་ཤིང་དང་།

ཙན་དན་དང་།

ཙན་དན་དམར་པོ་དང་།

ཨུ་བ་ཏ་དང་།

ས་ཀ་བི་ཛ་དང་།

གར་ཛ་དང་།

བི་གར་ཛ་དང་།

གསེར་ཤིང་དང་།

པ་ན་ས་དང་།

རྒུན་ཤིང་དང་།

ཤིང་བལ་ཤིང་དང་།

པ་རི་ཀྵཏྲ་དང་།

ཧི་ལ་སྟེ་ལྷ་དང་བཅས་པ་དག་གོ །

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་ཐང་ལས་སྐྱེས་པའི་མེ་ཏོག་རྣམ་པ་མང་པོ་དག་སྐྱེ་བ་འདི་ལྟ་སྟེ།

ཨ་ཏི་མུག་ཏ་ཀ་དང་།

ཙམ་པ་ཀ་དང་།

སྐྱ་སྣར་དང་།

བཱར་ཤི་ཀ་དང་།

སྣ་མའི་མེ་ཏོག་དང་།

དྲི་མཆོག་དང་།

ཡུ་ཐི་ཀ་དང་།

ད་ནུ་སྐ་རི་དང་།

བལ་ལ་དང་།

ཏ་ར་ཎི་དང་།

ག་བ་ཏ་ར་ཎི་དང་།

ཀང་ས་གུ་ན་དང་།

ལུག་མིག་དང་།

ཧ་རི་ནི་ཀ་དང་།

མ་ད་ཏ་ལི་ཀ་དང་།

མན་ཛུ་བུ་སྤི་ཀ་སྟེ་མེ་ཏོག་སྣ་ཚོགས་དེ་ལྟ་བུ་དག་གིས་རིའི་རྒྱལ་པོ་བྱ་རྒོད་ཀྱི་ཕུང་པོ་གང་ཞིང་མཛེས་སོ།

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་ཆུ་ལས་སྐྱེས་པའི་མེ་ཏོག་རྣམ་པ་མང་པོ་དག་སྐྱེ་བ་འདི་ལྟ་སྟེ།

ཨུད་པ་ལ་དང་།

པད་

མ་དང་།

ཀུ་མུ་ད་དང་།

པད་མ་དཀར་པོ་དང་།

པང་ཀ་ནི་རི་ཏི་ཀ་དང་།

ཀང་ཀ་ར་ཀ་དང་།

ཀང་ཀ་ར་ཀ་ཆེན་པོ་སྟེ།

དེ་དག་ལ་སོགས་པ་ཆུ་ལས་སྐྱེས་པའི་མེ་ཏོག་རྣམས་ཀྱིས་རིའི་རྒྱལ་པོ་བྱ་རྒོད་ཀྱི་ཕུང་པོ་མཛེས་པར་བྱས་སོ།

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་རྟག་ཏུ་རྒྱུན་མི་འཆད་པར་ནམ་གྱི་གུང་ཐུན་ལ་སྤྲིན་ཆེན་པོ་མངོན་པར་འདུས་ཏེ།

ཐོག་མར་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་ཆར་གྱི་སྤྲིན་ལྷའི་བུ་མངོན་པར་བསྒྲགས་ནས་བ་འཇོས་ཙམ་གྱི་བར་དུ་ཡན་ལག་བརྒྱད་དང་ལྡན་པའི་ཆར་ཟིམ་བུ་ཟིམ་བུ་དལ་བུ་དལ་བུས་འབབ་སྟེ།

དེས་རིའི་རྒྱལ་པོ་བྱ་རྒོད་ཀྱི་ཕུང་པོའི་ཁོ་ར་ཁོར་ཡུག་ཚིམ་པར་བྱས་ནས་ཐོ་རངས་སྤྲིན་ལྷ་གྱེས་ཤིང་ནམ་མཁའ་ལ་སྤྲིན་མེད་པར་གྱུར་ནས་དེར་ཡང་བསིལ་ཞིང་འཇམ་ལ་སིམ་པར་བྱེད་པའི་རླུང་ལྡང་སྟེ།

དེ་དག་གིས་རིའི་རྒྱལ་པོ་བྱ་རྒོད་ཀྱི་ཕུང་པོ་ལ་གནས་པའི་སེམས་ཅན་རྣམས་རྟས་པར་བྱེད།

སིམ་པར་བྱེད།

ཚིམ་པར་བྱེད་དེ།

འདི་ལྟ་སྟེ།

དཔེར་ན་མེ་ཏོག་ཕྲེང་རྒྱུད་དམ།

མེ་ཏོག་ཕྲེང་རྒྱུད་ཀྱི་སློབ་མས་ཕྲེང་བ་བརྒྱུས་ཟིན་ནས་ཆུས་བཏབ་པ་དང་དེའི་ཕྲེང་བ་དེ་དག་སྔ་མ་བས་ཆེས་བཟང་བར་འགྱུར་བ་དེ་བཞིན་དུ་རིའི་རྒྱལ་པོ་བྱ་རྒོད་ཀྱི་ཕུང་པོ་ལ་རྟག་ཏུ་རྒྱུན་མི་འཆད་པར་ནམ་གྱི་གུང་ཐུན་ལ་སྤྲིན་ཆེན་པོ་མངོན་པར་འདུས་ཏེ།

ཐོག་མར་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་ཆར་སྤྲིན་ལྷའི་བུ་མངོན་པར་བསྒྲགས་ནས་བ་འཇོས་ཙམ་གྱི་བར་དུ་ཡན་ལག་བརྒྱད་དང་ལྡན་པའི་ཆར་ཟིམ་བུ་ཟིམ་བུ་དལ་བུ་དལ་བུས་འབབ་སྟེ།

ཐོ་རངས་སྐྱ་རེངས་ཤར་བའི་དུས་ན་སྤྲིན་ལྷ་གྱེས་ཤིང་ནམ་མཁའ་ལ་སྤྲིན་མེད་པར་གྱུར་ཏོ།

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་ལ་རྩྭ་སར་པ་དག་སྐྱེ་སྟེ།

རེག་བཟོད་པ་དང་ལྡན་པ།

དྲི་དང་ལྡན་པ།

སྔོ་ཞིང་འཇམ་པ།

གཡས་ཕྱོགས་སུ་འཁྱིལ་པ་དག་སྐྱེ་བ་འདི་ལྟ་སྟེ།

དཔེར་ན་རྨ་བྱའི་མགྲིན་པའི་སྤུའི་ཁ་དོག་བཞིན་ནོ།

འདི་ལྟ་སྟེ།

དཔེར་ན་བར་ཤ་ཀའི་མེ་ཏོག་གི་དྲི་བཞིན་ནོ།

འདི་ལྟ་སྟེ།

དཔེར་ན་ཀ་ཙ་ལིན་དའི་

གོས་ལ་རེག་པ་བཞིན་ཏེ།

རྐང་མཐིལ་བཞག་ན་ནི་སོར་བཞིས་ནེམས་ཞེས་བྱེད་པ།

རྐང་མཐིལ་བཏེགས་ན་ནི་སོར་བཞིས་པར་ཅེས་བྱེད་པ།

མེ་ཏོག་དང་།

འདབ་མ་དང་།

འབྲས་བུ་དང་ལྡན་པ་བལྟ་བས་ཆོག་མི་ཤེས་པ་དག་གོ །

ཡང་རིའི་རྒྱལ་པོ་བྱ་རྒོད་ཀྱི་ཕུང་པོ་དེ་ལ་འབབ་ཆུའི་དངོ་དང་།

མཚོ་བྲན་དང་།

མཚོ་དང་།

མཚེའུ་དང་།

རྫིང་རྣམ་པ་མང་པོ་བསིལ་བའི་ཆུས་རབ་ཏུ་གང་བ་དག་ཡོད་དེ།

དེ་དག་ལས་པད་མ་སྔོན་པོ་དང་།

སེར་པོ་དང་།

དམར་པོ་དང་།

དཀར་པོ་དང་།

ལེབ་རྒན་དང་།

ཤེལ་གྱི་ཁ་དོག་ལྟ་བུ་དང་།

མེའི་ཁ་དོག་ལྟ་བུ་དང་།

གསེར་གྱི་ཁ་དོག་ལྟ་བུ་ཆེ་ཁྱད་ཤིང་རྟའི་འཕང་ལོ་ཙམ་དག་སྐྱེ་སྟེ།

དེ་དག་བཅད་ན་དྲི་ངད་ཕྱོགས་བཞི་ཀུན་ཏུ་དཔག་ཚད་ཙམ་དུ་ལྡང་ངོ་།

རིའི་རྒྱལ་པོ་དེའི་རྩེ་མོ་ལ་པད་མའི་གདན་ཆེན་པོ་ཨན་ད་རྙིལ་གཞན་གྱིས་མི་ཚུགས་པ་རྡོ་རྗེ་ལྟ་བུའི་ཆུ་བ་ཅན།

བཻ་དཱུརྱ་ཆེན་པོས་མཐའ་བསྐོར་བ།

འཛམ་བུ་ཆུ་བོའི་གསེར་དྲི་མ་མེད་པའི་འདབ་མ་རྒྱས་པ།

ཙན་དན་དུས་ཀྱི་རྗེས་སུ་འབྲང་བའི་སྙིང་པོ་རྣམ་པར་དག་པ།

རིན་པོ་ཆེ་རྡོའི་སྙིང་པོའི་ཟེ་བ་དང་ལྡན་པ།

ཚད་རྒྱ་མཚོ་ལྟར་ཡངས་ཤིང་རྒྱ་ཆེ་བ།

ལྷ་མ་ཡིན་གྱི་དབང་པོ་ས་ཡས་སྙིང་པོ་ཀུན་དུ་བཟུང་བ།

ནོར་བུ་རིན་པོ་ཆེ་ས་ཡའི་དྲ་བ་སྣ་ཚོགས་ཀྱིས་གཡོགས་པ།

ཀླུའི་དབང་པོ་ས་ཡས་སྤྲིན་ལས་སྤོས་ཆུའི་ཆར་ཕབ་པ།

ནམ་མཁའ་ལྡིང་གི་དབང་པོ་ས་ཡས་ཁ་ནས་དར་སྤྱངས་ཤིང་རི་མོ་བྱས་པ།

མིའམ་ཅིའི་དབང་པོ་ས་ཡས་ཕན་པའི་སེམས་ཀྱིས་བལྟས་པ།

ལྟོ་འཕྱེ་ཆེན་པོའི་དབང་པོ་ས་ཡས་གདོང་གིས་ཕྱག་འཚལ་ཞིང་རི་མོ་བྱས་པ།

དྲི་ཟའི་དབང་པོ་ས་ཡས་བསྟོད་ཅིང་བསྔགས་ལ་མཆོད་པ།

ལྷའི་དབང་པོ་ས་ཡས་མེ་ཏོག་དང་།

ཕྲེང་བ་དང་།

སྤོས་དང་།

བྱུག་པ་དང་།

ཕྱེ་མ་དང་།

གོས་དང་།

གདུགས་དང་།

རྒྱལ་མཚན་དང་།

ལྷའི་བ་དན་གྱི་སྤྲིན་གྱི་ཆར་ཕབ་པ།

ཚངས་པའི་དབང་པོ་ས་ཡས་མགོ་བོས་ཕྱག་འཚལ་

ཞིང་རི་མོ་བྱས་པ།

གནས་གཙང་མའི་རིས་ཀྱི་ལྷའི་བུ་ས་ཡས་ཐལ་མོ་སྦྱར་ནས་ཕྱག་བྱས་པ།

མིའི་དབང་པོ་འཁོར་ལོས་སྒྱུར་བ་ས་ཡས་ནོར་བུ་རིན་པོ་ཆེ་སྣ་བདུན་དང་ལྡན་པས་བསུ་བ།

རྒྱ་མཚོའི་ལྷ་ས་ཡས་བསུ་ཞིང་ཕྱག་བྱས་པ།

ནོར་བུ་རིན་པོ་ཆེ་སྐར་མདོག་ས་ཡས་འོད་ཟེར་གྱིས་སྣང་བར་བྱས་པ།

བསོད་ནམས་ཀྱིས་དག་པའི་ནོར་བུ་རིན་པོ་ཆེ་ས་ཡས་ཤིན་ཏུ་ངེས་པར་མཛེས་པར་བྱས་པ།

ནོར་བུ་རིན་པོ་ཆེ་རྣམ་པར་སྣང་བྱེད་ས་ཡས་སྙིང་པོ་དྲི་མ་མེད་པ།

ནོར་བུ་རིན་པོ་ཆེ་དཔལ་གྱི་འོད་ཟེར་ས་ཡས་དཔལ་རབ་ཏུ་ཐལ་ལེ་བ།

ནོར་བུ་རིན་པོ་ཆེའི་མཛོད་སྣ་ཚོགས་ས་ཡས་མཐའ་ཡས་པར་སྣང་བ།

ནོར་བུ་རིན་པོ་ཆེ་འཛམ་བུའི་རྒྱལ་མཚན་ས་ཡས་ལེགས་པར་བཟུང་བས་བརྟན་པར་གྱུར་པ།

ནོར་བུ་རིན་པོ་ཆེ་རྡོ་རྗེ་སེང་གེ་ས་ཡས་གཞན་གྱིས་མི་ཐུབ་པ་བཀོད་པ།

ནོར་བུ་རིན་པོ་ཆེ་ཉི་མའི་སྙིང་པོ་ས་ཡས་རྒྱ་ཆེར་སྤྲས་པ།

ནོར་བུ་རིན་པོ་ཆེ་བསམ་གྱིས་མི་ཁྱབ་པ་ས་ཡས་ཁ་དོག་སྣ་ཚོགས་ཀྱི་རི་མོ་བྱས་པ།

ཡིད་བཞིན་གྱི་ནོར་བུ་རིན་པོ་ཆེ་ས་ཡས་མི་ཟད་པ་བཀོད་པས་རི་མོ་བྱས་པ་བྱུང་སྟེ།

པད་མོ་ཆེན་པོ་དེ་ནི་དེ་བཞིན་གཤེགས་པའི་འཇིག་རྟེན་ལས་འདས་པའི་དགེ་བའི་རྩ་བ་ལས་ངེས་པར་བྱུང་བ།

བྱང་ཆུབ་སེམས་དཔའི་བསམ་པས་མནོས་པ།

ཕྱོགས་ཐམས་ཅད་དུ་མངོན་དུ་གོ་བར་བྱེད་པ།

སྒྱུ་མར་གྱུར་པའི་ཆོས་ལས་ངེས་པར་བྱུང་བ།

དྲི་ང་བ་མེད་པའི་ལས་ལས་སྐྱེས་པ།

ཉོན་མོངས་པ་མེད་པའི་ཆོས་ཉིད་ཀྱི་ཚུལ་བཀོད་པ།

རྨི་ལམ་ལྟ་བུའི་ཆོས་ཉིད་ཀྱིས་ཀུན་ཏུ་རྒྱུ་བ།

མངོན་པར་འདུ་བྱེད་པ་མེད་པའི་ཆོས་ཉིད་ཀྱིས་རྒྱས་བཏབ་པ།

ཆགས་པ་མེད་པ་དང་ལྡན་པ།

ཕྱོགས་ཀུན་ཏུ་ཆོས་ཀྱི་དབྱིངས་ཀྱིས་ཁྱབ་པར་བྱེད་པ།

སངས་རྒྱས་ཀྱི་ཡུལ་རབ་ཏུ་བརྗོད་པ་དང་འཐུན་པ་སྟེ།

དེའི་རྣམ་པ་དང་།

ཡོན་ཏན་དང་།

དབྱིབས་དང་།

ཁ་དོག་དང་།

བཀོད་པའི་མཐའ་ནི་བསྐལ་པ་གྲངས་མེད་པར་ཡང་རྟོགས་པར་མི་ནུས་པའི་པད་མ་ཆེན་པོ་དེ་ལ་བཅོམ་ལྡན་འདས་སྐྱིལ་མོ་ཀྲུང་བཅས་ནས་བཞུགས་ཏེ།

འདི་ལྟར་དགེ་སློང་བརྒྱད་སྟོང་གི་དགེ་འདུན་ཆེན་པོ་དང་ཐབས་ཅིག་པ་ལ་

འདི་ལྟ་སྟེ།

ཚེ་དང་ལྡན་པ་ཀུན་ཤེས་ཀོའུ་དི་ནྱ་དང་།

ཚེ་དང་ལྡན་པ་རྟ་ཐུལ་དང་།

ཚེ་དང་ལྡན་པ་རླངས་པ་དང་།

ཚེ་དང་ལྡན་པ་མིང་ཆེན་དང་།

ཚེ་དང་ལྡན་པ་འཆར་ཀ་དང་།

ཚེ་དང་ལྡན་པ་གྲགས་པ་དང་།

ཚེ་དང་ལྡན་པ་གང་པོ་དང་།

ཚེ་དང་ལྡན་པ་དྲི་མ་མེད་པ་དང་།

ཚེ་དང་ལྡན་པ་བ་ལང་བདག་དང་།

ཚེ་དང་ལྡན་པ་ལག་བཟངས་དང་།

ཚེ་དང་ལྡན་པ་ལྟེང་རྒྱས་འོད་སྲུང་དང་།

ཚེ་དང་ལྡན་པ་ཆུ་ཀླུང་འོད་སྲུང་དང་།

ཚེ་དང་ལྡན་པ་ག་ཡ་འོད་སྲུང་དང་།

ཚེ་དང་ལྡན་པ་འོད་སྲུང་ཆེན་པོ་དང་།

ཚེ་དང་ལྡན་པ་ཀཱ་ཏྱའི་བུ་དང་།

ཚེ་དང་ལྡན་པ་ཤ་ར་དྭ་ཏིའི་བུ་དང་།

ཚེ་དང་ལྡན་པ་མཽད་གལ་གྱི་བུ་ཆེན་པོ་དང་།

ཚེ་དང་ལྡན་པ་མ་འགགས་པ་དང་།

ཚེ་དང་ལྡན་པ་རབ་འབྱོར་དང་།

ཚེ་དང་ལྡན་པ་ནམ་གྲུ་དང་།

ཚེ་དང་ལྡན་པ་བྱམས་མའི་བུ་གང་པོ་དང་།

ཚེ་དང་ལྡན་པ་ཉེ་བར་འཁོར་དང་།

ཚེ་དང་ལྡན་པ་སྒྲ་གཅན་ཟིན་དང་།

ཚེ་དང་ལྡན་པ་ཀུན་དགའ་བོ་ལ་སོགས་པ་དགེ་སློང་བརྒྱད་སྟོང་ཐམས་ཅད་ཀྱང་བདེན་པའི་ངོ་བོ་ཉིད་ཀྱི་ཚུལ་མངོན་པར་རྫོགས་པར་རྟོགས་པ།

ཡང་དག་པའི་མཐའ་མངོན་སུམ་དུ་གྱུར་པ།

ཆོས་ཀྱི་རང་བཞིན་ལ་ཞུགས་པ།

སྲིད་པའི་རྒྱ་མཚོ་ལས་རྒལ་བ།

དེ་བཞིན་ཉིད་ནམ་མཁའ་ལྟ་བུའི་སྤྱོད་ཡུལ་བ།

ཀུན་ཏུ་སྦྱོར་བ་དང་བག་ལ་ཉལ་གྱི་འཆིང་བ་བཅད་པ།

གནས་དང་རྟེན་ལ་མ་ཆགས་པ།

ནམ་མཁའ་ལྟར་ཞི་བ་ལ་རྣམ་པར་རྒྱུ་བ།

སངས་རྒྱས་ལ་ནེམ་ནུར་དང་།

ཡིད་གཉིས་དང་།

ཐེ་ཚོམ་ཟ་བ་བཅད་པ།

སངས་རྒྱས་ཀྱི་ཡེ་ཤེས་ཀྱི་རྒྱ་མཚོ་ལ་མོས་པའི་ལམ་དུ་ཞུགས་པ།

འགྲོ་བ་ཐམས་ཅད་ལ་ཕན་པའི་ཕྱིར་ཞུགས་པ།

གསོལ་བ་མ་བཏབ་པར་དགེ་བའི་བཤེས་གཉེན་བྱེད་པ།

སེམས་ཅན་ཐམས་ཅད་བསྲུང་བར་ཞུགས་པ།

སེམས་ཅན་ཐམས་ཅད་ཡོངས་སུ་མི་གཏོང་བའི་མཛའ་བཤེས་སུ་གྱུར་པ།

སངས་རྒྱས་ཀྱི་བསྟན་པའི་སྤྱོད་ཡུལ་ལས་ངེས་པར་བྱུང་བ།

དེ་བཞིན་གཤེགས་པའི་བསྟན་པ་བསྲུང་བར་ཞུགས་པ།

སངས་རྒྱས་ཀྱི་བསྟན་པ་ཀུན་ཏུ་འཛིན་པར་སྨོན་ལམ་བཏབ་པ།

དེ་བཞིན་གཤེགས་པའི་གདུང་རིགས་འབྱུང་བར་མངོན་དུ་ཕྱོགས་པ།

ཐམས་ཅད་མཁྱེན་པའི་

ཡེ་ཤེས་མངོན་དུ་གྱུར་པ་ཤ་སྟག་གོ །

ཀུན་ཏུ་བཟང་པོ་དང་།

བྱང་ཆུབ་སེམས་དཔའ་འཇམ་དཔལ་ལ་སོགས་པ་བྱང་ཆུབ་སེམས་དཔའ་བརྒྱད་སྟོང་དང་ཐབས་ཅིག་པ་ལ་འདི་ལྟ་སྟེ།

བྱང་ཆུབ་སེམས་དཔའ་ཡེ་ཤེས་བླ་མའི་ཡེ་ཤེས་ཅན་དང་།

རིན་ཆེན་བླ་མའི་ཡེ་ཤེས་ཅན་དང་།

སྐད་ཐམས་ཅད་ཤེས་པ་ཅན་དང་།

ཐོགས་པ་མེད་པའི་ཡེ་ཤེས་ཅན་དང་།

མེ་ཏོག་བླ་མའི་ཡེ་ཤེས་ཅན་དང་།

ཉི་མའི་བླ་མའི་ཡེ་ཤེས་ཅན་དང་།

ཟླ་བའི་བླ་མའི་ཡེ་ཤེས་ཅན་དང་།

དྲི་མ་མེད་པའི་བླ་མའི་ཡེ་ཤེས་ཅན་དང་།

རྡོ་རྗེའི་ཡེ་ཤེས་ཅན་དང་།

རྡུལ་མེད་ཡེ་ཤེས་ཅན་དང་།

བྱང་ཆུབ་སེམས་དཔའ་རྣམ་པར་སྣང་བའི་ཡེ་ཤེས་ཅན་དང་།

བྱང་ཆུབ་སེམས་དཔའ་སྣང་བའི་རྒྱལ་མཚན་དང་།

ལྷུན་པོའི་རྒྱལ་མཚན་དང་།

རིན་ཆེན་རྒྱལ་མཚན་དང་།

མ་ཆགས་རྒྱལ་མཚན་དང་།

མེ་ཏོག་རྒྱལ་མཚན་དང་།

དྲི་མེད་རྒྱལ་མཚན་དང་།

ཉི་མའི་རྒྱལ་མཚན་དང་།

མཛེས་པའི་རྒྱལ་མཚན་དང་།

རྡུལ་མེད་རྒྱལ་མཚན་དང་།

བྱང་ཆུབ་སེམས་དཔའ་རྣམ་པར་སྣང་བའི་རྒྱལ་མཚན་དང་།

བྱང་ཆུབ་སེམས་དཔའ་སའི་གཟི་བརྗིད་དང་།

རིན་པོ་ཆེའི་གཟི་བརྗིད་དང་།

གཟི་བརྗིད་ཆེན་པོ་དང་།

ཡེ་ཤེས་རྡོ་རྗེའི་གཟི་བརྗིད་དང་།

དྲི་མ་མེད་པའི་གཟི་བརྗིད་དང་།

ཉི་མའི་གཟི་བརྗིད་དང་།

ཟླ་བའི་གཟི་བརྗིད་དང་།

བསོད་ནམས་རིའི་གཟི་བརྗིད་དང་།

ཡེ་ཤེས་སྣང་བའི་གཟི་བརྗིད་དང་།

བྱང་ཆུབ་སེམས་དཔའ་ཀུན་ནས་དཔལ་གྱི་གཟི་བརྗིད་དང་།

བྱང་ཆུབ་སེམས་དཔའ་ནམ་མཁའི་སྙིང་པོ་དང་།

པད་མའི་སྙིང་པོ་དང་།

རིན་པོ་ཆེའི་སྙིང་པོ་དང་།

ཉི་མའི་སྙིང་པོ་དང་།

ཡོན་ཏན་རྣམ་པར་དག་པའི་སྙིང་པོ་དང་།

ཆོས་ཀྱི་རྒྱ་མཚོའི་སྙིང་པོ་དང་།

རྣམ་པར་སྣང་བའི་སྙིང་པོ་དང་།

ལྟེ་བའི་སྙིང་པོ་དང་།

བྱང་ཆུབ་སེམས་དཔའ་པད་མའི་དཔལ་གྱི་སྙིང་པོ་དང་།

བྱང་ཆུབ་སེམས་དཔའ་ཉི་མའི་མིག་དང་།

རྣམ་པར་དག་པའི་མིག་དང་།

དྲི་མ་མེད་པའི་མིག་དང་།

མ་ཆགས་པའི་མིག་དང་།

ཀུན་ཏུ་ལྟ་བའི་མིག་དང་།

ཡེ་ཤེས་ཤིན་ཏུ་རྣོ་བའི་མིག་དང་།

རྡོ་རྗེའི་མིག་དང་།

རིན་པོ་ཆེའི་མིག་དང་།

ནམ་མཁའི་མིག་དང་།

བྱང་

ཆུབ་སེམས་དཔའ་ཀུན་ནས་མིག་དང་།

བྱང་ཆུབ་སེམས་དཔའ་ལྷའི་ཅོད་པན་དང་།

ཆོས་ཀྱི་དབྱིངས་སྣང་བའི་ནོར་བུའི་ཅོད་པན་དང་།

བྱང་ཆུབ་ཀྱི་སྙིང་པོའི་ནོར་བུའི་ཅོད་པན་དང་།

ཕྱོགས་རྣམ་པར་སྣང་བའི་ཅོད་པན་དང་།

སངས་རྒྱས་ཐམས་ཅད་བྱུང་བའི་སྙིང་པོའི་ཅོད་པན་དང་།

འཇིག་རྟེན་ཐམས་ཅད་ལས་འཕགས་པའི་ཅོད་པན་དང་།

ཀུན་ནས་རྣམ་པར་སྣང་བའི་ཅོད་པན་དང་།

ཟིལ་གྱིས་མི་ནོན་པའི་ཅོད་པན་དང་།

དེ་བཞིན་གཤེགས་པ་ཐམས་ཅད་ཀྱི་སེང་གེའི་གདན་གཡོགས་པའི་ཅོད་པན་དང་།

བྱང་ཆུབ་སེམས་དཔའ་ནམ་མཁའ་ལྟ་བུའི་ཆོས་ཀྱི་དབྱིངས་ཀུན་ནས་སྣང་བའི་ཅོད་པན་དང་།

བྱང་ཆུབ་སེམས་དཔའ་ཚངས་པའི་དབང་པོའི་གཙུག་པུད་དང་།

ཀླུའི་དབང་པོའི་གཙུག་པུད་དང་།

སངས་རྒྱས་ཐམས་ཅད་ཀྱི་སྤྲུལ་པ་སྣང་བའི་གཙུག་པུད་དང་།

བྱང་ཆུབ་ཀྱི་སྙིང་པོའི་གཙུག་པུད་དང་།

སྨོན་ལམ་ཐམས་ཅད་ཀྱི་རྒྱ་མཚོའི་དབྱིངས་ཀྱི་ནོར་བུའི་རྒྱལ་པོའི་གཙུག་པུད་དང་།

དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་གྱིས་འགྲོལ་བའི་ནོར་བུ་རིན་པོ་ཆེ་རབ་ཏུ་བསྒྲགས་པའི་གཙུག་པུད་དང་།

ནམ་མཁའི་དཀྱིལ་ཐམས་ཅད་དབྱེར་མེད་པ་རྣམ་པར་རིག་པའི་ནོར་བུ་རིན་པོ་ཆེས་བརྒྱན་པའི་གཙུག་པུད་དང་།

དེ་བཞིན་གཤེགས་པ་ཐམས་ཅད་ཀྱི་རྣམ་པར་སྤྲུལ་པ་སྣང་བའི་རྒྱལ་མཚན་གྱི་ནོར་བུ་རིན་པོ་ཆེའི་དྲ་བས་གཡོགས་པའི་གཙུག་པུད་དང་།

དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དབྱངས་ཀྱི་གཙུག་པུད་དང་།

བྱང་ཆུབ་སེམས་དཔའ་དུས་གསུམ་ཐམས་ཅད་ཀྱི་འཁོར་ལོའི་དབྱངས་ཀྱི་གཙུག་ཕུད་ཅེས་བྱ་བ་དང་།

བྱང་ཆུབ་སེམས་དཔའ་འོད་ཆེན་དང་།

དྲི་མ་མེད་པའི་འོད་དང་།

རིན་པོ་ཆེའི་འོད་དང་།

རྡུལ་མེད་འོད་དང་།

སྐར་མའི་འོད་དང་།

ཆོས་ཀྱི་འོད་དང་།

ཞི་བའི་འོད་དང་།

ཉི་མའི་འོད་དང་།

རྣམ་པར་སྤྲུལ་པའི་འོད་དང་།

བྱང་ཆུབ་སེམས་དཔའ་ལྷའི་འོད་དང་།

བྱང་ཆུབ་སེམས་དཔའ་བསོད་ནམས་ཀྱི་ཏོག་དང་།

ཡེ་ཤེས་ཀྱི་ཏོག་དང་།

ཆོས་ཀྱི་ཏོག་དང་།

མངོན་པར་ཤེས་པའི་ཏོག་དང་།

འོད་ཀྱི་ཏོག་དང་།

མེ་ཏོག་གི་ཏོག་དང་།

ནོར་བུའི་ཏོག་དང་།

བློའི་ཏོག་དང་།

ཚངས་པའི་ཏོག་དང་།

བྱང་ཆུབ་སེམས་དཔའ་ཀུན་ནས་སྣང་བའི་ཏོག་དང་།

བྱང་ཆུབ་སེམས་དཔའ་ཚངས་པའི་དབྱངས་དང་།

རྒྱ་མཚོའི་དབྱངས་དང་།

ས་ངེས་པར་སྒྲོགས་པའི་དབྱངས་དང་།

འཇིག་རྟེན་དབང་པོའི་དབྱངས་དང་།

རིའི་དབང་པོའི་དབྱངས་དང་།

རིའི་དབང་པོའི་རྒྱལ་པོ་ཀུན་ཏུ་རྡོབ་པའི་དབྱངས་དང་།

ཆོས་ཀྱི་དབྱིངས་རྒྱས་པར་འགེངས་པའི་དབྱངས་དང་།

ཆོས་ཀྱི་རྒྱ་མཚོ་ཐམས་ཅད་བསྒྲགས་པའི་དབྱངས་དང་།

བདུད་ཀྱི་དཀྱིལ་འཁོར་ཐམས་ཅད་རབ་ཏུ་འཇོམས་པའི་དབྱངས་དང་།

སྙིང་རྗེ་ཆེན་པོའི་ཚུལ་གྱི་འབྲུག་ངེས་པར་བསྒྲགས་པའི་དབྱངས་དང་།

བྱང་ཆུབ་སེམས་དཔའ་འགྲོ་བ་ཐམས་ཅད་ཀྱི་སྡུག་བསྔལ་རབ་ཏུ་ཞི་བའི་སྒྲ་དབྱངས་དང་།

བྱང་ཆུབ་སེམས་དཔའ་ཆོས་འཕགས་དང་།

ཁྱད་པར་འཕགས་དང་།

ཡེ་ཤེས་འཕགས་དང་།

བསོད་ནམས་རི་རབ་འཕགས་དང་།

ཡོན་ཏན་མཆོག་རབ་འཕགས་དང་།

གྲགས་པ་འཕགས་དང་།

ཀུན་ནས་སྣང་འཕགས་དང་།

བྱམས་པ་ཆེན་པོ་འཕགས་དང་།

ཡེ་ཤེས་སྣང་བ་འཕགས་དང་།

བྱང་ཆུབ་སེམས་དཔའ་དེ་བཞིན་གཤེགས་པའི་གདུང་རིགས་འཕགས་དང་།

བྱང་ཆུབ་སེམས་དཔའ་འོད་དཔལ་དང་།

མཆོག་རབ་དཔལ་དང་།

ཆོས་འཕགས་དཔལ་དང་།

རྣམ་པར་སྣང་བའི་དཔལ་དང་།

ཆོས་དཔལ་དང་།

ཟླ་བ་དཔལ་དང་།

ནམ་མཁའ་དཔལ་དང་།

རིན་ཆེན་དཔལ་དང་།

ཏོག་དཔལ་དང་།

བྱང་ཆུབ་སེམས་དཔའ་ཡེ་ཤེས་དཔལ་དང་།

བྱང་ཆུབ་སེམས་དཔའ་སཱ་ལའི་དབང་པོའི་རྒྱལ་པོ་དང་།

ཆོས་ཀྱི་དབང་པོའི་རྒྱལ་པོ་དང་།

གླང་པོ་ཆེའི་དབང་པོའི་རྒྱལ་པོ་དང་།

ཚངས་པའི་དབང་པོའི་རྒྱལ་པོ་དང་།

རིའི་དབང་པོའི་རྒྱལ་པོ་དང་།

ཚོགས་ཀྱི་དབང་པོའི་རྒྱལ་པོ་དང་།

ལྷའི་དབང་པོའི་རྒྱལ་པོ་དང་།

ཞི་བའི་དབང་པོའི་རྒྱལ་པོ་དང་།

མི་གཡོ་བའི་དབང་པོའི་རྒྱལ་པོ་དང་།

ཁྱུ་མཆོག་གི་དབང་པོའི་རྒྱལ་པོ་དང་།

བྱང་ཆུབ་སེམས་དཔའ་བྱང་ཆུབ་མཆོག་གི་དབང་པོའི་རྒྱལ་པོ་དང་།

བྱང་ཆུབ་སེམས་དཔའ་ཞི་བའི་སྒྲ་དང་།

ཆགས་པ་མེད་པའི་སྒྲ་དང་།

སའི་དབྱངས་སྒྲ་དང་།

རྒྱ་མཚོའི་དབྱངས་སྒྲ་དང་།

སྤྲིན་གྱི་དབྱངས་སྒྲ་དང་།

ཆོས་སྣང་བའི་སྒྲ་དང་།

ནམ་མཁའི་དབྱངས་སྒྲ་དང་།

བྱང་ཆུབ་

སེམས་དཔའ་དགེ་བའི་རྩ་བ་ཐམས་ཅད་ངེས་པར་བསྒྲགས་པའི་སྒྲ་དང་།

སྔོན་གྱི་སྨོན་ལམ་གྱིས་ཡང་དག་པར་བསྐུལ་བའི་སྒྲ་དང་།

བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་ཐམས་ཅད་ཀྱི་དབྱངས་སྒྲ་དང་།

བྱང་ཆུབ་སེམས་དཔའ་ཡེ་ཤེས་ལྷུན་པོའི་བློ་དང་།

ནམ་མཁའི་བློ་དང་།

དྲི་མ་མེད་པའི་བློ་དང་།

ཆགས་པ་མེད་པའི་བློ་དང་།

སད་པའི་བློ་དང་།

དུས་གསུམ་སྣང་བའི་བློ་དང་།

རིན་པོ་ཆེའི་བློ་དང་།

ཡངས་པའི་བློ་དང་།

ཀུན་ནས་སྣང་བའི་བློ་དང་།

བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་སྣང་བའི་བློ་ལ་སོགས་པ་བྱང་ཆུབ་སེམས་དཔའ་བརྒྱད་སྟོང་པོ་ཐམས་ཅད་ཀྱང་ཀུན་ཏུ་བཟང་པོའི་སྤྱོད་པའི་སྨོན་ལམ་ལས་ངེས་པར་བྱུང་བ།

སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པས་སྤྱོད་ཡུལ་ཐོགས་པ་མེད་པ།

དེ་བཞིན་གཤེགས་པ་ཐམས་ཅད་ཀྱི་ཐད་དུ་འགྲོ་བས་ལུས་མཐའ་ཡས་པར་བྱིན་གྱིས་རློབས་པ།

སངས་རྒྱས་ཀྱི་རྣམ་པར་སྤྲུལ་པ་ཐམས་ཅད་རྣམ་པར་རིག་པས་མཐའ་ཡས་པ་ལ་དམིགས་པའི་མིག་གི་དཀྱིལ་འཁོར་རྣམ་པར་དག་པ།

དེ་བཞིན་གཤེགས་པ་ཐམས་ཅད་མངོན་པར་རྫོགས་པར་བྱང་ཆུབ་པའི་སྒོར་འགྲོ་བ་རྒྱུན་མི་གཅོད་པས་འགྲོ་བ་ཚད་མེད་པ།

ཆོས་རྒྱ་མཚོ་ཐམས་ཅད་ཀྱི་ཚུལ་ཤེས་པའི་སྣང་བ་ནོད་པས་སྣང་བ་མཐའ་ཡས་པ།

སོ་སོ་ཡང་དག་པར་རིག་པ་རྣམ་པར་དག་པས་བསྐལ་པ་མཐའ་ཡས་པར་ཡོན་ཏན་མི་ཟད་པར་སྟོན་པ།

ཡེ་ཤེས་ཀྱི་སྤྱོད་ཡུལ་རྣམ་པར་དག་པས་ནམ་མཁའི་ཁམས་ཀྱིས་ཀླས་པ།

བསམ་པ་ཇི་ལྟ་བ་བཞིན་དུ་འགྲོ་བའི་ལུས་གཟུགས་ཀུན་ཏུ་སྟོན་པས་གནས་པ་མེད་པ།

སེམས་ཅན་མེད་པ་དང་ལྡན་པའི་དབྱིངས་ཡོངས་སུ་ཤེས་པས་རབ་རིབ་མེད་པ།

ཆོས་ཀྱི་དབྱིངས་ཐམས་ཅད་འོད་ཟེར་གྱི་དྲ་བས་རྒྱས་པར་འགེངས་པས་ཤེས་རབ་ནམ་མཁའ་ལྟ་བུ།

སེམས་ཤིན་ཏུ་ཞི་ཞིང་རབ་ཏུ་ཞི་བ།

གཟུངས་ཀྱི་རིགས་ཐམས་ཅད་ཤེས་པའི་ཡུལ་དང་ལྡན་པ།

ཏིང་ངེ་འཛིན་གྱིས་ཕ་རོལ་གནོན་པ་ལ་འཇིགས་པ་མེད་པ།

ཆོས་ཀྱི་དབྱིངས་གནས་པའི་མཐར་ཐུག་པའི་མིག་ཅན།

ཆོས་ཐམས་ཅད་མི་དམིགས་པར་གནས་པ་ཐོབ་པ།

ཤེས་རབ་རྒྱ་མཚོ་མཐའ་ཡས་པས་རྣམ་པར་

རྒྱུ་བ།

ཡེ་ཤེས་དམ་པའི་ཕ་རོལ་ཏུ་སོན་པ།

ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་པ།

རྫུ་འཕྲུལ་གྱི་ཕ་རོལ་ཏུ་ཕྱིན་པས་འགྲོ་བ་མཆོག་ཐམས་ཅད་ཀྱི་ཕ་རོལ་ཏུ་སོན་པ།

ཏིང་ངེ་འཛིན་མཆོག་ལ་དབང་ཐོབ་པ་ཤ་སྟག་གོ །

དགེ་སློང་མ་ལྔ་བརྒྱ་དང་ཡང་ཐབས་ཅིག་པ་ལ་འདི་ལྟ་སྟེ།

གཽ་ཏ་མཱི་སྐྱེ་དགུའི་བདག་མོ་ཆེན་མོ་དང་།

དགེ་སློང་མ་བདེ་མ་དང་།

དགེ་སློང་མ་ཨུད་པ་ལའི་མདོག་དང་།

དགེ་སློང་མ་གཽ་ཏ་མཱི་སྐེམ་མོ་དང་།

སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་ལ་སོགས་པ་དགེ་སློང་མ་ལྔ་བརྒྱ་དང་ཡང་ཐབས་ཅིག་གོ །

དགེ་བསྙེན་ལྔ་བརྒྱ་ཙམ་དང་ཡང་ཐབས་ཅིག་པ་ལ་འདི་ལྟ་སྟེ།

དགེ་བསྙེན་གཟི་བརྗིད་བཟང་པོ་དང་།

སའི་གཟི་བརྗིད་དང་།

ཤེས་རབ་འོད་དང་།

གྲགས་པའི་གཟི་བརྗིད་དང་།

གྲགས་མཆོག་གཟི་བརྗིད་དང་།

བློ་གྲོས་བཟང་དང་།

ཟླ་བའི་དཔལ་དང་།

ཟླ་བ་དགའ་དང་།

ཆེར་དགའ་དང་།

སྒྲ་གཅན་བཟང་དང་།

ཆེར་བཟང་ལ་སོགས་པ་དགེ་བསྙེན་ལྔ་བརྒྱ་དང་ཡང་ཐབས་ཅིག་གོ །

དགེ་བསྙེན་མ་ལྔ་བརྒྱ་ཙམ་ལ་འདི་ལྟ་སྟེ།

དགེ་བསྙེན་མ་འོད་ཆེན་དང་།

འོད་བཟངས་དང་།

ལུས་བཟངས་དང་།

མངོན་དགའ་ལུས་དང་།

བཟང་མོ་དང་།

བཟང་དཔལ་དང་།

ཟླ་འོད་དང་།

ཏོག་འོད་དང་།

དཔལ་འོད་དང་།

མིག་བཟངས་ལ་སོགས་པ་དགེ་བསྙེན་མ་ལྔ་བརྒྱ་དང་ཡང་ཐབས་ཅིག་གོ །

དེ་བཞིན་དུ་ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

མིའམ་ཅི་དང་།

ལྟོ་འཕྱེ་ཆེན་པོ་རྣམས་ཀྱིས་ཡོངས་སུ་བསྐོར་ཅིང་མདུན་གྱིས་བལྟས་ནས་བཅོམ་ལྡན་འདས་ཆོས་སྟོན་ཏེ།

འདི་ལྟ་སྟེ།

སྡོམ་པ་གསུམ་བསྟན་པ་ཞེས་བྱ་བའི་ཆོས་ཀྱི་སྒོའི་ལེའུ་ཡང་དག་པར་རབ་ཏུ་སྟོན་ཏོ།

དེ་བཞིན་གཤེགས་པ་ཐམས་ཅད་ཀྱི་ཡུལ།

བྱང་ཆུབ་སེམས་དཔའི་སྤྱོད་པ་རབ་ཏུ་བརྗོད་པ།

ཆོས་ཀྱི་དབྱིངས་ཀྱི་དཀྱིལ་འཁོར་ཐམས་ཅད་སྣང་བ།

ཆོས་ཀྱི་དཀྱིལ་འཁོར་ཐམས་ཅད་ཡང་དག་པར་འདུ་བར་སྣང་བ།

ཞིང་གི་དཀྱིལ་འཁོར་ཐམས་ཅད་རྣམ་པར་སྦྱོང་བའི་རྒྱན།

ཕས་ཀྱི་རྒོལ་བ་ཐམས་ཅད་རྣམ་པར་འཐོར་བ།

བདུད་ཀྱི་རྩོད་པའི་ཕ་རོལ་གྱི་དམག་ཚོགས་རབ་ཏུ་འཇོམས་པ།

སེམས་ཅན་གྱི་ཁམས་ཐམས་ཅད་ཚིམ་པར་བྱེད་

པ།

སེམས་ཅན་ཐམས་ཅད་ཀྱི་སེམས་ཀྱི་ཐིབས་པོ་སྣང་བར་བྱེད་པ།

སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་གོ་བར་བྱེད་པ།

སེམས་ཅན་ཐམས་ཅད་ཀྱི་དབང་པོ་བཞིན་དུ་འཁོར་ལོ་སྐོར་བར་སྣང་བ་རབ་ཏུ་སྟོན་ཏོ།

དེ་ནས་ཚེ་དང་ལྡན་པ་འོད་སྲུང་ཆེན་པོ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་སེམས་ཅན་གང་དག་སངས་རྒྱས་ཀྱི་ཆོས་ཚོལ་བ་དང་།

སངས་རྒྱས་ཀྱི་སྟོབས་དང་།

མི་འཇིགས་པ་ཚོལ་བ་དེ་དག་གིས་ཆོས་ཇི་ལྟ་བུ་དག་ཅིག་ཡང་དག་པར་བླངས་ཏེ་གནས་པར་བགྱི།

དེ་དག་ཡོངས་སུ་སྨིན་པར་འགྱུར་བའི་ཆོས་རྣམས་ནི་ཇི་ལྟ་བུ་ཞིག་ལགས།

དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་ཅིང་ཐོབ་པར་འགྱུར་བའི་ཆོས་རྣམས་ནི་ཇི་ལྟ་བུ་ཞིག་ལགས།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ།

འོད་སྲུང་ཁྱོད་སྐྱེ་བོ་མང་པོ་ལ་ཕན་པ་དང་།

སྐྱེ་བོ་མང་པོ་ལ་བདེ་བ་དང་།

འཇིག་རྟེན་ལ་སྙིང་བརྩེ་བ་དང་།

ལྷ་དང་མི་རྣམས་ཀྱི་དོན་དང་།

ཕན་པ་དང་བདེ་བའི་ཕྱིར་ཞུགས་ཏེ།

འདི་ལྟ་བུའི་གནས་དག་འདྲི་བར་སེམས་པ་ནི་འོད་སྲུང་ཁྱོད་ལེགས་སོ་ལེགས་སོ།

འོད་སྲུང་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ།

ཚེ་དང་ལྡན་པ་འོད་སྲུང་ཆེན་པོ་དང་།

ཐམས་ཅད་དང་ལྡན་པའི་འཁོར་དེས་བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ།

འོད་སྲུང་སེམས་ཅན་གང་དག་སངས་རྒྱས་ཀྱི་ཡེ་ཤེས་ཚོལ་བ་དང་།

སངས་རྒྱས་ཀྱི་སྟོབས་དང་།

མི་འཇིགས་པ་ཚོལ་བའི་སེམས་ཅན་དེ་ལྟ་བུ་དེ་དག་གིས་དེ་དག་གང་ལ་བརྟེན་ནས་དགེ་བའི་རྩ་བ་རྣམས་སྐྱེ་བར་འགྱུར་བའི་ཆོས་གང་ཡང་མི་དམིགས་སོ།

འོད་སྲུང་བྱང་ཆུབ་སེམས་དཔའ་ཇི་སྙེད་པ་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་ཞིང་སངས་རྒྱས་ཀྱི་ཆོས་

རྣམས་ལས་འདུས་བྱས་གཞན་པར་སེམས་ཤིང་འདུས་མ་བྱས་ལས་སངས་རྒྱས་ཀྱི་ཆོས་རྣམས་གཞན་པར་སེམས་ལ།

སངས་རྒྱས་ཀྱི་ཆོས་རྣམས་ལ་སེམས་ཤིང་འདུ་ཤེས་ལ་སྤྱོད་པར་འགྱུར་བའམ།

སངས་རྒྱས་ཀྱི་ཆོས་རྣམས་ལ་སེམས་པའོ་སྙམ་དུ་ཤེས་ན་ཤེས་པ་དེ་སངས་རྒྱས་ཀྱི་ཆོས་རྣམས་ལས་ཕྱིར་ལོག་པ་ཡིན་ཏེ།

དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཞེས་མི་བྱའོ།

དེ་ཅིའི་ཕྱིར་ཞེ་ན།

སངས་རྒྱས་ཀྱི་ཆོས་སུ་སེམས་ན་དེ་བདག་ཏུ་འཛིན་པ་ཉིད་ཡིན་པའི་ཕྱིར་རོ།

ཉིན་གཅིག་བཞིན་དུ་སྦྱོར་བས་དེ་ལ་བརྩོན་པར་བྱེད་ན་དེ་ནི་དེའི་བདག་ཏུ་འཛིན་པ་ཡིན་ཏེ་འབྲལ་བ་མ་ཡིན་ནོ།

གང་མ་བྲལ་བ་དེ་སེམས་པའོ།

གང་སེམས་པ་དང་།

གང་གིས་སེམས་པ་དང་།

གང་ལ་སེམས་པ་དེ་རྣམ་པར་ཉམས་པའོ།

གང་རྣམ་པར་ཉམས་པ་དེ་རྣམ་པར་རྒྱུག་གོ །

གང་རྣམ་པར་རྒྱུག་པ་དེ་ཀུན་ཏུ་རྒྱུག་གོ །

གང་ཀུན་ཏུ་རྒྱུག་པ་དེ་རྗེས་སུ་འགྲོའོ།

གང་རྗེས་སུ་འགྲོ་བ་དེ་རྟོག་གོ །

གང་རྟོག་པ་དེ་རྣམ་པར་རྟོག་གོ །

གང་རྣམ་པར་རྟོག་པ་དེ་རབ་ཏུ་རྟོག་གོ །

གང་རབ་ཏུ་རྟོག་པ་དེ་ཀུན་ཏུ་རྟོག་གོ །

གང་ཀུན་ཏུ་རྟོག་པ་དེ་མ་ཞི་བའོ།

གང་མ་ཞི་བ་དེ་གཡོན་ཕྱོགས་པའོ།

གང་གཡོན་ཕྱོགས་པ་དེ་འཁྱམ་པའོ།

གང་འཁྱམ་པ་དེ་ཕོངས་པའོ།

ཅིས་ཕོངས་ཞེ་ན།

བདེ་བས་ཕོངས་སོ།

བདེ་བ་གང་ཞེ་ན།

གང་ལ་ཀུན་ཏུ་རྟོག་པ་མེད་པ་དེ་བདེ་བའོ།

གང་ཕོངས་པ་དེ་སྐྱོན་ཅན་ནོ།

སྐྱོན་ཅན་གང་ཡིན་པ་དེ་ཉེ་བར་འགྲོ་བའོ།

གང་ཉེ་བར་འགྲོ་བ་དེ་བག་ལ་ཉལ་བའོ།

བག་ལ་ཉལ་བ་གང་ཡིན་པ་དེ་མཚམས་སྦྱོར་བའོ།

གང་མཚམས་སྦྱོར་བ་དེ་རྣམ་པར་མཚམས་སྦྱོར་བའོ།

གང་རྣམ་པར་མཚམས་སྦྱོར་བ་དེ་ཡོངས་སུ་མཚམས་སྦྱོར་བའོ།

གང་ཡོངས་སུ་མཚམས་སྦྱོར་བ་དེ་རྣམ་པར་སྨྲ་བའོ།

གང་རྣམ་པར་སྨྲ་བ་དེ་སྨྲ་བ་ལྐུགས་པའོ།

གང་སྨྲ་བ་ལྐུགས་པ་དེ་མྱ་ངན་བྱེད་པའོ།

གང་མྱ་ངན་བྱེད་པ་དེ་ཚིག་པར་བྱེད་པའོ།

གང་ཚིག་པར་བྱེད་པ་དེ་ཉམས་པ་སྟེ་ཡིད་དུ་འོང་བ་དང་།

ཡིད་དུ་མི་འོང་བའི་ཆོས་ཞེས་གང་ལ་གནས་པའི་དྲ་བ་ཅན་ནོ།

འདི་ལ་ཆོས་གང་

ཡང་གནས་པ་མེད་མོད་ཀྱི།

འོན་ཀྱང་འདུ་ཤེས་ཀྱི་རྒྱུན་གྱིས་འདུ་ཤེས་བཅིངས་ཤིང་།

འདུ་ཤེས་བཅིངས་པས་འདུ་ཤེས་ཀྱི་རྒྱུན་ཏེ།

དེས་ན་འདུ་ཤེས་ཀྱིས་བཅིངས་པ་ཞེས་བྱའོ།

མ་བྱུང་བའི་གནས་ནི་འདོད་ཆགས་ཀྱི་གནས།

ཁྲོ་བའི་གནས།

ཞེ་སྡང་གི་གནས།

གཏི་མུག་གི་གནས་ཏེ།

ཡང་དག་པ་མ་ཡིན་པའི་ཀུན་རྟོག་པ་ལ་རྟོག་རྣམ་པར་རྟོག །

དཔྱོད་རྣམ་པར་དཔྱོད་པས་དེའི་ཕྱིར་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མྱུར་དུ་མི་འཐོབ་བོ།

འོད་སྲུང་དེ་ལྟར་ན་སྲེད་པའི་གནས་ཏེ།

ཅིའི་ཕྱིར་སྲེད་པའི་གནས་ཞེས་བྱ་ཞེ་ན།

གང་སྲེད་པ་ཞེས་བྱ་བའི་ཆོས་དེ་ཡང་གང་ཡང་མེད་ལ་འདི་ལ་གང་གིས་སྲེད་པའི་ཆོས་ཀྱང་གང་ཡང་མེད་ཅིང་།

དེ་ལ་གང་ལ་སྲེད་པའི་ཆོས་ཀྱང་གང་ཡང་མེད་པའི་ཕྱིར་རོ།

འོན་ཀྱང་སྲེད་པ་ཞེས་མངོན་པར་ཞེན་པས་མངོན་པར་ཞེན་ཏེ་ནམ་མཁའ་ལ་སྦག་པར་བྱེད་དོ།

གང་ནམ་མཁའ་ལ་སྦག་པར་བྱེད་པ་དེས་སྦགས་པ་རྙེད་པར་འགྱུར་ཏེ།

བདག་གིས་སྦགས་པ་དང་།

སེམས་ཅན་གྱིས་སྦགས་པ་དང་།

དགེ་བ་དང་མི་དགེ་བས་སྦགས་པའོ།

འོད་སྲུང་དེ་ལྟར་ན་མེད་པའི་ཆོས་རྣམས་ཀྱིས་རྟོག་པར་བྱེད་པ་དེ་ནི་དངོས་པོ་མེད་པའོ།

གང་དངོས་པོ་མེད་པ་ལ་དངོས་པོའི་འདུ་ཤེས་ཅན་དེ་ནི་བྱང་ཆུབ་ལ་དངོས་པོར་བྱེད་དོ།

གང་བྱང་ཆུབ་ལ་དངོས་པོར་བྱེད་པ་དེ་ནི་བདག་གི་འདུ་ཤེས་ཅན་ནོ།

བདག་གི་འདུ་ཤེས་ཅན་གང་ཡིན་པ་དེ་ནི་བྱང་ཆུབ་སེམས་དཔའ་ཞེས་མི་བྱའོ།

ཅིའི་ཕྱིར་བདག་གི་འདུ་ཤེས་ཅན་ཞེས་བྱ་ཞེ་ན།

འདུ་ཤེས་མི་དམིགས་པའི་ཕྱིར་ཏེ།

གང་ལ་འདུ་ཤེས་མི་དམིགས་པ་དེ་ལ་འདུ་ཤེས་ཅན་མེད་དེ།

དེའི་ཕྱིར་བདག་གི་འདུ་ཤེས་ཅན་ཞེས་བྱའོ།

འདི་ལྟ་སྟེ།

བདག་གི་འདུ་ཤེས་ཞེས་བྱ་བ་དེ་ནི་ཡང་དག་པ་མ་ཡིན་པའི་གཞིའི་ཚིག་བླ་དགས་སོ།

འོན་ཀྱང་སེམས་ཅན་ཡོངས་སུ་རྫོགས་པ་གང་ཡིན་པ་དེ་བྱང་ཆུབ་ཡོངས་སུ་རྫོགས་པའོ།

དེ་ལ་བྱང་ཆུབ་གང་ཞེ་ན།

གང་སྒྱུ་མར་གྱུར་པ་ཡོངས་སུ་རྫོགས་པའོ།

སྒྱུ་མར་གྱུར་པ་ཡང་གང་ཞེ་ན།

སེམས་ཅན་ཆེན་པོར་འདུ་ཤེས་ཤིང་སྨྲ་བ་དང་།

སྲོག་ཆེན་པོར་འདུ་ཤེས་ཤིང་

སྨྲ་བའོ།

གང་འདུ་ཤེས་དང་།

འདུ་ཤེས་ལ་གནས་པར་བྱེད་པ་དེ་འདུ་ཤེས་མེད་པ་དང་།

འདུ་ཤེས་མེད་པ་ལ་གནས་པར་བྱེད་པའོ།

གང་འདུ་ཤེས་མེད་པ་དང་།

འདུ་ཤེས་མེད་པ་ལ་གནས་པ་དེ་རྒྱགས་པར་བྱེད་པའོ།

གང་རྒྱགས་པར་བྱེད་པ་དེ་སྡུག་བསྔལ་དང་།

སྡུག་བསྔལ་ལ་ཀུན་ཏུ་རྒྱུག་གོ །

གང་སྡུག་བསྔལ་དང་།

སྡུག་བསྔལ་ལ་ཀུན་ཏུ་རྒྱུག་པ་དེ་སྨྲ་བ་ལ་རྒྱུག་ཅིང་གནས་པའོ་ཞེས་དེ་བཞིན་གཤེགས་པས་གསུངས་སོ།

ཅིའི་ཕྱིར་སྨྲ་བ་ལ་རྒྱུག་ཅིང་གནས་པ་ཞེས་བྱ་ཞེ་ན།

ཤིན་ཏུ་ཡིད་ལ་བྱེད་པའི་ཕྱིར་རོ།

གང་ལ་ཡིད་ལ་བྱེད་པ་ཡོད་པ་དེ་ལ་ངར་འཛིན་པ་ཡོད་དོ།

གང་ལ་ངར་འཛིན་པ་ཡོད་པ་དེ་ལ་བྱེད་པ་ཡོད་དོ།

གང་ལ་བྱེད་པ་ཡོད་པ་དེ་ལ་ཤིན་ཏུ་ཡོད་དོ།

གང་ལ་ཤིན་ཏུ་ཡོད་པ་དེ་ཀུན་ཏུ་བརྗོད་པ་དང་།

ཉེ་བར་བརྗོད་པ་དང་།

གནས་པར་བྱེད་པའོ་ཞེས་དེ་བཞིན་གཤེགས་པས་གསུངས་ཏེ།

དེའི་ཕྱིར་ཆོས་ཐམས་ཅད་ནི་ཡིད་ལ་བྱེད་པ་ལས་བྱུང་བའོ།

འོད་སྲུང་འདི་ལྟ་སྟེ།

དཔེར་ན་སྟེང་གི་བར་སྣང་ལས་སྤྲིན་གྱི་ཕུང་པོ་བྱུང་བ་དེ་དག་ནི་ཤར་ཕྱོགས་ནས་མ་འོངས།

ལྷོ་ཕྱོགས་ནས་མ་ཡིན།

ནུབ་ཕྱོགས་ནས་མ་ཡིན།

བྱང་ཕྱོགས་ནས་མ་ཡིན།

སྟེང་ནས་མ་ཡིན།

འོག་ནས་མ་ཡིན།

ཕྱོགས་ནས་མ་ཡིན།

ཕྱོགས་མཚམས་ནས་ཀྱང་མ་འོངས་ཏེ།

དེ་བཞིན་གཤེགས་པ་ཡང་དག་པ་གསུང་བས་དེ་ཕྱོགས་བཅུ་ནས་མ་འོངས་པར་མཁྱེན་ནས།

དོན་གྱི་ཚུལ་དང་།

རིགས་པའི་ཚུལ་དང་།

ཡང་དག་པའི་ཚུལ་གྱིས་སྤྲིན་གྱི་ཕུང་པོ་ནི་ཕུང་པོ་མེད་པའོ་ཞེས་ཡང་དག་པ་ཇི་ལྟ་བ་བཞིན་དུ་གསུངས་ཏེ།

དེས་ན་ཕུང་པོ་མེད་པ་ནི་སྤྲིན་གྱི་ཕུང་པོ་ཞེས་བྱའོ།

ཅིའི་ཕྱིར་སྤྲིན་གྱི་ཕུང་པོ་ཞེས་བྱ་ཞེ་ན།

ཡངས་པའི་གནས་ཀྱིས་སོ།

ཡངས་པའི་གནས་ཇི་ལྟ་བུ་ཞེ་ན།

མཚན་མ་སྣ་ཚོགས་ཀྱི་སྦྱོར་བས་ལྡིང་བའི་མཚན་མའོ་ཞེས་རྒྱུད་འཁྲུལ་གྱི།

དེ་ལ་ནི་ལྡིང་བར་རྣམ་པར་ཤེས་པར་བྱེད་པ་གང་ཡང་མེད་དོ།

སྤྲིན་གྱི་ཕུང་པོ་ནི་ལྡིང་བའི་མཚན་མ་ལས་བྱུང་བ་ལ་ལྟོས།

དེ་ལ་ལྡིང་བའི་མཚན་མ་གང་ཡིན་པ་དེ་ནི་མཚན་མ་མེད་པའོ།

གང་

ལྡིང་བར་ཤིན་ཏུ་འདུ་ཤེས་པ་དེ་ནི་སྤྲིན་གྱི་ཕུང་པོ་མ་ཡིན་ནོ།

འོད་སྲུང་འདི་ལྟ་སྟེ།

དཔེར་ན་མི་ལ་ལ་ཞིག་གིས་མི་གཞན་ཞིག་ལ་འདི་སྐད་ཅེས་སྨྲས་ཏེ།

གྲིབ་མ་དེར་དོང་ལ་འཁོད་པར་བྱའོ།

དེ་ནས་མཁས་པའི་རང་བཞིན་ཅན་གྱི་མི་དེས་འདི་སྐད་ཅེས་སྨྲས་ཏེ།

ཁོ་བོ་ནི་སྤྲོ་བ་མེད་དེ་འདི་ན་འདུག་གོ །

དེས་འདི་སྐད་ཅེས་སྨྲས་ཏེ།

ཁོ་བོ་ནི་ཁྱོད་ལ་མི་ཟེར་གྱི་གྲིབ་མ་འདི་ལ་ཟེར་རོ།

དེས་འདི་སྐད་ཅེས་སྨྲས་ཏེ།

ཀྱེ་མི་ཁྱོད་ཀྱིས་གང་གྲིབ་མ་དེས་སྨྲས་པ་དེ་ནི་གྲིབ་མ་མེད་པ་སྨྲས་སོ་ཞེས་ཟེར་ན།

འོད་སྲུང་མི་དེས་ཐ་སྙད་ཀྱི་གནས་ཇི་སྙེད་པ་དེ་གང་གིས་རྗེས་སུ་རྟོགས་པ་ལ་ལྟོས།

འོད་སྲུང་དེ་བཞིན་དུ་དེ་བཞིན་གཤེགས་པས་ཆོས་རྣམས་ཀྱི་ཚུལ་མཁྱེན་ནས་འཁོར་ལ་ཡང་དག་པར་སེང་གེའི་སྒྲ་སྒྲོག་གོ །

འོད་སྲུང་དེ་བཞིན་གཤེགས་པ་ནི་བཞེད་ན་འཐུན་པའི་ཆོས་རྣམས་ལ་མི་འཐུན་པའི་འདུ་ཤེས་ཅན་དུ་གནས་ཏེ།

སེམས་ཅན་རྣམས་ཀྱི་བདག་གི་འདུ་ཤེས་གང་ཡིན་པ་དེ་ནི་དེ་བཞིན་གཤེགས་པའི་དོན་དམ་པའོ།

དེ་ཅིའི་ཕྱིར་ཞེ་ན།

དེ་བཞིན་གཤེགས་པས་མཁྱེན་ལ་དེ་བཞིན་གཤེགས་པས་མཁྱེན་པའི་ཕྱིར་ཏེ།

སེམས་ཅན་གྱི་འདུ་ཤེས་གང་ཡིན་པ་དེ་ནི་འདུ་ཤེས་མེད་པའོ།

དེ་ལ་བྱིས་པའི་རང་བཞིན་ཅན་ལ་ལ་ཞིག་གྲིབ་མ་དེའི་ལྡེམ་པོ་ངག་དམ་པ་དེ་མ་ཤེས་པ་དེ་ནི་དེ་བཞིན་གཤེགས་པ་ལ་རྒོལ་ཏེ།

དེས་ན་ངས་འདི་སྐད་དུ་འཇིག་རྟེན་ནི་ང་ལ་རྒོལ་གྱི།

ང་ནི་འཇིག་རྟེན་དང་མི་རྩོད་དོ་ཞེས་གསུངས་སོ།

དེ་ལ་འཇིག་རྟེན་གང་ཞེ་ན།

འཇིག་རྟེན་ཞེས་བྱ་བ་ནི་སེམས་ཅན་གྱི་འཇིག་རྟེན་ནོ།

ཅིའི་ཕྱིར་སེམས་ཅན་གྱི་འཇིག་རྟེན་ལ་བྱ་ཞེ་ན།

དེ་བཞིན་གཤེགས་པས་ཇི་ལྟར་མཁྱེན་པ་འཇིག་རྟེན་ཡང་དེ་བཞིན་ཏེ།

དེའི་ཕྱིར་སེམས་ཅན་ལ་འཇིག་རྟེན་ཞེས་བྱའོ།

བྱིས་པ་སོ་སོའི་སྐྱེ་བོ་རྣམས་ཀྱིས་ཇི་ལྟར་ཤེས་པ་དེ་ནི་འཇིག་པ་རབ་ཏུ་འཇིག་པའོ།

ཉམས་པར་འགྱུར་བ་རྣམ་པར་ཉམས་པར་འགྱུར་བའོ།

འདི་ལྟ་སྟེ།

རྣམ་པར་འཇིག་པ་དེ་ནི་དེ་དག་གི་ཐ་སྙད་འདི་གོ་བར་བྱེད་པ་ཡིན་ནོ།

དེ་ཅིའི་ཕྱིར་ཞེ་ན།

གང་དག་འཇིག་རྟེན་འདི་ན་གནས་པ་དེ་དག་རྣམ་པར་འཇིག་པ་ཆེན་པོར་འགྱུར་བའི་ཕྱིར་ཏེ།

གང་དག་འཇིག་རྟེན་འདི་ན་གནས་པ་དེ་དག་ནི་བརྐམ་པའོ།

གང་དག་བརྐམ་པ་དེ་དག་ཁྲོ་བའོ།

གང་དག་ཁྲོ་བ་དེ་དག་རྨོངས་པའོ།

གང་དག་རྨོངས་པ་དེ་དག་མ་དག་པའོ།

གང་དག་མ་དག་པ་དེ་དག་འགལ་བའོ།

སུ་དང་འགལ་ཞེ་ན།

དེ་བཞིན་གཤེགས་པ་དང་དེ་བཞིན་གཤེགས་པའི་ཉན་ཐོས་རྣམས་དང་འགལ་ལོ།

གང་དག་འགལ་བ་དེ་དག་རྗེས་སུ་འཛིན་པའོ།

གང་དག་རྗེས་སུ་འཛིན་པ་དེ་དག་སོ་སོར་འཛིན་པའོ།

གང་དག་སོ་སོར་འཛིན་པ་དེ་དག་སྲིད་པ་ཚོལ་བའོ།

གང་དག་སྲིད་པ་ཚོལ་བ་དེ་དག་ཚོལ་བའོ།

གང་དག་ཚོལ་བ་དེ་དག་ཡོངས་སུ་ཚོལ་བའོ།

གང་དག་ཡོངས་སུ་ཚོལ་བ་དེ་དག་འདོད་པ་ཆུང་བ་མ་ཡིན་ནོ།

གང་དག་འདོད་པ་ཆུང་བ་མ་ཡིན་པ་དེ་དག་བྱ་བ་མང་བའོ།

གང་དག་བྱ་བ་མང་བ་དེ་དག་འདོད་པ་ཆེ་བའོ།

གང་དག་འདོད་པ་ཆེ་བ་དེ་དག་འདོད་པའི་ཁམས་བག་ལ་ཉལ་བར་བྱེད།

གཟུགས་ཀྱི་ཁམས་དང་།

གཟུགས་མེད་པའི་ཁམས་བག་ལ་ཉལ་བར་བྱེད་དོ།

གང་དག་བག་ལ་ཞེན་པར་བྱེད་པ་དེ་དག་བག་ལ་ཉལ་བར་བྱེད་དོ།

གང་དག་བག་ལ་ཉལ་བར་བྱེད་པ་དེ་དག་རྒྱུན་དང་།

རྒྱུན་ཕྱོགས་སུ་འགྲོ་བའོ།

གང་དག་རྒྱུན་དང་རྒྱུན་ཕྱོགས་སུ་འགྲོ་བ་དེ་དག་འཆི་བར་འགྲོ་བའོ།

གང་དག་འཆི་བར་འགྲོ་བ་དེ་དག་མྱ་ངན་ལས་འདས་པར་མི་འགྲོ་བའོ།

གང་དག་མྱ་ངན་ལས་འདས་པར་མི་འགྲོ་བ་དེ་དག་འགྲོ་བ་མ་ཡིན་པར་འགྲོ་བའོ།

གང་དག་འགྲོ་བ་མ་ཡིན་པར་འགྲོ་བ་དེ་དག་ཐམས་ཅད་སེམས་ཅན་དམྱལ་བར་འགྲོ་བའོ།

འོད་སྲུང་དེ་ལྟར་ན་བཀྲ་མི་ཤིས་པའི་སྦྱོར་བས་སྦྱོར་གྱིས།

ཁྲོ་བ་དང་འཁྲུག་པས་མི་སྦྱོར་བ་མ་ཡིན།

རྣམ་པར་འཇིག་པས་མ་ཡིན་ནོ།

གང་དག་རྣམ་པར་འཇིག་པས་མ་ཡིན་པ་དེ་དག་བདག་གི་འདུ་ཤེས་ལ་རྣམ་པར་རྟོག་པར་མི་བྱེད་དོ།

གང་དག་བདག་གི་འདུ་ཤེས་ལ་རྣམ་པར་རྟོག་པར་མི་བྱེད་པ་དེ་དག་ང་ཞེ་འམ་ངའི་ཞེས་གོང་བུར་བྱེད་དོ།

ཟག་པར་བྱེད་དོ།

ཅིའི་ཕྱིར་ངའམ་ངའི་ཞེས་བྱ་ཞེ་ན།

ཡང་དག་པ་མ་ཡིན་པ་ལ་འཛིན་པས་འདུ་ཤེས་

རྣམ་པ་སྣ་ཚོགས་ཀྱིས་གནས་ནས་ལས་མངོན་པར་འདུ་བྱེད་དེ།

གང་དག་འདུ་ཤེས་རྣམ་པ་སྣ་ཚོགས་དག་གིས་གནས་ནས་ལས་མངོན་པར་འདུ་བྱེད་པ་དེ་དག་བདག་ལ་ངའོ་སྙམ་དུ་འཛིན་པའི་ཕྱིར་རོ།

ཅིའི་ཕྱིར་ངའི་ཞེས་བྱ་ཞེ་ན།

བརྣབ་སེམས་དང་ངའི་དང་འདོད་པ་རྣམས་ཀྱིས་འདུ་འཛི་ལ་མངོན་པར་གཏོད་པ་དང་།

ཚུལ་ཁྲིམས་ཀྱི་ཕུང་པོ་འཇིག་པར་བྱེད་པ་དང་།

གཞན་ལ་གནོད་སེམས་ཀྱི་སེམས་སུ་བྱེད་པ་དང་།

ཁྲོ་བས་ཟིལ་གྱིས་ནོན་པ་དང་།

དེ་ཡང་བདག་ལ་རྣམ་པར་ང་རྒྱལ་བྱེད་པ་དང་།

འབྲུ་རྗེན་པ་བདག་གིར་བྱེད་པ་དང་།

ལེན་པ་དང་།

སྡུད་པ་དང་།

ཉེ་བར་བྱེད་པ་སྟེ།

དེའི་ཕྱིར་ངའི་ཞེས་བྱའོ།

གང་དག་ང་ཡིར་བྱེད་པ་དེ་དག་འཁྱམ་པའོ།

གང་དག་འཁྱམ་པ་དེ་དག་རྨོངས་པའོ།

གང་དག་རྨོངས་པ་དེ་དག་སྡང་བའོ།

གང་དག་སྡང་བ་དེ་དག་གཤེ་བའོ།

གང་དག་གཤེ་བ་དེ་དག་ཟ་བའོ།

གང་དག་ཟ་བ་དེ་དག་ཚིག་པའོ།

གང་དག་ཚིག་པ་དེ་དག་ཡོངས་སུ་ཆགས་པ་སྟེ།

འདོད་པའི་འདོད་ཆགས་ཀྱིས་བུད་མེད་ཀྱི་འདུ་ཤེས་དང་།

སྐྱེས་པའི་འདུ་ཤེས་དང་།

སྲོག་གི་འདུ་ཤེས་ཀྱིས་བདག་གིར་བྱེད་དེ།

དེའི་ཕྱིར་ངའི་ཞེས་བྱའོ།

ཡང་དོན་དུ་ན་དེ་ནི་བདག་ལ་མི་སྙན་པ་བརྗོད་པ་ཞེས་བྱ་སྟེ།

བདག་གི་ཕྱིར་བྱིས་པའོ།

བྱིས་པའི་ཚུལ་བག་ལ་ཉལ་བར་བྱེད་དོ།

དེས་ན་ངའི་ཞེས་བྱའོ།

འོད་སྲུང་དེ་ལྟར་ན་གང་ཆོས་འདི་དག་མ་ཐོས་པར་བྱང་ཆུབ་ཏུ་ཁས་འཆེ་བ་འམ།

བྱང་ཆུབ་སེམས་དཔའི་སྤྱོད་པར་ཁས་འཆེ་བ་དེ་སྤྱོད་པ་ཁས་འཆེ་བའོ།

འོད་སྲུང་བྱང་ཆུབ་སེམས་དཔའི་སྤྱོད་པ་གང་ཡིན་པ་དེ་ལ་སྤྱོད་པ་གང་ཡང་མེད་དེ།

དེས་ན་བྱང་ཆུབ་སེམས་དཔའི་སྤྱོད་པ་ཞེས་བྱའོ།

འོད་སྲུང་བྱང་ཆུབ་སེམས་དཔའ་གང་གི་སྤྱོད་པ་ཡོངས་སུ་རྫོགས་པར་འགྱུར་བ་དང་།

ཚང་བར་འགྱུར་བ་དང་།

ཚོགས་པར་འགྱུར་བ་དང་།

དག་པར་འགྱུར་བ་དང་།

རྣམ་པར་དག་པར་འགྱུར་བ་དང་།

ཡོངས་སུ་དག་པར་འགྱུར་བ་དང་།

རྣམ་པར་གནོན་པར་འགྱུར་བའི་སྐབས་ཡོད་དོ།

དེ་དག་ཆོས་ཀྱང་སྟོན་ཏེ།

ཆོས་དེ་དག་ནམ་མཁའ་ལྟར་བྱས་ཀྱི་ཆོས་དེ་དག་ཕུང་པོར་མ་བྱས་སོ།

དེ་དག་རིགས་པ་རྣམས་ལ་ཆོས་

ཆེན་པོ་སྟོན་ཏེ།

མི་རིགས་པ་རྣམས་ལ་མ་ཡིན་ནོ།

ཡོན་ཏན་དང་ལྡན་པ་རྣམས་ལ་སྟེ།

ཉེས་པར་གནས་པ་རྣམས་ལ་མ་ཡིན་ནོ།

ཚུལ་དང་ལྡན་པ་རྣམས་ལ་སྟེ།

ཚུལ་ངན་པ་རྣམས་ལ་མ་ཡིན་ནོ།

ཁྱེད་ཀྱིས་ཆོས་དེ་དག་གཟུང་བར་བྱ་སྟེ།

ཇི་ལྟར་ཆོས་ལ་མངོན་པར་ཞེན་པར་མི་འགྱུར་བ་དེ་ལྟར་ཟུང་ཤིག །

དེ་ཅིའི་ཕྱིར་ཞེ་ན།

དེ་བཞིན་གཤེགས་པ་ནི་མཆོག་གསུང་བའི་ཕྱིར་ཏེ།

སེམས་ཅན་གཟུང་བར་འོས་པ་རྣམས་ཀྱི་དོན་གྱི་ཕྱིར་དྲིས་པ་དེ་ལ་ངས་ཆོས་ཀྱི་མཆོག་གིས་ལན་གདབ་པར་བྱའོ།

དེ་ལ་ཆོས་ཀྱི་མཆོག་གང་ཞེ་ན།

གང་ལ་ཆོས་ཀྱི་འདུ་ཤེས་མེད་པའོ།

འོད་སྲུང་འདི་ལ་བྱང་ཆུབ་སེམས་དཔའ་ཐོག་མ་ཉིད་དུ་ཚུལ་ཁྲིམས་དང་ལྡན་པར་འགྱུར་རོ།

གང་གི་སེམས་ལ་རྗེས་སུ་འགྱོད་པ་ཡོད་པ་ནི་མཚམས་མེད་པ་བྱེད་པར་མི་འགྱུར།

དགེ་སློང་མ་སུན་པར་བྱེད་པར་མི་འགྱུར།

ཁྱིམ་གྱི་ནང་དུ་འདྲེ་བར་མི་འགྱུར།

སྲོག་གཅོད་པར་མི་འགྱུར།

མ་བྱིན་པར་ལེན་པར་མི་འགྱུར།

འདོད་པ་ལ་ལོག་པར་གཡེམ་པར་མི་འགྱུར།

བརྫུན་སྨྲ་བར་མི་འགྱུར།

ཕྲ་མ་སྨྲ་བར་མི་འགྱུར།

ངག་རྩུབ་པོ་སྨྲ་བར་མི་འགྱུར།

ཚིག་ཀྱལ་པ་སྨྲ་བར་མི་འགྱུར།

བརྣབ་སེམས་ཅན་དུ་མི་འགྱུར།

གནོད་སེམས་ཅན་དུ་མི་འགྱུར།

ལོག་པར་ལྟ་བར་མི་འགྱུར།

བདག་ལ་གནོད་པ་བྱ་བར་མི་སེམས།

གཞན་ལ་གནོད་པ་བྱ་བར་མི་སེམས།

འདུ་བ་འདོད་པར་མི་འགྱུར།

ལོངས་སྤྱོད་ལ་འདོད་པར་མི་འགྱུར།

རྒྱལ་བར་བྱ་བའི་རྩེད་མོ་རྣམས་གཞན་དག་ལ་རྗོད་པར་མི་བྱེད།

བདག་ཀྱང་མི་བྱེད།

མ་ནིང་དང་སྟེན་པར་མི་བྱེད།

སྨད་འཚོང་མ་སྤྱོད་ཡུལ་བར་མི་འགྱུར།

ཡུག་ས་མོ་སྤྱོད་ཡུལ་བར་མི་འགྱུར།

ན་ཆུང་ཆེན་མོ་སྤྱོད་ཡུལ་བར་མི་འགྱུར།

བྱ་པ་དང་འདྲེ་བར་མི་འགྱུར།

ཉ་པ་དང་འདྲེ་བར་མི་འགྱུར།

རི་དགས་ཀྱི་རྔོན་པ་དང་འདྲེ་བར་མི་འགྱུར།

གསོད་པ་དང་འདྲེ་བར་མི་འགྱུར།

གདོལ་པ་དང་འདྲེ་བར་མི་འགྱུར།

གཞན་གྱི་ཆུང་མ་དང་སྟེན་པར་མི་འགྱུར།

མི་ར་རོ་བའི་ལག་ནས་འཛིན་པ་འམ་རྩོད་པར་མི་བྱེད་དེ།

དེ་དག་ཁྱི་དང་གདོལ་པ་ལྟར་ཡོངས་སུ་སྤང་བས་ཡོངས་སུ་སྤོང་ངོ་།

གང་དག་ཡོངས་སུ་སྤངས་

པ་དེ་ལ་འཁྲུལ་བའི་སེམས་བསྐྱེད་པ་གཅིག་ཙམ་གྱི་སེམས་ཀྱང་མི་སྐྱེད་དོ།

དེ་ལྟར་ན་བྱམས་པའི་རྣམ་པ་ལ་ཞུགས་པའི་སེམས་ཀྱིས་གནས་ཉི་ཤུ་ཡོངས་སུ་སྤོང་ངོ་།

ཉི་ཤུ་གང་ཞེ་ན།

བུད་མེད་ཡོངས་སུ་སྤོང་ཞིང་།

སུ་དང་ཡང་སྤྲོས་པར་མི་བྱེད་ལ་སུ་དང་ཡང་འཐམ་པར་མི་བྱེད་ཤིང་སྨྲ་བ་ལ་ཕྱིར་སྨྲ་བར་མི་བྱེད་པ་དང་།

ཕ་མ་ལ་མི་གུས་པར་མི་འགྱུར་བ་དང་།

སངས་རྒྱས་དང་།

ཆོས་དང་།

དགེ་འདུན་ལ་མི་གུས་པར་མི་འགྱུར་བ་དང་།

ཉི་ཤུར་མ་ཚང་བར་བུད་མེད་ཀྱི་འཁོར་ལ་ཆོས་མི་འཆད་ཅིང་གལ་ཏེ་སྐྱེས་པའི་གནས་ན་གནས་པར་གྱུར་ན་དེའི་ཚེ་ཆོས་སྟོན་པ་དང་།

དགེ་སློང་མའི་ཕུན་སུམ་ཚོགས་པར་ཐམས་ཅད་ཀྱི་ཐམས་ཅད་དུ་འགྲོ་བར་མི་བྱ་བ་དང་།

དགེ་སློང་མས་དྲིས་པའི་ལན་གདབ་པར་མི་བྱ་བ་དང་།

བུད་མེད་ཀྱི་ཡི་གེ་བྲི་བར་མི་བྱ་བ་དང་།

གསོལ་བ་མ་བཏབ་པར་སྦྱིན་པར་མི་བྱ་བ་དང་།

གཉེན་འདབ་ཀྱིས་འགྲོན་དུ་བོས་པ་རྣམ་པ་ཐམས་ཅད་དུ་བདག་གིར་མི་བྱ་བ་དང་།

རྣམ་པ་ཐམས་ཅད་དུ་འདོད་ཆགས་དང་བཅས་པས་རྗེས་སུ་ཆགས་པའི་སེམས་ཀྱིས་བུད་མེད་ཀྱི་མདུན་དུ་ཡུད་ཙམ་ཡང་གནས་པར་མི་བྱ་བ་དང་།

དེ་གཅིག་པུ་དབེན་པར་སོང་སྟེ།

རང་གི་ཡུལ་བསྟེན་པ་རྣམ་པ་ཐམས་ཅད་དུ་བརྗོད་པར་མི་བྱ་བ་དང་།

དགེ་སློང་མས་བསྐུགས་པ་ལ་རྣམ་པ་ཐམས་ཅད་དུ་སླར་བསྐུགས་པར་མི་བྱ།

དགེ་སློང་མས་བྱིན་པའི་ཆོས་གོས་རྣམ་པ་ཐམས་ཅད་དུ་བགོ་བར་མི་བྱ་སྟེ།

གཞན་དུ་ན་འཁོར་བཞི་པོ་རྣམས་ཀྱི་ནང་ན་འདུག་ཅིང་ཆོས་འཆད་པའི་ཚེ་ཆོས་ལ་དགབ་པར་བྱ་བ་ནི་མ་གཏོགས་ཏེ།

དེ་ལ་ཡང་དེས་ས་དང་མཚུངས་པའི་སེམས་ཀྱིས་ཡིད་ལ་བྱེད་པར་བསྒྱུར་ནས་སྤྱད་པར་བྱ་བ་དང་།

ཡང་དེའི་ངོར་བལྟ་བར་མི་བྱ་བ་དང་།

རྣམ་པ་ཐམས་ཅད་དུ་དགེ་སློང་མས་བྱས་པའི་ཆོས་གོས་ཉེན་པའི་གནས་སུ་ཡང་བགོ་བར་མི་བྱ་བ་དང་།

ནམ་ཡང་དགེ་སློང་མས་འགྲོན་དུ་བོས་པ་ལ་རྣམ་པ་ཐམས་ཅད་དུ་ཁས་བླང་བར་མི་བྱ་ན།

བདེ་བའམ་ནད་མེད་པའི་རང་བཞིན་ཅན་ལྟ་ཅི་སྨོས་པ་དང་།

ཡུག་ས་མོས་འགྲོན་དུ་བོས་ན་དགེ་འདུན་མེད་པར་རྣམ་པ་ཐམས་ཅད་དུ་ཁས་བླང་བར་མི་བྱ་བ་དང་།

དགེ་སློང་མའི་དབྱར་ཁང་དུ་རྣམ་པ་ཐམས་ཅད་དུ་

འཇུག་པར་མི་བྱ་བ་དང་།

རྣམ་པ་ཐམས་ཅད་དུ་དགེ་སློང་མ་དབང་དུ་མི་བྱ།

གལ་ཏེ་དགེ་སློང་མས་བོས་ན་ཡང་ལག་པ་བསྣོལ་ལ་མགོ་སྨད་དེ་ས་ཕྱོགས་དེ་ནས་འགྲོ་བར་བྱ་བ་དང་།

ཆོས་སྟོན་ཅིང་འདུག་པའི་གན་དུ་དགེ་སློང་མ་རྐང་པ་ལ་ཕྱག་འཚལ་དུ་འོང་ན།

སྙིམ་པས་གདོང་བཀབ་སྟེ་འདུག་པར་བྱ་ཞིང་དེས་རྐང་པ་བསྐྱོད་པར་མི་བྱ་སྟེ།

སྐྱེས་བུ་དམ་པས་ལུས་དཔའ་བར་མི་བྱའི་རྩེ་གཅིག་ཏུ་ཡིད་ལ་བྱ་བས་སེམས་དཔའ་བར་བྱ་བ་དང་།

དངོས་པོ་ཐམས་ཅད་ལ་ཀུན་ཏུ་འདོད་ཆགས་ཀྱི་སེམས་རྣམ་པ་ཐམས་ཅད་དུ་བསྐྱེད་པར་མི་བྱ་བ་དང་།

ཁོང་ཁྲོ་བའི་སེམས་རྣམ་པ་ཐམས་ཅད་དུ་བསྐྱེད་པར་མི་བྱ་བ་སྟེ།

འདི་ལྟར་ཐམས་ཅད་མཁྱེན་པ་ཉིད་ཀྱི་ཕྱིར་དམ་བཅས་པ་བརྟན་པར་བྱ་བ་དང་།

ཆོས་འདི་དག་ཐོས་ནས་ནན་ཏན་གྱིས་བསྒྲུབ་པར་མངོན་པར་བརྩོན་པར་བྱ་བ་དང་།

འོད་སྲུང་རིགས་ཀྱི་བུ་འམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་ཞིག་ཆོས་དེ་དག་ཐོས་མ་ཐག་ཏུ་ནན་ཏན་གྱིས་མི་སྒྲུབ་ན་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ།

དེ་ཅིའི་ཕྱིར་ཞེ་ན།

འོད་སྲུང་ནན་ཏན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཀྱི་ནན་ཏན་མེད་པས་ནི་མ་ཡིན་པའི་ཕྱིར་རོ།

འོད་སྲུང་གལ་ཏེ་ནན་ཏན་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ཏུ་ཟིན་ན་ནི་རི་བོང་དང་བྱི་ལ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

དེ་ཅིའི་ཕྱིར་ཞེ་ན།

འོད་སྲུང་གང་དག་ལ་ནན་ཏན་མེད་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་དུ་ཟིན་ན་ནི་འོད་སྲུང་སྒྲ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་ཕྱིར་ཏེ།

སངས་རྒྱས་སུ་འགྱུར་བར་བྱའོ་ཞེས་བརྗོད་པས་སེམས་ཅན་དཔག་ཏུ་མེད་པ་དག་སངས་རྒྱས་སུ་འགྱུར་བའི་རིགས་སོ།

འོད་སྲུང་འདི་ལྟར་ཐ་ན་ཉིན་ཞག་གཅིག་སྤྱོད་པ་འདི་ཡང་དག་པར་སྒྲུབ་པའི་སེམས་ཅན་དག་ཀྱང་དཀོན་ན་གང་བསྐལ་པ་འམ།

བསྐལ་པ་བརྒྱ་སྟོང་དུ་ལྟ་ཅི་སྨོས།

དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་འབྱུང་བ་རྙེད་པར་དཀའོ།

འོད་སྲུང་འདི་ལྟ་སྟེ།

དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་ཀྱི་ཁམས་ཀྱི་སེམས་ཅན་དེ་དག་ཐམས་ཅད་ཀྱི་ནང་ནས་སེམས་ཅན་གཅིག་ཅིག་བསྐལ་པ་འམ།

བསྐལ་པ་བརྒྱ་འམ།

བསྐལ་པ་སྟོང་ངམ།

བསྐལ་པ་བྱེ་བ་ཕྲག་བརྒྱ་སྟོང་ན་སངས་རྒྱས་སུ་འགྱུར་རོ།

སངས་རྒྱས་སུ་འགྱུར་རོ་ཞེས་བྱང་ཆུབ་ཀྱི་ཕྱིར་སྨྲས་ལ།

སེམས་ཅན་དེ་དག་གིས་ཀྱང་བསྐོར་ཅིང་སངས་རྒྱས་སུ་འགྱུར་རོ།

སངས་རྒྱས་སུ་འགྱུར་རོ་ཞེས་སྨྲས་ན།

རྣམ་གྲངས་འདིས་དབུགས་དབྱུང་བ་དང་རྔུབ་པ་རྒྱུན་ཆད་པར་འགྱུར་གྱི།

སེམས་ཅན་རྣམས་ཀྱི་ངག་གི་ལས་ནི་རྒྱུན་ཆད་པར་མི་འགྱུར་རོ།

འོད་སྲུང་དེ་ལྟ་བུའི་ངག་གི་ལས་ཙམ་གྱིས་ནི་བྱང་ཆུབ་སེམས་དཔས་སེམས་དང་པོ་བསྐྱེད་པར་ཡང་ཡོངས་སུ་སྨིན་པར་བྱ་བ་སླ་བ་མ་ཡིན་ན།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་བ་ལྟ་ཅི་སྨོས་ཏེ།

དེ་ནི་གནས་མ་ཡིན་ནོ།

འོད་སྲུང་དུས་དེ་དང་ཚེ་དེ་འབྱུང་བར་འགྱུར་ཏེ་ང་ཡོངས་སུ་མྱ་ངན་ལས་འདས་ཤིང་ཁྱོད་ཀྱང་ཡོངས་སུ་མྱ་ངན་ལས་འདས་ལ།

ལྷ་རྣམས་ཀྱང་སྤྲོ་བ་ཆུང་བའི་ཚེ་ངའི་བསྔགས་པ་ཐོས་ནས་སེམས་ཅན་མང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ཏེ།

དེ་ལ་དགེ་སློང་གང་དག་བྱང་ཆུབ་ཏུ་སེམས་སྐྱེད་པར་འགྱུར་བ་དེ་དག་ཕལ་ཆེར་ཆོས་ཉི་ཤུ་ལ་གནས་པར་འགྱུར་ཏེ།

ཉི་ཤུ་གང་ཞེ་ན།

དགེ་སློང་མ་དང་སྟེན་པར་འགྱུར།

ཁ་ཟས་ཡོངས་སུ་མ་དག་པ་ཟ་བར་འགྱུར།

ཁམ་གྱིས་ཟ་བའི་ཟས་ལ་བརྐམ་པར་འགྱུར།

དགེ་སློང་མས་ཡོངས་སུ་བསྒྲུབས་པའི་ཟས་ཟ་བར་འགྱུར་རོ།

འོད་སྲུང་དཔེར་ན་ད་ལྟར་མང་དུ་ཐོས་པའི་དགེ་སློང་དགོན་པ་ན་གནས་སམ།

གྲོང་ན་གནས་ཀྱང་རུང་སྟེ།

ཆོས་ཡང་དག་པར་སྡུད་ཅིང་གནས་པ་དེ་བཞིན་དུ་འོད་སྲུང་དེའི་ཚེ་དགེ་སློང་དག་དགོན་པ་ན་གནས་སམ།

གྲོང་ན་གནས་ཀྱང་རུང་སྟེ།

དགེ་སློང་མ་རྣམས་དང་ལྷན་ཅིག་ཆོས་ཡོངས་སུ་སྡུད་ཅིང་གནས་པར་འགྱུར་རོ།

དེ་དག་འདོད་ཆགས་ཀྱི་སེམས་ཤིན་ཏུ་མང་དུ་སྐྱེའི་ཆོས་ཀྱི་སེམས་ནི་མ་ཡིན་ནོ།

དགེ་སློང་མ་དེ་དག་ཀྱང་འདོད་ཆགས་ཀྱི་སེམས་ཤིན་ཏུ་མང་དུ་སྐྱེའི་ཆོས་ཀྱི་སེམས་ནི་ཤིན་ཏུ་ཉུང་ངོ་།

འོད་སྲུང་ཇི་ཙམ་དུ་བྱང་ཆུབ་སེམས་དཔའི་མིང་འདི་ཐོབ་ནས་ངན་སོང་གི་གཡང་ས་ཆེན་པོར་འགྲོ་བའི་ལམ་རབ་ཏུ་འཛིན་པར་འགྱུར་བ་ལ་ལྟོས།

འོད་སྲུང་དེ་ལྟར་ན་དེའི་ཚེ་ཆོས་ཀྱི་མཚན་ཉིད་ཀྱིས་འདུ་འཛིར་འགྱུར་ཏེ།

དེ་དག་གཅིག་གིས་གཅིག་མཐོང་ནས་འདོད་ཆགས་ཀྱིས་ཡོངས་སུ་ཚིག་པར་འགྱུར་རོ།

མཆུ་བསྒྱུར་བས་དགོས་པ་གོ་བར་བྱེད་པར་འགྱུར་རོ།

དེ་དག་འདུས་ནས་ཉེ་བར་གནས་པ་དང་།

གནས་རྣམས་ཡོངས་སུ་འཛིན་པར་འགྱུར།

དེ་དག་ཐོག་མར་སློབ་དཔོན་ལ་ཕྱག་འཚལ་བར་འགྱུར་རོ།

དེའི་འོག་ཏུ་སྨན་བྱེད་པ་གཏོང་བར་འགྱུར་རོ།

དེའི་འོག་ཏུ་མིང་ནས་སྨོས་པར་འགྱུར་རོ།

དེའི་འོག་ཏུ་ཁྱིམ་དུ་འཇོག་པར་འགྱུར་རོ།

ཡང་ན་ལམ་པོ་ཆེ་སྟོན་པར་འགྱུར།

གནས་ཁང་སྟོན་པར་འགྱུར།

དེ་དག་འཇུག་པ་དང་འབྱུང་བ་ན་ཡང་ཁྱོད་ཅི་འདྲ་ཞེས་འདྲི་བར་འགྱུར།

དེ་དག་ཕན་ཚུན་སྣག་གི་གཉེན་མཚམས་དང་སྲིང་མོ་ཞེས་རྗོད་པར་འགྱུར་རོ།

དེ་དག་རྒྱུན་མི་འཆད་པར་ལྟ་བས་གནས་སུ་འདུ་བར་འགྱུར་རོ།

གནས་སུ་འདུས་ནས་འདོད་ཆགས་འདྲེས་པར་འགྱུར་རོ།

འདོད་ཆགས་འདྲེས་ནས་སྤྲོད་པར་འགྱུར་རོ།

སྤྲད་ནས་དེ་ཉིད་ཀྱི་མིང་སྨོས་པར་འགྱུར་ཏེ།

དེ་དག་ནི་ཚངས་པར་སྤྱོད་པ་མ་ཡིན་པའི་ཆོས་སྤྱོད་དོ།

གང་ཆོས་མ་ཡིན་པ་སྟེན་པ་ནི་བྱང་ཆུབ་མེད་པར་འགྱུར།

མཐོ་རིས་མེད་པར་གྱུར་ཅིང་མྱ་ངན་ལས་འདས་པ་དང་རིང་ངོ་།

དེ་དག་གིས་དེ་བཞིན་གཤེགས་པ་ཡོངས་སུ་བཏང་།

དེ་དག་གིས་ཆོས་བོར།

དེ་དག་གིས་དགེ་འདུན་དོན་དུམ་གཉེར་ཏོ།

དེ་དག་ཕྱོགས་གཅིག་ཏུ་འཁོད་ནས་འདོད་པའི་རྣམ་པར་རྟོག་པ་ལ་རྣམ་པར་རྟོག་པར་འགྱུར་རོ།

གནོད་སེམས་ཀྱི་རྣམ་པར་རྟོག་པ་དང་།

རྣམ་པར་འཚེ་བའི་རྣམ་པར་རྟོག་པས་རྣམ་པར་རྟོག་པར་འགྱུར་རོ།

བྱང་ཆུབ་སེམས་དཔའི་ལམ་ཚངས་པའི་གནས་པ་བཞི་པོ་གང་ཡིན་པ་དེ་དག་ཀྱང་དེ་དག་ལ་མེད་པར་འགྱུར་ཏེ།

དཔེར་ན་ད་ལྟར་ཚངས་པའི་གནས་བསྒོམ་པ་དེ་ལྟར་དེའི་དུས་ན་འདོད་པ་ལ་རྣམ་པར་རྟོག་

པར་འགྱུར།

གནོད་སེམས་ཀྱིས་རྣམ་པར་རྟོག་པ་དང་།

རྣམ་པར་འཚེ་བས་རྣམ་པར་རྟོག་པར་འགྱུར་རོ།

འོད་སྲུང་དེ་ལྟར་དེའི་དུས་ན་སྐྱེས་བུ་དམ་པ་མ་ཡིན་པས་གནས་པར་འགྱུར།

རྐུ་བས་གནས་པ་དང་།

སྒྱུས་གནས་པར་འགྱུར་རོ།

འོད་སྲུང་དེའི་དུས་ན་ཇི་ཙམ་དུ་མཚམས་ལས་འདའ་བར་འགྱུར་བ་ལ་ལྟོས།

ཡང་མདོ་སྡེ་འདི་ལྟ་བུ་འདི་དག་ཐོས་ནས་སྨོད་པར་འགྱུར་ཏེ།

སྔོན་ཚུལ་ཁྲིམས་ཡོངས་སུ་དག་པ་ལ་གནས་ཤིང་སྦྱིན་པ་བྱིན་ནས་ཡིད་ཆེས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཀྱང་དེ་དག་ཕྱིས་མདོ་སྡེ་འདི་ལྟ་བུ་འདི་དག་ཐོས་ནས་སྤོང་བར་འགྱུར་རོ།

འོད་སྲུང་དེའི་དུས་ན་མདོ་སྡེ་འདི་ལྟ་བུ་འདི་དག་ཐོས་ནས་སྤོང་བར་འགྱུར་བའི་རྟགས་ཙམ་དང་།

མཚན་མ་ཙམ་འདི་ལ་ལྟོས།

དེ་ལ་མཁས་པ་ཚུལ་ཁྲིམས་ཡོངས་སུ་དག་པ་ཆོས་འཛིན་པ་རྣམས་ཀྱིས་ཇི་ལྟར་མདོ་སྡེའི་ཚིག་ལས་འབྱུང་བའི་དགེ་སློང་བསྟན་པ་འདི་ལྟ་བུ་དག་ཤེས་པར་བྱ།

ཡོངས་སུ་སྤང་བར་བྱ་སྟེ།

དེ་དག་ལ་ནི་ཆོས་ལ་དགའ་བ་མེད་དོ།

འོད་སྲུང་གཞན་ཡང་དེའི་དུས་ན་དེ་དག་བདག་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའི་སྤྱོད་པ་སྟོན་པར་འགྱུར།

བག་མེད་པར་འགྱུར་རོ།

བག་མེད་པར་གྱུར་པས་རང་སངས་རྒྱས་དང་དགྲ་བཅོམ་པ་དག་པས་ཀྱང་བདག་ཆེས་མཆོག་ཅེས་བརྗོད་པར་འགྱུར་ཏེ།

དེ་དག་གསོར་མི་རུང་བ།

བྱ་བ་མ་ཡིན་པར་ལྟུང་བ་སྟེ།

ལོག་པར་ལྟུང་བར་འགྲོ་བར་འགྱུར་རོ།

འོད་སྲུང་གཞན་ཡང་དེའི་དུས་ན་ལས་མ་ཡིན་པ་ལ་གནས་ཤིང་ལས་མི་བྱེད་པ་དག་འབྱུང་ངོ་།

དེའི་དུས་ན་བྱང་ཆུབ་བརྗོད་པས་ཆེར་སེམས་ཅན་དུ་འཛིན་ཅིང་ཀུན་ཏུ་ཞེན་ཏོ།

འོད་སྲུང་དེ་ལྟར་ན་དེའི་ཚེ།

མཚན་མའི་གནས་སུ་འགྱུར་རོ།

འོད་སྲུང་གཞན་ཡང་དེའི་དུས་ན་ཁ་ཅིག་ལ་ཕ་རོལ་དུ་ཕྱིན་པ་ལྟར་བཅོས་པ་ཤིན་ཏུ་རྫོགས་པར་འགྱུར།

ཤིན་ཏུ་འཇུག་པར་འགྱུར་ཏེ།

འདི་ཡང་དེའི་དུས་ན་མཚན་མའི་གནས་སུ་འགྱུར་བའོ།

འོད་སྲུང་གཞན་ཡང་དེའི་དུས་ན་ཡང་དག་པ་ཇི་ལྟ་བ་བཞིན་དུ་བཤད་པའི་མདོ་སྡེ་འདི་ལྟ་བུ་འདི་དག་ལ་ཤིན་ཏུ་སྡང་བར་འགྱུར།

ཤིན་ཏུ་འདོར་བར་འགྱུར་ཏེ།

མདོ་སྡེ་འདི་

ལྟ་བུ་འདི་དག་གིས་ལོག་པར་ལྟ་བའི་འདུ་ཤེས་སུ་འགྱུར་རོ།

མི་བླུན་པོ་དེ་དག་གིས་འཆལ་པའི་ཚུལ་ཁྲིམས་བརྗོད་པ་འདི་དག་དེ་ལྟར་རྟོག་པར་མི་འགྱུར་རོ།

འོད་སྲུང་ཡང་དེའི་དུས་ན་ཆོམ་རྐུན་གྱི་སྐྱོན་མཐའ་དག་ཆགས་པར་འགྱུར་ཏེ།

དེ་ལྟ་བས་ན་དེ་དག་ལས་བདག་གིར་བྱ་བ་ཉིད་མ་མཐོང་བའི་ཕྱིར་སངས་རྒྱས་ཀྱི་བྱང་ཆུབ་མ་དཀྲུགས་སོ་ཞེས་གནོང་མི་བཀུར་བས་སངས་རྒྱས་ཀྱི་བྱང་ཆུབ་སྤོང་བར་འགྱུར་རོ།

འོད་སྲུང་གཞན་ཡང་དེའི་དུས་ན་དགེ་འདུན་གྱི་རྗེས་སུ་འགྲོ་བར་མི་འགྱུར་ཏེ།

འདི་ཡང་དེའི་དུས་ན་མཚན་མའི་གནས་སུ་འགྱུར་བའོ།

འོད་སྲུང་གཞན་ཡང་དེའི་དུས་ན་ཕལ་ཆེར་བྱས་པ་མི་གཟོ་བར་འགྱུར།

བསླུས་པར་འགྱུར་རོ།

ཇི་སྲིད་ཅིག་ཏུ་བསླུས་པར་འགྱུར་ཞེ་ན།

གང་དེ་བཞིན་གཤེགས་པས་དེ་དག་གི་བསྙད་པ་བརྗོད་པར་འགྱུར་བ་དེ་སྲིད་དུ་བསླུས་པར་འགྱུར་རོ།

ཕྱིར་ཞིང་ཚིག་གིས་ཡོངས་སུ་བསླུ་བས་ཟས་མངོན་པར་བསྒྲུབ་པར་འགྱུར་རོ།

འོད་སྲུང་གཞན་ཡང་དེའི་དུས་ན་ཕལ་ཆེར་བྱས་པ་མི་གཟོ་བར་འགྱུར།

སོ་སོར་ཐར་པ་ལ་བསྔགས་པར་མི་འགྱུར།

ངག་གི་ལས་མ་བསྲུངས་པར་འགྱུར་རོ།

དེ་དག་ངག་གི་ལས་མ་བསྲུངས་པས་སྤྱོད་ལམ་མ་བསྲུངས་ལ་དེ་དག་རུང་བ་མ་ཡིན་པའི་གནས་ལ་གནས་ཤིང་རུང་བ་མ་ཡིན་པ་ལ་གནས་པ་རྣམས་ལ་ཆོས་སྟོན་པར་འགྱུར་ཏེ།

དེ་ལྟར་ཆོས་འདི་ལ་མཐར་གྱིས་ཆེར་འབད་པར་མི་འགྱུར་རོ།

དེ་ལྟར་མཐར་གྱིས་བུད་མེད་དང་ལྷན་ཅིག་གནས་པ་ཤིན་ཏུ་མང་བར་འགྱུར་ཏེ།

དེ་དག་སྐྱེས་པ་རྣམས་སྤངས་ནས་གཙུག་ལག་ཁང་དུ་འདོང་ཞིང་གཙུག་ལག་ཁང་དུ་ཞུགས་ནས་ལྷན་ཅིག་འཁོད་ཅིང་སངས་རྒྱས་ཀྱི་བཀའ་བརྗོད་དེ་མྱ་ངན་ལས་འདས་པ་ལྟར་བཅོས་པའི་གཏམ་རབ་ཏུ་འཆད་པར་འགྱུར་རོ།

འོད་སྲུང་ཆོས་ནི་ལྔ་བརྒྱ་ཀུན་ནས་ཉོན་མོངས་པ་ཡང་ལྔ་བརྒྱར་ཟད་ན་དེའི་ཚེ་མངོན་པར་མི་བརྩོན་པའི་སྐྱེས་བུ་གང་ཟག་གི་ཆོས་མ་ཡིན་པའི་སྒོ་ནི་མང་བར་ངས་དགོངས་ཏེ།

དེའི་དུས་ན་དེ་དག་མི་ཉུང་བར་རྗེས་སུ་འཇུག་པར་འགྱུར།

ཁྱིམ་པ་དང་ཚུལ་ཁྲིམས་འདྲ་བར་འགྱུར་ཏེ།

འོད་སྲུང་དེའི་དུས་ན་དེ་ལྟ་བུ་དག་འབྱུང་བར་འགྱུར་རོ།

དེ་ལ་དོན་ཚོལ་ཞིང་བྱང་ཆུབ་ཡོངས་སུ་ཚོལ་བར་འདོད་པས་དགེ་སློང་མ་དང་འདྲེ་བར་མི་བྱ།

དེ་ལྟར་གནས་པར་མི་བྱའོ།

འདྲེ་བ་ཐམས་ཅད་རྣམ་པ་ཐམས་ཅད་དུ་སྤངས་ལ་མི་འདྲེ་བར་བྱའོ།

འཇིག་རྟེན་གྱི་ཟང་ཟིང་ཐམས་ཅད་རྣམ་པ་ཐམས་ཅད་དུ་སྤངས་ལ་བསོད་སྙོམས་སྤྱད་པར་བྱའོ།

གོས་ལ་སྲེད་པ་ཐམས་ཅད་སྤངས་ལ་ཕྱག་དར་ཁྲོད་པར་བྱའོ།

ཁང་པ་བརྩེགས་པ་དང་།

གདིང་བ་ཐམས་ཅད་རྣམ་པ་ཐམས་ཅད་དུ་སྤངས་ལ་ཆུ་འགྲམ་དང་།

མྱ་ངམ་ལ་བརྟེན་པར་བྱ།

རྡོ་ལེབ་དང་ཤིང་དྲུང་དུ་བརྟེན་པར་བྱའོ།

ན་བའི་གསོས་སྨན་དང་།

ཡོ་བྱད་ཐམས་ཅད་སྤངས་ལ་བསྐུས་ཏེ་བོར་བ་ལ་བརྟེན་པར་བྱའོ།

སེམས་ཅན་ཐམས་ཅད་སྔོན་སྣག་གི་གཉེན་མཚམས་སུ་གྱུར་པར་རིག་ནས་བྱམས་པ་ལ་གནས་པར་བྱ།

གཤེ་བ་དང་།

བརྡེག་པ་དང་།

ཡོངས་སུ་གདུང་བ་རྣམ་པ་ཐམས་ཅད་དུ་སྤངས་ལ་བཟོད་པར་བྱའོ།

མཛའ་བཤེས་ཀྱི་ཁྱིམ་དང་།

བསླང་བ་སྟེར་བའི་ཁྱིམ་ཐམས་ཅད་སྤངས་ལ་ལས་བདག་གིར་བྱ་བ་ལ་བསྟེན་པར་བྱའོ།

ཁྱིམ་པ་དང་འདྲེ་བར་མི་བྱའོ།

དེས་ཇི་སྐད་དུ་བསྟན་པའི་སོ་སོར་ཐར་པ་དང་འཐུན་པར་བྱའོ།

འོད་སྲུང་གང་དག་སོ་སོར་ཐར་པ་དང་མི་འཐུན་པར་བྱ་བར་སེམས་པ་དེ་དག་ནི་སངས་རྒྱས་ཀྱི་སྟོབས་དང་མི་འཇིགས་པ་དང་མི་འཐུན་པར་བྱ་བར་སེམས་པའོ།

གང་དག་སངས་རྒྱས་ཀྱི་སྟོབས་དང་མི་འཇིགས་པ་དང་མི་འཐུན་པར་བྱ་བར་སེམས་པ་དེ་དག་ནི་འདས་པ་དང་།

མ་བྱོན་པ་དང་།

ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་དང་མི་འཐུན་པར་བྱ་བར་སེམས་པ་སྟེ།

དེའི་རྣམ་པར་སྨིན་པས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པས་སེམས་ཅན་དམྱལ་བའི་སྡུག་བསྔལ་གྱི་ཚོར་བ་མྱོང་བའི་ཚོར་བ་དག་གིས་དེའི་ཚོར་བ་དེའི་བརྒྱའི་ཆར་ཡང་མི་ཕོད།

སྟོང་དང་།

བརྒྱ་སྟོང་དང་།

བྱེ་བ་བརྒྱ་སྟོང་དང་།

གྲངས་དང་།

ཆ་དང་།

བགྲང་བ་དང་།

དཔེ་དང་།

རྒྱུར་ཡང་མི་ཕོད་དོ།

སྡུག་བསྔལ་དང་།

ཡིད་མི་བདེ་བ་འདི་ལྟ་བུ་འདི་དག་ཡོངས་སུ་སྤང་བར་འདོད་པས་དགེ་སློང་དེ་དག་གི་སྤྱོད་པ་འདི་ལྟ་བུ་དེ་དག་དཔག་ཚད་སྟོང་བས་

ཀྱང་རིང་དུ་ཡོངས་སུ་སྤང་བར་བྱ་སྟེ།

བཟླས་པའི་སྒྲ་ཡང་ཡོངས་སུ་སྤང་བར་བྱ་ན་བལྟ་བ་དང་མཉན་པ་ལྟ་ཅི་སྨོས་ཏེ་དེ་དག་ཡོངས་སུ་སྤང་བར་བྱའོ།

ཆོས་གཅིག་ཀུན་ཏུ་བསྟེན་པར་བྱ་སྟེ།

ཆོས་གཅིག་པོ་གང་ཞེ་ན།

ཆོས་ཐམས་ཅད་དངོས་པོ་མེད་པར་གྱུར་པ་སྟེ།

གང་གི་ཚེ་བདག་ཀྱང་དེ་དང་འདྲ་བའི་ཚེ་ཆོས་ཐམས་ཅད་ལ་དངོས་པོ་མེད་པའི་བཟོད་པ་དང་ལྡན་པར་འགྱུར་ཏེ།

དེ་མི་དེ་ལྟ་བུ་དེ་དག་དང་སྟེན་པར་མི་བྱེད།

སྙེན་པར་མི་བྱེད།

བསྙེན་བཀུར་མི་བྱེད་དོ།

དེས་ཆོས་གཉིས་ཀུན་ཏུ་བསྟེན་པར་བྱ་སྟེ།

གཉིས་གང་ཞེ་ན།

ཆོས་ཐམས་ཅད་ལ་དངོས་པོ་མེད་པའི་ཆོས་ཉིད་ཡོངས་སུ་བཙལ་བར་བྱ་བ་དང་།

ཡོངས་སུ་བཙལ་བའི་སེམས་ཀྱང་བསྐྱེད་པར་མི་བྱའོ།

ཇི་ལྟ་བུར་ཡོངས་སུ་བཙལ་བར་བྱ་ཞེ་ན།

ཇི་ལྟར་ཡོངས་སུ་བཙལ་བ་དེ་གཉིས་མི་དམིགས་པར་འགྱུར་བ་ལྟ་བུར་རོ།

དེ་ལ་མི་དམིགས་པས་མི་དམིགས་པའི་སེམས་ཀྱང་བསྐྱེད་པར་མི་བྱ་སྟེ།

དེ་ནི་ལོག་པར་ལྟ་བ་ཡིན་པས་ཁམས་གསུམ་པ་ཐམས་ཅད་དང་བྲལ་བའི་སེམས་ཀྱིས་བྱང་ཆུབ་སེམས་དཔའི་སྤྱོད་པའི་རྗེས་སུ་འགྲོ་བར་བྱའོ།

མཚན་མ་ཐམས་ཅད་མེད་པའི་སེམས་ཀྱིས་བྱང་ཆུབ་སེམས་དཔའི་སྤྱོད་པའི་རྗེས་སུ་འགྲོ་བར་བྱའོ།

དེ་ལ་བྱང་ཆུབ་སེམས་དཔའི་སྤྱོད་པ་ནི་འདི་ཡིན་ཏེ།

གང་འདི་དེའི་དུས་ན་བསྟན་པ་ཡིན་ནོ།

གང་དག་ཆོས་འདི་ལྟ་བུ་འདི་དག་ཐོས་ནས་ཡོངས་སུ་སྤོང་བས་ཡོངས་སུ་སྤོང་བ་དེ་དག་གིས་དེ་བཞིན་གཤེགས་པ་བྱམས་པ་མཉེས་པར་བྱས་ནས་མི་མཉེས་པར་མི་བྱེད།

ཐུགས་བྱུང་བར་མི་བྱེད་པས་ཀྱེ་མའོ་བདག་ཅག་བདུད་ཀྱི་ཞགས་པ་དག་ལས་གྲོལ་ལོ།

ཀྱེ་མ་བདག་ཅག་ངན་འགྲོར་འགྲོ་བའི་རྒྱུ་རྣམས་ལས་གྲོལ་ཏེ།

ཀྱེ་མ་བདེའོ་ཞེས་ཚིག་ཏུ་སྨྲའོ།

འོད་སྲུང་གང་དག་དེའི་དུས་ན་མདོ་སྡེ་འདི་ལྟ་བུ་འདི་དག་ཐོས་ནས་མི་སྐྲག་མི་དངང་ཞིང་དངང་བར་མི་འགྱུར་ལ།

དེ་ལ་བདག་ཀྱང་རྗེས་སུ་མཐོང་བར་འགྱུར་ཞིང་གཟུངས་ཀྱི་བློ་ཡང་སྐྱེ་བར་འགྱུར་བ་དེ་དག་ཐམས་ཅད་ནི་དེ་བཞིན་གཤེགས་པས་མཁྱེན་ཏེ།

དེ་དག་ཐམས་ཅད་ངའི་ཆོས་སྲུང་བ་དག་གོ །

འོད་སྲུང་འདི་ལྟ་སྟེ།

དཔེར་ན་ཁྱིམ་བདག་ཕྱུག་པོ་ནོར་ཆེ་བ་

ལོངས་སྤྱོད་ཆེ་བ་ཞིག་གི་བུ་གང་ཡིན་པ་དེ་དག་གིས་ཁྱིམ་དེ་ནས་ཐ་ན་ཕའི་རྫས་ལས་ཆུ་རྫ་ཙམ་མཐོང་ན་ཡང་མཐོང་མ་ཐག་ཏུ་ཕའི་རྫས་དེ་ལ་འདི་ནི་བདག་གིའོ་སྙམ་དུ་འདུ་ཤེས་སྐྱེད་དེ།

དུས་གཞན་ཞིག་ན་ཕ་ཡང་ཤི་ལ་ལོངས་སྤྱོད་ཀྱང་ཟད་པའི་ཚེ་ཆུ་རྫ་དེ་དག་གི་དྲུང་དུ་འཇོག་གམ།

གནས་གང་ཡང་རུང་བར་འཇོག་པ་དེ་བཞིན་དུ་འོད་སྲུང་དེའི་དུས་ན་དགེ་སློང་དེ་དག་མདོ་སྡེ་འདི་ལྟ་བུ་འདི་དག་ཐོས་ནས་འདི་ལྟ་བུའི་འདུ་ཤེས་ཡིད་ལ་བྱེད་པ་སྐྱེད་པར་འགྱུར་ཏེ།

མདོ་སྡེ་འདི་དག་ནི་དེ་བཞིན་གཤེགས་པས་གསུངས་པ་མཛེས་པ་ཡིད་དུ་འོང་བས་གསུངས་པའོ་སྙམ་མོ།

དེ་ལ་དགེ་སློང་ཁ་ཅིག་ནི་མདོ་སྡེ་འདི་ལྟ་བུ་འདི་དག་ཐོས་ནས་སྤོང་བར་འགྱུར་རོ།

དེ་ལ་ཆོས་འཛིན་པའི་དགེ་སློང་དེ་དག་ནི་འདི་སྙམ་དུ་སེམས་པར་འགྱུར་ཏེ།

མདོ་སྡེ་འདི་དག་ནི་དེ་བཞིན་གཤེགས་པས་གསུངས་པའོ་སྙམ་དུ་སེམས་ལ།

ཁ་ཅིག་གིས་བརྙས་ཤིང་ཤིན་ཏུ་བརྙས་པར་གྱུར་པ་དེ་དག་ནི་ཉུང་ལ་ཉམ་ཆུང་བར་གྱུར་པ་དག་སྟེ།

དེ་དག་གིས་སྦ་བའི་ཕྱིར་ཉིན་མཚན་དུ་འཇོག་པར་འགྱུར་རོ།

འོད་སྲུང་འདི་ལྟར་དེ་བཞིན་གཤེགས་པ་བྱམས་པ་དང་།

ངའི་ཆོས་ཀྱི་གྲོང་ཁྱེར་སྲུང་བར་གྱུར་པ་ཐ་མ་པ་དེ་དག་ནི་ཉུང་སྟེ།

དེ་དག་ངས་ད་ལྟར་གཟིགས་སོ།

དེའི་ཕྱིར་དེ་དག་གི་གཉེན་པོ་ནི་འདི་དག་སྟེ།

དེ་དག་ནི་སྦྱིན་པ་ཆེན་པོ་ཡོངས་སུ་གཏོང་བར་འགྱུར་རོ།

ཀྱེ་གང་གི་ཚེ་རིགས་ཀྱི་བུ་དེ་དག་གིས་ཆོས་འདི་ལྟ་བུ་འདི་དག་ཐོས་ནས་ཇི་ལྟར་བཅས་པའི་བྱ་བ་བཞིན་དུ་ནན་ཏན་གྱིས་སྒྲུབ་པ་དེ་དག་ནི་དེ་བཞིན་གཤེགས་པ་བྱམས་པ་ལས་སྙིང་པོ་མཆོག་ཐོབ་པར་འགྱུར་ཏེ།

དེ་ལ་ཚངས་པར་སྤྱད་པ་སྤྱོད་ཅིང་ཡང་དག་པར་བལྟ་བའི་སེམས་ཅན་རྣམས་ནི་ཡང་ཆོས་ཀྱི་གྲོང་ཁྱེར་འདི་འཛིན་པར་འགྱུར་རོ།

འོད་སྲུང་གང་དག་གིས་ང་མཉེས་པར་མ་བྱས་པའི་སེམས་ཅན་དེ་ནི་གཅིག་ཀྱང་ངས་ཀུན་ནས་མ་མཐོང་སྟེ།

དེ་དག་ནི་ཕྱི་མའི་ཚེ་ལྔ་བརྒྱ་ཐ་མ་ལ་མདོ་སྡེ་འདི་ལྟ་བུ་དེ་དག་ཐོས་ན་སྤོང་བར་མི་འགྱུར་གྱི།

ལེན་པར་འགྱུར།

འཛིན་པར་འགྱུར།

ཀློག་པར་འགྱུར་བ་དེ་ནི་གནས་མེད་དོ།

གང་དག་གིས་ད་ལྟར་ང་མཐོང་བ་དང་།

བསྙེན་བཀུར་བྱས་པ་དེ་དག་ནི་ཕྱི་མའི་ཚེ་ལྔ་བརྒྱ་ཐ་མ་ལ་མདོ་སྡེ་

འདི་ལྟ་བུ་འདི་དག་ནོད་པར་འགྱུར།

ལེན་པར་འགྱུར།

འཛིན་པར་འགྱུར་ཏེ།

དེ་དག་ལ་ངས་ལེགས་སོ་ཞེས་བྱ་བ་སྦྱིན་ཅི་དགོས་ཏེ།

དེ་དག་བདག་ཉིད་ཀྱིས་ཐམས་ཅད་མཁྱེན་པའི་ཡེ་ཤེས་དང་ལྡན་པའི་ཕྱིར་རོ།

ང་རྗེས་སུ་དྲན་ནས་དགའ་བར་འགྱུར་ཏེ།

ཀྱེ་མ་ཀྱེ་མ་ཤཱཀྱ་ཐུབ་པ་དེས་ཕན་གདགས་པའི་དམ་པས་བདག་ཅག་ལ་ཕན་བཏགས་སོ་ཞེས་ཚིག་དེ་སྐད་སྨྲ་བར་འགྱུར་རོ།

འོད་སྲུང་དེ་ལྟ་བས་ན་ཆོས་འདི་ལ་སློབས་ཤིག།།

འདི་ལ་བསླབས་ན་ཅི་དང་ཅི་འདོད་པ་དེ་དང་དེ་རྙེད་དཀའ་བར་མི་འགྱུར་རོ།

དེ་སྐད་ཅེས་བཀའ་སྩལ་བ་དང་།

བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་གིས་ཅི་ཞིག་བཙལ་བར་བགྱི།

བཅོམ་ལྡན་འདས་བདག་ནི་རེ་བ་མ་མཆིས་ཏེ།

བཅོམ་ལྡན་འདས་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཡོངས་སུ་ཉམས་པ་ལགས་སོ།

བཅོམ་ལྡན་འདས་བདག་གང་གི་ཚེ་ཐམས་ཅད་མཁྱེན་པའི་ཡེ་ཤེས་དང་ལྡན་པར་གྱུར་པ་ན་ཤིན་ཏུ་དགའ་བར་འགྱུར་ལགས་སོ།

བཅོམ་ལྡན་འདས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ངོ་མཚར་དུ་འཛིན་པ་ལགས་སོ།

བཅོམ་ལྡན་འདས་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྙེད་དཀའ་ལགས་སོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ།

འོད་སྲུང་ང་ཁྱོད་ལ་ནི་མི་ཟེར་གྱི་ཁྱོད་ལ་བརྟེན་ནས་དེ་དག་ལ་སྨྲས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱ་བ་ཐེ་ཚོམ་མེད་པ་ལ་ཁྱོད་ཐེ་ཚོམ་ཟའོ།

འོད་སྲུང་གཞན་ཡང་སེམས་ཅན་གང་དག་ཆོས་ལ་སྐོམ་པ་དང་ལྡན་པ་དང་།

ཆོས་ཡོངས་སུ་ཚོལ་བ་དང་ལྡན་པ་དེ་དག་ཐམས་ཅད་ནི་མཐར་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོངས་སུ་ཚོལ་བ་ཐམས་ཅད་ཡང་དག་པར་གཞོལ་བའི་ཕྱིར་ཆོས་སྟོན་པར་འགྱུར་རོ།།

སྡོམ་པ་གསུམ་བསྟན་པའི་ལེའུ་ཞེས་བྱ་བ་ཐེག་པ་ཆེན་པོའི་

མདོ།

བམ་པོ་གཉིས་པ།

འོད་སྲུང་བྱང་ཆུབ་སེམས་དཔས་ཆོས་བཞི་དང་ལྡན་པར་བྱ་སྟེ།

བཞི་གང་ཞེ་ན།

བྱང་ཆུབ་སེམས་དཔས་བརྩོན་འགྲུས་བརྩམ་པར་བྱའོ།

བརྩོན་འགྲུས་བརྩོན་འགྲུས་ཞེས་བྱ་བ་གང་ཞེ་ན།

གང་གཟུགས་མི་ཚོལ།

ཚོར་བ་དང་།

འདུ་ཤེས་དང་།

འདུ་བྱེད་དང་།

རྣམ་པར་ཤེས་པ་མི་ཚོལ་གྱི་ཟག་པ་མེད་པའི་ཆོས་རྣམས་ཚོལ་བའོ།

དེ་ལ་ཟག་པ་མེད་པའི་ཆོས་རྣམས་གང་ཞེ་ན།

གང་ན་སའི་ཁམས་མེད་པ་དང་།

སའི་ཁམས་ཀུན་ཏུ་བརྗོད་པ་མེད་པ་དང་།

ཆུའི་ཁམས་མེད་པ་དང་།

མེའི་ཁམས་མེད་པ་དང་།

རླུང་གི་ཁམས་མེད་པ་དང་།

རླུང་གི་ཁམས་ཀུན་ཏུ་བརྗོད་པ་མེད་པ་དང་།

གང་ན་གང་བརྗོད་པ་དེ་ཐམས་ཅད་ནི་བཏགས་པ་སྟེ།

བཏགས་པའི་ཆོས་དེ་དག་ཐམས་ཅད་ནི་ཡང་དག་པ་མ་ཡིན་པའོ།

དེ་ལ་བྱང་ཆུབ་སེམས་དཔས་བཏགས་པ་མེད་པའི་སྙིང་པོ་བླང་བར་བྱའོ།

གསོལ་པ།

བཅོམ་ལྡན་འདས་གལ་ཏེ་བཏགས་པའི་ཆོས་ཡང་དག་པ་མ་ལགས་ན་གང་ལ་ལ་འདི་སྐད་དུ་གལ་ཏེ་བཏགས་པའི་ཆོས་ཡང་དག་པ་མ་ཡིན་ན།

གང་སངས་རྒྱས་ཞེས་བྱ་བའི་སྒྲ་བརྗོད་པའི་བཏགས་པ་འདི་ཡང་ཡང་དག་པ་མ་ཡིན་པར་མི་འགྱུར་རམ་ཞེས་མཆི་བར་གྱུར་ན་བཅོམ་ལྡན་འདས་བདག་གིས་དེ་ལ་ཇི་སྐད་བགྱི།

བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྐུར་པ་འདེབས་པར་མི་འཚལ་ལོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ།

འོད་སྲུང་མ་འོངས་པའི་དུས་ན་དགེ་སློང་ལུས་མ་བསྒོམས་པ།

སེམས་མ་བསྒོམས་པ།

ཚུལ་ཁྲིམས་མ་བསྒོམས་པ།

ཤེས་རབ་མ་བསྒོམས་པ་དག་འབྱུང་སྟེ།

དེ་དག་ནི་དོན་མི་ཤེས་པ།

ཁྱད་དུ་གསོད་པ།

གནོད་སེམས་ལ་དཔའ་བ།

སྨྲ་བ་ལ་དཔའ་བ་དག་འབྱུང་སྟེ།

དེ་དག་མདོ་སྡེ་འདི་ལྟ་བུ་འདི་དག་ལེན་པར་མི་བྱེད།

ཀུན་ཆུབ་པར་མི་བྱེད།

འཛིན་པར་མི་བྱེད།

ཀློག་པར་མི་བྱེད་དོ།

དེ་ཅིའི་ཕྱིར་ཞེ་ན།

དེ་དག་འདི་ལྟར་གཟུགས་སྐྱེ་བ་དང་།

ཚོར་བ་དང་།

འདུ་ཤེས་དང་།

འདུ་བྱེད་དང་།

རྣམ་པར་ཤེས་པ་སྐྱེ་བར་རྟོག་

པའི་ཕྱིར་རོ།

འདི་ལྟར་མདོ་སྡེ་འདི་ལྟ་བུ་འདི་དག་ནི་བཏགས་པའི་ཆོས་སོ།

དེའི་དུས་ན་འབྱུང་བ་དེ་དག་ནི་ཇི་ལྟར་གཟུགས་སྐྱེ་བ་དང་།

ཇི་ལྟར་ཚོར་བ་དང་།

ཇི་ལྟར་འདུ་ཤེས་དང་།

ཇི་ལྟར་འདུ་བྱེད་རྣམས་དང་།

ཇི་ལྟར་རྣམ་པར་ཤེས་པ་སྐྱེ་བ་དེ་ལྟར་དགེ་སློང་དེ་དག་དེའི་ཚེ་གནས་པར་འགྱུར་རོ།

དེའི་དུས་ན་ཁྱིམ་པ་དང་དགེ་སློང་ཁ་ཅིག་འབྱུང་བར་འགྱུར་བ་དེ་དག་ལ་དོན་དམ་པས་ཅི་ཞིག་བྱ།

འོད་སྲུང་འདི་ལྟ་སྟེ།

དཔེར་ན་མི་དམུས་ལོང་ལ་གསེར་གྱི་ཕྲེང་བ་བཏགས་ན་དེས་མི་ཤེས་སོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་གིས་མདོ་སྡེ་འདི་ལྟ་བུ་འདི་དག་ཐོས་ན་ཚིག་ཏུ་བརྗོད་པས་ཀྱང་འཛིན་པར་མི་འགྱུར་ན་དོན་དམ་པ་ཡིད་ལ་བྱེད་པས་འཇུག་པར་འགྱུར་བ་ལྟ་ཅི་སྨོས།

འོད་སྲུང་འདི་ལྟ་སྟེ།

དཔེར་ན་ཁྱེའུ་འམ་བུ་མོ་ལ་ལ་ཞིག་ལ་མི་ལ་ལ་ཞིག་གིས་བསྡིགས་ན།

དེ་ཡུན་ཇི་སྲིད་དུ་མི་དེའི་མིང་བརྗོད་པ་ཐོས་པ་དེ་སྲིད་དུ་སྐྲག་ལ་དངང་ཞིང་དངང་བར་འགྱུར་རོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་མདོ་སྡེ་འདི་ལྟ་བུ་འདི་དག་གིས་ཡང་དག་པ་ཇི་ལྟ་བ་བཞིན་དུ་བསྐུལ་ན་བདག་གི་བསྔགས་པ་མ་ཡིན་པ་ཤེས་ཤིང་བདག་ཆོས་གོས་ཀྱིས་དཀྲིས་པར་རིག་ནས་སྐྲག་ལ་དངང་ཞིང་དངང་བར་འགྱུར་རོ།

འོད་སྲུང་འདི་ལྟ་སྟེ།

དཔེར་ན་སྤྲེའུ་བྱི་ལའི་དྲུང་དུ་བཏགས་ན་དེ་ལ་མི་ཕྱོགས་ཏེ་ལྟ་བར་མི་ནུས་སོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དག་མདོ་སྡེ་འདི་ལྟ་བུ་འདི་དག་ཐོས་ན་རྒྱབ་ཀྱིས་ཕྱོགས་ཤིང་མདུན་གྱིས་མི་ཕྱོགས་པར་འགྱུར་རོ།

འོད་སྲུང་འདི་ལྟ་སྟེ།

དཔེར་ན་ཝ་ནི་ཁྱི་ལས་འབྲོས་ཏེ་དུར་ཁྲོད་དུ་གཞོལ།

ཁུང་དུ་གཞོལ།

ཕུག་ཏུ་གཞོལ་ལོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་མདོ་སྡེ་འདི་ལྟ་བུ་འདི་དག་ཐོས་ན་ཝའི་རྣམ་པར་རྒྱུག་པས་རྒྱུག་པར་འགྱུར་རོ།

དེ་ལ་ཝའི་རྣམ་པར་རྒྱུག་པ་ནི་འདི་ཡིན་ཏེ།

གང་དག་ཚུལ་ཁྲིམས་འཆལ་པར་འགྱུར་བ་སྟེ།

དེ་དག་མདོ་སྡེ་འདི་ལྟ་བུ་འདི་དག་ཐོས་ན་སྤོང་བར་འགྱུར་རོ།

འོད་སྲུང་འདི་ལྟ་སྟེ།

དཔེར་ན་ཝ་ནི་དུར་ཁྲོད་དུ་གཞོལ་བར་འགྱུར་རོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་ཀྱང་མདོ་སྡེ་འདི་

ལྟ་བུ་འདི་དག་ཐོས་ན་ཁྱིམ་ལ་གཞོལ་བར་འགྱུར།

འདོད་པ་ལ་གཞོལ་བར་འགྱུར།

བུད་མེད་ལ་གཞོལ་བར་འགྱུར།

འཐབ་མོ་དང་མཚང་འབྲུ་བ་ལ་གཞོལ་བར་འགྱུར།

འདུས་པ་ལ་གཞོལ་བར་འགྱུར།

རྩི་སྨན་གྱི་ཐ་སྙད་ལ་གཞོལ་བར་འགྱུར།

རྒྱལ་པོའི་བཀྲབས་པར་འགྱུར་ཞིང་དེར་གནས་པ་དེ་དག་ཆེས་ཚུལ་ཁྲིམས་འཆལ་བར་འགྱུར་ཏེ།

དེ་ནི་དེ་དག་གི་དུར་ཁྲོད་དུ་འགྲོ་བ་ཞེས་བཤད་དོ།

འོད་སྲུང་འདི་ལྟ་སྟེ།

དཔེར་ན་ཝ་ནི་ཁུང་དུ་གཞོལ་ལོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་ཀྱང་འཆི་བའི་དུས་བྱས་ན་ངན་འགྲོར་གཞོལ་བར་འགྱུར་ཏེ།

དེ་ནི་དེ་དག་གི་ཁུང་དུ་གཞོལ་བར་བཤད་དོ།

འོད་སྲུང་འདི་ལྟ་སྟེ།

དཔེར་ན་ཝ་ནི་ཕུག་ཏུ་གཞོལ་ལོ།

འོད་སྲུང་དེ་བཞིན་དུ་དེའི་དུས་ན་དགེ་སློང་དེ་དག་ཀྱང་སྤུ་གྲི་གཏམས་པ་དང་།

རལ་གྲིའི་འདབ་མ་ཅན་གྱི་ཚལ་གྱི་སེམས་ཅན་དམྱལ་བ་ཆེན་པོ་རྣམས་དང་།

གསལ་ཤིང་གི་ཚལ་གྱི་སེམས་ཅན་དམྱལ་བ་ཆེན་པོ་རྣམས་སུ་རྒྱུག་ཅིང་རྣམ་པར་རྒྱུག་པར་འགྱུར་ཏེ།

འདི་ནི་དེ་དག་གི་ཝའི་འགྲོ་བ་ཞེས་བཤད་དོ།

འོད་སྲུང་ཝའི་ཆོས་དང་ལྡན་པའི་དགེ་སློང་ནི་མདོ་སྡེ་འདི་ལྟ་བུ་འདི་དག་གཟུང་བ་འམ་རྟོགས་པར་བྱེད་ནི་མི་ནུས་ཀྱི།

གང་སྨད་ཅིང་སྤངས་ནས་དེའི་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་ལྟུང་བར་ནི་བྱེད་ནུས་སོ།

འོད་སྲུང་དགེ་སློང་གང་འདི་སྐད་ཅེས་བཏགས་པའི་ཆོས་ཡང་དག་པ་མ་ཡིན་ན་གང་དེ་བཞིན་གཤེགས་པ་ཞེས་བརྗོད་པར་གྱུར་པ་འདི་ཡང་བཏགས་པ་སྟེ།

ཡང་དག་པ་མ་ཡིན་པའོ་ཞེས་ཟེར་བ་དེ་ལ་དགེ་སློང་མཁས་པ་རྣམས་ཀྱིས་འདི་སྐད་བརྗོད་པར་བྱ་སྟེ།

ཚེ་དང་ལྡན་པ་སྟོང་པ་ཉིད་དམ།

འོན་ཏེ་བཏགས་པ་འམ།

གནས་གང་གིས་གནས་འདི་བརྗོད་ཅེས་བརྗོད་པར་བྱའོ།

དེ་གལ་ཏེ་འདི་སྐད་དུ་བཏགས་པའོ་ཞེས་ཟེར་ན་དེ་ལ་འདི་སྐད་བརྗོད་པར་བྱ་སྟེ།

འོ་ན་ནི་ཁྱོད་ཀྱང་སངས་རྒྱས་སུ་འགྱུར་རོ།

དེ་ཅིའི་ཕྱིར་ཞེ་ན།

ཁྱོད་ཀྱི་མིང་བཏགས་པ་ཡང་ཡོད་པའི་ཕྱིར་རོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་སྟོང་པ་ཉིད་དོ་ཞེ་ན།

དེ་ལ་འདི་སྐད་

དུ་འོ་ན་ནི་བརྗོད་པར་མི་བྱའོ།

དེ་ཅིའི་ཕྱིར་ཞེ་ན།

སྟོང་པ་ཉིད་ནི་བརྗོད་དུ་མེད་པའི་ཕྱིར་ཏེ་དེས་སྟོང་པ་བཏགས་སོ།

སྟོང་པ་གང་ཡང་བདག་གམ།

བདག་གི་འམ།

སེམས་ཅན་གྱིས་སྟོང་པ་མ་ཡིན་པ་དེ་སྟོང་པའོ་ཞེས་བརྗོད་པར་བྱའོ།

ཡང་དགེ་སློང་དེ་ལ་དགེ་སློང་ཁྱོད་ཅི་ཆོས་ཐམས་ཅད་སྟོང་པར་འདོད་དམ་ཞེས་དྲི་བར་བྱའོ།

དེ་གལ་ཏེ་འདི་སྐད་དུ་ཁོ་བོ་ནི་སྟོང་པ་ཉིད་མི་འདོད་དོ་ཞེས་ཟེར་ན་དེ་ལ་འདི་སྐད་དུ་ཚེ་དང་ལྡན་པ་ཁྱོད་ནི་དགེ་སྦྱོང་ཤཱཀྱའི་སྲས་ལས་ཉམས་ནས་ཡུན་རིང་ངོ་།

དེ་ཅིའི་ཕྱིར་ཞེ་ན།

བཅོམ་ལྡན་འདས་དེ་ནི་སྟོང་པ་ཉིད་གསུང་བ་སྟེ།

བདག་ཏུ་གསུང་བ་མ་ཡིན།

སེམས་ཅན་དུ་གསུང་བ་མ་ཡིན།

སྲོག་ཏུ་གསུང་བ་མ་ཡིན།

གང་ཟག་ཏུ་གསུང་བ་མ་ཡིན་པའི་ཕྱིར་རོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་ཆོས་ཐམས་ཅད་ནི་སྟོང་པ་སྟེ།

ཁོ་བོ་སྟོང་པ་ཉིད་འདོད་དོ་ཞེས་ཟེར་ན་དེ་ལ་འདི་སྐད་དུ་ཚེ་དང་ལྡན་པ་ཆོས་ཐམས་ཅད་ཀྱང་སྟོང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟ་ཅི་སྨོས།

ཚེ་དང་ལྡན་པ་ཅི་མིག་དེ་བཞིན་གཤེགས་པ་ཡིན་ནམ།

ཅི་རྣ་བ་དང་།

སྣ་དང་།

ལྕེ་དང་།

ལུས་དང་།

ཡིད་དེ་བཞིན་གཤེགས་པ་ཡིན་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་ཡིན།

རྣ་བ་དང་།

སྣ་དང་།

ལྕེ་དང་།

ལུས་དང་།

ཡིད་དེ་བཞིན་གཤེགས་པ་ཡིན་ནོ་ཞེས་ཟེར་ན་དེ་ལ་འདི་སྐད་དུ་འོ་ན་ནི་ཚེ་དང་ལྡན་པ་ཡང་དེ་བཞིན་གཤེགས་པ་ཡིན་ནོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན་ཏེ།

ཡིད་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་ལྟར་ན་མིག་ནི་བཏགས་པ་སྟེ།

དེ་དེ་བཞིན་གཤེགས་པ་མ་ཡིན།

ཡིད་ཀྱི་བར་དུ་བཏགས་པ་སྟེ།

དེ་དེ་བཞིན་གཤེགས་པ་མ་ཡིན་ནོ།

ཚེ་དང་ལྡན་པ་དེ་ལྟར་ན་ཁྱོད་འདི་སྐད་དུ་དེ་བཞིན་གཤེགས་པ་བཏགས་པ་མ་ཡིན་ནོ་ཞེས་ཟེར་ན་གནས་དེར་བདག་ཅག་གིས་ཅི་ཞིག་མ་ཐོབ་པར་གྱུར་ཅེས་བརྗོད་པར་བྱའོ།

དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན།

དེ་བཞིན་གཤེགས་པ་མིག་ལས་གཞན་པ་ཡང་མ་

ཡིན།

ཡིད་ཀྱི་བར་དུ་དེ་བཞིན་གཤེགས་པ་མ་ཡིན།

དེ་བཞིན་གཤེགས་པ་ཡིད་ལས་གཞན་པ་ཡང་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་བཞིན་གཤེགས་པས་སྐྱེ་མཆེད་བཅུ་གཉིས་གསུངས་པ་ནི་འདི་ལྟ་སྟེ།

མིག་གི་སྐྱེ་མཆེད་དང་།

གཟུགས་ཀྱི་སྐྱེ་མཆེད་ནས་ཡིད་ཀྱི་སྐྱེ་མཆེད་དང་།

ཆོས་ཀྱི་སྐྱེ་མཆེད་དེ།

ཚེ་དང་ལྡན་པ་དེ་དག་ནི་སེམས་ཅན་ནམ་སེམས་ཅན་དུ་བཏགས་པར་ཟད་ན།

ཚེ་དང་ལྡན་པ་ཅི་མིག་དེ་བཞིན་གཤེགས་པ་ཡིན་ནམ།

ཡིད་ཀྱི་བར་དུ་དེ་བཞིན་གཤེགས་པ་ཡིན་ནམ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་ཡིན་ཏེ།

ཡིད་ཀྱི་བར་དུ་དེ་བཞིན་གཤེགས་པ་ཡིན་ནོ་ཞེས་ཟེར་ན་དེ་ལ་འདི་སྐད་དུ་འོ་ན་སེམས་ཅན་ཐམས་ཅད་ཀྱང་སངས་རྒྱས་སུ་འགྱུར་ཏེ།

ས་ཐམས་ཅད་དང་།

རི་ཐམས་ཅད་དང་།

ཤིང་ཐམས་ཅད་དང་།

སྲིད་པར་གཏོགས་པ་རྣམས་སངས་རྒྱས་སུ་འགྱུར་རོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་མིག་དེ་བཞིན་གཤེགས་པ་མ་ཡིན་ཏེ།

ཡིད་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེ་བཞིན་གཤེགས་པས་ཆོས་དང་ཆོས་མ་ཡིན་པ་བསྟན་པ་ནི་འདི་དག་གོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་གཟུགས་དེ་བཞིན་གཤེགས་པ་མ་ཡིན་ཏེ།

ཆོས་ཀྱི་བར་དུ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་ཚེ་དང་ལྡན་པ་ཅི་ཆོས་མ་ཡིན་པ་དེ་བཞིན་གཤེགས་པ་ཡིན་ནམ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་ཆོས་མ་ཡིན་པ་དེ་བཞིན་གཤེགས་པའོ་ཞེས་ཟེར་ན་དེ་ལ་འདི་སྐད་དུ་འོ་ན་སེམས་ཅན་གང་དག་ཕར་མི་འཛིན་པ་དང་།

མར་མི་འཛིན་པ་དང་།

དགེ་སྦྱོང་དུ་མི་འཛིན་པ་དང་།

བྲམ་ཟེར་མི་འཛིན་པ་དང་།

རིགས་ཀྱི་གཙོ་བོ་མི་སྐྱོང་བ་དང་།

སྲོག་གཅོད་པ་དང་།

མ་བྱིན་པར་ལེན་པ་དང་།

འདོད་པས་ལོག་པར་གཡེམ་པ་དང་།

བརྫུན་དུ་སྨྲ་བ་དང་།

ཕྲ་མ་སྨྲ་བ་དང་།

ངག་རྩུབ་པོ་སྨྲ་བ་དང་།

ཚིག་ཀྱལ་པ་སྨྲ་བ་དང་།

བརྣབ་སེམས་ཅན་དང་།

གནོད་སེམས་ཀྱི་སེམས་དང་ལྡན་པ་དང་།

ལོག་པར་ལྟ་བ་དག་དང་།

སྲིད་པར་བསྡུས་པ་དེ་དག་ཐམས་ཅད་ཀྱང་དེ་བཞིན་གཤེགས་པར་འགྱུར་

རོ་ཞེས་བརྗོད་པར་བྱའོ།

དེ་གལ་ཏེ་འདི་སྐད་དུ་ཆོས་མ་ཡིན་པ་དེ་བཞིན་གཤེགས་པ་མ་ཡིན་ནོ་ཞེས་ཟེར་ན་དེ་ལ་འདི་སྐད་དུ་དེའི་ཕྱིར་དེ་བཞིན་གཤེགས་པ་ནི་ཆོས་ཀྱང་མ་ཡིན་ཆོས་མ་ཡིན་པ་ཡང་མ་ཡིན་ནོ།

གང་ཆོས་ཀྱང་མ་ཡིན་ཆོས་མ་ཡིན་པ་ཡང་མ་ཡིན་པ་དེ་ལ་བཏགས་པ་མེད་དོ།

ཚེ་དང་ལྡན་པ་དེ་ལྟར་ན་འདི་སྐད་དུ་དེ་བཞིན་གཤེགས་པ་བཏགས་པ་མ་ཡིན་ནོ་ཞེས་ཟེར་རམ་ཞེས་བརྗོད་པར་བྱའོ།

འོད་སྲུང་དེ་ལྟར་ན་མི་བླུན་པོ་དེ་དག་ནི་དུས་དུས་སུ་ཆོས་དང་འཐུན་པས་ཚར་གཅད་པར་བྱའོ།

འོད་སྲུང་གང་ཆོས་དང་འཐུན་པ་ངེས་པར་བྱུང་བ་འདི་ལ་ཆོས་དང་འཐུན་པས་ཕྱིར་སྨྲ་ནུས་པ་དེ་ནི་ལྷ་དང་བཅས་པ་དང་།

བདུད་དང་བཅས་པ་དང་།

ཚངས་པ་དང་བཅས་པའི་འཇིག་རྟེན་ན་ངས་མ་མཐོང་སྟེ།

གཞན་དུ་ན་ཁྲོ་བ་དང་།

ཞེ་སྡང་དང་།

གཏི་མུག་དང་།

མི་བཟོད་པ་དང་།

རྐྱེན་མེད་པ་སྨྲས་ནས་ཆོས་སྟོང་པ་ལ་སྨོད་ཅིང་འགྲོ་བར་འགྱུར་བ་ནི་མ་གཏོགས་སོ།

འོད་སྲུང་དེ་ལྟར་ཁྱོད་ཀྱིས་མདོ་སྡེ་འདི་ལྟ་བུ་འདི་དག་གཟུང་བར་བྱའོ།

འོད་སྲུང་དགེ་སློང་གང་དག་མདོ་སྡེ་འདི་ལྟ་བུ་འདི་དག་འཛིན་པར་མི་འགྱུར་བའི་དུས་དེ་ཡོད་དེ།

དེ་དག་ལ་མིང་གསུམ་འདོགས་པར་འགྱུར་རོ།

གསུམ་གང་ཞེ་ན།

འདི་ལྟ་སྟེ།

ཆད་པར་སྨྲ་ཞིང་དངོས་པོ་མེད་པ་དང་།

ཕུང་པོ་མེད་པ་དང་།

རིམ་གྲོ་མེད་པའོ།

འོད་སྲུང་དེ་ལྟར་ན་དེའི་ཚེ་མདོ་སྡེ་འདི་ལྟ་བུ་འདི་དག་སྤང་བར་འགྱུར་རོ།

འོད་སྲུང་དེའི་དུས་ན་འདི་ལྟར་དེ་བཞིན་གཤེགས་པ་ལ་བསྟི་སྟང་མི་བྱེད་པ་དང་།

ཆོས་ལ་བསྟི་སྟང་མི་བྱེད་པར་འགྱུར་ཏེ།

དེ་བཞིན་གཤེགས་པ་དང་ཆོས་ལ་བསྟི་སྟང་མེད་པར་བྱས་ནས་དགེ་འདུན་གྱི་མིང་གི་ཚོགས་ལྷག་མར་འགྱུར་བ་ལ་ལྟོས།

དེ་དག་ནི་བཏགས་པ་ལ་རྟེན་པར་འགྱུར།

མིང་ལ་རྟེན་པར་འགྱུར་ཏེ།

དེ་དག་སངས་རྒྱས་དང་ཆོས་ཀྱི་མིང་བརྗོད་ཅིང་གཞན་དག་ལ་སྟོན་ཀྱང་སངས་རྒྱས་ཇི་ལྟར་བལྟ་བར་བྱ་བ་ནི་ཤེས་པར་མི་འགྱུར་རོ།

དེ་དག་སངས་རྒྱས་དང་ཆོས་ཞེས་ཚིག་ཏུ་བརྗོད་ཀྱང་དེ་བཞིན་གཤེགས་པས་ཆོས་བཤད་པ་གང་ཡིན་པ་དེ་ནི་ཤེས་པར་མི་

འགྱུར་རོ།

དེ་དག་སྐྱེས་བུ་ཟུང་བཞི་དང་།

སྐྱེས་བུ་གང་ཟག་ཡ་བརྒྱད་བརྗོད་པར་འགྱུར་ཞིང་།

བཅོམ་ལྡན་འདས་ཀྱི་ཉན་ཐོས་ཀྱི་མིང་ཙམ་ཤེས་པར་འགྱུར་ཏེ།

ཡོན་ཏན་གང་དག་གིས་དེའི་མིང་དང་།

དེའི་དོན་ནི་རིག་པར་མི་འགྱུར།

དེའི་དོན་ནི་ཤེས་པར་མི་འགྱུར་རོ།

དེ་དག་གོས་དང་ཟས་ཀྱི་ཆེད་དང་།

མལ་སྟན་དང་།

ན་བའི་གསོ་སྨན་དང་།

ཡོ་བྱད་ཀྱི་ཕྱིར་ཆོས་སྤོང་བར་འགྱུར་རོ།

དེ་ལ་བྱང་ཆུབ་སེམས་དཔས་མདོ་སྡེ་འདི་ལྟ་བུ་འདི་དག་ཁོང་དུ་ཆུད་པར་བྱ་བའི་ཕྱིར་བརྩོན་འགྲུས་བརྩམ་པར་བྱ།

བདག་འཇུག་པར་བྱས་ལ་གཟུང་བར་བྱའོ།

དེ་ཅིའི་ཕྱིར་ཞེ་ན།

དེ་དག་ཕྱི་མའི་དུས་ན་ཆོས་ཀྱི་གྲོང་ཁྱེར་སྐྱོང་བར་འགྱུར་བའི་ཕྱིར་རོ།

ཆོས་བསྟན་པ་འདི་ལྟ་བུས་བསྐལ་པ་དགུ་བཅུ་རྩ་གཅིག་སྟོངས་པར་གྱུར་ཏོ།

འོད་སྲུང་ངས་མངོན་པར་ཤེས་ཏེ་འདས་པའི་དུས་ན་བསྐལ་པ་སྟོང་ལ་དེ་བཞིན་གཤེགས་པ་གཅིག་འཇིག་རྟེན་དུ་བྱུང་ངོ་།

འོད་སྲུང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་ཞི་བ་དང་ལྡན་པ་ཞེས་བྱ་བ་བྱང་ཆུབ་སེམས་དཔའ་རྣམས་ཡོངས་སུ་སྨིན་པར་མཛད་པ་དང་།

འཇིག་རྟེན་གྱི་དོན་གྱི་ཕྱིར་བསྐལ་པ་བརྒྱད་ཁྲི་བཞི་སྟོང་དུ་བཞུགས་པར་གྱུར་ཏོ།

འོད་སྲུང་ངས་མངོན་པར་ཤེས་ཏེ་འདས་པའི་དུས་ན་དེ་བཞིན་གཤེགས་པ་དྲི་མ་མེད་པ་ཞེས་བྱ་བ་བསྐལ་པ་བྱེ་བ་ཕྲག་ཉི་ཤུར་བཞུགས་ཏེ།

བསྐལ་པ་བྱེ་བ་ཕྲག་ཉི་ཤུར་བྱང་ཆུབ་སེམས་དཔའི་སྤྱོད་པ་སྤྱད་ནས་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ།

འོད་སྲུང་དེ་བཞིན་གཤེགས་པས་སེམས་ཅན་རྣམས་ལ་ཕན་གདགས་པའི་ཕྱིར་ཅི་ཙམ་དུ་དཀའ་བ་མཛད་པ་ལ་ལྟོས།

འོད་སྲུང་བསྐལ་པའི་སྙིགས་མ་འདི་ལྟ་བུ་ཟད་པའི་དུས་ན་ངས་སྨད་པར་མི་བྱའོ།

འོད་སྲུང་ཐ་ན་སེམས་ཅན་གཅིག་གིས་ངའི་ཆོས་ཤེས་པ་དང་ཐམས་ཅད་ལག་ན་དབྱིག་པ་ཐོགས་ཤིང་ལག་ན་མཚོན་ཐོགས་ཏེ་ངའི་གན་དུ་རྒྱུག་ཅིང་འོང་བར་མི་སེམས་པ་དེ་ཡང་ངོ་མཚར་ཤིན་ཏུ་ཆེའོ།

དེ་ཅིའི་ཕྱིར་ཞེ་ན།