經部第46卷（མདོ་སྡེ་ཁ་བ་བཞུགས་སོ།།）

རྒྱ་གར་སྐད་དུ།

ཨཱརྱ་ལ་ལི་ཏ་བི་སྟཱ་ར་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་མཉན་ཡོད་ན།

རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན།

དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ལ་འདི་ལྟ་སྟེ།

ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་།

ཚེ་དང་ལྡན་པ་རྟ་ཐུལ་དང་།

ཚེ་དང་ལྡན་པ་རླངས་པ་དང་།

ཚེ་དང་ལྡན་པ་མིང་ཆེན་དང་།

ཚེ་དང་ལྡན་པ་བཟང་པོ་དང་།

ཚེ་དང་ལྡན་པ་གྲགས་སྦྱིན་དང་།

ཚེ་དང་ལྡན་པ་དྲི་མ་མེད་དང་།

ཚེ་དང་ལྡན་པ་ལག་བཟངས་དང་།

ཚེ་དང་ལྡན་པ་གང་པོ་དང་།

ཚེ་དང་ལྡན་པ་བ་ལང་བདག་དང་།

ཚེ་དང་ལྡན་པ་ལྟེང་རྒྱས་འོད་སྲུང་དང་།

ཚེ་དང་ལྡན་པ་ཆུ་ཀླུང་འོད་སྲུང་དང་།

ཚེ་དང་ལྡན་པ་ག་ཡཱ་འོད་སྲུང་དང་།

ཚེ་དང་ལྡན་པ་ཤཱ་རིའི་བུ་དང་།

ཚེ་དང་ལྡན་པ་མཽད་གལ་གྱི་བུ་ཆེན་པོ་དང་།

ཚེ་དང་ལྡན་པ་འོད་སྲུང་ཆེན་པོ་དང་།

ཚེ་དང་ལྡན་པ་

ཀཱ་ཏྱཱའི་བུ་ཆེན་པོ་དང་།

ཚེ་དང་ལྡན་པ་ཀ་པི་ན་ཆེན་པོ་དང་།

ཚེ་དང་ལྡན་པ་གསུས་པོ་ཆེ་དང་།

ཚེ་དང་ལྡན་པ་སྐུལ་བྱེད་དང་།

ཚེ་དང་ལྡན་པ་བྱམས་མའི་བུ་གང་པོ་དང་།

ཚེ་དང་ལྡན་པ་མ་འགགས་པ་དང་།

ཚེ་དང་ལྡན་པ་དགའ་བྱེད་དང་།

ཚེ་དང་ལྡན་པ་འུག་པ་དང་།

ཚེ་དང་ལྡན་པ་རབ་འབྱོར་དང་།

ཚེ་དང་ལྡན་པ་ནམ་གྲུ་དང་།

ཚེ་དང་ལྡན་པ་སེང་ལྡེང་ནགས་པ་དང་།

ཚེ་དང་ལྡན་པ་དོན་ཡོད་རྒྱལ་པོ་དང་།

ཚེ་དང་ལྡན་པ་ཕ་རོལ་ཏུ་འགྲོ་བ་ཆེན་པོ་དང་།

ཚེ་དང་ལྡན་པ་བ་ཀུ་ལ་དང་།

ཚེ་དང་ལྡན་པ་དགའ་བོ་དང་།

ཚེ་དང་ལྡན་པ་སྒྲ་གཅན་ཟིན་དང་།

ཚེ་དང་ལྡན་པ་ལེགས་འོངས་དང་།

ཚེ་དང་ལྡན་པ་ཀུན་དགའ་བོ་དང་།

དེ་དག་ལ་སོགས་པ་དགེ་སློང་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ།

བྱང་ཆུབ་སེམས་དཔའ་སུམ་ཁྲི་ཉིས་སྟོང་ཐམས་ཅད་ཀྱང་སྐྱེ་བ་གཅིག་གིས་ཐོགས་པ།

བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་ལས་ངེས་པར་སྐྱེས་པ།

བྱང་ཆུབ་སེམས་དཔའི་མངོན་པར་ཤེས་པ་ཐམས་ཅད་ཀྱིས་རྣམ་པར་རྩེ་བ།

བྱང་ཆུབ་སེམས་དཔའི་གཟུངས་ཐམས་ཅད་ཐོབ་པ།

བྱང་ཆུབ་སེམས་དཔའི་སྤོབས་པ་ཐམས་ཅད་ཐོབ་པ།

བྱང་ཆུབ་སེམས་དཔའི་སྨོན་ལམ་ཐམས་ཅད་ཤིན་ཏུ་ཡོངས་སུ་རྫོགས་པ།

བྱང་ཆུབ་སེམས་དཔའི་སོ་སོ་ཡང་དག་པར་རིག་པ་ཐམས་ཅད་རྟོགས་པར་ཁོང་དུ་ཆུད་པ།

བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་དབང་ཐོབ་པ།

བྱང་ཆུབ་སེམས་དཔའི་དབང་ཐམས་ཅད་ཐོབ་པ།

བྱང་ཆུབ་སེམས་དཔའི་བཟོད་པ་ཐམས་ཅད་ལ་ཞུགས་པ།

བྱང་ཆུབ་སེམས་དཔའི་ས་ཐམས་ཅད་རབ་ཏུ་རྫོགས་པ་ཤ་སྟག་སྟེ།

འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་རྒྱལ་པོ་

དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་ཏོག་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དོན་གྲུབ་བློ་གྲོས་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པ་རབ་ཏུ་ཞི་བའི་བློ་གྲོས་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་ཐོབ་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་རྟག་པར་སྦྱོར་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེར་སེམས་དང་།

དེ་དག་ལ་སོགས་པ་བྱང་ཆུབ་སེམས་དཔའ་སུམ་ཁྲི་ཉིས་སྟོང་དང་ཡང་ཐབས་ཅིག་གོ།

དེའི་ཚེ་བཅོམ་ལྡན་འདས་མཉན་ཡོད་ཀྱི་གྲོང་ཁྱེར་ཆེན་པོ་ན།

འཁོར་བཞི་དང་།

རྒྱལ་པོ་དང་།

རྒྱལ་པོའི་སྲས་དང་།

རྒྱལ་པོའི་བློན་པོ་ཆེན་པོ་དང་།

ཆགས་འོག་གི་རྒྱལ་ཕྲན་དང་།

རྒྱལ་པོའི་ཞབས་འབྲིང་བ་དང་།

རྒྱལ་རིགས་དང་།

བྲམ་ཟེ་དང་།

ཚོང་དཔོན་དང་།

ཁྱིམ་བདག་དང་།

བློན་པོ་དང་།

འཁོར་གྱི་མི་དང་།

གྲོང་ཁྱེར་པ་དང་།

ཡུལ་གྱི་མི་དང་།

མུ་སྟེགས་ཅན་དང་།

དགེ་སྦྱོང་དང་།

བྲམ་ཟེ་དང་།

དཔྱོད་པ་པ་དང་།

ཀུན་ཏུ་རྒྱུ་སྣ་ཚོགས་ཀྱིས་རིམ་གྲོར་བྱས།

བླ་མར་བྱས།

བསྟི་སྟང་དུ་བྱས།

མཆོད་པ་བྱས་སོ།

བཅོམ་ལྡན་འདས་ནི་བཟའ་བ་དང་།

བཅའ་བ་དང་མྱང་བ་དག་བསོད་ཅིང་མང་བ་དང་།

ན་བཟའ་དང་།

བསོད་སྙོམས་དང་།

གཟིམས་ཆ་དང་།

སྙུན་གྱི་གསོས་སྨན་དང་།

ཡོ་བྱད་རུང་བ་བརྙེས་ཤིང་།

བཅོམ་ལྡན་འདས་ནི་བརྙེས་པ་དམ་པ་དང་།

གྲགས་པ་དམ་པ་བརྙེས་ཀྱང་པད་མ་ལ་ཆུས་མི་གོས་པ་ལྟར་ཐམས་ཅད་དུ་མ་ཆགས་མ་གོས་པར་བཞུགས་སོ།

བཅོམ་ལྡན་འདས་ཀྱི་གྲགས་པ་དང་།

སྒྲ་དང་སྙན་པ་ནི་འདི་སྐད་དུ།

བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་རྟེན་མཁྱེན་པ།

སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་ཞེས་བྱ་བར་འཇིག་རྟེན་དུ་མངོན་པར་གྲགས་པར་གྱུར་ཏོ།

དེ་ནི་སྤྱན་ལྔ་དང་ལྡན་པ་སྟེ།

འཇིག་རྟེན་འདི་དང་འཇིག་རྟེན་ཕ་རོལ་ལྷ་དང་བཅས་པ།

བདུད་དང་བཅས་པ།

ཚངས་པ་དང་བཅས་པ།

དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལྷ་

དང་མིར་བཅས་པ་དག །

རང་གིས་མངོན་པར་མཁྱེན་པས་མངོན་དུ་མཛད་ནས་ཉེ་བར་བསྒྲུབས་ཏེ་རབ་ཏུ་སྟོན་ཏོ།

དེ་ཐོག་མར་དགེ་བ།

བར་དུ་དགེ་བ།

ཐ་མར་དགེ་བ།

དོན་བཟང་པོ།

ཚིག་འབྲུ་བཟང་པོ།

མ་འདྲེས་པ།

ཡོངས་སུ་རྫོགས་པ།

ཡོངས་སུ་དག་པ།

ཡོངས་སུ་དཀར་བའི་ཆོས་སྟོན་ཏེ།

ཚངས་པའི་སྤྱོད་པ་ཡང་དག་པར་སྟོན་ཏོ།

དེའི་ཚེ་བཅོམ་ལྡན་འདས་ཀྱིས་ནམ་གྱི་གུང་ཐུན་ལ།

སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ།

བཅོམ་ལྡན་འདས་ཀྱིས་སངས་རྒྱས་ཀྱི་རྒྱན་བཀོད་པ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ།

སྐད་ཅིག་དེ་ཉིད་ལ་བཅོམ་ལྡན་འདས་ཀྱི་དབུའི་གཙུག་གི་གཙུག་ཏོར་གྱི་གསེབ་ནས།

སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བ་ཞེས་བྱ་བའི་འོད་ཟེར་བྱུང་སྟེ།

དེས་གནས་གཙང་མའི་ལྷའི་གནས་ཐམས་ཅད་སྣང་བར་བྱས་ནས་ལྷའི་བུ་དབང་ཕྱུག་ཆེན་པོ་ལ་སོགས་པ་ལྷའི་བུ་ཚད་མེད་པ་དག་ཡང་དག་པར་བསྐུལ་ཏོ།

དེ་བཞིན་གཤེགས་པའི་འོད་ཟེར་གྱི་ཚོགས་དེ་ལས་བསྐུལ་བའི་ཚིགས་སུ་བཅད་པ་འདི་དག་ཀྱང་བྱུང་ངོ་།

ཡེ་ཤེས་འོད་ལྡན་མུན་བཅོམ་འོད་མཛད་པ།

འོད་བཟང་གཟི་བརྗིད་དམ་པ་དྲི་མེད་པ།

སྐུ་ལུས་རབ་ཞི་ཐུགས་དགེ་ཞི་བ་པོ།

ཤཱཀྱའི་སེང་གེ་ཐུབ་དང་ཕྲད་པར་གྱིས།

ཡེ་ཤེས་རྒྱ་མཚོ་མཐུ་ཆེན་དག་པ་སྟེ།

ཆོས་ཀྱི་མངའ་བདག་ཀུན་མཁྱེན་ཐུབ་པའི་དབང་།

མི་དང་ལྷས་མཆོད་ལྷ་ཡི་ལྷར་གྱུར་པ།

ཆོས་ལ་རང་བྱུང་མངའ་དབང་མཛད་ལ་རྟོན།

གང་ཞིག་གདུལ་དཀའི་སེམས་ལ་མངའ་མཛད་དེ།

གང་ཞིག་བདུད་ཀྱི་རྙི་ལས་གྲོལ་བའི་ཐུགས།

དེ་འདིར་མཐོང་ཐོས་དོན་མེད་མ་ཡིན་གྱིས།

རྣམ་གྲོལ་མཐར་ཕྱིན་ཞི་བའི་དྲུང་དུ་དེང་།

མཚུངས་མེད་ཆོས་ལ་སྣང་བར་གྱུར་པ་སྟེ།

མུན་སེལ་ཚུལ་བཟང་སྟོན་པར་རབ་མཛད་པ།

སངས་རྒྱས་སྤྱོད་ཞི་མཁྱེན་པ་དཔག་མེད་པ།

དེ་ཡི་དྲུང་དུ་དད་པ་མཆོག་གིས་དེང་།

དེ་ནི་སྨན་པའི་རྒྱལ་པོ་བདུད་རྩི་གཏོང་།

དེ་ནི་སྨྲ་བ་དཔའ་བོ་ཚོགས་ངན་འཇོམས།

དེ་ནི་ཆོས་ཀྱི་རྩ་ལག་དོན་དམ་མཁས།

དེ་ནི་འདྲེན་པ་བླ་མེད་ལམ་སྟོན་པའོ།

གནས་གཙང་མའི་

རིས་ཀྱི་ལྷའི་བུ་དེ་དག་སྔོན་གྱི་སངས་རྒྱས་རྗེས་སུ་དྲན་པར་བྱ་བ་ལ་ཆགས་པ་མེད་པའི་ཡེ་ཤེས་སྣང་བའི་འོད་ཟེར་དེས་ཕོག་ཅིང་ཚིགས་སུ་བཅད་པ་རྣམ་པ་དེ་ལྟ་བུ་དེ་དག་གིས་ཀྱང་བསྐུལ་མ་ཐག་ཏུ་རབ་ཏུ་ཞི་བའི་ཏིང་ངེ་འཛིན་དེ་ལས་ལངས་ནས་སངས་རྒྱས་ཀྱི་མཐུས་བསྐལ་པ་གྲངས་མེད་ཚད་མེད་བགྲང་བ་ལས་ཤིན་ཏུ་འདས་པ་དག་ལས་འདས་པའི་སངས་རྒྱས་བཅོམ་ལྡན་འདས་རྣམས་རྗེས་སུ་དྲན་ཞིང་།

སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་གང་ཡིན་པ་དག་དང་།

འཁོར་གྱི་དཀྱིལ་འཁོར་གང་ཡིན་པ་དག་དང་།

ཆོས་བསྟན་པ་གང་ཡིན་པ་དེ་དག་ཐམས་ཅད་ཀྱང་རྗེས་སུ་དྲན་པར་གྱུར་ཏོ།

དེ་ནས་དེའི་ནུབ་མོ་མི་ཉལ་ཙམ་ན་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང་།

དབང་ཕྱུག་ཆེན་པོ་དང་།

དགའ་བོ་དང་།

ཤིན་ཏུ་དགའ་བོ་དང་།

ཙན་དན་དང་།

མཆོད་བྱས་དང་།

རབ་ཞི་དང་།

དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང་།

གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཁ་དོག་འཕགས་ཤིང་ཤིན་ཏུ་འཕགས་པ་དང་ལྡན་པ་དག་གིས།

ལྷའི་སྣང་བས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བར་བྱས་ཏེ།

བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།

ཕྱོགས་གཅིག་ཏུ་འཁོད་ནས་ཀྱང་གནས་གཙང་མའི་རིས་ཀྱི་ལྷའི་བུ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་རྒྱ་ཆེར་རོལ་པ་ཞེས་བགྱི་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བསྡུས་པ།

བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡང་དག་པར་བསྟན་པ།

དགའ་ལྡན་གྱི་ཕོ་བྲང་དམ་པ་ནས་འབབ་པ་དང་།

ཆེད་དུ་དགོངས་ཏེ་ལྷུམས་སུ་འཇུག་པའི་རྣམ་པར་རོལ་པ་དང་།

མངལ་གྱི་གནས་ཀྱི་ཁྱད་པར་ཀུན་ཏུ་བསྟན་པ།

རིགས་བཟང་པོར་སྐྱེ་བའི་སའི་མཐུ་ཀུན་དུ་བསྟན་པ།

བྱིས་པའི་སྤྱོད་པ་ཐམས་ཅད་ལས་ཡོན་ཏན་གྱི་ཁྱད་པར་གྱིས་ཤིན་ཏུ་འདའ་བ་བསྟན་པ།

འཇིག་རྟེན་པའི་བཟོའི་གནས་དང་།

ལས་ཀྱི་གནས་དང་།

ཡི་གེ་དང་།

གྲངས་དང་།

ལག་རྩིས་དང་།

རྩིས་དང་།

རལ་གྲིའི་ཐབས་དང་།

འཕོང་དང་།

སྟོབས་དང་།

གྱད་ཀྱི་འཛིན་སྟངས་རྣམས་སེམས་ཅན་ཐམས་ཅད་ལས་ཁྱད་པར་དུ་འཕགས་པ་ཀུན་དུ་བསྟན་པ།

བཙུན་མོའི་འཁོར་དང་།

ཡུལ་གྱི་ལོངས་སྤྱོད་དང་།

ཡོངས་སུ་སྤྱོད་པ་ཀུན་ཏུ་བསྟན་པ།

བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱི་རྒྱུ་འཐུན་པས་ཡོངས་སུ་གྲུབ་པའི་འབྲས་བུ་བརྙེས་པ་ཡོངས་སུ་བརྗོད་པ།

བྱང་ཆུབ་སེམས་དཔའི་རྣམ་པར་རོལ་པ་དང་།

བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇིག་པ་བསྟན་པ།

དེ་བཞིན་གཤེགས་པའི་སྟོབས་དང་།

མི་འཇིགས་པ་བསྡུས་པ།

སངས་རྒྱས་ཀྱི་ཆོས་ཚད་མ་མཆིས་པ་ངེས་པར་བསྟན་པ།

སྔོན་གྱི་དེ་བཞིན་གཤེགས་པ་རྣམས་ཀྱིས་སྔོན་ཆད་གསུངས་པ་མཆིས་ཏེ།

འདི་ལྟ་སྟེ།

བཅོམ་ལྡན་འདས་པད་མའི་བླ་མ་དང་།

ཆོས་ཀྱི་ཏོག་དང་།

མར་མེ་མཛད་དང་།

ཡོན་ཏན་གྱི་ཏོག་དང་།

ཡོན་ཏན་འབྱུང་གནས་དང་།

འོད་ཟེར་ཆེན་པོ་དང་།

དྲང་སྲོང་ལྷ་དང་།

དཔལ་གྱི་གཟི་བརྗིད་དང་།

བདེན་པའི་ཏོག་དང་།

རྡོ་རྗེ་མཁྲེགས་དང་།

ཐམས་ཅད་ཟིལ་གྱིས་གནོན་དང་།

གསེར་མདོག་དང་།

ཤིན་ཏུ་མཐོར་གཤེགས་དང་།

བྱི་རུའི་རྒྱ་མཚོ་དང་།

མེ་ཏོག་གི་ཏོག་དང་།

གཟུགས་བཟང་དང་།

སྤྱན་བཟང་དང་།

དྲང་སྲོང་སྦེད་དང་།

དམག་ཚོགས་ལས་རྒྱལ་དང་།

མཐོ་བ་དང་།

མེ་ཏོག་རྒྱས་པ་དང་།

མཛོད་སྤུ་གཟི་བརྗིད་དང་།

ཤིན་ཏུ་རྒྱས་དང་།

འོད་ཟེར་བཟང་པོ་དང་།

བཀྲ་ཤིས་ལྡན་དང་།

བལྟ་ན་བཟང་དང་།

སེང་གེའི་གཟི་བརྗིད་ཆེན་པོ་དང་།

བློ་གྲོས་བརྟན་པས་བྱིན་དང་།

སོས་ཀའི་སྤོས་དྲི་དང་།

བདེན་པའི་ཆོས་གྲགས་རྒྱ་ཆེན་དང་།

འོད་ལྡན་དང་།

སྐར་རྒྱལ་དང་།

འཇིག་རྟེན་མཛེས་དང་།

འོད་རྒྱ་ཆེན་དང་།

རིན་ཆེན་གྲགས་དང་།

དྲག་ཤུལ་གཟི་བརྗིད་དང་།

རིན་ཆེན་གཟི་བརྗིད་དང་།

ཚངས་པའི་གཟི་བརྗིད་དང་།

སྒྲ་སྙན་དང་།

མེ་ཏོག་བཟང་པོ་དང་།

རི་རབ་མེ་ཏོག་དང་།

རབ་ཏུ་ཡིད་འོང་དབྱངས་དང་།

དགེ་བ་ཚུལ་བཟངས་དང་།

རབ་ཏུ་འཛུམ་པའི་སྤྱན་དང་།

ཡོན་ཏན་ཕུང་པོ་དང་།

འབྲུག་སྒྲ་དང་།

ཁ་དོག་མཛེས་དང་།

ཚེའི་གཟི་བརྗིད་དང་།

དོམ་བག་གླང་པོའི་འགྲོས་དང་།

འཇིག་རྟེན་མངོན་པར་སྨོན་དང་།

དགྲ་ལས་རྒྱལ་དང་།

ཡང་དག་

མཆོད་དང་།

རྣམ་པར་གཟིགས་དང་།

གཙུག་ཏོར་ཅན་དང་།

ཐམས་ཅད་སྐྱོབ་དང་།

འཁོར་བ་འཇིག་དང་།

གསེར་ཐུབ་དང་།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཀྱང་སྔོན་ཆད་གསུངས་པ་ལགས་ན།

དེ་བཅོམ་ལྡན་འདས་ཀྱིས་ཀྱང་སྐྱེ་བོ་མང་པོ་ལ་སྨན་པ་དང་།

སྐྱེ་བོ་མང་པོ་ལ་བདེ་བ་དང་།

འཇིག་རྟེན་ལ་ཐུགས་བརྩེ་བ་དང་།

སྐྱེ་བོ་ཕལ་པོ་ཆེའི་དོན་དང་།

ལྷ་དང་མི་རྣམས་ཀྱི་དོན་དུ་འགྱུར་བ་དང་།

སྨན་པ་དང་བདེ་བར་འགྱུར་བ་དང་།

ཐེག་པ་ཆེན་པོ་འདིའང་བརྗོད་པ་དང་།

ཕས་ཀྱི་རྒོལ་བ་ཐམས་ཅད་ཚར་གཅད་པ་དང་།

བདུད་ཐམས་ཅད་ཟིལ་གྱིས་མནན་པ་དང་།

བྱང་ཆུབ་སེམས་དཔའ་ཐམས་ཅད་ལ་བསྟན་པ་དང་།

བྱང་ཆུབ་སེམས་དཔའི་ཐེག་པ་པའི་གང་ཟག་ཐམས་ཅད་ཀྱི་བརྩོན་འགྲུས་བརྩམ་པ་བསྐྱེད་པ་དང་།

དམ་པའི་ཆོས་ཡོངས་སུ་གཟུང་བ་དང་།

དཀོན་མཆོག་གསུམ་གྱི་གདུང་མི་གཅད་པ་དང་།

སངས་རྒྱས་ཀྱི་མཛད་པ་ཡོངས་སུ་རྫོགས་པ་ཡང་ཀུན་ཏུ་བསྟན་པའི་སླད་དུ་ད་བསྟན་དུ་གསོལ་ཞེས་གསོལ་པ་དང་།

བཅོམ་ལྡན་འདས་ཀྱིས་ལྷའི་བུ་དེ་དག་དང་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ་།

དེ་ནས་ལྷའི་བུ་དེ་དག་ཀྱང་།

བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ།

དགའ་བ་དང་ཡིད་བདེ་བ་སྐྱེས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཙན་དན་གྱི་ཕྱེ་མ་དང་།

ཨ་ག་རུའི་ཕྱེ་མ་དང་།

མེ་ཏོག་མན་དཱ་ར་བདག་གིས་ཀྱང་མངོན་པར་གཏོར་ཏེ།

དེ་ཉིད་དུ་མི་སྣང་བར་གྱུར་ཏོ།

དེ་ནས་བཅོམ་ལྡན་འདས་ནུབ་མོ་དེའི་ནམ་ནངས་པ་དང་།

སྨྱིག་མའི་ལྡུམ་བུའི་འཁོར་གྱི་ཁྱམས་ག་ལ་བ་དེར་གཤེགས་ཏེ་བྱོན་ནས།

བཅོམ་ལྡན་འདས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་ཉན་ཐོས་ཀྱི་དགེ་འདུན་གྱིས་མདུན་གྱིས་བལྟས་ཏེ།

གདན་བཤམས་པ་ལ་བཞུགས་སོ།

བཞུགས་ནས་ཀྱང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་མདང་འདིར་ངའི་དྲུང་དུ་གནས་གཙང་མའི་རིས་ཀྱི་ལྷའི་བུ་དབང་ཕྱུག་ཅེས་བྱ་བ་དང་།

དབང་ཕྱུག་ཆེན་པོ་དང་དགའ་བོ་དང་།

ཤིན་ཏུ་དགའ་བོ་དང་།

ཙན་དན་དང་།

མཆོད་བྱས་དང་།

རབ་ཞི་དང་།

དུལ་བ་རབ་ཞི་དབང་ཕྱུག་ལ་སོགས་པ་དེ་དག་དང་གནས་གཙང་མའི་རིས་ཀྱི་ལྷའི་བུ་གཞན་ཤིན་ཏུ་མང་པོ་ཞེས་བྱ་བ་ནས།

དེ་ཉིད་དུ་མི་སྣང་བར་གྱུར་ཅེས་བྱ་བའི་བར་དུ་སྔ་མ་བཞིན་དུ་གསུངས་སོ།

དེ་ནས་བྱང་ཆུབ་སེམས་དཔའ་དེ་དག་དང་།

ཉན་ཐོས་ཆེན་པོ་དེ་དག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་རྒྱ་ཆེར་རོལ་པའི་ཆོས་ཀྱི་རྣམ་གྲངས་ལེགས་པར་བསྟན་དུ་གསོལ།

དེ་ནི་སྐྱེ་བོ་མང་པོ་ལ་སྨན་པ་དང་།

སྐྱེ་བོ་མང་པོ་ལ་བདེ་བ་དང་།

འཇིག་རྟེན་ལ་ཐུགས་བརྩེ་བར་མཛད་པ་དང་།

སྐྱེ་བོ་ཕལ་པོ་ཆེ་དང་།

ལྷ་དང་མི་རྣམས་དང་།

ད་ལྟར་དང་མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་དང་།

སྨན་པ་དང་བདེ་བར་འགྱུར་རོ་ཞེས་གསོལ་པ་དང་།

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ཉན་ཐོས་ཆེན་པོ་དེ་དག་དང་།

ལྷ་དང་མི་དང་ལྷ་མ་ཡིན་དང་བཅས་པའི་འཇིག་རྟེན་ལ་ཐུགས་བརྩེ་བའི་ཕྱིར་ཅང་མི་གསུང་བས་གནང་ངོ་།

དེ་ལ་འདི་སྐད་ཅེས་བྱ་སྟེ།

དགེ་སློང་དག་ཀྱེ་ང་ནི་མདང་སུམ་འདིར།

གནས་པ་བཟང་པོས་བདེ་བར་གནས་གྱུར་ཅིང་།

ཉོན་མོངས་མེད་པར་རབ་ཏུ་གནས་གྱུར་ལ།

རྩེ་གཅིག་སེམས་སུ་མཉམ་པར་བཞག་དྲུང་དུ།

རྫུ་འཕྲུལ་ཆེ་ཞིང་ཁ་དོག་བཟང་ལྡན་ལ།

དྲི་མེད་དཔལ་འབར་ལྷ་ཡི་བུ་ལྷགས་ནས།

དཔལ་གྱིས་རྒྱལ་བྱེད་ཚལ་འདི་སྣང་བྱས་ཏེ།

དགའ་བས་ང་ཡི་གན་དུ་མངོན་པར་ལྷགས།

དབང་ཕྱུག་དབང་ཕྱུག་ཆེན་པོ་ཙན་དན་དང་།

དགའ་བོ་རབ་ཏུ་སེམས་ཞི་མཆོད་བྱས་དང་།

ཤིན་ཏུ་དགའ་བོ་ཞི་བ་ལྷ་ཡི་བུ།

བྱེ་བ་ལྷ་མང་དེ་དང་དེ་དག་རྣམས།

ང་ཡི་ཞབས་ལ་ཕྱག་འཚལ་བསྐོར་བྱས་ཏེ།

ང་ཡི་མདུན་དུ་འདིར་ནི་འཁོད་པར་གྱུར།

སོར་མོ་བཅུ་ཡིས་ཐལ་སྦྱར་གུས་བཅས་པར།

དེ་དག་འདིར་ནི་ང་ལ་

གསོལ་བ་བཏབ།

འཇིག་རྟེན་ཀུན་ལ་སྨན་པའི་དོན་སླད་དུ།

རྒྱལ་བ་ཀུན་གྱིས་སྔོན་ཆད་གང་གསུངས་པ།

ཤིན་ཏུ་རྒྱས་མདོ་གླེང་གཞི་ཆེན་པོ་འདི།

ཐུབ་པ་འདོད་ཆགས་བསལ་བས་དེ་རིང་ཡང་།

བྱང་ཆུབ་སེམས་དཔའི་ཚོགས་ཀུན་བཟུང་བཞེད་པས།

ཕས་ཀྱི་རྒོལ་དང་བདུད་རྣམས་འདུལ་མཛད་ལ།

ཐེག་པ་ཆེན་པོ་མཆོག་འདི་རབ་གསུང་ཞིང་།

ཐུབ་པ་དེ་སླད་ལེགས་པར་བཤད་དུ་གསོལ།

ལྷ་ཡི་ཚོགས་ཀྱིས་གསོལ་བ་དེ་སྣང་ཕྱིར།

མི་གསུང་གྱུར་པས་གནང་བ་མཛད་པས་ན།

ཐམས་ཅད་ཚིམ་ཞིང་རབ་དགའ་མགུ་གྱུར་ནས།

དགའ་བ་ཐོབ་པས་མེ་ཏོག་སིལ་མ་གཏོར།

དེ་ཕྱིར་དགེ་སློང་ཤིན་ཏུ་རྒྱས་པའི་མདོ།

འཇིག་རྟེན་ཀུན་ལ་ཕན་པའི་དོན་གྱི་ཕྱིར།

དེ་བཞིན་གཤེགས་པ་ཀུན་གྱིས་སྔོན་བཤད་པ།

གླེང་གཞི་ཆེན་པོ་ཁྱེད་ཀུན་འདིར་ཉོན་ཅིག །

གླེང་གཞིའི་ལེའུ་སྟེ་དང་པོའོ།།

དགེ་སློང་དག་དེ་ལ་ཆོས་ཀྱི་རྣམ་གྲངས་ཤིན་ཏུ་རྒྱས་པ་ཆེན་པོའི་མདོ་རྒྱ་ཆེར་རོལ་པ་ཞེས་བྱ་བ་དེ་གང་ཞེ་ན།

དགེ་སློང་དག་འདི་ལ་བྱང་ཆུབ་སེམས་དཔའ་དགའ་ལྡན་གྱི་གནས་མཆོག་ན་གནས་པ།

མཆོད་པར་བྱ་བས་མཆོད་པ།

དབང་བསྐུར་བ་ཐོབ་པ།

ལྷ་བརྒྱ་སྟོང་གིས་བསྟོད་ཅིང་བཀུར་ཏེ་བརྗོད་ཅིང་བསྔགས་པ།

བསམ་པ་ཐོབ་པ།

སྨོན་ལམ་གྱིས་ཡང་དག་པར་འཕགས་པ།

སངས་རྒྱས་ཀྱི་ཆོས་ཐམས་ཅད་ཡང་དག་པར་ཐོབ་པའི་བློ་དང་ལྡན་པ།

ཡེ་ཤེས་ཀྱི་མིག་ཤིན་ཏུ་རྒྱས་ཤིང་ཡོངས་སུ་དག་པ་དང་ལྡན་པ།

དྲན་པ་དང་།

བློ་གྲོས་དང་།

རྟོགས་པ་དང་།

ཁྲེལ་ཡོད་པ་དང་།

དགའ་བ་འབར་བའི་བློ་རླབས་པོ་ཆེ་དང་ལྡན་པ།

སྦྱིན་པ་དང་།

ཚུལ་ཁྲིམས་དང་།

བཟོད་པ་དང་།

བརྩོན་འགྲུས་དང་།

བསམ་གཏན་དང་།

ཤེས་རབ་དང་།

ཐབས་ལ་མཁས་པ་ཆེན་པོའི་དམ་པའི་ཕ་རོལ་ཏུ་སོན་པ།

ཚངས་པའི་ལམ་བྱམས་པ་ཆེན་པོ་དང་།

སྙིང་རྗེ་ཆེན་པོ་དང་།

དགའ་བ་ཆེན་པོ་དང་།

བཏང་སྙོམས་ཆེན་པོ་ལ་མཁས་པ།

མངོན་པར་ཤེས་པ་དང་།

རིག་པ་ཆེན་པོས་སྒྲིབ་པ་མེད་ཅིང་ཆགས་པ་མེད་པའི་ཡེ་ཤེས་མཐོང་བ་མངོན་དུ་གྱུར་པ།

དྲན་པ་ཉེ་བར་གཞག་པ་དང་།

ཡང་དག་པར་སྤོང་བ་དང་།

རྫུ་འཕྲུལ་གྱི་རྐང་པ་དང་།

དབང་

པོ་དང་།

སྟོབས་དང་།

བྱང་ཆུབ་ཀྱི་ཡན་ལག་དང་།

ལམ་དང་།

བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་རྫོགས་པའི་མཐར་ཕྱིན་པ།

བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པའི་མཚན་དང་དཔེ་བྱད་བཟང་པོས་ལུས་ལེགས་པར་བརྒྱན་པ།

ཡུན་རིང་པོར་རྗེས་སུ་འབྲང་བ་དང་ལྡན་པ།

ཇི་སྐད་དུ་སྨྲས་པ་དེ་ལྟར་བྱེད་པས་ལོག་པ་མེད་པའི་ཚིག་གི་ལམ་ཡང་དག་པར་སྨྲ་བ།

དྲང་ཞིང་མ་ཡོ་ལ།

གྱ་གྱུ་མེད་པའི་ཡིད་ཐོགས་པ་མེད་པ་དང་ལྡན་པ།

ང་རྒྱལ་དང་།

རྒྱགས་པ་དང་།

དྲེགས་པ་དང་།

འཇིགས་པ་དང་།

ཞུམ་པ་ཐམས་ཅད་མེད་པ།

སེམས་ཅན་ཐམས་ཅད་ལ་སེམས་མཉམ་པ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་བསྙེན་བཀུར་བྱས་པ།

བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོས་ངོར་བལྟ་ཞིང་བལྟ་བའི་བཞིན་དང་ལྡན་པ།

བརྒྱ་བྱིན་དང་།

ཚངས་པ་དང་།

དབང་ཕྱུག་ཆེན་པོ་དང་།

འཇིག་རྟེན་སྐྱོང་བ་དང་།

ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

སྲིན་པོ་རྣམས་ཀྱིས་མངོན་པར་དགའ་བར་བྱ་བའི་གྲགས་པ་དང་ལྡན་པ།

ཚིག་ཐམས་ཅད་རབ་ཏུ་ཕྱེ་སྟེ་བསྟན་པ་ལ་ཐོགས་པ་མེད་པའི་སོ་སོ་ཡང་དག་པར་རིག་པ་ལ་འཇུག་པའི་ཤེས་པ་ལ་མཁས་པ།

སངས་རྒྱས་ཐམས་ཅད་ཀྱིས་གསུངས་པ་གཟུང་བ་ལ་དྲན་པའི་སྣོད་འཁྲུལ་པ་མེད་པ་དང་།

གཟུངས་མཐའ་ཡས་མུ་མེད་པ་རབ་ཏུ་ཐོབ་པ།

དྲན་པ་ཉེ་བར་གཞག་པ་དང་།

ཡང་དག་པར་སྤོང་བ་དང་།

རྫུ་འཕྲུལ་གྱི་རྐང་པ་དང་།

དབང་པོ་དང་།

སྟོབས་དང་།

བྱང་ཆུབ་ཀྱི་ཡན་ལག་དང་།

ལམ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་དང་།

ཐབས་མཁས་པའི་ཆོས་རིན་པོ་ཆེ་དང་།

བསོད་ནམས་ཀྱིས་ཡང་དག་པར་བསྒྲུབས་པའི་ཆོས་ཀྱི་གྲུ་ཆེན་པོའི་དེད་དཔོན་ཆེན་པོ།

ཆུ་བོ་བཞིའི་ཕ་རོལ་ཏུ་འགྲོ་བའི་བསམ་པ་ཅན།

བདུད་དང་ཕྱིར་རྒོལ་བ་བཅོམ་པ།

ཕས་ཀྱི་རྒོལ་བ་ཐམས་ཅད་ཤིན་ཏུ་ཚར་བཅད་པ།

གཡུལ་ངོའི་ཐོག་མ་ལ་རབ་ཏུ་འདུག་པ།

ཉོན་མོངས་པའི་དགྲའི་ཚོགས་འཇོམས་པ།

ཡེ་ཤེས་མཆོག་གི་རྡོ་རྗེའི་མཚོན་སྲ་བ་དང་

ལྡན་པ།

བྱང་ཆུབ་ཀྱི་སེམས་ཀྱི་རྩ་བ་ལས་སྙིང་རྗེ་ཆེན་པོའི་ཆུ་བ་ལྷག་པའི་བསམ་པས་སྐྱེས་པ་ཟབ་ཅིང་བརྟན་པ་དང་།

བརྩོན་འགྲུས་ཀྱི་ཆོས་ཀྱི་ཆུས་མངོན་པར་བརླན་པ།

ཐབས་མཁས་པའི་སྙིང་པོ་དང་ལྡན་པ།

བྱང་ཆུབ་ཀྱི་ཡན་ལག་དང་།

བསམ་གཏན་གྱི་ཟེ་བ་ཅན།

ཏིང་ངེ་འཛིན་གྱི་ཟེ་འབྲུ་དང་ལྡན་པ།

ཡོན་ཏན་གྱི་ཚོགས་རྒྱ་ཆེན་པོའི་མཚོ་ལས་སྐྱེས་པ།

ང་རྒྱལ་དང་དྲེགས་པའི་གདུང་བ་མེད་པའི་ཟླ་བས་དྲི་མ་མེད་པའི་འདབ་མ་རྒྱས་པ།

ཚུལ་ཁྲིམས་དང་།

ཐོས་པ་དང་།

བག་ཡོད་པའི་བསུང་གི་ངད་ཕྱོགས་བཅུར་ཐོགས་པ་མེད་པར་ལྡང་བ།

འཇིག་རྟེན་ན་ཤེས་པའི་ཐུ་བོར་གྱུར་པ།

འཇིག་རྟེན་གྱི་ཆོས་བརྒྱད་ཀྱིས་མ་གོས་པ།

སྐྱེས་བུ་ཆེན་པོའི་པད་མ།

བསོད་ནམས་དང་ཡེ་ཤེས་ཀྱི་ཚོགས་ཀྱི་དྲི་ཞིམ་པོ་འབྱུང་བ།

ཤེས་རབ་དང་ཡེ་ཤེས་ཀྱི་ཉི་མའི་འོད་ཟེར་གྱིས་མིག་ཤིན་ཏུ་རྣམ་པར་དག་པའི་པད་མ་འདབ་མ་བརྒྱ་པ་རྒྱས་པ།

རྫུ་འཕྲུལ་གྱི་རྐང་པ་བཞི་མཆོག་ཏུ་མགྱོགས་པའི་ཤུགས་དང་ལྡན་པ།

འཕགས་པའི་བདེན་པ་བཞིའི་སྡེར་མོ་དང་མཆེ་བ་ཤིན་ཏུ་རྣོ་བ།

ཚངས་པའི་གནས་པ་བཞིའི་སོ་དྲང་བསྙེར་བ།

བསྡུ་བའི་དངོས་པོ་བཞིས་ཤིན་ཏུ་བསྡུས་པའི་མགོ་དང་ལྡན་པ།

རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ཁོང་དུ་ཆུད་པས་རིམ་གྱིས་འཕགས་པའི་ལུས་དང་ལྡན་པ།

བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་དག་པར་ཡོངས་སུ་རྫོགས་པས་རལ་པ་ཅན་དུ་བྱས་ཤིང་།

རིག་པ་དང་།

ཡེ་ཤེས་ཀྱི་ཟེ་བ་ཅན།

རྣམ་པར་ཐར་པའི་སྒོ་གསུམ་གྱི་ཁ་གདངས་པ།

ཞི་གནས་དང་ལྷག་མཐོང་ཤིན་ཏུ་རྣམ་པར་དག་པའི་མིག་དང་ལྡན་པ།

བསམ་གཏན་དང་།

རྣམ་པར་ཐར་པ་དང་།

ཏིང་ངེ་འཛིན་དང་།

སྙོམས་པར་འཇུག་པའི་རི་སུལ་གྱི་ཕུག་ན་གནས་པ།

སྤྱོད་ལམ་བཞི་དང་།

འདུལ་བའི་ནགས་ཚལ་དང་།

ནགས་འདབ་ནས་སྐྱེས་པའི་ལུས་དང་ལྡན་པ།

སྟོབས་བཅུ་དང་།

མི་འཇིགས་པ་བཞི་དང་།

ཉེ་བའི་སྟོབས་དང་ལྡན་པ།

སྐྱེ་བ་དང་འཇིག་པའི་འཇིགས་པ་དང་སྤུ་གཡོ་བ་མེད་པ།

རྩལ་ལ་ཞུམ་པ་མེད་པ།

མུ་སྟེགས་ཅན་གྱི་བོང་བུ་དང་རི་དགས་མང་པོའི་ཚོགས་རབ་ཏུ་འཇོམས་པ།

བདག་

མེད་པར་སྒྲ་བརྗོད་པའི་སེང་གེའི་ང་རོ་ཆེན་པོ་སྒྲོག་པ།

སྐྱེས་བུ་སེང་གེ།

རྣམ་པར་གྲོལ་བ་དང་།

བསམ་གཏན་གྱི་དཀྱིལ་འཁོར་ལས་ཤེས་རབ་ཀྱི་འོད་དང་།

འོད་ཟེར་གྱིས་མུ་སྟེགས་བྱེད་སྲིན་བུ་མེ་ཁྱེར་གྱི་ཚོགས་འོད་མེད་པར་བྱེད་པ།

མ་རིག་པའི་མུན་པ་མུན་ནག་གི་ལིང་ཏོག་དང་རབ་རིབ་མེད་པར་བྱེད་པ།

སྟོབས་དང་བརྩོན་འགྲུས་འབར་བ།

ལྷ་དང་མིའི་ནང་དུ་བསོད་ནམས་ཀྱི་གཟི་བརྗིད་ཀྱི་གཟི་དང་ལྡན་པ་སྐྱེས་བུ་ཆེན་པོའི་ཉི་མ།

ནག་པོའི་ཕྱོགས་མེད་པ།

དཀར་པོའི་ཕྱོགས་ཡོངས་སུ་རྫོགས་པ།

བལྟ་ན་སྡུག་ཅིང་ཡིད་དུ་འོང་བས་མིག་གི་དབང་པོ་ལ་ཐོགས་པ་མེད་པ།

ལྷ་བརྒྱ་སྟོང་གི་སྐར་མའི་ཚོགས་ཀྱིས་ཤིན་ཏུ་བརྒྱན་པ།

བསམ་གཏན་དང་།

རྣམ་པར་ཐར་པ་དང་།

ཡེ་ཤེས་ཀྱི་དཀྱིལ་འཁོར་ཅན།

བྱང་ཆུབ་ཀྱི་ཡན་ལག་གི་བདེ་བས་ཟླ་བའི་འོད་ཟེར་དུ་གྱུར་པ།

མི་དང་ལྷ་མཁས་པའི་མེ་ཏོག་ཀུ་མུ་ད་ཁ་འབྱེད་པ་སྐྱེས་བུ་ཆེན་པོ་ཟླ་བ།

འཁོར་གྱི་གླིང་བཞིར་སོང་བ།

བྱང་ཆུབ་ཀྱི་ཡན་ལག་བདུན་གྱི་རིན་པོ་ཆེ་དང་ལྡན་པ།

སེམས་ཅན་ཐམས་ཅད་ལ་སེམས་མཉམ་པར་སྦྱོར་བ།

བློ་དཔྱད་ཐོགས་པ་མེད་པ།

དགེ་བ་བཅུའི་ལས་ཀྱི་ལམ་གྱི་དཀའ་ཐུབ་དང་བརྟུལ་ཞུགས་ཤིན་ཏུ་ཕུན་སུམ་ཚོགས་ཤིང་རབ་ཏུ་རྫོགས་པས་ཁྱད་པར་དུ་བོགས་དབྱུང་བར་བྱ་བའི་བསམ་པ་ཅན།

ཆོས་ཀྱི་རྒྱལ་པོའི་ཆོས་ཀྱི་འཁོར་ལོ་རིན་པོ་ཆེ་མཆོག་དམ་པ་ཐོགས་པ་མེད་པར་བསྐོར་བ།

འཁོར་ལོས་སྒྱུར་བའི་རིགས་ཀྱི་རྒྱུད་དུ་བྱུང་བ།

ཆོས་ཀྱི་འཁོར་ལོས་སྒྱུར་བ་ཆེན་པོ།

རྟེན་ཅིང་འབྲེལ་པར་འབྱུང་བ་ཟབ་ཅིང་གཏིང་དཔག་དཀའ་བ།

ཆོས་རིན་པོ་ཆེ་ཐམས་ཅད་ཀྱིས་རབ་ཏུ་གང་བ།

ཐོས་པས་མི་ངོམས་པས་ཡངས་ཤིང་རྒྱ་ཆེ་ལ་མཐའ་ཡས་པའི་ཡེ་ཤེས་དང་ཚུལ་ཁྲིམས་ཀྱི་ཚོད་ལས་མི་འདའ་བ།

བློ་རྒྱ་མཚོ་དང་ས་ལྟར་རྒྱ་ཆེ་བའི་མཆོག་ཏུ་གྱུར་པ།

ས་དང་ཆུ་དང་མེ་དང་རླུང་དང་མཉམ་པའི་སེམས་སུ་གྱུར་པ།

རི་རབ་ལྟར་བརྟན་ཞིང་མི་གཡོ་ལ་བསྐྱོད་པར་མི་ནུས་པའི་ཡིད་དང་ལྡན་པ།

རྗེས་སུ་ཆགས་པ་དང་ཁོང་ཁྲོ་བ་མེད་པ།

ནམ་མཁའི་དཀྱིལ་ལྟར་དྲི་མ་མེད་ཅིང་ཡངས་ལ་འདྲ་བ་མེད་པར་རྒྱ་ཆེ་བའི་བློ་དང་ལྡན་པ།

ལྷག་པའི་བསམ་པ་ཤིན་ཏུ་ཡོངས་སུ་

དག་པ།

སྦྱིན་པ་ལེགས་པར་བྱིན་པ།

སྔོན་སྦྱོར་བ་ལེགས་པར་བྱས་པ།

ལྷག་པའི་བྱ་བ་ལེགས་པར་བྱས་པ།

བདེན་པའི་རྒྱན་གྱིས་ལེགས་པར་བརྒྱན་པ།

དགེ་བའི་རྩ་བ་ཐམས་ཅད་ཡོངས་སུ་བཙལ་བ།

གོས་པར་བྱ་བ་བསྒོས་པ།

དགེ་བའི་རྩ་བ་ངེས་པར་བྱས་པ།

བསྐལ་པ་གྲངས་མེད་པ་བདུན་དུ་དགེ་བའི་རྩ་བ་ཐམས་ཅད་ཡང་དག་པར་བསྒྲུབས་པ།

སྦྱིན་པ་རྣམ་པ་བདུན་བྱིན་པ།

བསོད་ནམས་བྱ་བའི་དངོས་པོ་ལྔ་ཤིན་ཏུ་བསྟེན་པ།

ལེགས་པར་སྤྱད་པ་ལུས་ཀྱི་རྣམ་གསུམ།

ངག་གི་རྣམ་བཞི།

ཡིད་ཀྱི་རྣམ་གསུམ་སྤྱད་པར་གྱུར་པ།

དགེ་བ་བཅུའི་ལས་ཀྱི་ལམ་བསྟེན་པ་དང་ལྡན་པ།

ཡང་དག་པའི་སྦྱོར་བ་ཡན་ལག་བཞི་བཅུ་དང་ལྡན་པ་བསྟེན་པར་གྱུར་པ།

ཡང་དག་པའི་སྨོན་ལམ་ཡན་ལག་བཞི་བཅུ་དང་ལྡན་པའི་སྨོན་ལམ་བཏབ་པ།

ལྷག་པའི་བསམ་པ་ཡན་ལག་བཞི་བཅུ་དང་ལྡན་པ་ལ་ཞུགས་པ།

ཡང་དག་པའི་རྣམ་པར་ཐར་པ་ཡན་ལག་བཞི་བཅུ་དང་ལྡན་པ།

ཡོངས་སུ་རྫོགས་པར་བྱས་པ།

ཡང་དག་པའི་མོས་པ་ཡན་ལག་བཞི་བཅུ་དང་ལྡན་པ་དྲང་པོར་བྱས་པ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བཞི་བཅུའི་རྗེས་སུ་རབ་ཏུ་བྱུང་བ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལྔ་བཅུ་རྩ་ལྔ་ལ་སྦྱིན་པ་ཕུལ་བར་གྱུར་པ།

རང་སངས་རྒྱས་བྱེ་བ་བརྒྱ་ཕྲག་ཕྱེད་དང་བཞི་ལ་ལྷག་པར་བྱ་བ་བྱས་པ།

སེམས་ཅན་ཚད་མེད་གྲངས་མེད་པ་དག་མཐོ་རིས་དང་ཐར་པའི་ལམ་དུ་བཙུད་པར་གྱུར་པ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པ།

ཚེ་གཅིག་གིས་ཐོགས་པ།

འདི་ནས་ཤི་འཕོས་ནས་དགའ་ལྡན་གྱི་གནས་དམ་པ་ན་གནས་པ་ལྷའི་བུ་དམ་པ་ཏོག་དཀར་པོ་ཞེས་བྱ་བ།

ལྷའི་ཚོགས་རྣམས་ཀྱིས་འདི་ནི་འདི་ནས་ཤི་འཕོས་ནས་མིའི་འཇིག་རྟེན་དུ་སྐྱེས་ཏེ།

རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དེར་ཤིན་ཏུ་མཆོད་པ།

གཞལ་མེད་ཁང་གནས་སུམ་ཁྲི་ཉིས་སྟོང་ལ་རབ་ཏུ་གནས་པ།

སྟེགས་བུ་དང་།

བ་གམ་དང་།

རྟ་བབས་དང་།

སྐར་ཁུང་དང་།

བསིལ་ཁང་དང་།

ཁང་པ་བརྩེགས་པ་དང་།

ཁྱམས་

ཀྱིས་ལེགས་པར་བརྒྱན་པ།

གདུགས་དང་།

རྒྱལ་མཚན་དང་།

བ་དན་སྒྲེང་བ།

རིན་པོ་ཆེའི་དྲིལ་བུ་གཡེར་ཁའི་དྲ་བའི་བླ་རེ་བྲེས་པ།

མེ་ཏོག་མན་དཱ་ར་བ་དང་།

མན་དཱ་ར་བ་ཆེན་པོ་དག་ཆལ་པར་བཀྲམ་པ།

ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གླུ་དབྱངས་ལེན་པ།

མེ་ཏོག་ཨ་ཏི་མུཀ་ཏ་ཀ་དང་།

ཙམ་པ་ཀ་དང་།

སྐྱ་སྣར་དང་།

ས་བརྟོལ་དང་།

བཏང་བཟུང་དང་།

བཏང་བཟུང་ཆེན་པོ་དང་།

མྱ་ངན་འཚང་དང་།

ནྱ་གྲོ་དྷ་དང་།

ཏིན་དུ་ཀ་དང་།

ཨཱ་ས་ན་དང་།

དོང་ཀའི་མེ་ཏོག་དང་།

ཤིང་ཀེ་ས་ར་དང་།

ཏ་མ་ལ་དང་།

སཱ་ལ་དང་།

རིན་པོ་ཆེའི་ཤིང་ལྗོན་པ་ཆེན་པོས་བརྒྱན་པ།

གསེར་གྱི་དྲ་བས་གཡོགས་པ།

གཞི་མཉམ་ཞིང་བཀོད་པས་མཛེས་པར་བྱས་པ།

མེ་ཏོག་སྣང་འོད་དང་།

མཱ་ལི་ཀ་དང་།

སྣ་མའི་མེ་ཏོག་དང་།

བཱར་ཤི་ཀ་དང་།

ཏ་ར་ནི་དང་།

བ་ལི་དང་།

ཀོ་ཏ་ར་ནི་དང་།

མཆོག་ཏུ་དྲི་ཞིམ་དང་།

དྷ་ནུས་ཀ་རི་དང་།

ལྷའི་སྣ་མའི་མེ་ཏོག་དང་།

ཨུད་པ་ལ་དང་།

པད་མ་དང་།

ཀུ་མུ་ད་དང་།

པད་མ་དཀར་པོ་དང་།

དྲི་རབ་ཏུ་ཞིམ་པའི་བླ་རེ་ཆེན་པོ་ཕྱོགས་ཕྱོགས་སུ་བྲེས་པ།

བྱ་འདབ་སྤེན་དང་།

ནེ་ཙོ་དང་།

རི་སྐེགས་དང་།

ཁུ་བྱུག་དང་།

ངང་པ་དང་།

རྨ་བྱ་དང་།

ངུར་པ་དང་།

ཀུ་ན་ལ་དང་།

ཀ་ལ་པིང་ཀ་དང་།

ཤང་ཤང་ཏེའུ་ལ་སོགས་པ་བྱ་སྣ་ཚོགས་སྒྲ་སྙན་པ་འབྱིན་པ།

ལྷ་བྱེ་བ་ཁྲག་ཁྲིག་བརྒྱ་སྟོང་གིས་མིག་མངོན་དུ་ཕྱོགས་ཏེ་བལྟ་ཞིང་ལྟད་མོར་བྱ་བ།

ཆོས་རྒྱ་ཆེ་བ་ཆེན་པོ་ཡང་དག་པར་བརྗོད་པས་འདོད་པ་ལ་དགའ་བའི་ཤུགས་ཀྱིས་ཉོན་མོངས་པ་ཐམས་ཅད་གཅོད་པ།

ང་རྒྱལ་དང་།

རྒྱགས་པ་དང་།

དྲེགས་པ་དང་།

ཁྲོ་བ་དང་།

ཐ་བ་དང་།

ཁོང་ཁྲོ་བ་མེད་པར་གྱུར་པ།

དགའ་བ་དང་།

མགུ་བ་དང་།

མཆོག་ཏུ་དགའ་བ་དང་།

དྲན་པ་རྒྱ་ཆེ་ཞིང་གསལ་བ་སྐྱེ་བའི་གཞལ་མེད་ཁང་ཆེན་པོ་དེ་ན་བདེ་བར་གནས་ཤིང་ཆོས་ཀྱི་ཡང་དག་པའི་གཏམ་བྱུང་བ་དང་།

སིལ་སྙན་དང་།

གླུ་དབྱངས་བརྒྱད་ཁྲི་བཞི་སྟོང་པོའི་སྒྲ་དེ་དག་ལས་བྱང་ཆུབ་སེམས་དཔའི་སྔོན་གྱི་ལས་དགེ་བའི་ཚོགས་ཀྱིས་ཡང་དག་པར་བསྐུལ་བའི་ཚིགས་སུ་བཅད་པ་འདི་དག་བྱུང་ངོ་།

བསོད་ནམས་རྒྱ་ཆེན་ཚོགས་མངའ་དྲན་རྟོགས་དང་།

བློ་གྲོས་མཐའ་ཡས་ཤེས་རབ་འོད་མཛད་པ།

མཚུངས་

མེད་སྟོབས་མངའ་སྐུ་རྩལ་རྒྱ་ཆེ་བ།

མར་མེ་མཛད་ཀྱིས་ལུང་བསྟན་དགོངས་པར་མཛོད།

རྒྱ་ཆེན་དྲི་མ་མེད་པའི་ཐུགས་མངའ་བ།

དྲི་མ་གསུམ་སྤངས་རྒྱགས་དང་སྐྱོན་ཞི་བ།

དགེ་བ་དྲི་མེད་རྣམ་པར་དག་པའི་ཐུགས།

སྔོན་ཆད་ཇི་ལྟར་སྦྱིན་སྤྱད་དགོངས་པར་མཛོད།

ཞི་གནས་ཚུལ་ཁྲིམས་བརྟུལ་ཞུགས་བཟོད་པ་དང་།

དུལ་དང་བརྩོན་འགྲུས་བསམ་གཏན་ཤེས་རབ་སྟོབས།

བསྐལ་པ་བྱེ་བ་ཁྲག་ཁྲིག་རྣམས་སྤྱད་པ།

སྤྱོད་རིགས་ཆེར་བྱུང་དགོངས་མཛོད་དགོངས་པར་མཛོད།

སེམས་ཅན་རྣམས་ལ་ཐུགས་བརྩེ་མཛད་གྱུར་ཅིང་།

སངས་རྒྱས་བྱེ་བ་ཁྲག་ཁྲིག་ཁྱོད་ཀྱིས་མཆོད།

དགོངས་མཛོད་དགོངས་པར་མཛོད་ཅིག་གྲགས་མཐའ་ཡས།

དེ་དུས་ལགས་ཀྱིས་བཏང་སྙོམས་མ་མཛད་ཅིག །

རྒ་ཤི་ཉོན་མོངས་འཇིག་མཛད་རྡུལ་བྲལ་བ།

ལྷ་དང་ཀླུ་དང་གནོད་སྦྱིན་དྲི་ཟ་དང་།

ལྷ་མིན་དབང་པོ་དག་ཀྱང་སྡོད་ལགས་ཀྱིས།

འཆི་འཕོའི་ཚུལ་མཁྱེན་འཕོ་བ་བསྟན་པར་མཛོད།

བསྐལ་པ་སྟོང་དུ་དཀའ་བ་སྤྱད་གྱུར་ཀྱང་།

རྒྱ་མཚོ་ཆུ་ཡིས་ཇི་བཞིན་མི་ངོམས་ཀྱིས།

ངོམས་པ་ཁྱོད་ཀྱི་ཐུགས་དམ་དགེ་བ་སྟེ།

ཡུན་རིང་སྐོམ་ཉེན་སྐྱེ་བོ་ཚིམ་པར་མཛོད།

སྨད་པ་མེད་པའི་གྲགས་པ་མངའ་བ་ཁྱོད།

ཆོས་ལ་དགྱེས་པར་ཁྱོད་དགྱེས་འདོད་མི་དགྱེས།

འོན་ཀྱང་དྲི་མ་མེད་པའི་སྤྱན་མངའ་བ།

ལྷར་བཅས་འཇིག་རྟེན་དག་ལ་ཐུགས་བརྩེ་མཛོད།

ལྷ་རྣམས་བྱེ་བ་ཁྱོད་ལས་ཆོས་ཐོས་པས།

ངོམས་པར་འགྱུར་བམ་ལགས་འོན་གྱིས་ཀྱང་།

དལ་དང་མི་ལྡན་གྱུར་པའི་ངན་སོང་དུ།

གནས་པར་གྱུར་པ་དག་ལ་གཟིགས་སུ་གསོལ།

དྲི་མ་མེད་པའི་སྤྱན་མངའ་ཕྱོགས་བཅུ་ཡི།

འཇིག་རྟེན་དག་གི་སངས་རྒྱས་གཟིགས་གྱུར་ཅིང་།

དེ་དག་རྣམས་ལ་ཆོས་གསན་ཆོས་མཆོག་དེ།

འཇིག་རྟེན་དག་ལ་རྣམ་པར་དབྱེ་བ་མཛོད།

དཔལ་ལྡན་ཁྱོད་ཀྱི་བསོད་ནམས་དཔལ་གྱིས་ནི།

དགའ་ལྡན་ཕོ་བྲང་ཤིན་ཏུ་མཛེས་མོད་ཀྱི།

འོན་ཀྱང་ཐུགས་རྗེ་ཐུགས་དང་ལྡན་པས་ན།

འཛམ་བུའི་རྒྱལ་མཚན་དུ་ནི་ཆར་པ་ཕོབ།

བརྟུལ་ཞུགས་གྲུབ་པ་བྱང་ཆུབ་རེག་ཅེས་ཏེ།

འདོད་པའི་ཁམས་ལས་རབ་ཏུ་འདས་པ་ཡི།

གཟུགས་ཀྱི་

ཁམས་ན་ལྷ་རྣམས་གང་འཁོད་པ།

དུ་མ་ཐམས་ཅད་མངོན་པར་རབ་ཏུ་དགའ།

མགོན་པོ་ཁྱོད་ཀྱིས་བདུད་ཀྱི་ལས་རྣམས་བཅོམ།

ཁྱོད་གཞན་མུ་སྟེགས་ཅན་རྣམས་ཕམ་མཛད་དེ།

ཁྱོད་ནི་བྱང་ཆུབ་ཕྱག་མཐིལ་བཞག་དང་འདྲ།

དེ་དུས་ལགས་ཀྱིས་བཏང་སྙོམས་མ་མཛད་ཅིག །

ཉོན་མོངས་རབ་ཏུ་འབར་བའི་འཇིག་རྟེན་ལ།

དཔའ་བོ་ཁྱོད་ཀྱིས་སྤྲིན་ལྟར་ཁྱབ་མཛད་དེ།

བདུད་རྩིའི་ཆར་པ་མངོན་པར་རབ་ཏུ་ཕོབ།

ལྷ་མི་རྣམས་ཀྱི་ཉོན་མོངས་ཞི་བར་མཛོད།

ཁྱོད་ནི་སྨན་པ་ཁམས་ལ་མཁས་པ་སྟེ།

ཡུན་རིང་ནད་པ་སྨན་པས་བོར་བ་ཡི།

སེམས་ཅན་རྣམ་ཐར་གསུམ་གྱི་སྦྱར་སྨན་གྱིས།

མྱ་ངན་འདས་པའི་བདེ་ལ་མྱུར་དུ་ཁོད།

སེང་གེའི་ང་རོ་ཐོས་པར་མ་གྱུར་པས།

ཝ་རྣམས་འཇིགས་པ་མེད་པར་སྒྲ་སྒྲོག་གིས།

སངས་རྒྱས་སེང་གེའི་སྒྲ་ནི་རབ་སྒྲོགས་ཏེ།

མུ་སྟེགས་ཅན་གཞན་ཝ་རྣམས་སྐྲག་པར་མཛོད།

ས་ཡི་དཀྱིལ་ན་སྟོབས་དང་བརྩོན་འགྲུས་ཀྱི།

སྟོབས་ལྡན་ཕྱག་ན་ཤེས་རབ་སྒྲོན་མ་བསྣམས།

ཕྱག་མཐིལ་དམ་པས་ས་ལ་བརྡབ་མཛོད་དེ།

འདི་རྣམས་ཁྱོད་ཀྱིས་རབ་ཏུ་ཕམ་པར་མཛོད།

གང་དག་ཁྱོད་ལ་ལྷུང་བཟེད་འབུལ་བ་ཡི།

འཇིག་རྟེན་སྐྱོང་བ་བཞི་པོ་སྡོད་ཅིང་མཆིས།

ཁྱོད་བལྟམ་གང་དག་ལེན་པར་འགྱུར་བ་ཡི།

བརྒྱ་བྱིན་ཚངས་པ་ཁྲག་ཁྲིག་སྡོད་ཅིང་མཆིས།

བློ་གྲོས་བཟང་པོ་རིགས་ཆེན་རིགས་ལྡན་པ།

གང་ལ་གནས་ནས་བྱང་ཆུབ་སེམས་དཔའ་ཡི།

སྤྱོད་པ་སྟོན་གྱུར་དམ་པའི་རིགས་སྐྱེས་པས།

རིགས་ཀྱི་ནང་ན་བཙུན་པའི་རིགས་ལ་གཟིགས།

སྣོད་གྱུར་གང་དུ་ནོར་བུ་རིན་པོ་ཆེ།

བཞག་ན་དཔལ་དང་ལྡན་པར་འགྱུར་བ་བཞིན།

ནོར་བུ་རིན་ཆེན་ལྟ་བུར་དྲི་མེད་ཐུགས།

འཛམ་བུའི་རྒྱལ་མཚན་དུ་ནི་ཆར་པ་ཕོབ།

གླུ་དབྱངས་སྒྲ་ལས་རྣམ་པ་འདི་ལྟ་ཡི།

ཚིགས་སུ་བཅད་པ་མང་པོ་བྱུང་གྱུར་ནས།

འདི་ནི་དུས་ལགས་བཏང་སྙོམས་མ་མཛད་ཅེས།

སྙིང་རྗེའི་ཡིད་དང་ལྡན་ལ་སྐུལ་བར་བྱེད།

ཡང་དག་པར་སྤྲོ་བར་བྱ་བའི་ལེའུ་སྟེ་གཉིས་པའོ།།

དགེ་སློང་དག་དེ་ལྟར་བྱང་ཆུབ་སེམས་དཔའ་ཆོས་ཀྱི་དུས་དེ་ལྟ་བུས་ཡང་དག་པར་བསྐུལ་

བ་དང་།

གཞལ་མེད་ཁང་ཆེན་པོ་དེ་ནས་བྱུང་སྟེ།

ཆོས་ཀྱིས་མཐོ་བ་ཞེས་བྱ་བའི་ཁང་བཟངས་ཆེན་པོ་གང་དུ་བྱང་ཆུབ་སེམས་དཔའ་འདུག་ཅིང་དགའ་ལྡན་གྱི་ལྷ་རྣམས་ལ་ཆོས་སྟོན་པ་དེར་བྱང་ཆུབ་སེམས་དཔའ་ཞུགས་སོ།

ཞུགས་ནས་ཀྱང་སེང་གེའི་ཁྲི་ཆོས་བཟང་པོ་ཞེས་བྱ་བ་ལ་འདུག་གོ།

དེ་ནས་ལྷའི་བུ་གང་དག་བྱང་ཆུབ་སེམས་དཔའ་དང་སྐལ་བ་མཉམ་པ་ཐེག་པ་མཚུངས་པ་ལ་ཞུགས་པ་དེ་དག་ཀྱང་ཁང་བཟངས་དེ་ཉིད་དུ་ཞུགས་སོ།

གང་ཡང་བྱང་ཆུབ་སེམས་དཔའ་ཕྱོགས་བཅུ་ནས་འདུས་པ།

བྱང་ཆུབ་སེམས་དཔའ་དང་སྤྱོད་པ་འདྲ་བ་དག་དང་།

ལྷའི་བུ་དེ་དག་ཀྱང་ལྷའི་བུ་མོའི་ཚོགས་རྣམས་བསལ་ཅིང་ལྷའི་བུ་ཕལ་རྣམས་ཀྱང་བསལ་ནས་ལྷག་པའི་བསམ་པ་འཐུན་པའི་འཁོར་ཅན་དུ་བྱས་ཏེ།

འཁོར་བྱེ་བ་ཕྲག་དྲུག་ཅུ་རྩ་བརྒྱད་བརྒྱད་དང་།

ཁང་བཟངས་དེར་ཞུགས་ནས་སོ་སོ་ཅི་རིགས་པར་རང་རང་གི་སེང་གེའི་ཁྲི་ལ་འཁོད་པར་གྱུར་ཏོ།

དགེ་སློང་དག་དེ་ལྟར་བྱང་ཆུབ་སེམས་དཔའ་ལོ་བཅུ་གཉིས་ན་མའི་མངལ་དུ་འཇུག་པར་འགྱུར་རོ་ཞེས་བྱ་བ་དེའི་ཚེ་གནས་གཙང་མའི་རིས་ཀྱི་ལྷའི་བུ་དག་འཛམ་བུའི་གླིང་དུ་ལྷགས་ནས།

ལྷའི་ཁ་དོག་མི་སྣང་བར་བྱས་ཏེ།

བྲམ་ཟེའི་ཆ་བྱད་དུ་བསྒྱུར་ནས།

བྲམ་ཟེ་རྣམས་རིག་བྱེད་སློབ་ཏུ་འཛུད་དེ།

གང་ཞིག་རྣམ་པ་འདི་ལྟ་བུར་མངལ་དུ་ཞུགས་པར་གྱུར་ན།

དེ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པར་འགྱུར་ཏེ།

དེ་དག་དང་ལྡན་ན་རྣམ་པ་གཉིས་སུ་འགྱུར་གྱི།

གསུམ་དུ་འགྱུར་བ་མེད་དེ།

དེ་གལ་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ཆོས་དང་ལྡན་པ།

ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ།

དེའི་རིན་པོ་ཆེ་སྣ་བདུན་ནི་འདི་ལྟ་སྟེ།

འཁོར་ལོ་རིན་པོ་ཆེ་དང་།

གླང་པོ་རིན་པོ་ཆེ་དང་།

རྟ་རིན་པོ་ཆེ་དང་།

བུད་མེད་རིན་པོ་ཆེ་དང་།

ནོར་བུ་རིན་པོ་ཆེ་དང་།

ཁྱིམ་བདག་རིན་པོ་ཆེ་དང་།

བློན་པོ་རིན་པོ་ཆེ་དང་བདུན་ནོ།

འཁོར་ལོས་སྒྱུར་བའི་རྒྱལ་པོ་འཁོར་ལོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པར་འགྱུར་ཞེ་ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་གསོ་སྦྱོང་གི་ཉི་མ་ཚེས་བཅྭ་ལྔ་ལ་མགོ་ཁྲུས་བྱས་ཏེ།

དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་

ནས་བསྐོར་ཅིང་འདུག་པའི་ཚེ།

ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་ཡོད་པ།

མུ་ཁྱུད་དང་ལྡན་པ།

ལྟེ་བ་དང་བཅས་པ།

ཐམས་ཅད་གསེར་ལས་གྲུབ་པ།

མགར་བས་མ་བྱས་པ།

འཕང་དུ་ཤིང་ཏ་ལ་བདུན་ཙམ་ནས་འབྱུང་སྟེ།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས།

ལྷའི་འཁོར་ལོ་རིན་པོ་ཆེ་དེ་མཐོང་ནས་འདི་སྙམ་དུ་སེམས་ཏེ།

བདག་གིས་ཐོས་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་གི་ཉི་མ་ཚེས་བཅྭ་ལྔ་ལ་མགོ་ཁྲུས་བྱས་ཏེ།

དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ།

ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་བྱུང་བར་གྱུར་ན།

དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་ཏེ།

བདག་གི་དྲུང་དུ་ལྷའི་འཁོར་ལོ་རིན་པོ་ཆེ་འོངས་པ་ལས་ན།

བདག་ཀྱང་འཁོར་ལོས་སྒྱུར་བའི་རྒྱལ་པོ་ཡིན་དུ་ངེས་སོ་སྙམ་སྟེ།

དེ་ནས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་བླ་གོས་ཕྲག་པ་གཅིག་ཏུ་གཟར་ནས།

པུས་མོ་གཡས་པའི་ལྷ་ང་ས་ལ་བཙུགས་ཏེ།

ལག་པ་གཡས་པས་ལྷའི་འཁོར་ལོ་རིན་པོ་ཆེ་དེ་སྐོར་ཞིང་འདི་སྐད་དུ་བཙུན་པ་ལྷའི་འཁོར་ལོ་རིན་པོ་ཆེ་ཆོས་ཀྱིས་སྐོར་ཅིག །

ཆོས་མ་ཡིན་པས་ནི་མ་ཡིན་ནོ་ཞེས་བྱ་བའི་ཚིག་སྨྲས་པ་དང་།

དེ་ནས་ལྷའི་འཁོར་ལོ་རིན་པོ་ཆེ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བསྐོར་བས་རྫུ་འཕྲུལ་གྱིས་ནམ་མཁའ་ལས་ཤར་ཕྱོགས་སུ་ལེགས་པར་འགྲོ་སྟེ།

རྒྱལ་པོ་འཁོར་ལོས་སྒྱུར་བ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་རྗེས་སུ་འགྲོའོ།

སའི་ཕྱོགས་གང་དུ་ལྷའི་འཁོར་ལོ་རིན་པོ་ཆེ་དེ་གནས་པར་འགྱུར་བ་དེར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་པར་འགྱུར་རོ།

དེ་ནས་ཤར་ཕྱོགས་ཀྱི་ཁམས་ཀྱི་རྒྱལ་པོ་གང་ཡིན་པ་དེ་དག་དངུལ་གྱི་སྣོད་ནི་གསེར་ཕྱེས་བཀང་སྟེ་ཐོགས།

གསེར་གྱི་སྣོད་ནི་དངུལ་སིལ་མས་བཀང་སྟེ་ཐོགས་ནས།

འཁོར་ལོས་སྒྱུར་བའི་རྒྱལ་པོ་བསྩ་ཞིང་འདི་སྐད་དུ་ལྷ་འདིར་ལེགས་པར་གཤེགས་སོ།

ལྷ་ཚུར་གཤེགས་སུ་གསོལ།

ལྷའི་ཆབ་སྲིད་ནི་ཤིན་ཏུ་རྒྱས་ཤིང་འབྱོར་ལ་བདེ་

སྟེ།

ལོ་ལེགས་ཤིང་ཉམས་དགྱེས་ལ་སྐྱེ་བོ་མང་པོ་དང་།

མིས་གཏམས་པ་ལགས་ན།

ལྷ་ཉིད་ཀྱི་ཡུལ་དུ་བྱོན་ནས་བཞུགས་སུ་གསོལ།

དེ་སྐད་ཅེས་སྨྲས་པ་དང་།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་ཁམས་ཀྱི་རྒྱལ་པོ་དེ་དག་ལ་འདི་སྐད་དུ་ཁྱེད་རང་རང་གི་རྒྱལ་སྲིད་དག་ཆོས་ཀྱིས་གྱིས་ཤིག །

ཆོས་མ་ཡིན་པས་ནི་མ་ཡིན་ནོ།

ཁྱེད་སྲོག་ཆགས་མ་གསོད་ཅིག །

མ་བྱིན་པར་མ་ལེན་ཅིག །

འདོད་པ་ལ་ལོག་པར་གཡེམ་པར་མ་བྱེད་ཅིག །

བརྫུན་དུ་མ་སྨྲ་ཤིག །

ཕྲ་མ་མ་ཟེར་ཅིག །

ངག་རྩུབ་པོ་མ་སྨྲ་ཤིག །

ཚིག་ཀྱལ་པ་མ་སྨྲ་ཤིག །

བརྣབ་སེམས་ཅན་དུ་མ་གྱུར་ཅིག །

གནོད་སེམས་ཅན་དུ་མ་གྱུར་ཅིག །

ལོག་པར་ལྟ་བར་མ་གྱུར་ཅིག །

སྲོག་གཅོད་པ་ལ་བྱམས་པར་མ་གྱུར་ཅིག །

ལོག་པར་ལྟ་བ་ཅན་གྱི་བར་ལ་བྱམས་པར་མ་གྱུར་ཅིག །

ངའི་ཡུལ་དུ་ཆོས་མ་ཡིན་པ་འབྱུང་ད་རེ།

ཆོས་མ་ཡིན་པར་སྤྱོད་པ་ལ་བྱམས་པར་མ་བྱེད་ཅིག་ཅེས་བསྒོ་ནས།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་དེ་ལྟར་ཤར་ཕྱོགས་སུ་རྣམ་པར་རྒྱལ་བར་བྱེད་དོ།

ཤར་ཕྱོགས་སུ་རྣམ་པར་རྒྱལ་བར་བྱས་ནས།

ཤར་ཕྱོགས་ཀྱི་རྒྱ་མཚོ་ལ་འགྲོའོ།

ཤར་ཕྱོགས་ཀྱི་རྒྱ་མཚོ་ལ་སོང་ནས།

ཤར་ཕྱོགས་ཀྱི་རྒྱ་མཚོ་ལས་རྒལ་ལོ།

རྒལ་ནས་ཀྱང་ལྷོ་ཕྱོགས་སུ་ནམ་མཁའ་ལ་རྫུ་འཕྲུལ་གྱིས་ལེགས་པར་འགྲོ་སྟེ།

འཁོར་ལོས་སྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འགྲོའོ།

སྔ་མ་བཞིན་དུ་ལྷོ་ཕྱོགས་སུ་རྣམ་པར་རྒྱལ་བར་བྱེད་དོ།

ལྷོ་ཕྱོགས་སུ་ཇི་ལྟ་བ་དེ་བཞིན་དུ་ནུབ་ཕྱོགས་དང་།

བྱང་ཕྱོགས་སུ་རྣམ་པར་རྒྱལ་བར་བྱེད་དོ།

བྱང་ཕྱོགས་སུ་རྣམ་པར་རྒྱལ་བར་བྱས་ནས་བྱང་ཕྱོགས་ཀྱི་རྒྱ་མཚོ་ལ་འགྲོའོ།

བྱང་ཕྱོགས་ཀྱི་རྒྱ་མཚོ་ལ་སོང་ནས།

བྱང་ཕྱོགས་ཀྱི་རྒྱ་མཚོ་ལས་རྒལ་ལོ།

རྒལ་ནས་ཀྱང་ནམ་མཁའ་ལ་རྫུ་འཕྲུལ་གྱིས་རྒྱལ་པོའི་ཕོ་བྲང་དུ་ལེགས་པར་འོངས་ནས་བཙུན་མོའི་འཁོར་གྱི་སྒོའི་སྟེང་དུ་ཉམས་པ་མེད་པར་གནས་ཏེ།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནི་འཁོར་ལོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་

ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་གླང་པོ་རིན་པོ་ཆེ་སྔ་མ་བཞིན་དུ་འབྱུང་སྟེ།

ཐམས་ཅད་ཐལ་ཀར་གྱུར་པ།

ཡན་ལག་བདུན་ཤིན་ཏུ་གནས་པ།

གཙུག་གསེར་གྱིས་བརྒྱན་པ།

གསེར་གྱི་རྒྱལ་མཚན་དང་ལྡན་པ།

གསེར་གྱི་རྒྱན་གྱིས་བརྒྱན་པ།

གསེར་གྱི་དྲ་བས་གཡོགས་པ།

རྫུ་འཕྲུལ་དང་ལྡན་པ་ནམ་མཁའ་ལ་འགྲོ་བ།

རྣམ་པར་འཕྲུལ་པའི་ཆོས་ཅན་ཏེ།

འདི་ལྟར་གླང་པོའི་རྒྱལ་པོ་བྱང་ཆུབ་ཅེས་བྱ་བའོ།

གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གླང་པོ་རིན་པོ་ཆེ་དེ་བརྟག་པར་འདོད་པར་གྱུར་པ་དེའི་ཚེ།

ཉི་མ་ཤར་ཀར་གླང་པོ་རིན་པོ་ཆེ་དེ་ལ་ཞོན་ཏེ་ས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ།

རྒྱ་མཚོའི་མུར་ཐུག་པ་དང་བཅས་པ་ཀུན་ཏུ་བསྐོར་ཏེ།

རྒྱལ་པོའི་ཕོ་བྲང་དུ་འོངས་ནས་ཁྱེའུ་སུས་ཀྱི་དགའ་བ་མྱོང་བར་བྱེད་དེ།

འཁོར་ལོས་སྒྱུར་བའི་རྒྱལ་པོ་གླང་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

འཁོར་ལོས་སྒྱུར་བའི་རྒྱལ་པོ་རྟ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་རྟ་རིན་པོ་ཆེ་སྔ་མ་བཞིན་དུ་འབྱུང་སྟེ།

ཐམས་ཅད་སྔོན་པོར་གྱུར་པ།

མགོ་གནག་པ།

རྔོག་མ་ལྕང་ལོར་འདུག་པ།

ཞོན་ན་གུས་པར་བྱེད་པ།

གསེར་གྱི་རྒྱལ་མཚན་དང་བཅས་པ།

གསེར་གྱི་རྒྱན་དང་ལྡན་པ།

གསེར་གྱི་དྲ་བས་གཡོགས་པ།

རྫུ་འཕྲུལ་དང་ལྡན་པ།

ནམ་མཁའ་ལ་འགྲོ་བ།

རྣམ་པར་འཕྲུལ་པའི་ཆོས་ཅན་ཏེ།

འདི་ལྟར་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བའོ།

གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ།

རྟ་རིན་པོ་ཆེ་བརྟག་པར་འདོད་པར་གྱུར་པ་དེའི་ཚེ་ཉི་མ་ཤར་ཀར་རྟ་རིན་པོ་ཆེ་དེ་ལ་ཞོན་ནས་ས་ཆེན་པོ་འདི་རྒྱ་མཚོའི་མཐའ་སྐོར་དང་བཅས་པ་རྒྱ་མཚོའི་མུར་ཐུག་པ་དང་བཅས་པ་ཀུན་ཏུ་བསྐོར་ཏེ།

ཕྱིར་རྒྱལ་པོའི་ཕོ་བྲང་དུ་འཁོར་ནས་ཁྱེའུ་སུས་ཀྱི་བདེ་བ་མྱོང་བར་བྱེད་དེ།

འཁོར་ལོས་སྒྱུར་བའི་རྒྱལ་པོ་ནི་རྟ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

འཁོར་ལོས་སྒྱུར་བའི་རྒྱལ་པོ་ནོར་བུ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ནོར་བུ་རིན་པོ་ཆེ་སྔ་མ་བཞིན་དུ་འབྱུང་སྟེ།

ཐམས་ཅད་དུ་སྔོ་བ།

བཻ་དཱུརྱའི་རང་བཞིན།

ཟུར་བརྒྱད་དུ་འདུག་པ།

ཤིན་ཏུ་སྦྱངས་པ་འབྱུང་སྟེ།

ནོར་བུ་རིན་པོ་ཆེ་དེའི་འོད་ཀྱིས་བཙུན་མོའི་འཁོར་ཐམས་ཅད་ཀྱང་སྣང་བས་ཁྱབ་པར་འགྱུར་རོ།

གང་གི་ཚེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནོར་བུ་རིན་པོ་ཆེ་དེ་བརྟག་པར་འདོད་པར་གྱུར་པ་དེའི་ཚེ།

མཚན་མོ་ནམ་གྱི་གུང་ལ་མུན་པ་མུན་གནག་གི་ནང་དུ་ནོར་བུ་རིན་པོ་ཆེ་དེ་རྒྱལ་མཚན་གྱི་རྩེ་མོ་ལ་བཏགས་ཏེ།

སྐྱེད་མོས་ཚལ་གྱི་ས་བཟང་པོ་བལྟ་བའི་ཕྱིར་སོང་ན།

ནོར་བུ་རིན་པོ་ཆེ་དེའི་འོད་ཀྱིས་ཐམས་ཅད་དང་ལྡན་པའི་དཔུང་གི་ཚོགས་ཡན་ལག་བཞི་པ་ཐམས་ཅད་དཔག་ཚད་ཁོ་ར་ཁོར་ཡུག་ཏུ་སྣང་བས་གསལ་བར་འགྱུར་རོ།

ནོར་བུ་རིན་པོ་ཆེའི་འཁོར་ན་གནས་པའི་མི་དེ་དག་ཀྱང་སྣང་བ་དེས་གསལ་བར་གྱུར་པ་དང་།

གཅིག་གིས་གཅིག་མཐོང་།

གཅིག་གིས་གཅིག་ཤེས་ནས་གཅིག་ལ་གཅིག་འདི་སྐད་སྨྲ་སྟེ།

བཞིན་བཟངས་དག་ལོངས།

ལས་ཀྱི་མཐའ་དག་བྱོས་ཤིག །

ཚོང་འདུས་དག་ཁྲོམ།

ཉི་མ་ཤར་ཏེ་ཉིན་མོར་ཤེས་སོ་ཞེས་ཟེར་ཏེ།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་ནོར་བུ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ།

བུད་མེད་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བུད་མེད་རིན་པོ་ཆེ་སྔ་མ་བཞིན་དུ་འབྱུང་སྟེ།

ཚུལ་དང་འཐུན་པ་རྒྱལ་རིགས་སུ་སྐྱེས་པ་ཧ་ཅང་ཡང་མི་རིང་བ།

ཧ་ཅང་ཡང་མི་ཐུང་བ།

ཧ་ཅང་ཡང་མི་སྦོམ་པ།

ཧ་ཅང་ཡང་མི་སྐེམ་པ།

ཧ་ཅང་ཡང་མི་དཀར་བ།

ཧ་ཅང་ཡང་མི་གནག་པ།

གཟུགས་མཛེས་པ།

ཚུལ་དུ་ཤིས་པ།

བལྟ་ན་སྡུག་པ།

ཁ་དོག་བཟང་པོ་རྒྱས་པ་མཆོག་དང་ལྡན་པ།

དེའི་སྤུའི་ཁུང་ཐམས་ཅད་ནས་ཙན་དན་གྱི་དྲི་འབྱུང་བ།

ཁ་ནས་ཨུད་པ་ལའི་ངད་ལྡང་བ།

ཀ་ཙ་ལིན་དའི་གོས་ལྟར་རེག་ན་བདེ་བ།

དེ་གྲང་བའི་དུས་ན་ནི་ལུས་ལ་རེག་ན་དྲོ་བ།

དྲོ་བའི་དུས་ན་ལུས་ལ་རེག་ན་བསིལ་བ་སྟེ།

དེ་འཁོར་ལོས་སྒྱུར་བའི་རྒྱལ་པོ་མ་གཏོགས་པར་གཞན་ལ་ཡིད་ཀྱིས་ཀྱང་འདོད་ཆགས་སུ་མི་བྱེད་ན།

ལུས་ཀྱིས་ལྟ་ཅི་སྨོས་ཏེ།

འཁོར་ལོས་སྒྱུར་བའི་རྒྱལ་པོ་ནི་བུད་མེད་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

འཁོར་ལོས་སྒྱུར་བའི་རྒྱལ་པོ་ཁྱིམ་བདག་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།

འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི།

ཁྱིམ་བདག་རིན་པོ་ཆེ་སྔ་མ་བཞིན་དུ་འབྱུང་སྟེ།

མཁས་པ།

གསལ་བ།

ཡིད་གཞུངས་པ།

ལྷའི་མིག་དང་ལྡན་པ་འབྱུང་ངོ་།

དེ་ལྷའི་མིག་དེས་དཔག་ཚད་ཁོ་ར་ཁོར་ཡུག་ཏུ་བདག་པོ་དང་བཅས་པའི་གཏེར་དག་ཀྱང་མཐོང་།

བདག་པོ་མེད་པའི་གཏེར་དག་ཀྱང་མཐོང་སྟེ།

དེ་བདག་པོ་མེད་པའི་གཏེར་གང་ཡིན་པ་དེ་དག་གིས་འཁོར་ལོས་སྒྱུར་བའི་རྒྱལ་པོའི་ནོར་གྱི་དགོས་པ་བྱེད་དེ།

འཁོར་ལོས་སྒྱུར་བའི་རྒྱལ་པོ་ནི་ཁྱིམ་བདག་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ནོ།

འཁོར་ལོས་སྒྱུར་བའི་རྒྱལ་པོ་བློན་པོ་རིན་པོ་ཆེ་རྣམ་པ་ཇི་ལྟ་བུ་དང་ལྡན་པ་ཡིན་ཞེ་ན།

འདི་ལ་འཁོར་ལོས་སྒྱུར་བའི་རྒྱལ་པོའི་བློན་པོ་རིན་པོ་ཆེ་སྔ་མ་བཞིན་དུ་འབྱུང་སྟེ།

མཁས་ཤིང་གསལ་ལ་ཡིད་གཞུངས་པའོ།

དེ་འཁོར་ལོས་སྒྱུར་བའི་རྒྱལ་པོ་དེས་བསམས་པ་ཙམ་གྱིས་བསྐོ་བར་བྱ་བའི་དཔུང་རྣམས་སྐོའོ།

འཁོར་ལོས་སྒྱུར་བའི་རྒྱལ་པོ་ནི་བློན་པོ་རིན་པོ་ཆེ་རྣམ་པ་དེ་ལྟ་བུ་དང་ལྡན་པ་ཡིན་ཏེ།

འཁོར་ལོས་སྒྱུར་བའི་རྒྱལ་པོ་ནི་རིན་པོ་ཆེ་སྣ་བདུན་དེ་དག་དང་ལྡན་པ་ཡིན་ནོ།

དེ་ལ་བུ་སྟོང་འབྱུང་སྟེ།

དཔའ་བ།

རྟུལ་ཕོད་པ།

ཡན་ལག་མཆོག་གི་གཟུགས་དང་ལྡན་པ།

ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་སྟེ།

དེས་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད་པར་སྔོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ་ཆོས་ཀྱིས་ལེགས་པར་ཕབ་སྟེ་གནས་སོ།

གལ་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ན་སངས་རྒྱས་སུ་འགྱུར་ཏེ།

འདོད་པའི་འདོད་ཆགས་སྤངས་པ།

འདྲེན་པ་གཞན་གྱི་དྲིང་མི་འཇོག་པ།

ལྷ་དང་མི་རྣམས་ཀྱི་སྟོན་པར་འགྱུར་རོ།

ཞེས་རིག་བྱེད་འདོན་དུ་འཛུད་དོ།

དེ་བཞིན་དུ་ལྷའི་བུ་གཞན་དག་ཀྱང་འཛམ་བུའི་གླིང་དུ་ལྷགས་ཤིང་།

རང་སངས་རྒྱས་དག་ལ་སྐུལ་མ་འདེབས་ཏེ།

འཕགས་པ་དག་ད་སྟེ་ལོ་བཅུ་གཉིས་ན་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་གིས་སངས་རྒྱས་ཀྱི་ཞིང་འདི་བོར་ཅིག་ཅེས་ཟེར་རོ།

དགེ་སློང་དག་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་

ཆེན་པོ་ན་མཇུག་མ་སྒྱུར་བ་ཞེས་བྱ་བའི་རི་ལ་རང་སངས་རྒྱས་གླང་པོ་ཞེས་བྱ་བ་འདུག་པས་སྒྲ་དེ་ཐོས་ནས་རྡོ་བའི་སྟེང་དུ་འཇིམ་པ་ལ་བྱ་བ་དེ་བཞིན་དུ་འདུག་སྟེ།

ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་སོ།

གྱེན་དུ་འཕགས་ནས་ཀྱང་མེའི་ཁམས་ལ་སྙོམས་པར་ཞུགས་ཏེ་སྒྲོན་མ་བཞིན་དུ་མྱ་ངན་ལས་འདས་སོ།

དེའི་མཁྲིས་པ་དང་།

བད་ཀན་དང་།

ཆུ་རྒྱུས་དང་།

རུས་པ་དང་།

ཤ་དང་།

ཁྲག་ཏུ་གྱུར་པ་གང་ཡིན་པ་དེ་དག་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ།

རིང་བསྲེལ་འབའ་ཞིག་ས་ལ་ལྷགས་ནས།

རྐང་རྗེས་དེ་དག་ནི་ད་དུང་ཡང་དྲང་སྲོང་གི་རྗེས་ཞེས་གྲག་སྟེ་ཡོད་དོ།

དགེ་སློང་དག་དེའི་ཚེ་ཡུལ་བཱ་རཱ་ཎ་སཱིའི་རི་དགས་ཀྱི་ནགས་དྲང་སྲོང་ལྷུང་བ་ན་རང་སངས་རྒྱས་ལྔ་བརྒྱ་འཁོད་པ་དེ་དག་གིས་ཀྱང་སྒྲ་དེ་ཐོས་ནས།

ནམ་མཁའ་ལ་ཤིང་ཏ་ལ་བདུན་སྲིད་དུ་གྱེན་དུ་འཕགས་ནས།

མེའི་ཁམས་ལ་སྙོམས་པར་ཞུགས་ཏེ།

སྒྲོན་མ་བཞིན་དུ་ཡོངས་སུ་མྱ་ངན་ལས་འདས་སོ།

དེ་དག་གི་མཁྲིས་པ་དང་།

བད་ཀན་དང་།

ཆུ་རྒྱུས་དང་།

རུས་པ་དང་།

ཤ་དང་།

ཁྲག་ཏུ་གྱུར་པ་གང་ཡིན་པ་དེ་དག་ཐམས་ཅད་ནི་མེས་ཡོངས་སུ་ཟད་པར་གྱུར་ཏེ།

རིང་བསྲེལ་འབའ་ཞིག་ས་ལ་ལྷགས་སོ།

དེ་ལྟར་འདིར་དྲང་སྲོང་རྣམས་ལྷུང་ངོ་ཞེས་དེ་ཕྱིན་ཆད་དྲང་སྲོང་ལྷུང་བ་ཞེས་བྱ་བ་ཡང་དྲང་སྲོང་ལྷུང་བ་དྲང་སྲོང་ལྷུང་བ་ཞེས་མིང་དུ་ཆགས་པར་གྱུར་ཏོ།

མི་འཇིགས་པ་བྱིན་པའི་རི་དགས་དག་ཀྱང་དེ་ན་གནས་པས་དེ་ཕྱིན་ཆད་རི་དགས་ཀྱི་ནགས་ཞེས་བྱ་བ་ཡང་རི་དགས་ཀྱི་ནགས་རི་དགས་ཀྱི་ནགས་ཞེས་མིང་དུ་གྱུར་ཏོ།

དགེ་སློང་དག་དེ་ལྟར་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འདུག་པ་ནི་རྣམ་པར་བལྟ་བ་ཆེན་པོ་བཞི་ལ་རྣམ་པར་ལྟ་སྟེ།

བཞི་གང་ཞེ་ན།

འདི་ལྟ་སྟེ།

དུས་ལ་རྣམ་པར་ལྟ་བ་དང་།

གླིང་ལ་རྣམ་པར་ལྟ་བ་དང་།

ཡུལ་ལ་རྣམ་པར་ལྟ་བ་དང་།

རིགས་ལ་རྣམ་པར་ལྟ་བའོ།

དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་དུས་རྣམ་པར་བལྟ་བ་ལ་རྣམ་པར་ལྟ་ཞེ་ན།

བྱང་ཆུབ་སེམས་དཔའ་ནི་ཐོག་མའི་དུས་སེམས་ཅན་འདུ་བའི་ཚེ་མའི་མངལ་དུ་མི་འཇུག་གི །

གང་གི་ཚེ་འཇིག་རྟེན་གསལ་བར་ཀུན་ནས་གནས་པར་གྱུར་ཏེ།

སྐྱེ་བ་སྣང་བར་གྱུར།

རྒ་བ་སྣང་བར་གྱུར།

ན་བ་སྣང་བར་གྱུར།

འཆི་བ་སྣང་བར་གྱུར་པ་དེའི་ཚེ་བྱང་ཆུབ་སེམས་དཔའ་མའི་མངལ་དུ་འཇུག་གོ།

དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་གླིང་རྣམ་པར་བལྟ་བ་ལ་རྣམ་པར་ལྟ་ཞེ་ན།

བྱང་ཆུབ་སེམས་དཔའ་ནི་མཐའ་འཁོབ་ཀྱི་གླིང་དུ་མི་སྐྱེ།

ཤར་གྱི་ལུས་འཕགས་པོར་མི་སྐྱེ།

ནུབ་ཀྱི་བ་ལང་སྤྱོད་དུ་མི་སྐྱེ།

བྱང་གི་སྒྲ་མི་སྙན་དུ་མི་སྐྱེའི།

ལྷོའི་འཛམ་བུ་གླིང་ཉིད་དུ་སྐྱེའོ།

དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་ཡུལ་རྣམ་པར་བལྟ་བ་ལ་རྣམ་པར་ལྟ་ཞེ་ན།

བྱང་ཆུབ་སེམས་དཔའ་ནི་མཐའ་འཁོབ་ཀྱི་ཡུལ་གང་ན་མི་རྣམས་དབང་པོ་རྟུལ་ཞིང་བླུན་ལ་ལུག་ལྟར་ལྐུགས་པའི་རང་བཞིན་ཅན་ལེགས་པར་བསྟན་པ་དང་།

ཉེས་པར་བསྟན་པའི་དོན་ཤེས་པར་བྱ་བའི་སྐལ་བ་མེད་པ་དག་ཡོད་པ་དག་ཏུ་མི་སྐྱེའི།

བྱང་ཆུབ་སེམས་དཔའ་ནི་ཡུལ་གྱི་དབུས་ཉིད་དུ་སྐྱེའོ།

དགེ་སློང་དག་ཅིའི་ཕྱིར་བྱང་ཆུབ་སེམས་དཔའ་རིགས་རྣམ་པར་བལྟ་བ་ལ་རྣམ་པར་ལྟ་ཞེ་ན།

བྱང་ཆུབ་སེམས་དཔའ་ནི་རིགས་དམའ་བ་གདོལ་པའི་རིགས་སམ།

སྨྱིག་མ་མཁན་གྱི་རིགས་སམ།

ཤིང་རྟ་མཁན་གྱི་རིགས་སམ།

གཡུང་རིགས་སུ་མི་སྐྱེའི།

བྲམ་ཟེའི་རིགས་སམ།

རྒྱལ་རིགས་ཁོ་ན་སྟེ།

རིགས་གཉིས་སུ་སྐྱེའོ།

དེ་ལ་གང་གི་ཚེ་བྲམ་ཟེའི་རིགས་བཙུན་པར་བྱ་བ་དེའི་ཚེ་བྲམ་ཟེའི་རིགས་སུ་སྐྱེའོ།

གང་གི་ཚེ་རྒྱལ་རིགས་བཙུན་པར་བྱ་བ་དེའི་ཚེ་རྒྱལ་རིགས་སུ་སྐྱེ་སྟེ།

དགེ་སློང་དག་ད་ལྟར་ནི་རྒྱལ་རིགས་བཙུན་པར་བྱ་བས།

དེའི་ཕྱིར་བྱང་ཆུབ་སེམས་དཔའ་རྒྱལ་རིགས་སུ་སྐྱེ་སྟེ།

དགེ་སློང་དག་དོན་གྱི་དབང་དེ་ལ་བརྟེན་ནས།

བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་གནས་པ་རྣམ་པར་བལྟ་བ་ཆེན་པོ་བཞི་ལ་རྣམ་པར་ལྟ་སྟེ།

དེ་ལྟར་བལྟས་ནས་ཅང་མི་ཟེར་བར་གྱུར་ཏོ།།

འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་གཉིས་པ།

དགེ་སློང་དག་དེ་ལྟར་ལྷའི་བུ་དེ་དག་དང་།

བྱང་ཆུབ་སེམས་དཔའ་དེ་དག་གཅིག་ལ་གཅིག་འདི་སྐད་དུ།

བྱང་ཆུབ་སེམས་དཔའ་རིགས་རིན་པོ་ཆེ་ནི་ཇི་ལྟ་བུ་ཞིག་ཏུ་སྐྱེ་བར་འགྱུར།

ཡུམ་ནི་ཇི་ལྟ་བུ་ཞིག་གི་ལྷུམས་སུ་འཇུག་པར་

འགྱུར་ཞེས་འདྲིའོ།

དེ་ལ་ལ་ལ་ན་རེ་ཡུལ་མ་ག་དྷཱ་ན་ལུས་འཕགས་ཀྱི་རིགས་འདི་འབྱོར་ཅིང་རྒྱས་ལ་ལོ་ལེགས་པ་དང་།

བདེ་བ་དང་ལྡན་པ་ཡིན་ཏེ།

དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ནི་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་དེ་ནི་མའི་རྒྱུད་ཀྱིས་དག་པ་ཡང་མ་ཡིན།

ཕའི་རྒྱུད་ཀྱིས་དག་པ་ཡང་མ་ཡིན་ལ།

བསོད་ནམས་ཆུང་ངུས་བྱུང་གི།

བསོད་ནམས་རྒྱ་ཆེན་པོས་མངོན་པར་བྱུང་བ་མ་ཡིན་ཞིང་རྒོད་ལ་མི་བརྟེན་ཏེ་མི་གནས་པ་ཡིན་ལ།

ཡུལ་དེ་ཡང་ཉེ་འཁོར་གསེག་མས་གང་བ།

སྐྱེད་མོས་ཚལ་དང་།

མཚོ་དང་།

མཚེའུ་དག་ཀྱང་མི་མང་ལ་རི་བྲགས་ལྟར་མཐའ་འཁོབ་ཀྱི་གནས་སུ་གྱུར་པ་སྟེ།

དེའི་ཕྱིར་དེ་ནི་ཚུལ་དང་འཐུན་པ་མ་ཡིན་ནོ་ཞེས་ཟེར་རོ།

ལ་ལ་ན་རེ་ཀོ་ས་ལའི་རིགས་འདི་འཁོར་མང་ཞིང་བཞོན་པ་མང་ལ་ནོར་ཆེ་བ་སྟེ།

དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་ཀོ་ས་ལའི་རིགས་ནི་གདོལ་པའི་རིགས་ལས་ཤི་འཕོས་ནས་སྐྱེས་པ་ཡིན་ཏེ།

ཕ་དང་མས་དག་པ་ཡང་མ་ཡིན་ལ།

དམའ་བ་ལ་མོས་པ་སྟེ།

རིགས་མཐོ་བར་ཡང་མི་བྱ།

ནོར་དང་རིན་པོ་ཆེའི་གཏེར་ཡང་ཚད་མེད་པར་ཕུན་སུམ་ཚོགས་པ་མ་ཡིན་ཏེ།

དེའི་ཕྱིར་དེ་ནི་ཚུལ་དང་འཐུན་པ་མ་ཡིན་ནོ་ཞེས་ཟེར་རོ།

ལ་ལ་ན་རེ་རྒྱལ་པོ་བད་སའི་རིགས་འདི་འབྱོར་ཅིང་རྒྱས་ལ།

ལོ་ལེགས་པ་དང་།

བདེ་བ་དང་ལྡན་པ་ཡིན་ཏེ།

དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་དེའི་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་རྒྱལ་པོ་བད་སའི་རིགས་ནི་ཕལ་པ་སྟེ།

གཏུམ་ལ་གཟི་བརྗིད་འབར་བ་ཡང་མ་ཡིན་ཞིང་།

སྐྱེས་པ་གཞན་ལས་སྐྱེ་བ་གྲུབ་པ།

ཕ་མ་ཉིད་ཀྱི་གཟི་བརྗིད་ཀྱི་ལས་ཀྱིས་གྲུབ་པ་མ་ཡིན་ལ།

དེའི་རྒྱལ་པོ་ཡང་ཆད་པར་སྨྲ་བ་སྟེ།

དེའི་ཕྱིར་དེ་ཡང་ཚུལ་དང་འཐུན་པ་མ་ཡིན་ནོ་ཞེས་ཟེར་རོ།

ལ་ལ་ན་རེ་གྲོང་ཁྱེར་ཆེན་པོ་ཡངས་པ་ཅན་འདི་ནི་འབྱོར་ཅིང་རྒྱས་ལ།

ལོ་ལེགས་པ་དང་།

བདེ་བ་དང་ལྡན་པ་ཡིན་ཏེ།

ཉམས་

དགའ་ལ་སྐྱེ་བོ་མང་པོ་དང་མིས་ཀུན་ཏུ་གང་བ།

སྟེགས་བུ་དང་།

བ་གམ་དང་།

རྟ་བབས་དང་།

སྐར་ཁུང་དང་།

བསིལ་ཁང་དང་།

ཁང་པ་བརྩེགས་པ་དང་།

ཁང་བཟངས་དག་གིས་ལེགས་པར་བརྒྱན་པ་སྟེ།

མེ་ཏོག་གི་ར་བ་དང་།

ནགས་ཚལ་གྱི་ཕྲེང་བ་མེ་ཏོག་ཀུན་ཏུ་རྒྱས་པ་དང་ལྡན་པ་ཡིན་ལ་ལྷའི་ཕོ་བྲང་དང་འདྲ་བ་ཡིན་ཏེ།

དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་དེ་དག་ལ་ནི་ཕན་ཚུན་དུ་རིགས་པར་སྨྲ་བ་མེད་དོ།

ཆོས་སྤྱོད་པ་མེད་དོ།

གོང་མ་དང་བར་མ་དང་རྒན་པ་དང་།

གཙོ་བོ་དག་ལ་ཡང་རིམ་གྲོར་བྱ་བ་མེད་ཅིང་།

རེ་རེ་ཞིང་ཡང་འདི་སྙམ་དུ་བདག་ནི་རྒྱལ་པོའོ།

བདག་ནི་རྒྱལ་པོའོ་སྙམ་དུ་སེམས་པས་སློབ་མར་ཁས་ལེན་པ་མེད་ཅིང་ཆོས་ཁས་ལེན་པ་མེད་པ་སྟེ།

དེའི་ཕྱིར་དེའང་ཚུལ་དང་འཐུན་པ་མ་ཡིན་ནོ་ཞེས་ཟེར་རོ།

ལ་ལ་ན་རེ་གྲོང་ཁྱེར་འཕགས་རྒྱལ་ན་རབ་སྣང་གི་རིགས་འདི་ནི་དཔུང་ཆེ་ཞིང་བཞོན་པ་མང་བ།

ཕ་རོལ་གྱི་གཡུལ་ངོར་རྒྱལ་བ་འཐོབ་པ་ཡིན་ཏེ།

དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་དེ་དག་ནི་ཁྲོ་ཞིང་གཏུམ་ལ་བརླང་ཞིང་གཟུ་ལུམས་ཅན་རྒོད་པ་སྟེ།

ལས་ཡོད་པར་བལྟ་བའང་མ་ཡིན་པས།

དེའི་ཕྱིར་དེ་ཡང་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ།

ལ་ལ་ན་རེ་གྲོང་ཁྱེར་བཅོམ་བརླག་འདི་འབྱོར་ཅིང་རྒྱས་ལ་ལོ་ལེགས་པ་དང་བདེ་བ་དང་ལྡན་པ།

སྐྱེ་བོ་མང་པོ་དང་མིས་ཀུན་ཏུ་གང་བ་ཡིན་པས།

རྒྱལ་པོ་ལག་བཟངས་སྡེ་དཔའ་བའི་བདག་པོའི་རྒྱལ་པོའི་ཕོ་བྲང་དེ་ནི་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་རྒྱལ་པོ་དེ་ནི་ལོག་པར་ལྟ་བའི་རིགས་ཀྱི་རྒྱུད་དུ་སྐྱེས་པ་སྟེ།

མི་རྒོད་དང་འདྲ་བའི་རྒྱལ་པོ་ཡིན་པས་བྱང་ཆུབ་སེམས་དཔའ་སྲིད་པ་ཐ་མ་པ་ནི་ལོག་པར་ལྟ་བའི་རིགས་སུ་སྐྱེ་བར་མི་

རིགས་ཏེ།

དེའི་ཕྱིར་དེ་ཡང་ཚུལ་དང་འཐུན་པ་མ་ཡིན་ནོ་ཞེས་ཟེར་རོ།

ལ་ལ་ན་རེ་གྲོང་ཁྱེར་ཧསྟི་ན་པུ་ར་འདིའི་རྒྱལ་པོ་ནི་སྐྱ་བསེང་གི་བུའི་རིགས་ཀྱི་རྒྱུད་ལས་སྐྱེས་པ།

དཔའ་ཞིང་རྟུལ་ཕོད་པ་དང་ལྡན་པ།

ཡན་ལག་མཆོག་གི་གཟུགས་ཕུན་སུམ་ཚོགས་པ་གཞན་གྱི་སྡེ་འཇོམས་པ་སྟེ།

རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་ཡིན་ནོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

འདི་ལྟར་སྐྱ་བསེང་གི་བུའི་རིགས་སུ་སྐྱེས་པ་དག་གིས་ནི་རིགས་ཀྱི་རྒྱུད་རྣམ་པར་འཁྲུགས་པར་བྱས་ཏེ།

གཡུལ་ངོར་བརྟན་པ་ལ་ནི་ཆོས་ཀྱི་བུ་ཞེས་ཟེར།

འཇིགས་སྡེ་ལ་ནི་རླུང་གི་བུ་ཞེས་ཟེར།

སྲིད་སྒྲུབ་ལ་ནི་དབང་པོའི་བུ་ཞེས་ཟེར།

རིགས་མེད་དང་ལྷར་བཅས་ལ་ནི་ཐ་སྐར་གྱི་བུ་ཞེས་ཟེར་ཏེ།

དེའི་ཕྱིར་རིགས་དེ་ཡང་བྱང་ཆུབ་སེམས་དཔའ་དེ་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ།

ལ་ལ་ན་རེ་གྲོང་ཁྱེར་བཅོམ་བརླག་འདི་ནི་ཤིན་ཏུ་ཡང་ཉམས་དགའ་ཞིང་ཕན་ཚུན་འབྱོར་གྱི་སྟེང་དུ་རྒྱལ་པོ་བཟང་པོའི་བཤེས་གཉེན་བཞུགས་པའི་ས་ཡང་ཡིན་ལ།

རྒྱལ་པོ་དེ་ཡང་གླང་པོ་དང་།

རྟ་དང་།

ཤིང་རྟ་དང་།

དཔུང་བུ་ཆུང་དང་།

དཔུང་གི་ཚོགས་མང་པོ་དང་ལྡན་པ།

གསེར་དང་།

དངུལ་དང་།

ནོར་བུ་དང་།

མུ་ཏིག་དང་།

བཻ་དཱུརྱ་དང་།

དུང་དང་།

མན་ཤེལ་དང་།

བྱི་རུ་དང་།

ས་ལེ་སྦྲམ་དང་།

ནོར་དང་།

ཡོ་བྱད་ཤིན་ཏུ་མང་བ།

རྒྱལ་པོ་དང་བློན་པོ་ཐམས་ཅད་ཀྱི་ཟིལ་གྱིས་མི་ནོན་པའི་སྟོབས་དང་།

ཕ་རོལ་གནོན་པ་དང་ལྡན་པ།

མཛའ་བ་དང་ལྡན་ཞིང་ཆོས་ལ་དགའ་བ་སྟེ།

རིགས་དེ་ནི་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་སུ་རུང་ངོ་ཞེས་ཟེར་རོ།

ལ་ལ་ན་རེ་དེ་ཡང་ཚུལ་དང་འཐུན་པ་མ་ཡིན་ཏེ།

དེ་ཅིའི་ཕྱིར་ཞེ་ན།

རྒྱལ་པོ་བཟང་པོའི་བཤེས་གཉེན་ཡོན་ཏན་དེ་ལྟ་བུ་དང་ལྡན་པ་དེ་ཡོད་མོད་ཀྱི།

དེ་ནི་ཤིན་ཏུ་རྒས་པས་བུ་སྐྱེད་པའི་མཐུ་ཡང་མེད་ལ།

བུའང་མང་བས་དེའི་ཕྱིར་རིགས་དེ་ཡང་བྱང་ཆུབ་སེམས་དཔའ་དེ་ཡུམ་གྱི་ལྷུམས་སུ་འཇུག་པའི་གནས་ཀྱི་འོས་མ་ཡིན་ནོ་ཞེས་ཟེར་རོ།

དེ་ལྟར་བྱང་ཆུབ་སེམས་དཔའ་དེ་དག་དང་ལྷ་དེ་དག་གིས་འཛམ་བུའི་གླིང་གི་ཡུལ་ཆེན་པོ་བཅུ་དྲུག་པོ་ཐམས་

ཅད་ན།

རྒྱལ་པོའི་རིགས་མཐོན་པོ་མཐོན་པོ་གང་ཇི་སྙེད་ཅིག་ཡོད་པ།

དེ་དག་ཐམས་ཅད་ལ་བལྟས་ན་ཐམས་ཅད་ཀྱང་ཉེས་པ་དང་བཅས་པར་མཐོང་སྟེ།

དེ་དག་དེ་ལྟར་སེམས་པའི་ཡིད་ལ་བྱེད་པའི་ཚེ།

ལྷའི་བུ་ཡེ་ཤེས་ཏོག་གི་རྒྱལ་མཚན་ཞེས་བྱ་བ་བྱང་ཆུབ་ལས་ཕྱིར་མི་ལྡོག་པ་ཐེག་པ་ཆེན་པོ་འདི་ལ་ངེས་པར་གྱུར་པ་ཞིག་ཡོད་པ་དེས་བྱང་ཆུབ་སེམས་དཔའི་འཁོར་དང་།

ལྷའི་འཁོར་ཆེན་པོ་ཡོད་པ་དེ་དག་ལ་འདི་སྐད་ཅེས་སྨྲས་སོ།

གྲོགས་པོ་དག་ཚུར་ཤོག །

བྱང་ཆུབ་སེམས་དཔའ་དེ་ཉིད་ཀྱི་དྲུང་དུ་དོང་སྟེ།

རིགས་རིན་པོ་ཆེ་ཡོན་ཏན་ཇི་ལྟ་བུར་ཕུན་སུམ་ཚོགས་པ་ཞིག་ཏུ་སྲིད་པ་ཐ་མ་པའི་བྱང་ཆུབ་སེམས་དཔའ་སྐྱེ་བར་འགྱུར་བ་དྲིའོ་ཞེས་སྨྲས་པ་དང་།

ལེགས་སོ་ཞེས་ཏེ།

དེ་དག་ཐམས་ཅད་ཀྱང་ཐལ་མོ་སྦྱར་ནས་བྱང་ཆུབ་སེམས་དཔའི་དྲུང་དུ་ཕྱིན་ཏེ་དྲིས་པ།

སྐྱེས་བུ་དམ་པ་རིགས་རིན་པོ་ཆེ་ཡོན་ཏན་ཕུན་སུམ་ཚོགས་པ་ཇི་ལྟ་བུ་ཞིག་ཏུ་བྱང་ཆུབ་སེམས་དཔའ་སྲིད་པ་ཐ་མ་པ་སྐྱེ་བར་འགྱུར།

དེ་ནས་བྱང་ཆུབ་སེམས་དཔའས་བྱང་ཆུབ་སེམས་དཔའི་ཚོགས་ཆེན་པོ་དང་།

ལྷའི་ཚོགས་ཆེན་པོ་དེ་དག་ལ་རྣམ་པར་བལྟས་ཏེ་འདི་སྐད་ཅེས་སྨྲས་སོ།

གྲོགས་པོ་དག་བྱང་ཆུབ་སེམས་དཔའ་སྲིད་པ་ཐ་མ་པ་གང་དུ་སྐྱེ་བར་འགྱུར་བའི་རིགས་དེ་ནི་རྣམ་པ་དྲུག་ཅུ་རྩ་བཞི་ཕུན་སུམ་ཚོགས་པ་ཡིན་ཏེ།

དྲུག་ཅུ་རྩ་བཞི་གང་ཞེ་ན།

འདི་ལྟ་སྟེ།

རིགས་དེ་ནི་བཙུན་པ་ཡིན།

རིགས་དེ་ནི་ཀུན་གྱིས་མངོན་པར་ཤེས་པ་ཡིན།

རིགས་དེ་ནི་ཕྲན་ཚེགས་མེད་ཅིང་གནོད་པར་བྱེད་པ་མེད་པ་ཡིན།

རིགས་དེ་ནི་རྒྱུད་ཕུན་སུམ་ཚོགས་པ་ཡིན།

རིགས་དེ་ནི་ཆོ་འབྲང་ཕུན་སུམ་ཚོགས་པ་ཡིན།

རིགས་དེ་ནི་སྐྱེས་བུ་ཟུང་ཕུན་སུམ་ཚོགས་པ་ཡིན།

རིགས་དེ་ནི་སྔོན་གྱི་སྐྱེས་བུ་ཟུང་ཕུན་སུམ་ཚོགས་པ་ཡིན།

རིགས་དེ་ནི་བཙུན་པའི་སྐྱེས་བུ་ཟུང་ཕུན་སུམ་ཚོགས་པ་ཡིན།

རིགས་དེ་ནི་ཀུན་གྱིས་མངོན་པར་ཤེས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན།

རིགས་དེ་ནི་དབང་ཆེ་བར་གྲགས་པའི་སྐྱེས་བུ་ཟུང་ཕུན་སུམ་ཚོགས་པ་ཡིན།

རིགས་དེ་ནི་སྐྱེས་པ་མང་བ་ཡིན།

རིགས་དེ་ནི་བུད་མེད་མང་བ་ཡིན།

རིགས་དེ་ནི་འཇིགས་པ་མེད་པ་ཡིན།

རིགས་དེ་ནི་དམན་པ་མེད་ཅིང་ཞུམ་

པ་མེད་པ་ཡིན།

རིགས་དེ་ནི་བརྐམ་པ་མེད་པ་ཡིན།

རིགས་དེ་ནི་ཚུལ་ཁྲིམས་དང་ལྡན་པ་ཡིན།

རིགས་དེ་ནི་ཤེས་རབ་དང་ལྡན་པ་ཡིན།

རིགས་དེ་ནི་བློན་པོས་བལྟ་ཞིང་ལོངས་སྤྱོད་ལ་སྤྱོད་པ་ཡིན།

རིགས་དེ་ནི་བཟོ་དོན་ཡོད་པས་བཤམས་ཤིང་ལོངས་སྤྱོད་ལ་སྤྱོད་པ་ཡིན།

རིགས་དེ་ནི་མཛའ་བ་བརྟན་པ་ཡིན།

རིགས་དེ་ནི་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་ཀྱི་སྲོག་ལ་ལྟ་བ་ཡིན།

རིགས་དེ་ནི་བྱས་པ་གཟོ་བ་དང་ལྡན་པ་ཡིན།

རིགས་དེ་ནི་བརྟུལ་ཞུགས་ཤེས་པ་ཡིན།

རིགས་དེ་ནི་འདུན་པས་མི་འགྲོ་བ་ཡིན།

རིགས་དེ་ནི་ཞེ་སྡང་གིས་མི་འགྲོ་བ་ཡིན།

རིགས་དེ་ནི་གཏི་མུག་གིས་མི་འགྲོ་བ་ཡིན།

རིགས་དེ་ནི་འཇིགས་པས་མི་འགྲོ་བ་ཡིན།

རིགས་དེ་ནི་ཁ་ན་མ་ཐོ་བས་འཇིགས་པ་ཡིན།

རིགས་དེ་ནི་གཏི་མུག་ལ་མི་གནས་པ་ཡིན།

རིགས་དེ་ནི་ལག་སྦབས་ཆེ་བ་ཡིན།

རིགས་དེ་ནི་བྱ་བ་ལ་མོས་པ་ཡིན།

རིགས་དེ་ནི་གཏོང་བ་ལ་མོས་པ་ཡིན།

རིགས་དེ་ནི་སྦྱིན་པ་ལ་མོས་པ་ཡིན།

རིགས་དེ་ནི་ཞོ་ཤ་ཤེས་པ་ཡིན།

རིགས་དེ་ནི་རྩལ་བརྟན་པ་ཡིན།

རིགས་དེ་ནི་མཐུ་རྩལ་དང་ལྡན་པ་ཡིན།

རིགས་དེ་ནི་རྩལ་མཆོག་དང་ལྡན་པ་ཡིན།

རིགས་དེ་ནི་དྲང་སྲོང་མཆོད་པ་ཡིན།

རིགས་དེ་ནི་ལྷ་མཆོད་པ་ཡིན།

རིགས་དེ་ནི་མཆོད་རྟེན་མཆོད་པ་ཡིན།

རིགས་དེ་ནི་མཚུན་རྗེད་པ་ཡིན།

རིགས་དེ་ནི་ཁོན་དུ་འཛིན་པ་མེད་པ་ཡིན།

རིགས་དེ་ནི་ཕྱོགས་བཅུར་སྒྲ་གྲགས་པ་ཡིན།

རིགས་དེ་ནི་འཁོར་ཆེན་པོ་དང་ལྡན་པ་ཡིན།

རིགས་དེ་ནི་འཁོར་མི་ཕྱེད་པ་དང་ལྡན་པ་ཡིན།

རིགས་དེ་ནི་བླ་ན་མེད་པའི་འཁོར་དང་ལྡན་པ་ཡིན།

རིགས་དེ་ནི་རིགས་ཀྱི་ནང་ན་གཙོ་བོར་བྱ་བ་ཡིན།

རིགས་དེ་ནི་རིགས་ལ་དབང་ཐོབ་པ་ཡིན།

རིགས་དེ་ནི་དབང་ཆེ་བར་གྲགས་པ་ཡིན།

རིགས་དེ་ནི་ཕར་འཛིན་པ་ཡིན།

རིགས་དེ་ནི་མར་འཛིན་པ་ཡིན།

རིགས་དེ་ནི་དགེ་སྦྱོང་དུ་འཛིན་པ་ཡིན།

རིགས་དེ་ནི་བྲམ་ཟེར་འཛིན་པ་ཡིན།

རིགས་དེ་ནི་ནོར་དང་འབྲུའི་བང་མཛོད་མང་བ་ཡིན།

རིགས་དེ་ནི་དབྱིག་དང་།

གསེར་དང་།

ནོར་བུ་དང་།

མུ་ཏིག་དང་།

བཻ་དཱུརྱ་དང་།

དུང་དང་།

མན་ཤེལ་དང་།

བྱི་རུ་དང་།

ས་ལེ་སྦྲམ་དང་།

དངུལ་དང་།

རྫས་དང་།

ཡོ་བྱད་མང་བ་ཡིན།

རིགས་དེ་ནི་གླང་པོ་ཆེ་དང་།

རྟ་དང་།

རྔ་མོ་དང་།

བ་ལང་དང་།

ལུག་ཤིན་ཏུ་མང་བ་ཡིན།

རིགས་དེ་ནི་བྲན་ཕོ་དང་།

བྲན་མོ་དང་།

ལས་བྱེད་པ་དང་།

ཞོ་ཤས་འཚོ་བ་ཤིན་ཏུ་མང་བ་ཡིན།

རིགས་དེ་ནི་ཐུབ་པར་དཀའ་བ་ཡིན།

རིགས་དེ་ནི་དོན་ཐམས་ཅད་གྲུབ་པ་ཡིན།

རིགས་དེ་ནི་འཁོར་ལོས་སྒྱུར་བའི་རིགས་ཀྱི་རྒྱུད་དུ་སྐྱེས་པ་ཡིན།

རིགས་དེ་ནི་སྔོན་གྱི་དགེ་བའི་རྩ་བའི་གྲོགས་ཀྱིས་བསྐྱེད་པ་ཡིན།

རིགས་དེ་ནི་བྱང་ཆུབ་སེམས་དཔའི་རིགས་སུ་རིགས་བཙུན་པར་སྐྱེས་པ་ཡིན།

རིགས་དེ་ནི་འཇིག་རྟེན་ལྷ་དང་བཅས་པ།

བདུད་དང་བཅས་པ།

ཚངས་པ་དང་བཅས་པ།

དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པའི་ནང་ན་རིགས་ལས་སྨོས་པའི་སྐྱོན་གྱིས་ཁ་ན་མ་ཐོ་བ་ཐམས་ཅད་དང་བྲལ་བ་སྟེ།

གྲོགས་པོ་དག་གང་དུ་བྱང་ཆུབ་སེམས་དཔའ་སྲིད་པ་ཐ་མ་པ་འབྱུང་བར་འགྱུར་བའི་རིགས་དེ་ནི་རྣམ་པ་དྲུག་ཅུ་རྩ་བཞི་པོ་དེ་དག་དང་ལྡན་པ་ཡིན་ནོ།

གྲོགས་པོ་དག་སྲིད་པ་ཐ་མ་པའི་བྱང་ཆུབ་སེམས་དཔའ་བུད་མེད་གང་གི་མངལ་དུ་འཇུག་པར་འགྱུར་བའི་བུད་མེད་དེ་ནི་ཡོན་ཏན་གྱི་རྣམ་པ་སུམ་ཅུ་རྩ་གཉིས་དང་ལྡན་པ་ཡིན་ཏེ།

སུམ་ཅུ་རྩ་གཉིས་གང་ཞེ་ན།

འདི་ལྟ་སྟེ།

བྱང་ཆུབ་སེམས་དཔའ་སྲིད་པ་ཐ་མ་པ་ནི་ཀུན་གྱིས་མངོན་པར་ཤེས་པའི་བུད་མེད་ཀྱི་མངལ་དུ་འཇུག་གོ།

ཀུན་གྱིས་མངོན་པར་རིག་པ་དང་།

སྤྱོད་པ་ལ་གླགས་མི་ཐོད་པ་དང་།

རིགས་ཕུན་སུམ་ཚོགས་པ་དང་།

ཆོ་འབྲང་ཕུན་སུམ་ཚོགས་པ་དང་།

གཟུགས་ཕུན་སུམ་ཚོགས་པ་དང་།

མིང་ཕུན་སུམ་ཚོགས་པ་དང་།

ཆུ་ཞེང་ཕུན་སུམ་ཚོགས་པ་དང་།

སྔན་ཆད་མ་བཙས་པ་དང་།

ཚུལ་ཁྲིམས་ཕུན་སུམ་ཚོགས་པ་དང་།

གཏོང་བ་ཕུན་སུམ་ཚོགས་པ་དང་།

བཞིན་འཛུམ་པ་དང་།

འཐུན་པར་འཛིན་པ་དང་།

གསལ་བ་དང་།

དུལ་བ་དང་།

འཇིགས་པ་མེད་པ་དང་།

མང་དུ་ཐོས་པ་དང་།

མཁས་པ་དང་།

སྒྱུ་མེད་པ་དང་།

གཡོ་མེད་པ་དང་།

མི་ཁྲོ་བ་དང་།

ཕྲག་དོག་མེད་པ་དང་།

སེར་སྣ་མེད་པ་དང་།

མི་རྒོད་པ་དང་།

མི་གཡེང་བ་དང་།

ཅ་ཅོ་མེད་པ་དང་།

བཟོད་ཅིང་དེས་པ་དང་ལྡན་པ་དང་།

ངོ་ཚ་ཤེས་ཤིང་ཁྲེལ་ཡོད་པ་དང་།

འདོད་ཆགས་དང་།

ཞེ་སྡང་དང་།

གཏི་མུག་གི་ཤས་ཆུང་བ་དང་།

བུད་མེད་ཀྱི་སྐྱོན་དང་བྲལ་བ་དང་།

ཁྱིམ་ཐབ་ཀྱི་བརྟུལ་ཞུགས་དང་ལྡན་པ་དང་།

ཡོན་ཏན་ཐམས་ཅད་ཕུན་སུམ་ཚོགས་པའི་བུད་མེད་ཀྱི་མངལ་དུ་བྱང་ཆུབ་སེམས་དཔའ་སྲིད་པ་ཐ་མ་པ་འཇུག་གོ།

གྲོགས་པོ་དག་བྱང་ཆུབ་སེམས་དཔའ་སྲིད་པ་ཐ་མ་པ་བུད་མེད་གང་གི་མངལ་དུ་འཇུག་པའི་བུད་མེད་དེ་ནི་ཡོན་ཏན་གྱི་རྣམ་པ་སུམ་ཅུ་རྩ་གཉིས་པོ་དེ་དག་དང་ལྡན་པ་ཡིན་ནོ།

གྲོགས་པོ་དག་བྱང་ཆུབ་སེམས་དཔའ་ནི་ཟླ་བ་མར་གྱི་ངོ་ལ་མའི་མངལ་དུ་མི་འཇུག་གི །

བྱང་ཆུབ་སེམས་དཔའ་སྲིད་པ་ཐ་མ་པ་ནི་ཟླ་བ་ཡར་གྱི་ཚེས་བཅོ་ལྔའི་ཟླ་བ་ཉ་སྟེ་རྒྱས་པ་ལ་སྐར་མ་རྒྱལ་དང་ལྡན་པའི་ཚེ།

མ་གསོ་སྦྱོང་བླངས་པའི་མངལ་དུ་འཇུག་གོ།

དེ་ནས་བྱང་ཆུབ་སེམས་དཔའ་དེ་དག་དང་།

ལྷའི་བུ་དེ་དག་གིས་བྱང་ཆུབ་སེམས་དཔའ་ལས་རིགས་ཡོངས་སུ་དག་པ་དང་།

མ་ཡོངས་སུ་དག་པའི་རྣམ་པ་དེ་ལྟ་བུ་དེ་དག་ཐོས་ནས་འདི་སྙམ་དུ་སེམས་ཏེ།

སྐྱེས་བུ་དམ་པ་འདིས་རྣམ་པ་ཇི་སྙེད་དུ་བསྟན་པ་དེ་ལྟ་བུའི་ཡོན་ཏན་དང་ལྡན་པའི་རིགས་དེ་གང་ཞིག་ལ་ཡོད་སྙམ་དུ་སེམས་སོ།

དེ་ལྟར་སེམས་ཤིང་ཡིད་ལ་བྱེད་པ་ལ་ཞུགས་པ་ན་དེ་དག་འདི་སྙམ་དུ་སེམས་ཏེ།

ཤཱཀྱའི་གྲོང་ཁྱེར་འདི་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང་ལྡན་ཏེ།

ཉམས་དགའ་ཞིང་སྐྱེ་བོ་མང་པོ་དང་མིས་གང་བ་ཡིན་ལ།

རྒྱལ་པོ་ཟས་གཙང་མ་ཡང་མའི་རྒྱུད་ཀྱིས་དག་པ།

ཕའི་རྒྱུད་ཀྱིས་དག་པ།

ཆུང་མ་དག་པ་དང་ལྡན་པ།

ལས་ཀྱི་མཐའ་ལ་ཉོན་མོངས་པ་མེད་པ།

དཔེ་བྱད་བཟང་བ།

ཤིན་ཏུ་མཛངས་པ།

བསོད་ནམས་ཀྱི་གཟི་བརྗིད་དང་ལྡན་པ།

གྲགས་པ་ཆེན་པོའི་རིགས་སུ་སྐྱེས་པ།

འཁོར་ལོས་སྒྱུར་བའི་རིགས་ཀྱི་རྒྱུད་དུ་སྐྱེས་པ།

ནོར་དང་།

གཏེར་དང་།

རིན་པོ་ཆེ་དཔག་ཏུ་མེད་པ་དང་ལྡན་པ།

ལས་ཡོད་པར་ལྟ་བ།

སྡིག་པའི་ལྟ་བ་མེད་པ།

ཤཱཀྱའི་ཡུལ་ཀུན་ན་ཡང་རྒྱལ་པོ་དེ་གཅིག་པུར་ཟད་དེ།

ཚོང་དཔོན་དང་།

ཁྱིམ་བདག་དང་།

བློན་པོ་དང་།

འཁོར་གྱི་མི་ཐམས་ཅད་ཀྱིས་རིམ་གྲོར་བྱ་ཞིང་མཆོད་པ།

མཛེས་པ།

བལྟ་ན་སྡུག་པ།

ཧ་ཅང་ཡང་མི་རྒན་ཧ་ཅང་ཡང་མི་གཞོན་ཞིང་གཟུགས་མཛེས་ལ་ཡོན་ཏན་ཐམས་ཅད་དང་ལྡན་པ།

བཟོ་ཤེས་པ།

དུས་ཤེས་པ།

བདག་ཤེས་པ།

ཆོས་ཤེས་པ།

སེམས་ཅན་ཤེས་པ།

འཇིག་རྟེན་ཤེས་པ།

མཚན་ཤེས་པ།

ཆོས་ཀྱི་རྒྱལ་པོ་ཆོས་

ཀྱིས་རྗེས་སུ་སྟོན་པའོ།

སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ནི་སེམས་ཅན་དགེ་བའི་རྩ་བ་བསྐྱེད་པ་རྣམས་ཀྱི་གནས་ཏེ།

གང་དག་དེར་སྐྱེས་པར་གྱུར་པ་དེ་དག་ཀྱང་དེ་དང་སྐལ་བ་འདྲ་བ་དག་གོ།

རྒྱལ་པོ་ཟས་གཙང་མ་དེ་ལ་ལྷ་མོ་སྒྱུ་འཕྲུལ་ཞེས་བྱ་བ་ཤཱཀྱའི་བདག་པོ་ཤིན་ཏུ་ལེགས་པར་རྟོགས་པ་ཞེས་བྱ་བའི་བུ་མོ་ཞིག་ཡོད་པའང་ཕྱུག་ཅིང་གཞོན་ཞིང་དར་ལ་བབ་པའི་གཟུགས་ཕུན་སུམ་ཚོགས་པ་སྔན་ཆད་མ་བཙས་པ།

བུ་དང་བུ་མོ་མེད་པ།

གཟུགས་མཛེས་པ།

བུ་དོན་ལ་བྲིས་པ་ལྟར་བལྟ་ན་སྡུག་པ།

ལྷའི་བུ་མོ་ལྟར་རྒྱན་ཐམས་ཅད་ཀྱིས་བརྒྱན་པ།

བུད་མེད་ཀྱི་སྐྱོན་རྣམས་དང་བྲལ་བ།

བདེན་པར་སྨྲ་བ།

མི་དྲག་པ།

མི་བརླངས་པ།

མི་གཅོར་བ།

ཁ་ན་མ་ཐོ་བ་མེད་པ།

གྱོ་མོའི་སྒྲ་ལྟ་བུ་མེད་པ།

ཅ་ཅོ་མེད་པ།

འཇམ་ཞིང་སྙན་ལ་ཡིད་དུ་འོང་བར་སྨྲ་བ།

མི་དེས་པ་དང་།

ཁོང་ཁྲོ་བ་དང་།

ང་རྒྱལ་དང་།

དྲེགས་པ་དང་།

རྒྱགས་པ་དང་།

ཁྲོ་བ་མེད་པ།

ཕྲག་དོག་མེད་པ།

དུས་སུ་སྨྲ་བ།

གཏོང་བ་ཕུན་སུམ་ཚོགས་པ།

ཚུལ་ཁྲིམས་དང་ལྡན་པ།

ཁྱོས་ཆོག་པར་འཛིན་པ།

ཁྱིམ་ཐབ་ཀྱི་བརྟུལ་ཞུགས་ཅན།

སྐྱེས་པ་གཞན་ལ་བསམ་པའི་ཡིད་ལ་བྱ་བ་དང་བྲལ་བ།

མགོ་དང་།

རྣ་བ་དང་།

སྣ་གནས་སུ་ཕེབས་པ།

བུང་བའི་མཆོག་གི་ཁ་དོག་ལྟ་བུའི་སྐྲ་དང་ལྡན་པ།

དཔྲལ་བ་ལེགས་པ།

སྨིན་ཚུགས་ལེགས་པ།

ཁྲོ་གཉེར་མེད་པ།

བཞིན་འཛུམ་པ།

གསོང་པོར་སྨྲ་བ།

འཇམ་ཞིང་སྙན་པའི་ཚིག་དང་ལྡན་པ།

འཐུན་པར་འཛིན་པ།

དྲང་བ།

གྱ་གྱུ་མེད་པ།

སྒྱུ་མེད་པ།

གཡོ་མེད་པ།

ཁྲེལ་ཡོད་ཅིང་ངོ་ཚ་ཤེས་པ།

མི་རྒོད་པ།

མི་གཡེང་བ།

ཁ་ངན་མི་སྨྲ་བ།

འཆལ་པའི་ཚིག་མེད་པ།

འདོད་ཆགས་དང་།

ཞེ་སྡང་དང་།

གཏི་མུག་གི་ཤས་ཆུང་བ།

ངང་དེས་ཤིང་བཟོད་པ་དང་ལྡན་པ།

རྐང་ལག་དང་།

མིག་དང་།

བློ་ཤིན་ཏུ་བསྲུངས་པ།

རྐང་ལག་ཤིན་ཏུ་འཇམ་པ།

ཀ་ཙ་ལིན་དའི་གོས་ལྟར་རེག་ན་བདེ་བ།

པད་མ་གཞོན་ནུའི་འདབ་མ་ལྟར་མིག་ཤིན་ཏུ་རྣམ་པར་དག་པ།

སྣ་དབྱིབས་ལེགས་ཤིང་མདོག་སྡུག་པ།

ཡན་ལག་ཤིན་ཏུ་བརྟན་པ།

འཇའི་དབྱིབས་ལྟར་ཤིན་ཏུ་འདུད་པ།

ཡན་ལག་

དང་།

ཉིང་ལག་ཤིན་ཏུ་འབྱེས་པ།

ཡན་ལག་ལ་སྨད་དུ་མེད་པ།

མཆུ་བིམ་པ་ལྟར་དམར་བ།

བལྟ་ན་མཛེས་པ།

མགུལ་རིམ་བཞིན་དུ་འདུག་པ།

རྒྱན་དམ་པ་དང་ལྡན་པ།

སྣ་མའི་མེ་ཏོག་དང་བཱར་ཤི་ཀ་ལྟར་སོ་ཤིན་ཏུ་རྣམ་པར་དག་པ།

ཕྲག་པ་ལེགས་པར་བྱིན་གྱིས་འཚམ་པ།

རིམ་གྱིས་ལེགས་པར་གྲུབ་པའི་དཔུང་པ་དང་ལྡན་པ།

རྐེད་པ་གཞུའི་ཆང་ཟུངས་ལྟར་ཕྲ་བ།

གཞོགས་ཉམས་པ་མེད་པ།

ལྟེ་བ་ཁུང་ཟབ་པ།

སྟ་ཟུར་འཇམ་ཞིང་ཡངས་ལ་ཟླུམ་ཞིང་བརྟན་པར་གྲུབ་པ།

རྡོ་རྗེ་ལྟར་མཁྲེགས་ཤིང་མཚུངས་པ་མེད་པའི་ལུས་དང་ལྡན་པ།

གླང་པོའི་སྣ་ལྟར་མཉམ་ཞིང་ལེགས་པའི་བརླ་དང་ལྡན་པ།

བྱིན་པ་རི་དགས་ཨེ་ན་ཡའི་ལྟ་བུ།

ལག་པ་དང་རྐང་པའི་མཐིལ་རྒྱ་སྐྱེགས་ཀྱི་ཁུ་བ་ལྟར་འདུག་པ།