經部第54卷（མདོ་སྡེ་ཐ་པ་བཞུགས་སོ།།）

རྒྱ་གར་སྐད་དུ།

ཨཱརྱ་མ་ཧཱ་པ་རི་ནིརྦཱ་ཎ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་ཡོངས་སུ་མྱ་ངན་ལས་འདས་པ་ཆེན་པོ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་གྲོང་ཁྱེར་ཀུ་ཤི་ན།

ཆུ་ཀླུང་གསེར་ལྡན་གྱི་འགྲམ།

གྱད་ཀྱི་ཉེན་ཀོར་ཤིང་སཱ་ལ་ཟུང་གི་ཚལ་ན་བཞུགས་ཏེ།

དེ་ན་བཅོམ་ལྡན་འདས་དགེ་སློང་བྱེ་བ་འབུམ་ཕྲག་བརྒྱད་ཅུས་བསྐོར་ཅིང་མདུན་གྱིས་བལྟས་ཏེ།

དཔྱིད་ཟླ་ཐ་ཆུངས་ཟླ་བ་ཉ་བའི་ནང་པར་ཡོངས་སུ་མྱ་ངན་ལས་འདའ་བའི་དུས་དང་ཉེ་བར་གྱུར་པ་ན།

སེམས་ཅན་ཐམས་ཅད་ཀྱི་རང་རང་གི་ཡུལ་གྱི་སྐད་དུ་ཤིན་ཏུ་ཟུར་ཕྱིན་པར་དོན་བརྡ་སྤྲོད་པའི་ཚིག་རྣམས་ཀྱིས།

སྲིད་པའི་རྩེ་མོ་མན་ཆད་གོ་བར་མཛད་དེ།

དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་ལ་ཐུགས་བརྩེ་བ་ཅན།

འཇིག་རྟེན་ཐམས་ཅད་

སྐྱོབ་པ།

སེམས་ཅན་ཐམས་ཅད་ལ་སྒྲ་གཅན་ཟིན་དང་འདྲ་བར་གཟིགས་པ་སྐྱབས་ཆེན་པོའི་གནས་དང་གཞི་བོར་གྱུར་པ་ཐུབ་པ་ཆེན་པོ་ཡོངས་སུ་མྱ་ངན་ལས་འདའ་བར་འགྱུར་རོ་ཞེས་བཀའ་སྩལ་ཏེ།

སེམས་ཅན་ཐམས་ཅད་ཀྱི་ཞུ་བ་ལུང་བསྟན་པ་ཐ་མལ་དེ་ལྟ་བུའི་གསུང་རྣམས་བྱུང་བར་གྱུར་ཏོ།

གཞན་ཡང་དེའི་ཚེ་བཅོམ་ལྡན་འདས་ཉིད་ཀྱི་ཞལ་ནས་འོད་ཟེར་སྣ་ཚོགས་འདི་ལྟ་སྟེ།

སྔོན་པོ་དང་།

སེར་པོ་དང་།

དམར་པོ་དང་།

དཀར་པོ་དང་།

ཤེལ་གྱི་ཁ་དོག་དང་།

རྡོའི་སྙིང་པོའི་ཁ་དོག་ལྟ་བུ་དག་བྱུང་སྟེ།

འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ།

སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་དང་།

ལྷ་མ་ཡིན་དང་།

གཤིན་རྗེའི་འཇིག་རྟེན་གྱི་སེམས་ཅན་དེ་དག་ལ་ཕོག་ནས།

དེའི་མོད་ལ་ཉོན་མོངས་པའི་མུན་པ་ཐམས་ཅད་དང་།

ངན་སོང་དང་།

མི་ཁོམ་པ་ཐམས་ཅད་རྒྱུན་ཆད་པར་གྱུར་ཏོ།

དེ་ནས་མྱ་ངན་ཆེན་པོས་ནོན་ཏེ་ཚིག་འཐུན་པར་ཀྱེ་མ་ཁེབས་སོ་ཁེབས་སོ་ཞེས་ཀྱང་ཟེར་ཏོ།

ཀྱི་ཧུད་ཀྱི་ཧུད་ཅེས་ཀྱང་སྐད་ཆེར་འབོད་ཅིང་ལག་པ་བརྐྱང་བས་ཀྱང་མགོ་བོ་ལ་རྡོབས་ཤིང་ལུས་འདར་ཞིང་ཤིན་ཏུ་ངུའོ།

དེའི་ཚེ་ས་ཆེན་པོ་ནགས་ཚལ་དང་བཅས་རི་དང་བཅས་པའི་རྒྱ་མཚོའི་མཐས་གཏུགས་པ་ཡང་རབ་ཏུ་གཡོས་ཏེ།

སེམས་ཅན་དེ་དག་ཀྱང་གཅིག་ལ་གཅིག་འཛིན་ཅིང་འདི་སྐད་དུ་གྲོགས་པོ་དག་རིངས་གྲོགས་པོ་དག་རིངས།

གྱད་ཡུལ་གྱི་གྲོང་ཁྱེར་ཀུ་ཤིར་འདོང་ངོ་འདོང་ངོ་།

དེ་བཞིན་གཤེགས་པའི་ཞབས་ལ་ཕྱག་འཚལ་ཏེ།

ཡོངས་སུ་མྱ་ངན་ལས་འདའ་བར་གཤེགས་པ་ལས་བཟློག་ལ་བསྒྲིམ་མི་དགོས་པར་

བསྐལ་པའམ་བསྐལ་པ་ལས་ལྷག་པར་ཡང་བཞུགས་པར་གསོལ་བ་གདབ་བོ་ཞེས་ཟེར་ཏོ།

གཅིག་ལ་གཅིག་འཇུས་ནས་འདི་སྐད་དུ།

ཀྱེ་མ་འཇིག་རྟེན་སྟོངས་པར་འགྱུར་རོ།

ཀྱེ་མ་འཇིག་རྟེན་སྟོངས་པར་འགྱུར་རོ།

ཀྱེ་མ་སེམས་ཅན་རྣམས་ཀྱི་བསོད་ནམས་ཀྱི་ལས་ཀྱི་རྣམ་པར་སྨིན་པ་ནི་ཟད་དོ།

ལས་མི་བཟད་པ་ནི་བྱུང་ངོ་།

ཚེ་དང་ལྡན་པ་དག་མྱུར་ཅིག །

ཚེ་དང་ལྡན་པ་དག་མྱུར་ཅིག །

དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་དེང་གི་ཡུད་ཙམ་འདི་ལ་ཡོངས་སུ་མྱ་ངན་ལས་འདའ་བར་འགྱུར་རོ།

ཀྱེ་མ་འཇིག་རྟེན་སྟོངས་པར་འགྱུར་རོ།

ཀྱེ་མ་འཇིག་རྟེན་སྟོངས་པར་འགྱུར་རོ།

དེ་བཞིན་གཤེགས་པ་མི་བཞུགས་ན།

བདག་ཅག་མགོན་མེད་པ་དང་།

རྩ་ལག་མེད་པ་དང་།

ཕོངས་པར་ཇི་ལྟར་འགྱུར་ཞིག་གུ།

བདག་ཅག་གི་ཐེ་ཚོམ་དང་སོམ་ཉི་ཅི་དང་ཅི་ཡོད་པ་དེ་དང་དེ་དག་ཞུ་བར་བྱའོ་ཞེས་ཀྱང་ཟེར་ཏོ།

ཉན་ཐོས་ཆེན་པོ་འདི་དག་ཀྱང་དེ་ན་འཁོད་དེ།

འདི་ལྟ་སྟེ།

གནས་བརྟན་ཀཱ་ཏྱཱ་ཡ་ན་ཆེན་པོ་དང་།

གནས་བརྟན་བཀྐུ་ལ་དང་།

གནས་བརྟན་ཉེ་དགའ་བོ་དང་།

དེ་དག་ལ་སོགས་པ་གཞན་དག་ཀྱང་དེ་ན་འཁོད་དེ།

དེ་དག་ལ་འོད་ཟེར་གྱིས་ཕོག་ནས།

འདར་རབ་ཏུ་འདར།

དམ་དམ་རབ་ཏུ་དམ་དམ།

འཁྲུགས་རབ་ཏུ་འཁྲུགས།

བརྟབས་རབ་ཏུ་བརྟབས།

འུར་འུར་རབ་ཏུ་འུར་འུར།

འཁམས་རབ་ཏུ་འཁམས།

རྨུགས་རབ་ཏུ་རྨུགས།

རེངས་རབ་ཏུ་རེངས་ཏེ།

དེ་དག་ལ་སོགས་པ་དག་ཏུ་གྱུར་ནས་ཆས་སོ།

དེའི་ཚེ་དགེ་སློང་ས་ཡ་ཕྲག་བརྒྱད་སོ་ཤིང་ཟོས་ནས་ཕྱིར་བྱུང་སྟེ།

གནས་བརྟན་དེ་དག་ལ་འོད་ཟེར་གྱི་སྣང་བ་དེས་ཕོག་ནས་ཤིན་ཏུ་རིངས་པར་ཁ་གདོང་བཀྲུས་ཏེ་གཅིག་ལ་གཅིག་འཇུས་སོ།

དེ་བཞིན་གཤེགས་པའི་སྲས་དེ་དག་ཐམས་ཅད་ཀྱང་དགྲ་བཅོམ་པ།

དབང་ཐོབ་པ།

བྱ་བ་བྱས་པ།

བྱེད་པ་བྱས་པ།

ཅང་ཤེས་པ།

གཙོ་བོ་ཆེན་པོ།

ཆེན་པོ་སྟོང་པ་ཉིད་ཀྱིས་རང་གི་དོན་ཐོབ་པ།

ཙན་དན་ཆེན་པོ་ལྟ་བུའི་གཡོག་འཁོར་དང་ལྡན་པ།

སེང་གེ་ལྟ་བུའི་གཡོག་འཁོར་དང་ལྡན་པ་ཤ་སྟག་སྟེ།

དེ་ལ་

སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་དེ་དག་ཐམས་ཅད་སྔ་དྲོ་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས།

མིག་ནི་མཆི་མ་ཁྲག་ལྟ་བུས་གང་སྟེ།

མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས།

སེམས་ཅན་ཐམས་ཅད་ལ་ཕན་པ་དང་བདེ་བ་དང་སྙིང་བརྩེ་བའི་ཕྱིར་དང་།

གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ།

སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་འབུམ་བསྐོར་བ་བྱས་ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ།

དེའི་ཚེ་ཀོ་ཏ་ཀའི་བུ་མོ་རབ་བཟངས་མ་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་ཐམས་ཅད་ཀྱང་དགྲ་བཅོམ་པ།

ཟག་པ་ཟད་པ།

དབང་ཐོབ་པ།

བྱ་བ་བྱས་པ།

བྱེད་པ་བྱས་པ།

ཁུར་བོར་བ།

ཉོན་མོངས་པ་མེད་པ།

གཙོ་མོ་ཆེན་མོ།

ཆེན་པོ་སྟོང་པ་ཉིད་ཀྱིས་རང་གི་དོན་ཐོབ་པ་ཤ་སྟག་སྟེ།

འདི་ལྟ་སྟེ།

ཀོ་ཏ་ཀའི་བུ་མོ་དགེ་སློང་མ་རབ་བཟངས་མ་དང་།

དགེ་སློང་མ་ཉེ་དགའ་མོ་དང་།

དགེ་སློང་མ་རྒྱ་མཚོ་བློ་གྲོས་དང་།

དེ་ལ་སོགས་པ་དགེ་སློང་མ་བྱེ་བ་འབུམ་ཕྲག་དྲུག་སྔ་དྲོ་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས།

མིག་ནི་མཆི་མ་ཁྲག་ལྟ་བུས་གང་སྟེ།

མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས།

སེམས་ཅན་ཐམས་ཅད་ལ་ཕན་པ་དང་།

བདེ་བ་དང་།

སྙིང་བརྩེ་བའི་ཕྱིར་དང་།

གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ།

སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་འབུམ་བསྐོར་བ་བྱས་

ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ།

འཁོར་དེ་ན་དགེ་སློང་མ་འཁོད་པ་རྣམས་ཀྱང་བྱང་ཆུབ་སེམས་དཔའ་མི་མཆོག་ས་བཅུ་ཐོབ་པ་ཤ་སྟག་སྟེ།

གདུལ་བའི་དབང་གི་ཕྱིར་བུད་མེད་ཀྱི་གཟུགས་དང་།

བུད་མེད་ཀྱི་དབྱིབས་དང་།

ཤ་དང་།

ཁྲག་དང་།

རྒྱུས་པ་མང་པོ་དང་རུས་པའི་ལུས་འཆང་བ།

རྟག་ཏུ་ཚད་མེད་པ་བཞི་བསྒོམ་པ་དང་ལྡན་པ།

བདག་ཉིད་ཀྱིས་སངས་རྒྱས་ཀྱི་ཡུལ་གྱི་ཆོ་འཕྲུལ་ཆེན་པོའི་དོན་བྱེད་ནུས་པ་ཤ་སྟག་གོ།

གཞན་ཡང་དེའི་ཚེ་བྱང་ཆུབ་སེམས་དཔའ་རྒྱ་མཚོས་བྱིན་ལ་སོགས་པ་བྱང་ཆུབ་སེམས་དཔའ་གང་གཱའི་ཀླུང་གི་བྱེ་མ་སྙེད་ཐམས་ཅད་ཀྱང་མི་མཆོག་ས་བཅུ་ཐོབ་པ།

ཐབས་ཀྱིས་ལུས་འཆང་བ་ཤ་སྟག་ལ་འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོས་བྱིན་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་།

དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་།

ཐེག་པ་ཆེན་པོ་ཐོས་པར་འདོད་པ།

ཐེག་པ་ཆེན་པོ་ལ་ཞུགས་པ།

ཐེག་པ་ཆེན་པོས་བཀྲེས་པ།

ཐེག་པ་ཆེན་པོ་ལ་སྲེད་པ།

ཐེག་པ་ཆེན་པོ་ལ་སེར་སྣ་མེད་པ།

འཇིག་རྟེན་ཐམས་ཅད་དང་འཐུན་པར་བྱེད་ནུས་པ་ཤ་སྟག་དང་།

བདག་ཅག་རྒལ་ནས་གཞན་བསྒྲལ་བར་བྱའོ་སྙམ་སྟེ།

སྔོན་གྱི་བསྐལ་པ་བྱེ་བ་སྙེད་དུ་ཚུལ་ཁྲིམས་ཀྱི་བཀོད་པའི་དམ་བཅའ་བ་ལེགས་པར་བླངས་པ།

འཛིན་པའི་སྤྱད་པ་སྤྱོད་པ་ཤ་སྟག་དང་།

དེ་བཞིན་དུ་བདག་ཅག་གྲོལ་ནས་གཞན་དགྲོལ་བར་བྱའོ་སྙམ་པ་དང་།

དེ་བཞིན་དུ་དཀོན་མཆོག་གསུམ་གྱི་གདུང་མི་འཆད་པར་བྱའོ་སྙམ་པ་དང་།

ཆོས་ཀྱི་འཁོར་ལོ་བསྐོར་བར་བྱའོ་སྙམ་པ་དང་།

གོ་ཆ་ཆེན་པོ་བགོ་བར་བྱའོ་སྙམ་དུ་སེམས་པ་ཤ་སྟག་དང་།

དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ་དང་།

བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙོམས་པར་ལྟ་བ་ཤ་སྟག་སྟེ།

དེ་དག་ཐམས་ཅད་སྔ་དྲོའི་ཉི་མ་འཆར་ཀར་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས།

མིག་ནི་མཆི་མ་ཁྲག་ལྟ་བུས་གང་སྟེ།

མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས་སེམས་ཅན་ཐམས་ཅད་ལ་ཕན་པ་དང་།

བདེ་བ་དང་།

སྙིང་བརྩེ་བའི་ཕྱིར་དང་།

གདུལ་བར་བྱ་བའི་དབང་གི་དོན་དུ།

ཐེག་པ་ཆེན་པོའི་མཆོག་ཏུ་གསང་བ་སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་སྒོའི་ཚུལ་བཤད་པར་བྱ་བའི་ཕྱིར།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་འབུམ་བསྐོར་བ་བྱས་ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ།

ཡང་དེའི་ཚེ་བསླབ་པའི་གཞི་ལྔ་བླངས་ཤིང་།

ཚུལ་ཁྲིམས་དང་།

ཆོ་ག་དང་།

ཡོན་ཏན་དང་ལྡན་པའི་དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ལ་སོགས་པ་དགེ་བསྙེན་གང་གཱའི་ཀླུང་གཉིས་ཀྱི་བྱེ་མ་སྙེད་ཐམས་ཅད་ཀྱང་ཟུང་དང་ཟུང་དུ་ཤེས་པར་འདོད་པ་ཤ་སྟག་སྟེ།

སྡུག་བསྔལ་བ་དང་།

བདེ་བ་དང་།

རྟག་པ་དང་།

མི་རྟག་པ་དང་།

བདག་ཡོད་པ་དང་།

བདག་མེད་པ་དང་།

སྟོང་པ་དང་།

སྟོང་པ་མ་ཡིན་པ་དང་།

དེ་ཁོ་ན་དང་།

དེ་ཁོ་ན་མ་ཡིན་པ་དང་།

སྐྱབས་དང་།

སྐྱབས་མ་ཡིན་པ་དང་།

སེམས་ཅན་དང་།

སེམས་ཅན་མེད་པ་དང་།

བརྟན་པ་དང་།

བརྟན་པ་མ་ཡིན་པ་དང་།

ཞི་བ་དང་།

ཞི་བ་མ་ཡིན་པ་དང་།

འདུས་བྱས་དང་།

འདུས་མ་བྱས་དང་།

ཐེར་ཟུག་དང་།

ཐེར་ཟུག་མ་ཡིན་པ་དང་།

ཡོངས་སུ་མྱ་ངན་ལས་འདས་པ་དང་།

ཡོངས་སུ་མྱ་ངན་ལས་འདས་པ་མ་ཡིན་པ་ལ་སོགས་པའི་ཁྱད་པར་དང་ཁྱད་པར་དུ་འཕགས་པ་ཤེས་པར་འདོད་པ་ཤ་སྟག་སྟེ།

འདི་ལྟ་སྟེ།

དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ཞེས་བྱ་བ་དང་།

དགེ་བསྙེན་རབ་སྦྱིན་ལ་སོགས་པ་དགེ་བསྙེན་ཐེག་པ་ཆེན་པོ་ཐོས་པར་འདོད་ལ།

ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་དམ་བཅས་ཤིང་ཚུལ་ཁྲིམས་བླངས་པ།

ཐེག་པ་ཆེན་པོས་སྐོམ་ལ་ངོམས་ནས་ཀྱང་གཞན་སྐོམ་པ་དག་ངོམས་པར་བྱའོ་སྙམ་དུ་དམ་བཅས་པ།

ཐེག་པ་ཆེན་པོ་ལ་སྲེད་པ།

ཐེག་པ་ཆེན་པོ་ལ་སེར་སྣ་མེད་པ།

འཇིག་རྟེན་ཐམས་ཅད་དང་འཐུན་པར་བྱེད་ནུས་པ་ཤ་སྟག་དང་།

བདག་ཅག་རྒལ་ནས་གཞན་

བསྒྲལ་བར་བྱའོ།

བདག་ཅག་གྲོལ་ནས་གཞན་དགྲོལ་བར་བྱའོ།

དཀོན་མཆོག་གསུམ་གྱི་གདུང་མི་ཆད་པར་བྱའོ།

ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་སློབ་པར་འདོད་པ།

གོ་ཆ་ཆེན་པོ་བགོས་པ།

བསླབ་པ་རྣམས་ལ་སེམས་གུས་པ་དང་།

དེ་བཞིན་དུ་ཡོན་ཏན་གྲངས་མེད་པ་དང་ལྡན་པ།

བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ།

དེ་དག་ཀྱང་ཉི་མ་འཆར་ཀར་དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར་རེ་རེས་ཀྱང་ཙན་དན་དང་།

ཨ་ག་རུ་དང་།

ཐང་ཤིང་གི་མཆོག་དང་།

ཙན་དན་ས་མཆོག་པའི་བུད་ཤིང་རྣམས་དང་།

ཡམ་སྲེག་ཤིང་དྲི་བསུང་དང་ལྡན་པ་ཡོན་ཏན་ཅན་ལྔ་སྟོང་ལྔ་སྟོང་ཁྱེར་ཏེ་འོངས་སོ།

དེ་ལ་ཡམ་སྲེག་ཤིང་སྣ་རེ་ཞིང་ཡང་གསེར་གྱི་སྐུད་པ་རིན་པོ་ཆེ་སྣ་བདུན་རིགས་བདུན་དང་ལྡན་པས་སྤྲས་པས་དཀྲིས་པ།

རི་མོ་ལ་བྲིས་པ་ཁོ་ན་བཞིན་དུ་འདུག་པ།

རང་བཞིན་གྱིས་གཞོན་ཤ་ཅན་ལེགས་པར་བཅོས་པ་ཤ་སྟག་སྟེ།

སྣ་རེ་ཞིང་ཡང་འོད་རྣམ་པ་སྣ་ཚོགས་དང་ལྡན་པའི་ཕུང་པོ་ཆེན་པོ་མདོག་སྔོ་བ་དང་།

བར་བར་ཁ་ཅིག་ཏུ་མདོག་དཀར།

ཁ་ཅིག་ཏུ་སྔོ་སྐྱ།

ཁ་ཅིག་ཏུ་རྩ་དམར།

ཁ་ཅིག་ཏུ་སེར་བ།

མིག་ཏུ་སྡུག་པར་བྱ་བ་ཤ་སྟག་གོ།

བམ་པོ་རེ་རེའི་གཡོགས་མའི་ཕྱར་བུ་ཡང་རིན་པོ་ཆེ་སྣ་བདུན་ལས་བྱས་པ་ཤ་སྟག་གོ །

ཆིངས་མའི་ཐེ་གུ་མང་པོ་རེ་རེ་ཞིང་ཡང་ལྡོང་རོས་ཀྱི་མདོག་ལྟ་བུ་དང་།

ཟར་མའི་མེ་ཏོག་གི་མདོག་ལྟ་བུ་དང་།

སྔོན་པོ་དང་།

སེར་པོ་རྣམས་ཀྱིས་བར་བར་དུ་སྤེལ་བ་ཤ་སྟག་གོ།

དེ་ལ་ཆིངས་མའི་ཐེ་གུ་མང་པོ་རེ་རེ་ཞིང་ཡང་གསེར་ཐགས་ཀྱི་མཆོག་རྣམ་པར་དག་པ།

ཡུལ་མང་པོར་གྲགས་པ་དག་གིས་སྤེལ་བ་ཤ་སྟག་གོ།

དེ་ལ་ཡམ་སྲེག་ཤིང་སྣ་རེ་རེ་ཞིང་ཡང་སྤོས་དྲི་བསུང་ཞིམ་པོ་དང་།

མེ་ཏོག་ཕྲེང་དང་།

གུར་གུམ་གྱི་ཕྱེ་མ་དང་ལྡན་པར་བྱས་པ།

གསེར་ཐགས་ཀྱིས་གཡོགས་པ།

དར་སྣས་བརྒྱན་པ།

རིན་པོ་ཆེ་སྣ་བདུན་གྱི་ཤུབས་སྔོན་པོ་དང་།

སེར་པོ་དང་།

སྔོ་སྐྱ་དང་།

དཀར་པོ་དང་།

བཙོད་ཀ་ལྟ་བུ་དག་གི་ནང་དུ་བཅུག་པ།

ཡུལ་ཀ་ལིང་ཀའི་རས་དང་།

ཟར་མའི་རས་དང་།

ཟབ་དར་དང་།

རྒྱ་དར་གྱི་མཆོག་རྣམས་ཀྱིས་དཀྲིས་པ།

མེ་ཏོག་མང་པོས་བརྒྱན་པ།

བྱུག་པ་དྲི་བསུང་ཞིམ་པོ་དག་གིས་བྱུགས་པ་ཤ་སྟག་གོ།

ཡམ་སྲེག་ཤིང་སྣ་རེའི་ཤིང་རྟ་རེ་རེ་ཞིང་ཡང་རིན་པོ་ཆེ་སྣ་བདུན་གྱིས་བརྒྱན་པ།

གསེར་གྱིས་མཛེས་པར་བྱས་པ་ཁ་ཅིག །

ཁ་ཅིག་ཏུ་སྔོན་པོ་དང་།

དཀར་པོ་དང་།

བབ་ལའི་ཁ་དོག་དང་།

ལི་ཁྲིའི་ཁ་དོག་པས་ལྷག་པའི་འོད་གསལ་བ་དང་ལྡན་པ་ཤ་སྟག་གོ།

ཤིང་རྟ་དེ་དག་གི་གཉའ་ཤིང་རྣམས་ཀྱང་རིན་པོ་ཆེ་སྣ་བདུན་གྱིས་བརྒྱན་པ།

དཔེ་མེད་པ།

རྟ་ཅང་ཤེས་མགྱོགས་པ་དག་དང་སྦྱར་བ་ཤ་སྟག་གོ།

རྟ་དེ་དག་ཀྱང་རླུང་གི་ཤུགས་པས་མགྱོགས་པ།

སྤུ་ཁ་ཆུ་སྐྱར་གྱི་མདོག་དང་།

ལྡོང་རོས་ཀྱི་མདོག་དང་།

སྤྲིན་གྱི་མདོག་ཅན་ཤ་སྟག་སྟེ།

ཐབས་དེ་འདྲ་བའི་ཤིང་རྟ་རེ་རེའི་མདུན་ལོགས་དང་རྒྱབ་ལོགས་སུ་རྒྱལ་མཚན་དང་བ་དན་བསྒྲེང་སྟེ།

རྒྱལ་མཚན་ཐམས་ཅད་ཀྱང་རིན་པོ་ཆེ་ལས་བྱས་པ།

གསེར་གྱི་དྲ་བས་གཡོགས་པ་ཤ་སྟག་གོ།

རྒྱལ་མཚན་གྱི་མདུན་ལོགས་སུ་ཡང་གདུགས་རྩིབས་དང་རྩ་བ་ནོར་བུ་དྲི་མ་མེད་པ་འོད་ཅན་ལས་བྱས་པ།

མུ་ཏིག་གི་ཆུན་པོ་སྤྱངས་པ་ཤ་སྟག་ཁྱེར་རོ།

གདུགས་རེ་རེའི་མདུན་ལོགས་སུ་ཡང་གསེར་གྱི་མེ་ཏོག་ཀུ་མུ་ད་དང་།

ཨུད་པ་ལ་དང་།

པདྨ་དཀར་པོ་སྡོང་བུ་བཻ་དཱུརྱ་ལས་བྱས་པ།

ཟེ་བ་རྡོ་རྗེ་ལས་བྱས་པ།

བུང་བ་མང་པོ་སྐད་འབྱིན་པ།

དྲི་བསུང་ཞིམ་པོ་དང་ལྡན་པ།

ཡིད་དུ་འོང་བ།

འོད་དང་ལྡན་པ།

ཆེ་བ་མང་བ་ཤ་སྟག་དང་།

ལྡ་ལྡི་ཆེན་པོ་ཤ་སྟག་ཁྱེར་རོ།

ལྡ་ལྡི་ཆེན་པོ་རྣམས་ཀྱི་མདུན་དུ་ཡང་བྱང་ཆུབ་སེམས་དཔའི་སྐྱེས་པའི་རབས་ཀྱི་སྤྱོད་པ་རི་མོར་བྲིས་པ་ཆེན་པོ་དག་ཐོགས་སོ།

རི་མོའི་གཟུགས་རེ་རེའི་གློ་གཡས་གཡོན་ནས་ཀྱང་།

ཟློས་གར་གྱི་གར་ཐབས་ཡུལ་དབུས་ནས་བྱུང་བ་རྣམ་པ་སྣ་ཚོགས་བྱེད་དེ།

གར་ཐབས་བྱེད་པ་དེའི་ནང་ན་སིལ་སྙན་རིན་པོ་ཆེ་ལས་བྱས་པའི་རྫ་རྔ་དང་།

ཁར་རྔ་དང་།

རྔ་ཟླུམ་དང་།

པི་བང་དང་།

གླིང་བུ་དང་།

པི་བང་རྒྱུད་གཅིག་པ་དང་།

རྔ་བོ་ཆེ་དང་།

དུང་ལ་སོགས་པ་དག་བརྡུང་ཞིང་འབུད་དོ།

གར་ཐབས་ཀྱི་སིལ་སྙན་དེ་དག་ལས་ཀྱང་ཀྱེ་མ་འཇིག་རྟེན་སྟོངས་པར་འགྱུར་རོ་ཞེས་བྱ་བ་དེ་ལྟ་བུའི་

རྣམ་པ་བརྗོད་ཅིང་གདུང་གདུང་སྐད་དུ་དབྱངས་ལེན་ཏོ།

གར་ཐབས་ཀྱི་སིལ་སྙན་རེ་རེའི་མདུན་དུ་ཡང་མེ་ཏོག་དྲི་ཞིམ་པོ་སྣ་ཚོགས་རྣམ་པར་འཚེར་བ་རྣམས་ཀྱི་ཕྱེ་མས་རིན་པོ་ཆེའི་སྐོན་བུ་ལེགས་པར་བཅོས་པ་གཞོན་ཤ་ཅན་དག་གིས་བཀང་བ་ཤ་སྟག་དང་།

དེ་མ་ཡིན་པའི་སྐོན་བུ་མང་པོ་བལྟ་ན་སྡུག་པ།

གུར་གུམ་གྱི་ཕྱེ་མས་བཀང་བ་མང་པོ་ཤ་སྟག་ཐོགས་སོ།

དེ་དག་གི་མདུན་དུ་ཡང་བཅོམ་ལྡན་འདས་དགེ་སློང་གི་དགེ་འདུན་གྱི་འཁོར་དང་བཅས་པ་ཁྱབ་པར་འགྱུར་བའི་ཞལ་ཟས་དག་ཁྱེར་ཞིང་འདོང་ངོ་།

ཞལ་ཟས་དེ་དག་ཀྱང་བུད་ཤིང་ཙན་དན་དམར་པོ་དང་།

ཨ་ག་རུ་དང་།

ཐང་ཤིང་གི་མེ་ཆུང་ངུས་བཙོས་པ་དང་།

གང་གཱའི་ཀླུང་གི་ཆུས་བཙོས་པ་ཤ་སྟག་སྟེ།

སྐྱུར་བ་དང་།

ལན་ཚྭའི་རོ་དང་།

མངར་བ་དང་།

བསྐ་བ་དང་།

ཚ་བ་དང་།

ཁ་བའི་རོ་དང་ལྡན་པ།

མདངས་སྐྱེད་པ།

ཕན་པར་འགྱུར་བ་ཤ་སྟག་གོ།

སཱ་ལ་ཟུང་གི་དྲུང་གི་ཉེན་ཀོར་ཐམས་ཅད་ཀྱང་གསེར་གྱི་བྱེ་མ་འཇམ་པོས་བདལ་ཏེ།

ག་པུ་ཤའི་རས་དང་།

སྣམ་བུ་དང་།

བཙོས་སྣམ་དང་།

དྲེའུ་རྔོག་དང་།

ཀ་ལིང་ཀའི་རས་དང་།

ཟབ་དར་འཇམ་ཞིང་མདོག་དཀར་བ་རྣམས་ཀྱང་བཏིང་ངོ་།

གྲུབ་པའི་གནས་དེའི་གཞི་དཔག་ཚད་སུམ་ཅུ་རྩ་གཉིས་ཁོ་ར་ཁོར་ཡུག་ཀྱང་གུར་གུམ་གྱིས་བྱུགས་སོ།

བཅོམ་ལྡན་འདས་དགེ་སློང་གི་དགེ་འདུན་དང་བཅས་པའི་སེང་གེའི་ཁྲི་ཆེན་པོ་གསེར་ལས་བྱས་པ།

རིན་པོ་ཆེ་སྣ་བདུན་གྱིས་སྤྲས་ཤིང་སྣང་བར་བྱས་པ།

རི་རབ་ལྟར་ཆེ་ཞིང་འཕང་མཐོ་བ་དག་ཀྱང་བཤམས་སོ།

གཡོགས་མ་ཡང་དེ་དག་གི་རྐྱེན་དུ་འཚམ་པ་ཤ་སྟག་གིས་གཡོགས་ཏེ།

གསེར་གྱི་དྲིལ་བུ་གཡེར་ཀ་སྒྲ་སི་ལི་ལི་དང་།

ཁྲོལ་ཤང་གི་སྒྲ་འབྱུང་བའི་དྲ་བ་ཅན་གྱི་ཡོལ་བ་རྣམས་ཀྱིས་ནི་བསྐོར།

རྒྱ་དར་སྤུ་སྡུག་ཡུག་ཁྱིམ་ཆེན་པོའི་བླ་རེ་རྣམས་ནི་བྲེས།

གདུགས་དཀར་པོ་རྣམས་ཀྱིས་ནི་ཉི་མཚན་བསྒྲིབས།

རྔ་ཡབ་དཀར་པོ་རྣམས་ཀྱིས་ནི་གཡབས།

རྒྱབ་རྟེན་གླང་པོ་ཆེའི་མཆེ་བ་ལ་ཆུ་སྲིན་མ་ཀ་ར་རྟེན་པའི་ཁ་ནས།

ཟླ་བ་ཉ་བའི་འོད་ཟེར་ལྟར་དཀར་བའི་མུ་ཏིག་གི་ཆུན་པོ་འབྱུང་ཞིང་སྤྱངས་པ་དང་ལྡན་པ་

རྣམས་ནི་བཅས།

ས་ཕྱོགས་རྣམས་ནི་མེ་ཏོག་དྲི་ཞིམ་པོའི་སིལ་མས་གཏོར་ཏོ།

དགེ་བསྙེན་དེ་དག་རེ་རེ་ནས་ཀྱང་འདི་སྙམ་དུ་སེམས་ཏེ།

བདག་གིས་སེམས་ཅན་ཐམས་ཅད་ལ་ཟས་འདོད་པ་རྣམས་ལ་ནི་ཟས་སྦྱིན་ནོ།

སྐོམ་འདོད་པ་རྣམས་ལ་ནི་སྐོམ་སྦྱིན་ནོ།

མགོ་བོ་དང་མིག་ལ་སོགས་པ་ཡན་ལག་དང་ཉིང་ལག་ཐམས་ཅད་འདོད་པ་རྣམས་ལ་ཡང་ཇི་ལྟར་འདོད་པ་བཞིན་དུ་སྦྱིན་ནོ།

དབུལ་པོ་དང་།

བཀྲེན་པ་དང་།

ཕོངས་པ་རྣམས་ལ་ཡང་འདོད་པ་དང་།

དུག་དང་།

གནོད་པ་དང་།

མ་བརྟགས་པའི་སྦྱིན་པ་རྣམས་མ་གཏོགས་པར་གང་དང་གང་དག་ཅི་དང་ཅི་འདོད་པ་དེ་དང་དེ་དག་ཆོག་པར་སྦྱར་རོ་སྙམ་དུ་སེམས་ཀྱི།

གཞན་ནི་ཅི་ཡང་མི་སེམས་སོ།

དེ་བཞིན་དུ་དགེ་བའི་བཤེས་གཉེན་གྱི་སྡེ་ཚན།

བྱང་ཆུབ་སེམས་དཔའི་སྤྱོད་པ་ལ་གནས་པ་དེ་དག་ཐམས་ཅད་ཀྱིས་བསམས་པ།

དེ་བཞིན་གཤེགས་པ་ལ་བདག་གིས་བཤོས་གསོལ་ཏེ་ཡོངས་སུ་མྱ་ངན་ལས་འདའ་བར་བྱའོ།

དེ་བཞིན་གཤེགས་པ་ལ་བདག་གིས་བཤོས་གསོལ་ཏེ་ཡོངས་སུ་མྱ་ངན་ལས་འདའ་བར་བྱའོ་སྙམ་སྟེ།

སོ་སོ་ནས་དེ་འབའ་ཞིག་སྙིང་ལ་སེམས་ཤིང་ཡན་ལག་ཐམས་ཅད་ཀྱི་བ་སྤུ་རྒྱ་སྐྱེགས་ཀྱི་ཤིང་གི་མེ་ཏོག་ལྟར་རྩ་དམར་བ་ནི་ལངས།

མིག་ནི་མཆི་མ་ཁྲག་ལྟ་བུས་གང་སྟེ།

མཆོག་ཏུ་སྡུག་བསྔལ་བའི་ཚོར་བ་དང་ལྡན་ནས།

རང་རང་གི་མཆོད་པའི་ཡོ་བྱད་བུད་ཤིང་དང་།

ཡམ་སྲེག་ཤིང་དང་།

ཤིང་རྟ་དང་།

རྒྱལ་མཚན་དང་།

གདུགས་དང་།

བ་དན་རྣམས་དང་ཆས་ཏེ་ཞལ་ཟས་ཀྱི་མཆོག་གིས་སྦྱར་བའི་སྣོད་རྣམས་ཐོགས་ནས།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་སྤོས་དང་།

མེ་ཏོག་ཕྲེང་དང་།

ཕྱེ་མ་དང་།

ཕྱེ་མ་ཞིབ་བུ་དང་།

གདུགས་དང་།

རྒྱལ་མཚན་དང་།

བ་དན་དང་།

བླ་རེ་རྒྱ་ཆེན་པོ་དག་གིས་མཆོད་ནས་ལན་འབུམ་བསྐོར་བ་བྱས་ཏེ།

མིག་ནས་མཆི་མ་རྒྱུན་མི་ཆད་པར་ཆར་བཞིན་དུ་ཕབ་ནས།

བདག་ཉིད་ལ་སྡུག་བསྔལ་གྱི་རྣམ་པ་མང་པོ་བྱེད་ཅིང་།

ཀྱེ་མ་འཇིག་རྟེན་སྟོངས་པར་འགྱུར་

རོ།

ཀྱེ་མ་འཇིག་རྟེན་སྟོངས་པར་འགྱུར་རོ་ཞེས་དེ་སྐད་དུ་སྐད་པོ་ཆེ་འདོན་ཏེ།

དེ་བཞིན་གཤེགས་པའི་ཞབས་དྲུང་ན་སྲོག་ཆགས་ཤི་ཤུ་མ་ར་བཞིན་དུ་འགྲེ་ལྡོག་ཅིང་གསོལ་བ་འདེབས་ཏེ།

བཅོམ་ལྡན་འདས་དེ་བཞིན་གཤེགས་པ་དགེ་སློང་གི་དགེ་འདུན་གྱི་འཁོར་དང་བཅས་པས་བདག་གིས་སྦྱར་བའི་བཤོས་གསོལ་བར་ཅི་གནང་།

བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་སྦྱིན་པའི་ཐ་མ་དེ་བཞིན་གཤེགས་པས་བཞེས་སུ་གསོལ།

ཞེས་གསོལ་བ་འདེབས་སོ།

དེ་ནས་བཅོམ་ལྡན་འདས་ཐམས་ཅད་མཁྱེན་བཞིན་དུ་ཅང་མི་གསུང་བར་གྱུར་ཏོ།

དེ་དག་གིས་ལན་གཉིས་ལན་གསུམ་དུ་དེ་སྐད་ཅེས་གསོལ་ཀྱང་།

ལན་གཉིས་ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏོ།

དེ་ནས་དགེ་བསྙེན་གྱི་ཚོགས་དེ་དག་རེ་ཐག་ཆད་དེ་ཅང་མི་ཟེར་བར་འཁོད་ནས།

བུ་གཅིག་པ་ཤི་ནས་དུར་ཁྲོད་དུ་བོར་མ་ཐག་པའི་ཕ་མ་འགྲེ་ལྡོག་པ་བཞིན་དུ་ཤིན་ཏུ་སྡུག་བསྔལ་བར་གྱུར་ཏོ།

དེ་བཞིན་དུ་དགེ་བསྙེན་དེ་དག་ཐམས་ཅད་མཆོག་ཏུ་སྡུག་བསྔལ་བར་གྱུར་པ་ལས་ལངས་ཏེ།

རང་རང་གི་མཆོད་པའི་ཡོ་བྱད་རྣམས་བསྡུས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་བསླབ་པའི་གཞི་ལྔ་བླངས་ཤིང་།

ཚུལ་ཁྲིམས་དང་།

ཆོ་ག་དང་།

ཡོན་ཏན་དང་ལྡན་པ་དང་།

དམ་པའི་ཆོས་ཀྱི་གཅེས་པ་འཛིན་པའི་དགེ་བསྙེན་མ་ཚོང་དཔོན་གྱི་བུ་མོ་འཚོ་བའི་དཔལ་ལ་སོགས་པ་དགེ་བསྙེན་མ་གང་གཱའི་ཀླུང་གསུམ་གྱི་བྱེ་མ་སྙེད་ཐམས་ཅད་ཀྱང་བུད་མེད་ཀྱི་གཟུགས་ཀྱིས་སེམས་ཅན་བྱེ་བ་ཕྲག་མང་པོ་ངེས་པར་སྒྲོལ་བ།

ཁྱིམ་གྱི་གནས་ལ་སྨོད་པ་ཤ་སྟག་སྟེ།

ལུས་འདི་ནི་ཉེས་པའི་ཁམས་བརྒྱད་ཅུ་རྩ་བཞི་ལས་ལྷགས་པས་བསྡུས་པའོ།

ལུས་འདི་ནི་སྲིན་བུའི་རིགས་བྱེ་བ་ཕྲག་བརྒྱད་ཅུ་རྩ་བཞིའི་ཟས་སོ།

ལུས་འདི་ནི་རྒྱལ་པོའི་ཁྲི་མོན་དུ་བྲུབས་པའི་དྲི་མནམ་པའོ།

ལུས་འདི་ནི་ཁྱི་རོ་རུལ་པའི་དྲི་བམ་གྱིས་ལྷག་པར་སྦགས་པའོ།

ལུས་འདི་ནི་སྒོ་དགུ་ནས་མི་གཙང་བ་འཛག་པའོ།

ལུས་འདི་ནི་ཤ་དང་།

ཆུ་བ་དང་།

རུས་པ་དང་།

ཁྲག་དང་།

པགས་པའི་ཞལ་ཞལ་ཅན།

རྐང་ལག་གི་ཕྱི་སྒོ་དང་།

ར་བ་དང་།

བ་གམ་ཅན།

མིག་གི་སྐར་ཁུང་ཅན།

མགོ་བོའི་ཡང་ཏོག་ཅན།

ཡིད་རྒྱལ་པོ་ལྟ་བུའི་ཕོ་བྲང་གྲོང་ཁྱེར་ལྟ་བུའོ།

ལུས་འདི་ནི་མཁས་པ་ཐམས་ཅད་ཀྱིས་སྤངས་ཤིང་བྱིས་པའི་སྐྱེ་བོ་དགའ་བར་བྱེད་པའི་འདོད་ཆགས་དང་།

ཞེ་སྡང་དང་།

གཏི་མུག་ལ་སོགས་པའི་ཉོན་མོངས་པ་བྱེ་བ་སྙེད་ཀྱི་སྲིན་པོ་བརྟེན་པ།

འདམ་བུ་དང་།

ཨེ་རཎྜ་དང་།

དབུ་བ་དང་།

ཆུ་ཤིང་ལྟ་བུར་སྙིང་པོ་མེད་པ།

གློག་དང་།

རི་གཟར་པོའི་འབབ་ཆུའི་དབའ་རླབས་ལྟར་ཤིན་ཏུ་མི་བརྟན་པའོ།

སྒྱུ་མ་དང་།

སྨིག་རྒྱུ་དང་།

བྲག་ཅ་དང་།

ཟླ་བའི་གཟུགས་བརྙན་ལྟར་སླུ་བར་བྱེད་པ།

རླུང་ཤུགས་དྲག་པོས་རྣམ་པར་དཀྲུགས་པའི་ཆུའི་ཤུགས་ཀྱིས་བརྐོས་པའི་འགྲམ་གྱི་སྡོང་པོ་ལྟར་གཡང་ས་ན་འདུག་པའི་ཆོས་ཅན།

སྤྱང་ཀི་དང་།

ཝ་དང་།

བྱ་རྒོད་དང་།

བྱ་རོག་རྣམས་ཀྱི་ཟས་ཡིན་ན།

སུ་ཞིག་འདི་ལྟ་བུ་འཆང་བ་ལ་དགའ་བར་བྱེད།

རྒྱ་མཚོའི་ཆུ་ཐམས་ཅད་སྐྲའི་རྩེ་མོས་བླངས་ཏེ།

བ་ལང་གི་རྨིག་རྗེས་སུ་བླུགས་པར་ནི་ནུས་སྲིད་ཀྱི།

ལུས་ནད་བཞི་བརྒྱ་རྩ་བཞིས་གཟིར་བ་འདི་སྙིང་པོ་མེད་པའམ།

མི་གཙང་བ་ནི་ཚིག་ཙམ་གྱིས་བསྟན་པར་མི་ནུས་སོ།

ས་ཆེན་པོ་འདི་རྒྱ་ཤུག་གི་འབྲས་བུའི་རུས་པའི་འབྲུ་ཙམ་ཤ་སྟག་ཏུ་བྱས་པའམ།

ཡུངས་འབྲུ་ཙམ་འམ།

རྡུལ་ཕྲ་རབ་ཀྱི་རྡུལ་ཙམ་ཤ་སྟག་ཏུ་བྱས་པས་ནི་ཟད་པར་འགྱུར་ཡང་སྲིད་ཀྱི།

ལུས་འདི་ཡོད་ཀྱི་བར་དུ་འདིའི་ཉེས་དམིགས་ནི་མཐར་ཐུག་པར་མི་འགྱུར་ཏེ།

དེ་བས་ན་དམ་པའི་ཆོས་བསྲུང་བའི་ཕྱིར་འདི་མཆིལ་མ་བཞིན་དུ་དོར་བར་བྱའོ་སྙམ་སྟེ།

འདི་ལྟར་དགེ་བསྙེན་མ་དེ་དག་ཐམས་ཅད་ཆེན་པོ་སྟོང་པ་ཉིད་དང་།

མཚན་མ་མེད་པ་དང་།

སྨོན་པ་མེད་པ་བསྒོམས་པས་སེམས་བསྒོམས་པ་ཤ་སྟག་སྟེ།

འདི་ལྟ་སྟེ།

དགེ་བསྙེན་མ་འཚོ་བའི་དཔལ་ཞེས་བྱ་བ་དང་།

དགེ་བསྙེན་མ་དཔལ་ཕྲེང་ཞེས་བྱ་བ་དང་།

དགེ་བསྙེན་མ་ས་ག་ཞེས་བྱ་བ་དང་།

དེ་ལ་སོགས་པ་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ།

ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་དམ་བཅས་པ།

བསྲུང་བ་ལྷུར་ལེན་

པ།

བུད་མེད་ཀྱི་ལུས་ངན་ནོ་སྙམ་དུ་སྨོད་པ་དང་།

ལུས་སྙིང་པོ་མེད་དོ་སྙམ་དུ་སྨོད་པ་སོ་སོ་ནས་ཤས་ཆེར་སྒོམ་པ་དང་།

འཁོར་བའི་འཁོར་ལོ་གཞིག་གོ་སྙམ་དུ་སེམས་པ་ཤ་སྟག་དང་།

ཐེག་པ་ཆེན་པོས་སྐོམ་ལ་ངོམས་ནས་ཀྱང་གཞན་སྐོམ་པ་དག་ངོམས་པར་བྱའོ་སྙམ་དུ་དམ་བཅས་པ་ཤ་སྟག་དང་།

ཐེག་པ་ཆེན་པོ་ལ་སྲེད་པ།

ཐེག་པ་ཆེན་པོ་ལ་སེར་སྣ་མེད་པ།

འཇིག་རྟེན་ཐམས་ཅད་དང་འཐུན་པར་སློབ་པར་འདོད་པ་དང་།

གྲོལ་ནས་གཞན་དགྲོལ་བར་བྱའོ།

རྒལ་ནས་གཞན་བསྒྲལ་བར་བྱའོ།

དཀོན་མཆོག་གསུམ་གྱི་གདུང་མི་འཆད་པར་བྱའོ།

ཆོས་ཀྱི་འཁོར་ལོ་བསྐོར་བར་བྱའོ་སྙམ་དུ་སློབ་པར་འདོད་པ་ཤ་སྟག་དང་།

གོ་ཆ་ཆེན་པོ་བགོས་པ།

བསླབ་པ་རྣམས་ལ་བརྟུལ་ཞུགས་བརྟན་པ་དང་།

དེ་བཞིན་དུ་ཡོན་ཏན་དུ་མ་དང་ལྡན་པ་དང་།

བུ་གཅིག་པ་ལ་བྱ་བ་བཞིན་དུ་སེམས་ཅན་ཐམས་ཅད་ལ་སྙིང་རྗེ་དང་ལྡན་པ་ཤ་སྟག་སྟེ།

དེ་དག་ཀྱང་ཉི་མ་འཆར་ཀར་ཤིན་ཏུ་རིངས་པར་གཅིག་ལ་གཅིག་འཇུས་ཏེ།

དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར།

ཡམ་སྲེག་ཤིང་དགེ་བསྙེན་ཕ་རྣམས་ཀྱི་ཉིས་འགྱུར་ཁྱེར་བ་ལས་བཅོམ་ལྡན་འདས་ཀྱིས་ཞལ་ཟས་མ་བཞེས་ནས།

བུ་ཤི་བ་བཞིན་དུ་མཆོག་ཏུ་སྡུག་བསྔལ་བར་གྱུར་ཏེ།

ངུས་ནས་ལངས་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལིད་ཙ་བཱི་གཞོན་ནུ་གཙང་མ་དྲི་མ་མེད་པའི་སྙིང་པོ་ལ་སོགས་པ་ཡངས་པ་ཅན་ན་གནས་པའི་ལིད་ཙ་བཱི་གཞོན་ནུ་གྲོང་ཁྱེར་གྱི་ནང་ན་གནས་པ་དང་།

ཕྱི་རོལ་ན་གནས་པ་དང་བཅས་པ་རྣམས་དང་།

འཛམ་བུའི་གླིང་ན་གནས་པའི་རྒྱལ་ཕྲན་བློན་པོ་དང་བཅས་པ་གང་གཱའི་ཀླུང་བཞིའི་བྱེ་མ་སྙེད་ཐམས་ཅད་ཀྱང་དམ་པའི་ཆོས་བསྲུང་བ་ལ་མཁས་པ།

ཚུལ་ཁྲིམས་དང་ཆོ་ག་དང་ཡོན་ཏན་དང་ལྡན་པ།

དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་རྣམས་ཀྱི་སེར་བ་ལྟ་བུར་གྱུར་པ་ཤ་སྟག་ལ།

དེ་དག་ཐམས་ཅད་ཀྱང་འདི་ལྟ་བུར་འདོད་དེ།

བདག་ཅག་གི་ནོར་དང་།

འབྲུའི་ཚོགས་དང་།

མཛོད་དང་།

བང་བའི་ཚོགས་གང་ཡིན་པ་དེ་དག་ཐམས་

ཅད་ནི་བདུད་རྩི་མི་ཟད་པར་བྱ་བ་དང་།

བདུད་རྩི་གནས་པར་བྱ་བའི་ཕྱིར་ཡིན་གྱིས།

བདག་ཅག་གིས་དམ་པའི་ཆོས་ལ་ནན་ཏན་བྱའོ།

དམ་པའི་ཆོས་ལ་སུན་འབྱིན་ཅིང་ལོག་པར་ལྟ་བ་རྣམས་ཀྱི་ལྕེ་གཅད་པར་བྱའོ་ཞེས་ལེགས་པར་དམ་བཅས་པ།

ཚུལ་ཁྲིམས་འཆལ་པ་ཚུལ་ཁྲིམས་ལ་མི་གནས་པ་རྣམས་ནི་གོས་དཀར་པོ་གྱོན་དུ་བཅུག་སྟེ།

ཁྱིམ་པའི་ལས་བྱེད་དུ་གཞུག་གོ་སྙམ་དུ་སེམས་བརྟུལ་བ།

དམ་པའི་ཆོས་སྟུག་པ་ལ་ནི་བླ་མ་བཞིན་དུ་རིམ་གྲོ་བྱའོ་སྙམ་དུ་དམ་བཅས་པ།

དགེ་འདུན་ལ་ཕན་པ་དང་བདེ་བར་གནས་པར་བྱ་བའི་ཡོངས་སུ་རྫོགས་པར་བྱས་ཀྱང་།

དེས་ཆོག་གོ་སྙམ་དུ་སེམས་པ་དང་།

ཐེག་པ་ཆེན་པོ་ཐོས་པར་འདོད་ལ།

ཐོས་ནས་ཀྱང་གཞན་དག་ལ་བསྟན་པར་བྱའོ་སྙམ་དུ་ཡི་དམ་བཅས་པ་ལ་བརྟན་པ་དང་།

དེ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་ཤ་སྟག་སྟེ།

འདི་ལྟ་སྟེ།

ལིད་ཙ་བཱི་གཞོན་ནུ་གཙང་མ་དྲི་མ་མེད་པའི་སྙིང་པོ་ཞེས་བྱ་བ་དང་།

སྒྲིབ་པ་དག་པ་ཞེས་བྱ་བ་དང་།

གང་གཱའི་ཆུ་དྲི་མ་མེད་པས་བྱིན་པ་ཞེས་བྱ་བ་དང་།

དེ་ལ་སོགས་པ་ལིད་ཙ་བཱི་གཞོན་ནུ་དེ་དག་ཀྱང་གཅིག་ལ་གཅིག་འཇུས་ཏེ།

རེ་རེས་ཀྱང་གདུང་ཞུགས་ལ་བཞེན་པའི་བུད་ཤིང་ཐང་ཤིང་གི་མཆོག་དང་།

ཙན་དན་དང་།

ཨ་ག་རུ་རྣམས་དང་།

ཡམ་སྲེག་ཤིང་བྱེ་བ་ཕྲག་བརྒྱད་ཅུ་རྩ་བཞི་དང་།

མཆོད་པ་སྔ་མའི་ཉིས་འགྱུར་རྣམས་ཁྱེར་ནས་མཆོད་པ་རྣམས་བསྒྲགས་ཏེ།

བཅོམ་ལྡན་འདས་ཀྱི་ཐད་དུ་དོང་ངོ་།

ལིད་ཙ་བཱི་གཞོན་ནུ་རེ་རེ་ལ་ཡང་གླང་པོ་ཆེ་བརྒྱད་ཁྲི་བཞི་སྟོང་དང་།

རྟ་བརྒྱད་ཁྲི་བཞི་སྟོང་དང་།

ཤིང་རྟ་བརྒྱད་ཁྲི་བཞི་སྟོང་དང་།

ནོར་བུ་ཆུ་ཤེལ་བརྒྱད་ཁྲི་བཞི་སྟོང་དང་ཆས་སོ།

གླང་པོ་ཆེ་རེ་རེའི་མདུན་དུ་ཡང་།

ཆེ་བ་ལ་འོས་པའི་གདུགས་དང་།

རྒྱལ་མཚན་དང་།

བ་དན་དང་།

དར་གྱི་བླ་རེ་ཆེན་པོ་རྣམས་ཐོགས་སོ།

གདུགས་རྣམས་ཀྱི་ནང་ན་ཐུང་ངུ་གང་ཡིན་པ་དེ་ལ་ཡང་།

ཁོ་ར་ཁོར་ཡུག་ཏུ་དཔག་ཚད་གཅིག་ཡོད་དོ།

དར་གྱི་བླ་རེ་ཆེན་པོ་རྣམས་ཀྱི་ནང་ན་ཆུང་ངུ་གང་ཡིན་པ་དེ་ལ་ཡང་ཆུ་ཞེང་དུ་དཔག་

ཚད་སུམ་ཅུ་རྩ་གཉིས་ཡོད་དོ།

རྒྱལ་མཚན་རྣམས་ཀྱི་ནང་ན་ཐུང་ངུ་གང་ཡིན་པ་དེ་ལ་ཡང་འཕང་དུ་དཔག་ཚད་བརྒྱ་ཡོད་དོ།

བ་དན་རྣམས་ཀྱི་ནང་ན་ཐུང་ངུ་གང་ཡིན་པ་དེས་ཀྱང་དཔག་ཚད་སྟོང་དུ་ཕྱིན་ཏོ།

དེ་ལྟར་དེ་དག་མཆོད་པ་རྣམས་དང་བཅས་ཏེ་བཅོམ་ལྡན་འདས་ཀྱི་ཐད་དུ་དོང་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

ཞལ་ཟས་ཕུལ་བ་ལས་བཅོམ་ལྡན་འདས་ཅང་མི་གསུང་སྟེ།

མ་བཞེས་ནས་མཆོག་ཏུ་སྡུག་བསྔལ་བར་གྱུར་ཏེ།

རེ་ཐག་ཆད་ནས་ལངས་ཏེ་བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་འཕགས་ཏེ་འཁོད་དོ།

གཞན་ཡང་དེའི་ཚེ་འཛམ་བུ་གླིང་པའི་བློན་པོ་དང་།

ཚོང་དཔོན་དང་།

ཁྱིམ་བདག་གང་གཱའི་ཀླུང་ལྔའི་བྱེ་མ་སྙེད་ཐམས་ཅད་ཀྱང་ཐེག་པ་ཆེན་པོ་ལ་དད་པ།

ཚུལ་ཁྲིམས་དང་།

ཆོ་ག་དང་།

ཡོན་ཏན་རྣམ་པར་དག་པ་དང་ལྡན་པ།

དམ་པའི་ཆོས་སུན་འབྱིན་པ་རྣམས་ཀྱི་སེར་བ་ལྟ་བུར་གྱུར་པ་ཤ་སྟག་སྟེ།

འདི་ལྟ་སྟེ།

ཁྱིམ་བདག་གི་རྒྱལ་པོ་རྣམ་པར་སྣང་བྱེད་ཅེས་བྱ་བ་དང་།

འགྲོ་བ་སྐྱོང་ཞེས་བྱ་བ་དང་།

ཆོས་སྐྱོང་ཞེས་བྱ་བ་དང་།

དེ་ལ་སོགས་པ་དག་ཀྱང་དེའི་ཚེ་དེར་ལྷགས་ཏེ།

དེ་དག་ཐམས་ཅད་ཀྱིས་ཀྱང་རང་རང་གི་མཆོད་པས་མཆོད་པ་སྔ་མ་རྣམས་ཟིལ་གྱིས་མནན་ནས།

བཅོམ་ལྡན་འདས་ལ་མཆོད་པ་ཆེན་པོའི་ཚོགས་ཀྱིས་མཆོད་ནས་ཞལ་ཟས་མ་བཞེས་པའི་ཕྱིར།

མཆོག་ཏུ་སྡུག་བསྔལ་བར་གྱུར་ཏེ།

རེ་ཐག་ཆད་ནས་ལངས་ཏེ་བཅོམ་ལྡན་འདས་ཀྱི་མཐུས་ཏ་ལ་བདུན་གྱི་སྲིད་ཙམ་དུ་འཕགས་ཏེ་འཁོད་དོ།

གཞན་ཡང་དེའི་ཚེ་རྒྱལ་པོ་མ་སྐྱེས་དགྲ་མ་གཏོགས་པར་ཡངས་པ་ཅན་གྱི་རྒྱལ་པོ་ཟླ་བ་དྲི་མ་མེད་པའི་སྙིང་པོ་གྲོང་ཁྱེར་གྱི་ནང་ན་གནས་པ་དང་།

ཕྱི་རོལ་ན་གནས་པའི་གཡོག་འཁོར་དང་བཅས་པ་ལ་སོགས་པ་འཛམ་བུ་གླིང་ཐམས་ཅད་ཀྱི་གྲོང་ཁྱེར་དང་།

རི་ཁྲོད་ཀྱི་གྲོང་དང་།

ཡུལ་པོ་ཆེ་དང་།

ཁ་ལུངས་ཀྱི་རྒྱལ་པོ་གང་གཱའི་ཀླུང་དྲུག་གི་བྱེ་མ་སྙེད་དང་ལྷན་ཅིག་ཏུ་དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ།

རྒྱལ་པོ་དེ་རྣམས་རེ་རེ་ལ་ཡང་དམག་འཁྲུག་ས་ཡ་ཕྲག་བཅྭ་བརྒྱད་

བཅྭ་བརྒྱད་ཡོད་དོ།

དེ་དག་ལ་གླང་པོ་ཆེ་རྟག་ཏུ་འགྲམ་པ་ནས་རྔུལ་འཛག་པ་དག་དང་།

རྟ་རླུང་གི་ཤུགས་པས་ལྷག་པར་མགྱོགས་པ་དག་ཀྱང་ཡོད་དོ།

དེ་དག་གི་མཆོད་པའི་ཡོ་བྱད་གང་ཡིན་པ་དེ་དག་ཀྱང་མཆོད་པའི་ཡོ་བྱད་སྔ་མ་དེ་དག་ལས་ཉིས་འགྱུར་གྱིས་ཆེས་བཟང་ལ་ཆེས་མང་སྟེ།

དེ་ལྟ་བུའི་མཆོད་པའི་ཕུལ་དག་ཁྱེར་ནས།

དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་སོ།

དེ་དག་གི་མཆོད་པ་དེ་རྣམས་ཀྱི་ནང་ན་གདུགས་ཐུང་ངུ་གང་ཡིན་པ་དེ་ཡང་དཔག་ཚད་བརྒྱད་ཅུ་ཆུ་ཞེང་གབ་པར་འདུག་གོ།

བ་དན་གྱི་ནང་ན་ཆུང་ངུ་གང་ཡིན་པས་ཀྱང་དཔག་ཚད་བརྒྱ་སྟོང་དུ་ཕྱིན་ཏོ།

རྒྱལ་མཚན་ཕལ་པ་གང་ཡིན་པ་དེ་ལ་ཡང་འཕང་དུ་དཔག་ཚད་སུམ་ཅུ་ཡོད་དོ།

དེ་ལྟར་ཡངས་པ་ཅན་གྱི་རྒྱལ་པོ་ཟླ་བ་དྲི་མ་མེད་པའི་སྙིང་པོ་དང་།

ཉི་འོད་ཅེས་བྱ་བ་དང་།

དེ་ལ་སོགས་པ་རྒྱལ་པོ་རྣམས་ཉི་མ་འཆར་ཀར་ལྷགས་ཏེ།

དེ་དག་ཀྱང་དམ་པའི་ཆོས་སུན་འབྱིན་ཅིང་རྟགས་ཅན་འཆལ་པ་རྣམས་ཀྱི་སེར་བ་ལྟ་བུར་གྱུར་པ།

མཐུས་ཀྱང་སེམས་ཅན་རྣམས་དམ་པའི་ཆོས་ལ་འགོད་པར་བྱེད་པ་དང་།

བདག་ཅག་གི་ནོར་དང་།

འབྲུའི་ཚོགས་དང་།

མཛོད་དང་།

བང་བའི་ཚོགས་གང་ཡིན་པ་དེ་དག་ནི་དམ་པའི་ཆོས་གནས་པར་བྱ་བའི་ཕྱིར་རོ་སྙམ་དུ་སེམས་པ་ཤ་སྟག་དང་།

བདག་ཅག་གིས་དམ་པའི་ཆོས་ལ་ནན་ཏན་བྱའོ།

དམ་པའི་ཆོས་སུན་འབྱིན་པ་རྣམས་ཀྱི་ལྕེ་ནི་དྲུང་ནས་གཅད་དོ་ཞེས་དམ་བཅས་པ་བརྟན་པོར་བྱས་པ་ཤ་སྟག་དང་།

ཐེག་པ་ཆེན་པོ་འདོད་པ་དང་།

འཇིག་རྟེན་ཐམས་ཅད་ལ་སྙིང་བརྩེ་བ་ཤ་སྟག་སྟེ།

དེ་དག་གི་མཆོད་པ་རྣམས་ཀྱིས་ཡངས་པ་ཅན་ནས་གྲོང་ཁྱེར་ཀུ་ཤིའི་བར་ཐམས་ཅད་ཀུན་ཏུ་གང་བར་གྱུར་ཏོ།

དེ་དག་གི་གདུགས་ཀྱི་གྲིབ་མ་འདབ་ཆགས་སུ་འདུག་པས་ནི་ཉི་མའི་འོད་ཀྱིས་མི་ཕོག་གོ།

དེ་དག་གི་ཁ་ཟས་ཀྱི་དྲི་བསུང་གིས་ནི་དཔག་ཚད་བཞིར་ཁྱབ་པར་གྱུར་ཏེ།

དེ་དག་གིས་བཅོམ་ལྡན་འདས་ལ་རང་རང་གིས་སྦྱར་བའི་ཞལ་ཟས་བཞེས་པར་ལན་གསུམ་གྱི་བར་དུ་གསོལ་བ་བཏབ་ཀྱང་།

ཞལ་ཟས་མ་

བཞེས་ནས་ཡིད་མི་དགའ་སྟེ།

ལངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་རྒྱལ་པོ་མ་སྐྱེས་དགྲའི་བཙུན་མོ་མ་གཏོགས་པར་ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ལ་སོགས་པ་འཛམ་བུ་གླིང་པའི་རྒྱལ་པོ་དང་།

ཚོང་དཔོན་དང་།

ཁྱིམ་བདག་རྣམས་ཀྱི་ཆུང་མ་གང་གཱའི་ཀླུང་བདུན་གྱི་བྱེ་མ་སྙེད་དང་ལྷན་ཅིག་ཏུ་ལྷགས་ཏེ།

དེ་དག་ཐམས་ཅད་ཀྱང་བུད་མེད་ཀྱི་གཟུགས་ཀྱིས་སེམས་ཅན་མང་པོ་ངེས་པར་སྒྲོལ་བ།

རྟག་ཏུ་ལུས་བསྒོམ་པ་དང་ལྡན་པ།

ཆེན་པོ་སྟོང་པ་ཉིད་དང་།

མཚན་མ་མེད་པ་དང་།

སྨོན་པ་མེད་པས་སེམས་རྣམ་པར་དག་པ་ཤ་སྟག་སྟེ།

འདི་ལྟ་སྟེ།

ཡངས་པ་ཅན་གྱི་རྒྱལ་པོའི་བཙུན་མོ་འཇིག་རྟེན་གསུམ་ན་མཛེས་མ་ཞེས་བྱ་བ་དང་།

བཙུན་མོ་པྲི་ཡང་ཀུ་ཞེས་བྱ་བ་དང་།

དེ་ལ་སོགས་པ་ཐམས་ཅད་ཀྱང་སེམས་ཅན་ཐམས་ཅད་ལ་བུ་གཅིག་པ་ལ་བྱ་བ་བཞིན་དུ་སྙིང་རྗེ་དང་ལྡན་པ་ཤ་སྟག་སྟེ།

གཅིག་ལ་གཅིག་འཇུས་ནས།

དེ་བཞིན་གཤེགས་པའི་གདུང་ཞུགས་ལ་བཞེན་པའི་ཕྱིར།

ཡམ་སྲེག་ཤིང་རྣམས་ཁྱེར་ཏེ།

མཆོད་པ་སྔ་མ་ཐམས་ཅད་རང་རང་གི་མཆོད་པ་རྣམས་ཀྱིས་ཟིལ་གྱིས་མནན་ནས།

བཅོམ་ལྡན་འདས་ལ་ཉིས་འགྱུར་དུ་མཆོད་པ་བྱས་ཏེ།

དེ་དག་གི་མཆོད་པའི་ཡོ་བྱད་རྣམས་ཀྱི་རྒྱལ་མཚན་དང་།

བ་དན་དང་།

གདུགས་རྣམས་ཀྱི་འཕང་དང་ཆུ་ཞེང་གི་ཚད་ཀྱང་སྔ་མའི་ཉིས་འགྱུར་བས་ལྷག་གོ།

ཁ་ཟས་རྣམས་ཀྱི་དྲི་བསུང་ནི་དཔག་ཚད་བརྒྱད་དུ་ཁྱབ་པར་གྱུར་ཏེ།

བཅོམ་ལྡན་འདས་ལ་ཕྱག་འཚལ་ནས་ཞལ་ཟས་བཞེས་པར་གསོལ་བ་བཏབ་ཀྱང་ཞལ་ཟས་མ་བཞེས་ནས།

བཅོམ་ལྡན་འདས་ལ་སྐོར་བ་བྱེད་ཅིང་སྐྲ་འབལ་ལ་རང་རང་གི་རྒྱན་རྣམས་འཐོར་ཞིང་།

སྐད་མི་སྙན་པས་ངུས་ཏེ་བུ་གཅིག་པ་ཤི་བ་བཞིན་དུ་མཆོག་ཏུ་སྡུག་བསྔལ་བར་གྱུར་ནས་བཅོམ་ལྡན་འདས་ཀྱི་མཐུས་སཱ་ལ་ཟུང་གི་དྲུང་ཉིད་དུ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷ་མིག་ཡངས་ཞེས་བྱ་བ་ལ་སོགས་པ་ལྷའི་ཚོགས་གང་གཱའི་ཀླུང་བརྒྱད་ཀྱི་བྱེ་མ་སྙེད་དང་

ལྷན་ཅིག་ཏུ་ལྷགས་ནས།

ལྷ་དེ་དག་གིས་འདི་སྐད་ཅེས་སྨྲས་སོ།

གྲོགས་པོ་དག་ལྟོས།

གྲོགས་པོ་དག་ལྟོས།

མི་རྣམས་ཀྱི་མཆོད་པའི་ཡོ་བྱད་མཆོག་ཏུ་ཁྱད་པར་དུ་འཕགས་ལ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མཆོད་པ་བཀུར་སྟི་ཐམས་ཅད་མཆོད་པར་འདོད་དེ།

མི་རྣམས་ཀྱི་ཞལ་ཟས་ཀྱི་ཐ་མ་བཞེས་པའི་ཕྱིར།

བཅོམ་ལྡན་འདས་ལ་གསོལ་བ་འདེབས་ཀྱིས།

གྲོགས་པོ་དག་བདག་ཅག་གིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱ་ཞིང་ཐ་མའི་དུས་སུ་ཞལ་ཟས་དབུལ་བར་བྱ་ན།

ཇི་ལྟར་བདག་ཅག་གིས་ཕུལ་བའི་ཞལ་ཟས་དེ་བཞིན་གཤེགས་པས་གསོལ་ཏེ།

ཡོངས་སུ་མྱ་ངན་ལས་འདའ་བར་དེ་བཞིན་གཤེགས་པས་མཛད་ཅིག་གུ།

གྲོགས་པོ་དག་སངས་རྒྱས་འབྱུང་བ་ནི་ཤིན་ཏུ་དཀོན་ནོ།

དེ་བས་ཀྱང་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ནི་ཆེས་དཀོན་ནོ།

ཀྱེ་མ་བཅོམ་ལྡན་འདས་ཡོངས་སུ་མྱ་ངན་ལས་འདས་ན་ནི་འཇིག་རྟེན་སྟོངས་པར་འགྱུར་རོ་ཞེས་སྨྲས་སོ།

ལྷ་དེ་དག་ཐམས་ཅད་ཀྱང་ཐེག་པ་ཆེན་པོ་ཐོས་པར་འདོད་ལ།

ཐོས་ནས་ཀྱང་གཞན་དག་ལ་བསྟན་ཏོ་སྙམ་དུ་དམ་བཅས་པ།

ཐེག་པ་ཆེན་པོས་སྐོམ་པ་ངོམས་ནས་ཀྱང་གཞན་སྐོམ་པ་རྣམས་ངོམས་པར་བྱའོ་སྙམ་དུ་དམ་བཅས་པ།

ཐེག་པ་ཆེན་པོ་ལ་སྲེད་པ།

ཐེག་པ་ཆེན་པོ་ལ་སེར་སྣ་མེད་པ།

ཐེག་པ་ཆེན་པོ་ལ་ཕྲག་དོག་དང་།

དུས་ཆེ་བ་དང་།

འཆབ་པ་དང་།

སྒྱུ་མེད་པ།

ཐེག་པ་ཆེན་པོ་སུན་འབྱིན་པའི་སེམས་ཅན་རྣམས་ཀྱི་སེར་བ་ལྟ་བུར་གྱུར་པ།

དམ་པའི་ཆོས་བསྲུང་བའི་ཚུལ་ཁྲིམས་བླངས་པ།

འཇིག་རྟེན་དང་འཐུན་པར་སློབ་པར་འདོད་པ།

བདག་ཅག་རྒལ་ནས་གཞན་བསྒྲལ་བར་བྱའོ།

བདག་ཅག་གྲོལ་ནས་གཞན་དགྲོལ་བར་བྱའོ།

ཆོས་ཀྱི་འཁོར་ལོ་བསྐོར་བར་བྱའོ།

དཀོན་མཆོག་གསུམ་གྱི་གདུང་མི་འཆད་པར་བྱའོ་སྙམ་དུ་སློབ་པར་འདོད་པ།

གོ་ཆ་ཆེན་པོ་བགོས་པ།

བསླབ་པ་རྣམས་ལ་དམ་བཅས་པ་བརྟན་པ་དང་།

དེ་བཞིན་དུ་ཡོན་ཏན་དཔག་ཏུ་མེད་པ་དང་ལྡན་པ།

བུ་གཅིག་པ་ལ་བྱ་བ་བཞིན་དུ་འཇིག་རྟེན་ཐམས་ཅད་ལ་སྙིང་རྗེས་ལྟ་བ་ཤ་སྟག་སྟེ།

དེ་དག་ཀྱང་ཉི་མ་འཆར་ཀར་སྟོན་པ་ཡོངས་སུ་མྱ་ངན་ལས་འདའ་བའི་གདུང་ཞུགས་ལ་བཞེན་པའི་ཕྱིར།

བུད་ཤིང་དང་།

ཡམ་སྲེག་ཤིང་རྣམས་ཁྱེར་ཏེ།

དེ་དག་ཀྱང་སྔ་མས་ཕུལ་བའི་ཡམ་སྲེག་ཤིང་གི་ཉིས་འགྱུར་བས་བཟང་བའི་ལྷ་རྫས་དྲི་བསུང་དང་ལྡན་པ།

ཡིད་དུ་འོང་བ།

མི་ལ་དཀོན་པ་ཤ་སྟག་གོ།

ཤིང་རྟ་ཡང་རྟའི་མཆོག་མགྱོགས་པ་དག་དང་སྦྱར་བ།

དར་ལ་དཀར་པོས་གཡོགས་པ།

གཟུགས་དང་དབྱིབས་རི་མོ་བྲིར་ཡང་མི་ནུས་པ།

དྲིལ་བུ་གཡེར་ཀའི་དྲ་བ་ཅན་གྱི་ཡོལ་བས་བསྐོར་བ།

དར་ཡུག་ཁྱིམ་ཆེན་པོའི་བླ་རེ་རྒྱ་ཆེན་པོ་རྩ་བ་རི་མོ་ཅན་དག་ལ་བཙུགས་པ་དང་།

གར་ཐབས་དང་།

རོལ་མོ་ཡིད་དུ་འོང་བ་རྣམས་ཀྱིས་མདུན་དུ་དྲངས་པ།

ཁ་ཟས་ཞིམ་པོ་མང་པོ་དག་དང་།

སེང་གེའི་ཁྲི་བཻ་དཱུརྱའི་རྒྱབ་རྟེན་རྩེ་མོ་ནོར་བུའི་འོད་ཀྱིས་སྣང་བར་བྱས་པ།

ཞབས་རྟེན་གསེར་ལས་བྱས་པ་དག་ཀྱང་བཤམས་པ་དང་།

ས་ཕྱོགས་ཀྱང་མེ་ཏོག་དྲི་བསུང་ཞིམ་པོ་སྣ་ཚོགས་ཀྱིས་མཛེས་པར་བྱས་པ།

མེ་ཏོག་གི་སིལ་མ་བཀྲམ་ཞིང་བཀོད་པ།

དཔུང་གི་ཚོགས་ཡན་ལག་བཞི་ཕྱི་བཞིན་འབྲང་བ་ཤ་སྟག་སྟེ།

སོ་སོ་ནས་མཆི་མ་ཁྲག་ལྟ་བུ་མི་ཐུབ་ཅིང་མཆོག་ཏུ་སྡུག་བསྔལ་བས་གདུངས་ནས།

སེམས་ཅན་ཐམས་ཅད་ལ་ཕན་པ་དང་།

བདེ་བ་དང་།

སྙིང་བརྩེ་བའི་ཕྱིར་དང་།

གདུལ་བར་བྱ་བའི་དབང་གི་དོན་དུ་ཐེག་པ་ཆེན་པོའི་མཆོག་ཏུ་གསང་བ།

སྟོང་པ་ཉིད་ཀྱི་རྣམ་པ་དགོངས་པའི་ཚིག་རྣམ་པ་སྣ་ཚོགས་ཀྱི་ཆོས་ཀྱི་སྒོའི་ཚུལ་བཤད་པར་བྱ་བའི་ཕྱིར།

བཅོམ་ལྡན་འདས་ཀྱི་ཐད་དུ་དོང་སྟེ།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས།

མཆོད་པ་དང་བཀུར་སྟིའི་མཆོག་རྣམ་པ་མང་པོ་དག་བྱས་ཏེ་བསྐོར་བ་ཡང་བྱས་ནས།

བཅོམ་ལྡན་འདས་ཀྱི་འཁོར་རྣམས་ཀྱི་ཕྱིར་རང་རང་གི་བླ་གོས་ས་ལ་བཏིང་སྟེ།

རང་རང་གི་རྒྱན་རྣམས་ཕོག་ཅིང་གཏོར་ནས་རང་རང་

གི་སྐྲ་འབལ་ཅིང་སྐད་མི་སྙན་པས་ངུ་སྟེ།

བཅོམ་ལྡན་འདས་ལ་ཚིག་འཐུན་པར་འདི་སྐད་ཅེས་གསོལ་ཏོ།

བཅོམ་ལྡན་འདས་ཀྱིས་བདག་གིས་སྦྱར་བའི་བཤོས་གསོལ་ཏེ།

ཡོངས་སུ་མྱ་ངན་ལས་འདའ་བར་མཛད་དུ་གསོལ།

ཞེས་ལན་གཉིས་ལན་གསུམ་དུ་གསོལ་བ་བཏབ་ཀྱང་བཅོམ་ལྡན་འདས་ཀྱིས་མ་བཞེས་ཏེ་ཅང་མི་གསུང་ནས།

དེ་དག་རེ་ཐག་ཆད་དེ་ལངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ཀླུའི་རྒྱལ་པོ་ཕྱོགས་བཞི་ན་གནས་པ་ཀླུའི་རྒྱལ་པོ་ནོར་རྒྱས་ཀྱི་བུ་དང་དགའ་བོ་དང་ཉེ་དགའ་བོ་ལ་སོགས་པ་ཀླུའི་རྒྱལ་པོ་གང་གཱའི་ཀླུང་དགུའི་བྱེ་མ་སྙེད་ཤིན་ཏུ་རིངས་པར་ཉི་མ་འཆར་ཀར་ལྷ་རྣམས་ཀྱི་མཆོད་པ་ལས་ཀྱང་ཉིས་འགྱུར་བས་ལྷག་པའི་མཆོད་པའི་ཡོ་བྱད་རང་རང་གི་འབྱོར་པ་དང་འཚམ་པ་དག་ཁྱེར་ནས།

བཅོམ་ལྡན་འདས་ཀྱི་ཐད་དུ་དོང་སྟེ་ཕྱག་འཚལ་ནས།

ཞལ་ཟས་བཞེས་པར་གསོལ་བ་བཏབ་ཀྱང་བསམ་པ་བཞིན་དུ་མ་གྲུབ་ནས་ལངས་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་རྣམ་ཐོས་ཀྱི་བུ་ལ་སོགས་པ་གནོད་སྦྱིན་གྱི་བདག་པོ་གཡོག་འཁོར་དང་བཅས་པ།

གང་གཱའི་ཀླུང་བཅུའི་བྱེ་མ་སྙེད་གཅིག་ལ་གཅིག་འཇུས་ནས།

རང་རང་གི་མཆོད་པ་རྣམས་ཀྱིས་ཀླུའི་རྒྱལ་པོ་རྣམས་ཀྱི་མཆོད་པ་སྔ་མ་ཟིལ་གྱིས་མནན་ནས།

ཚོགས་ཆེན་པོ་དང་ཆས་ཏེ་ལྷགས་ནས།

བཅོམ་ལྡན་འདས་ལ་ཕྱག་འཚལ་ཏེ་ཞལ་ཟས་བཞེས་པར་གསོལ་བ་བཏབ་ཀྱང་།

བཅོམ་ལྡན་འདས་ཀྱིས་ཞལ་ཟས་མ་བཞེས་ནས་ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ནམ་མཁའ་ལྡིང་གི་རྒྱལ་པོ་དགྲའི་མཛའ་བོ་ཞེས་བྱ་བ་ལ་སོགས་པ་ནམ་མཁའ་ལྡིང་གི་རྒྱལ་པོ་གང་གཱའི་ཀླུང་ཉི་ཤུའི་བྱེ་མ་སྙེད་ཀྱིས།

རང་རང་གི་མཆོད་པས་གནོད་སྦྱིན་གྱི་རྒྱལ་པོ་སྔ་མ་དག་གི་མཆོད་པ་རྣམས་ཟིལ་གྱིས་མནན་ནས།

བཅོམ་ལྡན་འདས་ལ་ཕྱག་འཚལ་ཏེ།

ཞལ་ཟས་བཞེས་པར་གསོལ་བ་བཏབ་ཀྱང་ཞལ་ཟས་མ་བཞེས་ནས།

ཡིད་མི་དགའ་སྟེ་ལངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་དྲི་ཟའི་བདག་པོ་མིས་

བྱིན་གྱི་བུ་ལ་སོགས་པ་དྲི་ཟའི་བདག་པོ་གང་གཱའི་ཀླུང་སུམ་ཅུའི་བྱེ་མ་སྙེད་ཀྱིས་མཆོད་པ་སྔ་མ་ཐམས་ཅད་པས་ཀྱང་ཆེས་མཆོག་ཏུ་གྱུར་པའི་མཆོད་པ་རྣམས་ཁྱེར་ཏེ་འོངས་ནས།

དེ་བཞིན་གཤེགས་པ་ལ་མཆོད་པ་བྱས་ཏེ།

རོལ་མོ་སྙན་དགུ་བྱས་ནས་ཕྱག་འཚལ་ཏེ།

བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་བཏབ་ཀྱང་།

བཅོམ་ལྡན་འདས་ཀྱིས་མ་བཞེས་ནས།

དེ་དག་ཀྱང་ཡིད་མི་དགའ་བར་གྱུར་ཏེ།

ལངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་མི་འམ་ཅིའི་བདག་པོ་ལེགས་མཐོང་ལ་སོགས་པ་མི་འམ་ཅིའི་བདག་པོ་གང་གཱའི་ཀླུང་བཞི་བཅུའི་བྱེ་མ་སྙེད་ལྷགས་ཏེ།

སྔ་མ་རྣམས་ཀྱི་མཆོད་པ་དེ་དག་བསྡོམས་པ་བས་ཀྱང་དེ་དག་རེ་རེའི་མཆོད་པ་ཆེས་ཁྱད་པར་འཕགས་པར་གྱུར་ཏེ།

དེ་དག་ཀྱང་ཞལ་ཟས་མ་བཞེས་ནས།

ཡིད་མི་དགའ་བར་གྱུར་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྟོ་འཕྱེ་ཆེན་པོའི་བདག་པོ་ལེགས་མཐོང་ཆེན་པོ་ལ་སོགས་པ་ལྟོ་འཕྱེ་ཆེན་པོའི་བདག་པོ་གང་གཱའི་ཀླུང་ལྔ་བཅུའི་བྱེ་མ་སྙེད་ཀྱིས་མཆོད་པ་སྔ་མའི་ཉིས་འགྱུར་ཁྱེར་བ་ལས།

སྔ་མ་བཞིན་དུ་ཞལ་ཟས་མ་བཞེས་ནས།

ཡིད་མི་དགའ་སྟེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷ་མ་ཡིན་གྱི་བདག་པོ་བདེ་མཆོག་རིགས་ལ་སོགས་པ་ལྷ་མ་ཡིན་གྱི་བདག་པོ་གང་གཱའི་ཀླུང་དྲུག་ཅུའི་བྱེ་མ་སྙེད་ལུས་ཆེ་ཞིང་སྣང་བ་ཆེན་པོ་དང་ལྡན་པ།

ལྷ་མ་ཡིན་གྱི་བསམ་པ་མེད་པ་ཤ་སྟག་གིས།

མཆོད་པ་སྔ་མའི་ཉིས་འགྱུར་ཉིས་འགྱུར་གྱི་མཆོད་པ་དག་ཁྱེར་ཏེ་འོངས་ཏེ།

བཅོམ་ལྡན་འདས་ལ་ཕྱག་འཚལ་ནས།

ཞལ་ཟས་མ་བཞེས་ཏེ་ཡིད་མི་དགའ་བར་གྱུར་ནས།

ལངས་ཏེ་ཤིང་སཱ་ལ་ཟུང་གི་དྲུང་དུ་རང་རང་གི་གཟི་བྱིན་གྱིས་སྣང་བར་བྱས་ཏེ་འཁོད་དོ།

གཞན་ཡང་དེའི་ཚེ་སྦྱིན་བྱེད་མའི་བུའི་བདག་པོ་གང་གཱའི་ཆུ་དྲི་མ་མེད་པ་རྗེས་བྱིན་ལ་སོགས་པ་སྦྱིན་བྱེད་མའི་བུ་གང་གཱའི་ཀླུང་བདུན་ཅུའི་བྱེ་མ་སྙེད་ལུས་ཆེ་ཞིང་སྣང་བ་ཆེན་པོ་དང་ལྡན་པ།

སྦྱིན་བྱེད་མའི་བུའི་བསམ་པ་མེད་པ་ཤ་སྟག་གིས་མཆོད་པ་སྔ་མ་ཐམས་ཅད་ལས་མཆོད་པ་ཉིས་འགྱུར་ཉིས་

འགྱུར་བས་བཟང་བ་དག་ཁྱེར་བ་ལས།

སྔ་མ་བཞིན་དུ་ཞལ་ཟས་མ་བཞེས་ནས་ཡིད་མི་དགའ་བར་གྱུར་ཏེ།

ཤིང་སཱ་ལ་ཟུང་གི་བར་དུ་རང་རང་གི་གཟི་བརྗིད་ཀྱིས་སྣང་བར་བྱས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་སྲིན་པོའི་བདག་པོ་འཇིགས་བྱེད་ལ་སོགས་པ་སྲིན་པོའི་བདག་པོ་གང་གཱའི་ཀླུང་བརྒྱད་ཅུའི་བྱེ་མ་སྙེད་སྲིན་པོའི་བསམ་པ་མེད་པ་ཤ་སྟག་གིས་གཟི་བརྗིད་ཆེན་པོའི་ཚོགས་ཀྱིས་སཱ་ལ་ཟུང་གི་དྲུང་དུ་སྣང་བར་བྱས་ནས།

བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་འབྲས་བུའི་ཤིང་གི་བདག་པོ་དྲི་སྲེལ་ལ་སོགས་པ་འབྲས་བུའི་ཤིང་གི་བདག་པོ་གང་གཱའི་ཀླུང་དགུ་བཅུའི་བྱེ་མ་སྙེད་ཀྱིས་སྔ་མའི་མཆོད་པ་ཐམས་ཅད་པས་ཉིས་འགྱུར་ཉིས་འགྱུར་གྱིས་ལྷག་པའི་མཆོད་པའི་ཚོགས་ཁྱེར་ནས།

ཁུ་བྱུག་ཕོ་རྒྱགས་པ་རྣམས་དང་།

བུང་བ་རྣམས་སྐད་འབྱིན་པ་དང་ལྡན་པའི་མེ་ཏོག་འཚེར་བའི་འཁྲི་ཤིང་མང་པོའི་དོག་པ་དང་།

ལོ་མ་ཁ་འབུས་པ་རྣམས་ཀྱིས་ས་ཕྱོགས་བརྒྱན་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་རིག་སྔགས་འཆང་གི་རྒྱལ་པོ་སྒྱུ་འཕྲུལ་ཆེན་པོ་ལ་སོགས་པ་རིག་སྔགས་འཆང་གི་རྒྱལ་པོ་གང་གཱའི་ཀླུང་སྟོང་གི་བྱེ་མ་སྙེད་ཀྱིས་མཆོད་པ་སྔ་མའི་ཉིས་འགྱུར་བས་ལྷག་པའི་མཆོད་པ་དག་ཁྱེར་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷ་མོ་འདོད་དགུར་སྒྱུར་བའི་གཟུགས་ཅན་ལེགས་མཐོང་མ་ལ་སོགས་པ་གང་གཱའི་ཀླུང་བྱེ་བའི་བྱེ་མ་སྙེད་ཀྱིས་ཡངས་པ་ཅན་གྱི་རྒྱལ་པོའི་བཙུན་མོའི་མཆོད་པ་ཉིས་འགྱུར་བས་ལྷག་པ་དག་ཁྱེར་ཏེ།

རང་རང་གི་རྒྱན་རྣམས་བཅོམ་ལྡན་འདས་ཀྱི་སྤྱན་སྔར་ས་ལ་སྤུངས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷའི་བུ་མོ་རམ་བྷ་དང་།

ཨུརྦ་ཤི་ལ་སོགས་པ་ལྷའི་བུ་མོ་གང་གཱའི་ཀླུང་བྱེ་བ་ཕྲག་བརྒྱའི་བྱེ་མ་སྙེད་མཆོད་པ་སྔ་མའི་ཉིས་འགྱུར་ཉིས་འགྱུར་བས་ཆེས་ལྷག་པར་མང་ཞིང་སྤ་བ་དག་གིས་མདུན་དུ་དྲངས་ཏེ།

སྔ་མ་བཞིན་དུ་ཕྱོགས་གཅིག་ཏུ་འཁོད་དོ།

གཞན་ཡང་དེའི་

ཚེ་འབྱུང་པོའི་ཚོགས་པ་བ་སངས་ལྟར་འཁོར་བ་ཞེས་བྱ་བ་ལ་སོགས་པ་གང་གཱའི་ཀླུང་བྱེ་བ་ཕྲག་སྟོང་གི་བྱེ་མ་སྙེད་སྔ་མ་བཞིན་དུ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་འཇིག་རྟེན་སྐྱོང་བ་བཞིའི་ལྷའི་བུ་གང་གཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་མཆོད་པ་སྔ་མའི་ཉིས་འགྱུར་ཉིས་འགྱུར་བས་ལྷག་པ་དག་ཁྱེར་ནས།

བཅོམ་ལྡན་འདས་ལ་ཕྱག་འཚལ་ཏེ།

ཞལ་ཟས་བཞེས་པར་གསོལ་བ་བཏབ་ཀྱང་།

བཅོམ་ལྡན་འདས་ཀྱིས་མ་བཞེས་ནས།

སྔ་མ་བཞིན་དུ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་རླུང་ལྷ་བཞི་རླུང་གཏོང་བའི་ལྷ་གང་གཱའི་ཀླུང་བྱེ་བ་ཕྲག་འབུམ་དང་ལྷན་ཅིག་ཏུ་དུས་མ་ཡིན་པར་ཡང་ཤིང་ལྗོན་པ་དང་།

འཁྲི་ཤིང་དང་།

ཤིང་གེལ་པ་དང་།

ནགས་མ་རྣམས་དང་།

སྙེ་མ་དང་།

མེ་ཏོག་གི་འཁྲི་ཤིང་དང་།

བྱི་རུ་རྣམས་ཀྱིས་ས་ཕྱོགས་རྒྱན་པར་བྱེད་ཅིང་།

དུས་ཚིགས་ཐམས་ཅད་ཀྱི་མེ་ཏོག་གི་དཔལ་རྣམས་ཕྱོགས་སུ་རྒྱས་པར་བྱེད་ལ།

ལོ་མ་ཁ་འབུས་པ།

རྩ་བ་དམར་བ་རྣམས་ཀྱིས་ཤིང་སཱ་ལ་ཟུང་ཉི་མ་འཆར་ཀའི་འོད་ཟེར་སེར་པོ་ཇ་ཧོང་ཁར་འདུག་པ་བཞིན་དུ་བྱས་ནས།

མཆོད་པ་སྔ་མའི་ཉིས་འགྱུར་བས་ལྷག་པའི་མཆོད་པ་དག་ཁྱེར་ཏེ།

བཅོམ་ལྡན་འདས་ལ་མཆོད་པ་བྱས་ནས།

སྔ་མ་བཞིན་དུ་ཤིང་སཱ་ལ་ཟུང་གི་དྲུང་དུ་འཁོད་དོ།

གཞན་ཡང་དེའི་ཚེ་ཆར་པ་འབེབས་པའི་ལྷ་གང་གཱའི་ཀླུང་གི་བྱེ་མ་སྙེད་སྤྲིན་ཆེན་པོ་དང་།

ཆུ་སྐྱར་རྣམས་ཕྱི་བཞིན་འབྲང་ཞིང་གློག་འགྱུ་བའི་གསེབ་ནས་རྨ་བྱའི་མགྲིན་པ་ལྟར་མདོག་སྔོ་བའི་ཆར་གྱི་རྒྱུན་འབབ་ལ།

འབྲུག་སྒྲ་དལ་ནས་སྒྲོགས་པའི་སྤྲིན་དང་ལྡན་པས་ཆར་ཟིམ་བུ་བསིལ་བ་དང་འདྲེས་པའི་མེ་ཏོག་གི་ཆར་འབེབས་ཤིང་།

བཅོམ་ལྡན་འདས་ལ་ཕྱག་འཚལ་ཏེ།

ཞལ་ཟས་མ་བཞེས་ནས་རེ་ཐག་ཆད་དེ།

དེ་བཞིན་གཤེགས་པའི་གདུང་ཞུགས་ལ་བཞེན་པའི་མེ་བསད་པའི་ཕྱིར་ནམ་མཁའ་ཉིད་ལ་འཁོད་དོ།

གཞན་ཡང་དེའི་ཚེ་སྤོས་ཀྱི་གླང་པོ་སྒྲ་གཅན་དང་།

ལུང་ཏང་མདོག་དང་།

སྦྲང་རྩི་མདོག་སེལ་དང་།

འདོད་དགུའི་སྤོས་ལྡན་ལ་སོགས་པ་སྤོས་ཀྱི་གླང་པོ་གང་གཱའི་ཀླུང་ཉི་ཤུའི་

བྱེ་མ་སྙེད་ཐེག་པ་ཆེན་པོ་འདོད་པ་ཤ་སྟག་གིས་སྟོན་པ་ཡོངས་སུ་མྱ་ངན་ལས་འདའ་བའི་ཕྱིར་གངས་ཀྱི་སྨན་དང་།

པདྨའི་རྩ་བ་དང་།

སྡོང་བུ་ཤིང་རྟ་ཆེན་པོའི་འཕང་ལོ་ཙམ་ཤ་སྟག་དང་།

དགོན་པ་ཆེན་པོ་དག་ནས་པདྨ་དང་།

ཨུད་པ་ལ་དང་།

ཀུ་མུ་ད་དང་།

པདྨ་དཀར་པོ་དང་།

རྩ་བ་དང་།

འབྲས་བུ་དང་།

རྡོ་གུ་ཐ་དད་པ་དུ་མ་དག་སྣའི་ཐོར་ཏོས་ཕྱུང་ཞིང་ཕྱུང་ཞིང་ཁྱེར་ཏེ།

རླུང་གི་ཤུགས་པས་ཀྱང་ཆེས་མགྱོགས་པ་དང་།

ཤིན་ཏུ་རིངས་པར་དབྱར་གྱི་འབྲུག་སྒྲ་བཞིན་དུ་སྒྲོགས་ཤིང་ལྷགས་ནས།

པདྨའི་འདབ་མ་བཅེར་བའི་སེང་གེའི་ཁྲིའི་ལྡ་ལྡི་དག་བཤམས་ཏེ།

བཅོམ་ལྡན་འདས་ལ་མཆོད་པ་བྱས་ནས།

ཞལ་ཟས་མ་བཞེས་ནས་རེ་ཐག་ཆད་དེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་སེང་གེ་སེང་གེའི་སྒྲ་སྒྲོགས་པ་ཞེས་བྱ་བ་ལ་སོགས་པ་སེང་གེ་གང་གཱའི་ཀླུང་སུམ་ཅུའི་བྱེ་མ་སྙེད་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཤ་སྟག་གིས།

སེང་གེའི་རྩལ་ཆེན་པོས་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་ཏོག་དང་འབྲས་བུ་རྣམས་ཁྱེར་ཏེ།

རིངས་པར་ལྷགས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་བྱ་ངང་པ་དང་།

ཁྲུང་ཁྲུང་དང་།

ངུར་པ་དང་།

ཀ་དམ་པ་དང་།

ཟལ་མོ་དང་།

བཞད་དང་།

ཁུ་བྱུག་དང་།

བ་ལི་ཀ་དང་།

ཀ་ལ་པིང་ཀ་དང་།

ཤང་ཤང་ཏེའུ་ལ་སོགས་པས་ཀྱང་སྤོས་ཀྱི་གླང་པོ་ཆེ་རྣམས་དང་འདྲ་བར་མེ་ཏོག་དང་འབྲས་བུ་ཁྱེར་ཏེ།

རང་རང་གི་སྐད་ཕྱུང་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་སའི་སྟེང་ན་བ་དང་།

མ་ཧེ་མོ་དང་།

ར་མ་མོ་ཡོད་དོ་ཅོག་གིས་ཀྱང་ནུ་མ་འོ་མས་བཀང་སྟེ།

ཤིན་ཏུ་རིངས་པར་ལྷགས་ནས།

ཤིང་སཱ་ལ་ཟུང་གི་དྲུང་ནས་ཕྱོགས་གཤོང་ཞིག་མཐོང་ནས།

དེར་རང་རང་གི་ནུ་མ་འོ་མས་གང་བ་དེ་དག་ལས་འོ་མ་གསེག་མ་དང་།

བྱེ་མ་དང་།

བ་ཚས་མ་འབགས་ཤིང་ཚ་བའི་སྐྱོན་དུ་འགྱུར་བ་མེད་པ་དག་གཟགས་ཏེ།

འོ་མ་དེ་དག་གི་ནང་ནས་སྦྲང་བུ་དག་བསལ་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་དྲང་སྲོང་བཟོད་པར་སྨྲ་བ་ལ་

སོགས་པ་གླིང་བཞི་ན་གནས་པའི་དྲང་སྲོང་མངོན་པར་ཤེས་པ་ལྔ་དང་ལྡན་པ།

ཐེག་པ་ཆེན་པོ་འདོད་པ་ཤ་སྟག་ལ།

གང་གཱའི་ཀླུང་དཀྲིགས་ཀྱི་བྱེ་མ་སྙེད་རང་རང་གི་རྫུ་འཕྲུལ་གྱི་སྟོབས་ཀྱིས་ཡམ་སྲེག་ཤིང་དང་།

ཞལ་ཟས་དག་ཁྱེར་ནས།

བཅོམ་ལྡན་འདས་ལ་ཕྱག་འཚལ་ཏེ།

ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་འོད་སྲུང་ཆེན་པོ་ལ་སོགས་པ་དགེ་སློང་གི་དགེ་འདུན་ཁ་ཅིག་དང་།

གནས་བརྟན་ཀུན་དགའ་བོ་ལ་སོགས་པ་མ་གཏོགས་པར་ཡུལ་ཕྱོགས་ན་གནས་པའི་དགེ་སློང་དང་།

དགེ་སློང་མ་ཇི་སྙེད་ཡོད་པ་དེ་དག་ཐམས་ཅད་ཀྱང་མ་ལུས་པར་དེར་ལྷགས་སོ།

གཞན་ཡང་དེའི་ཚེ་རི་རབ་ལ་སོགས་པ་རི་ཆེན་པོ་རྣམས་དང་།

འཇིག་རྟེན་གྱི་བར་མཚམས་ཀྱི་རི་གང་གཱའི་ཀླུང་གྲངས་མེད་པའི་བྱེ་མ་སྙེད་ཀྱང་ཤིང་ལྗོན་པ་དང་།

འཁྲི་ཤིང་མང་པོ་ཉི་ཚན་གྱི་གྲིབ་མ་བྱེད་པ་དང་།

བྲག་ཟང་ཡག་གྲིབ་མ་ཆེ་བ་དང་།

བྲག་ཁ་ནས་འབབ་པའི་ཆུས་གང་བ་དང་།

སྨན་གཤོང་རྡོ་གུ་དང་།

རྩ་བ་དང་།

འབྲས་བུས་གང་བ་དག་ཀྱང་དེར་ལྷགས་སོ།

ལྷའི་བུ་མཐུ་བོ་ཆེའི་འདུན་མ་ཆེན་པོ་དག་ཀྱང་རི་རབ་དང་བཅས་ཏེ་མཆོད་པའི་ཕྱིར་ལྷགས་ནས།

བཅོམ་ལྡན་འདས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷའི་བུ་མཐུ་བོ་ཆེ་འོད་ཆེན་པོ་རྒྱ་མཚོ་ཆེན་པོ་བཞིའི་ནང་ན་གནས་པ་དང་།

ཆུ་ཀླུང་ཆེན་པོ་དག་གི་ནང་ན་གནས་པ་གང་གཱའི་ཀླུང་གྲངས་མེད་པའི་བྱེ་མ་སྙེད་མཆོད་པ་སྔ་མ་བས་ཆེས་ཉིས་འགྱུར་གྱིས་མཛེས་པའི་མཆོད་པ་སྔོན་དུ་བཏང་ནས།

ཉི་མའི་འོད་ཀྱིས་མར་མེའི་འོད་ཟིལ་གྱིས་མནན་པ་བཞིན་དུ་རང་རང་གི་འོད་ཀྱིས་ཉི་མའི་འོད་ཟིལ་གྱིས་མནན་ཏེ།

ཉི་མ་འཆར་ཀའི་འོད་ཀྱིས་ཤིང་མྱ་ངན་འཚང་གི་ལོ་མ་ཐམས་ཅད་དམར་ལམ་མེར་སྣང་བར་བྱེད་པ།

དེ་བཞིན་དུ་རང་རང་གི་འོད་ཀྱིས་ཆུ་ཀླུང་གསེར་ལྡན་གྱི་ཆུ་དམར་ལམ་མེར་སྣང་བར་བྱས་ནས།

བཅོམ་ལྡན་འདས་ལ་ཕྱག་འཚལ་ཏེ།

ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་གྲོང་ཁྱེར་ཀུ་ཤི་ནས་ཤིང་སཱ་ལ་ཟུང་གི་དྲུང་གི་བར་སྐབས་ཀྱི་བར་

སྣང་ལ་ཁང་བཟངས་རིའི་དབང་པོའི་རྩེ་མོ་ལྟ་བུ།

ངང་པའི་ཐལ་གོང་ལྟར་དཀར་བ་ཤ་སྟག་གིས་འཁྲིགས་པར་གྱུར་ཏོ།

ས་གཞི་ནི་སྐྱེད་མོས་ཚལ་དང་།

རྫིང་བུའི་ཆུ་པད་མས་མཛེས་པར་བྱས་པ་དག་གིས་གང་བར་འདུག་སྟེ།

བྱང་གི་སྒྲ་མི་སྙན་གྱི་སྐྱེད་མོས་ཚལ་བས་ཀྱང་ལྷག་པར་མཛེས་སོ།

གཅིག་ཏུ་ན་དགའ་བའི་ཚལ་དང་།

ཤིང་རྟ་སྣ་ཚོགས་ཅན་དང་འདྲ་བར་གྱུར་ཏེ།

ས་ཕྱོགས་དེ་དག་དེ་ལྟར་དགའ་དགའ་ལྟར་འདུག་ཀྱང་།

ལྷ་དང་།

ལྷ་མ་ཡིན་དང་།

མི་དེ་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཕྱིར་ཤིན་ཏུ་ངུའོ།

གཞན་ཡང་དེའི་ཚེ་རྒྱལ་ཆེན་བཞིའི་རིས་ཀྱི་ལྷ་རྣམས་རང་རང་གི་འཁོར་ལ་འདི་སྐད་ཅེས་ཟེར་ཏོ།

གྲོགས་པོ་དག་ལྟོས།

གྲོགས་པོ་དག་ལྟོས།

ལྷ་དང་།

ལྷ་མ་ཡིན་དང་།

མི་རྣམས་ཀྱི་དེ་བཞིན་གཤེགས་པའི་མཆོད་པའི་ལས་ཁྱད་པར་དུ་འཕགས་ལ།

དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་འབུལ་བ་ལ་བརྩོན་གྱིས།

གྲོགས་པོ་དག་བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སོ་སོ་ནས་མཆོད་པ་བྱའོ།

ཞལ་ཟས་ཀྱི་ཐ་མ་ཡང་དབུལ་བར་བྱའོ།

གལ་ཏེ་བདག་ཅག་གིས་ཕུལ་བའི་ཞལ་ཟས་ཀྱི་ཐ་མ།

བཅོམ་ལྡན་འདས་ཀྱིས་བཞེས་པར་གྱུར་ན།

དེ་ལས་བདག་ཅག་གིས་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་ཐོབ་པར་འགྱུར་རོ་ཞེས་དེ་དག་གིས་དེ་སྐད་ཅེས་སྨྲས་ནས།

གཡོག་འཁོར་མང་པོ་གྲངས་མེད་པ་དང་བཅས་པས་མཆོད་པ་སྔ་མའི་ཉིས་འགྱུར་གྱི་མཆོད་པ་དང་ཞལ་ཟས་མང་པོ་དག་ཁྱེར་རོ།

མེ་ཏོག་མང་པོ་དག་ཀྱང་ཁྱེར་ཏེ།

འདི་ལྟ་སྟེ།

མན་དཱ་ར་བ་རྣམས་དང་།

མན་དཱ་ར་བ་ཆེན་པོ་རྣམས་དང་།

ཀེ་ཀེ་རུ་ཀ་རྣམས་དང་།

ཀེ་ཀེ་རུ་ཀ་ཆེན་པོ་རྣམས་དང་།

མན་ཛུ་ཥ་ཀ་རྣམས་དང་།

མན་ཛུ་ཥ་ཀ་ཆེན་པོ་རྣམས་དང་།

སན་ཏ་ན་ག་རྣམས་དང་།

སན་ཏ་ན་ག་ཆེན་པོ་རྣམས་དང་།

འོད་ཅན་རྣམས་དང་།

འོད་ཅན་ཆེན་པོ་རྣམས་དང་།

ཀུན་ཏུ་འོད་ཅན་རྣམས་དང་།

འོད་

མཐའ་ཡས་པ་རྣམས་དང་།

མཛེས་སྡུག་རྣམས་དང་།

མཛེས་སྡུག་ཆེན་པོ་རྣམས་དང་།

དགའ་བྱེད་རྣམས་དང་།

དགའ་བྱེད་ཆེན་པོ་རྣམས་དང་།

དྲི་མཆོག་རྣམས་དང་།

དྲི་མཆོག་ཆེན་པོ་རྣམས་དང་།

སྤོས་ཀྱི་ངད་ལྡང་རྣམས་དང་།

སྤོས་ཀྱི་ངད་ལྡང་ཆེན་པོ་རྣམས་དང་།

ཀུན་ཏུ་ངད་ལྡང་རྣམས་དང་།

ཀུན་ཏུ་ངད་ལྡང་ཆེན་པོ་རྣམས་དང་།

མཐའ་ཡས་ངད་ལྡང་རྣམས་དང་།

མཐའ་ཡས་ངད་ལྡང་ཆེན་པོ་རྣམས་དང་།

ལྷ་རྫས་ཀྱི་འདབ་མ་རྣམས་དང་།

ཀླུང་གི་མེ་ཏོག་རྣམས་དང་།

ཡོངས་འདུ་ས་བརྟོལ་རྣམས་དང་།

དེ་ལྟ་བུ་གཞན་དག་ཀྱང་ཁྱེར་ནས།

བཅོམ་ལྡན་འདས་ག་ལ་བ་དེར་དོང་སྟེ།

ཉི་མའི་གཟི་བྱིན་གྱིས་སྲིན་བུ་མེ་ཁྱེར་གྱི་འོད་ཟིལ་གྱིས་མནན་པ་བཞིན་དུ་རང་རང་གི་གཟི་བྱིན་གྱིས་ཐམས་ཅད་ཀྱི་འོད་ཟིལ་གྱིས་མནན་ཏེ།

ཞལ་ཟས་མ་བཞེས་ནས་ཕྱོགས་གཅིག་ཏུ་འཁོད་དོ།

གཞན་ཡང་དེའི་ཚེ་ལྷའི་དབང་པོ་བརྒྱ་བྱིན་སུམ་ཅུ་རྩ་གསུམ་པའི་ལྷ་རྣམས་ཀྱི་འཁོར་དང་བཅས་པས།

མཆོད་པ་སྔ་མ་དེའི་ཉིས་འགྱུར་དེའི་རྐྱེན་དུ་འཚམ་པ་དེ་ན་ཡོད་པའི་མེ་ཏོག་གི་སྣ་གྲངས་དུ་མ་ཡིད་དུ་འོང་བ་རྣམས་དང་།

ཡིད་དུ་འོང་བ་ཆེན་པོ་རྣམས་དང་།

དྲི་བསུང་ཞིམ་པོ་རྣམས་ཁྱེར་རོ།

ཁང་བཟངས་ཆེན་པོ་རྡོ་ཐལ་གྱི་མདོག་ལྟར་དཀར་བ།

ཐེམ་སྐས་ཀྱི་རིམ་པ་དང་ལྡན་པ།

སྐར་ཁུང་གི་ཕྲེང་བ་དུ་མ་ཕུག་རོན་ཤུག་རྩེ་བ་དང་ལྡན་པ་དག་ཀྱང་སྤྲུལ་ནས།

བཅོམ་ལྡན་འདས་ག་ལ་བ་དེར་དོང་སྟེ།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ཅག་ནི་ཐེག་པ་ཆེན་པོའི་མདོའི་སྡེ་ཚན་སྲུང་བ་ལགས་ན།

བདག་ཅག་ལ་ཐུགས་བརྩེ་བའི་སླད་དུ་བདག་ཅག་གིས་ཕུལ་བའི་ཞལ་ཟས་བཞེས་སུ་གསོལ།

དེ་སྐད་ཅེས་གསོལ་ཀྱང་ཞལ་ཟས་མ་བཞེས་ནས་ཕྱོགས་གཅིག་ཏུ་འཁོད་དོ།།

བམ་པོ་གཉིས་པ།

དེའི་རྗེས་ལ་མཐར་གྱིས་འདོད་པ་ན་སྤྱོད་པའི་ལྷའི་རིས་དྲུག་པོ་རྣམས་ཀྱིས་སྟེང་གི་བར་སྣང་ལ་མཆོད་པ་དང་།

འོད་སྔ་མ་ལས་ཁྱད་པར་དུ་སྤགས་ནས།

བཅོམ་ལྡན་འདས་ག་ལ་བ་དེར་དོང་སྟེ།

དེ་དག་གི་མཆོད་པའི་ནང་ན་གདུགས་ཕལ་པ་གང་ཡིན་པ་དེ་ཡང་ཁོ་ར་ཁོར་ཡུག་ཏུ་གླིང་བཞི་པའི་ཁྱོན་ཙམ་མོ།

བ་དན་ཕལ་པ་གང་ཡིན་པ་དེ་ཡང་རྒྱ་མཚོ་ཆེན་པོ་བཞིའི་མཐར་ཐུག་སྟེ།

ཤར་ཕྱོགས་ཀྱི་རྒྱ་མཚོ་ནས་ནུབ་ཕྱོགས་ཀྱི་རྒྱ་མཚོར་ཐུག་སྟེ།

རླུང་གིས་བསྐྱོད་དམ།

རླུང་གིས་ཕྱར་ན་བ་དན་དེ་དག་ལས་པི་བང་གི་སྒྲ་སྙན་པ་ཁོང་ནས་འཁྱིལ་པ་ལྟ་བུར་སྙན་པ་དག་འབྱུང་སྟེ།

དེ་དག་བཅོམ་ལྡན་འདས་ལ་ཕྱག་འཚལ་ནས་ཞལ་ཟས་བཞེས་པར་གསོལ་བ་བཏབ་ཀྱང་།

བཅོམ་ལྡན་འདས་ཅང་མི་གསུང་ནས་རེ་ཐག་ཆད་དེ་ཕྱོགས་གཅིག་ཏུ་འཁོད་དོ།

དེའི་ཚེ་སྲིད་པའི་རྩེ་མོར་སྐྱེས་པ་རྣམས་མ་གཏོགས་པར་གོང་མ་གོང་མའི་སེམས་ཅན་གཞན་གང་ཡིན་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པ་བྱ་བའི་ཕྱིར།

མཆོད་པ་རྒྱ་ཆེན་པོའི་ཚོགས་དང་ཆས་ཏེ་ལྷགས་ནས་སྔ་མ་བཞིན་དུ་ཕྱོགས་གཅིག་ཏུ་འཁོད་དོ།

མི་མཇེད་ཀྱི་བདག་པོ་ཚངས་པ་ཡང་ཚངས་རིས་ཀྱི་ལྷའི་བུ་དཔག་ཏུ་མེད་པ་དག་གིས་བསྐོར་ཅིང་མདུན་དུ་བདར་ཏེ།

རང་གི་གཟི་བྱིན་གྱིས་ལྷ་ཐམས་ཅད་ཀྱི་གཟི་བྱིན་ཟིལ་གྱིས་མནན་ནས།

མཆོད་པའི་ཚོགས་ཆེན་པོ་དང་ཆས་ཏེ་བཅོམ་ལྡན་འདས་ཀྱི་ཐད་དུ་དོང་སྟེ།

དེ་དག་གི་བ་དན་ཕལ་པ་གང་ཡིན་པ་དེ་ཡང་ཚངས་པའི་འཇིག་རྟེན་ནས་འཕྱང་སྟེ།

ཤིང་སཱ་ལ་ཟུང་གི་དྲུང་དུ་ཐུག་གོ།

དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས།

བཅོམ་ལྡན་འདས་ཀྱིས་མ་བཞེས་ནས་ཕྱོགས་གཅིག་ཏུ་འཁོད་དོ།

དེ་ནས་དེའི་ཚེ་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་གྱི་གཡོག་འཁོར་དཔག་ཏུ་མེད་པ་དང་བཅས་པས།

ཚངས་པ་དང་དབང་པོ་གཉིས་མ་གཏོགས་པར་དེའི་བར་གྱི་ལྷ་ཡོད་དོ་ཅོག་གི་འོད་རང་གི་འོད་ཀྱིས་མོག་མོག་པོར་བྱས་ནས།

དེའི་རྐྱེན་དུ་འཚམ་པའི་

མཆོད་པའི་ཚོགས་དང་།

རྐྱེན་དུ་འཚམ་པའི་ཞལ་ཟས་དག་དང་ཆས་ཏེ།

བཅོམ་ལྡན་འདས་ཀྱི་ཐད་དུ་སོང་ངོ་།

དེའི་གདུགས་ཕལ་པ་ཡང་ཆུ་ཞེང་དུ་འཇིག་རྟེན་གྱི་ཁམས་ཆུང་ངུ་ཁྱབ་པ་ཙམ་སྟེ།

དེས་ཀྱང་བཅོམ་ལྡན་འདས་ལ་ཞལ་ཟས་བཞེས་པར་གསོལ་བ་ལས།

བཅོམ་ལྡན་འདས་ཀྱིས་མ་བཞེས་ནས་ལངས་ཏེ་ཕྱོགས་གཅིག་ཏུ་འདུག་གོ།

དེ་ནས་བདུད་སྡིག་ཅན་ཆུང་མ་གྲངས་མེད་པའི་འཁོར་དང་ཆས་ཏེ།

སེམས་ཅན་དམྱལ་བ་ཐམས་ཅད་ཀྱི་བར་སྲང་ཐམས་ཅད་ཕྱེ་ནས།

དེ་དག་ལ་ཆུ་དང་།

ཁ་ཟས་ལ་སོགས་པ་ཅི་འདོད་པ་བྱིན་ཏེ།

དེ་དག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པར་གྱིས་ཤིག །

སྦྱིན་པའི་ཐ་མ་ལ་རྗེས་སུ་ཡི་རང་བར་གྱིས་ཤིག་ཅེས་སྨྲས་ནས།

དེ་དག་ལ་ཁྱེད་བདེ་བར་གྱུར་ཅིག་ཅེས་ཀྱང་དབུགས་ཕྱུང་ངོ་།

སེམས་ཅན་དམྱལ་བའི་གྲོང་ཁྱེར་མཚོན་ཆས་གང་ཞིང་མེ་ཆེན་པོ་འབར་བ་རྣམས་སུ་ཡང་སྤྲིན་ཆེན་པོ་བཞིན་དུ་ཆུ་ཆེན་པོ་ཕབ་ནས།

སེམས་ཅན་དམྱལ་བ་པ་རྣམས་ཀྱིས་སྔོན་མ་མྱོང་བའི་བདེ་བ་དང་ལྡན་པའི་འདུ་ཤེས་བསྐྱེད་དེ།

དེ་བཞིན་གཤེགས་པའི་མཐུས་བདུད་ཀྱི་སེམས་ཀྱི་གནས་སྐབས་དེ་ལྟ་བུར་གྱུར་ཏོ།

དེའི་འཁོར་གང་ཡིན་པ་དེ་དག་གིས་ཀྱང་གཞུ་དང་།

རལ་གྲི་དང་།

ཐོ་བ་དང་།

དགྲ་སྟ་དང་།

རྡོ་རྗེ་རྩེ་གཅིག་པ་དང་།

མཚོན་ཀམ་པ་ན་དང་།

ལྕགས་ཀྱི་བེར་ཀ་དང་།

ལྕགས་མདའ་དང་།

ཤ་ཏ་ཀ་ནི་ཧ་དང་།

མདའ་དང་།

འཕང་མདུང་དང་།

མདུང་རྩེ་གཅིག་པ་ལ་སོགས་པ་མཚོན་ཆ་རྣམ་པ་དུ་མ་ཡོངས་སུ་སྤངས་ཏེ་ཆོས་ལྷུར་ལེན་པར་གྱུར་ཏོ།

དེའི་མཆོད་པ་ཡང་ལྷ་སྔ་མ་རྣམས་ལ་མེད་པ་དེ་ལྟ་བུར་གྱུར་ཏེ།

དེའི་གདུགས་ཕལ་པའི་ཆུ་ཞེང་དུ་ཡང་འཇིག་རྟེན་གྱི་ཁམས་བར་མའི་ཁྱོན་ཙམ་མོ།

དེ་ལྟར་དེ་མཐུ་ཆེན་པོ་དང་ལྡན་ཞིང་རང་གི་ཆུང་མ་རྣམས་ཀྱི་རྔ་ཡབ་ཀྱིས་གཡོབ་བཞིན་དུ་བཅོམ་ལྡན་འདས་ག་ལ་བ་དེར་ཕྱིན་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

ཐལ་མོ་སྦྱར་ནས་འདི་སྐད་ཅེས་གསོལ་ཏོ།

བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་དང་།

འཁོར་དང་བཅས་པས་བདག་ཅག་གིས་ཕུལ་བའི་ཞལ་ཟས་བཞེས་སུ་གསོལ།

བཅོམ་ལྡན་འདས་བདག་ཅག་གིས་ད་སླན་ཆད་ཐེག་པ་ཆེན་པོའི་སླད་དུ་ཡི་དམ་བཅའ་བར་འཚལ་ཏེ།

རིགས་ཀྱི་བུའམ།

རིགས་ཀྱི་བུ་མོ་གང་སུ་ཡང་རུང་།

འཇིགས་པའི་སླད་དུ་འམ།

རྙེད་པ་དང་བཀུར་སྟི་འཚལ་བའི་སླད་དུ་འམ།

ཐོབ་ཏུ་རེ་བའི་སླད་དུ་འམ།

གཞན་གྱིས་བགྱིད་དུ་སྩལ་བ་འམ།

གཞན་གྱི་ཡིད་བསྲུང་བའི་སླད་དུ་ཡང་རུང་སྟེ།

ཐེག་པ་ཆེན་པོ་རྗོད་པར་བགྱིད་ན།

དེའི་དོན་དུ་འཇིགས་པ་དང་།

མི་དགའ་བ་ཐམས་ཅད་བསལ་བའི་གསང་སྔགས་བཤད་པར་འཚལ་ལོ།

ཏདྱ་ཐཱ།

ཋག་ཀེ །

ཊ་ཊ་ར་ཋག་ཀེ །

རོ་རུ་རེ།

མ་ཧཱ་རོ་རུ་རེ།

ཨཱ་ལ་མཱ་ལ།

ཏཱ་ལ།

སྭཱ་ཧཱ།

ཆོས་སྨྲ་བ་འཁྲུལ་པ་དང་འཇིགས་པས་གནོད་པར་གྱུར་པ་རྣམས།

ཆོས་ཀྱི་ཚུལ་ལ་སྤོབས་པ་བསྐྱེད་པར་བགྱི་བ་དང་།

མུ་སྟེགས་པ་རྣམས་མྱོས་པར་བགྱི་བ་དང་།

དམ་པའི་ཆོས་བསྲུང་བ་དང་།

བདག་དང་གཞན་བསྲུང་བའི་སླད་དུ་བདག་གིས་རང་གི་དམ་ཚིག་གིས་སྨྲས་པའི་གསང་སྔགས་འདི་གླང་པོ་ཆེའི་འཇིགས་པ་འམ།

ནགས་ཁུང་གི་འཇིགས་པ་འམ།

ཆུ་ཀླུང་གི་འཇིགས་པ་འམ།

མེའི་འཇིགས་པ་རྣམས་ཀྱི་ནང་དུ་བསྲུང་བའི་གཟུངས་སྔགས་ཀྱི་དོན་དུ་རྗོད་པ་གང་ལགས་པ་དེ་དག་ནི་རྗོད་པ་ཙམ་གྱིས་ཇི་ལྟར་རུ་སྦལ་རང་གི་ལུས་བསྲུངས་པ་དེ་བཞིན་དུ།

བདག་གིས་གཡོ་དང་སྒྱུ་མ་མཆིས་པར་དེ་དག་གི་འཇིགས་པ་ཐམས་ཅད་ལས་བསྲུང་བར་བགྱི།

སྟོབས་དང་ལྡན་པར་ཡང་བགྱིད་ལགས་ན།

བཅོམ་ལྡན་འདས་ཀྱིས་ད་ཞལ་ཟས་འདི་བཞེས་པར་གསོལ་ཞེས་བསྐུལ་ཏོ།

དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ།

སྡིག་ཅན་ཁྱོད་ཁ་ཟས་ཀྱི་ཕྱིར་གསོལ་བ་མ་འདེབས་ཤིག །

གསང་སྔགས་ཀྱི་ཚིག་འདི་སེམས་ཅན་ཐམས་ཅད་ལ་ཕན་པའི་ཕྱིར་ཆོས་ཀྱི་སྦྱིན་པར་

འགྱུར་བས་ན་བཞེས་པར་བྱའི།

ཟང་ཟིང་གི་སྦྱིན་པ་ནི་དེ་ལྟ་མ་ཡིན་གྱིས།

སྡིག་ཅན་ཁྱོད་གསོལ་བ་མ་འདེབས་ཤིག་ཅེས་བཀའ་སྩལ་ནས།

བཅོམ་ལྡན་འདས་ཅང་མི་གསུང་བར་གྱུར་ཏོ།

ལན་གཉིས་ལན་གསུམ་གྱི་བར་དུ་ཡང་བདུད་དང་བདུད་ཀྱི་བུ་མོ་རྣམས་ཀྱིས་བཅོམ་ལྡན་འདས་ལ་གསོལ་བ་བཏབ་པ་ལས་མ་བཞེས་ཏེ།

རེ་ཐག་ཆད་ནས་ཕྱོགས་གཅིག་ཏུ་འཁོད་དོ།

དེ་ནས་དེའི་ཚེ་ལྷའི་བུ་དབང་ཕྱུག་ཆེན་པོ་ལྷའི་བུ་དཔག་ཏུ་མེད་པ་མཐུ་དཔག་ཏུ་མེད་པ་དག་གིས་མདུན་དུ་བདར་ཏེ།

རང་གི་འོད་ཀྱིས་ཚངས་པ་དང་།

ལྷའི་དབང་པོ་དང་།

ལྷ་མ་ཡིན་དང་།

བདུད་ཀྱི་འོད་རྣམས་སྣག་ཚའི་གོང་བུ་བཞིན་དུ་འོད་མི་གསལ་བར་བྱས་ཏེ།

བཅོམ་ལྡན་འདས་ཀྱི་མཆོད་པ་རྒྱ་ཆེན་པོ་ཉིས་འགྱུར་ཉིས་འགྱུར་བས་ལྷག་པ་དག་ཁྱེར་ནས་དེར་སོང་སྟེ།

དེའི་མཆོད་པ་རྣམས་ཀྱི་ནང་ན་གདུགས་ཕལ་པ་གང་ཡིན་པ་དེ་ཡང་ཆུ་ཞེང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པར་འདུག་སྟེ།

མཆོད་པ་དེ་ལྟ་བུ་སྔོན་དུ་བཏང་ནས།

བཅོམ་ལྡན་འདས་ཀྱི་ཐད་དུ་ཕྱིན་ཏེ།

ལན་དུ་མར་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ལ་བདག་མཆོད་པ་བགྱིད་པ་ནི་སྦྲང་བུ་མཆོད་པ་བགྱིད་པ་དང་འདྲ་སྟེ།

བདག་སྦྲང་བུ་དང་འདྲ་བས་བཅོམ་ལྡན་འདས་ལ་མཆོད་པ་བགྱིད་པའི་རྔོ་ག་ལ་ཐོགས་ཀྱིས་ཀྱང་།

བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཞལ་ཟས་ཀྱི་ཐ་མ་གསོལ་བར་ཅི་གནང་ཞེས་ལན་གཉིས་ལན་གསུམ་དུ་གསོལ་བ་བཏབ་ཀྱང་།

ལན་གཉིས་ལན་གསུམ་དུ་བཅོམ་ལྡན་འདས་ཅང་མི་གསུང་བར་གྱུར་ཏེ།

རེ་ཐག་ཆད་ནས་ལངས་ཏེ་ཕྱོགས་གཅིག་ཏུ་འདུག་གོ།

དེ་ནས་དེའི་ཚེ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་འཇིག་རྟེན་གྱི་ཁམས་གང་གཱའི་ཀླུང་གྲངས་མེད་པ་གཏམས་ཕྲག་དཀྲིགས་ཀྱི་བྱེ་མ་སྙེད་འདས་པ་ན།

འཇིག་རྟེན་གྱི་ཁམས་ཡིད་འཕྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་དང་མཉམ་པ་ཞེས་བྱ་བ་བཞུགས་ཏེ།

དེས་སྲས་ཀྱི་ཐུ་བོ་ཉན་ཐོས་ལུས་ཆེན་མཐའ་ཡས་ལ་བཀའ་སྩལ་པ།

རིགས་ཀྱི་བུ་ཁྱོད་མི་མཇེད་ཀྱི་འཇིག་རྟེན་གྱི་ཁམས་སུ་སོང་ལ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིང་པོ་མི་ཐོགས་པར་ཡོངས་སུ་མྱ་ངན་ལས་འདའ་བར་འགྱུར་གྱིས།

རིགས་ཀྱི་བུ་ཁྱོད་ཀྱིས་དེའི་དོན་དུ་འཇིག་རྟེན་གྱི་ཁམས་འདི་ནས་ཞལ་ཟས་ཞིམ་པོ་ཕན་པ་དག་ཁྱེར་ཏེ་སོང་ཤིག །

མཆོད་པ་ཆེན་པོ་དག་ཀྱང་ཁྱེར་ཏེ་སོང་ལ།

དེ་ལ་འདི་སྐད་དུ་དེ་བཞིན་གཤེགས་པ་བཅོམ་ལྡན་འདས་ཀྱིས་ཞལ་ཟས་འདི་གསོལ་ཏེ་ཡོངས་སུ་མྱ་ངན་ལས་འདའ་བར་མཛད་དུ་གསོལ་ཞེས་གྱིས་ཤིག །

ཁྱོད་ཀྱི་ཐེ་ཚོམ་དང་ཡིད་གཉིས་ཅི་དང་ཅི་ཡོད་པ་དེ་དང་དེ་དག་ཀྱང་།

དེ་བཞིན་གཤེགས་པ་དེ་ཁོ་ན་ལ་ལེགས་པར་ཞུས་ཤིག་དང་།

དེས་ཁྱོད་ལ་ལུང་བསྟན་པར་འགྱུར་རོ་ཞེས་བཀའ་སྩལ་ཏོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་དེས།

ལེགས་སོ།

ལེགས་སོ་ཞེས་གསོལ་ནས།

དེ་བཞིན་གཤེགས་པ་དེ་ལ་བསྐོར་བ་བྱས་ནས།

ཞབས་ལ་མགོ་བོས་ཕྱག་འཚལ་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་པོ་གྲངས་མེད་པས་བསྐོར་ཅིང་མདུན་དུ་བདར་ནས།

མི་མཇེད་ཀྱི་འཇིག་རྟེན་གྱི་ཁམས་འདིར་འོངས་སོ།

དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོས་རབ་ཏུ་གཡོས།

འགུལ་རབ་ཏུ་འགུལ།

འཁྲུགས་རབ་ཏུ་འཁྲུགས།

འཁོར་རབ་ཏུ་འཁོར།

འུར་འུར་རབ་ཏུ་འུར་འུར།

ཤིག་ཤིག་རབ་ཏུ་ཤིག་ཤིག །

མེར་མེར་རབ་ཏུ་མེར་མེར།

ལྡེམ་ལྡེམ་རབ་ཏུ་ལྡེམ་ལྡེམ་མོ།

དེ་ལ་སོགས་པ་བྱས་ཏེ།

ས་ཆེན་པོ་རབ་ཏུ་གཡོས་སོ།

དེ་ནས་འཁོར་དེ་དག་གི་ནང་ན་ཚངས་པ་དང་།

དབང་པོ་དང་།

འཇིག་རྟེན་སྐྱོང་དང་།

ལྷ་མ་ཡིན་དང་།

དབང་ཕྱུག་ཆེན་པོ་ལ་སོགས་པ་ལྷ་རྣམས་ཀྱིས་ས་གཞི་དེ་ལྟ་བུར་གྱུར་པ་མཐོང་ནས་སྐྱི་བུང་ཞེས་བྱས་ཏེ།

འཇིགས་ཤིང་ཁ་དང་ལྐོག་མ་སྐམས་ནས།

འབྲོས་པར་ཆས་ཏེ་རང་རང་གི་འོད་ཀྱང་མི་མཐོང་ཞིང་འོད་ཉམས་པར་གྱུར་ཏོ།

དེ་ནས་འཁོར་དེ་ཉིད་ཀྱི་ནང་ནས།

འཇམ་དཔལ་གཞོན་ནུར་གྱུར་པ་ལངས་ཏེ།

ལྷའི་ཚོགས་དེ་དག་ལ་འདི་སྐད་ཅེས་སྨྲས་སོ།

གྲོགས་པོ་དག་མ་འཇིགས་ཤིག །

མ་འཇིགས་ཤིག །

ཤར་ཕྱོགས་ལོགས་སུ་འཇིག་རྟེན་གྱི་ཁམས་གང་གཱའི་ཀླུང་གྲངས་མེད་པ་གཏམས་ཕྲག་དཀྲིགས་ཀྱི་བྱེ་མའི་རྡུལ་ཕྲ་རབ་གྲངས་མེད་པ་སྙེད་འདས་པ་ན།

འཇིག་རྟེན་གྱི་ཁམས་ཡིད་འཕྲོག་སྒྲ་སྙན་མུ་ཏུག་ཅེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་དང་མཉམ་པ་ཞེས་བྱ་བ་ད་ལྟར་བཞུགས་ལ་འཚོ་ཞིང་གཞེས་ཏེ།

དེ་བཞིན་གཤེགས་པ་དེས་རང་གི་སྲས་ཀྱི་ཐུ་བོ་ཉན་ཐོས་ལ་བོས་ཏེ་བཀའ་སྩལ་པ།

རིགས་ཀྱི་བུ་ཁྱོད་མི་མཇེད་ཀྱི་འཇིག་རྟེན་གྱི་ཁམས་སུ་སོང་ལ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཡོངས་སུ་མྱ་ངན་ལས་འདའ་བར་འགྱུར་གྱིས།

དེ་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་ཕུལ་ལ།

ཁྱོད་ཀྱི་ཐེ་ཚོམ་དང་ཡིད་གཉིས་ཅི་དང་ཅི་ཡོད་པ་དེ་དག་ཀྱང་ལེགས་པར་ཞུས་ཤིག་དང་།

དེས་ཁྱོད་ལ་ལུང་བསྟན་པར་འགྱུར་རོ་ཞེས་བཀའ་སྩལ་ཏེ།

བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་འདི་བཏང་སྟེ།

བྱང་ཆུབ་སེམས་དཔའ་གྲངས་མེད་པས་བསྐོར་ཅིང་མདུན་དུ་བདར་ནས།

འདིར་འོངས་པ་དེའི་གཟི་བརྗིད་ཀྱིས་ཁྱོད་ཀྱི་འོད་ཉམས་པར་གྱུར་ཏོ།

དེ་འོང་བ་ལ་རྗེས་སུ་ཡི་རང་བར་གྱིས་ཤིག །

དེ་བཞིན་གཤེགས་པ་ནམ་མཁའ་དང་མཉམ་

པས་བདག་ཅག་གི་དེ་བཞིན་གཤེགས་པ་ལ་མཆོད་པ་མཛད་པ་ལ་ཡང་ལྟོས་ཤིག་ཅེས་བྱས་སོ།

དེ་ནས་འཁོར་དེ་དག་ཐམས་ཅད་ཀྱིས་མེ་ལོང་གི་ངོས་ལ་བདག་གི་གཟུགས་མཐོང་བ་བཞིན་དུ།

འཇིག་རྟེན་གྱི་ཁམས་ཐག་རིང་པོ་ན་བཞུགས་པའི་དེ་བཞིན་གཤེགས་པ་དེ་དང་།

འཇིག་རྟེན་གྱི་ཁམས་དེ་མཐོང་ངོ་།

དེ་ནས་འཇམ་དཔལ་གཞོན་ནུར་གྱུར་པས་འཁོར་དེ་དག་ལ་འདི་སྐད་ཅེས་སྨྲས་སོ།

ཇི་ལྟར་ཁྱོད་ཀྱིས་འཇིག་རྟེན་གྱི་ཁམས་འདི་དང་།

དེ་བཞིན་གཤེགས་པ་འདི་མཐོང་བ་དེ་བཞིན་དུ།

ཕྱོགས་བཅུའི་དེ་བཞིན་གཤེགས་པ་རྣམས་དང་།

འཇིག་རྟེན་གྱི་ཁམས་གཞན་དག་ཀྱང་ལྟོས་ཤིག །

དེ་བཞིན་གཤེགས་པ་རྣམས་ནི་འདི་ལྟར་བདག་ཉིད་ཆེ་བ་ཡིན་ཏེ།

རང་རང་གི་གནས་ན་བཞུགས་བཞིན་དུ་ཡང་ཁྱེད་ལ་ཞལ་སྟོན་པར་མཛད་དོ།

འཁོར་དེ་དག་གིས་སྨྲས་པ།

ཀྱེ་མ་དེ་བཞིན་གཤེགས་པ་དེ་ལྟར་བདག་ཉིད་ཆེ་བ་ཡང་ཡོངས་སུ་མྱ་ངན་ལས་འདའ་བར་འགྱུར་བ་ལྟ།

ཀྱི་ཧུད་ཅེས་བླ་ཞིང་འཁོད་དོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པ་དག་གིས་བསྐོར་བ་ཡང་མཐོང་སྟེ།

བྱང་ཆུབ་སེམས་དཔའ་དེའི་ལུས་ཀྱི་བ་སྤུའི་ཁུང་བུ་རེ་རེ་ནས་པད་མ་ཆེན་པོ་བྱུང་ངོ་།

པད་མ་ཆེན་པོ་རེ་རེ་ལ་ཡང་གྲོང་ཁྱེར་བདུན་ཁྲི་བརྒྱད་སྟོང་བདུན་ཁྲི་བརྒྱད་སྟོང་ཡོད་ལ་གྲོང་ཁྱེར་དེ་དག་ཀྱང་ཡུལ་ཡངས་པ་ཅན་གྱི་ཐག་གྲུ་ཙམ་ཤ་སྟག་སྟེ།

རིན་པོ་ཆེ་སྣ་བདུན་གྱི་ར་བ་དང་འོབས་བདུན་རིམ་གྱིས་བསྐོར་ལ།

ཤིང་ཏ་ལའི་ཕྲེང་བ་བདུན་རིམ་གྱིས་མཛེས་པར་བྱས་པ་ཤ་སྟག་སྟེ།

འབྱོར་པ་དང་།

རྒྱས་པ་དང་།

བདེ་བ་དང་ལྡན་ཞིང་དགའ་དགའ་ལྟར་འདུག་ལ།

ར་བ་དེ་དག་ཀྱང་འཛམ་བུ་ཆུ་བོའི་གསེར་གྱི་བ་གམ་ཆེན་པོ་ཤ་སྟག་གིས་བསྐོར་ཏེ།

བ་གམ་ཐམས་ཅད་ཀྱི་བར་བར་ན་ཡང་ཤིང་ལྗོན་པ་གཞོན་ཤ་ཅན་འབྲས་བུ་དང་མེ་ཏོག་དང་ལྡན་པ་སྣ་མང་པོ་དག་ཡོད་དོ།

ཤིང་ལྗོན་པ་དེ་དག་

གི་ཡལ་ག་རླུང་གིས་བསྐྱོད་པ་ལས་ཀྱང་སིལ་སྙན་དགའ་བར་བྱེད་པའི་སྒྲ་སྙན་ཅིང་ཆགས་སུ་རུང་བ་འབྱུང་བ་སྣ་ལྔ་ལྔ་སྒྲོགས་ཏེ།

སྒྲ་དེ་དག་གིས་སེམས་ཅན་དེ་དག་རྩེ་ཞིང་དགའ་ལ་དགའ་མགུར་སྤྱོད་དོ།

འོབས་དེ་དག་ཐམས་ཅད་ཀྱང་ཆུ་བསིལ་ཞིང་ཤེལ་བཞིན་དུ་དང་བ་དག་གིས་གང་བར་འདུག་སྟེ།

དེ་དག་གི་ནང་ཁོ་ར་ཁོར་ཡུག་ཏུ་སེམས་ཅན་དེ་དག་རིན་པོ་ཆེའི་གྲུ་དག་གིས་དགའ་ཞིང་རྒྱུ་བར་བྱེད་དོ།

ཆུ་དེ་དག་ཀྱང་པད་མ་དང་།

ཨུད་པ་ལ་དང་།

ཀུ་མུ་ད་ཤིང་རྟའི་འཕང་ལོ་ཙམ་ཤ་སྟག་གིས་བརྒྱན་ཏོ།

འོབས་ཀྱི་ཁོ་ར་ཁོར་ཡུག་ཀྱང་སྐྱེད་མོས་ཚལ་གྱི་ཕྲེང་བས་མཛེས་པར་བྱས་ཏེ།

སྐྱེད་མོས་ཚལ་རེ་རེ་ལ་ཡང་རྫིང་བུ་ཐག་གྲུ་དཔག་ཚད་ཕྱེད་པ་ལྔ་ལྔ་ཡོད་དོ།

རྫིང་བུའི་ཆུ་དེ་དག་ཀྱང་པད་མ་དང་།

ཨུད་པ་ལ་དང་།

ཀུ་མུ་ད་ཁ་དོག་སྣ་ཚོགས་དྲི་ཞིམ་པོ་ཤིང་རྟའི་འཕང་ལོ་ཙམ་ཤ་སྟག་གིས་ཁེབས་པར་འདུག་ལ།

ཤིང་ལྗོན་པ་མེ་ཏོག་རྒྱས་པའི་ཕྲེང་བས་མཛེས་པར་བྱས་སོ།

སྐྱེད་མོས་ཚལ་ཁོ་ར་ཁོར་ཡུག་ན་ཡང་ངང་ངུར་དང་།

ཟལ་མོ་དང་།

ཁྲུང་ཁྲུང་ཤུག་དག་གིས་པད་མའི་ཟེ་འབྲུ་མྱོང་བར་བྱེད་དོ།

ཁོ་ར་ཁོར་ཡུག་གི་སྐྱེད་མོས་ཚལ་དེ་དང་དེ་དག་ན་ཡང་ཁང་ཁྱིམ་དག་ཡོད་ལ།

ཁང་པ་རེ་རེ་ལ་ཡང་ཆུ་ཞེང་དུ་དཔག་ཚད་བཞི་བཞི་ཡོད་དེ།

རྩིག་པ་ནི་གསེར་དང་།

དངུལ་དང་།

བཻ་དཱུརྱ་དང་།

ཤེལ་ལས་བྱས།

ས་གཞི་ནི་ཀེ་ཀེ་རུ་ལས་གྲུབ་པ་སྟེ།

ནོར་བུའི་འཇོ་ཚར་གྱིས་སྤེལ་ཅིང་སྣང་བར་བྱས་པའི་མུ་ཏིག་གི་དོ་ཤལ་སྤྱངས་པ་དང་ལྡན་པ།

གསེར་གྱི་རྟ་བབས་ཆེན་པོ་དང་།

སྐར་ཁུང་དང་།

དྲ་བ་དག་གིས་བརྒྱན་པའི་ཁང་བཟངས་མཐོན་པོ་ས་གཞི་ནི་གསེར་གྱི་བྱེ་མ་བདལ་བ་དང་ལྡན་པ་ཤ་སྟག་གོ།

རྫིང་བུ་རྣམས་ཀྱང་འདྲུལ་བའི་ལམ་གསེར་གྱི་ཐེམ་སྐས་ཐེམ་པ་བཅྭ་བརྒྱད་དང་ལྡན་པ་དང་།

མཐའ་ཐོག་ཐག་ཏུ་གསེར་གྱི་ཆུ་ཤིང་གི་ཕྲེང་བས་མཛེས་པར་བྱས་པའི་ལྷའི་ཙན་དན་གྱི་དྲི་བསུང་ཅན་གྱི་ཆུ་དང་ལྡན་པ་ཤ་སྟག་གོ།

གྲོང་ཁྱེར་ཆེན་པོ་དེ་དག་རེ་རེའི་ནང་ན་ཡང་རྒྱལ་པོ་བརྒྱད་ཁྲི་བཞི་སྟོང་

བརྒྱད་ཁྲི་བཞི་སྟོང་ཡོད་དེ།

དེ་དག་ཐམས་ཅད་ཀྱང་བུད་མེད་ཀྱི་ཚོགས་དཔག་ཏུ་མེད་པ་དཔག་ཏུ་མེད་པ་དག་གིས་བསྐོར་ཅིང་།

འདོད་པའི་ཡོན་ཏན་ལྔ་དང་ལྡན་ཏེ་རྩེ་ཞིང་དགའ་ལ་དགའ་མགུར་སྤྱོད་དོ།

སེམས་ཅན་གཞན་དག་ཀྱང་དེ་དང་འདྲ་སྟེ།

ས་ཕྱོགས་ཀ་ཙ་ལིན་དའི་གོས་ལྟར་རེག་ན་བདེ་བ།

ཙན་དན་གྱི་ཆུས་ཆག་ཆག་བཏབ་པ།

མེ་ཏོག་གི་སིལ་མས་གཏོར་བ།

གཞན་དག་ན་རྩེ་ཞིང་དགའ་ལ་དགའ་མགུར་སྤྱོད་དོ།

གྲོང་ཁྱེར་ཆེན་པོ་དག་ན་ཐེག་པ་ཆེན་པོའི་སྒྲ་མ་གཏོགས་པར་ཐེག་པ་གཞན་གྱི་སྒྲ་མེད་དོ།

པད་མ་ཆེན་པོ་དེ་དག་ལ་ཡང་སེང་གེའི་ཁྲི་ཆེན་པོ་རྐང་པ་གསེར་དང་།

དངུལ་དང་།

བཻ་དཱུརྱ་དང་།

ཤེལ་ལས་བྱས་པ།

ཀ་ལིང་ཀའི་རས་ཀྱིས་གཡོགས་པ།

ཆེ་བ་ལ་འོས་པ།

འཇིག་རྟེན་གསུམ་ན་ཕུལ་དུ་བྱ་བ་ཤ་སྟག་གིས་དཀྲིས་ཏེ།

སེང་གེའི་ཁྲི་དེ་དག་ལ་རྒྱལ་པོ་དེ་དག་འཁོད་ཅིང་སེམས་ཅན་གཞན་དག་ཐེག་པ་ཆེན་པོའི་མདོ་སྡེ་རྣམས་སློབ་པར་བྱེད་དེ།

རྒྱལ་པོ་དེ་དག་གི་མདུན་ན་ལ་ལ་ནི་ཡི་གེ་འདྲི།

ལ་ལ་ནི་ཀློག །

ལ་ལ་ནི་ཁ་ཏོན་སློབ་བོ།

དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་བ་སྤུའི་ཁུང་བུ་ནས་སྐྱེས་པའི་པད་མ་དག་ལ་འཁོད་པའི་སེམས་ཅན་དེ་དག་འདོད་པའི་ཡོན་ཏན་ལྔའི་དགའ་བ་དང་ལྡན་ཡང་།

དེ་དག་ཡོངས་སུ་སྤངས་ནས་མྱ་ངན་གྱིས་གདུངས་ཏེ་སྨྲེ་སྔགས་འདོན་ཅིང་།

ཀྱི་ཧུད་ཀྱི་ཧུད་ཅེས་བླ་ཞིང་འཁོད་དེ།

ཉིས་འགྱུར་དུ་མཆོད་པའི་ཚོགས་འབུལ་བར་བྱེད་དོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ཏེ།

དེ་ལྟ་བུའི་འབྱོར་པའི་རྣམ་པ་དག་སྟོན་ཅིང་མཆོད་པའི་ཚོགས་ཆེན་པོ་དང་།

ཞལ་ཟས་ཆེས་རྒྱ་ཆེ་བ་དག་ཁྱེར་ཏེ་འོངས་ནས།

ཞལ་ཟས་དེ་དག་དང་།

པད་མ་དེ་དག་གི་དྲི་བསུང་ཚོར་བ་གང་ཡིན་པ་དེ་དག་ཀྱང་ཉོན་མོངས་པ་དང་བྲལ་བར་གྱུར་ཏོ།

བྱང་ཆུབ་སེམས་དཔའི་མཐུ་ཆེན་པོས་འཇིག་རྟེན་

གྱི་ཁམས་ཐམས་ཅད་ཀྱང་མཐོང་བར་གྱུར་ཏོ།

བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཀྱི་ལུས་ཀྱི་ཚད་ཀྱང་ནམ་མཁའ་དང་མཉམ་པར་འདུག་སྟེ།

སུས་ཀྱང་མཐོང་བར་མི་ནུས་སོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་བཅོམ་ལྡན་འདས་ཀྱི་ཐད་དུ་སོང་སྟེ།

ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ།

བདག་གིས་ཕུལ་བའི་ཞལ་ཟས་བཅོམ་ལྡན་འདས་ཀྱིས་བཞེས་སུ་གསོལ།

དེ་ནས་བཅོམ་ལྡན་འདས་ཅང་མི་གསུང་བར་གྱུར་ཏེ།

ལན་གཉིས་ལན་གསུམ་དུ་གསོལ་ཀྱང་།

བཅོམ་ལྡན་འདས་ཅང་མི་གསུང་བར་བཞུགས་ནས་བྱང་ཆུབ་སེམས་དཔའ་དེ་ལངས་ཏེ་ཕྱོགས་གཅིག་ཏུ་འདུག་གོ།

དེ་བཞིན་དུ་ལྷོ་ཕྱོགས་དང་།

ནུབ་ཕྱོགས་དང་།

བྱང་ཕྱོགས་ལོགས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ཆེན་མཐའ་ཡས་ཞེས་བྱ་བ་འཁོར་གྱི་ཚོགས་ཆེན་པོ་དང་ལྡན་པ་ཤ་སྟག་ལྷགས་ཏེ།

དེ་དག་གི་པད་མ་དང་།

གྲོང་ཁྱེར་གྱི་ཚད་ཀྱང་སྔ་མ་སྔ་མ་ལས་ཉིས་འགྱུར་ཉིས་འགྱུར་གྱིས་ཆེ་བ་དང་།

འབྱོར་པ་ཉིས་འགྱུར་ཉིས་འགྱུར་གྱིས་ཆེ་བ་ཤ་སྟག་དང་ཆས་ཏེ།

དེ་དག་དེར་ལྷགས་ནས་བཅོམ་ལྡན་འདས་ལ་པད་མ་དག་གིས་མཆོད་པ་བྱས་ཏེ་སྔ་མ་བཞིན་དུ་ཕྱོགས་གཅིག་ཏུ་འཁོད་དོ།

ཤིང་སཱ་ལ་ཟུང་གི་དྲུང་གྲུབ་པའི་གནས་དེ་ཉིད་ན་དཀྱིལ་འཁོར་སུམ་ཅུ་རྩ་གཉིས་ཀྱི་ཚད་ཀྱི་ཁྱོན་གྱི་ས་གཞི་ལ།

སེམས་ཅན་མི་འཁོད་པའི་གོ་སྐབས་ཅི་ཡང་མེད་དོ།

དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ལུས་ཆེ་བ་རང་རང་གི་གཡོག་འཁོར་དག་དང་བཅས་པ་དེ་རྣམས་ཀྱང་།

ཁ་ཅིག་ནི་ས་ཕྱོགས་སྨྱུང་བུའི་རྩེ་མོའི་ཁྱོན་ཙམ་ལ་འཁོད་དོ།

ཁ་ཅིག་ནི་ཁབ་ཀྱི་རྩེ་མོའི་ཁྱོན་ཙམ་ལ་འཁོད་དོ།

ཁ་ཅིག་ནི་རྡུལ་ཕྲ་རབ་ཀྱི་ཁྱོན་ཙམ་ལ་བག་ཡངས་སུ་འཁོད་དོ།

འཇིག་རྟེན་གྱི་ཁམས་རྡུལ་ཕྲ་རབ་ཀྱི་རྡུལ་སྙེད་དག་ན་བྱང་ཆུབ་སེམས་དཔའ་འཁོད་པ་གང་ཡིན་པ་དེ་དག་ཀྱང་ཐབས་དེ་ལྟ་བུར་ལྷགས་ཏེ་འཁོད་དོ།

འཛམ་བུའི་གླིང་གི་སེམས་ཅན་ཡང་ཚེ་དང་ལྡན་པ་འོད་སྲུང་དང་།

གནས་བརྟན་ཀུན་དགའ་བོ་དང་།

རྒྱལ་པོ་མ་སྐྱེས་དགྲ་རྣམས་མ་གཏོགས་པར་དེར་མ་འོངས་པ་སུ་ཡང་མེད་དེ།

ཐ་ན་མི་གདུག་པ་དང་།

སྦྲུལ་གདུག་པ་དང་།

སྡིག་པ་དང་།

སྡོམ་ལ་སོགས་པ་ལས་མི་བཟད་པ་བཅུ་དྲུག་བྱེད་པ་ཡན་ཆད་ཀྱང་དེར་ལྷགས་སོ།

སྦྱིན་བྱེད་མའི་བུ་དང་།

ལྷ་མ་ཡིན་རྟག་ཏུ་འཁོན་གྱི་བསམ་པ་ཅན་ཐམས་ཅད་ཀྱང་སྡིག་པའི་ལས་སྤངས་ནས་གཅིག་ལ་གཅིག་བུ་དང་།

མ་དང་།

སྲིང་མོ་དང་འདྲ་བར་སེམས་པར་གྱུར་ཏོ།

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་སེམས་ཅན་ཐམས་ཅད་ཀྱང་གཅིག་ལ་གཅིག་བུ་གཅིག་པ་ལ་བྱ་བ་བཞིན་དུ་བྱམས་པར་བྱེད་དེ།

འདོད་ཆེན་པོ་ནི་མ་གཏོགས་སོ།

མི་མཇེད་ཀྱི་འཇིག་རྟེན་གྱི་ཁམས་འདི་ཡང་དེ་བཞིན་གཤེགས་པའི་མཐུས་བོང་བ་དང་།

རྡོ་དང་།

གསེག་མ་དང་།

རྡུ་བ་དང་།

ཚེར་མ་མེད་པར་གྱུར་ཏེ།

ཤིང་ལྗོན་པ་རིན་པོ་ཆེའི་འཁྲི་ཤིང་གིས་དཀྲིས་པ།

མཉེན་ཞིང་རེག་ན་འཇམ་པ་དག་དང་ལྡན་ཞིང་།

འཇིག་རྟེན་གྱི་ཁམས་བདེ་བ་ཅན་དང་འདྲ་བར་གྱུར་ཏོ།

སེམས་ཅན་དེར་ལྷགས་པ་ཐམས་ཅད་ཀྱིས་ཀྱང་དེ་ན་འཁོད་བཞིན་དུ།

ཇི་ལྟར་མེ་ལོང་གི་ངོས་ལ་རང་གི་གཟུགས་བརྙན་སྣང་བ་བཞིན་དུ།

རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་དང་།

སངས་རྒྱས་ཀྱི་ཞིང་འབྱོར་པ་དང་ལྡན་པ་གཞན་དག་ཀྱང་མཐོང་ངོ་།

དེ་ནས་དེ་བཞིན་གཤེགས་པའི་ཞལ་ནས་འོད་ཟེར་ཁ་དོག་སྣ་ཚོགས་སྔོན་པོ་དང་།

སེར་པོ་དང་།

དམར་པོ་དང་།

དཀར་པོ་དང་།

བཙོད་ཀ་དང་།

ཤེལ་གྱི་ཁ་དོག་ལྟ་བུ་དང་།

མེ་ལྕེ་ལྟ་བུ་དག་བྱུང་བ་གང་ཡིན་པ་དེ་དག་གིས་བྱ་བ་གང་ཡིན་པ་དེ་དག་གི་བྱ་བ་ཐམས་ཅད་བྱས་ཏེ་ཕྱིར་ལོག་ནས།

བཅོམ་ལྡན་འདས་ཉིད་ཀྱི་ཞལ་དུ་ཞུགས་ཏེ་མི་སྣང་བར་གྱུར་ཏོ།

འཁོར་ཐམས་ཅད་ཀྱི་འོད་ཀྱང་དེས་ཟིལ་གྱིས་གནོན་པར་གྱུར་ཏོ།

དེ་ནས་ལྷ་དང་།

མི་དང་།

ལྷ་མ་ཡིན་དང་བཅས་པའི་འཇིག་རྟེན་གྱིས་འོད་ཟེར་དེ་དག་བཅོམ་

ལྡན་འདས་ཀྱི་ཞལ་དུ་མི་སྣང་བར་གྱུར་པ་མཐོང་ནས།

འཇིགས་ཤིང་སྐྱི་བུང་ཞེས་བྱས་ཏེ།

རྒྱུ་མེད་པར་བཅོམ་ལྡན་འདས་ཀྱི་འོད་ཟེར་རྣམས་ཕྱིར་ལོག་ནས་མི་སྣང་བར་འགྱུར་བའི་མི་རིགས་ན།

གོར་མ་ཆག་པར་ཕྱོགས་བཅུ་དག་ཏུ་བྱ་བ་རྣམས་ཟིན་ནས་ད་ནི་གདོན་མི་ཟ་བར་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་འགྱུར་རོ།

བཅོམ་ལྡན་འདས་ཀྱིས་གང་ལས་ཀྱང་ཞལ་ཟས་མ་བཞེས་ན།

ཀྱེ་མ་སེམས་ཅན་ཐམས་ཅད་ལ་ཚད་མེད་པ་བཞི་སྤངས་སམ།

ཅི་སྨྱུང་བར་བཞུགས་པར་ཆད་དམ།

ཀྱེ་མ་ཅི་ཉི་མ་དང་ཟླ་བ་ནུབ་བམ།

ཅི་དམ་པའི་ཆོས་ཀྱི་གྲུ་བྱིང་ངམ།

ཀྱི་ཧུད་ཀྱི་ཧུད་ཅེས་བླ་ཞིང་འཁོད་དོ།

དེ་ནས་དེ་དག་རང་རང་གི་ཡན་ལག་རྣམས་རྨས་པར་བྱས་པའི་ཁྲག་གིས་ས་གཞི་འདམ་དུ་གྱུར་ཏོ།

ཆུ་ཀླུང་གསེར་ལྡན་ཡང་ཁྲག་ཏུ་འབབ་པར་གྱུར་ཏོ།

དེ་ནས་འཁོར་དེ་དག་གི་ནང་ན་གྲོང་ཁྱེར་ཀུ་ཤི་པ་མགར་བའི་བུ་དགེ་བསྙེན་སྐུལ་བྱེད་ཅེས་བྱ་བ་དེ་མགར་བའི་བུ་བཅྭ་ལྔ་དང་ཐབས་ཅིག་ཏུ་ལངས་ཏེ།

རང་རང་གི་སྤྱོད་ལམ་བཅོས་ནས་འཇིག་རྟེན་དག་ལ་བལྟས་ཏེ་བླ་གོས་ཕྲག་པ་གཅིག་ཏུ་གཟར་ནས།

པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

མཆི་མ་མི་ཐུབ་བཞིན་དུ་ཞབས་ལ་ཕྱག་འཚལ་ཏེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ནི་སེམས་ཅན་ཐམས་ཅད་ངེས་པར་བསྒྲལ་བའི་སླད་དུ།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ལ་ཞལ་ཟས་ཀྱི་ཐ་མ་དབུལ་བར་འཚལ་ཏེ།

བདག་ནི་མགོན་མ་མཆིས་པ་ལགས།

རྩ་ལག་མ་མཆིས་པ་ལགས།

སྐྱབས་མ་མཆིས་པ་ལགས།

ཕོངས་ཏེ་རེ་བ་ལགས་ན།

བཅོམ་ལྡན་འདས་ཀྱིས་བདག་གིས་ཕུལ་བའི་ཞལ་ཟས་བཞེས་ཏེ།

ཡོངས་སུ་མྱ་ངན་ལས་མི་འདའ་བར་མཛད་དུ་གསོལ།

བཅོམ་ལྡན་འདས་

དཔེར་གསོལ་ན་ཁྱིམ་བདག་གམ་བྲམ་ཟེ་ཤིན་ཏུ་དབུལ་པོ་འགའ་ཞིག་གཞན་གྱི་ཡུལ་དུ་མཆིས་ལ།

བདག་ཉིད་སྤྲོ་བ་བསྐྱེད་དེ་མཐར་གྱིས་ཞིང་ལས་བརྩམས་ནས།

དེས་རྨོན་གླང་རྨོ་སྐྱེན་པ་ཐོང་གཤོལ་དང་སྦྱར་བ་དག་གིས་ཞིང་ལ་རྡོ་དང་།

རྡུ་བ་དང་།

ཚེར་མ་མ་མཆིས་པར་བགྱིས་ཏེ།

རེ་བ་ཆེན་པོ་བསྐྱེད་ནས་སྤྲིན་ཆེན་པོ་ལས་ཆར་འབབ་པ་སྡོད་ཅིང་མཆིས་པ་དེ་བཞིན་དུ།

བཅོམ་ལྡན་འདས་བདག་ནི་ལུས་ཀྱི་ཞིང་ལ་ཉེས་པ་གསུམ་དང་།

བཞི་དང་བྲལ་བའི་ཡིད་དང་ངག་གི་རྨོན་གླང་དང་ཤེས་པའི་ཐོང་གཤོལ་གྱིས་ཉོན་མོངས་པ་རྣམ་པ་སྣ་ཚོགས་ཀྱི་རྡོ་དང་།

རྡུ་བ་དང་།

ཚེར་མ་མ་མཆིས་པར་བགྱིས་ནས།

ཁྱོད་ཀྱི་ཆོས་ཀྱི་སྤྲིན་ཆེན་པོ་ལས་ཆོས་ཀྱི་ཆར་པ་འབབ་པ་ལ་སྡོད་ཅིང་མཆིས་ཏེ།

དགེ་སློང་གི་དགེ་འདུན་དང་བཅས་པར་སྤྱན་འདྲེན་ན།

བདག་གི་དབུལ་བ་བསལ་བ་དང་།

སེམས་ཅན་ཐམས་ཅད་ལ་སྨན་པའི་སླད་དུ།

བདག་གིས་ཕུལ་བའི་ཞལ་ཟས་བཞེས་སུ་གསོལ།

བདག་ནི་མགོན་མ་མཆིས་པ།

སྐྱབས་མ་མཆིས་པ་ལགས་ན།

དེ་བཞིན་གཤེགས་པས་བདག་ལ་སྒྲ་གཅན་ཟིན་བཞིན་དུ་གཟིགས་པར་གསོལ།

དེ་ནས་བཅོམ་ལྡན་འདས་ཐམས་ཅད་མཁྱེན་པ་རྒྱལ་བ་གང་ཟག་བླ་ན་མེད་པས་མགར་བའི་བུ་སྐུལ་བྱེད་ལ་འདི་སྐད་ཅེས་བཀའ་སྩལ་ཏོ།

སྐུལ་བྱེད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ཀྱི་ཞལ་ཟས་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་བཞེས་པར་མཛད་དོ།

དེ་ནས་ལྷ་དང་།

མི་དང་།

ལྷ་མ་ཡིན་དེ་དག་གིས་སྐུལ་བྱེད་ཀྱིས་ཕུལ་བའི་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཆེན་པོ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པས་བཞེས་སོ་ཞེས་ཐོས་ནས་ངོ་མཚར་རྨད་དུ་བྱུང་བའི་ཆོས་ཐོབ་སྟེ།

ལེགས་སོ་ལེགས་སོ་ཞེས་སྐད་ཆེན་པོ་ཕྱུང་ནས་མགར་བའི་བུ་སྐུལ་བྱེད་ལ་འདི་སྐད་ཅེས་སྨྲས་སོ།

ཀྱེ་མགར་བའི་བུ་སྐུལ་བྱེད་ཁྱོད་སྐྱིད་དེ་བ་ཁྱོད་ཀྱིས་མི་ལུས་ཐོབ་པ་ནི་ཕན་ཐོགས་པར་གྱུར་ཏོ།

ལེགས་པར་ཐོབ་

བོ།

སྐུལ་བྱེད་འཇིག་རྟེན་ན་ཨུ་དུམ་བཱ་རའི་མེ་ཏོག་བཞིན་དུ་མཛེས་པ་ནི་རྙེད་པར་དཀའོ།

དེ་བས་ཀྱང་ཆེས་དེ་བཞིན་གཤེགས་པ་འབྱུང་བ་རྙེད་པར་དཀའོ།

དེ་བས་ཀྱང་དད་པ་རྙེད་པ་ཤིན་ཏུ་དཀའོ།

དེ་བས་ཀྱང་ཆེས་ཆོས་ཐོས་པ་རྙེད་པར་དཀའོ།

དེ་བས་ཀྱང་ཆེས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མ་དབུལ་བ་རྙེད་པར་དཀའོ།

དེ་བས་ན་ཞལ་ཟས་ཀྱི་ཐ་མ་སྦྱིན་པའི་ཕ་རོལ་ཏུ་ཕྱིན་པ་ཐོབ་པ་མགར་བའི་བུ་སྐུལ་བྱེད་ཁྱོད་ལ་ཕྱག་འཚལ་ལོ།

དཔེར་ན་སྟོན་ཟླ་འབྲིང་པོ་ཉ་ལ་སྤྲིན་མེད་པའི་ཚེ་ཟླ་བའི་དཀྱིལ་འཁོར་དྲི་མ་མེད་པ་མཛེས་པ་མཐོང་བ་ན་ཟླ་བ་འབའ་ཞིག་མངོན་དུ་སྣང་བ་དེ་བཞིན་དུ།

ཁྱོད་ཀྱིས་ཕུལ་བའི་ཞལ་ཟས་ཀྱི་ཐ་མ་དེ་བཞིན་གཤེགས་པས་བཞེས་པས་ན་ཁྱོད་འབའ་ཞིག་སེམས་ཅན་ཐམས་ཅད་ལ་མངོན་དུ་སྣང་ངོ་།

ཁྱོད་ལ་ཡང་དང་ཡང་དུ་ཕྱག་འཚལ་ལོ།

སྐུལ་བྱེད་ཁྱོད་ནི་མིའི་ལུས་བྱེད་བཞིན་དུ་ལྷའི་ཡང་ལྷ་ཡིན་ནོ།

དེ་བཞིན་གཤེགས་པའི་སྲས་སྒྲ་གཅན་ཟིན་དང་འདྲའོ་ཞེས་བྱས་ནས་ཚིགས་སུ་བཅད་པ་འདི་དག་ཀྱང་སྨྲས་སོ།

ཁྱོད་ནི་མི་མ་ཡིན་ཏེ་ལྷ་མཆོག་ཡིན།

མི་མཆོག་གཙོ་བོ་ཁྱད་པར་འཕགས་པ་སྟེ།

དེ་ཕྱིར་ཁྱོད་ལ་གསོལ་བ་འདི་སྐད་འདེབས།

སྟོན་པ་ཡོངས་སུ་མྱ་ངན་འདའ་བར་ཆས།

བདག་ཅག་ཀུན་ལ་བརྩེ་བས་སྐུལ་བྱེད་ཁྱོད།

སྐྱེ་བོ་རྣམས་ལ་ཡུན་དུ་ཕན་པའི་ཕྱིར།

འདིར་ནི་སྟོན་པ་དཔག་མེད་མགོན་པོ་ལ།

བཞུགས་ཤིང་རྒྱུན་དུ་བདུད་རྩི་སྟོན་ཅེས་གསོལ།

སྲིད་ལས་རྣམ་གྲོལ་མྱ་ངན་འདའ་བཞེད་ལ།

གལ་ཏེ་ཁྱོད་ཀྱིས་དེ་རིང་མ་གསོལ་ན།

བདག་ཅག་ཐམས་ཅད་མ་རུང་ཤེས་པར་གྱིས།

དེ་བས་ཕན་ཕྱིར་མགོན་ལ་གསོལ་བ་ཐོབ།

དེ་ནས་ལ་ལ་ཞིག་ཕ་མ་གཉིས་ཤི་བ་ལས་ཕྱིར་སོས་ཏེ་གསོན་པོར་འདུག་པ་མཐོང་ན་མཆོག་ཏུ་དགའ་བར་གྱུར་པ་དེ་ཁོ་ན་བཞིན་དུ་མགར་བའི་བུ་སྐུལ་བྱེད་དེ་མཆོག་ཏུ་དགའ་བར་གྱུར་ནས་ལག་པ་བརྐྱང་སྟེ།

བཅོམ་ལྡན་འདས་ལ་མགོ་བོས་ཕྱག་འཚལ་ནས་ལངས་ཏེ་ཚིགས་སུ་བཅད་པ་འདི་དག་སྨྲས་སོ།

ཀྱེ་མ་དེང་བདག་རྙེད་པ་ལེགས་པར་རྙེད།

མི་ཡི་འཇིག་རྟེན་སྐྱེས་པ་འབྲས་བུ་ཡོད།

ད་ནི་རྙེད་ལ་སོགས་ལས་འབྲལ་མི་འགྱུར།

མི་བཟད་དམྱལ་བར་ཡང་ནི་ལྟུང་མི་འགྱུར།

དེང་འདིར་རྙེད་པ་ཆེན་པོ་རྙེད་པ་འདི།

གསེར་གྱི་ཕུང་པོ་བས་ཀྱང་ལྷག་པ་ཡིན།

དཔའ་བོ་བདེ་གཤེགས་མགོན་དང་ཕྲད་པས་ན།

ཕྱིན་ཆད་བདག་ནི་དུད་འགྲོའི་འཇིགས་པ་མེད།

སངས་རྒྱས་ལ་ནི་དད་པ་གཏིང་ཟུག་པ།

དེང་རྙེད་ཨུ་དུམ་བཱ་རའི་མེ་ཏོག་བཞིན།

རབ་འཇིགས་ཡི་དགས་འགྲོ་བ་ཡོངས་སྤངས་ཤིང་།

ལྷ་མིན་སྐྱེ་བའི་ས་བོན་མི་བཟད་བཅོམ།

དེ་བཞིན་གཤེགས་འབྱུང་དཀོན་དང་དེང་ཕྲད་པ།

ཁབ་ཀྱི་རྩེ་མོར་ཡུངས་འབྲུ་ཆགས་པ་བཞིན།

དེ་ལ་ཕ་རོལ་ཕྱིན་མཆོག་སྦྱིན་ཕུལ་བས།

རྟག་ཏུ་ལྷ་ཡི་འགྲོ་བར་འཕར་བར་གྱུར།

ཆུ་གནས་པད་མ་ཆུས་མི་ཆགས་པ་ལྟར།

དྲང་སྲོང་ཆེན་པོ་འཇིག་རྟེན་ཆོས་རྣམས་ཀྱིས།

ཆགས་མེད་ཕྲད་པས་སྲིད་རྩེའི་ས་བོན་ཀུན།

དྲུངས་ཕྱུང་བདག་ཉིད་འཁོར་བའི་མཚོ་ཆེན་རྒལ།

རྒྱ་མཚོའི་ནང་གི་རུ་སྦལ་ཞར་བའི་མགྲིན།

གཉའ་ཤིང་མིག་ཏུ་ཆུད་དཀའ་འདྲ་བ་ལས།

བདེ་གཤེགས་དེང་ཕྲད་དེ་ལ་སྦྱིན་པ་ཕུལ།

དེ་ན་བདག་གིས་ཉོན་མོངས་གསོག་ཀུན་བཅོམ།

ལྷ་རྣམས་ཀྱིས་ནི་ཞལ་ཟས་བཟང་པོ་དག །

ཕུལ་ཡང་བདེ་གཤེགས་མ་བཞེས་བདག་ལས་ནི།

ཨེ་རཎྜ་ཡི་མེ་ཏོག་འདྲ་བཞེས་དེས།

བདག་ནི་འཇིག་རྟེན་རབ་མཆོག་དཔལ་ཡོན་ཅན།

ཚངས་པ་བརྒྱ་བྱིན་ལ་སོགས་འཇིག་རྟེན་འདི།

ཐམས་ཅད་ལྷགས་ཏེ་གུས་པར་བདག་ལ་མཆོད།

ཁྱུ་མཆོག་གནས་སུ་སོན་པ་གང་ཡིན་འདི།

སྐྱེ་བ་འདི་ཉིད་ལ་ནི་བདག་གིས་ཐོབ།

དེ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

མགོན་ཁྱོད་མྱ་ངན་འདའ་བ་མཐོང་ནས་ནི།

འཇིག་རྟེན་འདི་ཀུན་སྡུག་བསྔལ་གཟིར་བར་གྱུར།

དབང་མེད་ཀྱི་ཧུད་ཅེས་ནི་སྐད་ཆེར་བླ།

འདི་དག་མ་དོར་རྟག་ཏུ་སྲས་བཞིན་གཟིགས།

ལྷུན་པོའི་གསེར་གྱི་

རྩེ་མོ་རབ་མཐོ་བ།

མཚོ་ཆེན་དབུས་ན་མཛེས་པར་གནས་པ་ལྟར།

ཆོས་ཀྱི་མངའ་བདག་ཁྱོད་ནི་ཆོས་སྟོན་ཅིང་།

དགེ་འདུན་དབུས་སུ་མཛེས་པར་བཞུགས་སུ་གསོལ།

ཇི་ལྟར་ཉི་མ་གཟི་ཅན་ཤར་བ་ན།

འོད་ཟེར་དག་གིས་སྤྲིན་སྲབ་སེལ་བ་ལྟར།

དྲང་སྲོང་ཆེན་པོ་ཡེ་ཤེས་སྒྲོན་ཆེན་གྱིས།

སྐྱེ་བོ་མང་པོའི་མྱ་ངན་དེང་བསལ་མཛོད།

སེམས་ཅན་འདི་དག་ངུད་མོས་མིག་སྐྲངས་ཤིང་།

སྡུག་བསྔལ་གཅིག་པུའི་རྒྱ་མཚོའི་གཏིང་དུ་ཞུགས།

དེ་ཕྱིར་དད་པ་རྙེད་དཀའ་སྐྱེད་མཛད་ཅིང་།

འདི་རྣམས་སྡུག་བསྔལ་ཆོད་ལ་ཡུན་དུ་བཞུགས།

དེ་ནས་བཅོམ་ལྡན་འདས་ཀྱིས་སྐུལ་བྱེད་ལ་བཀའ་སྩལ་པ།

སྐུལ་བྱེད་དེ་ནི་དེ་བཞིན་ནོ།

དེ་ནི་དེ་བཞིན་ཏེ།

སངས་རྒྱས་འབྱུང་བ་ནི་ཨུ་དུམ་བཱ་རའི་མེ་ཏོག་བཞིན་ཤིན་ཏུ་རྙེད་པར་དཀའོ།

དད་པ་ཡང་རྙེད་པར་དཀའོ།

ཆོས་ཐོས་པ་ཡང་རྙེད་པར་དཀའོ།

དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚེ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཡང་རྙེད་པར་དཀའོ།

སྐུལ་བྱེད་གཞན་ཡང་ཁྱོད་མ་ངུ་མྱ་ངན་མ་བྱེད་པར་བདག་གིས་དེ་བཞིན་གཤེགས་པ་ལ་ཞལ་ཟས་ཀྱི་ཐ་མའི་སྦྱིན་པའི་ཕ་རོལ་ཏུ་ཕྱིན་པ་ཕུན་སུམ་ཚོགས་པ་ཐོབ་བོ་སྙམ་དུ་དགའ་བ་སྐྱེད་ཅིག་དང་།

དེ་བཞིན་གཤེགས་པ་ལ་བཅོམ་ལྡན་འདས་བཞུགས་སུ་གསོལ་ཞེས་དེ་སྐད་དུ་ཁྱོད་གསོལ་བ་མ་འདེབས་ཤིག །

སངས་རྒྱས་རྣམས་ཀྱི་ཆོས་ཀྱི་དེ་ཁོ་ན་ཉིད་ལ་རྟོགས་ཤིག །

མི་རྟག་པ་ཉིད་ལ་འཇུག་པར་གྱིས་ཤིག །

འདུ་བྱེད་རྣམས་ཀྱི་རང་བཞིན་ཤེས་པར་གྱིས་ཤིག་ཅེས་བཀའ་སྩལ་ནས་ཚིགས་སུ་བཅད་པ་འདི་དག་གསུངས་སོ།

ཚེ་ནི་ཤིན་ཏུ་རིང་ཡང་འཇིག་པར་འགྱུར།

འདིར་ནི་ཐམས་ཅད་ངེས་པར་འཆི་བར་འགྱུར།

འཚོ་བའི་འཇིག་རྟེན་འཇིག་པའི་ཆོས་ཅན་ཡིན།

འབྱོར་པ་ཐམས་ཅད་རྒུད་པར་གཞོལ་བར་འགྱུར།

རྟག་ཏུ་ལང་ཚོ་རྒ་བས་ངེས་པར་འཇོམས།

གཟུགས་བཟང་ནད་མེད་ནད་ཀྱིས་འཇིག་པར་འགྱུར།