經部第56卷（མདོ་སྡེ་ན་བཞུགས་སོ། །）

རྒྱ་གར་སྐད་དུ།

ཨཱརྱཱ་པྲ་ཏྱུད་པན་ནེ་བུད་དྷ་ས་མ་མུ་ཁ་ཨ་བ་སྠི་ཏ་ས་མཱ་དྷི་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་ན།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ།

ཐམས་ཅད་ཀྱང་དགྲ་བཅོམ་པ།

ཟག་པ་ཟད་པ།

ཉོན་མོངས་པ་མེད་པ།

དབང་དང་ལྡན་པར་གྱུར་པ།

བྱ་བ་བྱས་པ།

བྱེད་པ་བྱས་པ།

ཁུར་བོར་བ།

བདག་གི་དོན་རྗེས་སུ་ཐོབ་པ།

སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ།

ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ།

སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་དུ་སོན་པ།

རྣམ་པར་ཐར་པ་བརྒྱད་ཐོབ་པ་ཤ་

སྟག་སྟེ།

གང་ཟག་གཅིག་མ་གཏོགས་པ་ནི་འདི་ལྟ་སྟེ།

ཚེ་དང་ལྡན་པ་ཀུན་དགའ་བོའོ།

དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཞེས་བྱ་བ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ།

བྱང་ཆུབ་སེམས་དཔའ་ལྔ་བརྒྱ་ཙམ་ཐམས་ཅད་ཀྱང་ཁྱིམ་པར་གྱུར་ཅིང་བསླབ་པའི་གཞི་ལྔ་ཡོངས་སུ་བཟུང་བ་ཤ་སྟག་དང་ལྷན་ཅིག་ཏུ་ཆོས་ཉན་པའི་ཕྱིར་བཅོམ་ལྡན་འདས་ཀྱི་ཞབས་འབྲིང་བྱེད་པར་གྱུར་ཏོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས།

བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་བདུན་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འདུག་གོ།

བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་ཀྱང་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་བདུན་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་དུ་འཁོད་དོ།

དགེ་སློང་ལྔ་བརྒྱ་ཙམ་པོ་དེ་དག་ཀྱང་ཕྱེ་མ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་བདུན་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ།

ཡང་དེའི་ཚེ་ཚེ་དང་ལྡན་པ་ཤཱ་རིའི་བུ་དང་།

ཚེ་དང་ལྡན་པ་མཽད་གལ་གྱི་བུ་ཆེན་པོ་མཉན་ཡོད་ཀྱི་

གྲོང་ཁྱེར་ཆེན་པོར་དབྱར་གནས་ནས་དགེ་སློང་ལྔ་བརྒྱ་ཙམ་དང་ལྷན་ཅིག་ཏུ་རིམ་གྱིས་ཡུལ་རྒྱུ་ཞིང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་གང་ན་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་པས་དགེ་སློང་གང་དག་ཡུལ་སོ་སོ་ན་རྟེན་ཅིང་གནས་པ་དེ་དག་ཐམས་ཅད་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ།

ཡང་དེའི་ཚེ་སྨྱིག་མའི་ཚལ་བྱ་ཀ་ལན་ད་ཀ་གནས་པར་དགེ་སློང་འབུམ་ལྷན་ཅིག་ཏུ་འདུས་ཏེ་འཁོད་པར་གྱུར་ཏོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་བྱ་བ།

མངོན་པར་མཛད་པས་སྐྱེ་དགུའི་བདག་མོ་ཆེན་མཱོ་གཽ་ཏ་མི་ལ་སོགས་པ་དགེ་སློང་མ་སུམ་ཁྲི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་བདུན་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཀོན་མཆོག་འབྱུང་གནས་ཞེས་བྱ་བ་ཡངས་པའི་གྲོང་ཁྱེར་ཆེན་པོ་ནས་བྱུང་སྟེ།

ལིད་ཙ་བཱི་གཞོན་ནུ་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་

ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ཕུག་སྦས་ཀྱང་གྲོང་ཁྱེར་ཆེན་པོ་ཙམ་པ་ཡ་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འདམ་བུས་བྱིན་ཡང་གྲོང་ཁྱེར་ཆེན་པོ་བྭ་རཱ་ཎ་སཱི་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟངས་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་

ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དེད་དཔོན་ཆེན་པོ་དང་།

ཁྱིམ་བདག་མགོན་མེད་ཟས་སྦྱིན་ཡང་མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་ཡང་ཀོའུ་ཤམ་བིའི་གྲོང་ཁྱེར་ཆེན་པོ་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་ཡང་གནས་བཅས་ཀྱི་གྲོང་ཁྱེར་ཆེན་པོ་ནས་བྱུང་སྟེ།

སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་།

སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

རྒྱལ་པོ་མ་སྐྱེས་དགྲ་ཡང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ།

སྲོག་ཆགས་སུམ་ཁྲི་ཙམ་གྱིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་སྨྱིག་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་།

བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

རྒྱལ་པོ་ཆེན་པོ་བཞི་དང་།

ལྷའི་དབང་པོ་བརྒྱ་བྱིན་དང་།

མི་མཇེད་ཀྱི་བདག་པོ་ཚངས་པ་དང་།

ལྷའི་བུ་དཔལ་བཟངས་ཀྱང་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ།

ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

ལྷའི་བུ་དབང་ཕྱུག་ཆེན་པོ་ཡང་གནས་གཙང་མའི་རིས་ཀྱི་ལྷའི་བུ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང་།

ལྷ་མ་ཡིན་གྱི་དབང་པོ་བཞི་ཡང་ལྷ་མ་ཡིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག །

ཀླུའི་རྒྱལ་པོ་དགའ་བོ་དང་ཉེ་དགའ་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག །

ཀླུའི་རྒྱལ་པོ་མ་དྲོས་ཀྱང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག །

ཀླུའི་རྒྱལ་པོ་གཟི་ཅན་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག །

ཀླུའི་རྒྱལ་པོ་ཨེ་ལའི་འདབ་མ་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་མཛད་དོ།

ཡང་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི།

འདི་ནས་སྟེང་དུ་ཚངས་པའི་འཇིག་རྟེན་མན་ཆད་ཐ་ན་འཁར་བའི་རྩེ་མོ་

གཟུགས་པའི་ས་ཁྱོན་ཙམ་ཡང་དབང་ཆེ་བ་དབང་ཆེ་བར་གྲགས་པའི་ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

མི་འམ་ཅི་དང་།

ལྟོ་འཕྱེ་ཆེན་པོ་རྣམས་ཀྱིས་མ་གང་བ་གང་ཡང་མེད་པར་གྱུར་ཏོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ།

བཅོམ་ལྡན་འདས་ཀྱིས་བདག་ལ་སྐབས་ཕྱེ་ན།

བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ།

བཟང་སྐྱོང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་ཅི་དང་ཅི་འདོད་པ་དྲིས་ཤིག་དང་།

དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ།

དེ་སྐད་ཅེས་བཀའ་སྩལ་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་གང་ལ་གནས་ན་ཐོས་པ་རྒྱ་མཚོ་འདྲ་བ་དང་།

ཐོས་པ་བསྩགས་པ་རྣམས་སུ་གྱུར་པ་དང་།

ནེམ་ནུར་མ་མཆིས་པ་དང་།

ཐེ་ཚོམ་མ་མཆིས་པ་དང་།

ཡིད་གཉིས་མ་མཆིས་པ་རྣམས་སུ་འགྱུར་བ་དང་།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་མི་ཉམས་ཤིང་ཡོངས་སུ་མི་ཉམས་པ་རྣམས་སུ་འགྱུར་བ་དང་།

མི་ངལ་བ་རྣམས་སུ་མི་སྐྱེ་བ་དང་།

སྐྱེ་བ་དྲན་པ་རྣམས་སུ་འགྱུར་བ་དང་།

ཐ་ན་རྨི་ལམ་དུ་ཡང་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་སུ་འགྱུར་བ་དང་།

གཟུགས་བཟང་ཞིང་མཛེས་ལ་བལྟ་ན་སྡུག་ཅིང་ཁ་དོག་བཟང་པོ་རྒྱས་པ་མཆོག་དང་ལྡན་པ་རྣམས་

སུ་འགྱུར་བ་དང་།

རིགས་མཐོ་བ་དང་རིགས་ཆེ་བ་རྣམས་སུ་འགྱུར་བ་དང་།

གཡོག་འཁོར་མང་ཞིང་གཡོག་འཁོར་མི་ཕྱེད་པ་རྣམས་སུ་འགྱུར་བ་དང་།

རྟོགས་པ་དང་ལྡན་པ་རྣམས་སུ་འགྱུར་བ་དང་།

དྲན་པ་དང་ལྡན་པ་རྣམས་སུ་འགྱུར་བ་དང་།

བློ་གྲོས་དང་ལྡན་པ་རྣམས་སུ་འགྱུར་བ་དང་།

དཔལ་དང་ལྡན་པ་རྣམས་སུ་འགྱུར་བ་དང་།

བརྟན་པ་དང་ལྡན་པ་རྣམས་སུ་འགྱུར་བ་དང་།

རྫུ་འཕྲུལ་དང་ལྡན་པ་རྣམས་སུ་འགྱུར་བ་དང་།

ཤེས་རབ་དང་ལྡན་པ་རྣམས་སུ་འགྱུར་བ་དང་།

བསོད་ནམས་དང་ལྡན་པ་རྣམས་སུ་འགྱུར་བ་དང་།

ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པ་རྣམས་སུ་འགྱུར་བ་དང་།

ང་རྒྱལ་བཅག་པ་རྣམས་སུ་འགྱུར་བ་དང་།

བྱམས་པ་ལ་གནས་པ་རྣམས་སུ་འགྱུར་བ་དང་།

ཡེ་ཤེས་དང་ལྡན་པ་རྣམས་སུ་འགྱུར་བ་དང་།

བློ་དང་ལྡན་པ་རྣམས་སུ་འགྱུར་བ་དང་།

བརྩོན་འགྲུས་དང་ལྡན་པ་རྣམས་སུ་འགྱུར་བ་དང་།

མ་ཞུམ་པ་རྣམས་སུ་འགྱུར་བ་དང་།

དོན་གྱི་རྗེས་སུ་འགྲོ་བ་རྣམས་སུ་འགྱུར་བ་དང་།

ཆོས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང་།

ཞི་གནས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང་།

ལྷག་མཐོང་གི་རྗེས་སུ་འགྲོ་བ་རྣམས་སུ་འགྱུར་བ་དང་།

བསམ་གཏན་གྱི་རྗེས་སུ་འགྲོ་བ་རྣམས་སུ་འགྱུར་བ་དང་།

ཏིང་ངེ་འཛིན་གྱི་རྗེས་སུ་འགྲོ་བ་རྣམས་སུ་འགྱུར་བ་དང་།

ཤེས་རབ་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང་།

སྟོང་པ་ཉིད་དང་།

མཚན་མ་མེད་པ་དང་།

སྨོན་པ་མེད་པའི་ཆོས་རྣམས་ཀྱིས་མི་སྐྲག་མི་དངང་དངང་བར་མི་འགྱུར་བ་རྣམས་སུ་འགྱུར་བ་དང་།

གཡང་ས་ཆེན་པོར་མི་ལྟུང་བའི་སྟེང་དུ་ཆོས་རབ་ཏུ་འཛིན་པ་དང་།

ཆོས་སྨྲ་བ་ཆེན་པོ་རྣམས་སུ་འགྱུར་བ་དང་།

སངས་རྒྱས་ཀྱི་ཞིང་གང་དང་གང་དུ་སྐྱེ་བར་སེམས་ཀྱིས་སྨོན་པ་དེ་དང་དེར་སྐྱེ་བ་དང་།

མུ་སྟེགས་ཅན་གྱི་གནས་ཐམས་ཅད་ཀྱིས་ཡོངས་སུ་མི་ཟིན་པ་རྣམས་སུ་འགྱུར་བ་དང་།

རྒྱུའི་སྟོབས་ཅན་རྣམས་སུ་འགྱུར་གྱི་རྐྱེན་གྱི་སྟོབས་ཅན་རྣམས་སུ་མི་འགྱུར་བ་དང་།

བསམ་པའི་སྟོབས་ཅན་རྣམས་སུ་འགྱུར་བ་དང་།

སྦྱོར་བའི་སྟོབས་ཅན་རྣམས་སུ་འགྱུར་བ་དང་།

དབང་པོའི་སྟོབས་ཅན་རྣམས་སུ་འགྱུར་བ་དང་།

དམིགས་པའི་སྟོབས་ཅན་རྣམས་སུ་འགྱུར་བ་དང་།

ངེས་པར་སེམས་པའི་སྟོབས་ཅན་རྣམས་སུ་འགྱུར་བ་དང་།

ཞི་གནས་ཀྱི་སྟོབས་ཅན་རྣམས་སུ་འགྱུར་བ་དང་།

རྣམ་པར་ལྟ་བའི་སྟོབས་ཅན་རྣམས་སུ་འགྱུར་བ་དང་།

མོས་པའི་སྟོབས་ཅན་རྣམས་སུ་འགྱུར་བ་དང་།

སྨོན་ལམ་གྱི་སྟོབས་ཅན་རྣམས་སུ་འགྱུར་བ་དང་།

བསམ་པ་ཡོངས་སུ་མི་ཟད་པ་རྣམས་སུ་འགྱུར་བ་དང་།

ཐོས་པ་རྒྱ་མཚོ་དང་མཚུངས་པས།

རྒྱ་མཚོ་ཆུ་གཏེར་ལྟ་བུ་རྣམས་སུ་འགྱུར་བ་དང་།

དཀར་པོའི་ཆོས་ཡོངས་སུ་རྫོགས་པས་ཟླ་བ་ལྟ་བུ་རྣམས་སུ་འགྱུར་བ་དང་།

མི་ཤེས་པའི་མུན་པ་བསལ་བས་ཉི་མ་ལྟ་བུ་རྣམས་སུ་འགྱུར་བ་དང་།

སྣང་བར་བྱེད་པས་མར་མེ་ལྟ་བུ་རྣམས་སུ་འགྱུར་བ་དང་།

ཤིན་ཏུ་མི་གོས་པས་བར་སྣང་ལྟ་བུ་རྣམས་སུ་འགྱུར་བ་དང་།

སེམས་ནམ་མཁའ་དང་མཚུངས་པས་མི་གནས་པ་རྣམས་སུ་འགྱུར་བ་དང་།

ཆོས་ཐམས་ཅད་ངེས་པར་རྟོགས་པས་རྡོ་རྗེ་ལྟ་བུ་རྣམས་སུ་འགྱུར་བ་དང་།

མཐུ་བརྟན་པས་རི་ལྟ་བུ་རྣམས་སུ་འགྱུར་བ་དང་།

མི་གཡོ་བས་བརྟན་པའི་ཆོས་རྣམས་སུ་འགྱུར་བ་དང་།

ལེགས་པར་གནས་པས་སྒོའི་ཐེམ་པ་ལྟ་བུ་རྣམས་སུ་འགྱུར་བ་དང་།

སེམས་ལས་སུ་རུང་བས་བྱི་ལའི་པགས་པ་ལྟ་བུ་རྣམས་སུ་འགྱུར་བ་དང་།

བྱ་ལྟར་གང་དང་གང་དུ་འདོད་པར་འགྲོ་བས་ཡོངས་སུ་འཛིན་པ་མ་མཆིས་པ་རྣམས་སུ་འགྱུར་བ་དང་།

གདོལ་བུ་ལྟ་བུར་ང་རྒྱལ་བཅག་པ་རྣམས་སུ་འགྱུར་བ་དང་།

གྲོང་དང་གྲོང་ཁྱེར་དང་གྲོང་རྡལ་དང་།

ཡུལ་འཁོར་དང་།

ཕོ་བྲང་འཁོར་ལ་མངོན་པར་དགའ་བ་མི་སྐྱེད་པ་དང་།

རི་དགས་དང་།

སྤྲེའུ་དང་མཚུངས་པས་དགོན་པ་ལ་མངོན་པར་དགའ་བ་རྣམས་སུ་འགྱུར་བ་དང་།

ཁྱིམ་པ་དང་རབ་ཏུ་བྱུང་བ་རྣམས་དང་ལྷན་ཅིག་ཏུ་མི་སྟེན་པས་མ་འདྲེས་པ་རྣམས་སུ་འགྱུར་བ་དང་།

ཚོགས་ཡོངས་སུ་སྡུད་པས་ཚོགས་ཀྱི་སྟོན་པ་རྣམས་སུ་འགྱུར་བ་དང་།

སེམས་ཅན་ཐམས་ཅད་ཀྱིས་མི་བསྐྱོད་པ་རྣམས་སུ་འགྱུར་བ་དང་།

བདུད་ཐམས་ཅད་ཀྱིས་གདུལ་དཀའ་བ་རྣམས་སུ་འགྱུར་བ་དང་།

ཆོས་ཐམས་ཅད་ཤིན་ཏུ་ངེས་པར་ཤེས་པས་སོ་སོ་ཡང་དག་པར་རིག་པ་ཐོབ་པ་

རྣམས་སུ་འགྱུར་བ་དང་།

སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མི་འཇོག་པ་རྣམས་སུ་འགྱུར་བ་དང་།

བྱམས་པ་ཆེན་པོ་རབ་ཏུ་མི་གཡོ་བས་ཟིལ་ཀྱིས་གནན་པར་དཀའ་ཞིང་བསམ་པ་བརྟན་པ་རྣམས་སུ་འགྱུར་བ་དང་།

དམིགས་སུ་མེད་པ་ལ་སྤྱད་ཅིང་བརྗོད་དུ་མེད་པའི་སྤྱོད་ཡུལ་དང་ལྡན་པས་ལྷག་པའི་བསམ་པ་ཟབ་པ་རྣམས་སུ་འགྱུར་བ་དང་།

ཆོས་ཀྱི་ཤུགས་ཀྱི་དགའ་བས་བག་ཡོད་པ་མང་ཞིང་བསམ་པ་མཉེན་པ་རྣམས་སུ་འགྱུར་བ་དང་།

སངས་རྒྱས་ཐམས་ཅད་ལ་མཆོད་པ་དང་རིམ་གྲོའི་ལས་བགྱིད་པས་ལྷག་པའི་བསམ་པ་རྒྱ་ཆེ་བ་རྣམས་སུ་འགྱུར་བ་དང་།

དགེ་བའི་རྩ་བ་སྣ་ཚོགས་ཡང་དག་པར་བསྒྲུབས་པས་ལྷག་པའི་བསམ་པ་སྣ་ཚོགས་རྣམས་སུ་འགྱུར་བ་དང་།

རྒྱན་གྱིས་བརྒྱན་པ་རྣམ་པར་དག་པས་ལྷག་པའི་བསམ་པ་དགེ་བ་རྣམས་སུ་འགྱུར་བ་དང་།

རྫུན་དང་ཁོང་ཁྲོ་བའི་སྐྱོན་སྤངས་པས་ལྷག་པའི་བསམ་པ་བཟང་པོ་རྣམས་སུ་འགྱུར་བ་དང་།

ཐམས་ཅད་མཁྱེན་པའི་ཡེ་ཤེས་ཀྱི་སྣང་བ་ཐོབ་པས་ལྷག་པའི་བསམ་པ་ཡོངས་སུ་དག་པ་རྣམས་སུ་འགྱུར་བ་དང་།

སེམས་དང་ཞིང་ཐ་བ་མེད་ལ་ཤེས་རབ་རྒྱས་པ་ཡོངས་སུ་བཟུང་བས་ཡིད་བདེ་བའི་ལྷག་པའི་བསམ་པ་རྣམས་སུ་འགྱུར་བ་དང་།

འཇིག་རྟེན་གྱི་ཁམས་ཐམས་ཅད་རྒྱན་གྱིས་བརྒྱན་པ་རྣམ་པར་དག་པས་བཀོད་པ་ཆེན་པོ་ལ་སྤྱད་པའི་ལྷག་པའི་བསམ་པ་རྣམས་སུ་འགྱུར་བ་དང་།

ཉན་ཐོས་དང་རང་སངས་རྒྱས་ཀྱི་སེམས་ཡིད་ལ་བགྱི་བ་དང་བྲལ་བས།

ཚུལ་ཁྲིམས་ཡོངས་སུ་དག་པ་རྣམས་སུ་འགྱུར་བ་དང་།

བརྩམས་པ་ཐམས་ཅད་ཉམས་སུ་ལོན་པས་ཡི་དམ་ལ་བརྟན་པ་རྣམས་སུ་འགྱུར་བ་དང་།

སེམས་ཅན་ཐམས་ཅད་དགེ་བའི་ཆོས་རྗེས་སུ་སྤྱོད་པའི་སྔོན་དུ་འགྲོ་བ་རྣམས་སུ་འགྱུར་བ་དང་།

བྱང་ཆུབ་སེམས་དཔའ་ཐམས་ཅད་ཀྱི་བསླབ་པ་རྣམས་དང་ཕ་རོལ་ཏུ་ཕྱིན་པ་རྣམས་ལ་ཡོངས་སུ་མི་འཇིགས་པ་རྣམས་སུ་འགྱུར་བ་དང་།

སངས་རྒྱས་ཀྱི་ཆོས་ཐམས་ཅད་ལ་ཕྱིར་མི་ལྡོག་པ་རྣམས་སུ་འགྱུར་བ་དང་།

བདུད་དང་མུ་སྟེགས་ཅན་གཞན་དང་ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པ་རྣམས་སུ་འགྱུར་བ་དང་།

ཡིད་ལ་བྱེད་པ་རྣམས་

སངས་རྒྱས་ཀྱི་ཆོས་རྣམས་ལ་གཞོག་པས་ཆོས་ཐམས་ཅད་ལ་མོས་པ་རྣམས་སུ་འགྱུར་བ་དང་།

སངས་རྒྱས་ཐམས་ཅད་ལ་ཕར་འདུ་ཤེས་པ་རྣམས་སུ་འགྱུར་བ་དང་།

ཆོས་ཐམས་ཅད་ལ་སྣང་བ་སྐྱེས་པས་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་རྣམས་སུ་འགྱུར་བ་དང་།

སངས་རྒྱས་ཀྱི་ཆོས་ཐམས་ཅད་མངོན་དུ་གྱུར་པས་ཤེས་པ་སྒྲིབ་པ་མེད་པ་རྣམས་སུ་འགྱུར་བ་དང་།

ཆོས་ཐམས་ཅད་ལ་རློམ་སེམས་མེད་པས་སྒྱུ་མའི་སྐྱེས་བུ་ལྟ་བུ་རྣམས་སུ་འགྱུར་བ་དང་།

མ་སྐྱེས་མ་འོངས་ཤིང་འགྲོ་བ་མེད་པའི་ཆོས་དང་ལྡན་པས་སྤྲུལ་པ་ལྟ་བུ་རྣམས་སུ་འགྱུར་བ་དང་།

དུས་གསུམ་ལ་རྟོག་པས་རྨི་ལམ་ལྟ་བུ་རྣམས་སུ་འགྱུར་བ་དང་།

འཇིག་རྟེན་གྱི་ཁམས་ཐམས་ཅད་དུ་རང་གི་ལུས་ཡང་དག་པར་སྟོན་པས་གཟུགས་བརྙན་ལྟ་བུ་རྣམས་སུ་འགྱུར་བ་དང་།

འཕོ་བ་མེད་ཅིང་མི་གནས་ལ་རྟེན་པ་མེད་པའི་ཆོས་ཅན་པས་བྲག་ཅ་ལྟ་བུ་རྣམས་སུ་འགྱུར་བ་དང་།

འཆི་འཕོ་དང་།

སྐྱེ་བ་ཐམས་ཅད་ལ་གྲིབ་མ་ལྟ་བུ་རྣམས་སུ་འགྱུར་བ་དང་།

དངོས་པོའི་འདུ་ཤེས་སྤངས་པས་དངོས་པོ་མེད་པར་ཤེས་པ་ལ་གནས་པ་རྣམས་སུ་འགྱུར་བ་དང་།

གཉིས་ལ་ཀུན་ཏུ་སྤྱོད་པ་མེད་པས་མཚན་ཉིད་མེད་པའི་ཆོས་ལ་གཞོལ་བ་རྣམས་སུ་འགྱུར་བ་དང་།

བྱང་ཆུབ་ཀྱི་སེམས་ཚད་མེད་པས།

ཆོས་ཀྱི་དབྱིངས་ཀྱི་མཐས་གཏུགས་པ་རྣམས་སུ་འགྱུར་བ་དང་།

སེམས་ཀྱི་རྒྱུད་མི་གཡོ་བས་འཇིག་རྟེན་གྱི་ཁམས་ཐམས་ཅད་དུ་མི་གཡོ་བ་རྣམས་སུ་འགྱུར་བ་དང་།

སངས་རྒྱས་ཀྱི་ཞིང་ཐམས་ཅད་ལ་མི་ཆགས་པའི་སྤྱོད་ཡུལ་དང་ལྡན་པ་རྣམས་སུ་འགྱུར་བ་དང་།

ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་ལ་མཁས་པས་གཟུངས་ཀྱི་སྒོར་ཞུགས་པ་རྣམས་སུ་འགྱུར་བ་དང་།

སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་གྱུར་པས་ཆོས་ཀྱི་སྣོད་རྣམས་སུ་འགྱུར་བ་དང་།

སངས་རྒྱས་ཀྱི་གཟི་བརྗིད་ཀྱིས་བརྟན་པས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་རྣམས་སུ་འགྱུར་བ་དང་།

ཁྱུ་མཆོག་དང་སེང་གེའི་སྒྲ་སྒྲོགས་པས་བག་ཚ་བ་མེད་པ་རྣམས་སུ་འགྱུར་བ་དང་།

འཇིག་རྟེན་པ་ཐམས་ཅད་ཡང་དག་པར་དགའ་བར་བྱེད་པས་འཇིགས་པ་མེད་པ་རྣམས་སུ་འགྱུར་བ་དང་།

སངས་

རྒྱས་ཐམས་ཅད་དང་མཉམ་པས་རྨོངས་པ་མེད་པ་རྣམས་སུ་འགྱུར་བ་དང་།

ཆོས་ཐམས་ཅད་ལ་གཞན་གྱི་དྲིང་མི་འཇོག་ཅིང་ཐེ་ཚོམ་དང་བྲལ་བས་དེ་བཞིན་ཉིད་རབ་ཏུ་རྟོགས་པ་རྣམས་སུ་འགྱུར་བ་དང་།

དྲིས་པ་ཐམས་ཅད་ལུང་བསྟན་པ་ལ་སྲིད་པ་དང་དུས་གསུམ་སྟོན་ནུས་པ་རྣམས་སུ་འགྱུར་བ་དང་།

སྙིང་རྗེ་ཆེན་པོ་ཐོབ་པས་ཕན་པ་འདོད་པ་རྣམས་སུ་འགྱུར་བ་དང་།

ཆོས་སྟོན་པ་ལ་ངལ་བ་མེད་པ་རྣམས་སུ་འགྱུར་བ་དང་།

སེམས་ཅན་ཐམས་ཅད་ཡོངས་སུ་མི་གཏོང་བ་ལ་གནས་པ་རྣམས་སུ་འགྱུར་བ་དང་།

སྒྱུ་མེད་པས་གཡོ་མེད་པ་རྣམས་སུ་འགྱུར་བ་དང་།

འཇིག་རྟེན་ཐམས་ཅད་ཀྱི་སྒྲོན་མར་གྱུར་པས་དྲང་པོ་རྣམས་སུ་འགྱུར་བ་དང་།

ཁམས་གསུམ་ཐམས་ཅད་ན་ཚད་མེད་པ་རྣམས་སུ་འགྱུར་བ་དང་།

ཐ་སྙད་ཙམ་དུ་རྣམ་པར་དཔྱོད་པས་ཉོན་མོངས་པ་མེད་པ་ལ་གནས་པ་རྣམས་སུ་འགྱུར་བ་དང་།

གཞི་མེད་པ་ལ་དགའ་བས་མ་འདྲེས་པར་གནས་པ་རྣམས་སུ་འགྱུར་བ་དང་།

རྣམ་པར་མི་རྟོག་པའི་ཆོས་ཅན་པས་ཡང་དག་པའི་མཐའ་ལ་གནས་པ་རྣམས་སུ་འགྱུར་བ་དང་།

ཐེག་པ་ཆེན་པོ་ལ་སེམས་ཅན་ཐམས་ཅད་གཞོག་པས་ཐམས་ཅད་མཁྱེན་པའི་གཏམ་ཡང་དག་པར་སྟོན་པ་རྣམས་སུ་འགྱུར་བ་དང་།

འཇིགས་ཤིང་སྤུ་ཟིང་ཞེས་བྱེད་པ་ཐམས་ཅད་དང་བྲལ་བས་མི་འཇིགས་པ་ཐོབ་པ་རྣམས་སུ་འགྱུར་བ་དང་།

མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་དེ་བཞིན་གཤེགས་པའི་དགོངས་ཏེ་གསུངས་པ་ལ་མཁས་པ་རྣམས་སུ་འགྱུར་བ་དང་།

འཁོར་ཐམས་ཅད་ཀྱི་ནང་དུ་ཉེ་བར་འགྲོ་བས་བཞིན་ཀུན་ཏུ་སྟོན་པ་རྣམས་སུ་འགྱུར་བ་དང་།

ཐེག་པ་ཆེན་པོ་ལ་འཇིག་རྟེན་པ་ཐམས་ཅད་ཀྱིས་མཆོད་ཅིང་ཐམས་ཅད་མཁྱེན་པ་ལྟར་བསོད་ནམས་ཀྱི་བདག་པོ་རྣམས་སུ་འགྱུར་བ་དང་།

འཇིག་རྟེན་པ་ཐམས་ཅད་ཀྱི་སྦྱིན་གནས་སུ་གྱུར་པས་ཡོན་ཏན་ཟད་མི་ཤེས་པ་རྣམས་སུ་འགྱུར་བ་དང་།

དེ་བཞིན་གཤེགས་པའི་ཞབས་ཀྱི་དྲུང་དུ་དགའ་བ་དང་།

དད་པ་ཆེན་པོ་རབ་ཏུ་རྙེད་པ་རྣམས་སུ་འགྱུར་བ་དང་།

སངས་རྒྱས་ཀྱི་ཆོས་ཐམས་ཅད་ཡོངས་སུ་དྲི་བ་ལ་དགེ་བའི་སྤོབས་པ་ཅན་རྣམས་སུ་འགྱུར་བ་དང་།

འཁོར་གྱི་ནང་དུ་འཇིགས་ཤིང་

བག་ཚ་བ་སྤངས་པས་ཡིད་སྤ་མི་འགོང་བ་རྣམས་སུ་འགྱུར་བ་དང་།

ཕས་ཀྱི་རྒོལ་བ་ཐམས་ཅད་ཚར་གཅོད་པས་སྨྲ་བའི་སྟག་ལྟ་བུ་རྣམས་སུ་འགྱུར་བ་དང་།

ཕ་རོལ་གྱི་ཕྱོགས་ཐམས་ཅད་འཇོམས་པས་དམ་བཅས་པ་མ་ཉམས་པ་རྣམས་སུ་འགྱུར་བ་དང་།

སངས་རྒྱས་ཐམས་ཅད་ཀྱིས་གནང་བས་ཆོས་ཀྱི་འབེལ་བའི་གཏམ་གཏན་ལ་འབེབས་པའི་ཕྱིར།

སེང་གེའི་སྒྲ་སྒྲོག་ཅིང་སེང་གེའི་ཁྲི་ལ་འདུག་པ་མང་བ་རྣམས་སུ་འགྱུར་བ་དང་།

ཡང་དག་པར་བརྗོད་པ་ལ་འཇུག་པ་ཐམས་ཅད་རབ་ཏུ་རྟོགས་པས།

འཇིག་རྟེན་རྒྱང་པན་པ་ཐམས་ཅད་མ་བསྟན་པ་རྣམས་སུ་འགྱུར་བ་དང་།

སངས་རྒྱས་སུ་འགྱུར་བའི་རྒྱུ་ལ་གནས་པས་དམ་པའི་ཆོས་སྨྲ་བ་རྣམས་སུ་འགྱུར་བ་དང་།

དེ་བཞིན་གཤེགས་པའི་ཞབས་འབྲིང་བགྱིད་པས་ཆོས་འདོད་པ་རྣམས་སུ་འགྱུར་བ་དང་།

དགེ་བའི་བཤེས་གཉེན་ལ་བསྙེན་བཀུར་བགྱིད་པས་མི་སྐྱོ་བ་རྣམས་སུ་འགྱུར་བ་དང་།

ཕྱོགས་བཅུར་རྣམ་པར་རྒྱུ་བས་གནས་མ་མཆིས་པ་རྣམས་སུ་འགྱུར་བ་དང་།

སེམས་ཅན་ཐམས་ཅད་ཡོངས་སུ་སྨིན་པར་བགྱིད་པས་སྨོན་ལམ་འདེབས་པ་རྣམས་སུ་འགྱུར་བ་དང་།

རིན་པོ་ཆེའི་མཆོག་ལ་ངལ་སོས་པར་བགྱིད་པ་ལ་མཁས་པས།

ཆོས་ཀྱི་རྒྱ་མཚོར་ཞུགས་པ་རྣམས་སུ་འགྱུར་བ་དང་།

འཇིག་རྟེན་གྱི་ཁམས་ཐམས་ཅད་རྣམ་པ་སྣ་ཚོགས་ཀྱིས་བརྒྱན་པས་འཇིག་རྟེན་གྱི་ཁམས་ཐམས་ཅད་མི་གཡོ་བ་རྣམས་སུ་འགྱུར་བ་དང་།

སངས་རྒྱས་ཀྱི་ཆོ་འཕྲུལ་གྱིས་རྣམ་པར་རོལ་པ་སྤྱོད་པས་ཆོ་འཕྲུལ་ཆེན་པོ་མྱོང་བ་རྣམས་སུ་འགྱུར་བ་དང་།

སངས་རྒྱས་བལྟ་བ་སེམས་ཀྱི་སྐད་ཅིག་གཅིག་ལ་རག་ལས་པ་རྣམས་སུ་འགྱུར་བ་དང་།

ཆོས་ལ་གུས་པ་རྙེད་པས་ཡེ་ཤེས་ཀྱིས་བསྐོར་བ་རྣམས་སུ་འགྱུར་བ་དང་།

ཆོས་ཀྱི་སྐུ་དང་འདྲ་བར་རྟོགས་པས་ནམ་མཁའ་ལྟ་བུ་རྣམས་སུ་གྱུར་བ་དང་།

སངས་རྒྱས་ཀྱི་གདུང་མི་འཆད་པར་བགྱིད་པས་བྱང་ཆུབ་སེམས་དཔའ་རྣམས་ཡང་དག་པར་འཛིན་དུ་འཇུག་པ་རྣམས་སུ་འགྱུར་བ་དང་།

བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་གཅོད་པ་རྣམས་སུ་འགྱུར་བ་དང་།

ལེགས་པར་གནས་ཤིང་མྱུར་བའི་ཅང་ཤེས་

པས་གོ་ཅ་ཆེན་པོ་བགོས་པ་རྣམས་སུ་འགྱུར་བ་དང་།

དེ་བཞིན་གཤེགས་པའི་སྟོབས་བཅུའི་ས་ལ་ཐམས་ཅད་མཁྱེན་པ་ཉིད་དུ་དབང་བསྐུར་བས་དབང་བསྐུར་བ་རྣམས་སུ་འགྱུར་བ་དང་།

བགྲང་བའི་ཚུལ་གྱིས་ཆོག་ཤེས་པས་འདུ་ཤེས་ཀྱི་རྣམ་པ་ཐམས་ཅད་རབ་ཏུ་རྟོགས་པ་རྣམས་སུ་འགྱུར་བ་དང་།

གྲངས་ཀྱི་རྣམ་པ་ཐམས་ཅད་ཉེ་བར་རྟོགས་པས་འཇིག་པ་དང་འཆགས་པ་ཐམས་ཅད་ལ་མཁས་པ་རྣམས་སུ་འགྱུར་བ་དང་།

གཏོང་བ་ཐམས་ཅད་ལ་ནན་ཏན་བགྱིད་པས་མི་གནས་ཤིང་ལེན་པ་མ་མཆིས་པ་རྣམས་སུ་འགྱུར་བ་དང་།

འགྱོད་པ་མེད་པའི་སྦྱིན་བདག་ཆེན་པོར་གྱུར་པས་གཏོང་བ་ལ་མཁས་པ་རྣམས་སུ་འགྱུར་བ་དང་།

སྲིད་པའི་འགྲོ་བ་ཐམས་ཅད་ཀྱི་སྐྱེ་བའི་གནས་རྣམས་དོན་དུ་མི་གཉེར་བ་རྣམས་སུ་འགྱུར་བ་དང་།

འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་དག་མཐོང་ཞིང་ཆོས་ཀྱང་ཉན་ལ་དེ་ཡང་འཛིན་ཅིང་མི་བསྐྱུད་ལ།

ལྔ་མངོན་པར་ཤེས་པ་ཡང་མ་ལགས།

དྲུག་མངོན་པར་ཤེས་པ་ཡང་མ་ལགས་ཤིང་།

བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་ནས་ཤི་འཕོས་ཏེ།

སངས་རྒྱས་ཀྱི་ཞིང་དེ་དག་ན་གནས་པ་ཡང་མ་ལགས་ལ།

བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་ཉིད་ན་གནས་བཞིན་དུ་སངས་རྒྱས་རྣམས་ཀྱང་མཐོང་ལ་ཆོས་ཀྱང་ཉན་ཅིང་།

དེ་ཐམས་ཅད་ཀྱང་ཀུན་ཏུ་ཤེས་ཏེ།

ཇི་ལྟར་བདག་ད་ལྟར་བཅོམ་ལྡན་འདས་ཀྱི་སྤྱན་སྔ་ན་མཆིས་བཞིན་དུ་ཐེ་ཙོམ་དང་ནེམ་ནུར་མ་མཆིས་པ་དེ་བཞིན་དུ།

བྱང་ཆུབ་སེམས་དཔའ་དེ་རྣམས་ཀྱང་ཐ་ན་རྨི་ལམ་ན་ཡང་སངས་རྒྱས་མཐོང་ཞིང་།

ཆོས་ཉན་པ་དང་མི་འབྲལ་བ་རྣམས་སུ་འགྱུར་བའི་ཏིང་ངེ་འཛིན་གང་ལགས།

བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་དང་པོའོ།།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ།

བཟང་སྐྱོང་ལེགས་སོ་ལེགས་སོ།

ཡང་བཟང་སྐྱོང་ཁྱོད་སྐྱེ་བོ་མང་པོ་ལ་ཕན་པ་དང་།

སྐྱེ་བོ་མང་པོ་ལ་བདེ་བ་

དང་།

འཇིག་རྟེན་ལ་སྙིང་བརྩེ་བ་དང་།

སྐྱེ་བོ་ཕལ་པོ་ཆེ་དང་།

ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་ཞུགས་ཤིང་།

བཟང་སྐྱོང་ཁྱོད་དེ་ལྟར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ།

བཟང་སྐྱོང་ཁྱོད་ནི་སྔོན་གྱི་རྒྱལ་བ་ལ་བྱ་བ་བྱས་ཤིང་དགེ་བའི་རྩ་བ་བསྐྱེད་པ།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ།

ཆོས་དོན་དུ་གཉེར་བ་ཆོས་འདོད་པ་མི་དམིགས་པར་ཚངས་པར་སྤྱོད་པ།

བྱང་ཆུབ་སེམས་དཔའ་རྣམས་ཡང་དག་པར་སློབ་པར་བྱེད་པ།

བྱང་ཆུབ་སེམས་དཔའ་རྣམས་ཡང་དག་པར་དགའ་བར་བྱེད་པ།

བྱང་ཆུབ་སེམས་དཔའ་རྣམས་ལ་སྟོན་པ།

བྱང་ཆུབ་སེམས་དཔའ་རྣམས་ལ་ཡང་དག་པར་འཛིན་དུ་འཇུག་པ།

བྱང་ཆུབ་སེམས་དཔའ་རྣམས་ལ་ཡང་དག་པར་གཟེངས་སྟོད་པ།

བྱང་ཆུབ་སེམས་དཔའ་རྣམས་ལ་ལུང་འབོག་པ།

བྱང་ཆུབ་སེམས་དཔའ་རྣམས་ལ་སྒྲུབ་པར་བྱེད་པ།

བྱང་ཆུབ་སེམས་དཔའ་རྣམས་ལ་ཕན་པར་འདོད་པ།

སྙིང་རྗེ་ཆེ་བ།

སེམས་ཅན་ཐམས་ཅད་ལ་སེམས་མཉམ་པ།

སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ།

སངས་རྒྱས་མཐོང་བ་སྨོན་ལམ་རྒྱ་ཆེ་བ།

སྤྱོད་ཡུལ་ཟབ་པ།

ཐམས་ཅད་མཁྱེན་པ་སེམས་པ།

བྱང་ཆུབ་ཡང་དག་པར་འཛིན་པ།

དེ་བཞིན་གཤེགས་པའི་གདུང་སྟོན་པ།

བྱང་ཆུབ་ཀྱི་སེམས་རྡོ་རྗེ་ལྟ་བུ་དང་མཉམ་ཞིང་མཚུངས་པ།

སེམས་ཅན་ཐམས་ཅད་ཀྱི་བསམ་པ་ཀུན་ཏུ་སྤྱོད་པ་ལ་མཁས་པ།

སངས་རྒྱས་ཐམས་ཅད་དང་མངོན་སུམ་དུ་གནས་པ་སྟེ།

བཟང་སྐྱོང་ཁྱོད་ཀྱི་ཡོན་ཏན་བརྗོད་ན་ལྟ་མཐར་མི་ཕྱིན་ཏོ།

བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཡོད་དེ།

ཏིང་ངེ་འཛིན་དེ་བཟུང་ཞིང་མ་བརྗེད་ལ།

རྣ་བླགས་ཏེ་ཉན་ཅིང་སེམས་མི།

གཡེང་བ་རྙེད་ན།

ཡོན་ཏན་གྱི་ཁྱད་པར་དེ་དག་རྙེད་པ་མི་དཀའ་བར་འགྱུར་རོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བཅོམ་ལྡན་འདས་དེ་བས་ན་དེ་བཞིན་གཤེགས་པས་ཏིང་ངེ་འཛིན་དེ་བཤད་པར་གསོལ།

དེ་ནི་

སྐྱེ་བོ་མང་པོ་ལ་སྨན་པ་དང་།

སྐྱེ་བོ་མང་པོ་ལ་བདེ་བ་དང་།

འཇིག་རྟེན་ལ་སྙིང་བརྩེ་བ་དང་།

སྐྱེ་བོ་ཕལ་པོ་ཆེ་དང་།

ལྷ་དང་མིའི་དོན་དང་།

སྨན་པ་དང་བདེ་བར་འགྱུར་ཞིང་།

མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཡང་སྣང་བ་ཆེན་པོ་བགྱིས་པར་འགྱུར་རོ།

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ།

བཟང་སྐྱོང་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ།

བཅོམ་ལྡན་འདས་དེ་བཞིན་ནོ།

ཞེས་གསོལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ།

བཟང་སྐྱོང་ཆོས་གཅིག་ལ་ཀུན་ཏུ་བསྟེན་ངེས་པར་བསྟེན་ཅིང་བསྒོམས་ལ་ལན་མང་དུ་བྱས།

ལམ་དུ་བྱས།

གཞིར་བྱས།

ཡང་དག་པར་བསླང་།

ལེགས་པར་བྱང་བ་བྱས།

ཤིན་ཏུ་ཡོངས་སུ་སྦྱངས།

ཤིན་ཏུ་མཉམ་པར་བཞག །

ཤིན་ཏུ་ཡང་དག་པར་བརྩམས་ན་ཡོན་ཏན་ཐམས་ཅད་ཁྱད་པར་དུ་འཕགས་པར་འགྱུར་རོ།

ཆོས་གཅིག་པོ་གང་ཞེ་ན།

འདི་ལྟ་སྟེ།

ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཏེ།

མང་དུ་ཐོས་པ་སྔོན་དུ་འགྲོ་བའི་ཆོས་རྣམས་ཡོངས་སུ་རྫོགས་པར་འགྱུར་རོ།

བཟང་སྐྱོང་དེ་ལ་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་དེ་གང་ཞེ་ན།

འདི་ལྟ་སྟེ།

སངས་རྒྱས་ལ་དམིགས་པའི་སེམས་ཡིད་ལ་བྱེད་པ།

སེམས་མི་གཡེང་བ།

དྲན་པ་ཉེ་བར་གནས་པ་དང་ཤེས་རབ་ཐོབ་པ།

བརྩོན་འགྲུས་མི་གཏོང་བ།

དགེ་བའི་བཤེས་གཉེན་རྣམས་ལ་བསྙེན་བཀུར་བྱེད་པ།

སྟོང་པ་ཉིད་ལ་ཀུན་ཏུ་སྟེན་པ།

སྒོམ་པ་མང་དུ་བྱེད་པ།

སྒྲིབ་པ་རྣམས་སྤོང་བ།

རྨུགས་པ་དང་གཉིད་རྣམ་པར་སྤོང་བ།

གཏམ་ཡོངས་སུ་སྤོང་བ།

སྡིག་པའི་གྲོགས་པོ་རྣམས་རྣམ་པར་སྤོང་བ།

དགེ་བའི་བཤེས་གཉེན་རྣམས་ལ་ངེས་པར་སྟེན་པ།

དབང་

པོ་རྣམས་མི་གཡེང་བ།

ཟས་ཀྱི་ཚོད་ཤེས་པ།

ནམ་གྱི་ཆ་སྟོད་དང་།

ཆ་སྨད་ལ་མི་ཉལ་བའི་བརྩོན་འགྲུས་དང་ལྡན་པ།

གོས་དང་།

ཟས་དང་།

མལ་སྟན་དང་།

ན་བའི་གསོས་སྨན་དང་།

ཡོ་བྱད་རྣམས་ལ་མི་ཆགས་པ།

དགོན་པ་ལ་གནས་པ་མི་གཏོང་བ།

ལུས་ལ་ཆེད་ཆེར་མི་བྱེད་པ།

སྲོག་ལ་མི་ལྟ་བ།

ལུས་གཏོང་བ།

སེམས་ཅན་ལ་ཕན་འདོགས་པ།

གཉེན་རྣམས་ཡོངས་སུ་སྤོང་བ།

སྐྱེས་པའི་ས་རིང་དུ་བྱེད་པ།

བྱམས་པ་ལ་ཀུན་ཏུ་སྟེན་པ།

སྙིང་རྗེ་ཐོབ་པ།

དགའ་བ་ལ་གནས་པ།

བཏང་སྙོམས་སྒོམ་པ།

ཉེ་བའི་ཉོན་མོངས་པ་རྣམས་ཡོངས་སུ་སྤོང་བ།

བསམ་གཏན་རྣམས་སྒྲུབ་ཅིང་།

དེ་དག་གི་རོ་མྱོང་བར་མི་བྱེད་པ།

གཟུགས་ཀྱི་འདུ་ཤེས་རྣམ་པར་འཇིག་པ།

མི་སྡུག་པའི་འདུ་ཤེས་རྙེད་པ།

དྲན་པ་མི་གཡེང་བ་ཕུང་པོ་རྣམས་ཡོངས་སུ་མི་འཛིན་པ།

ཁམས་རྣམས་ལ་རློམ་སེམས་མེད་པ།

སྐྱེ་མཆེད་རྣམས་ལ་མངོན་པར་མི་ཆགས་པ།

རིགས་སྨྲ་བས་སྙེམས་པར་མི་བྱེད་པ།

ང་རྒྱལ་ཚར་གཅོད་པ།

གཞན་གྱི་རྙེད་པ་ལ་ཕྲག་དོག་མེད་པ།

སེམས་ཅན་ལ་ཕན་པའི་གཞིར་གྱུར་པ།

སེམས་ཅན་ཐམས་ཅད་ལ་སེམས་མཉམ་པ།

སེམས་ཅན་ཐམས་ཅད་མི་གཏོང་བ།

སེམས་ཅན་ཐམས་ཅད་ཡོངས་སུ་གྲོལ་བར་བྱེད་པ།

སེམས་ཅན་ཐམས་ཅད་ལ་བདག་ཏུ་འདུ་ཤེས་པ།

སེམས་ཅན་ཐམས་ཅད་ལ་མར་འདུ་ཤེས་པ།

ཕར་འདུ་ཤེས་པ།

བུར་འདུ་ཤེས་པ།

གཉེན་དུ་འདུ་ཤེས་པ།

སེམས་ཅན་ཐམས་ཅད་ལ་ཉོན་མོངས་པ་མེད་པར་འདུ་ཤེས་པ།

དངོས་པོ་ཐམས་ཅད་ཡོངས་སུ་མི་འཛིན་པ།

ཚུལ་ཁྲིམས་མཆོག་ཏུ་མི་འཛིན་པ།

ཏིང་ངེ་འཛིན་ལ་ངེས་པར་སྟེན་པ།

མང་དུ་ཐོས་པ་འདོད་ཅིང་དེས་ཀྱང་རློམ་སེམས་སུ་མི་བྱེད་པ།

ཚུལ་ཁྲིམས་ཀྱི་ཕུང་པོ་ལ་སྐྱོན་མེད་པ།

ཏིང་ངེ་འཛིན་གྱི་ཕུང་པོ་ལ་གཡོ་བ་མེད་པ།

ཆོས་རྣམས་ལ་ཐེ་ཙོམ་མེད་པ།

སངས་རྒྱས་དང་འཐུན་པ།

ཆོས་མི་སྤོང་བ།

དགེ་འདུན་མི་འབྱེད་པ།

ཕྲ་མའི་ཚིག་སྤོང་བ།

འཕགས་པ་རྣམས་ཀྱི་དྲུང་དུ་ཉེ་བར་འགྲོ་ཞིང་དེ་དག་ལ་བསྙེན་བཀུར་བྱེད་པ།

བྱིས་པ་རྣམས་རྣམ་པར་སྤོང་བ།

འཇིག་རྟེན་པའི་གཏམ་ལ་མངོན་པར་མི་དགའ་ཞིང་

མི་འདོད་ལ་རིང་དུ་བྱེད་པ།

འཇིག་རྟེན་ལས་འདས་པའི་གཏམ་ལ་མངོན་པར་དགའ་ཞིང་འདོད་ལ་འདུན་ཅིང་སྟེན་པ།

གཏམ་རྒྱུད་མ་ཡིན་པ་རྣམ་པར་སྤོང་བ།

དགའ་བར་བྱེད་པའི་ཆོས་དྲུག་ལ་སྟེན་པ།

སྙན་པ་རྣམས་སྨྲ་བ།

སྒྲིབ་པ་ལྔ་སྤོང་བ།

རྣམ་པར་གྲོལ་བའི་སྐྱེ་མཆེད་ལྔ་ལ་སྟེན་པ།

ཕུང་པོ་ལྔ་ཡོངས་སུ་ཤེས་པ།

མི་དགེ་བ་བཅུའི་ལས་ཀྱི་ལམ་རྣམ་པར་སྤོང་བ།

དགེ་བ་བཅུའི་ལས་ཀྱི་ལམ་སྒོམ་པ་སྟོབས་བཅུ་སྒྲུབ་པ།

ཀུན་ནས་མནར་སེམས་ཀྱི་དངོས་པོ་དགུ་རྣམ་པར་སྦྱོང་བ།

འདུ་ཤེས་དགུ་རྣམ་པར་འཇིག་པ།

ལེ་ལོའི་དངོས་པོ་བརྒྱད་རྣམ་པར་སྤོང་བ།

བརྩམས་པའི་དངོས་པོ་བརྒྱད་ལ་ངེས་པར་སྟེན་པ།

ཟིལ་གྱིས་གནོན་པའི་སྐྱེ་མཆེད་བརྒྱད་ལ་ཀུན་ཏུ་སྟེན་པ།

རྣམ་པར་གྲོལ་བ་བརྒྱད་སྒོམ་པ།

སྐྱེས་བུ་ཆེན་པོའི་རྣམ་པར་རྟོག་པ་བརྒྱད་ཐོབ་པ།

འཕགས་པའི་ལམ་ཡན་ལག་བརྒྱད་པ་དང་འཐུན་པ།

བསམ་གཏན་ལ་མི་ཆགས་པ།

ཐོས་པས་རློམ་སེམས་མི་བྱེད་པ།

ང་རྒྱལ་བཅོམ་པ།

ཆོས་ཉན་པར་འདོད་པ།

ཆོས་འདོད་པ།

ཆོས་དོན་དུ་གཉེར་བ།

ཆོས་ལ་འདུན་པ།

ཆོས་ལ་ཕྱོགས་པ།

ཆོས་ལ་འབབ་པ།

ཆོས་ལ་གཞོལ་བ།

ཆོས་ལ་བརྩོན་པ།

བདག་ཏུ་འདུ་ཤེས་པས་རློམ་སེམས་སུ་མི་བྱེད་པ།

སེམས་ཅན་དུ་འདུ་ཤེས་པ་སྤོང་བ།

སྲོག་ཏུ་འདུ་ཤེས་པ་མི་དམིགས་པ།

གང་ཟག་ཏུ་འདུ་ཤེས་པ་ཡོངས་སུ་སྤོང་བ།

ཕུང་པོར་འདུ་ཤེས་པ་རྣམས་སེལ་བ།

དངོས་པོར་འདུ་ཤེས་པ་ལ་མི་གནས་པ།

མྱ་ངན་ལས་འདའ་བ་མི་འདོད་པ།

ཕུང་པོ་རྣམས་མི་འདོད་པ།

འཁོར་བ་ལ་མི་བཟད་པའི་འཇིགས་པར་འདུ་ཤེས་པ།

ཕུང་པོ་རྣམས་ལ་གཤེད་མར་འདུ་ཤེས་པ།

ཁམས་རྣམས་ལ་སྦྲུལ་གདུག་པར་འདུ་ཤེས་པ།

སྐྱེ་མཆེད་རྣམས་ལ་གྲོང་སྟོང་པར་འདུ་ཤེས་པ།

ཁམས་གསུམ་ལ་མི་བདེ་བར་འདུ་ཤེས་པ།

མྱ་ངན་ལས་འདས་པ་ལ་ཕན་ཡོན་དུ་ལྟ་བ།

འདོད་པ་རྣམས་ལ་མཆིལ་མའི་ཐལ་བ་ལྟར་སྤོང་བར་འདུ་ཤེས་པ།

ཟས་ལ་མི་འཐུན་པར་འདུ་ཤེས་པ།

མངོན་པར་འབྱུང་བ་ལ་གཞོལ་བ།

ཁྱིམ་ན་གནས་པ་ལ་མངོན་པར་མི་དགའ་བ།

བུ་དང་བུ་མོ་རྣམས་ལ་དགྲར་

འདུ་ཤེས་པ།

ཆུང་མ་ལ་སྲིང་མོར་འདུ་ཤེས་པ།

སངས་རྒྱས་ཀྱི་བསྟན་པ་ལ་མི་ཕྱེད་པར་དད་པ།

སེམས་ཅན་ཐམས་ཅད་དང་མི་འཐུན་པ་མེད་པ།

འཇིག་རྟེན་གྱི་ཁམས་ཐམས་ཅད་དུ་གནས་པ་མེད་པ།

སངས་རྒྱས་ཐམས་ཅད་མངོན་སུམ་དུ་གྱུར་པ།

ལེགས་པར་བསྙེན་པར་རྫོགས་ཤིང་ཚངས་པ་ལེགས་པར་སྤྱད་པ།

ལུས་ཐམས་ཅད་རྟོགས་པ།

མོས་པ་ཡོངས་སུ་དག་པ།

ལྷག་པའི་བསམ་པ་དགེ་བ།

སེམས་ལས་སུ་རུང་བ།

མི་རིགས་པ་ལ་བརྩོན་པ་རྣམས་རྣམ་པར་སྤོང་བ།

རིགས་པར་བརྩོན་པ་རྣམ་པར་སྟོན་པ།

མཚན་མ་ཐམས་ཅད་རྣམ་པར་སེལ་བ།

དུས་གསུམ་མཉམ་པ།

སངས་རྒྱས་ཐམས་ཅད་རྗེས་སུ་དྲན་པ།

དགེ་བའི་རྩ་བ་ཐམས་ཅད་སྐྱེད་པ།

སངས་རྒྱས་ཐམས་ཅད་ཀྱི་བྱིན་གྱིས་བརླབས་པ།

ཏིང་ངེ་འཛིན་ཐམས་ཅད་ལ་དབང་བ།

སངས་རྒྱས་ཀྱི་སྐུའི་མཚན་ལ་མངོན་པར་མི་ཆགས་པ།

ཆོས་ཐམས་ཅད་ལ་མཉམ་པ།

འཇིག་རྟེན་དང་མི་རྩོད་པ།

བྱ་བ་རྣམས་ལ་མི་འཐུན་པ་མེད་པ།

རྟེན་ཅིང་འབྲེལ་པར་འབྱུང་བ་རྟོགས་པ།

ངེས་པར་འབྱུང་བའི་ལམ་དེ་བཞིན་གཤེགས་པའི་ས་ལ་བཟོད་པ་ཐོབ་པ།

ཆོས་ཀྱི་དབྱིངས་ལ་འཇུག་པ།

ནམ་མཁའི་ཁམས་ཡོངས་སུ་ཤེས་པ།

སེམས་ཅན་གྱི་ཁམས་ལ་མངོན་པར་མི་ཆགས་པ།

མི་སྐྱེ་བ།

མི་འགག་པ།

གནས་པ་མེད་པ།

མྱ་ངན་ལས་འདས་པའི་དབྱིངས་མངོན་སུམ་དུ་གྱུར་པ།

ཤེས་རབ་ཀྱི་མིག་རྣམ་པར་སྦྱོང་བ།

ཆོས་ཐམས་ཅད་ལ་གཉིས་སུ་མེད་པ།

བྱང་ཆུབ་ཀྱི་སེམས་ལ་མཐའ་དང་དབུང་མེད་པ།

སེམས་ཀྱི་རྒྱུད་གཅིག་ཏུ་གྱུར་པ།

སངས་རྒྱས་ཐམས་ཅད་དང་ཐོགས་པ་མེད་པའི་ཡེ་ཤེས་ལ་འཇུག་པ།

ཡེ་ཤེས་ལ་སྒྲིབ་པ་མེད་པ།

བྱང་ཆུབ་ཀྱི་ཕྱིར་སེམས་ཡོངས་སུ་སྨིན་པ།

སངས་རྒྱས་ཀྱི་ཡེ་ཤེས་གཞན་ལ་རག་མ་ལས་པ།

དགེ་བའི་བཤེས་གཉེན་རྣམས་ལ་སྟོན་པར་འདུ་ཤེས་པ།

བྱང་ཆུབ་སེམས་དཔའ་རྣམས་ལ་མི་འབྱེད་པ།

བདུད་ཀྱི་ལས་རྣམས་རྣམ་པར་སྤོང་བ།

འགྲོ་བ་ཐམས་ཅད་སྤྲུལ་པ་དང་མཚུངས་པ།

དེ་བཞིན་གཤེགས་པ་བལྟ་བ་ལ་མིག་ཡོར་དང་མཚུངས་པ།

བྱང་ཆུབ་ཀྱི་སེམས་ཡོངས་སུ་ཚོལ་བ།

ཕ་རོལ་ཏུ་ཕྱིན་པ་རྣམས་ལ་སེམས་མཉམ་པ།

དེ་བཞིན་གཤེགས་པ་རྣམས་བལྟ་བ་ལ་ཡང་དག་པའི་མཐའ་དང་མཉམ་པ།

སངས་རྒྱས་ཐམས་ཅད་ལ་ཡོན་ཏན་གྱི་ཆོས་ཐམས་ཅད་མཉམ་པ་འདི་ནི་བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཅེས་བྱའོ།

བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་གཉིས་པའོ།།

བཟང་སྐྱོང་ཆོས་དེ་རྣམས་ནི་ཏིང་ངེ་འཛིན་དེ་ཡོངས་སུ་སྐྱེད་པར་འགྱུར་ཏེ།

བཟང་སྐྱོང་དེ་ལ་ཏིང་ངེ་འཛིན་གང་ཆོས་དེ་རྣམས་ཀྱིས་ཡོངས་སུ་སྐྱེད་པར་འགྱུར་བའི་ཏིང་ངེ་འཛིན་དེ་གང་ཞེ་ན།

འདི་ལྟ་སྟེ།

ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཏོ།

བཟང་སྐྱོང་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་དེ་ཡང་གང་ཞེ་ན།

བཟང་སྐྱོང་དེ་ལ་དགེ་སློང་ངམ།

དགེ་སློང་མའམ།

དགེ་བསྙེན་ནམ།

དགེ་བསྙེན་མ་ཚུལ་ཁྲིམས་ཡོངས་སུ་རྫོགས་པར་སྤྱོད་པར་འགྱུར་ལ།

དེས་གཅིག་པུ་དབེན་པར་སོང་སྟེ་འདུག་ནས་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཕྱོགས་གང་རོལ་ན་གནས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཅིང་བཞུགས་སྙམ་དུ་སེམས་བསྐྱེད་པར་བྱའོ།

དེས་ཇི་སྐད་དུ་ཐོས་པའི་རྣམ་པས་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་བདེ་བ་ཅན་ན།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ།

ད་ལྟར་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་བཞུགས་སོ།

འཚོའོ་གཞེས་སོ།

ཆོས་ཀྱང་སྟོན་ཏོ་སྙམ་དུ་ཡིད་ལ་བྱེད་དེ།

དེས་ཀྱང་སེམས་མ་གཡེངས་པས་དེ་བཞིན་གཤེགས་པ་ཡིད་ལ་བྱེད་དོ།

བཟང་སྐྱོང་འདི་ལྟ་སྟེ་དཔེར་ན་སྐྱེས་པའམ།

བུད་མེད་གང་ལ་ལ་ཞིག་ཉལ་བའི་རྨི་ལམ་དུ་གཟུགས་ཀྱི་རྣམ་པ་མཐོང་སྟེ།

དངུལ་ལམ།

གསེར་

རམ།

མཛའ་བཤེས་སམ།

ཉེ་དུའམ།

སྣག་གི་གཉེན་མཚམས་སམ།

མཛའ་བོའམ།

ཡིད་དུ་འོང་བ་དང་།

སྡུག་པ་དང་མི་འཐུན་པ་མེད་པ་དག་མཐོང་ལ།

དེ་རྨི་ལམ་ན་དེ་དག་དང་ལྷན་ཅིག་ཏུ་རྩེ་ཞིང་དགའ་ལ་དགའ་དགུར་སྤྱོད་ཅིང་།

སྨྲ་ཀུན་ཏུ་སྨྲ་བར་རྨིས་པ་ལས་དེ་སད་ནས་ཇི་ལྟར་མཐོང་བ་དང་།

ཐོས་པ་དང་།

བྱེ་བྲག་ཕྱེད་པ་དང་།

རྣམ་པར་ཤེས་པ་དང་།

སྨྲས་པ་དང་།

ཀུན་ཏུ་སྨྲས་པ་དེ་ཐམས་ཅད་གཞན་དག་ལ་ཡང་བརྗོད་ཅིང་།

དེ་རྨི་ལམ་གྱི་མཚན་མ་རྗེས་སུ་དྲན་པས་མཆི་མ་ཀློག་པར་བྱེད་པ་དེ་བཞིན་དུ།

བཟང་སྐྱོང་བྱང་ཆུབ་སེམས་དཔའ་ཁྱིམ་པའམ།

རབ་ཏུ་བྱུང་བ་ཡང་རུང་གཅིག་པུ་དབེན་པར་སོང་སྟེ་འདུག་ལ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཇི་སྐད་དུ་ཐོས་པའི་རྣམ་པས་ཡིད་ལ་བྱས་ཏེ།

ཚུལ་ཁྲིམས་ཀྱི་ཕུང་པོ་ལ་སྐྱོན་མེད་ཅིང་དྲན་པ་གཡེང་བ་མེད་པར་ཉིན་ཞག་གཅིག་གམ།

གཉིས་སམ།

གསུམ་མམ།

བཞིའམ།

ལྔའམ།

དྲུག་གམ།

ཉིན་ཞག་བདུན་དུ་ཡིད་ལ་བྱའོ།

དེ་གལ་ཏེ་ཉིན་ཞག་བདུན་དུ་སེམས་མི་གཡེང་བར་དེ་བཞིན་གཤེགས་པ་ཚེ་དཔག་མེད་ཡིད་ལ་བྱེད་ན་དེ་ཉིན་ཞག་བདུན་ཡོངས་སུ་ཚང་སྟེ་འདས་ནས།

བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་མཐོང་ངོ་།

དེ་གལ་ཏེ་ཉིན་མོ་བཅོམ་ལྡན་འདས་དེ་མ་མཐོང་ན།

དེ་ཉལ་བའི་རྨི་ལམ་དུ་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་ཞལ་སྟོན་ཏོ།

བཟང་སྐྱོང་འདི་ལྟ་སྟེ་དཔེར་ན་བུད་མེད་དམ་སྐྱེས་པ་ཉལ་བའི་རྨི་ལམ་ན་བདག་ཉིད་ཁྱིམ་ན་འདུག་པར་ཡང་མི་ཤེས།

ཕྱོགས་ན་འདུག་པར་ཡང་མི་ཤེས་ཤིང་།

དེའི་མིག་གི་དབང་པོ་ལ་རྩིག་པས་སྒྲིབ་པར་ཡང་མི་བྱེད།

མུན་པ་དང་རབ་རིབ་ཏུ་ཡང་མི་བྱེད་པ་དེ་བཞིན་དུ།

བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཡང་ཇི་ལྟར་འཇིག་རྟེན་གྱི་བར་དག་གིས་སྒྲིབ་པར་ཡང་མི་བྱེད།

རིའི་རྒྱལ་པོ་རི་རབ་དང་།

རིའི་རྒྱལ་པོ་ཁོར་ཡུག་དང་།

ཁོར་ཡུག་ཆེན་པོ་དང་།

དེ་བཞིན་དུ་གཞན་ཡང་རི་ནག་པོ་རྣམས་ཀྱིས་མིག་གི་དབང་པོ་ལ་སྒྲིབ་པར་མི་བྱེད་པ་དེ་ལྟ་དེ་ལྟར་སེམས་

བསྐྱེད་དེ།

བྱང་ཆུབ་སེམས་དཔའ་དེ་ལྷའི་མིག་ཐོབ་པས།

དེ་བཞིན་གཤེགས་པ་མཐོང་བ་ཡང་མ་ཡིན།

ལྷའི་རྣ་བའི་ཁམས་ཐོབ་པས།

དམ་པའི་ཆོས་ཉན་པ་ཡང་མ་ཡིན།

རྫུ་འཕྲུལ་གྱི་སྟོབས་ཐོབ་པས།

འཇིག་རྟེན་གྱི་ཁམས་དེར་སྐད་ཅིག་ཏུ་འགྲོ་བ་ཡང་མ་ཡིན་གྱི།

བཟང་སྐྱོང་བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་འདི་ཉིད་ན་གནས་བཞིན་དུ།

བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེ་མཐོང་ཞིང་བདག་ཉིད་འཇིག་རྟེན་གྱི་ཁམས་དེ་ན་འདུག་པ་སྙམ་དུ་ཡང་ཤེས་ལ།

ཆོས་ཀྱང་ཉན་ཏོ།

འཆད་པ་ཐོས་ནས་ཀྱང་ཆོས་དེ་དག་ཀུན་འཛིན་ཏོ།

ཀུན་ཆུབ་པར་བྱེད་དོ།

འཛིན་པར་བྱེད་དོ།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ལ་བཀུར་སྟིར་བྱེད་དོ།

བླ་མར་བྱེད་དོ།

རི་མོར་བྱེད་དོ།

མཆོད་པར་བྱེད་དོ།

བྱང་ཆུབ་སེམས་དཔའ་དེ་ཏིང་ངེ་འཛིན་དེ་ལས་ལངས་ནས་ཀྱང་ཇི་སྐད་དུ་ཐོས་པ་དང་།

ཇི་ལྟར་བཟུང་བ་དང་།

ཇི་ལྟར་ཀུན་ཆུབ་པར་བྱས་པའི་ཆོས་དེ་དག་གཞན་དག་ལ་ཡང་རྒྱ་ཆེར་ཡང་དག་པར་འཆད་དོ།།

བམ་པོ་གཉིས་པ།

བཟང་སྐྱོང་འདི་ལྟ་སྟེ་དཔེར་ན།

སྐྱེས་བུ་ཞིག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འདུག་པ་ལས་ཡངས་པ་ཅན་གྱི་གྲོང་ཁྱེར་ན་སྨད་འཚོང་མ་ཡིད་བཟངས་ཞེས་བྱ་བ་ཞིག་ཡོད་པར་ཐོས་སོ།

སྐྱེས་བུ་གཉིས་པས་ནི་སྨད་འཚོང་མ་ཨ་མྲ་སྐྱོང་ཞེས་བྱ་བ་ཞིག་ཡོད་པར་ཐོས་སོ།

སྐྱེས་བུ་གསུམ་པས་ནི་སྔོན་གྱི་སྨད་འཚོང་མ་ཨུད་པ་ལའི་མདོག་ཅེས་བྱ་བ་ཡོད་པར་ཐོས་སོ།

དེ་རྣམས་ཀྱིས་དེ་དག་ཐོས་ནས་སོ་སོར་སོ་སོ་ལ་སེམས་ཆགས་པར་གྱུར་མོད་ཀྱི།

སྐྱེས་བུ་དེ་རྣམས་ཀྱིས་སྨད་འཚོང་མ་དེ་རྣམས་མཐོང་བ་ནི་མ་ཡིན་ཏེ།

མིང་དང་གཟུགས་དང་ཁ་དོག་ཙམ་ཞིག་ཐོས་པས་འདོད་ཆགས་ཀྱི་སེམས་སྐྱེད་པར་གྱུར་ཏོ།

དེ་དག་ཕྱི་ཕྱིར་ཞིང་དེ་ཡིད་ལ་བྱེད་བཞིན་དུ་ཉལ་བ་དང་།

རྨི་ལམ་དུ་ཡང་སྨད་འཚོང་མ་དེ་དག་གི་དྲུང་དུ་བདག་ཅག་དོང་བ་སྙམ་དུ་ཤེས་ཏེ།

ཇི་ལྟར་སྐྱེས་བུ་དེ་དག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འཁོད་ཅིང་སྔོན་མ་ཉལ་བར།

དེ་ལྟ་དེ་ལྟར་

འདོད་ཆགས་དང་ལྡན་པའི་སེམས་སྐྱེད་པ་དེ་བཞིན་དུ།

སྐྱེས་བུ་དེ་དག་ཉལ་ནས་ཀྱང་རྨི་ལམ་ན་སྨད་འཚོང་མ་དེ་དག་མཐོང་ཞིང་ཕན་ཚུན་སྤྲད་དེ།

འཁྲིག་པའི་ཆོས་ལ་བསྟེན་ནས།

འཁྲིག་པ་ལ་དད་པ་དེ་དང་ཡང་བྲལ་བར་གྱུར་པར་ཡང་རྨིས་སོ།

དེ་དག་སད་ནས་ཇི་ལྟར་མཐོང་བ་དང་།

ཐོས་པ་དང་ཤེས་པ་དང་།

རྟོགས་པའི་རྨི་ལམ་ན་མྱོང་བ་རྗེས་སུ་དྲན་ནས་བཟང་སྐྱོང་ཁྱོད་གང་ན་བ་དེར་དོང་སྟེ་ཕྱིན་ནས་ཁྱོད་ལ་དོན་དེ་དག་བརྗོད་དོ།

ཁྱོད་ཀྱིས་དོན་དེ་དག་ཐོས་ནས་ལུང་འདི་ཉིད་ཀྱིས་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ།

ངས་ཀྱང་སྐྱེས་བུ་དེ་དག་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལེགས་པར་སད་པ་ཞེས་བྱ་བ་རྣམས་སུ་འགྱུར་རོ་ཞེས་ལུང་སྟོན་ཏོ།

སྐྱེས་བུ་དེ་དག་བཟོད་པ་རྙེད་ཀྱང་ད་དུང་སྔོན་གྱི་མཚན་མ་དེ་དག་མཐོང་ཞིང་རྗེས་སུ་དྲན་ནོ།

བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་དང་ལྡན་པ་དེ་ནི་འཇིག་རྟེན་གྱི་ཁམས་འདི་ཉིད་ན་འདུག་བཞིན་དུ།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཐོས་སོ།

དེས་དེ་བཞིན་གཤེགས་པ་དེའི་མཚན་དང་གཟུགས་དང་།

ཡོན་ཏན་ཙམ་ཞིག་ཐོས་ནས་སེམས་མི་གཡེང་བར།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཡང་དག་པར་རྗེས་སུ་དྲན་པར་བྱེད་དོ།

དེ་ཕྱི་ཕྱིར་ཞིང་ཡིད་ལ་བྱེད་པས་དེ་བཞིན་གཤེགས་པ་དེ་མཐོང་ངོ་།

ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་ལ་གནས་ཏེ།

དེས་དེ་བཞིན་གཤེགས་པ་དེ་མཐོང་ནས།

བཅོམ་ལྡན་འདས་ཆོས་གང་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་འདིར་སྐྱེ་བར་འགྱུར་ཞེས་ཞུ་བ་ཞུའོ།

དེ་བཞིན་དུ་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པ་དེའི་ཚེ་དེ་བཞིན་གཤེགས་པ་ལ་

ཞུའོ།

དེ་སྐད་ཞུས་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ།

རིགས་ཀྱི་བུ་སངས་རྒྱས་རྗེས་སུ་དྲན་པ་ཀུན་ཏུ་བསྟེན་ངེས་པར་བསྟེན་ཅིང་བསྒོམས་ལ་མང་དུ་བྱས་ན་འཇིག་རྟེན་གྱི་ཁམས་འདིར་སྐྱེ་བར་བྱེད་དོ།

སངས་རྒྱས་རྗེས་སུ་དྲན་པ་ཀུན་ཏུ་བསྟེན་ངེས་པར་བསྟེན་ཅིང་བསྒོམས་ལ་མང་དུ་བྱས་ན་སངས་རྒྱས་ཀྱི་ཞིང་འདིར་སྐྱེ་བར་འགྱུར་རོ།

རིགས་ཀྱི་བུ་དེ་ལ་སངས་རྒྱས་རྗེས་སུ་དྲན་པ་དེ་གང་ཞེ་ན།

འདི་ལྟ་སྟེ།

གང་དེ་བཞིན་གཤེགས་པ་ཡིད་ལ་བྱེད་པ་སྟེ།

འདི་ལྟར་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་རྟེན་མཁྱེན་པ།

སྐྱེས་བུ་འདུལ་བའི་ཁ་ལོ་སྒྱུར་བ།

བླ་ན་མེད་པ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་གསེར་གྱི་མདོག་ལྟ་བུའི་སྐུ་དང་ལྡན་པ།

གསེར་གྱི་གཟུགས་འཚེར་ཞིང་གསལ་ལ་ལེགས་པར་གནས་པ་དང་འདྲ་བ་རིན་པོ་ཆེའི་མཆོད་སྡོང་ལྟར་ཤིན་ཏུ་བརྒྱན་པ།

ཉན་ཐོས་ཀྱི་དགེ་འདུན་གྱི་ནང་ན་ཆོས་ཀྱང་སྟོན་ཏེ་ཅི་ནས་ཀྱང་ཆུད་མི་ཟ་བ་དེ་ལྟར་སྟོན་ཏོ།

ཅི་ཞིག་ཆུད་མི་ཟ་ཞེ་ན།

ས་ཆུད་མི་གཟོན་ནོ།

ཆུ་དང་།

མེ་དང་།

རླུང་དང་།

འབྱུང་པོ་དང་།

ལྷ་དང་།

བྲམ་ཟེ་དང་།

སྐྱེ་དགུའི་བདག་པོ་ཆུད་མི་གཟོན་ཏོ།

གཟུགས་ཆུད་མི་གཟོན་ཏོ།

ཚོར་བ་དང་།

འདུ་ཤེས་དང་།

འདུ་བྱེད་དང་།

རྣམ་པར་ཤེས་པ་ཆུད་མི་གཟོན་ཏོ།

དེ་དེ་བཞིན་གཤེགས་པ་རློམ་སེམས་སུ་མི་བྱེད།

མི་དམིགས།

མངོན་པར་མི་ཆགས།

ཡང་དག་པར་མི་ཤེས།

མི་རྟོག །

རྣམ་པར་མི་རྟོག །

ཡང་དག་པར་རྗེས་སུ་མི་མཐོང་སྟེ།

གང་དེ་ལྟར་དེ་བཞིན་གཤེགས་པ་མི་དམིགས་པར་ཡིད་ལ་བྱེད་པས་སྟོང་པ་ཉིད་ཀྱི་ཏིང་ངེ་འཛིན་ཐོབ་པ་དེ་ནི་སངས་རྒྱས་རྗེས་སུ་དྲན་པ་ཞེས་བྱ་སྟེ།

བྱང་ཆུབ་སེམས་དཔའ་དེ་ཏིང་ངེ་འཛིན་དེ་བསྒོམས་ཤིང་ཏིང་ངེ་འཛིན་དེ་ལ་མཉམ་པར་བཞག་ནས་ཏིང་ངེ་འཛིན་དེ་ལས་ལངས་ཏེ།

བཟང་སྐྱོང་ཁྱོད་གང་ན་བ་དེར་སོང་ནས་ཕྱིན་པ་དང་ཏིང་ངེ་འཛིན་འདི་བརྗོད་དོ།

བཟང་སྐྱོང་དེ་ལ་ཁྱོད་ཀྱིས་ཅི་ནས་ཀྱང་བྱང་ཆུབ་སེམས་དཔའ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་སྟོན་ཏོ།

དེ་ལ་ངས་ཀྱང་སྐྱེས་བུ་དེ་ནི་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་རྙེད་པ་ཞེས་བྱ་བར་འགྱུར་རོ་ཞེས་ལུང་སྟོན་ཏོ།

བཟང་སྐྱོང་ཁྱོད་ཉིད་དང་གནས་བརྟན་འོད་སྲུང་ཆེན་པོ་དང་།

བྱང་ཆུབ་སེམས་དཔའ་དབང་པོས་བྱིན་དང་།

བྱང་ཆུབ་སེམས་དཔའ་མཚམས་བཟངས་དང་།

གཞན་ཡང་བྱང་ཆུབ་སེམས་དཔའ་གང་གིས་ཏིང་ངེ་འཛིན་འདི་ཐོབ་པ་རྣམས་ཏིང་ངེ་འཛིན་འདི་ལས་དབང་དུ་གྱུར་པ་ཡིན་ཏེ།

བཟང་སྐྱོང་སྔོན་བྱུང་བ་འདས་པའི་དུས་ན་སྐྱེས་བུ་གཅིག་ཅིག་དགོན་པའི་མྱ་ངམ་ཞིག་ཏུ་སོང་བ་དང་།

དེ་བཀྲེས་ཤིང་སྐོམས་ནས་རྨུགས་པ་དང་གཉིད་ཀྱིས་ནོན་ཏེ་དེ་ཉལ་བ་དང་།

རྨི་ལམ་ན་བཟའ་བ་དང་།

བཏུང་བ་མང་པོ་ཞིག་རྙེད་དོ།

རྙེད་ནས་ཀྱང་ཇི་ཙམ་ཆོག་པར་ཟོས་ཏེ།

བཀྲེས་པ་དང་སྐོམ་པ་དེ་དག་ཀྱང་མེད་པར་གྱུར་ཏོ།

དེ་སད་པ་དང་ཡང་ལུས་དང་ལྟོ་མ་རྒྱས་པར་གྱུར་ནས།

དེ་འདི་སྙམ་དུ་འདི་ལྟ་སྟེ།

རྨི་ལམ་དང་འདྲ་བ་དེ་ལྟ་བུའི་ཆོས་ཤིག་ཡོད་དོ་སྙམ་སྟེ།

དེ་དེ་ལྟར་རྟོགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་གྱུར་ཏོ།

བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་ཁྱིམ་པའམ་རབ་ཏུ་བྱུང་བ་ཡང་རུང་།

ཕྱོགས་གང་དང་གང་ན་དེ་བཞིན་གཤེགས་པ་བཞུགས་པར་ཐོས་པའི་ཕྱོགས་དེ་དང་དེ་ལོགས་སུ་དེ་བཞིན་གཤེགས་པ་དེ་ཡིད་ལ་བྱས་ན་དེས་སངས་རྒྱས་མཐོང་བ་ཐོབ་པོ།

དེས་དངོས་པོའི་འདུ་ཤེས་སུ་མི་བྱའི་ནམ་མཁའི་འདུ་ཤེས་སུ་བྱ་སྟེ།

དེ་ནམ་མཁའི་འདུ་ཤེས་ལ་ཤིན་ཏུ་གནས་ཤིང་སངས་རྒྱས་ཀྱི་འདུ་ཤེས་སུ་ཤིན་ཏུ་ཡིད་ལ་བྱས་པས།

དེ་བཞིན་གཤེགས་པ་བཻདཱུརྱའི་སྐུ་གཟུགས་ལྟ་བུ་བཟང་པོ་བྱང་ཆུབ་སེམས་དཔའ་དེས་མངོན་སུམ་དུ་མཐོང་བར་འགྱུར་ཏེ།

བྱང་ཆུབ་སེམས་དཔའ་དེས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལྟ་བུ་དེ་མཐོང་བར་འགྱུར་རོ།

བཟང་སྐྱོང་འདི་ལྟ་སྟེ་དཔེར་ན་སྐྱེས་བུ་ལ་ལ་ཞིག་རང་སྐྱེས་པའི་ཡུལ་ནས་ལྗོངས་ཀྱི་ཕྱོགས་གཞན་ཞིག་ཏུ་སོང་སྟེ་ཕྱིན་པ་དང་།

རང་སྐྱེས་པའི་ཡུལ་དེ་རྗེས་སུ་དྲན་ནས་ཇི་ལྟར་མཐོང་བ་དང་།

ཐོས་པ་དང་།

ཤེས་པ་དང་།

རྟོགས་པའི་ཆོས་རྣམས་ཡིད་ལ་བྱེད་པ་ལས་རྨུགས་པ་དང་གཉིད་ཀྱིས་ནོན་ཏེ།

དེ་ཉལ་བ་དང་རྨི་ལམ་ན་རང་སྐྱེས་པའི་ཡུལ་དུ་སོང་ནས་དེ་ན་བདག་ཉིད་འདུག་པ་སྙམ་དུ་ཤེས་ཤིང་།

ཇི་ལྟར་སྔོན་མཐོང་བ་དང་།

ཐོས་པ་དང་བྱེ་བྲག་ཕྱེད་པ་དང་།

རྣམ་པར་ཤེས་པ་དེ་དག་ཀྱང་མཐོང་ངོ་།

དེ་ན་འགྲོ་ཞིང་ལྡོག་པ་དག་ཀྱང་བྱེད་དོ།

དེ་སད་པ་དང་གཉེན་འདབ་དང་།

མཛའ་བཤེས་དང་།

ཉེ་དུ་དང་།

སྣག་གི་གཉེན་མཚམས་རྣམས་ཀྱི་ནང་དུ་ང་ནི་འདི་ལྟར་སོང་སོང་ངོ་།

ངས་ནི་འདི་དག་མཐོང་ངོ་།

དེར་ངས་ནི་འདི་དག་མྱོང་ངོ་ཞེས་དོན་དེ་དག་ཀྱང་རྗོད་དོ།

བཟང་སྐྱོང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པའམ་རབ་ཏུ་བྱུང་བ་ཡང་རུང་།

ཕྱོགས་གང་དང་གང་ན་དེ་བཞིན་གཤེགས་པ་བཞུགས་པར་ཐོས་པའི་ཕྱོགས་དེ་དང་དེ་ལོགས་སུ་དྲན་པ་དང་ལྡན་ཞིང་།

སེམས་གཡེང་བ་མེད་པས་སངས་རྒྱས་མཐོང་བ་ཐོབ་པར་བྱ་བའི་ཕྱིར་དེ་བཞིན་གཤེགས་པ་དེ་ཡིད་ལ་བྱའོ།

དེ་ལྟར་ན་བྱང་ཆུབ་སེམས་དཔའ་དེས་དེ་བཞིན་གཤེགས་པ་བཻདཱུརྱའི་སྐུ་གཟུགས་བཟང་པོར་གནས་པར་མཐོང་བར་འགྱུར་རོ།

བཟང་སྐྱོང་འདི་ལྟ་སྟེ་དཔེར་ན་དགེ་སློང་མི་སྡུག་པ་སྒོམ་པ་ཞིག་གིས་མདུན་ན་རྣམ་པར་བམ་པའི་གཟུགས་རྣམས་མཐོང་ཞིང་རྣམ་པར་སྔོས་པ་དང་།

རྣམ་པར་རྣགས་པ་དང་།

རྣམ་པར་དམར་བ་དང་།

རྣམ་པར་ཟོས་པ་དང་།

ཤ་རྣམས་འཕགས་པའམ།

ཤ་དང་ཁྲག་མེད་པའམ།

དཀར་པོ་འམ།

ཁ་དོག་དུང་དང་འདྲ་བའམ།

ཀེང་རུས་ཤིག་མདུན་དུ་མཐོང་ན་རྣམ་པར་སྔོས་པ་ནས།

ཀེང་རུས་ཀྱི་བར་དུ་དེ་དག་གང་ནས་ཀྱང་མ་འོངས།

གང་དུ་ཡང་མ་སོང་ངོ་།

དེ་དག་སུས་ཀྱང་མ་བྱས།

སུས་ཀྱང་མ་བགགས་ཏེ།

བཟང་སྐྱོང་འོན་ཀྱང་དགེ་སློང་དེའི་སེམས་རྩེ་

གཅིག་པའི་དབང་གིས་མདུན་ན་ཀེང་རུས་འདུག་པ་མཐོང་ངོ་།

བཟང་སྐྱོང་དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པ་རྣམས་ཕྱོགས་གང་དང་གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་པའི་ཕྱོགས་དེ་དང་དེ་ལོགས་སུ་སངས་རྒྱས་མཐོང་བ་འཐོབ་པར་བྱ་བའི་ཕྱིར་ཡིད་ལ་བྱེད་དོ།

ཕྱོགས་དེ་དང་དེ་ལོགས་སུ་ཡིད་ལ་བྱས་པས་དེས་ཕྱོགས་དེ་དང་དེ་ལོགས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ངོ་།

དེ་ཅིའི་ཕྱིར་ཞེ་ན།

བཟང་སྐྱོང་འདི་ལྟ་སྟེ།

སངས་རྒྱས་མཐོང་བ་འཐོབ་པར་འགྱུར་བ་འདི་ནི་ཏིང་ངེ་འཛིན་འདིའི་རྒྱུ་འཐུན་པ་ཡིན་ནོ།

ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་མཐུ་དང་།

རང་གིས་དགེ་བའི་རྩ་བའི་སྟོབས་བསྐྱེད་པ་དང་།

ཏིང་ངེ་འཛིན་ཐོབ་པའི་ཕྱིར་དང་།

འདི་དག་གསུམ་ཚོགས་ཤིང་འདུས་པས།

དེས་དེ་བཞིན་གཤེགས་པ་རྣམས་མཐོང་ཞིང་སྣང་བར་འགྱུར་རོ།

བཟང་སྐྱོང་འདི་ལྟ་སྟེ་དཔེར་ན་བུད་མེད་དམ་སྐྱེས་པ་གང་ལ་ལ་མགོ་འཁྲུ་ཞིང་རྒྱན་འདོགས་པའི་རང་བཞིན་ཅན་ཞིག་ཡོད་ལ།

དེ་འབྲུ་མར་དང་བའི་སྣོད་དམ།

ཆུ་དང་བའི་སྣོད་དམ།

ཡོངས་སུ་ཕྱིས་པའི་མེ་ལོང་གི་དཀྱིལ་འཁོར་རམ།

མཐིང་བུས་བསྐུས་པའི་ས་ཕྱོགས་ལ།

བདག་ཉིད་བལྟ་བར་བསམས་ནས་དེས་དེར་བདག་ཉིད་ཀྱི་གཟུགས་མཐོང་ན།

བཟང་སྐྱོང་དེ་ལ་ཇི་སྙམ་དུ་སེམས།

འབྲུ་མར་དང་བའི་སྣོད་དམ།

ཆུ་དང་བའི་སྣོད་དམ།

ཡོངས་སུ་ཕྱིས་པའི་མེ་ལོང་གི་དཀྱིལ་འཁོར་རམ།

མཐིང་བུས་བསྐུས་པའི་སའི་ཕྱོགས་དེ་ལ།

གང་སྐྱེས་པའམ་བུད་མེད་ཀྱི་གཟུགས་སྣང་བ་དེ་སྐྱེས་པའམ།

བུད་མེད་གང་ཡང་དེའི་ནང་དུ་སོང་བའམ།

དེའི་ནང་དུ་ཞུགས་པ་ཡོད་དམ།

བཟང་སྐྱོང་གིས་གསོལ་པ།

བཙུན་པ་བཅོམ་ལྡན་འདས་དེ་ནི་མ་མཆིས་མོད་ཀྱི།

བཙུན་པ་བཅོམ་ལྡན་འདས་འབྲུ་མར་དང་།

ཆབ་དེ་དང་ཞིང་རྙོག་པ་མ་མཆིས་པའམ།

མེ་ལོང་གི་དཀྱིལ་འཁོར་དེ་ལེགས་པར་ཡོངས་སུ་ཕྱིས་པའམ།

མཐིང་བུས་བསྐུས་པའི་ས་ཆེན་པོ་དེ་དག་པའི་སླད་དུ་གཟུགས་བརྙན་མདུན་ན་མཆིས་ཏེ།

ཆབ་དང་།

འབྲུ་མར་དང་།

མེ་ལོང་དང་།

ས་ཆེན་པོ་དེ་ལས་སྐྱེས་པའམ།

བུད་མེད་ཀྱི་ལུས་དེ་བྱུང་བའང་མ་ལགས།

གང་ནས་ཀྱང་མ་མཆིས།

གང་དུ་ཡང་མ་མཆིས།

གང་ནས་ཀྱང་མ་སྐྱེས།

གང་དུ་ཡང་མ་འགགས་སོ།

བཅོམ་ལྡན་འདས་ཀྱིས་བཀའ་སྩལ་པ།

བཟང་སྐྱོང་ལེགས་སོ་ལེགས་སོ།

བཟང་སྐྱོང་ཁྱོད་ཡང་ལེགས་སོ།

བཟང་སྐྱོང་དེ་དེ་བཞིན་ནོ།

ཇི་སྐད་སྨྲས་པ་བཞིན་ཏེ།

གཟུགས་རྣམས་ཤིན་ཏུ་ཡོངས་སུ་དག་པ་ལས་གཟུགས་བརྙན་རྣམས་སྣང་བར་འགྱུར་རོ།

དེ་བཞིན་དུ་བྱང་ཆུབ་སེམས་དཔའ་དེ་ཡང་ཏིང་ངེ་འཛིན་འདི་ཤིན་ཏུ་བསྒོམས་པས་ཚེགས་ཆུང་ངུས་དེ་བཞིན་གཤེགས་པ་དེ་རྣམས་བྱང་ཆུབ་སེམས་དཔའ་དེས་མཐོང་ངོ་།

མཐོང་ནས་ཀྱང་ཞུ་བ་ཞུ་ཞིང་ཞུས་པ་ལུང་བསྟན་པས་ཡི་རངས་པར་འགྱུར་རོ།

དེ་འདི་སྙམ་དུ་དེ་བཞིན་གཤེགས་པ་འདི་ག་ཞིག་ནས་བྱོན་ཏམ།

བདག་ག་ཞིག་ཏུ་སོན་ཏམ་སྙམ་པ་ལས།

དེས་དེ་བཞིན་གཤེགས་པ་དེ་གང་ནས་ཀྱང་མ་བྱོན་པར་རབ་ཏུ་ཤེས་སོ།

བདག་གི་ལུས་ཀྱང་གང་དུ་ཡང་མ་སོང་བར་རབ་ཏུ་འདུ་ཤེས་ནས།

དེ་འདི་སྙམ་དུ་ཁམས་གསུམ་པ་འདི་དག་ནི་སེམས་ཙམ་མོ།

དེ་ཅིའི་ཕྱིར་ཞེ་ན།

འདི་ལྟར་བདག་ཇི་ལྟ་ཇི་ལྟར་རྣམ་པར་རྟོག་པ་དེ་ལྟ་དེ་ལྟར་སྣང་ངོ་།

སེམས་དེ་ནང་ན་ཡང་མེད།

ཕྱི་རོལ་ན་ཡང་མེད།

གཉི་ག་མེད་པར་ཡང་མི་དམིགས་ཏེ།

གཞན་དུ་ན་དམིགས་པ་ལ་བརྟེན་ནས་སྐྱེའོ།

གང་རྟེན་ཅིང་འབྲེལ་པར་བྱུང་བ་དེ་ནི་དངོས་པོ་མེད་པའོ།

གང་དངོས་པོ་མེད་པ་དེ་ནི་མ་སྐྱེས་པའོ།

གང་མ་སྐྱེས་པ་དེ་ནི་དམིགས་སུ་མེད་པའོ།

གང་དམིགས་སུ་མེད་པ་དེ་ནི་རང་བཞིན་སྟོང་པའོ།

གང་རང་བཞིན་སྟོང་པ་དེ་ནི་གདགས་སུ་མེད་པའོ།

གང་གདགས་སུ་མེད་པ་དེ་ནི་བལྟ་བའམ།

རྣམ་པར་ཤེས་པའམ།

ཆགས་པར་བྱ་བའམ།

བསྟན་པའམ།

ཆུད་གཟན་པར་བྱ་བའམ།

རབ་ཏུ་གཞག་པར་བྱ་བ་མི་ནུས་སོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ།

སེམས་ཀྱིས་སངས་རྒྱས་བྱེད་པ་སྟེ།

སེམས་ཉིད་ཀྱིས་ཀྱང་མཐོང་བའོ།

སེམས་ཉིད་ང་ཡི་སངས་རྒྱས་ཏེ།

སེམས་ཉིད་དེ་བཞིན་

གཤེགས་པའོ།

སེམས་ཉིད་ང་ཡི་ལུས་ཡིན་ཏེ།

སངས་རྒྱས་སེམས་ཀྱིས་མཐོང་བའོ།

སེམས་ཉིད་ང་ཡི་བྱང་ཆུབ་སྟེ།

སེམས་ཉིད་རང་བཞིན་མེད་པའོ།

སེམས་ཀྱིས་སེམས་ནི་མི་ཤེས་ཤིང་།

སེམས་ཀྱིས་སེམས་ནི་མི་མཐོང་ངོ་།

སེམས་སུ་འདུ་ཤེས་མི་ཤེས་ཡིན།

སེམས་སུ་མི་ཤེས་མྱ་ངན་འདའ།

ཆོས་འདི་དག་ནི་སྙིང་པོ་མེད།

རློམ་སེམས་ལས་ནི་ཀུན་འབྱུང་སྟེ།

སྟོང་པ་ཉིད་ལས་གང་རློམ་པའི།

རློམ་སེམས་དེ་འདིར་སྟོང་པ་ཡིན།

བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ།

གསུམ་པའོ།།

བཟང་སྐྱོང་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་དེའི་ཡེ་ཤེས་ནི་དེ་ལྟ་བུ་ཡིན་ནོ།

བཟང་སྐྱོང་ཆོས་བཞི་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོབ་བོ།

བཞི་གང་ཞེ་ན།

འདི་ལྟ་སྟེ།

མི་འཕྲོགས་པའི་དད་པ་དང་།

ཕྱིར་མི་ལྡོག་པའི་བརྩོན་འགྲུས་དང་།

གཞན་གྱི་དྲིང་མི་འཇོག་པའི་ཤེས་རབ་དང་།

དགེ་བའི་བཤེས་གཉེན་ལ་བསྙེན་བཀུར་བྱེད་པ་སྟེ།

བཟང་སྐྱོང་ཆོས་བཞི་པོ་དེ་དག་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་བོ།

བཟང་སྐྱོང་གཞན་ཡང་ཆོས་བཞི་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

བཞི་གང་ཞེ་ན།

འདི་ལྟ་སྟེ།

ཟླ་བ་གསུམ་གྱི་བར་དུ་སེ་གོལ་བརྡབ་པ་ཙམ་ཡང་བདག་གི་འདུ་ཤེས་མི་སྐྱེད་པ་དང་།

ཟླ་བ་གསུམ་གྱི་བར་དུ་སེ་གོལ་བརྡབ་པ་ཙམ་ཡང་རྨུགས་པ་དང་།

གཉིད་ཀྱིས་མི་ནོན་པ་དང་།

བཤང་བ་དང་།

གཅི་བ་བྱེད་པ་མ་གཏོགས་པར་ཟླ་བ་གསུམ་གྱི་བར་དུ་བརྩོན་འགྲུས་བརྩམས་ཏེ་འཆག་པ་ལ་ཞུགས་ནས་ས་ལ་མི་འདུག་པ་དང་།

གཞན་དག་ལ་ཡང་ཆོས་ཀྱི་སྦྱིན་པ་རྒྱ་ཆེར་གཏོང་བའི་སྟེང་དུ་རྙེད་པ་དང་།

བཀུར་སྟི་དང་།

ཚིགས་སུ་བཅད་པ་ལ་མི་རེ་བ་སྟེ།

བཟང་སྐྱོང་ཆོས་བཞི་པོ་དེ་དག་དང་ལྡན་ན།

བྱང་ཆུབ་

སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

བཟང་སྐྱོང་གཞན་ཡང་ཆོས་བཞི་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

བཞི་གང་ཞེ་ན།

འདི་ལྟ་སྟེ།

སངས་རྒྱས་བལྟ་བར་སེམས་ཅན་རྣམས་ལ་སྐུལ་བ་དང་།

ཆོས་མཉན་པར་སེམས་ཅན་རྣམས་ལ་སྐུལ་བ་དང་།

བྱང་ཆུབ་ཀྱི་སེམས་སྐྱེད་པར་སེམས་ཅན་རྣམས་ལ་སྐུལ་བ་དང་།

ཕྲག་དོག་མེད་པ་སྟེ།

བཟང་སྐྱོང་ཆོས་བཞི་པོ་དེ་དག་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

བཟང་སྐྱོང་གཞན་ཡང་ཆོས་བཞི་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

བཞི་གང་ཞེ་ན།

འདི་ལྟ་སྟེ།

ཏིང་ངེ་འཛིན་འདི་འདོད་པས།

དེ་བཞིན་གཤེགས་པའི་སྐུ་གཟུགས་བྱེད་དུ་གཞུག་སྟེ།

ཐ་ན་རི་མོར་ཡང་འདྲིར་འཇུག་པ་དང་།

ཏིང་ངེ་འཛིན་འདི་འདོད་པས།

ཏིང་ངེ་འཛིན་འདི་ཡུན་རིང་དུ་གནས་པར་བྱ་བའི་ཕྱིར་ཅི་ནས་ཀྱང་ཏིང་ངེ་འཛིན་འདི་འཛིན་པར་ལེགས་པར་བྲིས་ཤིང་གླེགས་བམ་སྦྱིན་པ་དང་།

མངོན་པའི་ང་རྒྱལ་ཅན་གྱི་གང་ཟག་རྣམས་མངོན་པའི་ང་རྒྱལ་མེད་པའི་ཆོས་འདི་ལྟ་སྟེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པ་དང་།

དེ་བཞིན་གཤེགས་པའི་བསྟན་པ་བསྲུང་བ་དང་།

སྦ་བ་དང་།

ཡང་དག་པར་གཟུང་བའི་ཕྱིར་གནས་པ་སྟེ།

བཟང་སྐྱོང་ཆོས་བཞི་པོ་དེ་དག་དང་ལྡན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ།

བདེ་གཤེགས་བསྟན་པ་ལ་ནི་དད་པ་སྐྱེད།

སྟོང་པ་ཉིད་ཀྱི་ཆོས་བཤད་མ་སྨོད་ཅིག །

བརྩོན་འགྲུས་བརྩམས་ཤིང་གཉིད་ནི་སྤངས་བྱས་ཏེ།

ཟླ་གསུམ་ཚང་བར་ནམ་ཡང་མ་འདུག་ཤིག །

རྙེད་དང་བཀུར་སྟི་ཚིགས་བཅད་མི་རྟེན་པར།

བདེ་གཤེགས་གསུངས་པའི་ཆོས་ནི་བཤད་བྱ་ཞིང་།

མཚུངས་པ་མེད་པའི་བསྟན་པ་རྒྱས་པར་བྱ།

རྟེན་པ་མེད་ན་ཆོས་འདི་ཐོབ་པར་འགྱུར།

ཕྲག་དོག་མེད་ཅིང་ཁྲོ་བ་བསྐྱེད་མི་བྱ།

འདོད་ཆགས་སྤངས་ཤིང་སེམས་ནི་རྣམ་

གྲོལ་ལ།

མཉམ་པར་གཞག་ཅིང་བསམ་གཏན་དགའ་བྱས་ཏེ།

སྦྱོར་བར་བྱེད་ན་ཆོས་འདི་འཐོབ་པར་འགྱུར།

གསེར་མདོག་བསོད་ནམས་བརྒྱ་པའི་མཚན་མངའ་ལ།

མཛེས་ཤིང་ཀུན་ནས་ཡོངས་སུ་རྒྱས་གྱུར་པ།

གསེར་གྱི་གཟུགས་བཞིན་དུ་ནི་ལྟ་སྡུག་པའི།

བསོད་ནམས་མཆོག་མཚན་སངས་རྒྱས་དྲན་པར་བྱོས།

སངས་རྒྱས་འདས་པའམ་ཡང་ན་མ་བྱོན་པ།

ཐལ་མོ་སྦྱར་ཏེ་རྗེས་སུ་དྲན་པར་བྱོས།

མི་མཆོག་གང་དག་ད་ལྟར་བཞུགས་པ་ཡང་།

དེ་དག་མཆོད་ཕྱིར་བདེ་གཤེགས་དྲན་པར་བྱོས།

དང་བའི་སེམས་ཀྱིས་མེ་ཏོག་ཕྲེང་བ་དང་།

བྱུག་པ་དག་དང་བཟའ་དང་བཅའ་བ་ཡིས།

བདེ་བར་གཤེགས་པ་ལ་ནི་མཆོད་པ་བྱོས།

ཏིང་འཛིན་འདི་ནི་རྙེད་པར་དཀའ་མི་འགྱུར།

ཏིང་ངེ་འཛིན་གྱི་མཆོག་འདི་འདོད་པས་ན།

སེམས་ནི་རངས་ཤིང་དགའ་བ་འདྲ་མེད་པས།

རྔ་དུང་རྫ་རྔ་དག་གི་སིལ་སྙན་དང་།

དཔེ་མེད་རིང་བསྲེལ་ལ་ནི་རོལ་མོ་བྱེད།

ཏིང་ངེ་འཛིན་གྱི་མཆོག་ནི་འདོད་པས་ན།

རི་མོ་ལེགས་པར་བྲིས་ཤིང་མཚན་རྫོགས་ལ།

གསེར་གྱི་མདོག་འདྲ་རྒྱ་ཆེ་སྐྱོན་མེད་པའི།

མཚུངས་པ་མེད་པའི་སྐུ་གཟུགས་བྱེད་པ་དང་།

དགའ་བར་བྱེད་པའི་ཆོས་ནི་མདུན་བཞག་ནས།

ཚུལ་ཁྲིམས་ཡོངས་དག་ཐོས་པ་ཚོལ་བྱེད་ལ།

ལེ་ལོའི་དངོས་པོ་ཡོངས་སུ་སྤངས་བྱས་ན།

ཏིང་འཛིན་འདི་ནི་རིང་པོར་མི་ཐོགས་རྙེད།

ཀུན་ནས་མནར་སེམས་སུ་ལའང་མ་བྱེད་ཅིག །

བྱམས་ལ་གནས་དང་སྙིང་རྗེ་གནས་པ་དང་།

འདོད་པའི་ཡོན་ཏན་བཏང་སྙོམས་བྱས་ན་ནི།

ཏིང་འཛིན་འདི་ནི་རིང་པོར་མི་ཐོགས་རྙེད།

ཆོས་སྨྲ་བ་ལའང་དེ་བཞིན་བྱམས་པ་སྐྱེད།

སྟོན་པར་འདུ་ཤེས་རྟག་ཏུ་ཉེ་བར་ཞོག །

ང་རྒྱལ་མ་བྱེད་ཆགས་པ་སྤང་བར་བྱོས།

ཆོས་སྦྱིན་པ་ལ་ནམ་ཀྱང་འཇུངས་མ་གྱུར།

ཕན་ཡོན་བཟང་པོ་འདི་དག་བླང་བར་བྱོས།

གདམས་ངག་གནས་ནི་བདེ་བར་གཤེགས་པས་བསྟན།

འདི་ནི་སངས་རྒྱས་མང་པོའི་བསྟན་པ་སྟེ།

ཏིང་འཛིན་འདི་ནི་རྙེད་པར་དཀའ་མི་འགྱུར།

བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཞི་པའོ།།

བཟང་སྐྱོང་གཞན་ཡང་བྱང་ཆུབ་སེམས་དཔའ་སེམས་

དཔའ་ཆེན་པོ་ཏིང་ངེ་འཛིན་འདི་འདོད་པས་ཆོས་སྨྲ་བའི་དགེ་སློང་ལ་གུས་པ་དང་བཅས་ཤིང་ཞེ་ས་དང་བཅས་པར་བྱ་སྟེ།

ཀླན་ཀ་བཙལ་བ་མེད་པའི་སེམས་ཀྱིས་སྟོན་པར་འདུ་ཤེས་བསྐྱེད་ལ།

ཏིང་ངེ་འཛིན་འདི་ལ་སྦྱར་བར་བྱའོ།

བཟང་སྐྱོང་གལ་ཏེ་བྱང་ཆུབ་སེམས་དཔའ་དེས་ཆོས་སྨྲ་བའི་དགེ་སློང་དེ་ལ་ཀུན་ནས་མནར་སེམས་ཀྱི་སེམས་ཀྱིས་གནས་སམ།

ཐ་བའི་སེམས་ཀྱིས་གནས་སམ།

སེམས་མ་དད་པས་གནས་ན།

བཟང་སྐྱོང་བྱང་ཆུབ་སེམས་དཔའ་དེས་ཏིང་ངེ་འཛིན་འདི་ཐོབ་པ་ནི་གནས་མ་ཡིན་ཏེ་སྐབས་མེད་དོ།

གལ་ཏེ་ཆོས་སྨྲ་བའི་དགེ་སློང་དེ་ལ་སྟོན་པའི་འདུ་ཤེས་མི་སྐྱེད་ན་ཡང་གནས་དེ་མེད་དོ།

བཟང་སྐྱོང་དེ་ཅིའི་ཕྱིར་ཞེ་ན།

དེ་ལྟར་མ་གུས་པས་ནི་དམ་པའི་ཆོས་ནུབ་པར་འགྱུར་རོ།

བཟང་སྐྱོང་འདི་ལྟ་སྟེ།

དཔེར་ན་མིག་དང་ལྡན་པའི་སྐྱེས་བུ་ཞིག་གིས་ནམ་ཐང་ཞིང་།

སྤྲིན་མེད་པའི་མཚན་མོ་ནམ་གྱི་གུང་ཐུན་ལ་གདོང་གྱེན་དུ་བར་སྣང་ལ་བལྟས་ན།

དེས་དེར་སྐར་མའི་གཟུགས་མང་པོ་རྣམས་མཐོང་ངོ་།

བཟང་སྐྱོང་དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ལ་གནས་པ་ནི་ནམ་མཁའི་འདུ་ཤེས་ཤིན་ཏུ་ཉེ་བར་གནས་ཤིང་སངས་རྒྱས་ཀྱི་འདུ་ཤེས་ཤིན་ཏུ་བྱིན་གྱིས་བརླབས་པའི་ཕྱིར་སངས་རྒྱས་ཀྱི་མཐུ་དང་།

ཏིང་ངེ་འཛིན་འདི་བསྒོམས་པས་འཇིག་རྟེན་གྱི་ཁམས་གཞན་དུ་ཤར་ཕྱོགས་སུ་བལྟས་ན།

ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ།

ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང་།

སངས་རྒྱས་སྟོང་ཕྲག་མང་པོ་དང་།

སངས་རྒྱས་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཕྲག་མང་པོ་དང་།

སངས་རྒྱས་བྱེ་བ་བརྒྱ་ཕྲག་མང་པོ་དང་།

སངས་རྒྱས་བྱེ་བ་སྟོང་ཕྲག་མང་པོ་དང་།

སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཚེགས་ཆུང་ངུས་མིག་གི་དབང་པོ་ལ་སྣང་བར་འགྱུར་རོ།

དེ་བཞིན་དུ་ལྷོ་ཕྱོགས་དང་།

ནུབ་ཕྱོགས་དང་།

བྱང་ཕྱོགས་དང་།

ཕྱོགས་མཚམས་བཞི་དང་།

འོག་གི་ཕྱོགས་དང་།

སྟེང་གི་ཕྱོགས་རྒྱས་པར་བྱ་སྟེ།

དེ་ལྟར་

ཕྱོགས་བཅུར་བལྟས་ན།

བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ།

ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང་།

སངས་རྒྱས་སྟོང་ཕྲག་མང་པོ་དང་།

སངས་རྒྱས་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཕྲག་མང་པོ་དང་།

སངས་རྒྱས་བྱེ་བ་བརྒྱ་ཕྲག་མང་པོ་དང་།

སངས་རྒྱས་བྱེ་བ་སྟོང་ཕྲག་མང་པོ་དང་།

སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ།

ཚེགས་ཆུང་ངུས་མིག་གི་དབང་པོ་ལ་སྣང་བར་གྱུར་ཏོ།

བཟང་སྐྱོང་དེ་ལྟར་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པ་རྣམས་ནི་ཚེགས་ཆུང་ངུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ།

ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང་།

སངས་རྒྱས་སྟོང་ཕྲག་མང་པོ་དང་།

སངས་རྒྱས་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཕྲག་མང་པོ་དང་།

སངས་རྒྱས་བྱེ་བ་བརྒྱ་ཕྲག་མང་པོ་དང་།

སངས་རྒྱས་བྱེ་བ་སྟོང་ཕྲག་མང་པོ་དང་།

སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང་།

སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རྣམས་ཚེགས་ཆུང་ངུས་མིག་གི་དབང་པོ་ལ་སྣང་བར་འགྱུར་རོ།

བཟང་སྐྱོང་འདི་ལྟ་སྟེ་དཔེར་ན།

སངས་རྒྱས་ཀྱི་སྤྱན་གང་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཐམས་ཅད་ཐུགས་སུ་ཆུད་པ་དང་།

ཐམས་ཅད་གཟིགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སངས་རྒྱས་ཀྱི་སྤྱན་ཡོད་དོ།

བཟང་སྐྱོང་དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ལ་གནས་པ་རྣམས་ནི་ཚེགས་ཆུང་ངུས་མང་དུ་ཐོས་པ་ཡོངས་སུ་རྫོགས་པར་འགྱུར་རོ།

སྦྱིན་པའི་ཕ་རོལ་ཏུ་ཕྱིན་པ་དང་།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་ཕ་རོལ་ཏུ་ཕྱིན་པ་དང་།

བརྩོན་འགྲུས་ཀྱི་ཕ་རོལ་ཏུ་

ཕྱིན་པ་དང་།

བསམ་གཏན་གྱི་ཕ་རོལ་ཏུ་ཕྱིན་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ།

ཚུལ་ཁྲིམས་དང་།

ཏིང་ངེ་འཛིན་དང་།

ཤེས་རབ་དང་།

རྣམ་པར་གྲོལ་བ་དང་།

རྣམ་པར་གྲོལ་བའི་ཡེ་ཤེས་མཐོང་བ་ཡོངས་སུ་རྫོགས་པར་འགྱུར་རོ།

བྱང་ཆུབ་སེམས་དཔའི་ཡོན་ཏན་ཐམས་ཅད་ཡོངས་སུ་རྫོགས་པར་འགྱུར་རོ།

བླ་ན་མེད་པའི་ཤེས་རབ་ཀྱི་དབང་པོ་དང་།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པར་འགྱུར་རོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ།

དཔེར་ན་མིག་ལྡན་མི་ཞིག་མཚན་མོ་དབེན་པའི་དུས།

ནམ་གྱི་གུང་ཐུན་ལྡང་བྱས་ནམ་མཁའ་རྣམ་དག་ལ།

དེས་ནི་སྐར་མ་མང་པོ་བརྒྱ་སྟོང་མཐོང་གྱུར་ཏེ།

དྲན་ལྡན་བསམས་ན་ཉིན་པར་དུ་ཡང་དྲན་པར་འགྱུར།

དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ནས།

སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར།

དེ་ལས་ལངས་པའི་དུས་དེ་ན་ཡང་དྲན་འགྱུར་ཞིང་།

འཁོར་ལ་འཇིག་རྟེན་མགོན་པོ་འདི་འདྲའོ་ཞེས་ཀྱང་སྨྲ།

ཇི་ལྟར་ངའི་མིག་སངས་རྒྱས་སྤྱན་དེ་རྣམ་དག་ལ།

རབ་རིབ་མེད་ཅིང་ཡོངས་དག་དེས་ནི་འཇིག་རྟེན་ལྟ་བ་ལྟར།

དེ་ལྟར་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་སྤྱན།

རྡུལ་མེད་ཏིང་འཛིན་འདི་ཡིན་དེས་ནི་མི་དབང་མཐོང་།

སྟོབས་བཅུ་རྐང་གཉིས་དབང་པོ་འཇིག་རྟེན་གཙོ་ལྟའི་ཚེ།

ཐུབ་རྣམས་དངོས་པོའི་འདུ་ཤེས་ནམ་ཡང་མི་སྐྱེད་དོ།

དུག་བཅོམ་ཡོངས་དག་དངོས་པོའི་འདུ་ཤེས་མེད་པ་ཡི།

བྱང་ཆུབ་སེམས་དཔའ་གཙོ་བོའི་ཡོན་ཏན་ཁྱད་པར་ཉོན།

ཆོས་མཆོག་བསིལ་བ་དེ་དག་ཀྱང་ནི་མཉན་པར་བྱོས།

སྟོང་པ་ཉིད་ཆོས་བདེ་བ་མྱུར་དུ་དྲན་པར་བྱོས།

ངས་ཀྱང་རྒྱལ་བའི་བྱང་ཆུབ་རྙེད་ནས་སྐྱེ་དགུ་ལ།

སྐྱེ་བོ་མང་ལ་བདེ་བའི་ཆོས་འདི་བཤད་པར་བྱ།

ཇི་ལྟར་བྱང་ཆུབ་སེམས་དཔའ་ཚེ་དཔག་མེད་སྐྱེས་ནས།

འཇིག་རྟེན་མགོན་པོ་བརྒྱ་སྟོང་མང་པོ་མཐོང་གྱུར་པ།

དེ་ལྟར་བྱང་ཆུབ་སེམས་དཔའི་ཏིང་འཛིན་འདི་ཐོབ་ན།

སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར།

ཇི་ལྟར་

དྲན་ལྡན་དགེ་སློང་བཟང་པོ་ཀུན་དགའ་བོས།

ང་ལས་ཐོས་པ་རབ་ཏུ་བཟུང་ཞིང་དེ་ཡང་ཀུན་འཛིན་པ།

དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ན།

ཆོས་མང་ཐོས་ཤིང་དེ་ཡང་ཐམས་ཅད་འཛིན་པར་འགྱུར།

ཏིང་ངེ་འཛིན་འདི་ཐོས་ནས་ཡང་དག་དགའ་བསྐྱེད་ལ།

འཇིག་རྟེན་གསང་ཚིག་སྣ་ཚོགས་ཐམས་ཅད་སྤང་བྱོས་ཏེ།

མྱུར་དུ་དད་པར་བྱོས་ལ་ཆོས་ཀྱི་སྦྱིན་པའང་བྱིན།

དེ་ལྟར་ཡོངས་དག་ཞི་བའི་ས་འདི་ཐོབ་པར་འགྱུར།

བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།།

བཟང་སྐྱོང་དེ་ལ་བྱང་ཆུབ་སེམས་དཔས་ཏིང་ངེ་འཛིན་འདི་ཐོབ་པར་བྱ་བ་དང་།

འདི་ལྟ་སྟེ།

ཡོངས་སུ་བསྒྲུབ་པར་བྱ་བའི་ཕྱིར་སྤྲོ་བ་དང་བརྩོན་འགྲུས་ཆེན་པོ་བསྐྱེད་པར་བྱའོ།

བཟང་སྐྱོང་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་གྲུ་རིན་པོ་ཆེས་ཡོངས་སུ་གང་བ་ཞིག་རྒྱ་མཚོ་ཆེན་པོ་རྒལ་ཏེ་འཇིགས་པ་ཐམས་ཅད་སྤངས་པ་ལས།

ཚུ་རོལ་གྱི་འགྲམ་དུ་ཆག་ན།

དེ་ལ་འཛམ་བུའི་གླིང་བའི་མི་རྣམས་ཀྱིས་སྒྲ་ཆེན་པོ་དང་།

སྐད་ཆེན་པོ་དང་།

འོ་དོད་བོད་པར་བྱའོ།

བདག་ཅག་ནི་རིན་པོ་ཆེ་འདི་དག་ལས་ཉམས་སོ་ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱའོ།

བཟང་སྐྱོང་དེ་བཞིན་དུ་རིགས་ཀྱི་བུའམ།

རིགས་ཀྱི་བུ་མོའམ།

དགེ་སློང་ངམ།

དགེ་སློང་མའམ།

དགེ་བསྙེན་ནམ།

དགེ་བསྙེན་མ་གང་ལ་ལ་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་རྣ་ལམ་དུ་གྲག་པར་གྱུར་ལ།

ཐོས་ནས་ཀྱང་གླེགས་བམ་དུ་འདྲི་བར་མི་བྱེད།

སྟོན་པར་མི་བྱེད།

འདོན་པར་མི་བྱེད།

འཛིན་པར་མི་བྱེད།

ཀློག་པར་མི་བྱེད།

འཆད་པར་མི་བྱེད།

སྒོམ་པར་མི་བྱེད།

ནན་ཏན་གྱིས་སྒྲུབ་པར་མི་བྱེད་ན།

བཟང་སྐྱོང་དེ་ལ་ལྷ་དང་བཅས་པའི་འཇིག་རྟེན་གྱིས་སྒྲ་ཆེན་པོ་དང་།

སྐད་ཆེན་པོ་དང་།

འོ་དོད་བོད་པར་བྱའོ།

འདི་ལྟར་ཏིང་ངེ་འཛིན་ཟབ་མོ་རིན་པོ་ཆེ་འདི་ལྟ་བུ་སངས་རྒྱས་ཀྱིས་བསྔགས་པ།

སངས་རྒྱས་ཀྱིས་བསྟོད་པ།

སངས་རྒྱས་ཀྱིས་སྟོད་དུ་བཅུག་པ།

སངས་རྒྱས་ཀྱི་ཡོན་ཏན་ཐམས་ཅད་ཐོབ་པར་འགྱུར་བ་གང་ཡིན་པ་དེ་ཐོས་ནས་ཡི་གེར་འདྲི་བར་མི་བྱེད།

སྟོན་པར་མི་བྱེད།

འདོན་པར་མི་བྱེད།

འཛིན་པར་མི་བྱེད།

ཀློག་པར་

མི་བྱེད།

འཆད་པར་མི་བྱེད།

སྒོམ་པར་མི་བྱེད།

ནན་ཏན་གྱིས་སྒྲུབ་པར་མི་བྱེད་ཅིང་།

ང་རྒྱལ་གྱིས་ནོན་ལ་མི་ཤེས་ཏེ།

མང་དུ་ཐོས་པ་ཡོངས་སུ་རྫོགས་པ་མི་འཛིན་པའི་སེམས་ཅན་དེ་དག་ནི་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ལས་ཡོངས་སུ་ཉམས་སོ་ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱའོ།

བཟང་སྐྱོང་ཏིང་ངེ་འཛིན་འདི་ཉན་མི་འདོད་པར་འགྱུར་བ་དང་།

ཏིང་ངེ་འཛིན་འདི་འཛིན་པར་མི་འགྱུར་བའི་སེམས་ཅན་དེ་དག་ནི་བཟང་སྐྱོང་ཡོངས་སུ་ཉམས་པའི་ཆོས་ཅན་ཡིན་པར་ངས་བཤད་དོ།

བཟང་སྐྱོང་གང་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ཐོས་ནས་ཡི་གེར་འདྲི་བར་མི་བྱེད།

སྟོན་པར་མི་བྱེད།

འདོན་པར་མི་བྱེད།

འཛིན་པར་མི་བྱེད།

ཀློག་པར་མི་བྱེད།

འཆད་པར་མི་བྱེད།

སྒོམ་པར་མི་བྱེད།

ནན་ཏན་གྱིས་སྒྲུབ་པར་མི་བྱེད་པའི་སེམས་ཅན་དེ་དག་ནི་ཡོངས་སུ་ཉམས་པ་ཇི་ཙམ་དུ་འགྱུར་བ་ལྟོས་ཤིག །

བཟང་སྐྱོང་སེམས་ཅན་དེ་ལྟ་བུ་དེ་རྣམས་ལ་ནི་ཆོས་དེ་ལྟ་བུ་དག་ཆེད་མི་ཆེ་བར་ངས་བཤད་དོ།

བཟང་སྐྱོང་འདི་ལྟ་སྟེ་དཔེར་ན།

སྐྱེས་བུ་གང་ལ་ལ་ཞིག་བྱིས་པའི་རང་བཞིན་ཅན་ཤེས་རབ་འཆལ་པའི་རང་བཞིན་ཅན་ཞིག་ལ་ཙན་དན་དམར་པོ་སར་པ་ཞིག་བྱིན་པ་དང་།

དེ་དེ་ལ་མི་གཙང་བའི་འདུ་ཤེས་བསྐྱེད་དོ།

བཙོག་པའི་འདུ་ཤེས་བསྐྱེད་དོ།

དེ་ལ་སྐྱེས་བུ་མཁས་པའི་རང་བཞིན་ཅན་ཙན་དན་གྱི་ཚོང་པ་ཞིག་གིས་འདི་སྐད་དུ་ཀྱེ་སྐྱེས་བུ་ཁྱོད་ཙན་དན་སར་པ་འདི་ལ་མི་གཙང་བའི་འདུ་ཤེས་མ་སྐྱེད་ཅིག །

བཙོག་པའི་འདུ་ཤེས་མ་སྐྱེད་ཅིག །

ཀྱེ་སྐྱེས་བུ་འདིའི་དྲི་ཇི་ཙམ་དུ་དགའ་བར་བྱེད་པ་རེ་ཞིག་སྣོམས་ཤིག །

ཀྱེ་སྐྱེས་བུ་འདིའི་ཁ་དོག་ཅི་ཙམ་དུ་བལྟ་ན་སྡུག་པ་ཡང་ལྟོས་ཤིག་སྨྲས་པ་དང་།

བྱིས་པའི་རང་བཞིན་ཅན་ཤེས་རབ་འཆལ་པའི་རང་བཞིན་ཅན་གྱི་སྐྱེས་བུ་དེས་ཙན་དན་དམར་པོ་དེ་མཐོང་ནས་སྣོམ་མི་འདོད་པའི་ཕྱིར་རང་གིས་ཀྱང་མ་བླངས།

ལྟ་མི་འདོད་པའི་ཕྱིར་མིག་ཀྱང་འཛུམས་པར་བྱེད་པ་དེ་བཞིན་དུ།

བཟང་སྐྱོང་མ་འོངས་པའི་དུས་ན།

དགེ་སློང་བྱང་ཆུབ་སེམས་དཔའ་རློམ་སེམས་ཅན་ལུས་མ་བསྒོམས་པ།

སེམས་མ་བསྒོམས་པ།

ཚུལ་ཁྲིམས་མ་བསྒོམས་པ།

ཤེས་རབ་མ་བསྒོམས་པ།

ཚུལ་ཁྲིམས་འཆལ་པ།

དམ་པའི་

ཆོས་ངེས་པའི་དོན་རིན་པོ་ཆེ་མི་ལེན་པ།

དམ་པའི་ཆོས་ངེས་པའི་དོན་རིན་པོ་ཆེ་ཡོངས་སུ་སྤོང་བར་བྱེད་པ།

ཤེས་རབ་འཆལ་པ།

རབ་ལས་ཡོངས་སུ་ཉམས་པ།

བསམ་གཏན་རྙེད་པས་ལྷག་པའི་ང་རྒྱལ་ཅན་གང་ཟག་ལ་རྟེན་པ།

གང་ཟག་ཏུ་ལྟ་བ།

གང་ཟག་ཏུ་གནས་པ།

ཆོས་སུ་དམིགས་པ་ལ་མངོན་པར་ཞེན་པ།

སྟོང་པ་ཉིད་བཤད་པས་སྐྲག་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་བཤད་པ་ཐོས་ན།

རྣ་བླགས་ཏེ་ཉན་པར་མི་བྱེད།

མངོན་པར་དད་པར་མི་བྱེད།

འཛིན་པར་མི་བྱེད།

ཀུན་ཆུབ་པར་མི་བྱེད།

འཆང་བར་མི་བྱེད།

ཀློག་པར་ཡང་མི་བྱེད་ན།

གཞན་དག་ལ་རྒྱ་ཆེར་འཆད་པ་ལྟ་ཅི་སྨོས།

དེ་དག་དེའི་ཕྱིར་བྱམས་པ་དང་དགའ་བ་རྒྱ་ཆེན་པོ་ཡང་མི་འཐོབ་ན།

དེ་བཞིན་ཉིད་དུ་སྒྲུབ་པ་ལྟ་ཅི་སྨོས་པའི་སྟེང་དུ་ཐོས་ནས་ཀྱང་སྤོང་བར་བྱེད་དོ།

མངོན་པར་མ་དད་དོ།

མི་ལེན་ཏོ།

མོས་པར་མི་བྱེད་དོ།

དཔྱ་བའི་བསམ་པ་དང་།

བསྟིང་བའི་བསམ་པ་དང་།

སྨད་པའི་བསམ་པས་ཚིག་ཀྱང་འདི་སྐད་དུ་གསུང་རབ་འདི་དག་འབར་དང་།

འདི་ལྟར་དགེ་སློང་ཀུན་དགའ་བོ་འདྲ་བ་འཇིག་རྟེན་དུ་འབྱུང་བ་དང་།

འདི་ལྟ་བུའི་མདོ་སྡེ་འབྱུང་བ་ནི་ངོ་མཚར་ཏོ་ཞེས་ཟེར་ཞིང་།

ལྐོག་ཏུ་དོང་ནས་ཀྱང་ཕན་ཚུན་དུ་མདོ་སྡེ་འདི་ལྟ་བུ་དག་ནི་རང་གིས་བྱས་པ་རང་བཟོ་བྱས་པ་སྟེ།

འདི་ནི་སངས་རྒྱས་ཀྱིས་གསུངས་པ་མ་ཡིན།

སངས་རྒྱས་ཀྱིས་གནང་བ་མ་ཡིན་ནོ་ཞེས་དེ་སྐད་ཀྱང་རྗོད་ཅིང་སྨོད་པར་བྱེད་དེ།

སྐྱེས་བུ་བླུན་པོ་དེ་ལྟ་བུ་དག་ནི་དམ་པའི་ཆོས་རིན་པོ་ཆེ་ལས་ཡོངས་སུ་ཉམས་པ་དང་།

དམ་པའི་ཆོས་རིན་པོ་ཆེ་ཡོངས་སུ་སྤངས་པར་རིག་པར་བྱའོ།

བཟང་སྐྱོང་འདི་ལྟ་སྟེ་དཔེར་ན།

སྐྱེས་བུ་བྱིས་པའི་རང་བཞིན་ཅན་དེ་ཙན་དན་དམར་པོ་དེ་མཐོང་ནས་མི་བསྣོམ་པའི་ཕྱིར་སྣ་ཡང་འགོག་པ་དང་།

མི་མཐོང་བར་བྱ་བའི་ཕྱིར་མིག་ཀྱང་འཛུམས་པ་དེ་བཞིན་དུ།

བཟང་སྐྱོང་སྐྱེས་བུ་བླུན་པོ་དེ་དག་ཀྱང་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ཐོས་ནས།

ཕྱི་ཕྱིར་ཞིང་མཉན་པར་མི་སེམས།

གཟུང་བ་དང་།

ཀུན་ཆུབ་པར་བྱ་བ་དང་།

བཅང་བར་བྱ་བ་དང་།

བཀླག་པར་བྱ་བར་མི་སེམས་པའི་སྟེང་དུ་ཐོས་ནས་ཀྱང་འདི་ལྟ་སྟེ།

ཉན་མི་འདོད་པའི་ཕྱིར་གནས་དེ་ནས་འགྲོ་བར་

འགྱུར་རོ།

བཟང་སྐྱོང་འདི་ལྟ་སྟེ་དཔེར་ན།

སྐྱེས་བུ་རིན་པོ་ཆེ་འཚོང་བ་ལ་ལ་ཞིག་གིས་སྐྱེས་བུ་བླུན་པོའི་རང་བཞིན་ཅན་དེ་རྣམས་ལ་ནོར་བུ་རིན་པོ་ཆེ་བཻདཱུརྱ་རིན་ཐང་མེད་པ་ཞིག་བསྟན་པར་བསམས་པ་དང་།

དེ་ལ་སྐྱེས་བུ་བླུན་པོའི་རང་བཞིན་ཅན་དེ་དག་གིས་ནོར་བུ་རིན་པོ་ཆེ་དེ་མཐོང་ནས།

དེ་ལ་འདི་སྐད་ཅེས་སྨྲས་སོ།

ཀྱེ་སྐྱེས་བུ་ནོར་བུ་རིན་པོ་ཆེ་འདིའི་རིན་ཇི་ཙམ།

རིན་པོ་ཆེ་འཚོང་བ་དེས་དེ་དག་ལ་འདི་སྐད་ཅེས་སྨྲས་སོ།

ནོར་བུ་རིན་པོ་ཆེ་འདིའི་འོད་ཀྱིས་ས་ཕྱོགས་ཇི་ཙམ་ཁྱབ་པ་དེ་ཙམ་གྱི་ཕྱོགས་བཞིར་རིན་པོ་ཆེ་སྣ་བདུན་གྱིས་ཡོངས་སུ་གང་བར་བྱས་པ་དེ་བྱིན་ཅིག །

དེ་ཅིའི་ཕྱིར་ཞེ་ན།

ནོར་བུ་རིན་པོ་ཆེ་འདིའི་རིན་ཐང་ཚང་བ་ནི་དེ་ཡིན་ནོ།

སེམས་ཅན་བླུན་པའི་རང་བཞིན་ཅན་དེ་དག་གིས་དེ་ལས་ནོར་བུ་རིན་པོ་ཆེ་དེའི་རིན་ཐང་ཐོས་པ་དང་།

གད་མོས་འདེབས་ཤིང་འཕྱ་བར་བྱེད།

སྟིང་བར་བྱེད་ལ།

ནོར་བུ་རིན་པོ་ཆེ་དེ་ཡང་ལག་པ་གཉིས་ཀྱིས་དཔོག་པར་བྱེད་དོ།

བཟང་སྐྱོང་དེ་བཞིན་དུ་མ་འོངས་པའི་དུས་ན་དགེ་སློང་རྟོག་པ་མང་བ།

བསོད་ནམས་ཆུང་བ།

དགེ་བའི་རྩ་བ་མ་བསྐྱེད་པ།

སྔོན་གྱི་རྒྱལ་བ་ལ་བྱ་བ་མ་བྱས་པ།

ང་རྒྱལ་གྱིས་གཟིར་བ།

ཕྲག་དོག་གིས་གཟིར་བ།

རྙེད་པ་དང་།

བཀུར་སྟི་དང་།

ཚིགས་སུ་བཅད་པས་གཟིར་བ།

ཚུལ་ཁྲིམས་རྣམས་ཡོངས་སུ་མ་དག་པ།

ཏིང་ངེ་འཛིན་རྣམས་མ་ཐོབ་པ།

ཤེས་རབ་རྣམས་མ་ཐོབ་པ།

ཐོས་པ་ཉུང་བ།

སློབ་དཔོན་དང་མ་འགྲོགས་པ།

གང་ཟག་ཏུ་ལྟ་བ་དང་།

གང་ཟག་ལ་རྟེན་པ།

གང་ཟག་ལ་གནས་པ།

ཆོས་སུ་དམིགས་པ་ལ་མངོན་པར་ཞེན་པ་རྣམས་ནི་སྟོང་པ་ཉིད་བཤད་པས་སྐྲག་པར་འགྱུར་ཏེ།

དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་རྟོག་པར་མི་འགྱུར།

མངོན་པར་དད་པར་མི་འགྱུར།

ཡིད་ཆེས་པར་མི་འགྱུར།

མོས་པར་མི་འགྱུར་བའི་སྟེང་དུ་ཐོས་ཀྱང་གད་མོས་འདེབས་པར་འགྱུར།

འཕྱ་བར་འགྱུར།

སྟིང་བར་འགྱུར་རོ།

ལྐོག་ཏུ་དོང་ནས་ཀྱང་ཕན་ཚུན་ནས་སྨོད་པར་བྱེད་སྤོང་བར་བྱེད་ཅིང་།

ཚིག་ཀྱང་འདི་སྐད་དུ་དགེ་སློང་འདི་དག་ནི་སྤྱི་བརྟོལ་ཅན་ནོ།

དགེ་སློང་འདི་དག་ནི་མུ་ཅོར་སྨྲ་བ་སྟེ།

འདི་ལྟར་འདི་དག་ནི་སངས་

རྒྱས་ཀྱིས་མ་གསུངས་པ།

རང་གིས་བྱས་ཤིང་རང་བཟོ་བྱས་པ།

ཚིག་དང་ཡི་གེ་སྣ་ཚོགས་པ།

གཏམ་ཙམ་དུ་བཤད་པ་ལ་མདོ་སྡེའི་མིང་གིས་འཆད་པ་ངོ་མཚར་ཏོ་ཞེས་ཟེར་ཞིང་།

མདོ་སྡེ་འདི་དག་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་དེ་དག་སྐྱེ་བོ་རྣམས་ལ་ཡང་དེ་ལྟར་ཤེས་པར་བྱེད་དོ།

དེ་ལྟར་སྐྱེས་བུ་བླུན་པོ་བསོད་ནམས་ཆུང་བ་དགེ་བའི་རྩ་བ་རྣམས་མ་བསྐྱེད་པ།

སྔོན་གྱི་རྒྱལ་བ་ལ་བྱ་བ་མ་བྱས་པ།

བླ་ན་མེད་པའི་ཆོས་རིན་པོ་ཆེ་ཡོངས་སུ་སྤངས་པ་ཆོས་རིན་པོ་ཆེ་ལས་ཕྱི་རོལ་ཏུ་གྱུར་པ་དེ་དག་བསོད་ནམས་ཆུང་བ་ཉིད་ལ་སྟེན་པར་འགྱུར།

སྒོམ་པར་འགྱུར།

མང་དུ་བྱེད་པར་འགྱུར་རོ།

བཟང་སྐྱོང་དེ་ན་ཡང་སེམས་ཅན་གཞན་ཁ་ཅིག་སྔོན་གྱི་རྒྱལ་བ་ལ་བྱ་བ་བྱས་པ།

དགེ་བའི་རྩ་བ་བསྐྱེད་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས།

འདི་ལྟ་སྟེ་རྒྱས་པར་བྱ་བའི་ཕྱིར་འཛིན་པར་འགྱུར།

ཀུན་ཆུབ་པར་བྱེད་པར་འགྱུར།

ཡི་གེར་འདྲི་བར་འགྱུར།

ཡི་གེར་འདྲིར་འཇུག་པར་འགྱུར།

འཆད་པར་འགྱུར།

ཀློག་པར་འགྱུར།

གཞན་དག་ལ་ཡང་རྒྱ་ཆེར་ཡང་དག་པར་འཆད་པར་འགྱུར།

ལྷག་པར་དད་པར་འགྱུར།

རྟོག་པ་མང་བར་འགྱུར།

མོས་པ་མང་བར་འགྱུར།

སྤྱོད་ལམ་དང་བར་འགྱུར།

ངོ་ཚ་ཤེས་པ་དང་འགྱོད་པ་དང་ལྡན་པར་འགྱུར།

བསླབ་པ་འདོད་པར་འགྱུར།

ཟབ་མོ་ལ་མོས་པར་འགྱུར།

ཤེས་རབ་དང་ལྡན་པར་འགྱུར།

མང་དུ་ཐོས་པར་འགྱུར།

བྱམས་པ་ལ་གནས་པ་དང་སྙིང་རྗེ་ཐོབ་པར་འགྱུར།

དེ་དག་ཏིང་ངེ་འཛིན་འདི་མཉན་པའི་ཕྱིར་གང་ལ་ལར་སོང་བ་དེར་སྟོན་པར་འགྱུར།

ཡང་དག་པར་སྟོན་པར་འགྱུར་རོ།

དེ་འདི་སྙམ་དུ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱིས་གསུངས་པ།

འདི་འདྲ་བ་འདི་ཅི་ནས་ཀྱང་ཡུན་རིང་དུ་གནས་པར་གྱུར་ཅིག །

རྒྱས་པར་གྱུར་ཅིག །

སྙམ་དུ་སེམས་སྐྱེད་པར་འགྱུར་རོ།

བཟང་སྐྱོང་ལྷ་དང་མི་དང་ལྷ་མ་ཡིན་དུ་བཅས་པའི་འཁོར་འདི་རྣམས་ཀྱི་མདུན་དུ་ཁྱོད་མོས་པར་བྱའོ།

ཁྱོད་ཀྱིས་ཁོང་དུ་ཆུད་པར་བྱའོ།

རིགས་ཀྱི་བུ་འམ་རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ།

དེ་བཞིན་གཤེགས་

པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕུལ་བ་བས།

རིགས་ཀྱི་བུའམ་རིགས་ཀྱི་བུ་མོ་གང་གིས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཉན་ཅིང་ཐོས་ནས་ཀྱང་རྟོག་པར་བྱེད།

མངོན་པར་དད་པར་བྱེད།

ཡིད་ཆེས་པར་བྱེད་ལ་འདི་ནི་བདེན་པ་ཉིད་དོ་ཞེས་མོས་པར་བྱེད་ཅིང་།

སངས་རྒྱས་ཀྱིས་གསུངས་པ་ཡིན་ནོ་ཞེས་ཚིག་ཏུ་ཡང་བརྗོད་ན།

རིགས་ཀྱི་བུའམ་རིགས་ཀྱི་བུ་མོ་དེའི་བསོད་ནམས་ཆེས་མང་དུ་འཕེལ་བར་འགྱུར་རོ།

དེ་ནས་དེའི་ཚེ་དོན་དེ་ཉིད་བསྟན་པར་བྱ་བའི་ཕྱིར་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ།

གང་གིས་སྟོང་གསུམ་ཐམས་ཅད་དུ།

རིན་པོ་ཆེས་ནི་བཀང་བྱས་ཏེ།

བླ་མེད་བྱང་ཆུབ་བཙལ་བའི་ཕྱིར།

འཇིག་རྟེན་མགོན་ལ་ཕུལ་བ་བས།

གང་གིས་སངས་རྒྱས་ཀྱིས་བསྔགས་པའི།

མདོ་སྡེ་ཏིང་འཛིན་འདི་ལྟ་བུ།

ཐོས་ནས་མོས་པར་བྱེད་ན་ནི།

དེ་ཡི་བསོད་ནམས་ཁྱད་པར་འཕགས།

སྒྱུ་དང་གྱ་གྱུ་གཡོ་དང་ལྡན།

རྒོད་ཅིང་དབང་པོ་མ་བསྡུས་ལ།

སྡིག་པའི་གྲོགས་པོས་ཟིན་གྱུར་པ།

བློ་ངན་རྣམས་ནི་དད་མི་འགྱུར།

ཚུལ་ཁྲིམས་འཆལ་ཅིང་སྡིག་ཆོས་ཅན།

ང་ཞེས་ང་རྒྱལ་དམ་དུ་གནས།

ཕན་ཚུན་དག་ནས་འདུས་ནས་ཀྱང་།

རྒྱལ་བའི་བསྟན་ལ་གད་མོས་འདེབས།

མདོ་སྡེ་དེ་དག་ཆོས་ཀྱི་རྒྱལ།

སངས་རྒྱས་ཀྱིས་ནི་མ་གསུངས་ཞེས།

མ་བསྡམས་དེ་དག་དེ་འདྲ་བའི།

ཚིག་དག་ཀྱང་ནི་བརྗོད་པར་འགྱུར།

གང་ཞིག་ཏིང་འཛིན་མདོ་འདི་ལ།

ཐོས་ནས་རྟོག་པར་མི་འགྱུར་བ།

མ་རུངས་ཆུད་ཟོས་མི་ཤེས་ཤིང་།

ལྟ་བ་ངན་ལ་དམིགས་ཅན་ནོ།

སངས་རྒྱས་ཀྱིས་ནི་གསུངས་པ་ཡི།

མདོ་སྡེ་འདི་འདྲ་འདི་དག་ལ།

བསོད་ནམས་ཆུང་ཞིང་དམིགས་གནས་པས།

དད་པར་བྱ་བ་མི་ནུས་སོ།

གང་ཞིག་མདོ་སྡེ་འདི་འདྲ་བ།

ཐོས་ནས་དགའ་བར་འགྱུར་བ་ནི།

མི་མཆོག་ཏུ་ནི་མི་འགྱུར་སྙམ།

དེ་ལ་ཐེ་ཙོམ་མ་བྱེད་ཅིག །

གང་ཞིག་ཚུལ་ཁྲིམས་ཡོངས་དག་ཅིང་།

ལྟ་བའང་རྟག་ཏུ་དྲང་བ་དང་།

ཆོས་འདི་ལ་ནི་གུས་བཅས་པ།

ངས་ནི་དེ་ལ་ཆོས་བཤད་དོ།

གང་གིས་དཔའ་ཆེན་འཇིག་རྟེན་མགོན།

འོད་བྱེད་པ་ནི་མཐོང་

གྱུར་པ།

དེ་དག་དོན་དུ་བཤད་པར་བྱས།

དེ་དག་ཀྱང་ནི་ཆོས་འཛིན་ཤོག །

བཟང་སྐྱོང་གིས་ཞུས་པའི་ཏིང་ངེ་འཛིན་ལས་ལྷག་པའི་ང་རྒྱལ་ཅན་གྱི་ལེའུ་སྟེ་དྲུག་པའོ།།

བམ་པོ་གསུམ་པ།