律部第4卷（འདུལ་བ་ང་བཞུགས་སོ།།）

འདུལ་བ་གཞི།

བམ་པོ་བརྒྱད་བཅུ་གསུམ་པ།

གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ།

ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ཉམས་པ།

སྐྱེ་བོ་མང་པོའི་མིག་གིས་ཀྱང་ལྟ་མི་ཕོད་པ་འདི་ཅི་ཡིན།

ལྷ་འདི་ནི་བྲོ་འཚལ་བ་ཞེས་བགྱིའོ།

ཁ་ལོ་སྒྱུར་བ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན།

ལྷ་མི་འདི་གང་འདིས་འགུམ་པར་འགྱུར་བའི་གནས་དེ་མཆིས་ཏེ།

ལྷ་འདི་ནི་བྲོས་ཐེབས་པ་ཞེས་བགྱིའོ།

ཁ་ལོ་སྒྱུར་བ་ང་ཡང་ནད་ཀྱི་ཆོས་དང་ནད་ཀྱི་ཆོས་ཉིད་ལས་མ་འདས་སམ།

ལྷ་ཡང་སྙུན་གྱི་ཆོས་དང་སྙུན་གྱི་ཆོས་ཉིད་ལས་མ་འདས་སོ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་ཉིད་དུ་ཕྱིན་ནས་ང་ནད་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ།

ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ།

དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་ནད་ལས་མ་འདས་པ་

ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ།

འདིར་སྨྲས་པ།

མི་ནི་ལུས་རིད་སྐྱ་བོ་རྦབ་རྦབ་པོ།

རང་དབང་མེད་པའི་ནད་ཐེབས་འདིར་གཟིགས་ནས།

ནད་ལས་བདག་མ་འདས་པ་ལྟ་ཞིག་ཅེས།

དེ་ནས་མི་དགྱེས་ཐུགས་ངན་དགོངས་པར་མཛད།

དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ།

ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ།

སྐྱེད་མོས་ཚལ་ལ་མངོན་པར་དགའ་བར་གྱུར་ཏམ།

ལྷ་མ་ལགས་སོ།

དེ་ཅིའི་སླད་དུ་ཞེ་ན།

ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་མི་སྐྱ་བོ་རྦབ་རྦབ་པོ་རིད་པ།

ཉམ་ཆུང་བ།

དབང་པོ་ཉམས་པ།

སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ།

གཟིགས་ནས་ཀྱང་བདག་ལ་བཀའ་སྩལ་པ།

ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ།

ཉམ་ཆུང་བ།

དབང་པོ་ཉམས་པ།

སྐྱེ་བོ་མང་པོའི་མིག་གིས་ལྟ་མི་ཕོད་པ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་འདི་ནི་བྲོས་ཐེབས་པ་ཞེས་བགྱིའོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

མི་འདི་གང་གནོད་པ་འདིས་འགུམ་པར་འགྱུར་བའི་གནས་དེ་མཆིས་ཏེ།

ལྷ་དེ་ནི་བྲོས་ཐེབས་པ་ཞེས་བགྱིའོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་ང་ཡང་ནད་ཀྱི་ཆོས་དང་ནད་ཀྱི་ཆོས་ཉིད་ལས་མ་འདས་སམ།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་ཡང་སྙུན་གྱི་ཆོས་དང་སྙུན་གྱི་ཆོས་ཉིད་ལས་མ་འདས་སོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་ཉིད་དུ་ཕྱིན་ནས་ང་ནད་ལས་མ་འདས་

ཞེས་གྲགས་པའི་དོན་དེ་ཉིད་བསམ་པར་བྱའོ།

ལྷ་གཞོན་ནུ་དེ་ཕོ་བྲང་གི་ནང་དུ་གཤེགས་ནས་ང་ཡང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ།

དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ།

མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང་།

གཞོན་ནུ་སྐྲ་དང་ཁ་སྤུ་བྲེགས་ཏེ།

གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས།

མ་ལ་བདག་གིས་གཞོན་ནུ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ལ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ།

དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ཏེ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱས་སོ།

འདིར་སྨྲས་པ།

དེ་ཚེ་དགའ་ནས་བདག་འདོར་མི་གཞུག་ཕྱིར།

གཟུགས་དང་སྒྲ་དང་དྲི་དང་རོ་རྣམས་དང་།

རེག་བྱ་ཡིད་དུ་འོང་བ་གཙོ་རྣམས་ཀྱི།

འདོད་པའི་ཡོན་ཏན་ལྔ་པོ་ཡང་བྱིན་ནོ།

ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་པར་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ།

ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་།

དེར་བཞུགས་ནས་སྐྱེད་མོས་ཚལ་གྱི་གཞིར་འགྲོའོ་ཞེས་གསུང་བར་འགྱུར་བས་དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་པ།

ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག །

དེར་ང་ཞུགས་ནས་སྐྱེད་མོས་ཚལ་གྱི་གཞིར་འགྲོའོ།

ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ཏེ་བྱང་ཆུབ་སེམས་དཔའ་ཤཱཀྱ་ཐུབ་པ་གང་ན་བ་དེར་སོང་ནས་ཕྱིན་པ་དང་།

བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ།

ལྷ་བཅིབས་པ་བཟང་པོ་བཤམས་ལགས་ཀྱིས།

ལྷ་ད་དེའི་དུས་ལ་བབ་པར་དགོངས་སུ་གསོལ།

དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ཏེ་སྐྱེད་མོས་ཚལ་གྱི་གཞིར་བྱུང་བ་དང་།

བྱང་ཆུབ་སེམས་དཔའ་ཤཱཀྱ་ཐུབ་

པས་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་།

ཁྱོགས་ཁྱེར་བ་དང་།

མདུན་ན་མེ་སྒྲོན་ཐོགས་པ་དང་།

སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་།

བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་འབྲང་བ་ཞིག་གཟིགས་སོ།

གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ།

ཁ་ལོ་སྒྱུར་བ་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་།

ཁྱོགས་ཁྱེར་བ་དང་།

མདུན་ན་མེ་སྒྲོན་ཐོགས་པ་དང་།

སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་།

བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་དུ་འབྲང་བ་འདི་ཅི་ཡིན།

ལྷ་འདི་ནི་གུམ་པ་ཞེས་བགྱིའོ།

ཁ་ལོ་སྒྱུར་བ་ཤི་བ་ཞེས་བྱ་བ་འདི་ཅི་ཡིན།

ལྷ་མི་འདིས་སླན་ཆད་སྡུག་པའི་ཕ་མ་མི་མཐོང་ཞིང་བུ་ཕོ་དང་།

བུ་མོ་དང་།

བྲན་ཕོ་དང་།

བྲན་མོ་དང་།

ལས་བགྱིད་པ་དང་།

ཞོ་ཤས་འཚོ་བའི་མི་རྣམས་ཀྱང་མ་ལགས་ལ།

དེ་དག་གིས་ཀྱང་སླན་ཆད་འདི་མི་མཐོང་བས་ལྷ་འདི་ནི་གུམ་པ་ཞེས་བགྱིའོ།

ཁ་ལོ་སྒྱུར་བ་ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སམ།

ལྷ་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་ཉིད་དུ་ཕྱིན་ནས་ང་འཆི་བ་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ།

ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ།

དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ།

འདིར་སྨྲས་པ།

ཚེ་ཟད་པ་ཡིས་འདུ་ཤེས་བྲལ་གྱུར་ཅིང་།

སེམས་མེད་མི་ཡི་རོ་ཞིག་གཟིགས་ནས་ནི།

འཆི་ལས་བདག་མ་འདས་པ་ལྟ་ཞིག་ཅེས།

དེ་ནས་མི་དགྱེས་ཐུགས་ངན་དགོངས་པར་མཛད།

དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ།

ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ།

སྐྱེད་མོས་ཚལ་ལ་མངོན་པར་དགའ་བར་གྱུར་ཏམ།

ལྷ་མ་ལགས་སོ།

དེ་ཅིའི་སླད་དུ་ཞེ་ན།

ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་རས་ཁ་དོག་སྣ་ཚོགས་ལས་བགྱིས་

པའི་བླ་རེ་བྲེས་པ་དང་།

ཁྱོགས་ཁྱེར་བ་དང་།

མདུན་ན་མེ་སྒྲོན་ཐོགས་པ་དང་།

སྐྱེ་བོའི་ཚོགས་ཆེན་པོ་མདུན་ནས་མཆི་བ་དང་།

བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་རྗེས་བཞིན་དུ་འབྲང་བ་ཞིག་གཟིགས་སོ།

གཟིགས་ནས་ཀྱང་བདག་ལ་གསུངས་པ།

ཁ་ལོ་སྒྱུར་བ་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་།

ཁྱོགས་ཁྱེར་བ་དང་།

མདུན་ན་མེ་སྒྲོན་ཐོགས་པ་དང་།

སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་།

བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་རྗེས་བཞིན་དུ་འབྲང་བ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་འདི་ནི་གུམ་པ་ཞེས་བགྱིའོ།

དེས་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་ཤི་བ་ཞེས་བྱ་བ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་མི་འདིས་སླན་ཆད་སྡུག་པའི་ཕ་མ་མི་མཐོང་ཞིང་།

བུ་ཕོ་དང་།

བུ་མོ་དང་།

བྲན་ཕོ་དང་།

བྲན་མོ་དང་།

ལས་བགྱིད་པ་དང་།

ཞོ་ཤས་འཚོ་བ་རྣམས་ཀྱང་མ་ལགས་ལ།

དེ་རྣམས་ཀྱིས་ཀྱང་སླན་ཆད་འདི་མི་མཐོང་བས་ལྷ་འདི་ནི་གུམ་པ་ཞེས་བགྱིའོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སམ།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ།

དེས་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་དུ་ཕྱིན་ནས་འཆི་བ་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ།

ལྷ་གཞོན་ནུ་དེ་ཕོ་བྲང་གི་ནང་དུ་གཤེགས་ཏེ་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ།

དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ།

མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང་།

གཞོན་ནུ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས།

མ་ལ་བདག་གིས་གཞོན་ནུ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ལ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ།

དེ་

ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ནས་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱས་སོ།

འདིར་སྨྲས་པ།

གྲོང་ཁྱེར་དམ་པ་དཔལ་ལྡན་ཡིད་འོང་དེར།

ལྷ་ཡི་ལྷར་གྱུར་སྒྲོན་མ་དང་མཚུངས་པ།

འདོད་པའི་ཡོན་ཏན་ལྔ་པོས་ཀུན་དགྱེས་པ།

མིག་སྟོང་དགའ་བའི་ཚལ་ན་གནས་པ་བཞིན།

དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ།

བྱང་ཆུབ་སེམས་དཔའ་རྣམས་ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་བྱ་དགོས་ཏེ།

འདི་ལྟར་རྒྱུའི་སྟོབས་ཆེན་པོ་ཡང་རྐྱེན་གྱི་སྟོབས་ལ་ལྟོས་སོ་སྙམ་ནས་དེ་རྣམས་ཀྱིས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་སྤྲུལ་ཏོ།

ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་པར་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་དེར་བཞུགས་ནས་སྐྱེད་མོས་ཚལ་གྱི་གཞིར་གཤེགས་སོ་ཞེས་གསུང་བར་འགྱུར་བས།

དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་པ།

ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག །

དེར་བཞུགས་ནས་སྐྱེད་མོས་ཚལ་གྱི་གཞིར་གཤེགས་སོ།

ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ནས་བྱང་ཆུབ་སེམས་དཔའ་ཤཱཀྱ་ཐུབ་པ་གང་ན་བ་དེར་སོང་ནས་ཕྱིན་པ་དང་།

བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ།

ལྷ་བཅིབས་པ་བཟང་པོ་བཤམས་ལགས་ཀྱིས།

ལྷ་ད་དེའི་དུས་ལ་བབ་པར་དགོངས་སུ་གསོལ།

དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ནས་སྐྱེད་མོས་ཚལ་གྱི་གཞིར་བྱུང་བ་དང་།

བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་གཟིགས་སོ།

གཟིགས་ནས་ཀྱང་ཁ་ལོ་

སྒྱུར་བ་ལ་གསུངས་པ།

ཁ་ལོ་སྒྱུར་བ་མི་སྐྲ་བྲེགས་ཤིང་ལག་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་འགྲོ་ལ་འདིའི་གོས་ཀྱང་ཁ་དོག་མི་མཚུངས་ཏེ།

ཇི་ལྟར་ཡང་མི་གཞན་དག་གི་དང་མི་འདྲ་བ་འདི་ཅི་ཡིན།

ལྷ་དེ་ནི་རབ་ཏུ་བྱུང་བ་ཞེས་བགྱིའོ།

ཁ་ལོ་སྒྱུར་བ་རབ་ཏུ་བྱུང་བ་ཞེས་བྱ་བ་འདི་ཅི་ཡིན།

ལྷ་རབ་ཏུ་བྱུང་བ་དེ་ནི་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ།

གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་སྟེ།

ལྷ་འདི་ནི་རབ་ཏུ་བྱུང་བ་ཞེས་བགྱིའོ།

ཁ་ལོ་སྒྱུར་བ་དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བ་དེ་ལོགས་སུ་སྒྱུར་ཅིག །

ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ཤིང་རྟ་དེ་རབ་ཏུ་བྱུང་བ་གང་ན་བ་དེར་བསྒྱུར་ཏོ།

དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་རབ་ཏུ་བྱུང་བ་དེ་ལ་འདི་སྐད་ཅེས་བཀའ་སྩལ་ཏོ།

ཀྱེ་མི་ཁྱོད་ཅིའི་ཕྱིར་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་གོས་ཀྱང་ཁ་དོག་མི་མཚུངས་ཏེ།

ཅི་ལྟར་ཡང་མི་གཞན་དག་གི་དང་མི་འདྲ་བ་ཡིན།

དེས་འདི་སྐད་ཅེས་སྨྲས་སོ།

གཞོན་ནུ་བདག་ནི་རབ་ཏུ་བྱུང་བ་ཞེས་བགྱིའོ།

ཀྱེ་མི་ཁྱོད་ཇི་ལྟར་ན་རབ་ཏུ་བྱུང་བ་ཞེས་བྱ།

གཞོན་ནུ་བདག་གིས་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ།

དེ་ལྟར་ན་བདག་རབ་ཏུ་བྱུང་བ་ཞེས་བྱའོ།

ཀྱེ་མི་ཁྱོད་ཀྱིས་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་

སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས།

དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལེགས་སོ།

དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་ཁ་ལོ་སྒྱུར་བ་ལ་གསུངས་པ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་དུ་ཕྱིན་ནས་དོན་འདི་ཁོ་ན་བསམ་པར་བྱའོ།

ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ།

དེར་ཕོ་བྲང་དུ་གཤེགས་པ་དང་བྱང་ཆུབ་སེམས་དཔའ་ཤཱཀྱ་ཐུབ་པ་ཀྱེ་མའོ་བདག་ནི་སྐྲ་དང་ཁ་སྤུ་བྲེགས་ཏེ།

གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་པའི་དོན་དེ་ཉིད་དགོངས་སོ།

དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ།

ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ།

སྐྱེད་མོས་ཚལ་ལ་མངོན་པར་དགའ་བར་གྱུར་ཏམ།

ལྷ་མ་ལགས་སོ།

དེ་ཅིའི་སླད་དུ་ཞེ་ན།

ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་མི་སྐྲ་བྲེགས་ཤིང་གོས་ངུར་སྨྲིག་འཚལ་བ་སུག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་མཆི་བ་ཞིག་གཟིགས་སོ།

གཟིགས་ནས་ཀྱང་བདག་ལ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་མི་སྐྲ་བྲེགས་པ་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་འགྲོ་ལ་འདིའི་གོས་ཀྱང་ཁ་དོག་མི་མཚུངས་ཏེ།

ཇི་ལྟར་ཡང་མི་གཞན་དག་གི་དང་མི་འདྲ་བ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་དེ་ནི་རབ་ཏུ་བྱུང་བ་ཞེས་བགྱིའོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་རབ་ཏུ་བྱུང་བ་ཞེས་བྱ་བ་འདི་ཅི་ཡིན།

དེ་ལ་བདག་གིས་འདི་སྐད་ཅེས་གསོལ་ཏོ།

ལྷ་རབ་ཏུ་བྱུང་བ་དེ་ནི་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་

པ་ཁོ་ནས་ཁྱིམ་མེད་པར་རབ་ཏུ་བྱུང་བ་སྟེ།

ལྷ་འདི་ནི་རབ་ཏུ་བྱུང་བ་ཞེས་བགྱིའོ།

དེ་འདི་སྐད་ཅེས་གསུངས་ཏེ།

ཁ་ལོ་སྒྱུར་བ་དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བ་དེ་ལོགས་སུ་སྒྱུར་ཅིག །

ལྷ་བཀའ་བཞིན་འཚལ་ཞེས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ཤིང་རྟ་དེ་རབ་ཏུ་བྱུང་བ་གང་ན་བ་དེ་ལོགས་སུ་བསྒྱུར་བ་དང་།

བྱང་ཆུབ་སེམས་དཔའ་ཤཱཀྱ་ཐུབ་པས་རབ་ཏུ་བྱུང་བ་དེ་ལ་འདི་སྐད་ཅེས་གསུངས་ཏེ།

ཀྱེ་མི་ཁྱོད་ཅིའི་ཕྱིར་སྐྲ་བྲེགས་ལ་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་།

ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་གོས་ཀྱང་ཁ་དོག་མི་མཚུངས་ཏེ།

ཇི་ལྟར་ཡང་མི་གཞན་དག་དང་མི་འདྲ་བ་ཡིན།

དེས་འདི་སྐད་ཅེས་གསོལ་ཏོ།

གཞོན་ནུ་བདག་ནི་རབ་ཏུ་བྱུང་བ་ཞེས་བྱའོ།

བྱང་ཆུབ་སེམས་དཔས་གསུངས་པ།

ཀྱེ་མི་ཁྱོད་ཇི་ལྟར་རབ་ཏུ་བྱུང་བ་ཞེས་བྱ།

དེས་འདི་སྐད་ཅེས་གསོལ་ཏོ།

གཞོན་ནུ་བདག་གིས་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ།

དེ་ལྟར་ན་བདག་རབ་ཏུ་བྱུང་བ་ཞེས་བྱའོ།

བྱང་ཆུབ་སེམས་དཔས་གསུངས་པ་ཀྱེ་མི་ཁྱོད་ཀྱིས་དུལ་བ་ལེགས་པ་དང་།

ཡང་དག་པར་སྡོམ་པ་ལེགས་པ་དང་།

དོན་སྤྱོད་པ་ལེགས་པ་དང་།

ཆོས་སྤྱོད་པ་ལེགས་པ་དང་།

དགེ་བ་སྤྱོད་པ་ལེགས་པ་དང་།

དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལེགས་སོ།

ལྷ་དེ་ནས་གཞོན་ནུས་གསུངས་པ།

ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་།

འདི་ལྟར་ང་ཕོ་བྲང་དུ་ཕྱིན་ནས་དོན་འདི་བསམ་པར་བྱའོ།

བདག་གིས་དེ་ནས་ཤིང་རྟ་བསྒྱུར་ནས་གཞོན་ནུ་ཕོ་བྲང་དུ་ཞུགས་སོ།

རྒྱལ་པོས་བསམས་པ།

མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་

དག་པར་བདེན་པར་མི་འགྱུར་གྲང་།

གཞོན་ནུ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས།

མ་ལ་བདག་གིས་གཞོན་ནུ་ཞིང་པའི་གྲོང་དུ་བཏང་ལ་ཅི་ནས་ཀྱང་དེ་ལ་སེམས་གཡེངས་པར་འགྱུར་བར་བྱའོ་སྙམ་ནས།

གཞོན་ནུ་ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ།

གཞོན་ནུ་ཚུར་ཤོག །

ཁྱོད་ཞིང་པའི་གྲོང་དུ་སོང་ལ་ལས་ཀྱི་མཐའ་ལ་ལྟོས་ཤིག །

དེ་ནས་བྱང་ཆུབ་སེམས་དཔའ་རྒས་པ་དང་།

ནད་པ་དང་།

ཤི་བ་མཐོང་ནས་ནི་ཡིད་བྱུང་ངོ་།

རབ་ཏུ་བྱུང་བ་ལ་ནི་མངོན་པར་ཞེན་པའི་བློས་ཡབ་ཤཱཀྱ་ཟས་གཙང་གི་ཚིག་གསན་ནས་ཤིང་རྟར་ཞུགས་ཏེ་ཞིང་པའི་གྲོང་དུ་སྐུས་གཤེགས་ཀྱི་ཐུགས་ཀྱིས་ནི་མ་ཡིན་ནོ།

དེ་ལ་ལམ་ཀར་གཏེར་ལྔ་བརྒྱས་ཁ་ཉེ་བར་བསྟན་ཏེ་སྒྲ་ཕྱུང་བ།

གཞོན་ནུ་བདག་ཅག་ནི་ཁྱོད་ཀྱི་ཉེ་དུའི་གཏེར་ལགས་ཀྱིས་བདག་ཅག་བཞེས་ཤིག །

བྱང་ཆུབ་སེམས་དཔས་གསུངས་པ།

རེ་ཞིག་དེ་རྣམས་ཀྱིས་བླུན་པོའི་ཡོངས་སུ་གཟུང་བ་བྱས་ནས་ཅི་ཞིག་བྱས།

ཁྱེད་ང་ལ་དགོས་པ་མེད་ཀྱིས་སོང་ཤིག །

ཚིགས་སུ་བཅད་པས་ཀྱང་གསུངས་པ།

གང་གིས་ང་ལ་འཆི་བའི་གཏམ་སྨྲས་པ།

དེ་དག་ཀྱང་ཤི་གཏམ་དུ་གྱུར་པ་ཡིན།

བདག་ཀྱང་ཤི་ནས་རིང་པོ་མི་ཐོགས་པར།

གཞན་དག་གི་ཡང་གཏམ་དུ་འགྱུར་བར་འོང་།

དེ་རྣམས་ཀྱིས་ཡང་སྒྲ་ཕྱུང་བ།

གཞོན་ནུས་གལ་ཏེ་མི་བཞེས་ན།

བདག་ཅག་རྒྱ་མཚོ་ཆེན་པོར་འཇུག་གོ།

བྱང་ཆུབ་སེམས་དཔས་ཅི་བདེ་བར་ཞུགས་ཤིག་ཅེས་གསུངས་པ་དང་།

དེ་རྣམས་རྒྱ་མཚོ་ཆེན་པོའི་ནང་དུ་ཞུགས་སོ།

བྱང་ཆུབ་སེམས་དཔའ་གཤེགས་པ་དང་།

ཇི་ཙམ་ན་ཞིང་པ་སྐྲ་གྱེན་དུ་འགྲེང་བ།

ལག་པ་དང་རྐང་པ་སེར་ག་བྱུང་བ།

ལུས་རྡུལ་གྱིས་ཡོག་པ་དག་ཅིག་དང་།

རྨོན་པ་ལྕག་གཟེར་བུ་རྣོན་པོ་ཅན་གྱིས་ལུས་དྲལ་བས་རྒྱབ་དང་མཇུག་དོའི་ཕྱོགས་ཁྲག་གིས་ཡོག་པ།

ལྟོགས་པ་དང་སྐོམ་པས་དབུགས་བརྫགས་ཤིང་སྙིང་གའི་ཕྱོགས་ནས་དབུགས་བརྫགས་པ་རིང་དུ་འདྲེན་ལ་གཉའ་ཤིང་གིས་མནན་པའི་རྨ་ལས་རྣག་ཁྲག་འཛག་པ་ལ་སྦྲང་བུ་དང་འབུའི་ཚོགས་ཟ་བ།

ཐོང་

ལྕགས་ཀྱིས་རྐང་པ་རྨ་བྱུང་ཞིང་།

ཁ་དང་སྣ་ནས་ཁ་ཆུ་སྣ་ཆུ་འཛག་ལ་སྦལ་པ་དང་།

ཤ་སྦྲང་དང་།

སྦྲང་བུ་མཆུ་རིངས་ཀྱིས་ཡོག་པ་རྣམས་གཟིགས་སོ།

གཟིགས་ནས་ཀྱང་ཐོག་མ་མེད་པའི་དུས་ནས་བསོད་ནམས་བསྐྱེད་ཅིང་བསགས་པའི་ཐུགས་རྗེས་ཀུན་ནས་བསྐྱོད་པའི་ཐུགས་ཀྱིས་ཞིང་པ་རྣམས་ལ་འདི་སྐད་ཅེས་གསུངས་སོ།

ཤེས་ལྡན་དག་ཁྱོད་སུའི་ཡིན།

དེ་རྣམས་ཀྱིས་གསོལ་པ།

ལྷའི་ལགས་སོ།

དེས་གསུངས་པ།

ཤེས་ལྡན་དག་དེང་ཕན་ཆད་བྲན་དུ་མི་བྱ།

མངག་གཞུག་པར་མི་བྱ།

རང་དབང་ཅན་གང་དགའ་བར་འགྲོ་བར་བྱས།

བདེ་བ་ལ་རེག་པར་གནོས་ཤིག །

རྨོན་པ་རྣམས་ཀྱང་བཀྲོལ་ནས་གསུངས་པ།

ཁྱེད་ཅག་ཀྱང་དེང་ཕྱིན་ཆད་རྩྭ་མཆོག་མ་ཉམས་པ་ལ་ཟ་ཞིང་ཆུ་མ་རྡུལ་མ་བསྙོགས་ཤིང་དང་བདག་ལ་འཐུངས་ཤིག །

ཁྱོད་ལ་ཕྱོགས་བཞི་ནས་ཀྱང་རླུང་བསིལ་བ་ལྡང་བར་གྱུར་ཅིག །

དེ་ནས་བྱང་ཆུབ་སེམས་དཔའ་ཡིད་བྱུང་བ་དེ་ཉིད་ཀྱིས་ཡབ་ཤཱཀྱ་ཟས་གཙང་གི་ཞིང་བླས་ཀྱི་མཐའ་ལ་གཟིགས་ནས་ཤིང་འཛམ་བུའི་གྲིབ་མ་གང་ན་བ་དེར་གཤེགས་ཏེ་བྱོན་ནས།

ཤིང་འཛམ་བུའི་གྲིབ་མ་ལ་བཞུགས་ཏེ།

འདོད་པ་ལས་དབེན་པ།

སྡིག་པ་མི་དགེ་བའི་ཆོས་ལས་དབེན་པ།

རྟོག་པ་དང་བཅས།

དཔྱོད་པ་དང་བཅས་ཤིང་དབེན་པ་ལས་སྐྱེས་པའི་དགའ་བ་དང་བདེ་བ་ཅན་ཟག་པ་མེད་པ་དང་འདྲ་བའི་བསམ་གཏན་དང་པོ་ལ་སྙོམས་པར་ཞུགས་སོ།

སྐྱེ་བོའི་ཚོགས་ཆེན་པོ་ཡང་བྱང་ཆུབ་སེམས་དཔའ་སྤངས་ཏེ་མི་འགྲོ་བར་ཤིང་གཞན་རྣམས་ཀྱི་དྲུང་ན་སྡོད་དོ།

རྒྱལ་པོ་ཟས་གཙང་གིས་བསམས་པ་བྱང་ཆུབ་སེམས་དཔའ་རིང་ཞིག་ཐོགས་ཏེ་འདི་ལྟར་དྲོའི་དུས་ལས་ཡོལ་གྱིས་ལྟར་འགྲོའོ་ཞེས་དེ་ཤིང་རྟར་ཞུགས་ནས་ཞིང་པའི་གྲོང་དུ་སོང་སྟེ་ཕན་ཚུན་དུ་བྱང་ཆུབ་སེམས་དཔའ་ཚོལ་ཞིང་ཤིང་འཛམ་བུའི་དྲུང་དུ་ཕྱིན་ཏོ།

དེའི་ཚེ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ།

ཤར་ཕྱོགས་སུ་འབབ།

ཤར་ཕྱོགས་སུ་བབ་པར་གྱུར་ཏོ།

བྱང་ཆུབ་སེམས་དཔའི་མཐུས་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་ངོ་།

རྒྱལ་པོ་ཟས་གཙང་གིས་

ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ།

ཤར་ཕྱོགས་སུ་འབབ།

ཤར་ཕྱོགས་སུ་བབ་པར་གྱུར་ན་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་མཐོང་ངོ་།

མཐོང་ནས་ཀྱང་དེ་འདི་སྙམ་དུ་སེམས་ཏེ།

གཞོན་ནུ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ།

འདི་ལྟར་ད་ལྟ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ།

ཤར་ཕྱོགས་སུ་འབབ།

ཤར་ཕྱོགས་སུ་བབ་པར་གྱུར་ན་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་ངོ་མཚར་ཆེའོ་སྙམ་མོ།

དེ་ནས་དགའ་བའི་བསྟི་སྟང་བྱས་ཏེ་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཚིགས་སུ་བཅད་པས་སྨྲས་པ།

ཇི་ལྟར་བལྟམས་ཚེ་ས་ནི་གཡོས་པ་ལྟར།

འཛམ་བུའི་གྲིབ་མས་ཁྱོད་སྐུ་མི་གཏོང་བ།

བློ་ཆེན་ཁྱོད་ཀྱི་ཡ་མཚན་གཉིས་འདི་སྟེ།

ཀུན་གཟིགས་ཁྱོད་ཀྱི་ཞབས་ལ་ཕྱག་འཚལ་ལོ།

དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་སྐྱིལ་མོ་ཀྲུང་བཅས་པ་ལས་བསླང་ནས་ཤིང་རྟར་ཞུགས་ཏེ།

དུར་ཁྲོད་ཀྱི་ནང་ནས་སེར་སྐྱའི་གཞིར་གཤེགས་པ་ན་བྱང་ཆུབ་སེམས་དཔས་དུར་ཁྲོད་ཀྱི་ནང་ན་མི་རོ་རྣམ་པར་སྡོས་པ་དང་།

རྣམ་པར་འབུས་གཞིགས་པ་དང་།

རྣམ་པར་བམ་པ་དག་གཟིགས་ནས་དེ་ཤིན་ཏུ་སྐྱོ་བ་སྐྱེས་ཏེ།

ཤིང་རྟར་ཞུགས་བཞིན་དུ་སྐྱིལ་མོ་ཀྲུང་བཅས་ནས་བཞུགས་སོ།

དེ་ནས་ཡང་རྒྱལ་པོ་ཟས་གཙང་གིས་སྐྱིལ་མོ་ཀྲུང་བཅས་པ་ལས་བསླང་ནས།

སེར་སྐྱའི་གཞིར་གཤེགས་ཏེ།

གྲོང་ཁྱེར་གྱི་ནང་དུ་འཇུག་པ་ན་མཚན་མཁན་རྣམས་ཀྱིས་གལ་ཏེ་གཞོན་ནུ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་བར་ལུང་བསྟན་པར་རིག་ནས་དེ་རྣམས་ཀྱིས་རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ།

གལ་ཏེ་དེ་ཡི་བཟང་པོ་གཟིགས་བཞེད་ན།

དེའི་སླད་དགུང་བདུན་བར་དུ་སྲུངས་ཤིག་དང་།

མི་དབང་གདུགས་ནི་བདལ་བར་གྱུར་པ་ན།

རིན་ཆེན་སྣ་བདུན་འབྱུང་བར་ཐེ་ཚོམ་མེད།

ཁྱོད་སྲས་རིན་ཆེན་བདུན་པོ་ཡི།

དབང་ཕྱུག་གི་ནི་རྒྱལ་པོར་འགྱུར།

རྒྱ་མཚོ་ལ་ནི་ཐུག་པའི་ས།

ཆད་པ་མེད་པས་སྐྱོང་བར་འགྱུར།

འོན་ཏེ་ས་ནི་སྤངས་ནས་སུ།

བསྙེངས་མེད་ནགས་སུ་བཞུད་ན་ནི།

ཐམས་ཅད་མཁྱེན་པ་ཐོབ་གྱུར་ནས།

འགྲོ་བ་སྒྲོལ་བར་མཛད་པར་འགྱུར།

ཤཱཀྱ་དུས་ལེགས་ཀྱི་བུ་མོ་རི་དགས་སྐྱེས་ཞེས་བྱ་བ་དེ་སྐར་ཁུང་ན་འདུག་པས་བྱང་ཆུབ་སེམས་དཔའ་མཐོང་ནས་ཚིགས་སུ་བཅད་དེ་སྨྲས་པ།

ཀྱེ་མ་འདི་ཡི་ཡུམ་བདེ་ཞིང་།

ཡབ་དེ་ཡང་ནི་བདེ་བ་ཡིན།

ཀྱེ་མ་གང་གི་ཁྱིམ་ཐབ་འགྱུར།

བུད་མེད་དེ་ཡང་མྱ་ངན་འདས།

སྐྱེས་མཆོག་བསམ་གཏན་པ་དེ་ཡིས།

མྱ་ངན་འདས་པའི་སྒྲ་ཐོས་ནས།

མྱ་ངན་འདས་པ་ཞི་ཉིད་དུ།

མཁྱེན་ནས་དེ་ལ་ཐུགས་དགྱེས་གྱུར།

དེ་ནས་བྱང་ཆུབ་སེམས་དཔས་ལེགས་པར་སྨྲས་པའི་ཕྱིར་མུ་ཏིག་གི་ཕྲེང་བ་འཕངས་པ་དང་།

བྱང་ཆུབ་སེམས་དཔའི་མཐུས་སྐར་ཁུང་ནས་སོང་སྟེ་དེའི་མགུལ་དུ་འཁྲིས་པར་གྱུར་ཏོ།

སྐྱེ་བོའི་ཚོགས་ཀྱིས་ནང་དུ་སོང་བ་དེ་མཐོང་ནས།

དེ་རྣམས་ཀྱིས་རྒྱལ་པོ་ཟས་གཙང་ལ་རྒྱས་པར་སྨྲས་ནས་རྒྱལ་པོ་ཟས་གཙང་གིས་རི་དགས་སྐྱེས་འཁོར་ཉི་ཁྲི་དང་བྱང་ཆུབ་སེམས་དཔའི་བཙུན་མོར་བླངས་སོ།

དེ་ནས་བྱང་ཆུབ་སེམས་དཔའི་བཙུན་མོས་འཚོ་མ་དང་།

རི་དགས་སྐྱེས་ལ་སོགས་པའི་འཁོར་བུད་མེད་དྲུག་ཁྲི་ཡོད་དོ།

དེ་ནས་རྒྱལ་པོ་ཟས་གཙང་གཅུང་བྲེ་བོ་ཟས་དང་།

ཟས་དཀར་དང་།

ཚད་མེད་ཟས་གསུམ་དང་ལྷན་ཅིག་གཅིག་ཏུ་ཚོགས་ནས་གྲོས་བྱ་བར་བརྩམས་པ།

ཤེས་ལྡན་དག་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་གལ་ཏེ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱིས།

དེ་ལྟ་བས་ན་བདག་ཅག་གིས་བྱང་ཆུབ་སེམས་དཔའ་ཞག་བདུན་གྱི་བར་དུ་བསྒྲིམས་ཏེ་བསྲུང་བར་བྱ་ཞིང་གྲོང་ཁྱེར་ཡང་ལེགས་པར་བསྲུང་བར་བྱའོ།

དེ་ནས་དེ་རྣམས་ཀྱིས་སེར་སྐྱའི་གཞིའི་གྲོང་ཁྱེར་རབ་རིམ་པ་བདུན་དང་འོབས་རིམ་པ་བདུན་གྱིས་བསྐོར་ནས་གྲོང་ཁྱེར་གྱི་སྒོ་འཕར་ལྕགས་ལས་བྱས་ཤིང་།

སྒོ་འཕར་རྣམས་ལ་དྲིལ་བུ་ཤིན་ཏུ་སྒྲ་གསལ་བ་བཏགས་ཏེ་སྒོ་ཕྱེ་ན་དེའི་སྒྲས་དཔག་ཚད་གཅིག་ཁོ་ར་ཁོར་ཡུག་ཏུ་གྲག་པར་འགྱུར་རོ།

བྱང་ཆུབ་སེམས་དཔའ་ནི་ཁང་བཟངས་

ཀྱི་གཞི་ན་བུད་མེད་ཡིད་འཕྲོག་པ་གཟུགས་བཟང་བ་རྣམས་དང་།

གར་དང་གླུ་དང་།

རོལ་མོ་རྣམས་ཀྱི་སྤྱོད་པས་བསྙེན་བཀུར་བྱེད་དུ་བཅུག་གོ།

བློན་པོ་རྣམས་ནི་དཔུང་གི་ཚོགས་ཡན་ལག་བཞི་དང་ལྷན་ཅིག་ར་བའི་ཕྱི་རོལ་ཁོ་ར་ཁོར་ཡུག་ཏུ་གཅན་པ་བྱེད་དུ་བཅུག་གོ།

སྐས་སྤོར་རུང་བ་མི་ལྔ་བརྒྱས་ཚུགས་པ་ཡང་བྱས་སོ།

བཙུན་མོའི་འཁོར་གྱི་སྒོར་ཡང་སྒོ་ཕྱེ་ན་དེའི་སྒྲས་རྒྱལ་པོ་ཟས་གཙང་གི་ཕོ་བྲང་དུ་གྲག་ཅིང་དེ་ཐོས་ནས་བཙུན་མོའི་འཁོར་གྱི་མི་དང་།

གྲོང་ཁྱེར་གྱི་སྒོ་སྲུང་རྣམས་དང་།

ཕོ་བྲང་འཁོར་གྱི་མི་གྲོང་ཁྱེར་གྱི་ཕྱི་རོལ་ནས་སྲུང་དུ་བཅུག་པ་རྣམས་བག་དང་ཆས་ཏེ་འདུག་པར་འགྱུར་བ་དེ་ལྟ་བུ་བཏགས་སོ།

བྱང་ཆུབ་སེམས་དཔའ་ནི་སྟེང་གི་ཁང་བཟངས་ཀྱི་གཞི་སྐྱེས་པ་མེད་པར་ཞུགས་ནས་པི་བང་དང་།

གླིང་བུ་དང་།

འཁར་རྔ་དང་།

སྒྲ་སྙན་ལ་སོགས་པ་རོལ་མོའི་ཆ་སྤྱད་དག་ཉེ་བར་ལེན་ཅིང་འབྱོར་པ་ཆེན་པོས་བཞུགས་སོ།

མཚན་མོ་ནི་རྒྱལ་པོ་ཟས་གཙང་ཡང་དཔུང་གི་ཚོགས་ཡན་ལག་བཞི་དང་ཤར་སྒོའི་ཕྱི་རོལ་ན་འདུག་གོ།

ལྷོ་ཕྱོགས་ན་ནི་བྲེ་བོ་ཟས་སོ།

ནུབ་ཕྱོགས་ན་ནི་ཟས་དཀར་རོ།

བྱང་ཕྱོགས་ན་ནི་ཚད་མེད་ཟས་སོ།

གྲོང་ཁྱེར་གྱི་དབུས་ཀྱི་འགྲམ་པོ་བྱེད་པ་ནི་ཤཱཀྱ་མིང་ཆེན་ནོ།

དེ་ཤར་སྒོར་སོང་ནས་སྨྲས་པ།

སུ་ཞིག་མེལ་ཚེ་བྱེད།

སུ་ཞིག་མེལ་ཚེ་བྱེད་རྒྱལ་པོ་ཟས་གཙང་གིས་སྨྲས་པ།

ཁོ་བོ་མེལ་ཚེ་བྱེད་དོ།

ལྷ་མེལ་ཚེ་མཛོད་ཅིག །

མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ཏེ།

ཚིགས་སུ་བཅད་དེ་སྨྲས་པ།

འཇིག་རྟེན་གཉིད་ལོག་རོ་དང་མཚུངས།

གཉིད་ལོག་བདུད་ཀྱི་དབང་དུ་སོང་།

འདི་ན་མི་ཉལ་རྟག་ཏུ་མཁས།

དེ་བས་མ་ཉལ་མེལ་ཚེ་བྱོས།

ལྷོ་སྒོར་སོང་ནས་སྨྲས་པ།

སུ་ཞིག་མེལ་ཚེ་བྱེད།

སུ་ཞིག་མེལ་ཚེ་བྱེད།

བྲེ་བོ་ཟས་ཀྱིས་སྨྲས་པ།

ཁོ་བོ་མེལ་ཚེ་བྱེད་དོ།

ལྷ་མེལ་ཚེ་མཛོད་ཅིག །

མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ།

འཇིག་རྟེན་གཉིད་ལོག་རོ་དང་མཚུངས།

གཉིད་ལོག་བདུད་ཀྱི་དབང་དུ་སོང་།

གཉིད་ལོག་འཆི་བདག་དབང་དུ་སོང་།

དེ་བས་མ་ཉལ་མེལ་ཚེ་བྱོས།

ནུབ་སྒོར་སོང་ནས་

སྨྲས་པ།

སུ་ཞིག་མེལ་ཚེ་བྱེད།

སུ་ཞིག་མེལ་ཚེ་བྱེད།

ཟས་དཀར་གྱིས་སྨྲས་པ།

ཁོ་བོ་མེལ་ཚེ་བྱེད་དོ།

ལྷ་མེལ་ཚེ་མཛོད་ཅིག །

མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ།

གཉིད་ལོག་པ་ནི་རྟག་ཏུ་མྱོས།

མྱོས་འགྱུར་བྲེ་བོས་འཐུངས་པ་ཉལ།

དགོན་པའི་ནགས་སུ་ཉལ་བ་འདྲ།

དེ་བས་མ་ཉལ་མེལ་ཚེ་བྱོས།

བྱང་སྒོར་སོང་ནས་སྨྲས་པ།

སུ་ཞིག་མེལ་ཚེ་བྱེད།

སུ་ཞིག་མེལ་ཚེ་བྱེད།

ཚད་མེད་ཟས་ཀྱིས་སྨྲས་པ།

ཁོ་བོ་མེལ་ཚེ་བྱེད་དོ།

ལྷ་མེལ་ཚེ་མཛོད་ཅིག །

མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ།

རི་ཉལ་རི་སུལ་ཉལ་བ་བཞིན།

རྒྱ་མཚོའི་ཆུར་ནི་ཉལ་བ་དང་།

ལྗོན་ཤིང་རྩེ་ལ་ཉལ་བ་བཞིན།

དེ་བས་མ་ཉལ་མེལ་ཚེ་བྱོས།

དབུས་ཀྱི་བཞི་མདོ་དང་སུམ་མདོ་དག་ཏུ་སོང་ནས་སྨྲས་པ།

སུ་ཞིག་མེལ་ཚེ་བྱེད།

སུ་ཞིག་མེལ་ཚེ་བྱེད།

སྲུང་མ་རྣམས་ཀྱིས་སྨྲས་པ།

བདག་ཅག་མེལ་ཚེ་བགྱིད་དོ།

མེལ་ཚེ་བྱོས་ཤིག །

མེལ་ཚེ་བྱས་དང་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ།

ཆོས་སྤྱོད་ཆོས་མ་ཡིན་མ་སྤྱོད།

བདེན་པ་སྨྲོས་ཤིག་བརྫུན་མ་སྨྲ།

མུན་པ་ཆེན་པོར་འཇུག་པར་འགྱུར།

དེ་བས་མ་ཉལ་མེལ་ཚེ་བྱོས།

དེ་ནས་ནམ་ནངས་ནས་ཤཱཀྱ་མིང་ཆེན་གྱིས་རྒྱལ་པོ་ཟས་གཙང་ལ་སྨྲས་པ།

ལྷ་དགུང་སངས་ལགས་ཏེ་དགུང་བདུན་ལ་དགུང་གཅིག་ནི་ཐལ།

དགུང་དྲུག་ནི་ལུས་སོ།

རྒྱལ་པོ་ཟས་གཙང་གིས་སྨྲས་པ།

ལེགས་ཀྱིས་ཞག་དྲུག་འདས་ན་གཞོན་ནུ་འཁོར་ལོས་སྒྱུར་བར་གྱུར་ན་བདག་ཅག་ནམ་མཁའི་ངོས་ལ་རྒྱུ་ཞིང་གླིང་བཞིར་ཕྱི་བཞིན་དོང་ངོ་།

དེ་བཞིན་དུ་དགུང་གཅིག་ལུས་སོ་ཞེས་བྱ་བའི་བར་དུ་སྟེ།

ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་ཚིགས་སུ་བཅད་དེ་སྨྲས་པ།

མི་དབང་ཤཱཀྱའི་སྲས་པོ་ཐུབ་པ་འདི།

བདག་ཉིད་ཆེན་པོ་ཕ་རོལ་ཕྱིན་དྲུག་རྫོགས།

ཐུབ་རྣམས་དགྱེས་པར་མཛད་པ་དཀའ་ཐུབ་ཚལ།

འཕགས་པ་དགྱེས་པའི་ནགས་སུ་གཤེགས་པར་བཞེད།

དེ་ནས་

བྱང་ཆུབ་སེམས་དཔའ་བཙུན་མོ་དང་ལྷན་ཅིག་སྐྱེས་པ་མེད་པ་ན་རོལ་མོས་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་པ་ན་འདི་སྙམ་དུ་དགོངས་ཏེ།

བདག་ལ་གཞན་དག་གཞོན་ནུ་ཤཱཀྱ་ཐུབ་པ་ནི་སྐྱེས་པ་མ་ཡིན་ཏེ།

གང་གི་ཕྱིར་གྲགས་འཛིན་མ་དང་།

ས་འཚོ་མ་དང་།

རི་དགས་སྐྱེས་དང་།

བུད་མེད་དྲུག་ཁྲི་སྤངས་ནས་རབ་ཏུ་བྱུང་ངོ་ཞེས་གཞི་དེས་ཁ་ཟེར་བར་འགྱུར་དུ་འོང་གིས།

མ་ལ་བདག་གིས་གྲགས་འཛིན་མ་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེས་གྲགས་འཛིན་མ་དང་ལྷན་ཅིག་དགའ་མགུར་སྤྱོད་པ་དང་གྲགས་འཛིན་མ་སེམས་ཅན་དང་ལྡན་པར་གྱུར་ནས།

དེ་འདི་སྙམ་དུ་སེམས་ཏེ།

ནམ་ནངས་ནས་བྱང་ཆུབ་སེམས་དཔའི་སྙན་དུ་གསོལ་ལོ་སྙམ་མོ།

དེ་ནས་བྱང་ཆུབ་སེམས་དཔས་དེའི་ཚེ་རྟེན་ཅིང་འབྲེལ་བར་འབྱུང་བ་དང་ལྡན་པས་ཚིགས་སུ་བཅད་དེ་གསུངས་པ།

བུད་མེད་དང་བདག་ཁྱིམ་ཉལ་བའི།

ཐ་མ་དེང་གི་འདི་ཡིན་ཏེ།

ཕྱིན་ཅད་ཁྱིམ་དུ་བུད་མེད་དང་།

ང་ནི་ལྷན་ཅིག་མི་གནས་སོ།

དེ་ནས་བུད་མེད་དེ་རྣམས་གར་དང་གླུ་དང་རོལ་མོས་དུབ་ནས་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས་བསླ་བའི་ཚིག་བྱུང་རྒྱལ་དུ་བརྡོལ་ཞིང་གཉིད་ལོག་གོ།

བྱང་ཆུབ་སེམས་དཔས་བུད་མེད་དེ་དག་ཐམས་ཅད་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས་བསླ་བའི་ཚིག་བྱུང་རྒྱལ་དུ་བརྡོལ་ཞིང་གཉིད་ལོག་པ་གཟིགས་སོ།

གཟིགས་ནས་ཀྱང་བཙུན་མོའི་འཁོར་ལ་དུར་ཁྲོད་ཀྱི་འདུ་ཤེས་སྐྱེས་ནས་དེས་ཚིགས་སུ་བཅད་དེ་གསུངས་པ།

རླུང་གི་ཤུགས་ཀྱིས་པད་མའི་ཚལ་ལྟར་ས་གཞི་འདིར།

ལག་པ་དག་དང་རྐང་པ་བརྐྱང་ནས་འགྱེལ་གྱུར་ཏེ།

སྐྲ་རྣམས་ཞིག་ཅིང་མདོམས་དང་རྐུབ་ཀྱི་ཕྱོགས་སྣང་བ།

ཤཱཀྱའི་སྲས་ཀྱིས་གཟིགས་ནས་རང་བཞིན་སྐྱོ་བར་གྱུར།

ཚུལ་དང་བྲལ་བའི་བུད་མེད་ན་ཆུང་ཚོགས་འདི་དག །

དུར་ཁྲོད་འཇིགས་སུ་རུང་བའི་རང་བཞིན་འདྲར་མཐོང་ནས།

སེམས་ཅན་བྱིས་པའི་སྤྱོད་པའི་ཡུལ་ལ་དེང་དགའ་ན།

སེམས་དང་བློ་གྲོས་དྲན་དང་བྲལ་བ་ཡིན་ནམ་ཅི།

འདོད་པ་ཐ་ཆད་འདམ་དང་

མདའ་མདུང་དུག་མེ་འདྲ།

རྨི་ལམ་ལྟ་བུ་ཡིན་ཏེ་ཚྭ་ཆུའི་རོ་དང་མཚུངས།

འདོད་པ་ཕུང་བྱེད་རྩོད་དང་སྡིག་པའི་རྒྱུར་གྱུར་པ།

མཐའ་ངན་སྦྲུལ་གྱི་དབང་པོ་ལྟ་བུ་བདག་གིས་སྤང་།

བར་སྐབས་དེར་སྐྱེ་དགུའི་བདག་མོ་ཆེན་མོའི་རྨི་ལམ་དུ་བཞི་རྨིས་པ།

ཟླ་བ་སྒྲ་ཅན་གྱིས་ཟིན་པ་དང་།

ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་པ་དང་།

སྐྱེ་བོའི་ཚོགས་ཆེན་པོས་བདག་ལ་ཕྱག་བྱས་པ་དང་།

བདག་ཉིད་དགོད་ཅིང་ངུ་བའོ།

གྲགས་འཛིན་མའི་རྨི་ལམ་དུ་བརྒྱད་རྨིས་པ།

བདག་ཉིད་ཀྱི་ཁྱིམ་གྱི་གདུང་ཆག་པ་དང་།

བཀྲ་ཤིས་ཀྱི་མལ་ཁྲི་ཆག་པ་དང་།

ལག་པའི་གདུ་བུ་ཆག་པ་དང་།

སོའི་ཕྲེང་བ་ལྷགས་པ་དང་།

སྐྲའི་ལན་བུ་ཞིག་པ་དང་།

དཔལ་ཁྱིམ་ནས་བྱུང་བ་དང་།

ཟླ་བ་སྒྲ་ཅན་གྱིས་ཟིན་པ་དང་།

ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་པའོ།

བྱང་ཆུབ་སེམས་དཔས་ཀྱང་རྨི་ལམ་ལྔ་རྨིས་པ།

ས་ཆེན་པོ་ཉིད་ཀྱི་གཟིམས་མལ་དུ་བྱས་ཤིང་།

རི་རབ་རིའི་རྒྱལ་པོ་དབུ་རྟེན་དུ་བཅུག །

ཕྱག་གཡོན་པ་ཤར་ཕྱོགས་ཀྱི་རྒྱ་མཚོ་ཆེན་པོར་འཇུག །

ཕྱག་གཡས་པ་ནུབ་ཕྱོགས་ཀྱི་རྒྱ་མཚོ་ཆེན་པོར་འཇུག །

ཞབས་གཉིས་རྒྱ་མཚོ་ཆེན་པོར་འཇུག་པ་དང་།

འགྲེང་བ་ཞེས་བྱ་བའི་རྩའི་རིགས་ལྟེ་བ་ནས་བྱུང་ནས་ནམ་མཁའི་བར་དུ་འཕགས་ཏེ་འདུག་པ་དང་།

བྱ་ཀུན་ནས་དཀར་ལ་མགོ་གནག་པ་རྣམས་ཀྱིས་ཞབས་གཉིས་ལ་གཏུགས་ནས་པུས་མོའི་ལྷ་ང་ལ་ཐུག་གི་བར་དུ་ལྡག་པ་དང་བྱ་སྣ་ཚོགས་ཕྱོགས་བཞི་ནས་འོངས་ནས་མདུན་དུ་ཁ་དོག་གཅིག་ཏུ་འདུག་པ་དང་།

མི་གཙང་པའི་རིའི་སྟེང་ནས་བདག་ཉིད་མི་གཙང་བས་མ་གོས་པར་འཆག་པའོ།

རྨིས་ནས་ཀྱང་ཐུགས་དགྱེས་ཏེ་དགོངས་པ།

ངའི་རྨི་ལམ་འདི་འདྲ་བ་རྨིས་པས་རིང་པོ་མི་ཐོགས་པ་ཁོ་ནར་བླ་ན་མེད་པའི་ཡེ་ཤེས་ཐོབ་པར་འགྱུར་རོ་སྙམ་མོ།

དེ་ནས་གྲགས་འཛིན་མས་བྱང་ཆུབ་སེམས་དཔའ་ལ་རྨི་ལམ་གསོལ་པ།

ལྷ་ད་གཟོད་བདག་གིས་གཡར་ལམ་དུ་བརྒྱད་རྨིས་པ།

བདག་གི་སྡུམ་པའི་གདུང་ཆག་པ་དང་།

བཀྲ་ཤིས་ཀྱི་མལ་ཁྲི་ཆག་པ་དང་།

སུག་པའི་གདུ་བུ་ཆག་པ་དང་།

སོའི་ཕྲེང་བ་ལྷགས་པ་དང་།

སྐྲའི་ལན་བུ་ཞིག་པ་དང་།

དཔལ་སྡུམ་

བ་ནས་བྱུང་བ་དང་།

ཟླ་བ་སྒྲ་ཅན་གྱིས་ཟིན་པ་དང་།

གདུགས་ཤར་ཕྱོགས་ནས་བདལ་ནས་དེ་ཉིད་དུ་ནུབ་པ་རྨིས་ལགས་སོ།

བྱང་ཆུབ་སེམས་དཔས་གྲགས་འཛིན་མའི་ཡིད་མི་བདེ་བ་བསལ་བའི་ཕྱིར་རྨི་ལམ་རྣམས་བཤད་པ།

བདག་གི་ཁྱིམ་གྱི་གདུང་ཆག་གོ་ཞེས་སྨྲས་པ་གང་ཡིན་པ་དེ་མི་འདུག་གམ།

བདག་གི་བཀྲ་ཤིས་ཀྱི་མལ་ཁྲི་ཆག་གོ་ཞེས་སྨྲས་པ་གང་ཡིན་པ་དེ་ཡང་མ་ཆག་སྟེ་འདུག་པའོ་ནི་ཡིན་མོད།

ལག་པའི་གདུ་བུ་ཆག་གོ་ཞེས་སྨྲས་པ་གང་ཡིན་པ་ཅི་ཆག་གམ་མ་ཆག་རང་ཉིད་རྟོགས་ཤིག །

སོའི་ཕྲེང་བ་ལྷགས་སོ་ཞེས་སྨྲས་པ་གང་ཡིན་པ་དེ་ཡང་སོ་སོ་རང་གིས་རིག་པར་བྱ་བ་ཡིན་པས་ཅི་ལྷགས་སམ་མ་ལྷགས་རྟོགས་ཤིག །

བདག་གི་ལན་བུ་ཞིག་གོ་ཞེས་གང་སྨྲས་པ་དེ་ཡང་ཁྱོད་ཀྱིས་སོ་སོ་རང་གིས་རིག་པར་བྱ་བ་ཡིན་པས་ཅི་ཞིག་གམ་མ་ཞིག་རྟོགས་ཤིག །

ཁྱིམ་ནས་དཔལ་བྱུང་ངོ་ཞེས་སྨྲས་པ་གང་ཡིན་པ་དེ་ནི་བུད་མེད་རྣམས་ཀྱི་དཔལ་ནི་ཁྱོ་ཡིན་ལ་ང་ནི་འདུག་པ་ཉིད་དོ།

ཟླ་བ་སྒྲ་ཅན་གྱིས་ཟིན་ཅེས་སྨྲས་པ་གང་ཡིན་པ་དེ་ནི་ཟླ་བ་འདི་མངོན་སུམ་དུ་འདུག་པ་མ་ཡིན་ནམ།

ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་བོ་ཞེས་སྨྲས་པ་གང་ཡིན་པ་དེ་ནི་ད་དུང་ཡང་ནམ་ཕྱེད་ཡོད་དེ།

རེ་ཞིག་ཤར་ཀྱང་མ་ཤར་ན་ནུབ་པར་ལྟ་ག་ལ་གྱུར་ཅེས་དེ་ལྟར་བརྡ་སྤྲད་ནས་བཙུན་མོ་གྲགས་འཛིན་ཅང་མི་སྨྲ་བར་འདུག་གོ།

བྱང་ཆུབ་སེམས་དཔས་དགོངས་པ་གྲགས་འཛིན་མའི་རྨི་ལམ་དེ་འདྲ་བ་རྨིས་པས་གདོན་མི་ཟ་བར་ང་ཁོ་ན་བདག་འགྲོ་བར་བྱས་འདི་ལ་ཚིག་ཟུར་གྱིས་བསྟན་ནོ་སྙམ་ནས་དེས་དེ་ལ་ཚིག་ཟུར་གྱིས་བསྟན་པ་དང་།

གྲགས་འཛིན་མས་གསོལ་པ།

ལྷ་ཁྱོད་གང་དུ་བཞུད་པ་དེར་བདག་ཁྲིད་ཅིག །

བྱང་ཆུབ་སེམས་དཔས་མྱ་ངན་ལས་འདས་པ་ལས་དགོངས་ནས་བཀའ་སྩལ་པ།

དེ་བཞིན་དུ་བྱ་སྟེ།

གང་དུ་འགྲོ་བ་དེ་དང་དེར་ཁྱོད་བཀྲིའོ།

དེ་ནས་བརྒྱ་བྱིན་དང་ཚངས་པ་ལ་སོགས་ཏེ་ལྷ་རྣམས་ཀྱི་སེམས་ཀྱིས་བྱང་ཆུབ་སེམས་དཔའི་དགོངས་པ་ཤེས་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་།

བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ།

ནགས་ཀྱི་སྤྲེའུ་ནི་སྤྱོད་

ཡུལ་རྒྱུ་འདྲ་ཞིང་།

ཡན་པར་འདུག་པའི་རྟེའུ་དང་འདྲ་བའི་ཐུགས།

གལ་ཏེ་འདོད་པའི་ཡོན་ཏན་ལས་བཟློག་ན།

དེ་ནས་ཤིན་ཏུ་གསལ་བའི་སྣང་བ་གཟིགས།

བློ་གྲོས་བཟང་པོ་བཞེངས་ཤིག་བཞེངས།

ས་ནི་སྤངས་ཏེ་བཞུད་མཛོད་ལ།

ཐམས་ཅད་མཁྱེན་ཉིད་བརྙེས་ནས་ནི།

འགྲོ་བ་དག་ནི་བསྒྲལ་བར་མཛོད།

བྱང་ཆུབ་སེམས་དཔས་གསུངས་པ།

ཀཽ་ཤི་ཀ་མ་མཐོང་ངམ།

ང་ནི་རི་དགས་བདག་པོ་རྒྱས་བསྐོར་ལྟར།

མི་ནི་མཐུ་ལྡན་གཞུ་མཚོན་རལ་གྲི་ཐོགས།

རྟ་གླང་ཤིང་རྟ་དཔུང་ཚོགས་མང་པོ་ཡིས།

གྲོང་ཁྱེར་སེར་སྐྱ་ཀུན་ནས་ཡོངས་སུ་བསྐོར།

ཟས་གཙང་ལ་སོགས་ཤཱཀྱའི་ཚོགས་འདི་དག །

གླང་ཆེན་རྟ་ཞོན་ལེགས་པར་གོ་བགོས་ལུས།

མི་སྡུག་སྣ་ཚོགས་ལག་ན་མཚོན་ཐོགས་ཏེ།

ཁྱམས་དང་རྟ་བབས་ཁང་བཟངས་གཞི་ནང་གནས།

ཕོ་བྲང་དང་ནི་ཁྱིམ་སྒོ་དང་།

དེ་བཞིན་གྲོང་ཁྱེར་སྒོ་དག་ཀྱང་།

བཅད་ནས་གཏན་པ་དམ་བཅུག་སྟེ།

དེ་བཞིན་ཀུན་ནས་བསྲུངས་པར་གྱུར།

རྭ་དུང་པ་ཊ་ཧ་སྒྲ་རྔ་སྒྲ་ཡིས།

ཁྱམས་དང་རྟ་བབས་ཁང་བཟངས་ནང་གནས་ཤིང་།

གླང་ཆེན་རྟ་དམག་འབད་པའི་སྐྱེ་བོའི་ཚོགས།

རྒྱུན་དུ་ང་མི་བཏང་ཕྱིར་སྲུང་བར་བྱེད།

བརྒྱ་བྱིན་གྱིས་གསོལ་པ།

དེས་པ་མར་མེ་མཛད་ཀྱིས་ལུང་བསྟན་དང་།

སྡུག་བསྔལ་གྱིས་གདུངས་འཇིག་རྟེན་འདི་དང་ཡང་།

ཁྱོད་ཀྱི་སྔོན་གྱི་དམ་བཅས་དགོངས་མཛོད་ལ།

ཁབ་དག་སྤོངས་ཏེ་ངེས་པར་འབྱུང་བར་མཛོད།

ཇི་ལྟར་ཁྱོད་ནི་བགེགས་མེད་པར།

དེང་ཉིད་ནགས་སུ་གཤེགས་འགྱུར་བ།

བདག་ཅག་ཚངས་སོགས་བཅས་པ་ཡི།

ལྷ་རྣམས་ཀྱིས་ནི་དེ་བཞིན་བགྱི།

བྱང་ཆུབ་སེམས་དཔས་ལེགས་སོ་ཞེས་གསུངས་ནས་ཐུགས་དགྱེས་པར་གྱུར་ཏོ།

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་གཉིད་ཀྱིས་མྱོས་པར་བྱས་ནས།

གནོད་སྦྱིན་གྱི་སྡེ་དཔོན་ཆེན་པོ་ལྔས་རྩེན་ལ་བསྒོ་བ།

གྲོགས་པོ་བྱང་ཆུབ་སེམས་དཔའ་སྟེང་གི་ཁང་བཟངས་ནས་འབབས་ཀྱིས་སྐས་ལོང་ཤིག །

དེས་སྐས་བླངས་པ་ལ་བྱང་ཆུབ་སེམས་དཔའ་འབབས་པ་དང་།

དེ་ནས་བརྒྱ་བྱིན་གྱིས་བརྡ་བྱས་མ་ཐག་ཏུ་ཞབས་འབྲིང་བ་འདུན་པ་གང་ན་བ་དེར་གཤེགས་ནས།

ཇི་

ཙམ་ན་འདུན་པ་གཉིད་སྟུག་པོས་ནོན་པར་གཟིགས་ནས་བྱང་ཆུབ་སེམས་དཔས་བསྒྲིམས་ཏེ་བསླང་ནས་ཚིགས་སུ་བཅད་པའི་དབྱངས་ཀྱིས་གསུངས་པ།

འདུན་པ་ལོངས་ཀྱེ་ཁྱིམ་ནས་མྱུར་དུ་ནི།

ང་ཡི་རྟ་ཕོ་རིན་ཆེན་བསྔགས་ལྡན་ལོང་།

སྔོན་གྱི་རྒྱལ་བས་ལོངས་སྤྱོད་དཀའ་ཐུབ་ཚལ།

ཐུབ་རྣམས་དགྱེས་པར་མཛད་པར་ངག་གཤེགས་སོ།

འདུན་པ་གཉིད་ལོག་པའི་མིག་ཕྱེ་ནས་སྨྲས་པ།

ལྷ་ཁྱོད་སྐྱེད་མོས་ཚལ་གྱི་དུས་མ་བབ།

དེས་པ་ཁྱོད་དང་འགའ་ཡང་ཁོ་ན་མ་མཆིས།

ཁྱོད་ལ་དགྲ་བོ་སུ་ཡང་མ་མཆིས་ན།

དགུང་ཕྱེད་ཁྱོད་ལ་བཅིབས་པས་ཅི་ཞིག་བགྱིད།

བྱང་ཆུབ་སེམས་དཔས་བཀའ་སྩལ་པ།

འདུན་པ་ཁྱོད་ཀྱིས་ལན་འགའ་ཡང་།

ང་ཡི་ཚིག་ནི་མ་བཅག་ན།

ང་ཡི་དེང་དུས་ཐ་མ་ལ།

ང་ཡི་ཚིག་འདི་མ་གཅག་ཅིག །

འདུན་པས་གསོལ་པ།

གཞོན་ནུ་མཚན་མོ་འདི་ནི་འཇིགས་པ་དང་འཇིགས་སུ་རུང་བ་མཆིས་པས་བདག་བཅིབས་པ་མི་ལེན་ནོ།

བྱང་ཆུབ་སེམས་དཔས་དགོངས་པ།

ལན་དང་ཡང་ལན་གྱིས་གདོན་མི་ཟ་བར་སྐྱེ་བོ་སད་པར་འགྱུར་གྱིས་བདག་ཉིད་སོང་ལ་རྟའི་རྒྱལ་པོ་བསྔགས་ལྡན་སྟ་གོན་བྱའོ་སྙམ་ན།

དེ་ནས་ཉིད་ཀྱིས་ཕོ་བྲང་གི་སྒོ་ཕྱེ་ནས་རྟའི་རྒྱལ་པོ་བསྔགས་ལྡན་བཟུང་བར་བརྩམས་པ་ན་དེ་ཁྲོས་པའི་མེ་རབ་ཏུ་འབར་བས་རྐང་པ་འཕྲ།

འཇིང་ཀྱོག་བྱེད་ལ་ཕར་བྲོས་ཚུར་བྲོས་ཤིང་འདུག་ཏུ་མི་བཏུབ་བོ།

དེ་ནས་བྱང་ཆུབ་སེམས་དཔའི་ཕྱག་བསོད་ནམས་བརྒྱ་ཕྲག་དུ་མས་བསྐྱེད་པ།

འཁོར་ལོ་དང་བཀྲ་ཤིས་དང་།

གཡུང་དྲུང་འཁྱིལ་པ་མངའ་བ།

སྐྲག་པ་རྣམས་ལ་དབུགས་འབྱིན་པར་མཛད་པས་མགོ་ལ་བྱུགས་ནས་གསུངས་པ།

བསྔགས་ལྡན་ཐ་མ་ཡི་ནི་ཁུར་ལོང་སྟེ།

དཀའ་ཐུབ་ནགས་སུ་མ་ཐོགས་ང་སྐྱོལ་ཅིག །

བྱང་ཆུབ་ཐོབ་ནས་མྱུར་དུ་འགྲོ་བ་ཀུན།

བསམ་གཏན་རྣམ་ཐར་ཆར་གྱིས་ཚིམ་པར་བྱ།

ཆོས་ཉིད་ཀྱིས་དུད་འགྲོ་ཡང་གདམས་ན་ཕྱི་ལང་མི་བྱེད་པས་རྟའི་རྒྱལ་པོ་བསྔགས་ལྡན་མི་གཡོ་བར་འདུག་གོ།

དེ་ནས་བྱང་ཆུབ་སེམས་དཔའ་ཐུགས་དགྱེས་པ་སྐྱེས་ཏེ་རྟའི་རྒྱལ་པོ་བསྔགས་ལྡན་བསྟད་ནས་བཞེས་སོ།

བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱིས་བྱང་ཆུབ་

སེམས་དཔའ་ཕྱིར་གཤེགས་པའི་ཕྱིར་ལྷའི་བུ་བཞི་པོ་བསྒོ་སྟེ་བཞག་པ།

འགྲམ་དང་།

ཉེ་འགྲམ་དང་།

ལོ་མ་དང་།

ལོ་མ་གྱོན་པའོ།

བྱང་ཆུབ་སེམས་དཔས་དེ་རྣམས་ལ་གསུངས་པ།

ཤེས་ལྡན་དག་ང་སུས་བཀུར།

དེ་རྣམས་ཀྱིས་གསོལ་པ།

བདག་ཅག་གིས་བཀུར་ལགས་སོ།

ཁྱེད་ཅག་ལ་སྟོབས་ཇི་ཙམ་ཡོད།

གཅིག་གིས་གསོལ་པ།

གཞོན་ནུ་བདག་གིས་ནི་སའི་རྡུལ་ཇི་སྙེད་མཆིས་པ་ཁུར་དུ་ཐོགས་ཏེ་མཆིའོ།

གཉིས་པས་གསོལ་པ།

བདག་གིས་ནི་རྒྱ་མཚོ་ཆེན་པོ་བཞི་དང་།

མཚོ་དང་མཚེའུ་དང་ལྟེང་ཀ་དང་།

ཆུ་མིག་རྣམས་ཀྱི་ཆབ་ཇི་སྙེད་མཆིས་པ་དེ་ཐམས་ཅད་ཁུར་དུ་ཐོགས་ཏེ་མཆིའོ།

གསུམ་པས་གསོལ་པ།

བདག་གིས་ནི་ས་ལ་རི་ཇི་སྙེད་མཆིས་པ་དེ་ཐམས་ཅད་ཁུར་དུ་ཐོགས་ཏེ་མཆིའོ།

བཞི་པས་གསོལ་པ།

བདག་གིས་ནི་ས་ལ་རྩྭ་དང་ཤིང་དང་ཡལ་ག་དང་ལོ་མ་ཇི་སྙེད་མཆིས་པ་དེ་ཐམས་ཅད་ཁུར་དུ་ཐོགས་ཏེ་མཆིའོ།

དེ་ནས་བྱང་ཆུབ་སེམས་དཔས་ཞབས་ས་ལ་བཞག་པ་ན་དེ་རྣམས་ཀྱིས་བསྒུལ་བར་ཡང་མ་ནུས་ནས་ངོ་མཚར་སྐྱེས་ཏེ་གསོལ་པ།

གཞོན་ནུ་བདག་ཅག་གིས་ནི་བྱང་ཆུབ་སེམས་དཔའ་རྣམས་ལ་སྟོབས་འདི་འདྲ་བ་མངའ་བར་མ་འཚལ་ཏོ།

གལ་ཏེ་འཚལ་ན་བདག་ཅག་མི་མཆིས་པ་ལགས་པ་ཞིག །

གཏམ་དེ་འདུན་པ་སྔར་སད་པས་ཐོས་ནས་བྱང་ཆུབ་སེམས་དཔའི་སྤྱན་སྔར་སོང་བ་དང་།

དེ་ནས་བྱང་ཆུབ་སེམས་དཔའ་རྟའི་རྒྱལ་པོ་བསྔགས་ལྡན་ལ་བཅིབས།

འདུན་པ་ཡང་འཕོངས་ལ་ཞོན་ནས་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང་།

ལྷ་རྣམས་ཀྱིས་ལྷའི་མཐུས་རྟ་རིན་པོ་ཆེ་བསྔགས་ལྡན་སྟེང་གི་ནམ་མཁའ་ལས་མངོན་པར་འཕགས་པ་དང་ཕོ་བྲང་ན་གནས་པའི་ལྷ་རྣམས་བྱང་ཆུབ་སེམས་དཔའ་དང་བྲལ་བས་ངུ་བར་བརྩམས་སོ།

དེ་རྣམས་ངུ་བའི་མཆི་མའི་ཐིགས་པ་རྣམས་ལུས་དང་ས་ལ་བབ་བོ།

འདུན་པས་གསོལ་པ།

གཞོན་ནུ་ཆར་གྱི་ཐིགས་པ་དག་འབབ་ན་ཅི་ལྷས་དགུང་ཆར་ཕབ་བམ།

བྱང་ཆུབ་སེམས་དཔས་གསུངས་པ།

ལྷས་ཆར་ཕབ་པ་མ་ཡིན་ཏེ།

འོན་ཀྱང་ཕོ་བྲང་ན་གནས་པའི་ལྷ་རྣམས་ང་དང་བྲལ་བས་ངུ་བར་བརྩམས་ཏེ།

དེ་རྣམས་ཀྱི་

མཆི་མའི་ཐིགས་པ་རྣམས་ལུས་ལ་བབ་པ་ཡིན་ནོ།

དེ་ནས་འདུན་པ་མིག་མཆི་མས་གང་ཞིང་དབུགས་རིང་པོའི་ཤུགས་ནར་གྱིས་ཕྱུང་ནས་ཅང་མི་སྨྲ་བར་འདུག་གོ།

བྱང་ཆུབ་སེམས་དཔའ་སྐུ་ཐམས་ཅད་ཀྱིས་གླང་པོ་ཆེའི་གཟིགས་སྟངས་ཀྱིས་གཡས་ཕྱོགས་སུ་གཟིགས་ཏེ་དགོངས་པ།

ང་བུད་མེད་དང་ལྷན་ཅིག་ཁྱིམ་ན་ཉལ་བའི་ཐ་མ་ནི་འདི་ཡིན་ནོ་སྙམ་མོ།

ཡང་དགོངས་པ་གལ་ཏེ་ང་ཤར་སྒོ་སྤངས་ཏེ་སྒོ་གཞན་ནས་བྱུང་ན་གཞོན་ནུས་ནི་བདག་ལ་ཐ་མའི་དུས་ན་ཡང་མ་བལྟས་སོ་སྙམ་དུ་རྒྱལ་པོ་མི་དགའ་བར་འགྱུར་རོ་སྙམ་མོ།

ཇི་ཙམ་ན་རྒྱལ་པོ་ཟས་གཙང་གཉིད་སྟུག་པོས་ནོན་པ་གཟིགས་ནས་དེས་དེ་ལ་བསྐོར་བ་མཛད་དེ་གསུངས་པ།

ཡབ་གུས་པ་མ་མཆིས་པ་དང་།

ཞེས་མ་མཆིས་པས་སྐྲག་ནས་མཆི་བ་ནི་མ་ལགས་ཏེ།

གཞན་དུ་ན་འཇིག་རྟེན་རྒ་བ་དང་འཆི་བས་བཅོམ་པ་རྒ་བ་དང་འཆི་བའི་སྡུག་བསྔལ་གྱིས་འཇིགས་པ་ལས་ཡོངས་སུ་དགྲོལ་བའི་སླད་དུ་ལགས་སོ།

ཇི་ཙམ་ན་ཤཱཀྱ་མིང་ཆེན་འགྲམ་པོ་བྱེད་པ་སྐྱེ་བོ་ཉུལ་ཞིང་ཕྱོགས་དེར་ཕྱིན་པ་དང་བྱང་ཆུབ་སེམས་དཔའ་གཤེགས་པར་ཆས་པ་མཐོང་ངོ་།

དེ་ནས་སྐད་འཛེར་ཅིང་མིག་མཆི་མས་གང་བས་སྨྲས་པ།

གཞོན་ནུ་འདི་ཅི་མཛད།

མིང་ཆེན་འགྲོའོ།

གཞོན་ནུ་འདི་ནི་རིགས་པ་མ་ལགས་སོ།

མིང་ཆེན་གང་གི་ཕྱིར་ངས་བསྐལ་པ་གྲངས་མེད་པ་གསུམ་དུ་དཀའ་བ་བརྒྱ་སྟོང་དུ་མས་སེམས་ཅན་རྣམས་ཀྱི་དོན་དུ་བྱང་ཆུབ་ཡང་དག་པར་བསྒྲུབས་པ་དེས་ན་དང་ཅི་ཁྱིམ་ན་འདུག་ཕོད་དམ།

འདི་ནི་ངེས་ཏེ་དཀའ་ཐུབ་ཀྱི་ཚལ་དུ་འགྲོའོ།

དེ་ནས་གསུང་ཚིག་དྲག་པོས་ཤཱཀྱ་མིང་ཆེན་སྤྱོས་པ་དང་།

ཆོ་ངེས་བཏབ་སྟེ་ཀྱི་ཧུད།

དེང་དུ་རྒྱལ་པོ་ཟས་གཙང་དང་།

ཤཱཀྱ་དག་ནི་ཐམས་ཅད་ཀྱིས།

ཡང་དང་ཡང་དུ་བསམས་པ་ཡི།

རེ་བ་འབྲས་བུ་མེད་པར་གྱུར།

དེང་དུ་རྒྱལ་པོ་ཟས་གཙང་ནི།

སྲས་ཀྱི་མྱ་ངན་གྱིས་གདུངས་པས།

ལག་བསྒྲེང་ཤིན་ཏུ་སྡུག་བསྔལ་ཞིང་།

མི་བཟད་སྒྲ་ནི་འབྱིན་པར་གྱུར།

ས་འཚོ་གྲགས་འཛིན་རི་དགས་སྐྱེས།

དེ་བཞིན་བཙུན་མོའི་འཁོར་རྒྱས་པའང་།

དོན་གྲུབ་དང་ནི་བྲལ་བ་ཡིས།

ཤིན་ཏུ་སྡུག་

བསྔལ་མྱོང་བར་གྱུར།

ཞེས་སྨྲས་ནས།

དེ་སྔངས་པས་གྲགས་འཛིན་མ་བསླང་སྟེ་སྨྲས་པ།

དོན་གྲུབ་འདི་ནི་གཤེགས་གྱུར་གྱིས།

ཁྱིམ་ཐབ་སྡུག་བསྔལ་གྱིས་གདུངས་ནས།

སྡུག་བསྔལ་ཉམ་ཐག་དུར་འོང་གིས།

ཁྱིམ་ཐབ་སྡུག་པ་དེ་ཟློག་ཤིག །

ཁྱོད་ཀྱིས་ཁྱིམ་ཐབ་གཤེགས་འགྱུར་འདི་ནི་མཐོང་དཀའ་སྟེ།

ཁྱོད་ཀྱིས་འདི་ལྟོས་ཁྱིམ་ཐབ་མཐོང་བའི་ཐ་མ་ཡིན།

ཀྱི་ཧུད་ཕོངས་པས་བདག་གིས་མཚན་མོ་ཀུས་བཏབ་ཀྱང་།

སུས་ཀྱང་ལན་མ་སྟེར་བས་བདག་གིས་མཉེས་སོ།

དེས་ནི་དེ་ལྟར་ཁུས་བཏབ་ཀྱང་།

འདི་ལྟར་ལྷ་རྣམས་བྱིན་རླབས་ཀྱིས།

དགོན་པར་འོ་དོད་བོས་པ་བཞིན།

འགའ་ཡང་སད་པར་མ་གྱུར་ཏོ།

དེ་ནས་ཤཱཀྱ་མིང་ཆེན་སྡུག་བསྔལ་ཞིང་ཡིད་མི་བདེ་བས་གདུངས་ནས་དེ་རིངས་པར་རྒྱལ་པོ་ཟས་གཙང་གི་དྲུང་དུ་སོང་ནས་རྒྱལ་པོ་ཟས་གཙང་བསླང་སྟེ་སྨྲས་པ།

དོན་གྲུབ་འདི་ནི་བཞུད་ལགས་ཀྱིས།

ས་བདག་དེ་ནི་བཟློག་པར་མཛོད།

སྲས་ཀྱི་མྱ་ངན་གྱིས་ཐེབས་ནས།

སྡུག་བསྔལ་གྱིས་གདུངས་བཤུམས་འགྱུར་མཆིས།

མ་སྟེས་ཏེ་དེ་ཡང་གཉིད་མ་སད་དོ།

དེ་ནས་བརྒྱ་བྱིན་དང་།

ཚངས་པ་ལ་སོགས་པ་ལྷ་རྣམས་ཀྱང་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་།

བྱང་ཆུབ་སེམས་དཔའ་བསྐོར་ཅིང་དོང་སྟེ་གཡས་ཕྱོགས་ནས་གཟུགས་ན་སྤྱོད་པའི་ལྷ་རྣམས་སྤྱོད་ལམ་ཞི་བ་དང་།

གཡོན་ཕྱོགས་ནས་འདོད་པ་ན་སྤྱོད་པའི་ལྷ་རྣམས་ཀྱིས་རྒྱལ་མཚན་དང་བ་དན་བསྒྲེང་ནས་ལྷའི་རོལ་མོའི་ཁྱད་པར་སྣ་ཚོགས་དང་།

མདུན་ནས་བརྒྱ་བྱིན་དང་ཚངས་པ་ལ་སོགས་པ་རང་རང་གི་སྤྱོད་ལམ་གྱིས་དོང་ངོ་།

ནམ་མཁའི་ངོས་ལ་གནས་པའི་ལྷ་བརྒྱ་སྟོང་ཕྲག་དུ་མས་ནི་བྱང་ཆུབ་སེམས་དཔའི་སྟེང་ནས་ལྷའི་མེ་ཏོག་ཨུཏྤལ་དང་།

པད་མ་དང་།

ཀུ་མུ་ད་དང་།

པད་མ་དཀར་པོ་རྣམས་ཀྱིས་གཏོར་རོ།

ཨ་ག་རུའི་ཕྱེ་མ་དང་།

ཙན་དན་གྱི་ཕྱེ་མ་དང་།

ཏ་མ་ལའི་འདབ་མའི་ཕྱེ་མ་དང་།

ལྷའི་མེ་ཏོག་མན་དཱ་ར་བས་ཀྱང་གཏོར་ཏོ།

ལྷའི་རོལ་མོའི་ཆ་བྱད་སྣ་ཚོགས་ཀྱང་བརྡུངས་སོ།

གོས་རྣམས་ཀྱང་གཏོར་རོ།

འདིར་སྨྲས་པ།

མཁའ་ལ་ལྷ་རྣམས་གཞའི་

སྒྲ་ཆེན་འབྱིན་བྱེད་ལ།

དགའ་བའི་ཡིད་ཀྱིས་གོས་ཀྱི་གཡབ་མོས་འདེབས་བྱེད་ཅིང་།

ཁ་ཅིག་བྱང་ཆུབ་སེམས་དཔའ་ལ་ནི་སྟོད་བྱེད་དེ།

ནམ་མཁའ་ལ་ནི་སོར་མོ་བརྒྱ་ཕྲག་སྒྱུར་བར་བྱེད།

ཁ་ཅིག་དག་ནི་སྒོ་རྣམས་འབྱེད་བྱེད་ཅིང་།

མེ་ཏོག་མན་དཱ་ར་བས་འཐོར་བར་བྱེད།

ཁ་ཅིག་དག་ནི་བཅིབས་པའི་རྐང་འཛིན་ཅིང་།

བདེ་བར་གཤེགས་པ་རྟོག་ཅིང་རྗེས་བཞིན་འབྲང་།

ཁ་ཅིག་དག་ཀྱང་གཡས་ནས་རྗེས་བཞིན་འབྲང་།

གཡོན་ནས་འགྲོ་བ་དག་ཀྱང་རྗེས་བཞིན་འབྲང་།

བརྒྱ་བྱིན་དེ་བཞིན་ཚངས་པར་བཅས་པ་དང་།

ལུས་ངན་བདག་ཉིད་ཤུལ་ནི་མཚོན་པར་བྱེད།

ཟླ་བ་ཉ་བ་རྒྱུ་སྐར་ཚོགས་ཀྱིས་ལྟར།

བདག་ཉིད་ཆེན་པོ་ལྷ་ཚོགས་མདུན་བདར་ནས།

དཀའ་ཐུབ་ནགས་ནི་ཐུབ་རྣམས་དགྱེས་བྱེད་པ།

འཕགས་པ་དགྱེས་པའི་ནགས་སུ་ཐུགས་དགྱེས་གཤེགས།

དེ་ནས་བྱང་ཆུབ་སེམས་དཔའ་གྲོང་ཁྱེར་སེར་སྐྱའི་གཞི་ནས་ཕྱིར་བྱུང་བ་དང་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཡིད་དགའ་བས་སྤྲོ་བ་བསྐྱེད་པ།

གྲོགས་པོ་ཁྱོད་ཡུན་རིང་པོ་ནས་ནམ་ཞིག་ནང་བགེགས་ལས་ཐར་ཏེ་དཀའ་ཐུབ་ཀྱི་ནགས་སུ་འགྲོ་བར་འགྱུར་སྙམ་དུ་དགོངས་པ་སྐྱེད་པ་གང་ལགས་པ་དེ་དེང་དུ་ཡོངས་སུ་རྫོགས་པ་ལགས་ཀྱིས།

ནམ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེའི་ཚེ།

བདག་ཅག་ལ་ཡང་དགོངས་ཤིག །

བྱང་ཆུབ་སེམས་དཔས་དེ་བཞིན་དུ་བྱའོ་ཞེས་དམ་བཅས་ནས་སྐུ་ཐམས་ཅད་ཀྱིས་གཡས་ཕྱོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས།

སངས་རྒྱས་རྣམས་ཀྱིས་བསྟན་པ་ཡི།

ལམ་གྱི་མཆོག་ནི་མ་ཐོབ་པར།

གྲོང་ཁྱེར་སེར་སྐྱའི་གཞིར་ནི་སླར།

ང་ནི་འཇུག་པར་མི་བྱའོ།

ཞེས་གསུངས་སོ།

དེ་ནས་བྱང་ཆུབ་སེམས་དཔའ་ཐུན་གཉིས་ཀྱི་དཔག་ཚད་བཅུ་གཉིས་སུ་བྱོན་ནས་བཅིབས་པ་ལས་བབས་ཏེ་རྒྱན་བཀྲོལ་ནས་འདུན་པ་ལ་བཀའ་སྩལ་པ།

འདུན་པ་རྒྱན་དང་རྟ་ཁྱེར་ལ་སླར་སོང་ཤིག །

འདིར་སྨྲས་པ།

ཁ་ལོ་སྒྱུར་ཁྱོད་ང་ཡི་རྟ་འདི་དང་།

རྒྱན་འདི་རྣམས་ཀྱང་གཉེན་པ་དག་ལ་བྱིན།

ང་ནི་འདོད་པ་རྒྱ་ཆེན་སྤངས་ནས་སུ།

ད་ལྟར་

འདི་ཉིད་དུ་ནི་རབ་བྱུང་བྱ།

དེ་ནས་འདུན་པ་གདོང་ལ་མཆི་མ་ཆར་བཞིན་འབབ་པས་བྱང་ཆུབ་སེམས་དཔའ་ལ་གསོལ་པ།

སེང་གེ་སྟག་གིས་བལྟམ་པ་དང་།

ཕྱུགས་རྗེས་བལྟམ་པའི་ནགས་ཚལ་དུ།

འབའ་ཞིག་སྐུ་གཉེན་དང་བྲལ་ནས།

འཕགས་པ་ཇི་ལྟར་སྤྱོད་པར་འགྱུར།

བྱང་ཆུབ་སེམས་དཔས་གསུངས་པ།

སྐྱེ་དགུ་འདི་ནི་སྐྱེ་ནའང་གཅིག་པུ་སྟེ།

དེ་བཞིན་འཆི་ནའང་གཅིག་པུ་འཆི་བར་འགྱུར།

འདི་ནི་གཅིག་པུས་སྡུག་བསྔལ་མྱོང་འགྱུར་གྱི།

འཁོར་བ་ལ་ནི་གྲོགས་ཡོད་མ་ཡིན་ནོ།

འདུན་པས་གསོལ་པ།

ཀྱེ་ཧུད་གཞོན་ནུས་སྡུག་བསྔལ་མ་གཟིགས་ཏེ།

ཞབས་འཇམ་གླང་ཆེན་རྟ་ལ་བཅིབས་གོམས་པ།

ས་གཞི་རྩྭ་དང་རྡོ་བས་བལྟམ་རྩུབ་པར།

ཇི་ལྟར་ཞབས་ཀྱིས་གཤེགས་ཤིང་ནགས་སུ་རྒྱུ།

བྱང་ཆུབ་སེམས་དཔས་གསུངས་པ།

འཆི་བདག་འཇིགས་པ་དེ་ནི་ལན་འགའ་ཡང་།

སྐྱིད་ལ་བརྩམས་མེད་བདེ་བར་གོམས་ལ་མིན།

མགོན་བཅས་ལ་མིན་རིགས་བཙུན་ལ་མ་ཡིན།

དཔའ་དང་བརྩོན་མིན་སྐྱེ་བོ་དགའ་ལ་མིན།

དགའ་བས་འཆི་བདག་འཇིགས་པ་དག །

བསྐྱེད་ནས་འོངས་པར་འགྱུར་ཞེས་གྲགས།

དོན་མ་བྱས་ཤིང་མ་བརྩམས་པར།

འཆི་བར་ཡང་ནི་འགྲོ་བར་འགྱུར།

འདུན་པས་གསོལ་པ།

ལྷ་རྒྱལ་པོ་བགྲེས་པོ་ནི་སྲས་ཀྱི་མྱ་ངན་གྱིས་འགྲོངས་པར་འགྱུར་རོ།

འོན་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཚོགས་བསགས་པའི་ཕྱིར་འདུན་པའི་ཚིག་ཐུགས་ལ་མ་བབ་བོ།

དེ་ནས་བྱང་ཆུབ་སེམས་དཔས་ཨུཏྤལ་སྔོན་པོ་འདྲ་བའི་རལ་གྲི་ཤུབས་ནས་ཕྱུང་ནས་གཙུག་ཕུད་བྲེགས་ཏེ་སྟེང་གི་ནམ་མཁའ་ལ་བོར་བ་དང་ལྷ་རྣམས་ཀྱི་དབང་པོ་བརྒྱ་བྱིན་གྱིས་བླངས་ནས་བཀུར་སྟི་ཆེན་པོ་བྱས་ཏེ་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ནས་གཙུག་ཕུད་ཀྱི་མཆོད་པ་ཆེན་པོ་བཙུགས་སོ།

བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ཕྱོགས་དེར་དབུ་སྐྲ་བླངས་པའི་མཆོད་རྟེན་བརྩིགས་ཏེ་ད་དུང་ཡང་མཆོད་རྟེན་ལ་ཕྱག་བྱེད་པའི་དགེ་སློང་དག་ཕྱག་བྱེད་དོ།།

འདུལ་བ་གཞི།

བམ་པོ་བརྒྱད་བཅུ་བཞི་པ།

བྱང་ཆུབ་སེམས་དཔས་གསུངས་པ།

འདུན་པ་ཇི་སྙམ་དུ་སེམས།

གང་ལ་

འདི་ལྟ་བུའི་བརྟུལ་བ་ཡོད་པ་དེ་ཅིག་ཡང་ཁྱིམ་ན་གནས་པར་འགྱུར་རམ།

ལྷ་མ་ལགས་སོ།

འདུན་པས་བསམས་པ།

གཞོན་ནུ་ནི་རྒྱལ་རིགས་ཀྱི་ང་རྒྱལ་ཅན་ཡིན་པས་འདི་ཕྱིར་བཟློག་པར་མི་ནུས་སོ་སྙམ་མོ།

དེ་ནས་རྟའི་རྒྱལ་པོ་བསྔགས་ལྡན་གྱིས་བྱང་ཆུབ་སེམས་དཔའི་ཞབས་གཉིས་ལ་ལྕེས་བལྡགས་པ་དང་།

བྱང་ཆུབ་སེམས་དཔའི་ཕྱག་འཁོར་ལོ་དང་།

བཀྲ་ཤིས་དང་།

གཡུང་དྲུང་འཁྱིལ་བ་མངའ་བས་བྱུགས་ནས་གསུངས་པ།

བསྔགས་ལྡན་སོང་ཤིག་དང་།

མངོན་པར་རྫོགས་པར་བྱང་ཆུབ་ནས་ཁྱོད་ཀྱི་བྱས་པ་གཟོ་བར་འགྱུར་རོ།

འདུན་པ་ལ་ཡང་གསུངས་པ།

ཁྱོད་ཀྱིས་བསྔགས་ལྡན་ཕོ་བྲང་དུ་མ་བཀྲི་ཤིག །

དེ་སྐད་ཅེས་གསུངས་པ་དང་།

འདུན་པ་སྐད་འཛེར་ཅིང་མིག་མཆི་མས་གང་ནས་རྟའི་རྒྱལ་པོ་བསྔགས་ལྡན་ཁྲིད་དེ་ཡང་དང་ཡང་དུ་བྱང་ཆུབ་སེམས་དཔའ་ལ་བལྟ་ཞིང་སོང་ངོ་།

དེ་གཉིས་ཀྱིས་ཐུན་གཉིས་ཀྱིས་སོན་པའི་ས་གང་ཡིན་པ་དེ་ནས་ཞག་བདུན་གྱིས་ཕྱིར་འཁོར་ཏོ།

འདུན་པས་བསམས་པ།

གལ་ཏེ་ལྷན་ཅིག་ཏུ་དོང་ན་སྨྲེ་སྔགས་ཆེན་པོས་བདག་ཤི་བར་འགྱུར་རོ་སྙམ་ནས་དེས་སྐྱེད་མོས་ཚལ་དུ་འདུག་ནས་བསྔགས་ལྡན་བཏང་ངོ་།

དེས་སྐད་ཕྱུང་བ་དང་ཕོ་བྲང་གི་སྐྱེ་བོ་དང་སྐྱེ་བོའི་ཚོགས་གཞན་གྱིས་ཀྱང་སྐད་དེ་ཤེས་ནས་རེ་སྟེ་ཕྱིར་བྱུང་བ་ལས་བྱང་ཆུབ་སེམས་དཔའ་མ་མཐོང་ནས་བསྔགས་ལྡན་དེའི་མགུལ་དུ་འཇུས་ཏེ་ངུ་བར་བརྩམས་སོ།

འདི་ནི་ཆོས་ཉིད་ཡིན་ཏེ།

དུད་འགྲོའི་སྐྱེ་གནས་སུ་སོང་བའི་སྲོག་ཆགས་ཕལ་པ་གཞན་ལ་ཡང་ཀུན་རྫོབ་ཀྱི་ཤེས་པ་ཡོད་ན་རྟའི་རྒྱལ་པོ་བསྔགས་ལྡན་ལ་ལྟ་སྨོས་ཀྱང་ཅི་དགོས་པས་དེས་སྐྱེ་བོའི་ཚོགས་ཆེན་པོ་སྨྲེ་སྔགས་འདོན་པའི་སྒྲ་ཐོས་ཏེ་དབུགས་ཁོང་དུ་སོང་བ་ཉིད་ཀྱིས་བརྣངས་ཏེ་ཤི་ནས་དེ་སྒྲ་ཅན་གྱི་བྲམ་ཟེ་ལས་དྲུག་ལ་བརྩོན་པ་ཞིག་གི་རིགས་སུ་ཉིང་མཚམས་སྦྱོར་བ་བླངས་སོ།

གང་གི་ཚེ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་བྱང་ཆུབ་པ་དེའི་ཚེ་དེ་ལ་དམུ་རྒོད་ཀྱི་གདམས་པས་གཏམས་ནས་འཁོར་བའི་དགོན་པ་ལས་བསྒྲལ་ཏེ་ཤིན་ཏུ་མཐར་ཕྱིན་པའི་གྲུབ་པ་དང་བདེ་བ་མྱ་ངན་

འདས་པ་ལ་འཇོག་པར་འགྱུར་རོ།

བྱང་ཆུབ་སེམས་དཔའ་ལ་ངུར་སྨྲིག་གིས་དགོས་པ་བྱུང་ནས་གྲོང་ཁྱེར་དཔེ་མེད་དུ་ཁྱིམ་བདག་ཕྱུག་པོ་ནོར་མང་བ།

ལོངས་སྤྱོད་ཆེ་བ།

ཡོངས་སུ་གཟུང་བ་ཡངས་ཤིང་རྒྱ་ཆེ་བ།

རྣམ་ཐོས་ཀྱི་བུའི་ནོར་དང་ལྡན་པ།

རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ།

དེ་དེ་དང་ལྷན་ཅིག་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་དོ།

དེ་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་སོ་ཞེས་བྱ་བ་ནས་དེ་བཞིན་དུ་ཁྱེའུ་བཅུ་བཙས་སོ་ཞེས་བྱ་བའི་བར་དུ་སྟེ།

དེ་དག་ཐམས་ཅད་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ།

དེ་དག་གི་མ་རྒན་མོ་དེས་དེ་དག་ལ་ཤ་ནའི་གོས་དག་ཅིག་བྱིན་པ་དང་།

དེ་རྣམས་ཀྱིས་སྨྲས་པ།

ཡུམ་བདག་ཅག་ཡོངས་སུ་མྱ་ངན་ལས་འདའ་བས་འདི་དག་བདག་ཅག་ལ་མི་དགོས་ཏེ་འོན་ཀྱང་རྒྱལ་པོ་ཟས་གཙང་གི་སྲས་གཞོན་ནུ་ཤཱཀྱ་ཐུབ་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་བ་ཞིག་ཡོད་ཀྱིས་འདི་དག་དེ་ལ་ཕུལ་ཅིག །

དེས་ན་ཁྱོད་ཀྱིས་འབྲས་བུ་ཆེན་པོ་ཐོབ་པར་འགྱུར་རོ་ཞེས་སྨྲས་ནས་འབར་བ་དང་།

གསལ་བ་དང་།

ཆར་འབེབས་པ་དང་།

གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ།

རྒན་མོ་དེས་ཀྱང་འཆི་ཁར་གོས་དེ་དག་བུ་མོ་ལ་གཏད་ནས་ཇི་ལྟར་གྱུར་པ་རྣམས་སྨྲས་སོ།

དེའི་བུ་མོ་དེ་ཡང་ནད་ཀྱིས་ཐེབས་ཏེ་འཆི་བར་ཤེས་ནས་དེས་ཀྱང་ཤིང་དྲུང་ཞིག་ཏུ་བཞག་ནས་ཤིང་དེ་ལ་གནས་པའི་ལྷ་གང་ཡིན་པ་དེ་ལ་ཁྱོད་ཀྱིས་འདི་དག་རྒྱལ་པོ་ཟས་གཙང་གི་སྲས་ལ་ཕུལ་ཅིག་ཅེས་གསོལ་བ་བཏབ་བོ།

ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་དེ་དག་ཤེས་ནས་བླངས་ཏེ།

དེ་ནས་རྔོན་པ་རྒས་འཁོགས་པ་ལྟ་བུ་ཞིག་ཏུ་བདག་ཉིད་མངོན་པར་སྤྲུལ་ནས་དེ་དག་བགོས་ཏེ་ལག་ན་མདའ་གཞུ་ཐོགས་ནས་བྱང་ཆུབ་སེམས་དཔའ་གཤེགས་པའི་

ལམ་ཀར་བསྡད་པ་དང་།

བྱང་ཆུབ་སེམས་དཔའ་ཡང་རིམ་གྱིས་ལམ་དེར་བྱོན་ནས་རྔོན་པ་ལག་ན་མདའ་གཞུ་ཐོགས་ཤིང་གོས་ངུར་སྨྲིག་གྱོན་པ་ཞིག་གཟིགས་སོ།

གཟིགས་ནས་ཀྱང་མི་དེ་ལ་གསུངས་པ།

ཀྭའི་ནང་རྗེ་ཤ་ནའི་གོས་འོ་ནི་དག་ནི་རབ་ཏུ་བྱུང་བ་ལ་འཚམ་པ་ཡིན་གྱིས།

ཀ་ཤི་ཀའི་རས་ཕྲན་འདི་དག་ཁྱེར་ལ་འོ་ནི་དག་ང་ལ་བྱིན་ཅིག་དེས་གསོལ་པ།

གཞོན་ནུ་བདག་ལ་གཞན་དག་ཁྱོད་ཀྱིས་རྒྱལ་བུ་གཞོན་ནུ་བཀྲོངས་ནས་ཀ་ཤི་ཀའི་རས་ཕྲན་གྱི་གོས་འདི་དག་བླངས་སོ་ཞེས་གཞི་དེས་གཡར་མཆི་བར་འགྱུར་ལགས་པས་བདག་འདི་དག་མི་འབུལ་ལོ།

བྱང་ཆུབ་སེམས་དཔས་གསུངས་པ།

ཀྱེ་ནང་རྗེ་ང་ནི་མཐུ་ཇི་ལྟ་བུ་དང་ལྡན་པ་འཇིག་རྟེན་ཐམས་ཅད་ཀྱིས་ཤེས་ཏེ་སུ་ཞིག་གིས་ང་དགྲོངས་པར་ནུས།

ཁྱོད་ཀྱིས་ང་དགྲོངས་པར་སུ་ཞིག་ཡིད་ཆེས་ཀྱིས་བག་ཚ་བ་མེད་པར་བྱིན་ཅིག །

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཤ་ནའི་གོས་དག་ཕུལ་ཏེ་ཀ་ཤི་ཀའི་རས་ཕྲན་རྣམས་བླངས་སོ།

བྱང་ཆུབ་སེམས་དཔའི་སྐུ་དང་ཤ་ནའི་གོས་དེ་དག་འཚམ་པར་མ་གྱུར་པ་དང་དེ་འདི་སྙམ་དུ་དགོངས་ཏེ།

ཀྱེ་མའོ་ཤ་ནའི་གོས་རྣམས་བདག་གི་སྐུ་དང་འཚམ་པར་གྱུར་ཅིག་སྙམ་ནས་ཚིག་ཏུ་སྨྲས་མ་ཐག་ཏུ་ཤ་ནའི་གོས་དེ་དག་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང་།

ལྷ་རྣམས་ཀྱི་ལྷའི་མཐུས་བྱང་ཆུབ་སེམས་དཔའི་སྐུ་དང་འཚམ་པར་གྱུར་ཏོ།

བྱང་ཆུབ་སེམས་དཔས་དགོངས་པ།

ད་ནི་བདག་རབ་ཏུ་བྱུང་ཟིན་གྱིས།

འགྲོ་བ་རྣམས་རྗེས་སུ་གཟུང་བར་བྱའོ་སྙམ་མོ།

དེ་ནས་བྱང་ཆུབ་སེམས་དཔའི་ཀ་ཤི་ཀའི་རས་ཕྲན་གྱི་གོས་དེ་དག་ལྷ་རྣམས་ཀྱི་དབང་པོ་བརྒྱ་བྱིན་གྱིས་བླངས་ནས་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཀ་ཤི་ཀའི་མཆོད་པ་ཆེན་པོ་བཙུགས་སོ།

བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ཀྱང་ཕྱོགས་དེར་ངུར་སྨྲིག་བླངས་པ་ཞེས་བྱ་བའི་མཆོད་རྟེན་བརྩིགས་ཏེ་ད་དུང་དུ་ཡང་མཆོད་རྟེན་ལ་ཕྱག་འཚལ་བའི་དགེ་སློང་དག་ཕྱག་བྱེད་དོ།

དེ་ནས་བྱང་ཆུབ་སེམས་དཔའ་

དབུ་སྐྲ་བྲེགས་ཤིང་ན་བཟའ་ངུར་སྨྲིག་མནབས་ཏེ་དཀའ་ཐུབ་ཀྱི་ནགས་སུ་ཕན་ཚུན་རྒྱུ་ཞིང་དྲང་སྲོང་ངན་སྤོང་གི་བུའི་བསྟི་གནས་སུ་གཤེགས་པ་དང་།

དེའི་ཚེ་དྲང་སྲོང་ངན་སྤོང་གི་བུ་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་པ་དེ་ལྟ་བུ་དེ་བྱང་ཆུབ་སེམས་དཔས་གཟིགས་ནས་གསུངས་པ་དྲང་སྲོང་ཆེན་པོ་ཅིའི་ཕྱིར་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག །

དེས་གསོལ་པ།

བདག་གི་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང་།

མེ་ཏོག་དང་།

འབྲས་བུ་ཆགས་པ་ལས་དེ་རྣམས་སྔ་མཁོ་བཞིན་དུ་མ་གྱུར་ཏོ།

བྱང་ཆུབ་སེམས་དཔས་གསུངས་པ།

དྲང་སྲོང་ཆེན་པོ་གང་གི་མཐུས་བསྟི་གནས་འདི་ནི་ཤིང་ཏ་ལ་རྣམས་གསེར་གྱི་ལོ་མ་དང་།

མེ་ཏོག་དང་།

འབྲས་བུར་ལྡན་པ་དེ་རྒ་བ་དང་།

ན་བ་དང་།

འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པས་སོ།

གལ་ཏེ་དེས་རྒ་བ་དང་།

ན་བ་དང་།

འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པར་མ་གྱུར་ན།

སྐྱེད་མོས་ཚལ་འདི་དེའི་ཡིན་པར་འགྱུར་བ་ཞིག །

དེ་སྐད་ཅེས་གསུངས་པ་དང་།

དྲང་སྲོང་ཆེན་པོ་ངན་སྤོང་གི་བུས་བྱང་ཆུབ་སེམས་དཔའ་ལ་བརྟག་པར་བརྩམས་སོ།

དེ་ནས་གཟུགས་བཟང་ཞིང་ཞི་བའི་ཆ་བྱད་དུ་མཐོང་ནས་ཡུན་རིང་དུ་བརྟགས་ཏེ་ངོ་མཚར་སྐྱེས་ནས་གསོལ་པ།

ཀྱེ་རབ་ཏུ་བྱུང་བ་དེ་ཁྱོད་ཁོ་ན་མ་ལགས་གྲང་།

བྱང་ཆུབ་སེམས་དཔས་གསུངས་པ།

དྲང་སྲོང་ཆེན་པོ་དེ་ལྟར་ངེས་སོ།

ད་ནས་ངན་སྤོང་གི་བུ་ཡ་མཚན་སྐྱེས་པའི་མིག་བགྲད་དེ་བལྟས་ནས།

བྱང་ཆུབ་སེམས་དཔའ་ཐོག་མར་གདན་ལ་སྤྱན་དྲངས་ཏེ་མེ་ཏོག་དང་།

འབྲས་བུ་བསྟབས་སོ།

དེ་ལྟར་ཀུན་དུ་དགྱེས་པར་བྱས་པ་དང་བྱང་ཆུབ་སེམས་དཔས་སྐད་ཅིག་གཅིག་བཞེས་ནས་གསུངས་པ།

དྲང་སྲོང་ཆེན་པོ་འདི་ནས་གྲོང་ཁྱེར་སེར་སྐྱའི་གཞིར་ཇི་སྲིད་ཡོད།

དེས་གསོལ་པ།

དཔག་ཚད་བཅུ་གཉིས་མཆིས་སོ།

བྱང་ཆུབ་སེམས་དཔས་དགོངས་པ།

གྲོང་ཁྱེར་སེར་སྐྱའི་གཞི་ཉེའོ།

འདིར་གནས་པ་ནི་རུང་བ་མ་ཡིན་ཏེ།

ཤཱཀྱ་རྣམས་ཀྱིས་གྲོང་གི་འཁྲུག་པ་བྱེད་པར་འགྱུར་གྱིས།

མ་ལ་བདག་གང་གཱ་རྒལ་ལོ་སྙམ་ནས་དེ་གང་གཱ་རྒལ་ནས་མཐར་གྱིས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ཏོ།

བྱང་ཆུབ་སེམས་དཔའ་ནི་བཟོའི་གནས་དང་།

ལས་ཀྱི་གནས་དེ་དང་།

དེ་རྣམས་ལ་མཁས་པ་ཡིན་པས་དེས་ཤིང་ཀ་ར་བཱི་རའི་ལོ་མ་ལས་ལྷུང་བཟེད་བྱས་ནས་སྤྱོད་ལམ་ཞི་བས་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་སོ།

དེའི་ཚེ་རྒྱལ་པོ་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞི་ན་འདུག་པ་དེས་དེ་འགྲོ་བ་དང་།

ལྡོག་པ་དང་།

ལྟ་བ་དང་།

རྣམ་པར་ལྟ་བ་དང་།

བསྐུམ་པ་དང་།

བརྐྱང་བ་དང་།

ཆོས་གོས་སྣམ་སྦྱར་དང་།

ལྷུང་བཟེད་ཐོགས་པ་མཛེས་པས་བསོད་སྙོམས་སྤྱོད་པ་མཐོང་ངོ་།

མཐོང་ནས་ཀྱང་འདི་སྙམ་དུ་སེམས་ཏེ།

རྒྱལ་པོའི་ཁབ་ན་རབ་ཏུ་བྱུང་བ་ཇི་སྙེད་ཅིག་གནས་པ་ལ་ཇི་ལྟར་རབ་ཏུ་བྱུང་བ་འདིའི་སྤྱོད་ལམ་དེ་ལྟ་བུ་ནི་འགའ་ཡང་མེད་དོ་སྙམ་ནས་འདིར་སྨྲས་པ།

ཇི་ལྟར་མིག་ཅན་འགྲོ་བ་ལྟར།

རབ་ཏུ་བྱུང་བ་བསྒྲགས་པར་བྱ།

འདི་ནི་བརྟགས་པར་མཛད་ནས་སུ།

རབ་ཏུ་བྱུང་བ་ཡང་དག་བཞེད།

ཁྱིམ་གནས་འདི་ནི་སྡུག་བསྔལ་ཏེ།

འདི་ནི་རྡུལ་གྱི་གནས་ཡིན་ཞིང་།

རབ་ཏུ་བྱུང་བ་བར་སྣང་ལྟར།

མཁྱེན་ནས་དེ་ཚེ་རབ་ཏུ་བྱུང་།

རབ་ཏུ་བྱུང་ནས་སྐུ་ཡི་ནི།

སྡིག་པའི་ལས་ནི་སྤངས་པ་དང་།

གསུང་གི་སྡིག་པ་སྤངས་ནས་ནི།

འཚོ་བ་ཀུན་ནས་དག་པར་མཛད།

དེ་ནས་མ་ག་དྷཱ་ཡི་ནི།

གྲོང་མཆོག་རྒྱལ་པོའི་ཁབ་གཤེགས་ནས།

མགོན་པོ་ཤེས་བཞིན་དྲན་ལྡན་པས།

བསོད་སྙོམས་ཕྱིར་ནི་གཤེགས་པ་དེ།

བཟོ་སྦྱངས་མ་ག་དྷཱ་ཡི་བདག །

ཁང་བཟངས་ན་ནི་འདུག་པས་མཐོང་།

མཐོང་ནས་སེམས་དད་དེ་ནས་ནི།

བློན་པོ་རྣམས་ལ་འདི་སྐད་སྨྲས།

མཚན་མཆོག་གི་ནི་རྒྱས་གྱུར་ཅིང་།

ཁོ་ལག་ཕུན་སུམ་ཚོགས་པ་དང་།

གཉའ་ཤིང་གང་དུ་ལྟ་བ་ཡི།

འདི་ལ་ཤེས་ལྡན་དག་ལྟོས་ཤིག །

སྤྱན་མི་འདེག་ལ་ཡིད་གཞུངས་ཤིང་།

དམན་པའི་རིགས་ལས་མ་འཁྲུངས་འདི།

གང་དུ་གནས་པར་གཤེགས་གྱུར་

པ།

རྒྱལ་པོས་ཕོ་ཉ་རྗེས་བཞིན་བཏང་།

དེ་ནས་ཕོ་ཉ་ལ་བསྒོ་བ།

དགེ་སློང་དེ་ནི་གར་འགྲོ་ཞིང་།

གང་དུ་གནས་ནི་བཏབ་པ་ཡི།

རྗེས་བཞིན་དུ་ནི་འབྲང་བར་གྱིས།

དེ་ནི་བསོད་སྙོམས་གཤེགས་པ་ན།

སྒོ་དྲུག་ལེགས་པར་བསྡམས་ནས་ནི།

ཤེས་བཞིན་དྲན་དང་ལྡན་པ་ཡིས།

ལྷུང་བཟེད་མྱུར་དུ་གང་བར་མཛད།

བསོད་སྙོམས་སྤྱད་པ་བྱས་ནས་ཀྱང་།

ཐུབ་པ་གྲོང་ཁྱེར་ཕྱིར་བྱུང་ནས།

སྐྱ་བསེང་ལས་ནི་མངོན་གཤེགས་ཏེ།

དེ་ལ་གནས་ནི་བཏབ་པར་གྱུར།

གནས་བཏབ་པ་ནི་ཤེས་ནས་ཀྱང་།

ཕོ་ཉ་གཅིག་གིས་བསྡད་བྱས་ནས།

གཞན་ནི་མྱུར་དུ་སླར་ལོག་སྟེ།

རྒྱལ་པོ་ལ་ནི་ཚིག་སྨྲས་པ།

རྒྱལ་པོ་ཆེན་པོ་དགེ་སློང་དེ།

སེང་གེའམ་སྟག་གི་ཕྲུ་གུ་དང་།

རི་སུལ་དག་ན་གནས་པ་ལྟར།

སྐྱ་བསེང་གི་ནི་སྟེང་ན་གནས།

ཕོ་ཉ་རྣམས་ཀྱི་ཚིག་ཐོས་ནས།

ས་བདག་ཤིང་དྲུང་ཞུགས་ནས་ནི།

དེ་ནི་བློན་པོས་ཡོངས་བསྐོར་ནས།

མྱུར་དུ་ཁོ་ནར་དོང་བར་གྱུར།

བཞོན་པས་བགྲོད་པའི་སར་ཞོན་ཏེ།

དེ་ནི་བཞོན་པ་ལས་བབ་ནས།

རྐང་གིས་ཉེ་བར་སོང་ནས་ནི།

དེ་ནས་དེ་བཞིན་གཤེགས་པ་མཐོང་།

རྒྱལ་པོས་འདུག་ནས་དགྱེས་པ་དང་།

མགུ་བར་འགྱུར་བའི་གཏམ་གསོལ་ནས།

དེ་ནི་མ་ཁེངས་མི་བརླང་བར།

དོན་འདི་དག་ནི་རབ་སྨྲས་སོ།

དགེ་སློང་ལང་ཚོ་དང་པོ་ལ།

བང་བར་ཡང་དག་གནས་གྱུར་ཅིང་།

འདི་འདྲ་གཟི་བརྗིད་ལྡན་པ་ལ།

བསོད་སྙོམས་སྤྱོད་པ་མཛེས་མ་ལགས།

ཁང་པ་ཉམས་དགའ་དག་དང་ནི།

བུད་མེད་རྒྱན་གྱིས་བརྒྱན་པ་དང་།

ལོངས་སྤྱོད་མཆོག་ནི་ཁྱོད་གསོལ་ན།

ཉིད་ཀྱི་གདུང་ནི་ཞུ་ཡིས་གསུངས།

རྒྱལ་པོ་གངས་རི་ཉེ་བ་ན།

ཡུལ་གྱི་ལྗོངས་ནི་ནོར་དག་དང་།

འབྲུ་དག་གིས་ནི་གང་གྱུར་པ།

ཀོ་ས་ལ་ཞེས་གྲགས་པ་ཡོད།

བུ་རམ་ཤིང་པ་ཉི་མའི་རུས།

ཤཱཀྱ་དག་ནི་དེ་ན་གནས།

རྒྱལ་པོ་ངའི་རིགས་རྒྱལ་རིགས་ཏེ།

ང་ནི་འདོད་པ་དོན་མི་གཉེར།

ས་འདི་རི་དང་བཅས་ཤིང་རྒྱ་མཚོར་བཅས།

རིན་ཆེན་ཀུན་དང་ལྡན་པ་བསྐྱངས་གྱུར་ཀྱང་།

མི་ནི་ནམ་ཡང་ངོམས་པར་མི་འགྱུར་ཏེ།

སོ་ག་ཚ་དུས་ཤིང་གིས་མེ་བཞིན་ནོ།

འདོད་པ་རྣམས་ནི་ཤ་ཁོ་ན་འབྲེལ་ཅེས་གསུངས།

མི་དབང་རྒལ་བར་དཀའ་ཞིང་འདམ་རྫབ་འདྲ།

སྡུག་བསྔལ་དང་ནི་མྱ་ངན་འཇིགས་པ་ཡི།

རྩ་བའི་གཙོ་སྟེ་བློ་ངན་རྣམས་ཀྱིས་བསྟན།

རྒྱལ་པོ་ངས་ནི་བྱུང་མ་ཐག་ཏུ་ཡང་།

འདོད་པ་རྣམས་ལ་མི་དགའི་བློ་བསྐྱེད་ན།

འཇིགས་བྱེད་ཆོས་ཀྱི་དགྲ་བོར་གྱུར་པ་དག །

བོར་བ་དེ་ཁོ་སླར་ཡང་ཇི་ལྟར་བླང་།

རྩེ་མོ་སྣ་ཚོགས་ཡངས་པར་གྱུར་པ་ཡི།

ལྷུན་པོ་གངས་ཅན་རླུང་གིས་བསྐྱོད་སྲིད་ཀྱི།

ང་ཡི་བློ་ནི་ཐར་པ་ལ་བརྟེན་པ།

འདོད་པའི་ཤུགས་ཀྱིས་བསྐྱོད་པར་མི་ནུས་སོ།

འཇིག་རྟེན་འདི་ནི་འདོད་པར་བྱིང་གྱུར་ནས།

འཁོར་བའི་འཁོར་ལོས་ཡོངས་སུ་འཁྱམ་པ་ལ།

མི་དབང་ང་སྐྱབས་ཡིན་ཏེ་གཞན་མེད་པས།

འཇིགས་པ་ཆེ་ལས་དེ་ནི་ཐར་བར་བྱ།

འདོད་པ་རྣམས་ཀྱི་ཉེས་དམིགས་མཁྱེན།

མྱ་ངན་འདས་པ་ཞི་བ་གཟིགས།

སྤང་ཕྱིར་གང་དུ་ང་ཡི་ཡིད།

དགའ་བ་དག་ཏུ་འགྲོ་བར་བྱ།

རྒྱལ་པོ་གཟུགས་ཅན་སྙིང་པོས་གསོལ་པ།

ཀྱེ་རབ་ཏུ་བྱུང་བ་བརྟུལ་ཞུགས་འདིས།

ཅི་ཞིག་དོན་དུ་གཉེར།

དེས་གསུངས་པ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ།

རྒྱལ་པོས་གསོལ་པ།

ཀྱེ་རབ་ཏུ་བྱུང་བ་གང་གི་ཚེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་གྱུར་པ་དེའི་ཚེ་བདག་ལ་ཡང་དགོངས་ཤིག །

བྱང་ཆུབ་སེམས་དཔས་གསུངས་པ།

དེ་བཞིན་དུ་བསམ་པར་བྱའོ་ཞེས་གསུངས་ནས།

རྒྱལ་པོའི་ཁབ་ནས་བྱུང་སྟེ་བྱ་རྒོད་ཀྱི་ཕུང་པོའི་རི་དང་ཧ་ཅང་ཡང་མི་རིང་བར་དྲང་སྲོང་རྣམས་ཀྱི་བསྟི་གནས་དེར་གཤེགས་སོ།

དེ་རྣམས་སྤྱོད་པ་དང་གནས་པས་བསམ་གཏན་ལ་བརྩོན་པར་གནས་ཏེ།

དེ་རྣམས་གང་གི་ཚེ་རྐང་པ་གཅིག་གིས་ཉིན་ཐུན་གཅིག་འགྲེང་བ་དེའི་ཚེ་བྱང་ཆུབ་སེམས་དཔའ་ཐུན་གཉིས་སུ་བཞེངས་སོ།

གལ་ཏེ་དེ་རྣམས་གདུང་བ་ལྔའི་སྦྱོར་བས་ཉིན་ཐུན་གཅིག་འདུག་པ་དེའི་ཚེ་བྱང་ཆུབ་སེམས་དཔས་ཀྱང་སྦྱོར་བ་དེས་ཐུན་གཉིས་སུ་

བཞུགས་སོ།

དེ་ནས་དེ་རྣམས་ཡ་མཚན་སྐྱེས་ནས་དགེ་སྦྱོང་འདི་ནི་ཆེན་པོ་ཞིག་གོ་ཞེས་སྨྲས་པས་དགེ་སྦྱོང་ཆེན་པོ་དགེ་སྦྱོང་ཆེན་པོ་ཞེས་བྱ་བར་གྱུར་ཏོ།

བྱང་ཆུབ་སེམས་དཔས་དེ་རྣམས་ལ་སྨྲས་པ།

ཤེས་ལྡན་དག་ཁྱེད་བརྟུལ་ཞུགས་འདིས་ཅི་ཞིག་དོན་དུ་གཉེར།

དེ་ན་ཁ་ཅིག་གིས་གསོལ་པ།

བརྒྱ་བྱིན་ཉིད་དོ།

ཁ་ཅིག་གིས་གསོལ་པ།

བདག་ཅག་ནི་ཚངས་པ་ཉིད་དོ།

ཁ་ཅིག་གིས་གསོལ་པ།

བདུད་ཉིད་དོ།

བྱང་ཆུབ་སེམས་དཔས་དགོངས་པ།

དྲང་སྲོང་འདི་དག་ནི་སླར་ལྟུང་བ་ལམ་ལོག་པར་ཞུགས་པ་སྟེ།

ལམ་དེ་ནི་ནུས་པ་མ་ཡིན་ནོ་སྙམ་ནས་དེ་སྒྱུ་རྩལ་ཤེས་ཀྱི་བུ་རིང་དུ་འཕུར་གང་ན་བ་དེར་གཤེགས་ཏེ་བྱོན་པ་དང་།

སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་གསུངས་སོ།

རིང་དུ་འཕུར་གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་དྲུང་དུ་ཁོ་བོ་ཚངས་པར་སྤྱོད་པ་སྤྱད་དོ།

དེས་སྨྲས་པ།

ཚེ་དང་ལྡན་པ་གཽ་ཏ་མ་བདག་ལ་མི་བདེ་བ་མེད་ཀྱིས།

ཁྱོད་ཅི་བདེ་བ་ཁོ་ནར་བཞུགས་ཤིག །

བྱང་ཆུབ་སེམས་དཔས་གསུངས་པ།

རིང་དུ་འཕུར་ཁྱོད་ཀྱིས་ཆོས་ཇི་སྙེད་ཅིག་རྟོགས་པར་གྱུར།

དེས་གསོལ་པ།

ཚེ་དང་ལྡན་པ་གཽ་ཏ་མ་ཅི་ཡང་མེད་པའི་སྐྱེ་མཆེད་ཀྱི་བར་དུའོ།

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

སྒྱུ་རྩལ་ཤེས་ཀྱི་བུ་རིང་དུ་འཕུར་དད་པ་དེ་ལ་ནི་ང་ཡང་དད་ལ།

སྒྱུ་རྩལ་ཤེས་ཀྱི་བུ་རིང་དུ་འཕུར་ལ་བརྩོན་འགྲུས་དང་།

དྲན་པ་དང་།

ཏིང་ངེ་འཛིན་དང་།

ཤེས་རབ་ཡོད་པ་ལྟར་བདག་ལ་ཡང་བརྩོན་འགྲུས་དང་།

དྲན་པ་དང་།

ཏིང་ངེ་འཛིན་དང་།

ཤེས་རབ་ཡོད་པས་སྒྱུ་རྩལ་ཤེས་ཀྱི་བུ་རིང་དུ་འཕུར་གྱིས་ཅི་ཡང་མེད་པའི་སྐྱེ་མཆེད་ཀྱི་བར་དུ་ཆོས་དེ་སྙེད་མངོན་སུམ་དུ་བྱས་ན།

ཅིའི་ཕྱིར་བདག་གིས་ཀྱང་ཆོས་འདི་དག་མངོན་སུམ་དུ་མི་བྱ་སྙམ་ནས།

དེ་ནས་བྱང་ཆུབ་སེམས་དཔས་ཆོས་དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང་།

མ་རྟོགས་པ་རྟོགས་པར་བྱ་བའི་ཕྱིར་དང་།

མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ་བག་ཡོད་པ།

རྟུན་པ་དང་ལྡན་པ།

བདག་ཉིད་གཏོད་པར་གནས་ཏེ་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ།

བདག་ཉིད་

གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་དག་མངོན་སུམ་དུ་མཛད་པར་གྱུར་ཏོ།

ཆོས་དེ་དག་མངོན་སུམ་དུ་མཛད་ནས་ཡང་སྒྱུ་རྩལ་ཤེས་ཀྱི་བུ་རིང་དུ་འཕུར་གང་ན་བ་དེར་གཤེགས་ཏེ་བྱོན་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་གསུངས་སོ།

རིང་དུ་འཕུར་ཁྱོད་ཀྱིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་འདི་དག་རང་གི་མངོན་པར་ཤེས་པས་མངོན་སུམ་དུ་བྱས་སམ།

དེས་འདི་སྐད་ཅེས་སྨྲས་སོ།

ཚེ་དང་ལྡན་པ་གཽ་ཏ་མ་མད་དེ།

བདག་གིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་མངོན་སུམ་དུ་བྱས་སོ།

བྱང་ཆུབ་སེམས་དཔས་གསུངས་པ།

ཚེ་དང་ལྡན་པ་རིང་དུ་འཕུར་བདག་གིས་ཀྱང་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་རང་གི་མངོན་པར་ཤེས་པས་མངོན་སུམ་དུ་བྱས་སོ།

ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ།

བདག་གི་ཇི་ཙམ་པ་ཁྱོད་ཀྱི་ཡང་དེ་ཙམ་པས་དོན་འདི་ལའོ་སྐོལ་མཚུངས་ཤིང་མཉམ་སྟེ་འདྲ་བར་ཐོབ་ཀྱིས་ཚུར་སྤྱོན་འོ་སྐོལ་གཉི་གས་འཁོར་འདི་ཡོངས་སུ་དྲང་བར་བགྱིའོ།

དེ་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་བྱང་ཆུབ་སེམས་དཔའི་ཐོག་མའི་སློབ་དཔོན་ཉིད་ཀྱིས་བྱང་ཆུབ་སེམས་དཔའ་ལ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་དོ།

དེའི་རྟོགས་པ་དག་ལ་ཡང་དགའ་བ་དང་མགུ་བར་གྱུར་ཏོ།

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

ལམ་འདི་ནི་ཤེས་པར་ནུས་པ་མ་ཡིན།

མཐོང་བར་ནུས་པ་མ་ཡིན།

བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ།

དེ་ནས་བྱང་ཆུབ་སེམས་དཔས་ལམ་དེ་ནུས་པ་མེད་པར་རིག་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་ནས་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ།

ལྷག་སྤྱོད་གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་དྲུང་དུ་ང་ཚངས་པར་སྤྱོད་པ་སྤྱད་དོ།

དེས་གསོལ་པ་ཚེ་དང་ལྡན་པ་གཽ་ཏ་མ་བདག་ལ་མི་བདེ་བ་མེད་ཀྱིས་ཁྱོད་ཅི་བདེ་བ་ཁོ་ནར་བཞུགས་ཤིག །

ཁྱོད་ཀྱིས་ཆོས་ཇི་སྙེད་ཅིག་མངོན་སུམ་དུ་བྱས་ཚེ་དང་ལྡན་པ་གཽ་ཏ་མ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་

ཀྱི་བར་དུའོ།

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

རངས་བྱེད་ཀྱི་བུ་ལྷག་སྤྱོད་དད་པ་ལ་ནི་བདག་ཀྱང་དད་ལ་རངས་བྱེད་ཀྱི་བུ་ལྷག་སྤྱོད་ལ་བརྩོན་འགྲུས་དང་།

དྲན་པ་དང་།

ཏིང་ངེ་འཛིན་དང་།

ཤེས་རབ་ཡོད་པ་ལྟ་བུའི་བརྩོན་འགྲུས་དང་།

དྲན་པ་དང་།

ཏིང་ངེ་འཛིན་དང་།

ཤེས་རབ་ནི་བདག་ལ་ཡོད་ན་རངས་ཁྱེད་ཀྱི་བུ་ལྷག་སྤྱོད་ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་སྙེད་ཅིག་མངོན་སུམ་དུ་བྱས་ན་བདག་གིས་ཀྱང་ཅིའི་ཕྱིར་ཆོས་འདི་དག་མངོན་སུམ་དུ་མི་བྱ་སྙམ་མོ།

དེ་ནས་བྱང་ཆུབ་སེམས་དཔས་ཆོས་དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང་།

མ་རྟོགས་པ་རྟོགས་པར་བྱ་བའི་ཕྱིར་དང་།

མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ།

བདག་ཉིད་གཏོད་པར་གནས་ཏེ།

གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ།

བདག་ཉིད་གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་མངོན་སུམ་དུ་མཛད་པར་གྱུར་ཏོ།

ཆོས་དེ་མངོན་སུམ་དུ་མཛད་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་པ་དང་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ།

ལྷག་སྤྱོད་ཁྱོད་ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་དུ་ཆོས་འདི་དག་རང་གིས་མངོན་སུམ་དུ་བྱས་སམ།

ཚེ་དང་ལྡན་པ་གཽ་ཏ་མ་མད་ལགས་ཏེ་བདག་གིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་མངོན་སུམ་དུ་བགྱིས་སོ།

བྱང་ཆུབ་སེམས་དཔས་གསུངས་པ།

ཚེ་དང་ལྡན་པ་ལྷག་སྤྱོད་བདག་གིས་ཀྱང་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་རང་གིས་མངོན་སུམ་དུ་བྱས་སོ།

ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ།

བདག་གི་ཇི་ཙམ་པ་ཁྱོད་ཀྱི་ཡང་དེ་ཙམ་པས་དོན་འདི་ལ་འོ་སྐོལ་མཚུངས་ཤིང་མཉམ་སྟེ་འདྲ་བ་ཐོབ་ཀྱིས་ཚུར་སྤྱོན་འོ་སྐོལ་གཉི་གས་ཚོགས་འདི་ཡོངས་སུ་དྲང་བར་བགྱིའོ།

དེ་ནས་རངས་བྱེད་ཀྱི་བུ་ལྷག་སྤྱོད་བྱང་ཆུབ་སེམས་དཔའི་ཐོག་མའི་སློབ་དཔོན་གྱིས་བྱང་ཆུབ་སེམས་དཔའ་ལ་རྗེད་པ་དམ་པས་རྗེད་ཅིང་མཆོད་པའི་དམ་

པས་མཆོད་དོ།

དེའི་ཤེས་པ་རྣམས་ལ་ཡང་དགའ་བ་དང་མགུ་བར་གྱུར་ཏོ།

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

ལམ་འདི་ནི་ཤེས་པར་ནུས་པ་མ་ཡིན།

མཐོང་བར་ནུས་པ་མ་ཡིན།

བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ།

དེ་ནས་བྱང་ཆུབ་སེམས་དཔའ་ལམ་དེ་ཡང་ནུས་པ་མེད་པར་རིག་ནས་གཤེགས་སོ།

རྒྱལ་པོ་ཟས་གཙང་བུའི་མྱ་ངན་གྱིས་རྟག་ཏུ་གདུངས་ནས་བྱང་ཆུབ་སེམས་དཔའ་བཙལ་བའི་ཕྱིར་ཕོ་ཉ་བཏང་བ་ལས།

དེས་ཇི་ལྟར་གཞོན་ནུ་དོན་ཐམས་ཅད་གྲུབ་པ་རངས་བྱེད་ཀྱི་བུ་ལྷག་སྤྱོད་དང་ལྷན་ཅིག་བཞུགས་པ་ལས་རྒྱལ་པོའི་ཁབ་ནས་ཕྱིར་བྱུང་སྟེ་རིམ་གྲོ་པ་མེད་པར་འཁྱམ་མོ་ཞེས་ཐོས་སོ།

ཐོས་ནས་རིམ་གྲོ་བྱེད་པ་སུམ་བརྒྱ་བཏང་ངོ་།

གྲོང་ཁྱེར་ལྷས་བསྟན་དུ་ཤཱཀྱ་ལེགས་པར་རབ་སད་ཀྱིས་ཀྱང་དེ་བཞིན་དུ་ཐོས་ནས་དེས་ཀྱང་རིམ་གྲོ་བྱེད་པ་ཉིས་བརྒྱ་བཏང་ངོ་།

དེ་ནས་བྱང་ཆུབ་སེམས་དཔའ་རིམ་གྲོ་པ་ལྔ་བརྒྱས་ཡོངས་སུ་བསྐོར་ནས་དཀའ་ཐུབ་ཀྱི་ནགས་སུ་རྒྱུ་བ་ན་དེས་དགོངས་པ།

དཀའ་ཐུབ་ཀྱི་ནགས་གང་བར་སྤྱོད་ཅིང་གནས་པས་ན་བདུད་རྩི་ཐོབ་པར་མི་ནུས་ཀྱིས།

མ་ལ་བདག་གིས་རིམ་གྲོ་བྱེད་པ་ལྔ་ཞིག་བླངས་ལ་ལྷག་མ་ནི་དགྱེའོ་སྙམ་ནས་དེས་ཡུམ་གྱི་ཕྱོགས་ལས་གཉིས།

ཡབ་ཀྱི་ཕྱོགས་ནས་གསུམ་ཁྲིད་དེ།

དེ་རྣམས་ཀྱིས་དེའི་རིམ་གྲོ་བྱེད་དོ།

དེ་ནས་བྱང་ཆུབ་སེམས་དཔའ་རིམ་གྲོ་པ་ལྔས་ཡོངས་སུ་བསྐོར་ཏེ་ག་ཡཱའི་ལྷོ་ཕྱོགས་ན་ལྟེང་རྒྱས་འོད་སྲུང་གི་སྡེའི་གྲོང་རྡལ་གང་ན་བ་དེར་རྒྱུ་ཞིང་གཤེགས་ཏེ་བྱོན་ནས་དེ་ཕན་ཚུན་དུ་འཆག་པ་ན་ས་ཕྱོགས་དགའ་དགའ་ལྟར་འདུག་པ།

ནགས་ཚང་ཚིང་མཛེས་པ།

ཆུ་ཀླུང་ནཻ་རཉྫ་ན་བསིལ་བར་འབབ་པ།

གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང་ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་གཟིགས་སོ།

གཟིགས་ནས་ཀྱང་འདི་སྙམ་དུ་དགོངས་ཏེ།

ཀྱེ་མའོ་ས་ཕྱོགས་འདི་ནི་དགའ་དགའ་ལྟར་འདུག་པ།

ནགས་ཚང་ཚིང་མཛེས་པ།

ཆུ་ཀླུང་ནཻ་རཉྫ་ན་བསིལ་བར་འབབ་པ།

གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང་།

ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་སྟེ།

ཀྱེ་མ་སྤོང་བ་དོན་དུ་གཉེར་བའི་རིགས་ཀྱི་བུས་ནགས་ཁྲོད་འདིར་བརྟེན་ན་སྤོང་བ་བྱ་བར་ནུས་སོ།

བདག་སྤོང་བ་དོན་དུ་གཉེར་བ་ཡིན་པས་མ་ལ་བདག་གིས་ཀྱང་ནགས་ཁྲོད་འདིར་བརྟེན་ལ་སྤོང་བ་བྱའོ་སྙམ་མོ།

དེ་ནས་བྱང་ཆུབ་སེམས་དཔའ་ནགས་ཁྲོད་དུ་ཞུགས་ཏེ་ཤིང་ཞིག་གི་དྲུང་དུ་བཞུགས་ནས་ཚེམས་ལ་ཚེམས་གཏད།

ལྗགས་རྐན་ལ་བཅར་ནས་ཐུགས་ཀྱིས་ཐུགས་མངོན་དུ་བཟུང་།

མངོན་དུ་བསྡམས།

ཤིན་ཏུ་མངོན་དུ་བསྡམས་སོ།

དེ་ཐུགས་ཀྱིས་ཐུགས་མངོན་དུ་བཟུང་།

མངོན་དུ་བསྡམས།

ཤིན་ཏུ་མངོན་དུ་བསྡམས་པས་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཏེ།

དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བ་ཞིག་ཕྱིང་ཀ་ལོག་ཏུ་བཟུང་།

མངོན་དུ་བསྡམས།

ཤིན་ཏུ་མངོན་དུ་བསྡམས་ན་དེའི་བ་སྤུའི་ཁུང་བུ་ཐམས་ཅད་ནས་རྡུལ་འབྱུང་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཚེམས་ལ་ཚེམས་གཏད།

ལྗགས་རྐན་ལ་བཅར་ཏེ་ཐུགས་ཀྱིས་ཐུགས་མངོན་དུ་བཟུང་།

མངོན་དུ་བསྡམས།

ཤིན་ཏུ་མངོན་དུ་བསྡམས་པ་ན་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་རླུང་ཐམས་ཅད་སྤྱི་བོའི་ནང་དུ་སོང་ནས།

དེ་དེའི་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ།

དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་སྤྱི་བོར་ལྕགས་ཀྱི་ཕུར་པ་རྣོན་པོས་བཏབ་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པས་རླུང་ཐམས་ཅད་སྙན་གཉིས་ཀྱི་བུ་གནས་རྒྱུས་པར་གྱུར་ཏོ།

དཔེར་ན་མགར་བས་སྦུད་པ་བུས་ན་རླུང་ཐམས་ཅད་ཀྱི་རྒྱུན་གྲྭ་གཉིས་ཀྱི་བུ་གནས་རྒྱུ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་རླུང་ཐམས་ཅད་ཀྱི་རྒྱུན་སྙན་གཉིས་ཀྱི་བུ་གནས་རྒྱུས་པར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་

ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་ལྷག་པར་ཡང་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པས་ཕྱལ་གྱི་ནང་ཐམས་ཅད་རྒྱས་པར་གྱུར།

ཤིན་ཏུ་རྒྱས་པར་གྱུར་ཏོ།

དཔེར་ན་མགར་བའི་སྦུད་པ་བུས་ན་གང་བར་གྱུར།

ཤིན་ཏུ་གང་བར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཕྱལ་གྱི་ནང་ཐམས་ཅད་རྒྱས་པར་གྱུར།

ཤིན་ཏུ་རྒྱས་པར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ།

དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་མགོ་འབྲེང་བས་ཡང་ནས་ཡང་དུ་དམ་

དུ་བཅིངས་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེར་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་ཁོང་དུ་ཁོང་གི་ཚོར་བ་མི་བཟད་པ་སྐྱེས་སོ།

དཔེར་ན་བ་ལང་གི་ཤེན་པ་མཁས་པའམ།

བ་ལང་གི་ཤེན་པའི་སློབ་མ་མཁས་པས་བ་ལང་གསོད་པའི་གྲི་རྣོན་པོས་བ་ལང་གི་ལྟོ་དྲལ་ན་དེའི་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་ལྷག་

པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ།

དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ།

དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་དང་།

ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ།

དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་།

དེའི་ཚེ་སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་སོ།

དཔེར་ན་མི་ཤིན་ཏུ་སྟོབས་དང་ལྡན་པ་གཉིས་ཀྱིས་མི་སྟོབས་ཤིན་ཏུ་ཆུང་བ་ཞིག་ཕྱིང་ཀ་ལོག་ཏུ་བཟུང་སྟེ་མེ་དོང་གི་ནང་དུ་སྦྱངས་ན་དེའི་ལུས་ལ་ལུས་ཀྱི་གདུང་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན།

སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་ཀྱང་།

དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བ་དེ་ལྟ་བུའི་ཚོར་བ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་འདི་སྙམ་དུ་དགོངས་ཏེ།

མ་ལ་བདག་གིས་ཐམས་ཅད་ཀྱི་ཐམས་ཅད་དུ་ཟས་མི་ཟ་བ་བསྒྲུབ་པར་བྱའོ་སྙམ་མོ།

དེ་ནས་ལྷ་རབ་ཏུ་མང་པོའི་སེམས་ཀྱིས་བྱང་ཆུབ་སེམས་དཔའི་ཐུགས་ཤེས་ནས་བྱང་ཆུབ་སེམས་དཔའ་གང་ན་བ་དེར་དོང་སྟེ་ཕྱིན་ནས།

བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ།

གྲོགས་པོ་གལ་ཏེ་ཁྱོད་མིའི་ཁ་ཟས་ཀྱིས་འཛེམ་པར་མཛད།

ངོ་ཚ་བར་མཛད།

སྨོད་པར་མཛད།

རྣམ་པར་སྨོད་པར་མཛད་ན།

བདག་ཅག་གིས་ཁྱོད་ཀྱི་བ་སྤུའི་ཁུང་བུ་ཐམས་ཅད་ནས་ལྷའི་མདངས་བསྒྲུབ་པར་བགྱིས་ཏེ།

ཁྱོད་ཀྱིས་གཏོར་ཅིག །

དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ།

གལ་ཏེ་བདག་གིས་མིའི་ཟས་མི་བཟའ་བར་དམ་བཅས་ལ་

བདག་གི་བ་སྤུའི་ཁུང་བུ་ཐམས་ཅད་དུ་ལྷ་རྣམས་ཀྱིས་ལྷའི་མདངས་བསྒྲུབས་ནས་དེ་བདག་གིར་བྱེད་པ་ནི་བདག་གི་བརྫུན་ཡིན་ལ།

བདག་གི་བརྫུན་གང་ཡིན་པ་དེ་ནི་བདག་གི་ལོག་པ་ཡིན་ནོ།

བདག་གི་ལོག་པ་གང་ཡིན་པ་དེའི་རྐྱེན་གྱིས་ནི་འདི་ན་སེམས་ཅན་ཁ་ཅིག་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་གྱིས།

མ་ལ་བདག་གིས་ལྷ་རྣམས་ཀྱི་ཚིག་ནི་ཐམས་ཅད་ཀྱི་ཐམས་ཅད་དུ་སྤངས་ལ་ཁ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་བཟའ་བའམ།

ཡང་ན་མོན་སྲན་སྡེའུའི་ཁུ་བའམ།

འོན་ཏེ་རྒྱ་སྲན་གྱི་ཁུ་བའམ།

ཡང་ན་ཧ་རེ་ནུ་ཀའི་འབྲས་བུའི་ཁུ་བ་བཏུང་ངོ་སྙམ་མོ།

དེ་ནས་བྱང་ཆུབ་སེམས་དཔས་དེའི་ཚེ་ལྷ་རྣམས་ཀྱི་ཚིག་ཐམས་ཅད་ཀྱི་ཐམས་ཅད་དུ་སྤངས་ནས་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བའམ།

ཡང་ན་མོན་སྲན་སྡེའུའི་ཁུ་བའམ།

འོན་ཏེ་རྒྱ་སྲན་གྱི་ཁུ་བའམ།

ཡང་ན་ཧ་རེ་ནུ་ཀའི་འབྲས་བུའི་ཁུ་བ་གསོལ་ལོ།

དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ།

སྐེམ་ཞིང་དཔལ་ཆུང་བར་གྱུར་ཏོ།

དཔེར་ན་ལྡུམ་བུ་ཨ་སི་ཏའི་སྡོང་བུ་དང་།

ཀ་ལི་ཀའི་སྡོང་བུ་འཇུམ་ཀུན་དུ་འཇུམ་པས་ཤ་ཆུང་ཞིང་སྐམས་པར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ་སྐེམ་ཞིང་དཔལ་ཆུང་བར་གྱུར་ཏོ།

དེ་ནས་བྱང་ཆུབ་སེམས་དཔའ་དེའི་ཚེ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་དབུ་ལ་དབུའི་པགས་པ་རྙིས་ཀུན་དུ་རྙིས་ཏེ་འཁུམས་ཤིང་འབར་འབུར་དུ་གྱུར་ཏོ།

དཔེར་ན་ཀུ་བ་རྩ་བ་ནས་བཅད་ན་རྙིས་ཀུན་དུ་རྙིས་པས་འཁུམས་ལ་འབར་འབུར་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་

བ་ན་དབུ་ལ་དབུའི་པགས་པ་རྙིས་ཀུན་ཏུ་རྙིས་ཏེ་འཁུམས་ཤིང་འབར་འབུར་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ།

ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ངོ་།

དཔེར་ན་ཁྲོན་པ་ཟབ་མོའི་ཆུར་སྐར་མའི་གཟུགས་བརྙན་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ།

ཟབ་པ་ཤིན་ཏུ་ཟབ་པར་རིང་དུ་སོང་བར་གཏམ་དུ་བྱ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔས་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ།

ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ཡང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

དེའི་ཚེ་བྱང་ཆུབ་སེམས་དཔའ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་དེའི་ཚེ་རྩིབ་མའི་བར་མཐོན་དམན་ཅན་དུ་གྱུར་ཏེ།

དཔེར་ན་རྩྭ་ཁང་ལོ་གཉིས་སམ་གསུམ་ལོན་པའི་ཕྱམ་དགུ་པོ་མཐོན་དམན་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་རྩིབ་མའི་བར་མཐོན་དམན་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན།

ལུས་མ་སྦྱངས་པ་མ་ཡིན་གྱི་སྦྱངས་པ་ཡིན།

རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ།

སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ།

བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ།

དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་།

ཆུང་བ་དང་།

ཆུང་ཟད་དང་།

ཆང་ཆུང་གསོལ་བ་ན་སྒལ་པའི་ཚིགས་འདི་ལྟ་སྟེ།

སྐྲའི་ལན་བུ་ལྟ་བུར་གྱུར་ཏོ།

མཇུག་དོ་ནི་འདི་ལྟ་སྟེ་རྔ་མོའི་རྐང་པ་ལྟ་བུར་གྱུར་ཏོ།

དེ་ལན་འགའ་ལྡང་བར་འདོད་ན་ཁ་སྦུབ་ཏུ་འགྱེལ་ལ།

ལན་འགའ་འདུག་པར་འདོད་ན་གན་རྐྱལ་དུ་འགྱེལ་ལོ།

དེ་རོ་སྟོང་ལ་བརྟེན་ནས་རོ་སྨད་འཇོག་པར་བྱེད།

རོ་སྨད་ལ་བརྟེན་ནས་རོ་སྟོད་འཇོག་པར་བྱེད་དོ།

དེ་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་ཏེ།

དེའི་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་པ་དེའི་ཚེ་བ་སྤུ་རྣམས་དྲུང་རུལ་བས་ས་ལ་ལྷགས་པར་གྱུར་ཏོ།

དེ་འདི་སྙམ་དུ་དགོངས་ཏེ།

ལམ་འདི་ཡང་ཤེས་པར་ནུས་པ་མ་ཡིན།

མཐོང་བར་ནུས་པ་མ་ཡིན།

བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ།

དེ་ནས་ལྷ་གསུམ་ཞིག་བྱང་ཆུབ་སེམས་དཔའ་གང་ན་བ་དེར་ལྷགས་ཏེ།

དེ་ནས་གཅིག་གིས་འདི་སྐད་ཅེས་སྨྲས་སོ།

དགེ་སྦྱོང་གཽ་ཏ་མ་ནི་ནག་པོ་ཞིག་གོ།

གཉིས་པས་འདི་སྐད་ཅེས་སྨྲས་སོ།

འདི་ནག་པོ་ནི་མ་ཡིན་གྱི་འོན་ཀྱང་སྔོ་བསངས་ཞིག་གོ།

གསུམ་པས་འདི་སྐད་ཅེས་སྨྲས་སོ།

འདི་ནག་པོ་ཡང་མ་ཡིན།

སྔོ་བསངས་ཀྱང་མ་ཡིན་གྱི་མདོག་དམར་སྨུག་ཅིག་གོ།

བྱང་ཆུབ་སེམས་དཔའི་སྐུ་མདོག་བཟང་པོར་སྣང་བ་ནི་ཐམས་ཅད་ཀྱི་ཐམས་ཅད་དུ་ནུབ་པར་གྱུར་ཏོ།

དེ་ནས་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་གསུམ་ཞིག་སྣང་བ་འདི་ལྟ་སྟེ།

ཤིང་རློན་པ་ཆུ་