律部第13卷（འདུལ་བ་པ་བཞུགས་སོ། །）

འདུལ་བ་གཞུང་དམ་པ།

བམ་པོ་ཉི་ཤུ་གསུམ་པ།

མདོར་ན།

ཁྱེའུ་གཉིས་རྒལ་གསུམ་པ་དང་།

ཕྲིན་པ་དག་དང་དགེ་འདུན་ཞིང་།

ཡོ་བྱད་རྣམས་དང་ཕུར་པ་དང་།

ཤིང་དང་བྱ་ཚང་རྣམ་གཉིས་སོ།

ཚེ་དང་ལྡན་པ་མཽད་གལ་གྱི་བུ་ཆེན་པོས་ཁྱིམ་བདག་མགོན་མེད་པ་ལ་ཟས་སྦྱིན་གྱི་བུ་རྣམས་ཐར་བར་བྱས་པ་ནི་རྒྱས་པར་རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ།

ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་གདུགས་ཚོད་ལ་སྤྱན་དྲངས་ནས།

སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་ནི་བྱོན་གྱི་དགེ་སློང་ཞིག་གཙུག་ལག་ཁང་ན་འདུག་སྟེ་བསོད་སྙོམས་མནོས་སོ།

དེ་ན་ཁྱིམ་བདག་མགོན་མེད་པ་ལ་ཟས་སྦྱིན་གྱི་ཁྱེའུ་རྣམས་ཛེ་ཏའི་ཚལ་ན་རྩེ་བ་ལས་གཡོན་ཅན་དག་གིས་བརྐུས་པ་དགེ་སློང་དེས་ཐོས་ཏེ།

དེས་སྔགས་བསླབས་ནས་རིང་པོ་མ་ལོན་པར་དེས་འདི་སྙམ་དུ་མ་ལ་བདག་གིས་སྔགས་འདིས་སད་དོ་སྙམ་དུ་བསམས་ནས་དེས་སྔགས་དེ་བརྗོད་པ་དང་།

གཡོན་

ཅན་དེ་དག་དཔུང་གི་ཚོགས་བཞིས་བསྐོར་བར་གྱུར་ནས་དེ་དག་གིས་ཁྱེའུ་དེ་རྣམས་བོར་ཏེ་བྲོས་སོ།

དེ་ལྟར་གྱུར་པ་དགེ་སློང་དག་གིས་ཐོས་ནས་དེ་ལ་དགེ་སློང་དག་གིས་འདི་ནི་ཕས་ཕམ་པའི་ཉེས་པ་བྱུང་ངོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་ཁྱོད་ཀྱིས་ཇི་ལྟར་བསམས་ཏེ་ཁྱེའུ་རྣམས་ཐར་བར་བྱས་ཞེས་སྨྲས་པ་དང་།

སྔགས་སད་པར་བསམས་སོ་ཞེས་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ།

སྔགས་བརྗོད་པ་ལ་ཉེས་པ་མེད་དོ།

ལྗོངས་ཀོ་ས་ལར་དགེ་འདུན་གྱི་ཆོས་གོས་བགོས་པ་དང་།

དགེ་སློང་གཞི་པ་ཞིག་གྲོང་གཞན་དུ་སོང་ནས་དེ་ལ་ལྷན་ཅིག་སྤྱོད་པ་གཉིས་ཤིག་ཡོད་དེ་དེ་གཉིས་ཀྱིས་མཁན་པོའི་གོས་སོ་སོར་མནོས་སོ།

དེ་གཉིས་ཀྱིས་མནོས་ཏེ་དོང་བ་དང་།

གཅིག་ལ་གཅིག་མཁན་པོའི་གོས་ཁྱོད་ཀྱིས་མནོས་སམ་ཞེས་དྲིས་སོ།

ཁྱོད་ཀྱིས་ཀྱང་མནོས་ཁོ་བོས་ཀྱང་མནོས་ན་གང་གིས་མི་དབང་བར་མནོས་པས་ཕས་ཕམ་པ་བྱུང་བ་ནི་མི་ཤེས་སོ་ཞེས་སྨྲས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

མནོས་པ་ལ་ཉེས་པ་མེད་དེ་འོན་ཀྱང་གཞན་ཤེས་པར་བྱོས་ཤིག །

གཞོངས་ཀོ་ས་ལར་དགེ་འདུན་གྱིས་གོས་བགོས་པ་དང་།

དགེ་སློང་གཞི་བ་ཞིག་གྲོང་གཞན་དུ་སོང་ནས།

དགེ་སློང་དེའི་མཛའ་བོ་ཞིག་ཡོད་དེ།

དེས་དེའི་གོས་མནོས་ནས་དེས་འོངས་པ་དང་།

འདི་སྐད་དུ་ཚེ་དང་ལྡན་པ་འདི་ནི་ཁྱོད་ཀྱི་གོས་ཡིན་ཏེ་ཁོ་བོས་མནོས་ནས་འོངས་སོ་ཞེས་སྨྲས་པ་དང་།

ངས་ཁྱོད་ལ་མ་བཅོལ་ཏོ་ཞེས་སྨྲས་ནས།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་

ཉེས་པ་མེད་དེ་མ་བཅོལ་བར་རྙེད་པ་མ་མནོད་ཅིག །

མནོས་ན་ནི་ཉེས་བྱས་སུ་འགྱུར་རོ།

གཞོངས་ཀོ་ས་ལར་གོས་རྣམས་བགོས་པའི་ཚེ་དགེ་སློང་ཞིག་ན་བ་དང་དེའི་ནད་གཡོག་གིས་གོས་མནོས་ནས་དེས་ཁྱེར་ཏེ་སོང་བ་དང་།

དགེ་སློང་དེ་ཡང་དུས་ལས་འདས་ཏེ་དགེ་སློང་དེས་ཇི་ལྟར་བྱ་བ་མི་ཤེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དེ་སྟེ་སྔར་དུས་ལས་འདས་ལ་ཕྱིས་མནོས་ན་ནི་དེ་ཉིད་དུ་སླར་ཕུལ་ཅིག །

འོན་ཏེ་སྔར་མནོས་ལ་ཕྱིས་དུས་ལས་འདས་ན་ནི་ཡོ་བྱད་གཞན་ཇི་ལྟ་བ་དེ་ལྟར་བྱོས་ཤིག །

དགེ་སློང་ཞིག་གིས་དགེ་སློང་ཞིག་ལ་ཚེ་དང་ལྡན་པ་ཚུར་ཤོག །

ཆུང་ངུ་ཆུང་ངུ་ནས་མ་བྱིན་པར་བླངས་པ་དང་ཉེས་པར་མི་འགྱུར་རོ་ཞེས་སྨྲས་པ་དང་།

དགེ་སློང་དག་གིས་ཐོས་ནས་བཅོམ་ལྡན་འདས་ལ་གསོལ་ཏོ།

བཅོམ་ལྡན་འདས་ཀྱིས་བཀའ་སྩལ་པ།

སྦྱོར་བ་གཅིག་གིས་རིན་ཐང་བརྩི་བར་བྱའོ།

ཁྱིམ་བདག་ཅིག་དགེ་འདུན་གྱི་ཞིང་རྨེད་པ་དང་།

དེ་ལ་དགེ་སློང་གཞི་བ་ཞིག་འོངས་ནས་འདི་སྐད་དུ་ཁྱིམ་བདག་ཡང་ན་ཤས་བྱིན་ཅིག །

ཡང་ན་ཞིང་མ་རྨེད་ཅིག་ཅེས་སྨྲས་ཀྱང་དེས་མ་མཉན་ཏེ་རྨོས་པ་དང་།

དགེ་སློང་དེས་ཐོང་བའི་རྩེ་མོར་ཉལ་ལོ།

དེ་ནས་ཁྱིམ་བདག་དེས་ཐོང་བ་བོར་ནས་འདི་སྐད་དུ་དགེ་སྦྱོང་འདི་ལྟ་བུ་དང་བྲལ་བར་ཤོག་ཤིག་ཅེས་འཕྱ་ཞིང་སྤོང་སྟེ་མི་སྙན་པར་ཟེར་བ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

ཕྱིན་ཆད་དགེ་སློང་གིས་འདི་ལྟར་ལུས་མི་སྡུག་པར་མ་བྱེད་ཅིག །

དགེ་སློང་ཞིག་གིས་དགེ་སློང་ཞིག་ལ་འདི་སྐད་དུ་ཚེ་དང་ལྡན་པ་ཚུར་ཤོག་མཆོད་རྟེན་གྱི་ནོར་བརྐུས་ཀྱང་བདག་ཅག་གཉིས་ལ་ཉེས་པར་མི་འགྱུར་རོ་ཞེས་སྨྲས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་མཆོད་རྟེན་གྱི་ཡོ་བྱད་སྲུང་མ་ཡོད་པ་ལས་ནི་དེ་སྟེ་རིན་ཐང་ཚང་ན་ཕས་ཕམ་པར་འགྱུར་རོ།

དགེ་སློང་གཞི་བ་ཞིག་དགེ་འདུན་གྱི་ཞིང་རྨེད་དུ་བཅུག་པ་དང་།

དེ་ནས་ཤིན་ཏུ་མི་རིང་བ་ཞིག་ན་ཁྱིམ་བདག་ཅིག་ཀྱང་ཞིང་རྨེད་དེ།

ཁྱིམ་བདག་དེ་འོངས་ནས་བཙུན་པ་ཁོ་བོའི་ཞིང་མ་རྨོ་ཤིག་ཅེས་སྨྲས་པ་དང་།

འདི་ཁྱོད་

ཀྱི་མ་ཡིན་ཏེ་དགེ་འདུན་གྱི་ཞིང་ངོ་།

བཙུན་པ་ཁོ་བོའི་དབང་དུ་མི་མ་ཡིན་པ་བསྟན་ཏོ་ཞེས་སྨྲས་ནས།

ཁྱིམ་བདག་དེས་སྔོན་མཚམས་སུ་ཕུར་པ་བཏབ་པ་དེ་བརྐོས་སོ།

དེ་བརྐོས་ནས་བསྟན་པ་དང་དེས་ཐོང་བ་བོར་ནས་ཁྱིམ་བདག་དེ་སོང་བའི་འོག་ཏུ་དེས་དེའི་ཕུར་པ་ནང་དུ་བསྣུར་ཏེ་ཞིང་རྨེད་པ་དང་།

ཁྱིམ་བདག་དེ་སླར་འོངས་ནས།

བཙུན་པ་ད་གཟོད་ཀྱང་ཁོ་བོ་རྒྱལ་ན་ཅིའི་ཕྱིར་ད་དུང་ཡང་ཞིང་རྨེད་ཅེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དེ་སྟེ་དངོས་པོ་ཚང་ན་ཕས་ཕམ་པར་འགྱུར་རོ།

དགེ་སློང་ཞིག་གིས་ཁྱིམ་བདག་གི་མེ་ཏོག་གི་ཤིང་ཞིག་མ་བྱིན་པར་བླངས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དེ་སྟེ་དངོས་པོ་ཚང་ན་ཕས་ཕམ་པར་འགྱུར་རོ།

འབྲས་བུའི་ཤིང་ཡང་དེ་བཞིན་ནོ།

དགེ་སློང་གི་འཆག་སར་ཤིང་ཞིག་སྐྱེས་ཏེ།

དེ་ལ་འོལ་བའི་ཚང་འཆས་ནས་དེས་དེ་དག་འཆག་པ་ལ་ཤིང་འདོར་ཞིང་སྐད་འབྱིན་པ་དང་།

དེས་དེའི་ཚང་བཤིག་ནས་དེ་སྐད་འབྱིན་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགའ་བོ་ལ་དགའ་བོ་འོལ་བ་ཅིའི་ཕྱིར་སྐད་འབྱིན་ཅེས་རྨས་པ་དང་།

དགེ་སློང་དག་གིས་འོལ་བའི་ཚང་བཤིག་པའི་སླད་དུའོ།

འོལ་བའི་ཚང་མ་གཞིག་ཅིག །

སུས་བཤིག་པ་དེ་ལ་ཉེས་བྱས་སུ་འགྱུར་རོ།

དགེ་སློང་གིས་འོལ་བའི་ཚང་བཤིག་ནས་ཚོན་བསྐོལ་བ་དེ་ཡང་རྒྱས་པར་དེ་བཞིན་ནོ།

མདོར་ན།

ལ་ཕུག་སྡོང་བུ་འབྲས་བུ་དང་།

འདབ་མ་མེ་ཏོག་རྣམ་གསུམ་དུ།

རྟ་དང་རྟ་ཞོན་རྐུ་བ་དང་།

གྲུ་རྒལ་བ་དང་ནོར་བུའོ།

མཉན་དུ་ཡོད་པ་ན་ཁྱིམ་བདག་ཅིག་ལ་ལ་ཕུག་གི་ར་བ་ཞིག་ཡོད་དེ་དེར་དགེ་སློང་ཞིག་སོང་ནས་འདི་སྐད་དུ་ལ་ཕུག་སློང་ཞེས་སྨྲས་པ་དང་།

བཙུན་པ་རིན་སྩོལ་ཅིག །

རིན་མེད་དོ།

རིན་མེད་པར་ཇི་ལྟར་གསོལ།

ཆོས་ཀྱི་ཕྱིར་རིན་མེད་པར་བྱིན་ཅིག །

བཙུན་པ་དེ་སྟེ་འདིར་འོངས་སོ་ཅོག་ལ་རིན་མེད་པར་བྱིན་ན་ཁོ་བོ་ཅག་གི་ཟས་དང་གོས་ཅུང་ཟད་ཀྱང་མེད་པར་འགྱུར་རོ་ཞེས་སྨྲས་པ་དང་།

ཅི་ཅུང་ཟད་ཀྱང་

མི་སྦྱིན་ནམ།

ཅུང་ཟད་ཀྱང་མི་གསོལ་ལོ་ཞེས་སྨྲས་ནས།

དེས་ལ་ཕུག་གི་ར་བ་དེ་སྔགས་ཀྱིས་བསྐམས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་མོད་ཀྱི་ཉེས་པ་སྦོམ་པོར་འགྱུར་རོ།

ལ་ཕུག་གི་ར་བ་ཇི་ལྟ་བ་བཞིན་དུ་སྡོང་བུའི་ར་བ་དང་།

ལོ་མའི་ར་བ་དང་།

འབྲས་བུའི་ར་བ་རྣམས་ཀྱང་དེ་བཞིན་ནོ།

རྟ་ཞིག་རྩྭ་ཟ་ཞིང་འདུག་པ་དང་།

དགེ་སློང་ཞིག་གིས་རྩྭ་ཆང་བ་གང་བླངས་ནས་རྟའི་མདུན་དུ་བསྒྲེངས་པ་དང་།

དེ་ཡང་དེའི་ཕྱི་བཞིན་དུ་འོང་བར་གྱུར་ནས།

དགེ་སློང་དེས་འདི་ལྟར་བརྐུ་བར་བྱའོ་སྙམ་སྟེ་ལུས་རྣམ་པར་བསྒྱུར་བ་དང་།

དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་ནི་མེད་ཀྱི་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་ཚོང་པ་འགྲོན་པ་མང་པོ་དག་ཅིག་དང་ལྷན་ཅིག་གཞོངས་ཀོ་ས་ལར་དོང་ནས་མྱ་ངན་གྱི་ལམ་ཞིག་ཏུ་ཕྱིན་པ་དང་།

ཚོང་པ་དེ་རྟ་ལ་ཞོན་ནས་དེ་དག་གིས་བཙུན་པ་མྱ་ངན་གྱི་ལམ་འདི་ནི་འཇིགས་པ་དང་བཅས་ཀྱིས་རྟ་ལ་བཅིབས་ལ་མྱུར་དུ་བཞུད་དོ་ཞེས་སྨྲས་པ་དང་།

དགེ་སློང་དག་གིས་རྟ་ལ་ཞོན་ཏེ་དེ་དག་གིས་དེར་འདི་ལྟར་བརྐུ་བར་བྱའོ་སྙམ་ནས་ལུས་རྣམ་པར་བསྒྱུར་བ་དང་།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ།

དགེ་སློང་ཞིག་རིན་པོ་ཆེས་གང་བའི་གྲུ་དང་ལྷན་ཅིག་རྒལ་བ་ལས་དེས་དེར་འདི་ལྟར་བརྐུ་བར་བྱའོ་སྙམ་ནས་ལུས་རྣམ་པར་བསྒྱུར་བ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ།

ཚོང་པ་ཞིག་གི་གྲུ་རིན་པོ་ཆེས་གང་བ་ཆུར་བྱིང་བ་དང་།

དེ་བྲེལ་བ་དང་རིན་པོ་ཆེའི་སྒྲོམ་ཆུས་ཁྱེར་ཏེ་དགེ་སློང་དག་ཅིག་འོག་ན་ཆུ་ལ་འཁྲུ་ཞིང་འདུག་པ་དེ་དག་གིས་རིན་པོ་ཆེའི་སྒྲོམ་མཐོང་ནས་དེ་དག་གིས་དེ་ཕྱུང་བ་དང་།

ཚོང་པ་དེས་མཐོང་སྟེ།

བཙུན་པ་དག་རིན་པོ་ཆེའི་སྒྲོམ་འདི་ནི་བདག་གི་ལགས་སོ་ཞེས་སྨྲས་པ་དང་།

འདི་ཆུས་ཁྱེར་བ་ལས་ངེད་ཀྱིས་རྙེད་དོ།

བཙུན་པ་དག་བདག་གིས་གྲུ་རིན་པོ་ཆེས་

གང་བ་ཆུར་བྱིང་སྟེ།

དེ་ནས་ཁོ་བོ་བྲེལ་བ་དང་།

རིན་པོ་ཆེའི་སྒྲོམ་བུ་འདི་ཆུས་ཁྱེར་ཏེ།

རིན་པོ་ཆེའི་སྒྲོམ་འདི་ནི་བདག་གི་ལགས་སོ་ཞེས་སྨྲས་པ་དང་།

དེ་སྟེ་ཁྱོད་ཀྱི་ཡིན་ན་ཁྱེར་ཅིག །

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་གཞི་བ་ཞིག་གིས་ཕྱོགས་བཞིའི་དགེ་འདུན་གྱི་ཡོ་བྱད་རྐུ་སེམས་ཀྱིས་གནས་ནས་གནས་སུ་སྤོས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

རྐུན་པོ་དག་ཅིག་གིས་བ་ཞིག་ཁྲིད་དེ་དགོན་པའི་གནས་སུ་འཛེགས་ནས་དེ་དག་གིས་དེར་བཏགས་ཏེ་དོང་བ་དང་།

གནས་དེར་དགེ་སློང་དག་ཉིན་པར་སྤྱོད་པའི་ཕྱིར་དོང་བ་དང་།

དེ་དག་གིས་བ་དེ་མཐོང་ནས་དེ་དག་གིས་སྙིང་རྗེ་སྟེ་བཏང་བ་དང་།

དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་བྱས་སུ་འགྱུར་རོ།

མདོར་ན།

རོ་དང་གསེར་གྱི་ཕྲེང་བ་དང་།

བྱན་ལག་བྱི་བ་རྣམ་པ་གཉིས།

རི་དགས་གསུམ་དང་ཀོག་ཚེ་གཉིས།

རྙི་དང་བྱ་རྒྱ་བྱ་ཚང་ངོ་།

མཉན་དུ་ཡོད་པ་ན་གཞན་དག་རོ་ལ་གསོལ་བ་འདེབས་ཏེ།

ཁྱིམ་བདག་དེས་ཀྱང་དགོས་པ་ཞིག་གསོལ་ནས།

དེའི་དགོས་པ་དེ་གྲུབ་པ་དང་།

དེས་དེ་ལ་རས་དཀར་པོ་ཞིག་གིས་གཡོགས་ཏེ་བཞག་པ་ལ་དགེ་སློང་ནག་པོ་དགའ་བོ་ཞེས་བྱ་བ་དེ་དེར་སོང་ནས་རས་དེ་བླངས་པ་དང་།

དེ་ལ་དགེ་སློང་རྣམས་ཀྱིས་ཁྱོད་ལ་ཕས་ཕམ་པའི་ཉེས་པ་བྱུང་ངོ་།

དངོས་པོ་གང་གི་ཕྱིར།

ཁྱོད་ཀྱིས་རོའི་རས་མ་བྱིན་པར་བླངས་པའི་ཕྱིར་རོ་ཞེས་སྨྲས་པ་དང་།

དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

གྲོང་ཁྱེར་ཡངས་པ་ཅན་ན་རོ་གསེར་གྱི་ཕྲེང་བ་བཏགས་པ་ཞིག་རང་ལ་བསྲུང་ཞིང་འདུག་གོ་ཞེས་དགེ་སློང་ནག་པོ་དགའ་བོ་ཞེས་བྱ་བ་དེས་ཐོས་ཏེ་དེ་དེར་སོང་ནས།

རོ་དེ་ལ་འཐོག་པ་ལས་རོ་དེ་སྨྲ་བ་དང་།

དེ་དཔའ་བ་ལ་ནུས་

པས་ན་དེས་གསེར་གྱི་ཕྲེང་བ་ཕྲོགས་ཏེ་ཁྱེར་བ་དང་།

དགེ་སློང་རྣམས་ཀྱིས་ཐོས་ནས་དེ་ཡང་དེ་བཞིན་དུ་རྒྱས་པར་རོ།

བུད་མེད་མང་ཞིག་ཆུ་བོ་མ་ཛི་ར་བ་ཏིའི་ངོགས་སུ་གོས་དང་རྒྱན་རྣམས་བཞག་སྟེ་ཁྲུས་བྱེད་པ་ན།

སྤྲེའུ་ཞིག་ཤིང་ལས་བབས་ནས་རྒྱན་རྣམས་ཁྱེར་ཏེ་ཤིང་ལ་སླར་འཛེགས་པ་དང་།

དེ་དག་སླར་བྱུང་ནས་གོས་རྣམས་བགོས་ཏེ་རྒྱན་རྣམས་ཐོགས་ཞེས་བྱས་ན་མུ་ཏིག་གི་དོ་ཤལ་མེད་ནས་གང་གི་ཚེ་མ་རྙེད་པ་དེའི་ཚེ་དོང་ངོ་།

དེ་ནས་སྤྲེའུ་དེས་མུ་ཏིག་གི་དོ་ཤལ་དེ་དེ་ཉིད་དུ་སླར་བོར་བ་དང་།

དགེ་སློང་དག་ཅིག་ཤིན་ཏུ་མི་རིང་བ་ཞིག་ན་འཆག་ཅིང་འཁོད་པ་དེ་དག་གིས་མུ་ཏིག་གི་དོ་ཤལ་དེ་མཐོང་ནས་བླངས་ཏེ་བུད་མེད་དེ་དག་ལ་བྱིན་ནོ།

བུད་མེད་དག་ན་རེ་ཁྱོད་ཀྱིས་མུ་ཏིག་གི་དོ་ཤལ་འདི་བརྐུས་སོ་ཞེས་སྨྲས་པ་དང་།

འདི་ངེད་ཅག་གིས་མ་བརྐུས་ཀྱིས་ཁྱེད་ཅག་ཁྲུས་བྱེད་པ་ན་སྤྲེའུ་ཞིག་ཤིང་ལས་བབས་ནས་མུ་ཏིག་གི་དོ་ཤལ་འདི་བླངས་ཏེ་སླར་ཤིང་ལ་འཛེགས་སོ།

གང་གི་ཚེ་ཁྱོད་ཀྱིས་བཙལ་ཏེ་མ་རྙེད་ནས་དོང་བ་དེའི་ཚེ་སླར་བབས་ཏེ་དེ་ཉིད་དུ་བཞག་གོ།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་གིས་བྱན་ལག་གི་ཚང་བཤིག་སྟེ་སྒོ་ང་བླངས་པ་དང་།

བྱན་ལག་དེ་སྒྲ་འབྱིན་ཏེ་དེ་བཞིན་རྒྱས་པར་རོ།

དགེ་སློང་མང་ཞིག་གཙུག་ལག་ཁང་ཞིག་ན་འཁོད་པ་དང་བྱི་བ་དག་ཅིག་བྱི་ཁུང་ནས་བྱུང་སྟེ་ནོར་དང་ཟས་བརྐུས་ཤིང་བྱི་ཁུང་དུ་སླར་སོང་བ་དང་།

དེ་དག་འདི་སྙམ་དུ་གྱུར་ཏོ།

བདག་ཅག་གི་ལ་རྐུ་བ་དེ་སུ་ཞིག་སྙམ་དུ་བསམས་ཏེ།

དགེ་སློང་དག་གིས་བསོད་སྙོམས་ལས་བསྐོར་ནས་གདུགས་ཚོད་ལ་སྡོད་ཅིང་འདུག་པ་དང་།

བྱི་བ་དེ་ཡང་ཁུང་བུ་ནས་བྱུང་སྟེ།

ཁ་ཟས་ཁྱེར་ནས་དེ་བཞིན་དུ་བྱི་ཁུང་དུ་སླར་སོང་བ་དང་།

དགེ་སློང་དེ་དག་འདི་སྙམ་དུ་བདག་ཅག་ལ་རྐུ་བ་ནི་འདི་ཡིན་ནོ་སྙམ་དུ་བསམས་ཏེ།

དེ་དག་གིས་དེ་བཟུང་ནས་དགེ་སློང་དག་ལ་བསྟན་ཏེ་བདག་ཅག་ལ་རྐུ་བ་ནི་འདི་ཡིན་ནོ་ཞེས་སྨྲས་པ་དང་།

དགེ་སློང་དེ་དག་གིས་སྨྲས་པ་ཁྱེད་ལ་ཕས་ཕམ་པའི་ཉེས་པ་བྱུང་ངོ་།

དངོས་པོ་གང་ལས་ཁྱེད་ཀྱིས་བྱི་བ་ལ་མ་

བྱིན་པར་བླངས་པས་སོ་ཞེས་སྨྲས་པ་དང་།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་ཀྱིས་དགེ་སློང་རྣམས་ཀྱི་གང་ཡིན་པ་དེ་ལོང་ཤིག །

བྱི་བའི་གང་ཡིན་པ་དེ་ནི་མི་བླང་བར་བྱའོ།

བྱི་བས་བཅའ་བ་དང་བཟའ་བའི་རྣམས་ཁྱེར་ཏེ་འོངས་ཤིང་དགེ་སློང་ཞིག་གི་མལ་སྟན་གྱི་འོག་ཏུ་བཞག་པ་དང་།

དགེ་སློང་དེས་ནང་པར་སྔར་སོ་ཤིང་ཟོས་གདོང་བཀྲུས་ནས་བྱིན་ལེན་བྱས་ཏེ།

དེ་ཟོས་པ་དང་དགེ་སློང་དག་གིས་ཚེ་དང་ལྡན་པ་ཁྱོད་རྟག་པར་ལག་པ་དང་།

རྐང་པ་ལེགས་པར་བཀྲུས་ཀྱང་བསོད་སྙོམས་ལ་གྲོང་དུ་མི་འཇུག་ན།

དེ་ཅིའི་ཕྱིར་ཞེས་སྨྲས་པ་དང་།

བདག་ནི་བྱི་བས་བཅའ་བ་དང་བཟའ་བ་ཁྱེར་ཏེ་འོངས་ཤིང་མལ་སྟན་གྱི་འོག་ཏུ་འཇོག་སྟེ་བདག་གིས་སྔར་བྱིན་ལེན་བྱས་ནས་ཟོས་སོ་ཞེས་སྨྲས་པ་དང་།

ཚེ་དང་ལྡན་པ་ཁྱོད་ནི་ཕས་ཕམ་པའི་ཉེས་པ་བྱུང་ངོ་།

དངོས་པོ་གང་གི་ཕྱིར།

ཁྱོད་ཀྱིས་བྱི་བའི་བཅའ་བ་དང་བཟའ་བ་མ་བྱིན་པར་བླངས་པའི་ཕྱིར་རོ།

དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དེ་ནི་ཚེ་སྔ་མ་ལ་བྱི་བའི་ཕ་ཡིན་ཏེ།

དེ་ཕ་ལ་བྱམས་པས་ན་དགེ་སློང་དེ་ལ་ཁ་ཟས་ཁྱེར་ཏེ་འོངས་ཤིང་བྱིན་པས་ཉེས་པ་མེད་དོ།

རི་དགས་ཤིག་རྔོན་པས་བསྙགས་ནས་གཙུག་ལག་ཁང་དུ་འོངས་པ་དང་རྔོན་པ་དེ་དག་གིས་བདག་ཅག་གི་རི་དགས་དེ་ནི་བསྙགས་ཏེ་གཙུག་ལག་ཁང་དུ་སོང་གིས་སླར་བྱིན་ཅིག་ཅེས་སྨྲས་པ་དང་།

དེ་དག་གིས་གང་གི་ཚེ་མ་ཐོབ་པ་དེའི་ཚེ་བོར་ཏེ་དོང་བ་དང་།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

རྔོན་པས་རི་དགས་མདས་ཕོག་པ་དེ་ཡང་དེ་བཞིན་དུ་རྒྱས་པར་བྱའོ།

རྔོན་པས་རི་དགས་ཤིག་མདའ་དུག་ཅན་གྱིས་ཕོག་པ་གཙུག་ལག་ཁང་དུ་འོངས་པ་དང་།

རྔོན་པ་དེ་དག་གིས་བདག་ཅག་གིས་རི་དགས་འདི་མདའ་དུག་ཅན་གྱིས་ཕོག་སྟེ།

གདོན་མི་ཟ་བར་འཆིས་སླར་བྱིན་ཅིག་ཅེས་སྨྲས་པ་དང་།

དགེ་སློང་དེ་དག་གིས་སླར་མ་བྱིན་ནས་དེ་དག་གིས་བོར་ཏེ་དོང་ངོ་།

དེ་

དག་དོང་བའི་འོག་ཏུ་རི་དགས་དེ་ཡང་དུས་ལས་འདས་ནས་དགེ་སློང་དེ་དག་གིས་ཇི་ལྟར་བྱ་མི་ཤེས་ནས།

བཅོམ་ལྡན་འདས་ཀྱིས་བཀའ་སྩལ་པ།

རྔོན་པ་དེ་དག་ལ་སླར་བྱིན་ཅིག །

དགེ་སློང་གིས་རྔོན་པ་ལ་གནོད་པར་བྱ་བའི་ཕྱིར་ཀོག་ཚེ་བཅད་ན་ཉེས་པ་སྦོམ་པོར་འགྱུར་རོ།

སྙིང་རྗེ་བས་བཅད་ན་ཉེས་བྱས་སུ་འགྱུར་རོ།

དེ་བཞིན་དུ་བྱའི་རྙི་ཡང་གནོད་པར་བྱ་བའི་ཕྱིར་བཅད་ན་ཉེས་པ་སྦོམ་པོར་འགྱུར་རོ།

སྙིང་རྗེ་བར་བསམས་ཏེ་བཅད་ན་ཉེས་བྱས་སུ་འགྱུར་རོ།

དགེ་སློང་གིས་བྱ་རྒྱ་གནོད་པར་བྱ་བའི་ཕྱིར་བཅད་ན་ཉེས་པ་སྦོམ་པོར་འགྱུར་རོ།

སྙིང་རྗེ་བར་བསམས་ཏེ་བཅད་ན་ཉེས་བྱས་སུ་འགྱུར་རོ།

བྱ་ཚང་ཡང་དེ་བཞིན་ནོ།

མདོར་ན།

གོས་འཚོང་བ་དང་ཚོང་འདུས་པ།

བཅའ་བ་གྲུ་གསུམ་ཐུག་པ་དང་།

ཟོང་དང་དངོས་པོ་ཆོས་གོས་སོ།

དགེ་སློང་ཞིག་གིས་གོས་འཚོང་བ་ར་རོ་བ་ཞིག་གིས་རས་ཞིག་བླངས་ནས་ཁྱེར་ཏེ་སོང་བ་དང་།

གོས་འཚོང་བས་མཐོང་ནས་དེས་དེ་ལ་རས་མ་རྐུ་ཞེས་སྨྲས་པ་དང་།

བསྟན་ནས་ཁྱེར་ཏེ་འོང་ངོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་ནི་མེད་དེ་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་ཚོང་འདུས་པ་ལ་སྐྱིན་པོར་མང་ཞིག་བླངས་པ་དང་།

དེས་སྐྱིན་པ་བདས་ན་དེས་འདི་སྙམ་དུ་འདི་ལ་མི་སྦྱིན་ནོ་སྙམ་བསམས་པ་དང་།

དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ་ཉེས་པ་སྦོམ་པོར་འགྱུར་རོ།

དགེ་སློང་ཞིག་ན་བ་དང་དེ་ཁུར་བ་གྲུ་གསུམ་དང་།

ཐུག་པ་ལ་དད་ནས་དེས་འདི་སྙམ་དུ་ཁུར་བ་གྲུ་གསུམ་དང་།

ཐུག་པ་བྱས་ཏེ་དགེ་འདུན་ལའང་གསོལ།

བདག་ཀྱང་བཟའོ་སྙམ་སྟེ།

དེས་ནད་གཡོག་རྣམས་ལ་དགེ་འདུན་ལའང་གསོལ།

ཁོ་བོ་ཡང་བཟས་ཁུར་བ་གྲུ་གསུམ་དང་།

ཐུག་པ་ཡང་སྦྱོར་ཅིག་ཅེས་སྨྲས་ནས།

དེས་དེ་ལ་རིན་བྱིན་པ་དང་དེ་དག་གིས་འདི་སྙམ་དུ་བདག་ཅག་ལ་ཁུར་བ་གྲུ་གསུམ་དང་།

ཐུག་པ་ཅི་དགོས་ཀྱིས་འདི་གཅིག་པུ་ལ་ཁུར་བ་གྲུ་གསུམ་དང་།

ཐུག་པ་བྱིན་ལ་རིན་དེ་བགོའོ་སྙམ་

བསམས་ནས་དེ་དག་གིས་དེ་ལ་ཁུར་བ་གྲུ་གསུམ་དང་།

ཐུག་པ་བྱིན་ཏེ་རིན་བགོས་པ་དང་།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ནད་པ་ཞིག་ཡོད་དེ།

དེ་ལ་ཟོང་མང་དུ་ཡོད་པས་དེས་འདི་སྙམ་དུ་འདི་དག་ནི་བདག་ཤི་བ་དང་དགེ་འདུན་གྱིས་བགོས་སོ་སྙམ་དུ་བསམས་ནས།

དེས་ནད་གཡོ་བ་རྣམས་ལ་ཚེ་དང་ལྡན་པ་དག་ཁོ་བོ་ལ་སྲན་ཆུང་གི་ཚོད་མ་ཞིག་བྱིན་ཅིག་ཅེས་སྨྲས་ནས་དེ་དག་གིས་དེ་ལ་སྲན་ཆུང་གི་ཚོད་མ་ཞིག་བྱས་ཏེ་བྱིན་པ་དང་།

ནད་གཡོག་དེ་དག་བྲེལ་བར་གྱུར་ནས།

དེས་ཟོང་དང་སྲན་ཆུང་གི་ཚོད་མར་བསྲེས་ནས་འཐུངས་པ་དང་།

དེ་ཁ་ཟས་ལྕི་བས་དུས་ལས་འདས་ཏེ་དགེ་སློང་དེ་དག་འདུས་ནས་དུར་ཁྲོད་དུ་བོར་རོ།

དེ་དག་གིས་དེ་བོར་ནས་ནད་གཡོག་རྣམས་ལ་དགེ་སློང་དེའི་ཟོང་མང་པོ་བགོ་བར་བྱས་ཁྱེར་ཏེ་ཤོག་ཅེས་སྨྲས་པ་དང་།

དགེ་སློང་དག་གིས་བཙལ་ནས་མ་རྙེད་དེ།

དེ་དག་སྟན་ལས་ལངས་ཏེ་དོང་ངོ་།

དགེ་སློང་དེ་གཅན་གཟན་གྱིས་ལྟོ་དྲལ་ཏེ་རྒྱུ་མ་དྲངས་སོ།

རྒྱུ་མ་དྲངས་པ་དང་ཟོང་རྣམས་ས་ལ་བྱུང་ཞིང་འདུག་གོ།

དགེ་སློང་ཞིག་དུར་ཁྲོད་དུ་མི་རོ་ལ་རྟོག་ཏུ་སོང་བ་དང་།

དེས་ཟོང་དེ་མཐོང་ནས་དེ་དག་ཁྱེར་ཏེ་དགེ་འདུན་ལ་ཕུལ་བ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ནད་པ་ཞིག་ཡོད་དེ་དེ་ལ་ཤིང་གི་དངོས་པོ་མང་དུ་ཡོད་པ་དང་།

དེས་ནད་གཡོག་རྣམས་ལ་ཚེ་དང་ལྡན་པ་དག་དགེ་སློང་རྣམས་བོས་ཤིག །

དགེ་འདུན་ལ་འབུལ་ལོ།

མཆོད་རྟེན་ལ་འབུལ་ལོ།

གང་ཟག་རྣམས་ལ་འབུལ་ལོ་ཞེས་སྨྲས་པ་དང་།

ནད་གཡོག་རྣམས་འདི་སྙམ་དུ་དགེ་འདུན་དང་མཆོད་རྟེན་ལ་ཕུལ་ན་བདག་ཅག་གིས་ཅུང་ཟད་ཀྱང་མི་ཐོབ་བོ་སྙམ་ནས།

དེ་དག་གིས་དགེ་སློང་མ་བོས་སོ།

དགེ་སློང་དེ་ཡང་དུས་ལས་འདས་ནས་དེ་དག་འགྱོད་པ་སྐྱེས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

ནད་པ་དང་མི་མཐུན་པར་ནད་གཡོག་གིས་མ་བྱེད་ཅིག །

ནད་

པས་ཇི་ལྟར་བསྒོ་བ་བཞིན་དུ་དེ་དག་གིས་བསྒྲུབ་པར་བྱའོ།

འོན་ཏེ་རྣམ་གྲངས་གཞན་ཞིག་ཏུ་འགོད་པར་གྱུར་ན་ཡང་ཇི་ལྟར་ནད་པས་བསྒོ་བ་དེ་ལྟར་བྱོས་ཤིག །

དགེ་སློང་ནད་པ་ཞིག་ཡོད་དེ།

དེ་ལ་ལྷུང་བཟེད་དང་ཆོས་གོས་མང་དུ་ཡོད་པ་དང་།

དེས་ནད་གཡོག་རྣམས་ལ་དགེ་སློང་རྣམས་བོས་ཤིག་མཆོད་རྟེན་ལ་འབུལ་ལོ།

དགེ་འདུན་ལ་འབུལ་ལོ།

གང་ཟག་ལ་འབུལ་ལོ་ཞེས་སྨྲས་པ་དེ་ཡང་དེ་བཞིན་དུ་རྒྱས་པར་བརྗོད་པར་བྱའོ།

མདོར་ན།

ཙན་ད་ལ་ཀ་སོ་ད་ཡི།

སྦྱར་མ་དང་ནི་བརྙ་བ་དང་།

སུ་ཤི་མ་དང་བཟང་སྦྱིན་དང་།

རང་གིར་འདུ་ཤེས་ལྷུང་བཟེད་བླངས་པ་དང་།

ཨ་ཛི་ཏ་དང་ཤ་ཤི་གུབ་ཏ་དང་།

རང་གི་གོས་རྣམས་བརྐུས་པའོ།

མདོ་ཚིགས་སུ་བཅད་པ་འདི་ནི་ཇི་ལྟར་རྣམ་པར་འབྱེད་པ་ལས་འབྱུང་བ་བཞིན་ནོ།

མདོར་ན།

དགེ་སློང་མ་ཡང་གཉིས་ལྡན་དང་།

མཽད་གལ་བུ་དང་གཞན་ཡང་གཉིས།

པི་ལིན་ད་ཡི་གཉིས་པོ་དང་།

ཉེ་དགའ་བོ་དང་སྤོང་བ་པོའོ།

དགེ་སློང་མ་གཉིས་དང་ལྡན་པ་ན་ཇི་ལྟར་འདུལ་བ་བཞིན་ནོ།

མཉན་དུ་ཡོད་པའི་ཚོང་པ་དག་ཅིག་གྲུ་ཆེན་པོར་ཞུགས་ནས་རྒྱ་མཚོ་མཆིང་རྣམ་རྒལ་ཏེ་དེ་དག་རྒྱ་མཚོ་མཆིང་རྣམ་གྱི་ནང་ནས་དོང་བ་དང་གྲུ་བོ་ཆེ་ཀླུས་བཟུང་ནས་ལྷ་བྲན་རྣམས་ལ་གསོལ་ཀྱང་མ་བཏང་བ་དང་།

དེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་གྲོང་དུ་ཉེ་བར་འགྲོ་བའི་དགེ་བསྙེན་ཞིག་ཡོད་དེ།

དེས་འདི་སྙམ་དུ་དེ་སྟེ་འཕགས་པ་མཽད་གལ་གྱི་བུ་ཆེན་པོས་དགོངས་ན་ནི་བཀྲ་ཤིས་པར་གྱུར་ཅིག་ཅེས་བསམས་པ་དང་།

གནས་བརྟན་གྱིས་ཀྱང་དགོངས་ཏེ་ཇི་ལྟར་སེམས་སྙོམས་པར་ཞུགས་པས་བྱའི་རྒྱལ་པོ་ནམ་མཁའ་ལྡིང་དུ་གྱུར་ནས།

གྲུའི་དངོར་འདུག་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང་།

ཀླུ་དེ་དག་སྐྲག་སྟེ།

གྲུ་བོ་ཆེ་དེ་བཏང་ནས་ཚོང་པ་རྣམས་བདེ་བར་མཉན་དུ་ཡོད་པར་ཕྱིན་ཏེ།

ཐམས་ཅད་ནི་འཕགས་པ་མཽད་གལ་གྱི་བུའི་མཐུའོ་ཞེས་བརྗོད་ནས།

དགེ་སློང་དག་གིས་འདི་ཇི་ལྟ་ཞེས་དྲིས་པ་དང་།

དེ་ལྟར་གྱུར་པ་རྒྱས་པར་སྨྲས་ཏེ།

དེ་ནས་དགེ་སློང་དེ་དག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ནི་ཕས་ཕམ་པའི་ཉེས་པ་བྱུང་ངོ་།

དངོས་པོ་གང་

གི་ཕྱིར།

ཀླུས་གྲུ་ཟིན་པ་མ་བྱིན་པར་བཏང་ངོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

མཽད་གལ་གྱི་བུ་ཁྱོད་ཀྱིས་ཇི་ལྟར་བསམས་ཏེ་བཏང་ཞེས་སྨྲས་པ་དང་།

རྫུ་འཕྲུལ་རྣམ་པར་སྤྲུལ་པར་བསམས་སོ།

མཽད་གལ་གྱི་བུས་རྫུ་འཕྲུལ་གྱིས་བཏང་བ་ལ་ནི་ཉེས་པ་མེད་དོ།

མཉན་དུ་ཡོད་པའི་ཚོང་པ་དག་ནོར་ཁྱེར་ཏེ་ལྗོངས་རྒྱུར་དོང་ནས་དེ་དག་མྱ་ངམ་གྱི་ནང་དུ་ཕྱིན་པ་དང་།

འགྲོན་པ་མང་པོ་དེ་དག་རྐུན་པོས་བསྐོར་ནས་དེ་དག་གིས་ལྷ་རྣམས་ལ་གསོལ་ཀྱང་མ་བཏང་བ་དང་།

དེ་དག་གི་ནང་ན་ཚེ་དང་ལྡན་པ་མཽད་གལ་གྱི་གྲོང་དུ་ཉེ་བར་འགྲོ་བའི་ཚོང་པ་ཞིག་ཡོད་པ་དེས་འདི་སྙམ་དུ་དེ་སྟེ་གནས་བརྟན་གྱིས་དགོངས་ན་ནི་བཀྲ་ཤིས་པར་གྱུར་ཅིག་ཅེས་བསམས་པ་དང་།

གནས་བརྟན་གྱིས་ཀྱང་དགོངས་ནས་ཇི་ལྟར་སེམས་སྙོམས་པར་ཞུགས་པས་རྐུན་པོ་རྣམས་དཔུང་གི་ཚོགས་ཡན་ལག་བཞི་པས་བསྐོར་བར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང་།

རྐུན་པོ་དེ་དག་སྐྲག་སྟེ།

འགྲོན་པ་མང་པོ་རྣམས་བཏང་སྟེ་བྲོས་པ་དང་།

ཚོང་པ་དེ་དག་བཀྲ་ཤིས་ཤིང་བདེ་བར་མཉན་དུ་ཡོད་པར་ཕྱིན་ཏོ།

དེ་དག་གིས་ཇི་ལྟར་གྱུར་པ་དགེ་སློང་རྣམས་ལ་རྒྱས་པར་སྨྲས་ཏེ་སྔ་མ་བཞིན་ནོ།

པི་ལིན་དའི་བུ་གཉིས་ནི་རྒྱས་པར་འདུལ་བ་ལས་ཇི་སྐད་འབྱུང་བ་བཞིན་ནོ།

ཤཱཀྱའི་བུ་ཉེ་དགའ་བོ་དབྱར་གྱི་ཟླ་བ་ཐ་མ་ལ་གང་དུ་དགེ་སློང་ཇི་སྙེད་ཅིག་དབྱར་ཚུལ་དུ་ཞུགས།

གང་དུ་དགེ་འདུན་གྱི་རྙེད་པ་ཇི་སྙེད་ཅིག་རྙེད་ཅེས་གཙུག་ལག་ཁང་དུ་རྒྱུ་ཞིང་སྤྱོད་དེ།

དེ་གནས་གང་དང་གང་དུ་ཕྱིན་པའི་དགེ་སློང་དེ་དག་གིས་ཚིག་སྙན་པས་བསུ་བ་དང་།

ཁྱེད་བདེ་བར་གནས་སམ་ཞེས་དྲིས་ཏེ་འདུག་ནས་དགེ་འདུན་གྱི་རྙེད་པ་ཅི་ཡོད་པ་འོན་ཅིག་དང་བགོས་ལ།

གང་ཁོ་བོའི་གོས་ཀྱི་སྐལ་བ་དེ་ནི་བཀུར་རོ་ཞེས་སྨྲས་པ་དང་།

དེ་དག་གིས་ཁྱེར་ཏེ་འོངས་ནས་དེའི་མདུན་དུ་བཞག་པ་དང་།

དེ་བགོས་ནས་དགེ་འདུན་གྱི་གནས་བརྟན་གྱི་གོས་ཀྱི་སྐལ་བ་ཁྱེར་ཏེ་ལངས་པ་དང་།

དེས་ཡང་གནས་བརྟན་ད་དུང་མ་བཞུད་པར་བཞུགས་ཤིག་ཅེས་སྨྲས་པ་དང་།

ཉེ་དགའ་བོ་

ཡང་གཏམ་སྙན་པ་གཏམ་སྣ་ཚོགས་བདེ་བ་ལ་སྤོབས་པ་དང་ལྡན་ཏེ།

རིགས་པ་དང་གྲོལ་བ་ལ་སྤོབས་པས་ན་དེས་ཇི་ལྟར་གནས་བརྟན་ལ་དད་པར་འགྱུར་བ་དེ་ལྟ་བུའི་ཆོས་བཤད་པ་དང་།

དེས་བདག་གི་གོས་ཀྱི་སྐལ་བ་ཅི་ཡོད་པ་ཚེ་དང་ལྡན་པ་བཞེས་ཤིག་ཅེས་སྨྲས་པ་དང་།

དེ་བཞིན་དུ་གནས་བརྟན་གཉིས་པ་དང་།

གནས་བརྟན་གསུམ་པ་དང་དགེ་སློང་དེ་དག་ལས་མང་ཞིག་གིས་གོས་དེ་ལ་བྱིན་ནས།

དེས་གོས་དེ་དག་ཁུར་དུ་ཁྱེར་ཏེ་ཛེ་ཏའི་ཚལ་དུ་ཞུགས་པ་དང་།

དགེ་སློང་དག་གིས་ཚེ་དང་ལྡན་པ་ཉེ་དགའ་བོ་ལ་གོས་འདི་དག་ག་ལས་བརྙེས་ཞེས་དྲིས་ནས།

དེས་དེ་དག་ལ་དེ་ལྟ་བུར་གྱུར་པ་རྒྱས་པར་སྨྲས་སོ།

དེ་ལྟ་བུ་འབྱུང་མོད་ཀྱི།

སངས་རྒྱས་བཅོམ་ལྡན་འདས་ཀྱིས་ནི་ད་དུང་བསླབ་པའི་གནས་མ་བཅས་སོ།

རྒན་ཞུགས་གཉིས་ནི་རྒྱས་པར་ཇི་ལྟར་འདུལ་བ་ལས་འབྱུང་བ་བཞིན་ནོ།

དགེ་སློང་གིས་གཞན་གྱི་དབྱར་གྱི་གོས་སྐལ་བ་མ་ལེན་ཅིག །

སུས་བླངས་པ་དེ་ཉེས་བྱས་སུ་འགྱུར་རོ།

ཚེ་དང་ལྡན་པ་ཀུན་དགའ་བོའི་ལྷན་ཅིག་སྤྱོད་པ་སྤོང་བ་པོ་ཞེས་བྱ་བ་དེས་པ།

ཚུལ་ཁྲིམས་དང་ལྡན་པ་ཞིག་སྟེ།

དེ་ཁྱིམ་བདག་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་ལ་བུ་གཉིས་ཤིག་ཡོད་དེ་ཁྱིམ་བདག་དེ་ཡང་ནད་ཀྱིས་བཏབ་བོ།

དེ་དེ་ལ་ནད་འདྲིར་སོང་བ་དང་།

དེས་དེ་ལ་ནོར་བྱིན་ནོ།

གཉིས་པོས་ནི་ཅི་ཡང་མ་ཐོབ་ནས་དེས་ཚེ་དང་ལྡན་པ་ཀུན་དགའ་བོ་ལ་འཁངས་པ་དང་།

ཚེ་དང་ལྡན་པ་ཀུན་དགའ་བོས་སྤོང་བ་པོ་ཆད་པས་བཅད་པ་དང་།

དེ་སྔོན་སློབ་མ་ལས་རབ་ཏུ་བྱུང་བས་ན་དེས་སློབ་མ་ལྔ་བརྒྱ་ཙམ་ཞིག་གཟེངས་བསྟོད་དེ་བདག་གི་མཁན་པོ་ལ་བཟོད་པ་གསོལ་ཅིག་ཅེས་སྨྲས་པ་དང་།

ཁྱོད་ཀྱི་མཁན་པོ་ལ་བཟོད་པ་ཇི་ལྟར་བྱ།

ཁྱོད་ཀྱིས་ཁྱེའུ་རྣམས་ཁྲིད་ལ་མཁན་པོའི་དྲུང་དུ་དེངས་ཤིག་དང་།

དེས་ཁྱེད་ཅག་ལ་ཆོས་འཆད་པར་འགྱུར་གྱིས་གང་གི་ཚེ་ཆོས་བཤད་ཟིན་པར་གྱུར་པ་དེའི་ཚེ་ཁྱེའུ་དང་བུ་མོ་རྣམས་བོར་ལ་དེངས་ཤིག་དང་།

དེ་དག་ངུས་པས་བུ་མོ་དང་ཁྱེའུ་དེ་དག་ཁྲིད་དེ་དེང་ཞེས་དེ་ཟེར་བ་དང་།

དེ་ལ་དེ་སྟེ་སྤོང་བ་པོ་ལ་ཡང་བཟོད་པར་

མཛད་དམ་ཞེས་སྨྲོས་ཤིག་ཅེས་སྨྲས་པ་དང་།

དེ་དག་གིས་ཇི་ལྟར་བསྒོ་བ་བཞིན་གང་གི་ཚེ་ཆོས་བཤད་ཟིན་པ་དེའི་ཚེ་ཁྱེའུ་དང་བུ་མོ་རྣམས་བོར་ཏེ་དོང་བ་དང་།

དེ་དག་རབ་ཏུ་ངུས་ནས་ཚེ་དང་ལྡན་པ་ཀུན་དགའ་བོས་སྨྲས་པ།

ཁྱེའུ་དང་བུ་མོ་འདི་དག་ཁྲིད་ལ་དེང་འདི་དག་ཅིའི་ཕྱིར་དོང་ཞེས་སྨྲས་པ་དང་།

དེ་དག་གིས་དེ་སྟེ་སྤོང་བ་པོ་ལ་ཡང་བཟོད་པར་མཛད་དམ་ཞེས་སྨྲས་པ་དང་།

བཟོད་པར་བྱས།

ཉེས་བྱས་ཀྱི་ཉེས་པ་བཤགས་པར་གྱིས་ཤིག །

མདོར་ན།

ཕག་དང་བུ་རམ་ཤིང་གི་སྡོང་བུ་དང་།

གནག་དགའ་བོ་ཡི་ཆོས་གོས་དང་།

མར་བྲེ་གང་དང་ཨ་ག་རུ།

གཟིག་དང་སེང་གེ་ལྔ་པའོ།

ཕག་དང་བུ་རམ་ཤིང་གི་སྡོང་བུ་དང་།

གནག་དགའ་བོའི་ཆོས་གོས་རྣམས་ནི་རྒྱས་པར་ཇི་ལྟར་འདུལ་བ་ལས་འབྱུང་བ་བཞིན་ནོ།

དགེ་སློང་བསོད་ནམས་ཆེ་བ་ཚོང་པ་རྣམས་ལ་གྲགས་པ་དེ་ལ་ཚོང་པ་གཞན་ཞིག་གིས་དེ་ལ་ཅི་དགོས་པ་དང་ཅི་མཁོ་བ་རྣམས་བདག་གིས་གསོལ་ལོ་ཞེས་བསྟབས་པ་དང་།

དགེ་སློང་དེའི་ནད་གཡོག་དེས་འདི་སྙམ་དུ་ཚོང་པ་དེ་ཡང་དང་ཡང་དུ་སྟོབས་ན་དེ་ལ་བདག་གིས་ཇི་ལྟར་སྙིང་ནས་སྟོབས་སམ།

ཁ་འགྲོན་ཙམ་དུ་སྟོབས་བགམ་མོ་སྙམ་དུ་བསམས་ནས་དེ་དེའི་དྲུང་དུ་སོང་སྟེ།

འདི་སྐད་དུ་མཁན་པོ་ལ་མར་ཞིག་དགོས་སོ་ཞེས་སྨྲས་པ་དང་།

དེ་ལ་མར་བྲེ་གང་བྱིན་ནས་ཡང་བཙུན་པ་སྲན་མའི་ཁུ་བའམ་ཤ་ཁུའང་རུང་སྟེ་ཅི་དགོས་པ་འདི་ནས་སྣོམས་ཤིག་ཅེས་སྨྲས་པ་དང་།

དེ་ལྟར་བགྱིའོ་ཞེས་སྨྲས་ནས་དགེ་སློང་དེས་མར་དེ་དགེ་སློང་དེའི་སྲན་མའི་ཁུ་བ་དང་ཤའི་ཁུ་བ་རྣམས་སུ་ཅུང་ཟད་བླུགས་སོ།

ཇི་ཙམ་ཞིག་ན་ཚོང་པ་དེ་དགེ་སློང་དེ་ལ་འཕགས་པ་ཁོ་བོས་ཁྱོད་ལ་མར་ནི་སྔར་བསྐུར་རོ།

དེ་སྟེ་གཞན་ཡང་སྲན་མའི་ཁུ་བའམ་ཤ་ཁུ་ཡང་རུང་སྟེ།

ཅི་དགོས་པ་དེ་དག་ལོང་ཤིག་ཅེས་སྤྲིང་བ་དང་།

དགེ་སློང་དེས་ནད་གཡོག་དེ་ལ་ཚོང་པ་འདི་ཞེས་བྱ་བ་ལ་མར་བླངས་སམ་ཞེས་དྲིས་ནས་བླངས་སོ་ཞེས་སྨྲས་པ་དང་།

འོ་ན་ཕས་ཕམ་པའི་ཉེས་པ་བྱུང་ངོ་།

མཁན་པོ་ལ་ཚོང་པ་དེ་ཡང་དང་ཡང་དུ་སྟོབས་ནས་བརྟག་ཅིང་བགམ་པའི་ཕྱིར་བདག་གིས་བླངས་ནས་མཁན་པོ་ཡིར་བགྱིས་སོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ་དེ་ནས་འདི་དང་འདི་བླང་ངོ་ཞེས་དྲིས་ཏེ་སོང་ཤིག །

མདོར་ན།

བདེ་བ་ལྡན་དང་འདུ་ཤེས་དང་།

ཆུང་མ་གཉིས་དང་སྡིག་ཅན་ལྔ།

མངལ་ན་གནས་པ་བཅུར་བྱས་དང་།

དགེ་སློང་མ་ཡིན་གཞན་ཡང་བཅུ།

སངས་རྒྱས་བཅོམ་ལྡན་འདས་ཡུལ་བྲྀ་ཛིའི་ཐང་ཤིང་གི་གནས་ན་བཞུགས་ཏེ།

ཀླུང་བདེ་ལྡན་གྱི་ངོགས་ཀྱི་དགེ་སློང་རྣམས་ལ་བསླབ་པའི་གནས་མ་བཅས་པས་ལས་དང་པོ་པ་རྣམས་ལ་ཉེས་པ་མེད་པར་གྱུར་པ་ན་དགེ་སློང་དག་ཐེ་ཚོམ་དང་ཡིད་གཉིས་དང་འགྱོད་པ་རྣམས་སྐྱེས་ཏེ།

བདག་ཅག་གིས་བསླབ་པའི་གནས་མ་བཅས་པར་དགེ་སློང་མང་ཞིག་ལ་འཆི་བར་བསྟབས་ན།

བདག་ཅག་གི་ལས་དང་པོ་གང་ཡིན་སྙམ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

ཀླུང་བདེ་ལྡན་གྱི་དྲུང་དུ་དགེ་སློང་དག་གནས་མ་བཅས་པ་ན་འདས་པ་དང་བཅས་པ་ནི་ཐམས་ཅད་དུ་ལས་དང་པོ་པ་སྟེ།

ལས་དང་པོ་ལ་ཉེས་པ་མེད་དོ།

དགེ་སློང་གིས་མི་ལ་མི་མ་ཡིན་པར་འདུ་ཤེས་ཏེ་འཚོ་བ་དང་ཕྲལ་བ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

མི་ལ་མི་མ་ཡིན་པར་འདུ་ཤེས་ན་ཉེས་པ་སྦོམ་པོར་འགྱུར་རོ།

མི་མ་ཡིན་པ་ལ་མི་མ་ཡིན་པར་འདུ་ཤེས་ནའང་ཉེས་པ་སྦོམ་པོར་འགྱུར་རོ།

མི་མ་ཡིན་པ་ལ་ཐེ་ཚོམ་ནའང་ཉེས་པ་སྦོམ་པོར་འགྱུར་རོ།

དགེ་སློང་ཞིག་ཡུན་རིང་ཞིག་ཏུ་ནད་ཀྱིས་གཟིར་ནས་དེས་བདག་ལ་འདི་ཅི་དགོས་སྙམ་དུ་བསམས་ནས་དགེ་སློང་དེས་མཛའ་བོའི་དྲུང་དུ་སོང་སྟེ་འདི་སྐད་དུ་གྲི་བྱིན་ཞེས་སྨྲས་པ་དང་།

ཁྱོད་ལ་གྲི་ཅིར་དགོས།

རེ་ཞིག་བྱིན་ཅིག་ཅེས་སྨྲས་ནས།

དེས་བྱིན་པ་དང་།

དེ་གནས་ཁང་དུ་ཞུགས་ཏེ་སྒོ་བཅད་དེ་གཏན་པ་བཅུག་སྐྱིལ་མོ་ཀྲུང་བཅས་ཏེ་འདུག་ནས།

བདག་ཉིད་ཀྱིས་སྲོལ་ཀོང་བཅད་དོ།

དེ་དེ་ལྟར་གྲི་ལག་ན་ཐོགས་བཞིན་དུ་དུས་ལས་འདས་པ་དང་།

དགེ་སློང་དེས་ཉི་མ་གཉིས་སམ་གསུམ་ལོན་ནས་འདི་སྙམ་དུ་དགེ་སློང་དེས་གྲི་ཁྱེར་ཏེ་སོང་གིས་སོང་ལ་བལྟའོ།

སྙམ་དུ་བསམས་ནས།

དེ་དེའི་གནས་ཁང་དུ་སོང་བ་དང་།

དགེ་སློང་དེ་སྐྱིལ་མོ་ཀྲུང་བཅས་ཏེ་སྲོལ་ཀོང་བཅད་དེ་གྲི་ཐོགས་

བཞིན་དུ་དུས་ལས་འདས་པར་མཐོང་ནས།

དགེ་སློང་དེ་འགྱོད་པ་སྐྱེས་ནས།

གང་ཅུང་ཟད་འདི་དུས་ལས་འདས་པ་ཐམས་ཅད་ནི་རྒྱུ་བ་དག་ལས་བྱུང་སྟེ།

དེ་སྟེ་བདག་གིས་གྲི་མ་བྱིན་པར་གྱུར་ན་ནི་འདི་ཡང་བདག་ཉིད་ཀྱིས་འཚོ་བ་དང་ཕྲལ་བར་མི་འགྱུར་རོ་སྙམ་དུ་བསམས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

ཕྱིན་ཆད་ནད་པ་ལ་བབ་བབ་ཏུ་གྲི་མ་སྦྱིན་ཅིག །

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་སོང་ནས་དེ་གྲོང་དུ་ཕྱིན་པ་དང་།

དེའི་བུད་མེད་དེས་བཙུན་པ་ཚུར་སྤྱོན་མི་ཚངས་པར་སྤྱད་དོ་ཞེས་སྨྲས་པ་དང་།

དགེ་སློང་གིས་ཁྱོད་ཀྱི་ཁྱོ་དེ་ནི་ཁྲོ་ལ་མི་སྲུན་ནོ་ཞེས་སྨྲས་པ་དང་།

དེས་བཙུན་པ་ཇི་ནས་ཁྲོ་ལ་མི་སྲུན་པར་མི་འགྱུར་བ་དེ་ལྟར་བགྱིའོ་ཞེས་སྨྲས་ནས།

དེས་དེ་ལ་དུག་བྱིན་པ་དང་།

ཁྱིམ་བདག་དེ་དུས་ལས་འདས་སོ།

དགེ་སློང་དེ་ཞག་གཅིག་འདས་པ་དང་ཁྱིམ་དེར་སོང་བ་དང་།

བུད་མེད་དེས་བཙུན་པ་ཚུར་སྤྱོན་མི་ཚངས་པར་སྤྱད་དོ་ཞེས་སྨྲས་པ་དང་།

སྲིང་མོ་དེ་སྐད་མ་ཟེར་ཅིག །

ཁོ་བོ་ནི་ཚངས་པར་སྤྱོད་པ་ཡིན་ནོ།

དེས་བཙུན་པ་གང་གི་ཚེ་ཁོ་མོས་ཁྱོ་འཚོ་བ་དང་ཕྲལ་བ་དེའི་ཚེ་གདོད་ཚངས་པར་སྤྱོད་དམ་ཞེས་སྨྲས་པ་དང་།

ཅི་ཁྱོད་ཀྱིས་ཁྱོ་འཚོ་བ་དང་ཕྲོལ་ཅིག་ཅེས་ཁོ་བོས་སྨྲས་སམ།

ཁྱོད་ཀྱི་ཁྱོ་འདི་ཁྲོ་ལ་མི་སྲུན་པའོ་ཞེས་མ་སྨྲས་སམ།

ཅི་ཁོ་བོས་ཁྱོད་ཀྱི་ཁྱོ་འདི་ཁྲོ་ལ་མི་སྲུན་པའོ་ཞེས་ནི་སྨྲས་ཀྱི།

ཁྱོད་ཀྱི་ཁྱོ་འདི་འཚོ་བ་དང་ཕྲོལ་ཅིག་ཅེས་ནི་མ་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་གྲོང་གཞན་དུ་གྲོང་དུ་ཉེ་བར་སོང་ནས་བྱེད་པ་ལས་ཁྱོད་ཀྱི་ཁྱོ་འདི་ནའོ་ཞེས་བྱ་བ་ནི་རྒྱས་པར་རོ།

དགེ་སློང་ཞིག་གིས་གསད་པར་བསམས་ཏེ།

བརྡེགས་པ་ལས་དུས་ལས་འདས་ན་ཕས་ཕམ་པར་འགྱུར་རོ།

དུས་ལས་མ་འདས་ན་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་མ་བསྲུང་བའི་ཕྱིར་མངལ་ན་གནས་པ་མཉེས་པ་ལས་མངལ་ན་གནས་པ་ཤི་ན་ཕས་ཕམ་པར་འགྱུར་རོ།

མ་ཤི་ན་ཉེས་པ་སྦོམ་པོར་འགྱུར་རོ།

གཉིས་ཀ་ཤི་ན་ཕས་ཕམ་པར་འགྱུར་རོ།

གཉིས་ཀ་མ་ཤི་ན་ཉེས་པ་སྦོམ་པོར་འགྱུར་རོ།

མངལ་

ན་གནས་པའི་མི་ཤི་བ་ཕྱུང་ན་ཉེས་པ་སྦོམ་པོར་འགྱུར་རོ།

བྱོལ་སོང་གི་མངལ་ན་གནས་པ་ཕྱུང་ན་ཡང་ཉེས་པ་སྦོམ་པོར་འགྱུར་རོ།

དེ་ལྟར་དགེ་སློང་མས་བྱས་ནའང་དེ་བཞིན་ནོ།།

འདུལ་བ་གཞུང་དམ་པ།

བམ་པོ་ཉི་ཤུ་བཞི་པ།

མདོར་ན།

རྩབ་མོ་རྣམ་པ་ལྔ་པ་དང་།

ལས་གསར་དག་དང་རྡོ་བ་དང་།

བ་ལང་རྭ་དང་ཝ་མོ་དང་།

སྟན་དང་སྨྱོན་པར་གྱུར་པའོ།

དགེ་སློང་ཞིག་གིས་དགེ་འདུན་ལ་བཏུང་བ་རྩབ་མོ་བྲིམས་པ་དང་།

དེར་དགེ་སློང་མང་ཞིག་དུས་ལས་འདས་སོ།

དགེ་སློང་དེ་འགྱོད་པ་སྐྱེས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་མཛའ་བོ་གཉིས་ཤིག་འཁོད་པ་ལས་གཅིག་ནད་ཀྱིས་བཏབ་སྟེ་ཉལ་ནས།

དེས་ནད་གཡོག་ལ་ཚེ་དང་ལྡན་པ་རྩབ་མོ་ཞིག་རྙེད་ན་ནི་ཁོ་བོ་བདེ་བར་འགྱུར་རོ།

ཞེས་སྨྲས་ཏེ།

རྒྱས་པར་ནི་འདུལ་བ་ལས་ཇི་སྐད་འབྱུང་བ་བཞིན་ནོ།

བྲམ་ཟེ་ཞིག་གློག་པའི་ནད་ཀྱིས་གཟིར་བ་དང་།

དེ་དགེ་སློང་ཞིག་གི་དྲུང་དུ་སོང་སྟེ་འདི་སྐད་དུ་བཙུན་པ་གལ་ཏེ་རྩབ་མོ་ཞིག་རྙེད་ན་ནི་བདེ་བར་འགྱུར་རོ་ཞེས་སྨྲས་པ་དང་།

ཁྱོད་བྲམ་ཟེ་ལོག་པར་ལྟ་བ་རྩབ་མོ་ཅིར་དགོས།

བཙུན་པ་སྔོན་བདག་ནད་ཀྱིས་བཏབ་པ་ན་ཡང་རྩབ་མོ་ཞིག་འཐུངས་པས་བདག་བདེ་བར་གྱུར་ཏོ།

དགེ་སློང་དེས་རྩབ་མོ་བླུད་པ་དང་།

དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་དུར་ཁྲོད་དུ་མི་རོ་ལ་རྟོག་ཏུ་སོང་བ་དང་།

དེ་ན་མི་ཞིག་གསལ་ཤིང་ཞིག་བཙུགས་ཤིང་འདུག་པ་དང་།

དེས་དགེ་སློང་ལ་བཙུན་པ་དེ་སྟེ་ཁོ་བོ་ལ་རྩབ་མོ་ཞིག་བླུད་ན་ནི་ཁོ་བོ་བདེ་བར་འགྱུར་རོ།

ཞེས་སྨྲས་པ་དང་།

དགེ་སློང་དེས་དེ་ལ་རྩབ་མོ་བླུད་ནས་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

རྐུན་པོ་ལྔ་བརྒྱ་ཞིག་དགེ་སློང་མ་ཞིག་གིས་རྩབ་མོ་བླུད་པ་དང་།

དེ་དག་ཀྱང་དུས་ལས་འདས་ཏེ་རྒྱས་པར་ནི་འདུལ་བ་ལས་ཇི་སྐད་འབྱུང་བ་བཞིན་ནོ།

དགོན་པ་གསར་ཅན་ཞེས་བྱ་བ་ན་གནས་ཁང་སར་པ་ཞིག་རྩིག་པ་ལས་དགེ་སློང་ཞིག་

གི་ལག་པ་ནས་ཕ་གུ་ཞིག་ལྷུང་བ་དང་།

འོག་ན་ལས་བྱེད་པ་ཞིག་འདུག་པ་དེའི་སྟེང་དུ་ལྷུང་ནས་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

བག་ཡོད་པར་བྱོས་ལ་གྲོགས་གྱིས་ཤིག །

དགོན་པ་ལ་དགེ་འདུན་གྱིས་གནས་ཁང་སར་པ་རྩིག་པ་ན་དགེ་སློང་ཞིག་བླ་གབ་མེད་པའི་སྟེང་ན་སོ་ཕག་འཇོག་པའི་ལག་པ་ནས་སྟེའུ་ལྷུང་སྟེ།

འོག་ན་རྩི་གུ་མཁན་ལས་བྱེད་པའི་སྟེང་དུ་ལྷུང་ནས་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

བག་ཡོད་པར་བྱོས་ལ་གྲོགས་གྱིས་ཤིག །

དགོན་པར་དགེ་འདུན་གྱི་དུགས་བྱ་བའི་ཁང་པ་ཞིག་རྩིག་སྟེ།

དགེ་སློང་དག་གདུང་མ་སྟེང་དུ་འདྲེན་པ་ལས་དགེ་སློང་ཉུང་ལ་ཁུར་ཆེ་ཞིང་ལྕི་བས་དེ་དག་གིས་བཏང་བ་དང་།

འོག་ན་ཤིང་མཁན་ཤིང་འཇོག་པའི་སྟེང་དུ་ལྷུང་ནས་དེ་དུས་ལས་འདས་སོ།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

ཉུང་ངུ་མས་ཁུར་ལྕི་བ་མ་འདེགས་ཤིག །

སྐས་འདེགས་པའང་དེ་བཞིན་ནོ།

དགོན་པར་དུགས་བྱ་བའི་ཁང་པ་ཞིག་རྩིག་སྟེ།

དེ་ན་དགེ་སློང་ཞིག་སེལ་པོའི་ནང་དུ་འཇིམ་པ་སྟེང་དུ་སྐྱེད་པ་ན་ཐག་པ་ངན་ཏེ་ཆད་པས་འོག་ན་རྩིག་གུ་མཁན་ལས་བྱེད་པའི་སྟེང་དུ་འཇིམ་པའི་སེལ་པོ་ལྷུང་ནས་དེ་དུས་ལས་འདས་སོ།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་ཀྱིས་བག་ཡོད་པར་བྱོས་ལ་གྲོགས་གྱིས་ཤིག །

བཅོམ་ལྡན་འདས་རྒྱལ་པོའི་ཁབ་ན་བཞུགས་སོ།

དགེ་སློང་ཞིག་རིའི་དྲུང་ན་སྐྱིལ་མོ་ཀྲུང་བཅས་ཏེ་འདུག་པ་དང་།

དགེ་སློང་ཞིག་གིས་རིའི་རྩེ་མོ་ནས་རྡོ་བ་བསྒྲིལ་བ་དགེ་སློང་དེའི་སྟེང་དུ་ལྷུང་ནས་དགེ་སློང་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཤིན་ཏུ་རྟོགས་ལ་བག་ཡོད་པར་བྱོས་ལ་རྡོ་བསྒྲིལ་བར་བྱའོ།

དགེ་སློང་ཞིག་བ་ལང་གི་ནང་དུ་སོང་བ་དང་།

གླང་མི་སྲུན་པ་ཞིག་གིས་བརྡུངས་ནས་ཁྱེའུ་ཞིག་གི་སྟེང་དུ་འགྱེལ་བ་དང་

ཁྱེའུ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

བག་ཡོད་པར་བྱོས་ལ་བ་ལང་གི་ནང་དུ་སོང་ཤིག །

དགེ་སློང་ཞིག་ནད་ཡུན་རིང་པོས་སྒུར་བོར་གྱུར་པ་དང་།

དེ་འདི་སྙམ་དུ་བདག་གསོན་ཏེ་ཅི་རུང་གིས་སོང་ལ་བདག་ཉིད་གཡང་ས་ནས་མཆོང་ངོ་སྙམ་དུ་བསམས་ཏེ།

དེས་བདག་ཉིད་གཡང་ས་ནས་མཆོངས་པ་དང་།

དྲུང་ན་ཝ་མོ་ཞིག་མི་རོ་ལ་ཟ་བ་དེའི་སྟེང་དུ་དགེ་སློང་ལྷུང་ནས་ཝ་མོ་དེ་ནི་དུས་ལས་འདས་སོ།

དགེ་སློང་དེ་ནི་དྲང་པོར་གྱུར་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

དེ་ལྟར་ལུས་ཀྱིས་ལོག་པར་འགྱུར་བ་མ་བྱེད་ཅིག །

དགེ་སློང་ནད་པ་ཞིག་སྟན་གྱི་སྟེང་ན་འདུག་པ་ལ་དེའི་ནད་གཡོག་གིས་ཚེ་དང་ལྡན་པ་ལོངས་ཞེས་སྨྲས་པ་དང་།

དེས་ཀྱང་ཁོ་བོ་མ་བསླང་ཤིག་ཤིར་འོང་ངོ་ཞེས་སྨྲས་ཀྱང་ཚེ་དང་ལྡན་པ་ལོངས་ཞེས་སྨྲས་ནས།

དེ་ལངས་པ་དང་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་གིས་སྨྱོན་པ་ཞིག་ལ་གསོད་སེམས་ཀྱིས་བརྡེགས་ཏེ་དེ་དུས་འདས་ན་ནི་ཕས་ཕམ་པར་འགྱུར་རོ།

དུས་མ་འདས་ན་ནི་ཉེས་པ་སྦོམ་པོར་འགྱུར་རོ།

མདོར་ན།

ཡོ་བྱད་མང་དང་མ་ཞུ་དང་།

ཕོལ་མིག་གཉིས་དང་ཟས་མ་ཡིན།

སྨན་དང་ཟས་བཟང་སྤྱོད་ལམ་དང་།

ཉེས་པ་མེད་དེ་གཞན་ཡང་སྦྱར།

དགེ་སློང་ཞིག་ནད་ཡུན་རིང་པོས་གཟིར་ནས་དེའི་ནད་གཡོག་སྐྱོ་སྟེ་དེ་ལ་ཁྱོད་མྱུར་དུ་འཆི་བར་འགྱུར་གྱིས་ནད་གཡོག་མི་བྱའོ་ཞེས་སྨྲས་ཏེ་དེས་ནད་གཡོག་མ་བྱས་པས་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་སྣོད་སྤྱད་དང་ཡོ་བྱད་མང་བ་ཞིག་ན་བ་དེ་ལ་ཁྱོད་ཀྱི་ནད་གཡོག་མི་བྱའོ།

ཤི་ན་ཡང་དགེ་འདུན་གྱི་བགོ་བ་མང་པོར་འགྱུར་རོ་ཞེས་སྨྲས་ནས།

དེས་དེའི་ནད་གཡོག་མ་བྱས་པ་དང་།

དེ་དུས་ལས་འདས་སོ།

དགེ་སློང་དེ་

འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་ཟས་མ་ཞུ་བར་འདུག་པ་དང་།

ནད་གཡོག་གིས་རེ་ཞིག་རྐྱོངས་ཤིག་ཞེས་སྨྲས་པ་དང་།

དེས་ནད་གཡོག་ལ་ཁོ་བོ་ཤིར་འོང་གིས་མ་བརྐྱང་ཤིག་ཅེས་སྨྲས་པ་དང་།

ཚེ་དང་ལྡན་པ་རྐྱོངས་ཤིག་ཅེས་སྨྲས་ནས།

དེས་བརྐྱང་བ་དང་།

དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་གིས་ཕོལ་མིག་མ་སྨིན་པར་བརྟོལ་ཏེ་དེ་དུས་ལས་འདས་ན་ཉེས་པ་སྦོམ་པོར་འགྱུར་རོ།

སྨིན་པར་བརྟོལ་ན་ཉེས་པ་མེད་དོ།

དགེ་སློང་མས་ཕོལ་མིག་མ་སྨིན་པར་བརྟོལ་ཏེ་དུས་ལས་འདས་ན་ཉེས་པ་སྦོམ་པོར་འགྱུར་རོ།

སྨིན་པར་བརྟོལ་ན་ཉེས་པ་མེད་དོ།

དགེ་སློང་ཞིག་ན་བ་དང་དེ་དང་འཕྲོད་པའི་ཟས་ནི་མ་རྙེད་ནས་དེའི་ནད་གཡོག་གིས་མི་འཕྲོད་པའི་ཟས་ཤིག་བྱིན་ནས་ཚེ་དང་ལྡན་པ་འདི་ལས་ཅི་ཡོག་པ་ཟོ་ཤིག །

དེས་ཟོས་ཏེ་དུས་ལས་འདས་ན་ཉེས་པ་སྦོམ་པོར་འགྱུར་རོ།

དེ་དང་འཕྲོད་པའི་ཟས་ཤིག་བྱིན་པ་ལས་དུས་ལས་འདས་ན་ཉེས་པ་མེད་དོ།

དགེ་སློང་ཞིག་ན་བ་དང་དེ་དང་འཕྲོད་པའི་སྨན་མ་རྙེད་ན་དེའི་ནད་གཡོག་ཀྱང་དེ་བཞིན་ནོ།

དགེ་སློང་ནད་པ་ཞིག་གིས་ནད་གཡོག་ལ་ཚེ་དང་ལྡན་པ་ནད་གཡོག་ཁོ་བོ་གནས་ཁང་ནས་ཕྱིར་ཕྱུང་ཤིག །

ཕྱིས་ཤིག །

ཁྲུས་ཤིག །

ཁོ་བོ་ནང་དུ་ཁྲིད་ཅིག །

འདུག་ཏུ་ཆུག་ཅིག་ཅེས་སྨྲས་ནས།

འདུག་ཏུ་ཡང་བཅུག །

སྙེས་སུ་ཡང་བཅུག་པ་ལས་དུས་ལས་འདས་ན།

ཐམས་ཅད་ལའང་ཉེས་པ་མེད་དོ།

མདོར་ན།

ཁར་བ་ཕོ་ལོང་ཆུ་རྣམས་དང་།

དགོན་པ་གཉིས་དང་བླ་གཏུན་དང་།

ཁྲོས་པ་ཐལ་མོ་བརྣངས་པའོ།

དགེ་སློང་ཞིག་འདུག་པ་ན་ཡུར་ཏེ་དགེ་སློང་གིས་དེ་ལ་ཁར་བས་བསྐྱོད་པ་དང་།

དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

དེའི་ཚེ་ན་དེ་ལ་མཚོན་ལྟ་བུ་ཞེས་

བྱ་བའི་རླུང་བྱུང་ངོ་།

གཞན་ཡང་ཕོ་ལོང་གིས་ཕོག་སྟེ་དུས་ལས་འདས་པ་དང་།

གཞན་ཡང་ཆུས་ཕོག་སྟེ་དུས་ལས་འདས་པ་འདི་དག་ཀྱང་དེ་བཞིན་དུ་རྒྱས་པར་བཤད་དོ།

བཅུ་བདུན་སྡེ་རྣམས་ཀྱང་རྒྱས་པར་ནི་རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ།

ཁྱིམ་བདག་གཞན་ཞིག་གསར་དུ་དད་དེ་དེས་དུས་སར་པའི་འབྲུ་སར་པ་དང་།

འབྲས་བུ་སར་པ་དེ་དང་དེ་དག་དགེ་འདུན་ལ་ཕུལ་ཏེ་བདག་ཉིད་ཕྱིས་ཟའོ།

དགོན་པ་པ་གཞན་ཞིག་ཁྱིམ་དེར་སོང་བ་དང་།

ཁྱིམ་བདག་དེས་འདི་སྙམ་དུ་ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་པ་འདི་ལ་དབུལ་ལོ་སྙམ་བསམས་ནས་དེས་དེ་ལ་བྱིན་ནོ།

དགེ་སློང་དེ་དག་གིས་ཁྱིམ་བདག་དེ་སྔོན་ཆད་ནི་དུས་སར་པའི་འབྲུ་སར་པ་དང་།

འབྲས་བུ་སར་པ་དེ་དང་དེ་དག་དགེ་འདུན་ལ་ཕུལ་ནས་ཕྱིས་བདག་ཉིད་ཟ་ན་དེ་ནི་དེས་མ་བྱིན་པས་ན་དགེ་སློང་དགོན་པ་པ་ཞིག་ཁྱིམ་དེར་སོང་བ་དེས་བཀག་པར་གྱུར་གྱིས་སོང་ལ་དེ་བོས་ཤིག་ཅེས་སྨྲས་པ་དང་།

དེ་དག་གིས་བོས་ནས་དགོན་པ་པ་ཁྱིམ་བདག་དེ་ནི་དུས་སར་པའི་འབྲུ་སར་པ་དང་།

འབྲས་བུ་སར་པ་དེ་དང་དེ་དག་དགེ་འདུན་ལ་ཐོག་མར་ཕུལ་ནས་ཕྱིས་བདག་ཉིད་ཟ་ན་ཁྱོད་དེའི་ཁྱིམ་དུ་སོང་ནས་ཁྱོད་ཀྱིས་བཀག་པར་གྱུར་ཏོ་ཞེས་སྨྲས་པ་དང་།

བཙུན་པ་མ་བཀག་གོ།

མ་བསྒོའོ་ཞེས་སྨྲས་ནས་དེ་དག་གིས་འདི་སྨྲར་མི་བཏུབ་ཀྱིས་ཁྲིད་ལ་དོང་དུ་ཆུག་ཤིག་ཅེས་སྨྲས་ཏེ།

དེ་དག་གིས་དེ་དོང་དུ་བཅུག་པས་དེ་དུས་ལས་འདས་སོ།

དགེ་སློང་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

ཁྱིམ་བདག་གཞན་ཞིག་དགེ་སློང་གི་དགེ་འདུན་དབྱར་གནས་པ་རྣམས་ལ་ཆོས་གོས་འབུལ་བ་ལས་དགེ་སློང་དགོན་པ་པ་ཞིག་ཁྱིམ་དེར་འོངས་ནས་ཁྱིམ་བདག་དེ་འདི་སྙམ་དུ་ད་ཕྱིན་ཆད་དགེ་འདུན་ལ་མི་དབུལ་བར་དགོན་པ་པ་འདི་ལ་དབུལ་ལོ་སྙམ་དུ་བསམས་ནས་དེས་དགོན་པ་པ་དེ་ལ་བྱིན་པ་དང་།

དགེ་སློང་དེ་དག་འདི་སྙམ་དུ་ཁྱིམ་བདག་དེ་དགེ་སློང་གི་དགེ་འདུན་དབྱར་གནས་པ་རྣམས་ལ་གོས་འབུལ་ན་དགེ་སློང་དགོན་

པ་པ་ཞིག་དེར་སོང་བ་དེས་བཀག་པར་གྱུར་པ་སྙམ་གྱིས་སོང་ལ་དེ་བོས་ཤིག་ཅེས་སྨྲས་པ་དང་།

དེ་དག་གིས་དེ་བོས་ནས་དགོན་པ་པ་ཁྱིམ་བདག་དེ་ནི་དགེ་སློང་གི་དགེ་འདུན་དབྱར་གནས་པ་རྣམས་ལ་གོས་དབུལ་བ་ལས་ད་མི་དབུལ་བ་ནི་ཁྱོད་དེའི་ཁྱིམ་དུ་སོང་ནས་བཀག་པར་མ་གྱུར་ཏམ་ཞེས་དྲིས་ན།

བཙུན་པ་བདག་གིས་ནི་མ་བཀག་གོ།

མ་བསྒོའོ་ཞེས་སྨྲས་པ་དང་།

དེ་དག་གིས་འདི་སྨྲར་མི་བཏུབ་ཀྱིས་ཁྲིད་ལ་སྒོ་ལེབ་ཀྱི་བར་དུ་ཚིར་ཅིག་ཅེས་སྨྲས་ནས་དེ་དག་གིས་སྒོ་ལེབ་ཀྱི་བར་དུ་བཙིར་བ་དང་།

དེ་དུས་ལས་འདས་སོ།

དགེ་སློང་དེ་དག་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་བསོད་སྙོམས་སྤྱོད་པ་དང་སྒོ་དོག་པ་ཞིག་ན་བླ་གཏུན་ཞིག་བསྒྲེང་ཞིང་འདུག་པ་ལས་དེའི་ཆོས་གོས་ཀྱི་གྲྭས་བསྔོས་པས་ཁྱེའུའི་སྟེང་དུ་འགྱེལ་ནས་ཁྱེའུ་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

བག་ཡོད་པར་བྱོས་ལ་བསོད་སྙོམས་སྤྱོད་ཅིག །

བྲམ་ཟེ་ཞིག་གིས་ནང་པར་སྔར་བཀྲ་ཤིས་པ་དང་།

ལྟས་བྱས་ནས་ཁྱིམ་གྱི་ནང་ན་འདུག་པ་དང་།

དགེ་སློང་ཞིག་ཁྱིམ་དེར་བསོད་སྙོམས་སྤྱོད་པ་ལ་དེ་ཁྲོས་ནས་ཕུལ་བ་དང་།

དགེ་སློང་དེ་ཁྱེའུ་ཞིག་གི་སྟེང་དུ་འགྱེལ་ནས་ཁྱེའུ་ཤི་བར་གྱུར་ཏོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཐལ་མོའི་རིག་སྔགས་འདེབས་ཤིང་དེ་ལག་པས་བྱུགས་ཏེ་ཐལ་མོ་ཅིག་བསྣུན་པ་དང་།

དེ་དུས་ལས་འདས་སོ།

དགེ་སློང་དེ་དག་འགྱོད་པ་སྐྱེས་ཏེ།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་ནི་མེད་དེ།

བག་ཡོད་པར་བྱོས་ལ་ཐལ་མོ་སྣུན་ཅིག །

དགེ་སློང་ཞིག་བརྣངས་ཏེ་ཤི་ལ་ཐུག་པ་དང་དེ་ལ་དགེ་སློང་ཞིག་གིས་ཁུ་ཚུར་ཅིག་བསྣུན་ནས་བརྣངས་པ་དེ་ཁྲག་དང་བཅས་ཏེ་བྱུང་ནས་དགེ་སློང་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ཅི་ནས་ཀྱང་བག་ཡོད་པར་བྱས་ཏེ་བརྣངས་པ་ཡང་བྱུང་བར་གྱུར་ལ་དུས་ལས་ཀྱང་འདས་པར་མི་འགྱུར་བ་དེ་ལྟར་བསྣུན་པར་བྱའོ།

མདོར་ན།

སྟན་གཉིས་པ་དང་ཕ་གཉིས་དང་།

གཞན་ཡང་བཏང་བ་གཉིས་པ་དང་།

འདྲ་བར་གྱུར་པ་སྤྲེའུ་དང་ནི།

རྐུན་པོ་རྣམས་ལ་བསྡིགས་པའོ།

ཚེ་དང་ལྡན་པ་འཆར་ཀ་ནག་པོས་མ་བརྟགས་པར་སྟན་ལ་འདུག་པར་ནི་རྣམ་པར་འབྱེད་པ་ལས་ཇི་སྐད་དུ་རྒྱས་པར་འབྱུང་བ་བཞིན་ནོ།

སྦོམ་མོ་དགའ་ལྡན་མོ་ཡང་དེ་བཞིན་དུ་སྦྱར་རོ།

དགེ་སློང་ཞིག་གིས་ཕ་ལམ་དུ་ཕུལ་ནས་དུས་ལས་འདས་པ་ཡང་རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ།

དགེ་སློང་རྒན་ཞུགས་ཕ་སྤད་གཉིས་ཤིག་ལྷན་ཅིག་ཏུ་ཛེ་ཏའི་ཚལ་དུ་དོང་བ་ལས་གཙུག་ལག་ཁང་གི་གྲོང་དུ་ཕྱིན་པ་དང་།

ཕས་བུ་ལས་འདིར་གཟིག་རྣམས་ཀྱིས་འཇིགས་པར་འགྱུར་གྱི་ནང་དུ་འཁོད་དོ་ཞེས་སྨྲས་པ་དང་།

བུས་དེ་ལ་རྒན་ཞུགས་དེང་ཁྱིམ་པ་དང་ལྷན་ཅིག་ཏུ་འཁོད་ན་དེ་དག་དང་བདག་ཅག་ཏུ་བྱེ་བྲག་ཅི་ཡོད་ཅེས་སྨྲས་པ་དང་།

བུ་ཁྱོད་ནི་མེལ་ཚེ་བྱོས་ཤིག་ཁོ་བོ་ཉལ་ལོ་ཞེས་སྨྲས་སོ།

དེ་ནས་རྒན་ཞུགས་དེ་ཉལ་བ་དང་།

དགེ་སློང་དེ་ཡང་ཉལ་ལོ།

རྒན་ཞུགས་དེ་སྔུར་པ་ཅན་ཞིག་སྟེ།

དེའི་སྒྲས་གཟིག་འོངས་ནས་དེས་དེའི་མགོ་བོ་ནས་བཟུང་བ་དང་།

དེས་སྒྲ་ཕྱུང་ནས་གཟིག་གིས་བཏང་སྟེ་བྲོས་སོ།

དགེ་སློང་དེས་མེ་མར་བླངས་ནས་བརྟགས་ན་དུས་ལས་འདས་ཏེ་འདི་སྙམ་དུ་དེས་ནང་དུ་འཁོད་དོ་ཞེས་ཟེར་ན་ཡང་བདག་གིས་དེའི་ཚིག་མ་མཉན་པས་གང་ཅུང་ཟད་འདི་དུས་ལས་འདས་པར་གྱུར་པ་དེ་ཐམས་ཅད་ནི་བདག་གིས་ཉེས་སོ་སྙམ་སྟེ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

མེལ་ཚེ་བྱོས་ཤིག །

དགེ་སློང་ཞིག་གིས་གསད་སེམས་ཀྱིས་དགེ་སློང་ཞིག་འཇིགས་པ་དང་བཅས་པའི་གནས་སུ་བཏང་བ་དང་།

དེ་དུས་ལས་འདས་ན་ཕས་ཕམ་པར་འགྱུར་རོ།

དུས་ལས་མ་འདས་ན་ཉེས་པ་སྦོམ་པོར་འགྱུར་རོ།

བཅོམ་ལྡན་འདས་གྲོང་ཁྱེར་

ཡངས་པ་ཅན་ན་བཞུགས་ཏེ།

དགེ་སློང་དག་ནགས་ཆེན་པོར་ཉིན་པར་སྤྱོད་དུ་དོང་ངོ་།

དེས་དེར་སྤྲེའུ་ཞིག་བསད་པ་དང་།

དགེ་སློང་ཞིག་གིས་ཁྱོད་ལ་ཕས་ཕམ་པའི་ཉེས་པ་བྱུང་ངོ་།

དངོས་པོ་གང་གི་ཕྱིར།

མིའི་འཚོ་བ་དང་བྲལ་བ་དང་།

མི་དང་འདྲ་བ་འདི་གཉིས་ལ་བྱེ་བྲག་ཅི་ཡོད་ཅེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་མེད་དེ།

ལྟུང་བར་འགྱུར་རོ།

རྐུན་པོ་བསྡིགས་པ་ཡང་རྒྱས་པར་འདུལ་བ་ལས་ཇི་ལྟར་འབྱུང་བ་བཞིན་ནོ།

མདོར་ན།

མགོ་ལྡན་སྔོན་གྱི་སྨན་པ་དང་།

འགེགས་ཏེ་ཤི་བར་གྱུར་པ་དང་།

གྲོང་ཁྱེར་ཡངས་པ་ཅན་གནས་དང་།

འགེག་ཐག་ཆད་དང་བརྒྱུགས་པའོ།

མཉན་དུ་ཡོད་པ་ན་ཁྱིམ་བདག་གཞན་ཞིག་ལས་བུ་ཁྱེའུ་ཞིག་བཙས་ཏེ་ཆེན་པོར་གྱུར་པ་དང་།

མགོ་བོས་སོ་ཕག་བསྲེགས་པ་ཚོགས་པས་དེའི་མིང་མགོ་ལྡན་དུ་བཏགས་སོ།

དེ་ཇི་ཙམ་ན་རབ་ཏུ་བྱུང་ནས་དེ་དོན་ཅིག་ལ་གྲོང་དུ་ཞུགས་པ་དང་།

ཁྱིམ་བདག་གཞན་ཞིག་གི་ཆུང་མ་ཞིག་ཀྱང་ཁྱེའུ་ཞིག་ཁྲིད་དེ་རྗེས་བཞིན་དུ་འོངས་ནས་དེ་ཡང་གློ་གཡས་གཡོན་ལྟ་ཞིང་སོང་ངོ་།

དེ་ལ་ལུག་ཐུག་ཅིག་གིས་སྙོགས་པ་དང་དགེ་སློང་དེས་ཀྱང་མགོ་བོ་བཏུད་དེ་སོང་བ་ལས་དེས་ཀྱང་བདག་ལ་བརྡུངས་པར་ཤེས་ནས་ལུག་ཐུག་དེས་དེ་ལ་བརྡུངས་པ་དང་།

དགེ་སློང་དེ་ཁྱེའུའི་སྟེང་དུ་འགྱེལ་ནས་ཁྱེའུ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་ནི་མེད་དེ།

དགེ་སློང་སྤྱོད་ལམ་དེ་ལྟ་བུར་མ་འགྲོ་བར་གཉའ་ཤིང་སྲིད་དུ་ལྟོས་ཤིག །

སྔོན་སྨན་པ་ལས་རབ་ཏུ་བྱུང་བ་གཞན་ཞིག་གིས་དགེ་སློང་ནད་པ་ཞིག་གི་དྲུང་དུ་འོངས་པ་དང་།

དེས་དེ་ལ་གཏར་ཁ་ཐོབ་ཤིག་ཅེས་སྨྲས་ནས།

དེས་ཀྱང་དེ་ལ་གཙགས་བུ་ཅིག་བཏབ་སྟེ།

གཙགས་བུ་དེ་སླར་ཕྱུང་བ་དང་།

དགེ་སློང་དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་ནི་མེད་དེ།

ཕྱིན་ཆད་དགེ་སློང་དག་མ་བསླབས་པར་སྨན་དཔྱད་མ་

བྱེད་ཅིག །

དགེ་སློང་ནད་པ་གཞན་ཞིག་ནད་མ་སོས་ནས།

དེ་འདི་སྙམ་དུ་བདག་འཚོ་སྟེ་ཅི་རུང་གིས་བདག་ཉིད་འཆིའོ་སྙམ་དུ་བསམས་ཏེ།

དགེ་སློང་དེས་ནད་གཡོག་ལ་འདི་སྐད་དུ་ཚེ་དང་ལྡན་པ་ཐག་པ་ཞིག་བྱིན་ཅིག་ཅེས་སྨྲས་སོ།

དེས་དེ་ལ་བྱིན་ནས་དེ་འགགས་པ་དང་།

དེ་དུས་ལས་འདས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

དགེ་སློང་གིས་བབ་བབ་ཏུ་ནད་པ་ལ་ཐག་པ་མ་སྦྱིན་ཅིག །

དགེ་སློང་ཞིག་བསོད་སྙོམས་སྤྱོད་པ་ན་གྲོང་ཁྱེར་ཡངས་པ་ཅན་ན་གནས་པ་དག་ཀྱང་མདའ་དང་།

གཞུ་ལག་ན་ཐོགས་པ་འོངས་ནས་དགེ་སློང་དེས་བཞིན་བཟངས་ཁོ་བོ་མ་གསད་པར་འདི་ལ་འཕོངས་ཤིག་ཅེས་སྨྲས་པ་དང་།

དེས་མདའ་འཕངས་ནས་དེ་དེར་བསད་དོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

དགེ་སློང་གིས་དེ་སྐད་མ་བསྒོ་ཤིག །

དགེ་སློང་ནད་པ་གཞན་ཞིག་ཀྱང་རྒྱས་པར་ནི་སྔ་མ་ཇི་ལྟ་བ་བཞིན་དུ་ཐག་པ་ཁྱེར་ནས་ནགས་ཆེན་པོར་སོང་བ་དང་།

དེས་དེར་ཤིང་ལ་འཛེགས་ནས་ཐ་གུ་དེས་བཏགས་ཏེ་དེས་ལྐོག་མ་ཞགས་མིག་ཏུ་བཅུག་ནས་ལུས་མཆོངས་པ་དང་།

ཐག་པ་ཆད་ནས་དེའི་འོག་ན་ཁྱི་བུ་བྱུང་བ་ཞིག་འདུག་སྟེ་དེའི་སྟེང་དུ་དགེ་སློང་ལྷུང་བ་དང་།

ཁྱི་དེ་བུ་དང་བཅས་ཏེ་དུས་ལས་འདས་ཏེ།

དགེ་སློང་དེ་དག་གིས་ཐོས་ནས་རྒྱས་པར་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་སྔ་མ་ནི་ཉེས་པར་འགྱུར་གྱི་ཕྱི་མ་ལ་ཉེས་པ་མེད་དོ།

དགེ་སློང་ལུས་ཀྱིས་འདི་ལྟར་བརྩལ་བ་ནི་མ་བྱེད་ཅིག །

བྱས་ན་ཉེས་པ་སྦོམ་པོར་འགྱུར་རོ།

དགེ་སློང་གཞན་ཞིག་གྲོང་དུ་དོན་ཅིག་ཡོད་དེ།

དེས་དགེ་སློང་ནད་སོས་ནས་རིང་པོར་མ་ལོན་པ་ཞིག་ཁྲིད་དེ་སོང་བ་དང་།

ལམ་དུ་རྐུན་པོས་སྐྲག་ནས་དེས་དེ་ལ་ཚེ་དང་ལྡན་པ་སྐྱེན་པར་འདོང་ཞེས་སྨྲས་པ་དང་།

དེས་མི་ནུས་སོ་ཞེས་སྨྲས་ནས།

དགེ་སློང་གིས་ཚུར་ཤོག་བཅོམ་མ་རེ་ཞེས་སྨྲས་ནས།

དེས་དེ་ལྟར་ཁྲིད་དེ་དེ་ཡང་གྲོང་དུ་ཁྲིད་པ་དང་དུས་ལས་འདས་སོ།

དེ་འདི་

སྙམ་དུ་དེ་སྟེ་བདག་གིས་དགེ་སློང་དེ་ཁྲིད་དེ་མ་འོངས་ན་ཤི་བར་མི་འགྱུར་རོ་སྙམ་བསམས་ནས་དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

ཕྱིན་ཆད་དགེ་སློང་གིས་ནད་པ་ཉམ་ཆུང་བར་གྱུར་པ་དེ་ལྟ་བུ་ལམ་དུ་མ་བཀྲི་ཤིག །

མདོར་ན།

བདེ་ལྡན་འདུ་ཤེས་བསྒོ་བ་དང་།

དགྲ་བཅོམ་བྲམ་ཟེ་དབང་པོ་དང་།

ཆོས་གོས་དག་དང་བསོད་སྙོམས་དང་།

གྲོང་དུ་ཉེར་འགྲོ་རྣམ་པ་གཉིས།

སངས་རྒྱས་བཅོམ་ལྡན་འདས་ཡུལ་བྲྀ་ཛིའི་འོད་མའི་ཚལ་གྱི་གྲོང་ན་བཞུགས་སོ།

ཀླུང་བདེ་ལྡན་གྱི་ངོགས་ན་གནས་པའི་དགེ་སློང་རྣམས་ལ་བསླབ་པའི་གནས་མ་བཅས་པས་ལས་དང་པོ་པ་ལ་ཉེས་པ་མེད་དེ།

བདག་ཅག་གིས་བསླབ་པའི་གནས་མ་བཅས་པ་ན་མེད་ལ་མེད་བཞིན་དུ་མི་ལས་བླ་མར་གྱུར་པའི་ཆོས་ཤིག་རིགས་མང་པོ་ལ་སྨྲས་ན།

བདག་ཅག་གི་ལས་དང་པོ་པ་གང་ཡིན་སྙམ་ནས་དོགས་པ་དང་།

འཛེམ་པ་དང་འགྱོད་པ་སྐྱེས་སོ།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་བསླབ་པའི་གནས་མ་བཅས་པ་ན་ཀླུང་བདེ་ལྡན་གྱི་ངོགས་ན་གནས་པའི་དགེ་སློང་རྣམས་ཀྱིས་འདས་པ་དང་བཅས་པ་ནི་ཐམས་ཅད་ལས་དང་པོ་པ་ཡིན་པས།

ལས་དང་པོ་པ་ལ་ཉེས་པ་མེད་དོ།

དགེ་སློང་ཞིག་གིས་མི་ལ་མི་མ་ཡིན་པར་འདུ་ཤེས་ཏེ་མེད་ལ་མེད་བཞིན་དུ་མི་ལས་བླ་མར་གྱུར་པའི་ཆོས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

མི་ལ་མིར་འདུ་ཤེས་ན་ཕས་ཕམ་པར་འགྱུར་རོ།

མི་མ་ཡིན་པ་ལ་ཐེ་ཚོམ་ན་ཉེས་པ་སྦོམ་པོར་འགྱུར་རོ།

མི་མ་ཡིན་པ་ལ་མིར་འདུ་ཤེས་ན་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་ཁྱིམ་བདག་ཅིག་ལ་མེད་ལ་མེད་བཞིན་དུ་མི་ལས་བླ་མར་གྱུར་པའི་ཆོས་སྨྲས་པ་དང་།

ཁྱིམ་བདག་དེ་ཡེངས་ནས་བཙུན་པ་ཅི་གསུང་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཕས་ཕམ་པའི་ཉེས་པ་ནི་མེད་དེ།

ཉེས་པ་སྦོམ་པོར་

འགྱུར་རོ།

ཁྱིམ་བདག་ཅིག་གིས་དགེ་སློང་ཞིག་ལ་བཙུན་པ་ཁྱོད་དགྲ་བཅོམ་པ་ལགས་ཀྱིས་ཆོས་གོས་དང་།

བསོད་སྙོམས་དང་།

མལ་སྟན་དང་།

ནད་ཀྱི་རྐྱེན་རྩི་དང་།

ཡོ་བྱད་ཀྱི་མཆོག་རྣམས་འོས་སོ་ཞེས་སྨྲས་པ་དང་།

ཅང་མི་སྨྲ་བས་ཁས་བླངས་པ་ཡིན་ཏེ་ཉེས་པ་སྦོམ་པོར་འགྱུར་རོ།

ཁྱིམ་བདག་ཅིག་གིས་དགེ་སློང་ཞིག་ལ་སྡིག་པ་མེད་པའི་ཆོས་ཚངས་པ་དང་ལྡན་ནམ་ཞེས་སྨྲས་ན་ཅང་མི་སྨྲ་བས་ཁས་བླངས་པ་ཡིན་ཏེ།

ཉེས་པ་སྦོམ་པོར་འགྱུར་རོ།

དེ་སྟེ་བཙུན་པ་དགྲ་བཅོམ་པ་ཡིན་ན་བདག་གི་བསོད་སྙོམས་བཞེས་ཤིག་ཅེས་སྨྲས་པ་དང་།

དེ་ཅང་མི་སྨྲ་བས་ཁས་བླངས་པ་ཡིན་ཏེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གཞན་གྱི་གྲོང་དུ་ཉེ་བར་འགྲོ་ཞེས་དེ་སྔ་དྲོའི་དུས་སུ་ཤམ་ཐབས་བགོས་ཏེ་གྲོང་དུ་སོང་བ་དང་།

དེ་ལ་ཁྱིམ་བདག་གིས་བཙུན་པ་དེ་སྟེ་དགྲ་བཅོམ་པ་ལགས་ན་ནང་དུ་གཤེགས་ཤིག་ཅེས་སྨྲས་པ་དང་།

ཅང་མི་སྨྲ་བར་ནང་དུ་འོངས་ན་ཉེས་པ་སྦོམ་པོར་འགྱུར་རོ།

དེ་བཞིན་དུ་སྟན་ལ་འདུག་ཟན་ལོང་ལ་གསོལ་ཅིག །

རྗེས་སུ་ཡི་རང་བ་གྱིས་ཤིག །

སླར་བྱུང་ཤིག་ཅེས་སྨྲས་པ་དང་།

དེ་ཅང་མི་སྨྲ་ན་ཁས་བླངས་པས་ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་ཞིག་ན་གྲོང་དུ་ཉེ་བར་འགྲོ་བ་ཡིན་ཏེ།

སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་།

ཁྱིམ་བདག་གིས་བཙུན་པ་དེ་སྟེ་དགྲ་བཅོམ་པ་ལགས་ན་ཁྱིམ་གྱི་ནང་དུ་གཤེགས་ཤིག་ཅེས་སྨྲས་པ་དང་།

ཁོ་བོ་དགྲ་བཅོམ་པ་ཅུང་ཟད་ཀྱང་མ་ལགས་ན་དེ་སྟེ་ཁྱོད་བཟོད་ན་ནི་ནང་དུ་མཆིའོ་ཞེས་སྨྲས་ན་ཉེས་པ་མེད་དོ།

སྟན་ལ་བཞུགས་བཤོས་དང་སྐྱུ་རུམ་དང་བཅའ་བ་རྣམས་བཞེས་ལ་གསོལ་ཅིག །

རྗེས་སུ་ཡི་རང་བར་གྱིས་ཤིག །

སླར་བྱུང་ཤིག་ཅེས་སྨྲས་པ་དང་།

ཁོ་བོ་ནི་དགྲ་བཅོམ་པ་ཅུང་ཟད་ཀྱང་མ་ལགས་ན་དེ་སྟེ་ཁྱོད་ཀྱིས་བཟོད་ན་ཕྱིར་འབྱུང་ངོ་།

ཞེས་སྨྲས་ན་ཉེས་པ་མེད་དོ།

ཁྱིམ་བདག་གིས་དགེ་སློང་ཞིག་ལ་བཙུན་པ་ཁྱོད་དབང་པོའི་སྒོ་རྣམས་ནི་ཤིན་ཏུ་བསྡམས་ཤིང་ལེགས་པར་བསྲུངས་པའོ་ཞེས་སྨྲས་པ་དང་།

ཅང་མི་སྨྲ་བར་ཁས་བླངས་ན་ཉེས་པ་སྦོམ་པོར་འགྱུར་

རོ།

སླར་ཕྱུང་ཤིག་ཅེས་སྨྲས་པ་ལས་ཁོ་བོ་དགྲ་བཅོམ་པ་ནི་ཅུང་ཟད་ཀྱང་མ་ལགས་སོ་ཞེས་སྨྲས་ནས་ཕྱིར་བྱུང་ན་ཉེས་པ་མེད་དོ།

མདོར་ན།

དྲུག་བྱས་དང་ནི་མངོན་ཤེས་དང་།

མེ་ཡི་ཕུང་པོ་མེད་པ་དང་།

མ་འདའ་གི་ནི་སྒྲ་རྣམས་དང་།

དྲི་ཟ་དང་ནི་ལྷ་མ་ཡིན།

རྫིང་བུ་བརྡུང་དང་འབའ་ལ་ཧ།

དཀའ་ཐུབ་འོག་མ་རྒྱུན་དུ་གཉིས།

འཐབས་པ་གཉིས་དང་ཁྱེའུ་གནས་བདེ་བར་འོངས།

མཛེས་པ་དང་ནི་འདི་གཉིས་དང་།

མདོའི་ཚིགས་སུ་བཅད་པ་གཉིས་པོ་རྒྱས་པར་ཤེས་པར་བྱའོ།

མདོར་ན།

འཆར་ཀ་སྦོམ་པོ་ནམ་མཁའ་དང་།

མགོ་ལ་ལག་པ་གཉིས་ཀྱིས་བྱུགས།

སྒྲེའུ་དུགས་ཁང་ཁྲུས་ལས་དང་།

གནས་དང་ཚུལ་བཞིན་མ་ཡིན་པའོ།

གླེང་གཞི་ནི་མཉན་དུ་ཡོད་པ་ན་སྟེ།

བསླབ་པའི་གནས་མ་བཅས་པ་ལས་དང་པོ་ལ་ཉེས་པ་མེད་པར་གྱུར་པ་ན་ཚེ་དང་ལྡན་པ་འཆར་ཀ་འདི་སྙམ་དུ་བདག་གིས་ནི་བསླབ་པའི་གནས་མ་བཅས་པར་ལན་མང་ཞིག་ཏུ་བསམས་བཞིན་དུ་ཁུ་བ་ཕྱུང་ན་བདག་གིས་ལས་དང་པོ་གང་ཡིན་སྙམ་ནས་ཐེ་ཚོམ་དུ་གྱུར་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

བསླབ་པའི་གནས་མ་བཅས་པ་ན་འཆར་ཀས་འདས་པ་དང་བཅས་པ་ནི་ཐམས་ཅད་ཀྱང་ལས་དང་པོ་པ་སྟེ།

ལས་དང་པོ་པ་ནི་ཉེས་པ་མེད་དོ།

དགེ་སློང་ཞིག་གིས་སྦུར་བུར་ཕྱུང་ངམ།

ནམ་མཁའ་ལ་སྤྱོད་དམ།

ནམ་མཁའ་ལ་ཕྱུང་ངམ།

ཕོ་མཚན་མནམས་སམ།

བཙིར་ཏེ་དགའ་བར་ཚོར་རམ།

བཙིར་ཏེ་བཏང་ཕྱུང་ངམ།

འཕགས་པ་ལས་བཏང་ངམ།

བརྩམས་ནས་སླར་བཏང་ཡང་རུང་སྟེ།

ཐམས་ཅད་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་བརླས་བསྔོས་ཏེ་ཁུ་བ་ཕྱུང་བ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་ལ་བུད་མེད་ཞིག་གིས་ལག་པ་གཉིས་ཀྱིས་རྐང་པ་གཉིས་ལ་ཕྱག་འཚལ་བ་དང་།

དེས་ཁུ་བ་ཕྱུང་སྟེ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

རི་དགས་སྒྲའི་མ་ས་ག་མ་དགེ་སློང་

རྣམས་ཀྱི་རྐང་པ་ལ་ཕྱག་འཚལ་ཏེ།

དེས་ཚེ་དང་ལྡན་པ་དགའ་བོའི་རྐང་པ་ལ་མགོ་བོས་ཕྱག་འཚལ་བ་དང་།

དེས་དེ་ཁུ་བ་ཕྱུང་ནས་རི་དགས་སྒྲའི་མ་ས་ག་མའི་མགོ་བོར་ལྷུང་བ་དང་།

དེ་ཕྱོགས་གཅིག་ཏུ་སོང་སྟེ་ལག་པ་གཉིས་མགོ་ལ་བྱུགས་ནས་འདི་སྐད་དུ་ཚངས་པ་མཚུངས་པར་སྤྱོད་པ་དེ་དག་ནི་བཅོམ་ལྡན་འདས་ཀྱི་དྲུང་ན་ཤིན་ཏུ་ཉོན་མོངས་པར་ཚངས་པར་སྤྱད་པ་སྤྱོད་དེ་བདག་གིས་ནི་རྙེད་པ་རབ་ཏུ་རྙེད་དོ་ཞེས་མགུ་བར་བརྗོད་པ་བརྗོད་དོ།

ཚེ་དང་ལྡན་པ་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དེ།

སྒྲེའུ་ཆོངས་ཤིག །

དགེ་སློང་ཞིག་གིས་སྒྲེའུ་ལ་རེག་སྟེ་ཁུ་བ་ཕྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་དུགས་ཁང་ན་ལས་བྱེད་པ་ལས་ཁུ་བ་བྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་གནས་ནས་གནས་སུ་འཆག་པ་ན་དེ་ཁུ་བ་བྱུང་སྟེ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་ལྷག་མའི་ཉེས་པ་ནི་མེད་ཀྱིས་ཉེས་པ་སྦོམ་པོར་འགྱུར་རོ།

ཚུལ་བཞིན་མ་ཡིན་པ་ཡིད་ལ་བྱེད་པའང་དེ་བཞིན་ནོ།

མདོར་ན།

བུད་མེད་རྣམ་པ་ལྔར་བྱས་དང་།

གནོད་པ་ལ་ཡང་རྣམ་པ་ལྔ།

གཟུང་བ་ལ་ཡང་ལྔར་བྱས་ཏེ།

དུར་ཁྲོད་པ་ལ་དྲུག་ཏུའོ།

དགེ་སློང་ཞིག་ལ་མ་དང་།

སྲིང་མོ་དང་།

བུ་མོ་དང་།

ཆུང་མ་དང་།

མཛའ་ན་མོ་རྣམས་ཀྱིས་འགྲོགས་ནས་རིང་པོར་མ་ལོན་པར་མགུལ་ནས་འཁྱུད་པ་དང་ཁུ་བ་བྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་གིས་བུད་མེད་མེ་ལས་ཕྱུང་།

ཆུ་དང་།

གཡང་ས་དང་།

མཚོན་དང་།

གཅན་གཟན་དང་།

མི་མ་ཡིན་པ་རྣམས་ལས་ཐར་བར་བྱས་པ་དང་།

དེ་ཁུ་བ་བྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ལ་བུད་མེད་ཅིག་གིས་རྐང་པས་བཟུང་ངམ།

བྱིན་པ་

དང་།

པུས་མོ་དང་།

བརླ་དང་།

མཛུབ་མོ་རྣམས་ཀྱིས་བཟུང་བ་དང་།

དེ་ཁུ་བ་བྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་གིས་རྣམ་པར་སྔོས་པ་ལས་ཁུ་བ་བྱུང་བ་དང་།

བམ་པ་དང་སྦོས་པ་དང་རྣམ་པར་དམར་བ་དང་།

རྣམ་པར་ཞིགས་པ་དང་།

ཀེང་རུས་ལ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ།

མདོར་ན།

འཕྲུག་པ་འདྲུད་པ་མཛུབ་མོ་དང་།

ཆུ་ལས་སྦྲིད་པར་གྱུར་པ་དང་།

ནང་གི་དགུར་ནི་བྱས་པ་དང་།

སྤྱོད་པ་རྣམ་པ་ཉི་ཤུའོ།

དགེ་སློང་ཞིག་གིས་འཕྲུག་པ་ལས་ཁུ་བ་བྱུང་ན་ཉེས་པ་མེད་དོ།

འདྲུད་པའང་དེ་བཞིན་ནོ།

དགེ་སློང་དེས་ཕོ་མཚན་ལས་བཟུང་བ་དང་།

ཁུ་བ་བྱུང་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་བསོད་སྙོམས་ལ་སྤྱོད་པ་དེ་ན་ན་ཆུང་གཞོན་ནུ་ཞིག་གདངས་ཏེ་འདུག་པར་གྱུར་པས་འཕགས་པ་ཚུར་སྤྱོན་ཁོ་མོ་ལ་འདི་དང་འདི་ལྟ་བུ་མཛོད་ཅེས་སྨྲས་ནས་དེས་དེར་མཛུབ་མོ་བཅུག་གོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་ཁྲུས་བྱེད་པ་ན་ཕོ་མཚན་ཆུའི་རྒྱུན་དུ་བསྡད་པ་དང་དེ་སྦྲིད་པས་ཁུ་བ་བྱུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་མགོ་བོ་དང་།

རྣ་བ་དང་།

སྣའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ།

དགེ་སློང་ཞིག་གིས་རྩིབ་ལོགས་དང་།

རྒྱབ་དང་།

བྲང་དང་།

ལྟོ་གཉེར་དང་།

སྐྲའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ།

དགེ་སློང་གིས་ལག་པ་དང་།

ཕྲག་པ་དང་།

དཔུང་བའི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ།

དགེ་སློང་གིས་རྐེད་པ་དང་།

བྱིན་པ་དང་།

རྐང་པ་དང་།

བརླ་རྣམས་ཀྱི་ནང་དུ་ཁུ་བ་ཕྱུང་ན་ཐམས་ཅད་དགེ་འདུན་གྱི་ལྷག་མར་འགྱུར་རོ།

དགེ་སློང་ཞིག་གིས་ལ་བ་དང་།

ཕྱིང་བ་དང་།

པར་ཏང་

དང་།

སྔས་རྣམས་སུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ།

དགེ་སློང་གིས་ཁྲི་དང་།

ཁྲིའུ་དང་།

ཤིང་སྟན་དང་།

ཁྲི་བར་དུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་བུམ་པ་དང་།

བུམ་བུ་དང་།

སྐྱོགས་དང་།

བུམ་པའི་ནང་དུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་རྡོ་དང་།

ཞལ་ཞལ་བྱས་པ་དང་།

ཞལ་ཞལ་བྱས་པའི་ནང་དང་།

སྒོ་གཏན་དང་།

ཤ་མེར་མེར་པོ་རྣམས་སུ་ཁུ་བ་ཕྱུང་ན་ཐམས་ཅད་ཉེས་པ་སྦོམ་པོར་འགྱུར་རོ།

མདོར་ན།

འཆར་ཀ་འདུ་ཤེས་རྐང་པ་ཕྲག་པ་དང་།

མ་དང་སོར་མོ་མེད་ལས་ཕྱུང་བ་དང་།

རྐང་པ་ལ་སོགས་བཟུང་བ་དང་།

སྔོ་ལ་སོགས་ལས་འཁྱུད་པའོ།

ཚེ་དང་ལྡན་པ་འཆར་ཀས་བསླབ་པའི་གནས་མ་བཅས་པ་ན་བདག་གིས་བུད་མེད་མང་པོ་དང་ལྷན་ཅིག་ལུས་ཀྱིས་ཀུན་ཏུ་རེག་པར་གྱུར་ན་དེ་དག་ལ་བདག་གི་ལས་དང་པོ་པ་ནི་གང་ཡིན་སྙམ་དུ་བསམས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

བསླབ་པའི་གནས་མ་བཅས་པ་ན་འཆར་ཀ་འདས་པ་དང་བཅས་པ་ཐམས་ཅད།

ལས་དང་པོ་པ་སྟེ་ལས་དང་པོ་པ་ལ་ཉེས་པ་མེད་དོ།

དགེ་སློང་ཞིག་གིས་ནི་མིའི་བུད་མེད་ལ་མི་མ་ཡིན་པར་འདུ་ཤེས་ཏེ་བཟུང་ངོ་།

དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ།

མི་ལ་མིར་འདུ་ཤེས་ན་དགེ་འདུན་གྱི་ལྷག་མར་འགྱུར་རོ།

རྒྱས་པར་ནི་རྣམ་པ་བཞིར་ཤེས་པར་བྱའོ།

དགེ་སློང་གིས་བུད་མེད་ཅིག་ལ་རྐང་པས་ཕུལ་ན་ཉེས་བྱས་སུ་འགྱུར་རོ།

བུད་མེད་ཀྱིས་དགེ་སློང་ལ་རྐང་པས་ཕུལ་ན་ཉེས་པ་མེད་དོ།

དགེ་སློང་གིས་བུད་མེད་ལ་ཕྲག་པས་ཕུལ་ན་ཉེས་བྱས་སུ་འགྱུར་རོ།

བུད་མེད་ཀྱིས་དགེ་སློང་ལ་ཕྲག་པས་ཕུལ་ན་ཉེས་པ་མེད་དོ།

དགེ་སློང་ཅིག་གིས་མའི་མགུལ་ནས་འཁྱུད་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་ལ་བུད་མེད་ཀྱིས་སོར་མོས་བཟུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་

སློང་ཞིག་གིས་བུད་མེད་ཅིག་མེ་དང་།

ཆུ་དང་།

གཡང་ས་དང་།

མཚོན་དང་།

གཅན་གཟན་དང་།

མི་མ་ཡིན་པ་རྣམས་ལས་ཐར་བར་བྱས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ལ་བུད་མེད་ཅིག་གིས་རྐང་པས་བཟུང་།

བྱིན་པ་དང་།

པུས་མོ་དང་།

བརླ་དང་།

སོར་མོས་བཟུང་ངོ་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་གིས་བུད་མེད་ཀྱི་རོ་སྔོན་པོར་གྱུར་པའི་མགུལ་ནས་འཁྱུད།

བམ་པ་དང་།

རུལ་བ་དང་།

རོ་དམར་པོར་གྱུར་པ་དང་།

འཐོར་བ་དང་།

ཀེང་རུས་རྣམས་ཀྱི་མགུལ་ནས་འཁྱུད་ན་ཐམས་ཅད་ཉེས་པ་སྦོམ་པོར་འགྱུར་རོ།

མདོར་ན།

གྲེད་ནས་རྡེག་འཆོས་བུ་མོ་དང་།

མུན་པ་བུད་མེད་ཕྲད་པ་དང་།

བུད་མེད་གཞོན་ནུས་འགྲོང་གདངས་པ།

སྟན་ལྔ་པ་དང་བཅུ་གསུམ་མོ།

བུད་མེད་ཅིག་གྲེད་དེ་རྡེག་འཆོས་པ་དང་།

དགེ་སློང་ཞིག་གིས་བསླང་ན་ཉེས་བྱས་སུ་འགྱུར་རོ།

དགེ་སློང་གྲེད་དེ་རྡེག་འཆོས་པ་ལས་བུད་མེད་ཅིག་གིས་བསླང་ན་ཉེས་པ་མེད་དོ།

དགེ་སློང་རྒན་པོ་ཞིག་བུ་མོ་ལ་ལྟར་སོང་ནས་བུ་མོ་དེའི་པང་བར་འདུག་གོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་ནམ་ཕྱེད་ན་གཅིན་གཅི་ཞིང་འདུག་པ་དང་།

བུད་མེད་ཅིག་ཀྱང་ཕྱིར་བྱུང་སྟེ་འོང་བ་དང་།

མུན་པའི་ནང་དུ་གདོང་ཐུགས་སུ་ཕྲད་དེ་དེ་རྡེག་འཆོས་ནས་དེའི་སྟེང་དུ་འགྱེལ་ཏོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་གྲོང་དུ་བསོད་སྙོམས་ལ་ཞུགས་པ་དང་།

ན་ཆུང་གཞོན་ནུ་མ་ཞིག་འགྲོང་གདངས་ཏེ་འདུག་ནས་དེས་འཕགས་པ་ཚུར་སྤྱོན་འདི་དང་འདི་མཛོད་ཅིག་ཅེས་སྨྲས་པ་དང་།

དེས་དེར་བོང་བ་བཅུག །

བསོད་སྙོམས་བཅུག་པས་བཙངས།

ཁར་བས་བཙོགས་ཤིང་རྡེག་ན་ཐམས་ཅད་ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་བུད་མེད་ལ་ཆོས་བཤད་

པ་དང་།

དེས་དེའི་སྟན་རྐང་པ་དང་།

བརླ་དང་།

བྱིན་པ་དང་།

རྐེད་པ་དང་།

རྩིབ་ལོགས་དང་།

རྒྱབ་དང་།

ལག་པ་དང་།

ཕྲག་པ་དང་།

མགོ་རྣམས་ཀྱིས་ཕུལ་ན་ཐམས་ཅད་ཉེས་བྱས་སུ་འགྱུར་རོ།

མདོར་ན།

འཆར་ཀ་བདེ་དང་འདུ་ཤེས་དང་།

བུང་བུ་གནས་ངན་ལེན་པ་དང་།

སྲིང་མོ་སྤྱོད་པ་ངན་པར་བཅས།

ཁོ་བོས་མཐོང་དང་ཁྱོད་ཀྱི་མདུན།

དེ་དང་དེ་སྟེ་དེ་ཡིད་མགུ།

བསླབ་པའི་གནས་མ་བཅས་པ་ལས་དང་པོ་ལ་ཉེས་པ་མེད་པ་ན།

ཚེ་དང་ལྡན་པ་འཆར་ཀས་འདི་ལྟར་བདག་གིས་བུད་མེད་མང་ཞིག་ལ་གནས་ངན་ལེན་གྱི་ཚིག་སྨྲས་ན།

བདག་གི་ལས་དང་པོ་གང་ཡིན་སྙམ་ནས་ཐེ་ཚོམ་དུ་གྱུར་པ་ནི་རྒྱས་པར་རོ།

དེས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་།

དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས།

བཅོམ་ལྡན་འདས་ཀྱིས་བཀའ་སྩལ་པ།

བསླབ་པའི་གནས་མ་བཅས་པ་ན་འཆར་ཀ་འདས་པ་དང་བཅས་པ་ནི་ཐམས་ཅད་ལས་དང་པོ་པ་སྟེ།

ལས་དང་པོ་པ་ལ་ནི་ཉེས་པ་མེད་དོ།

དགེ་སློང་ཞིག་གིས་མིའི་བུད་མེད་ལ་མི་མ་ཡིན་པར་འདུ་ཤེས་ཏེ་གནས་ངན་ལེན་གྱི་ཚིག་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

མི་ལ་མིར་འདུ་ཤེས་ན་ནི་དགེ་འདུན་གྱི་ལྷག་མར་འགྱུར་རོ།

རྒྱས་པར་ནི་དྲི་བར་བྱའོ།

རྫུ་འཕྲུལ་དང་ཆོ་འཕྲུལ་གྱི་ཆོས་སུ་སྨྲ་ན་ནི་ཉེས་པ་སྦོམ་པོར་འགྱུར་རོ།

ཆོ་འཕྲུལ་མེད་པའི་ཆོས་སུ་སྨྲ་ན་ནི་དགེ་འདུན་གྱི་ལྷག་མར་འགྱུར་རོ།

དགེ་སློང་ཞིག་བུད་མེད་ཅིག་གི་དྲུང་དུ་སོང་ནས་འདི་སྐད་དུ་སྲིང་མོ་རྒྱ་རྣ་རུ་ཞིག་བྱིན་ཅིག་ཅེས་སྨྲས་པ་དང་།

འཕགས་པ་ཁྱོད་ལ་རྒྱ་རྣ་རུ་ཅི་ཞིག་བགྱི།

མོས་གོ་ནས་འཕགས་པ་རྒྱ་རྣ་རུ་སྟ་གོན་བགྱིས་ལགས་སོ།

ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་དུ་བསོད་སྙོམས་ལ་སྤྱོད་པ་ན་བུད་མེད་ཅིག་འགྲོང་གདངས་ཏེ་འདུག་ནས་འཕགས་པ་འདི་བཞིན་མཛོད་ཅེས་སྨྲས་པ་དང་།

ཁྱོད་ཀྱི་ལུས་སྐལ་བ་འདི་ལྟ་བུ་

དང་མཐུན་པས་བོང་བུ་དང་འདི་ལྟར་འདི་བཞིན་བྱོས་ཤིག །

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་རང་བཞིན་གྱིས་གནས་ངན་ལེན་གྱི་ཚིག་སྨྲ་བ་ཞིག་སྟེ།

དེས་བུད་མེད་ཅིག་ལ་གནས་ངན་ལེན་གྱི་ཚིག་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་མ་ཞིག་ནང་པར་སྔར་ལངས་ཏེ།

ཁྲུས་བྱས་མིག་སྨན་གྱིས་བསྐུས།

མགོ་བཤད་དེ་ཆོས་གོས་རྙིང་ཆགས་བྱས་པ་གྱོན་ནས་མཉན་དུ་ཡོད་པར་སོང་བ་དང་།

དགེ་སློང་ཞིག་བསོད་སྙོམས་སྤྱོད་པ་དེས་དེ་མཐོང་ནས་དེས་སྲིང་མོ་ཁྱོད་སྐྱེས་པ་ལ་སྟེག་ཅིང་སྤྱད་པ་སྤྱོད་དོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་རྒན་པོ་ཞིག་བུ་མོ་ལྟར་སོང་བ་དང་།

དེའི་བུ་མོ་ལོག་པར་སྤྱོད་པ་ཞིག་སྟེ།

དེས་བུ་མོ་འདི་ལྟར་ཁྱིམ་གཉིས་འཇིག་པར་མ་བྱེད་ཅིག །

དེས་མི་ཐུབ་པ་ན་ཇི་ལྟར་བགྱི་ཞེས་སྨྲས་པ་དང་།

དེ་སྟེ་མི་ཐུབ་ན་དེར་མགལ་དུམ་ཆུག་ཤིག་ཅེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་དུ་གྲོང་དུ་ཉེ་བར་འགྲོ་བ་ཡིན་ཏེ།

དེ་སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་།

དེས་ཁྱིམ་བདག་དེའི་ཆུང་མ་ལ་སྲིང་མོ་ཁོ་བོ་ལ་བྱིན་ཅིག་ཅེས་སྨྲས་པ་དང་།

འཕགས་པ་ཁྱོད་ལ་ཅི་གསོལ།

སྲིང་མོ་ཁོ་བོ་ལ་དེ་བྱིན་ཅིག་ཅེས་སྨྲས་པ་དང་།

མོས་གོ་སྟེ་འཕགས་པ་སྟ་གོན་བགྱིས་སོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

སྲིང་མོ་ཁྱོད་ལ་གང་མཐོང་བའོ།

འཕགས་པ་བདག་ལ་ཅི་ཞིག་གཟིགས།

སྲིང་མོ་ཁྱོད་ལ་གང་མཐོང་བ་དེ་བྱིན་ཅིག །

མོས་གོ་ནས་འཕགས་པ་སྟ་གོན་བགྱིས་སོ་

ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

སྲིང་མོ་ཁྱོད་ཀྱི་མདུན་ན་ཅི་ཡིན་པ་དེ་བྱིན་བཙུན་པ་བདག་གི་མདུན་ན་ཅི་མཆིས།

སྲིང་མོ་ཁྱོད་ཀྱི་མདུན་ན་གང་ཡོད་པ་དེ་བྱིན་ཅིག །

མོས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་དུ་གྲོང་དུ་ཉེ་བར་འགྲོ་བ་ཡིན་ཏེ།

དེ་སྔ་དྲོ་ཤམ་ཐབས་དང་ཆོས་གོས་བགོས་ནས་ལྷུང་བཟེད་ཁྱེར་ཏེ་གྲོང་དེར་སོང་བ་དང་།

ཁྱིམ་པ་དེའི་ཆུང་མ་དེ་ལ་སྲིང་མོ་ཁྱོད་ཀྱིས་ཡིད་དུ་འོང་བ་གང་ཡིན་པ་དེ་བྱིན་ཅིག་ཅེས་སྨྲས་པ་དང་།

འཕགས་པ་བདག་ལ་ཡིད་དུ་འོང་བ་ཅི་ཞིག་མཆིས།

སྲིང་མོ་ཁྱོད་ཀྱི་ཡིད་དུ་འོང་བ་གང་ཡིན་པ་དེ་བྱིན་ཅིག །

མོས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་པ་དང་།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།།

འདུལ་བ་གཞུང་དམ་པ།

བམ་པོ་ཉི་ཤུ་ལྔ་པ།

མདོར་ན།

དགའ་དང་ཡིད་དུ་འོང་བ་དང་།

ཆུ་དང་བཅའ་བ་རྣམས་དང་ཡང་།

ཐུག་པ་དག་དང་བཟའ་བའི་རྣམས།

སྨྲས་པ་དག་ཀྱང་དེ་བཞིན་ནོ།

དགེ་སློང་ཞིག་གྲོང་གཞན་ཞིག་ཏུ་གྲོང་དུ་ཉེ་བར་འགྲོ་བ་ཡིན་ཏེ།

ཁྱིམ་བདག་དེས་ཆུང་མ་ལ་དགེ་སློང་དེ་ཅི་དགའ་བ་བྱིན་ཅིག་ཅེས་སྨྲས་ཏེ་སོང་ངོ་།

དགེ་སློང་དེའང་སྔ་དྲོ་ཤམ་ཐབས་དང་ཆོས་གོས་བགོས་ནས་ལྷུང་བཟེད་ཁྱེར་ཏེ་ཁྱིམ་དེར་སོང་བ་དང་།

བུད་མེད་དེས་བཙུན་པ་ཁྱིམ་བདག་གི་མཆིད་ནས་དགེ་སློང་དེ་ཅི་དགྱེས་པ་སྩོལ་ཅིག་ཅེས་མཆི་ན།

འཕགས་པ་ཁྱོད་ཅི་དགྱེས།

སྲིང་མོ་བདག་ནི་ཁྱོད་ཉིད་ལ་དགའོ་ཞེས་སྨྲས་པ་དང་།

མོས་ཀྱང་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ།

དགེ་སློང་དེ་བདག་ལ་དགེ་འདུན་གྱི་ལྷག་མའི་ཉེས་པ་མ་བྱུང་གྲང་སྙམ་དུ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་

ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

ཡིད་དུ་འོང་ངོ་ཞེས་བྱ་བའང་དེ་བཞིན་ནོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་སྔ་དྲོ་ཤམ་ཐབས་བགོས་ནས་གྲོང་དེར་སོང་བ་དང་།

ཁྱིམ་བདག་དེའི་ཆུང་མ་ལ་སྲིང་མོ་བདག་ལ་ཆུ་ལུད་ཅིག་ཅེས་སྨྲས་པ་དང་།

བཙུན་པ་ཆབ་བཅུས་ཏེ་མཆིས་གཞེས་ཤིག །

སྲིང་མོ་ཁྱོད་ཉིད་ཆུ་ཡིན་ནོ་ཞེས་སྨྲས་པ་དང་།

མོས་ཀྱང་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

སྲིང་མོ་བདག་ལ་བཅའ་བ་བྱིན་ཅིག །

བཙུན་པ་ཆོས་ཀྱི་བར་དུ་གཞེས་ཤིག །

སྲིང་མོ་བདག་གི་བཅའ་བ་ཁྱོད་ཉིད་ཡིན་ནོ།

དེས་འཕགས་པ་སྟ་གོན་བགྱིའོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

སྲིང་མོ་བདག་ལ་ཐུག་པ་བྱིན་ཅིག །

བཙུན་པ་བསྒྲལ་གྱི་བར་དུ་གཞེས་ཤིག །

སྲིང་མོ་ཁྱོད་ཉིད་ཁོ་བོའི་ཐུག་པའོ།

དེས་འཕགས་པ་སྟ་གོན་བགྱིའོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་སྔ་དྲོ་ཤམ་ཐབས་བགོས་ཏེ་གྲོང་དེར་སོང་ནས།

དེས་ཁྱིམ་བདག་གི་ཆུང་མ་དེ་ལ་སྲིང་མོ་བདག་ལ་ཟན་བྱིན་ཅིག་ཅེས་སྨྲས་པ་དང་།

འཕགས་པ་བསྒྲལ་གྱི་བར་དུ་གཞེས་ཤིག །

སྲིང་མོ་ཁྱོད་ཉིད་བདག་གི་ཟན་ནོ།

དེས་གོ་ནས་འཕགས་པ་སྟ་གོན་བགྱིའོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གིས་བུད་མེད་ལ་གནས་ངན་ལེན་གྱི་ཚིག་སྨྲས་ན།

དེ་མ་གོ་ནས་མོས་བཙུན་པ་དེ་ཇི་སྐད་གསུང་ཞེས་དྲིས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

མདོར་ན།

རི་དགས་བུ་དང་

སྤྲིང་བ་དང་།

མིང་དང་འཕགས་པ་ཆུང་མ་གསུམ།

སྨད་འཚོང་གཉིས་དང་བུད་མེད་དང་།

གཞོན་ནུ་སྐྱེས་པ་ཁུ་ཚུར་རོ།

སངས་རྒྱས་བཅོམ་ལྡན་འདས་ཛེ་ཏའི་ཚལ་མགོན་མེད་པ་ལ་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

བསླབ་པའི་གནས་མ་བཅས་ཏེ་ལས་དང་པོ་པ་ལ་ཉེས་པ་མེད་པ་ནི་རི་དགས་ལྟ་བུའི་བུ་ནག་པོ་དེ་འདི་སྙམ་དུ་བསླབ་པའི་གནས་མ་བཅས་པར་བདག་གིས་རིགས་མང་ཞིག་ལ་སྨྱན་བྱས་ན་བདག་གི་ལས་དང་པོ་གང་ཡིན་ཞེས་སེམས་ལ་ཐེ་ཚོམ་དང་དོགས་པ་དང་འགྱོད་པ་སྐྱེས་ནས།

དེས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

བསླབ་པའི་གནས་མ་བཅས་པ་ན་རི་དགས་ལྟ་བུའི་བུ་ནག་པོས་འདས་པ་དང་བཅས་པ་ཐམས་ཅད་ལས་དང་པོ་པ་སྟེ་ལས་དང་པོ་པ་ལ་ཉེས་པ་མེད་དོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་སོང་བ་དང་།

ཁྱིམ་བདག་དེས་སྨྲས་པ།

འཕགས་པ་བུད་མེད་འདི་ཞེས་བགྱི་བ་ལ་ཚུར་ཤོག་ཤིག་ཅེས་བགྱི་བར་སྤྱོད་དམ།

དེ་ན་རེ་ནུས་ཏེ་ལན་སླར་སྐྱེལ་མ་ནུས་སོ་ཞེས་སྨྲས་པ་དང་།

འོ་ན་དྲན་ཏེ་གྲུབ་པར་ཇི་ལྟར་ཤེས་པར་བྱ།

གནས་འདི་ཞེས་བྱ་བར་དགེ་སློང་ཞིག་གཞག་གོ།

དགེ་སློང་དེ་ཁྱིམ་གཞན་ཞིག་ཏུ་བཏང་སྟེ།

དགེ་སློང་དེ་ཡང་སླར་བྱུང་བ་མཐོང་ནས།

དེས་དེ་ལ་ཚེ་དང་ལྡན་པ་སྐད་ཅིག་འདི་ན་འདུག་ཤིག་ཅེས་སྨྲས་པ་དང་།

དེ་གནས་དེར་འདུག་ནས་ཁྱིམ་བདག་དེ་ཕྱིར་བྱུང་སྟེ།

དགེ་སློང་དེ་ལ་བཙུན་པ་ལེགས་སོ་ལེགས་སོ་ཞེས་བྱ་བའི་དོན་དེ་གྲུབ་མོད་ཅེས་སྨྲས་པ་དང་།

དེ་ཅི་ཞིག་བརྡའོ་ཞེས་སྨྲས་སོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་མེད་དོ།

དགེ་སློང་ཞིག་གྲོང་གཞན་ཞིག་ཏུ་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་ཕྱིན་པ་དང་།

ཁྱིམ་བདག་དེས་སྨྲས་པ།

དགེ་སློང་དེ་ལ་འཕགས་པ་བུད་མེད་འདི་ཞེས་བགྱི་བ་ལ་འདི་ལྟར་ཚུར་ཤོག་ཅེས་ཕྲིན་བགྱི་བར་སྤྱོད་དམ།

དེས་ནུས་སོ་ཞེས་སྨྲས་ནས་སོང་སྟེ་བསྒོ་བ་དང་།

བུད་མེད་དེས་བཙུན་པ་ཁོ་

མོ་ནི་མི་འཚལ་ཏོ་ཞེས་ནས་དེ་དག་གི་དོན་དེ་མ་གྲུབ་བོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

ཁྱིམ་བདག་ཅིག་གི་ཆུང་མས་ཉེས་པ་ཅུང་ཟད་ཅིག་བྱས་ཏེ།

དེས་དེ་ལ་རྡོག་པས་བརྡེགས་ནས་བསྐྲད་པ་དང་།

དེ་ན་ཡང་དགེ་སློང་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེས་དེ་གཉིས་བསྡུམས་ནས་དེ་གཉིས་དུམ་པར་གྱུར་ཏོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དེ་སྟེ་རྡོ་གསུམ་བོར་བའམ་ཤགས་བཀྱེ་སྟེ་ཆུང་མ་མ་ཡིན་པར་བསྒྲགས་པ་དེ་དག་གིས་སྨྱན་བྱས་ན་ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་ཕྱིན་པ་དང་།

ཁྱིམ་བདག་དེས་སྨྲས་པ།

འཕགས་པ་སྨད་འཚོང་མ་འདི་ཞེས་བགྱི་བ་ལ་ཚུར་ཤོག་ཤིག་ཅེས་ཕྲིན་བགྱི་བར་སྤྱོད་དམ།

དེས་ནུས་སོ་ཞེས་སྨྲས་ནས་དེར་སོང་སྟེ་མོ་ལ་བསྒོ་བ་དང་།

དེ་འདི་སྙམ་དུ་ཕ་གིར་ཉལ་དུ་མི་ཁོམ་གྱིས་ང་ཉལ་ལོ་སྙམ་དུ་བསམས་ནས་དེ་ཉལ་བ་ལས་ནམ་ལངས་ནས་དེ་གཉིས་ཀྱི་དོན་དེ་མ་གྲུབ་བོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་ནི་མེད་དེ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་ཕྱིན་པ་དང་།

ཁྱིམ་བདག་དེས་སྨྲས་པ།

བཙུན་པ་སྨད་འཚོང་མ་འདི་ཞེས་བགྱི་བ་ལ་ཚུར་ཤོག་ཅེས་ཕྲིན་བགྱི་བར་སྤྱོད་དམ།

དེས་ནུས་སོ་ཞེས་སྨྲས་ནས་དེ་སོང་སྟེ་བསྒོ་བ་དང་།

མོ་ཡང་འོང་བ་ལས་བར་དུ་གཞན་གྱིས་ཕྲོགས་ནས་དེ་གཉིས་ཀྱི་དོན་དེ་མ་གྲུབ་བོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

དགེ་སློང་ཞིག་གྲོང་གཞན་ཞིག་གི་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་ཕྱིན་པ་དང་།

ཁྱིམ་བདག་དེས་སྨྲས་པ།

འཕགས་པ་བུད་མེད་འདི་ཞེས་བགྱི་བ་ལ་ཕྲིན་འདི་སྐད་བགྱི་བར་སྤྱོད་དམ།

དེས་ནུས་སོ་ཞེས་

སྨྲས་ཏེ་སོང་ནས་དེ་ལ་བསྒོ་བ་དང་།

དེ་ཡང་རྒྱན་ཐོགས་ཏེ་ཆས་མ་ཐག་ཏུ་ཁྱོ་འོངས་ནས་དེ་གཉིས་ཀྱི་དོན་མ་གྲུབ་བོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

ཉེས་པ་སྦོམ་པོར་འགྱུར་རོ།

ཁྱིམ་བདག་གཉིས་ཤིག་མཛའ་སྟེ་དེ་གཉིས་ཀྱི་ཆུང་མ་སྦྲུམ་པར་གྱུར་པ་དང་།

དེ་སྟེ་ཁྱོད་ལས་བུ་མོ་ཞིག་བཙས་ཏེ་ཁོ་བོ་ལས་ཁྱེའུ་ཞིག་བཙས་ན་ཁྱོད་ཀྱི་བུ་མོ་ཁོ་བོའི་ཁྱེའུ་ལ་བྱིན་ཅིག །

འོན་ཏེ་ཁོ་བོའི་བུ་མོ་ལ་ཁྱོད་ཀྱི་ཁྱེའུ་བཙས་ན་ནི་ཁྱོད་ཀྱི་ཁྱེའུ་ལ་སྦྱིན་ནོ།

དེ་ནས་གཅིག་ལ་ནི་ཁྱེའུ་ཞིག་བཙས།

གཅིག་ལ་ནི་བུ་མོ་ཞིག་བཙས་པ་དང་ཁྱིམ་བདག་དེ་དུས་ལས་འདས་སོ།

དེ་དུས་ལས་འདས་པས་ཁྱིམ་སྲིད་ཀྱང་དམས་པར་གྱུར་ཏེ།

ཁྱིམ་བདག་དེས་བུ་མོ་མི་སྦྱིན་ནོ་སྙམ་དུ་བསམས་པ་དང་།

ཁྱེའུ་དེས་ཐོས་ནས་དེ་ན་དགེ་སློང་ཞིག་གྲོང་གཞན་དུ་ཉེ་བར་འགྲོ་བ་ཡིན་ཏེ།

གྲོང་དེར་ཕྱིན་པ་དང་།

དེ་ལ་ཁྱེའུས་སྨྲས་པ།

འཕགས་པ་བུ་མོ་འདི་ཞེས་བགྱི་བ་ལ་ཁྱོད་བདག་གི་མ་དང་ཕ་གཉིས་ཀྱིས་མ་བཙས་པར་བདག་ལ་བྱིན་ན་བདག་ཀྱང་ལས་སྨིན་པས་ལོངས་སྤྱོད་དམས་པར་གྱུར་ཏེ།

ལོངས་སྤྱོད་ལྟ་ད་རུང་ཡང་རྙེད་པར་འགྱུར་གྱིས་ད་ཡང་ཁོ་བོ་མ་བཏང་ཤིག་ཅེས་ཕྲིན་བགྱི་བར་སྤྱོད་དམ།

དེས་ནུས་སོ་ཞེས་སྨྲས་ནས་དེ་སོང་སྟེ་བསྒོ་བ་དང་།

བུ་མོ་དེ་མ་དང་ཕའི་དྲུང་ནས་བྲོས་ཏེ་དེའི་དྲུང་དུ་སོང་ནས་དེ་གཉིས་འདུས་པར་གྱུར་ཏོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

ཁྱིམ་བདག་ཅིག་གིས་བུད་མེད་ལ་ཁོ་མོ་ལ་འདི་བདག་གི་སྐབས་ཕྱེ་ཤིག་ཅེས་སྨྲས་པ་ན།

དེས་བདག་མི་ཁོམ་མོ་ཞེས་སྨྲས་པ་དང་།

ཁྱོད་ཇི་ཙམ་ན་ཁོམ་པ་བདག་གིས་ཇི་ལྟར་རྟོགས་པར་བྱ།

ཁོ་མོ་ལ་གྲོང་དུ་ཉེ་བར་འགྲོ་བའི་དགེ་སློང་ཞིག་ཡོད་ཀྱིས་དེར་རྒྱབ་ཏུ་ཁུ་ཚུར་ཅིག་བརྒྱབ་པ་ན་ཤེས་པར་མཛོད་ཅིག །

དགེ་སློང་དེ་ཡང་གྲོང་དེར་འོངས་པ་དང་།

བུད་མེད་དེས་སྨྲས་པ།

འཕགས་པ་ཁྱིམ་བདག་འདི་ཞེས་བགྱི་བའི་རྒྱབ་ཏུ་ཁུ་ཚུར་ཅིག་མཛད་པར་སྤྱོད་དམ།

དེས་ནུས་སོ་ཞེས་སྨྲས་ཏེ་སོང་

ནས་ཁྱིམ་བདག་དེའི་རྒྱབ་ཏུ་ཁུ་ཚུར་ཅིག་བརྒྱབ་པ་དང་།

དེ་བཙུན་པ་དོན་གྲུབ་ཀྱིས་ལེགས་སོ་ལེགས་སོ་ཞེས་སྨྲས་པ་དང་།

འདི་ནི་ཅི་ཞིག །

དེ་ནི་བརྡའོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།

དགེ་འདུན་གྱི་ལྷག་མའི་ཉེས་པ་མེད་དེ།

ཉེས་པ་སྦོམ་པོར་འགྱུར་རོ།

མདོར་ན།

གྲོང་དུ་ཉེར་འགྲོ་རྣམ་གཉིས་དང་།

གཞན་ཡང་དགེ་འདུན་རྣམས་ཀྱི་གཉིས།

གོས་དང་ནད་པར་གྱུར་པ་དང་།

གཞོན་ནུ་མ་དང་རྣམ་པ་ལྔ།

དགེ་སློང་ཞིག་གྲོང་གཞན་གྱི་གྲོང་དུ་ཉེ་བར་འགྲོ་བ་ཡིན་ཏེ།

དེ་གྲོང་དེར་ཕྱིན་ནས་བུད་མེད་དེས་སྨྲས་པ།

འཕགས་པ་ཁྱིམ་བདག་འདི་ཞེས་བྱ་བ་ལ་ཚུར་སྤྱོན་ཞེས་ཕྲིན་བགྱི་བར་སྤྱོད་དམ།

དེ་སྟེ་དགེ་འདུན་ལ་བཤོས་སྦྱོར་ནུས་ན་ནི་ནུས་སོ་ཞེས་སྨྲས་པ་དང་།

དེས་རྒྱུ་སྦྱིན་ནས་དགེ་སློང་དེས་བཤོས་སྦྱར་ཏེ་ཁྱིམ་བདག་དེ་བོས་པ་དང་།

དེ་གཉིས་ཕྲད་པར་གྱུར་ཏོ།

དགེ་སློང་དེ་འགྱོད་པ་སྐྱེས་ནས།

བཅོམ་ལྡན་འདས་ཀྱིས་བཀའ་སྩལ་པ།