增支部第1055經（Aṅguttara Nikāya 8.72 / 8. Yamakavagga / Dutiyasaddhāsutta）

Aṅguttara Nikāya 8.72

8. Yamakavagga

Dutiyasaddhāsutta

“Saddho ca, bhikkhave, bhikkhu hoti, no ca sīlavā.

Evaṁ so tenaṅgena aparipūro hoti.

Tena taṁ aṅgaṁ paripūretabbaṁ:

‘kintāhaṁ saddho ca assaṁ sīlavā cā’ti.

Yato ca kho, bhikkhave, bhikkhu saddho ca hoti sīlavā ca,

evaṁ so tenaṅgena paripūro hoti.

Saddho ca, bhikkhave, bhikkhu hoti sīlavā ca, no ca bahussuto …pe…

bahussuto ca, no ca dhammakathiko …pe…

dhammakathiko ca, no ca parisāvacaro …pe…

parisāvacaro ca, no ca visārado parisāya dhammaṁ deseti …pe…

visārado ca parisāya dhammaṁ deseti, no ca ye te santā vimokkhā atikkamma rūpe āruppā te kāyena phusitvā viharati …pe…

ye te santā vimokkhā atikkamma rūpe āruppā te kāyena phusitvā viharati, no ca āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati;

evaṁ so tenaṅgena aparipūro hoti.

Tena taṁ aṅgaṁ paripūretabbaṁ:

‘kintāhaṁ saddho ca assaṁ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseyyaṁ, ye te santā vimokkhā atikkamma rūpe āruppā te kāyena phusitvā vihareyyaṁ, āsavānañca khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja vihareyyan’ti.

Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṁ deseti. Ye te santā vimokkhā atikkamma rūpe āruppā te ca kāyena phusitvā viharati, āsavānañca khayā …pe… sacchikatvā upasampajja viharati;

evaṁ so tenaṅgena paripūro hoti.

Imehi kho, bhikkhave, aṭṭhahi dhammehi samannāgato bhikkhu samantapāsādiko ca hoti sabbākāraparipūro cā”ti.

Dutiyaṁ.