小部第113經（Khuddakanikāya / Dhammapada / Brāhmaṇavagga / Pasādabahulabrāhmaṇavatthu）

Khuddakanikāya

Dhammapada

Brāhmaṇavagga

Pasādabahulabrāhmaṇavatthu

Chinda sotaṁ parakkamma,

kāme panuda brāhmaṇa;

Saṅkhārānaṁ khayaṁ ñatvā,

akataññūsi brāhmaṇa.

Sambahulabhikkhuvatthu

Yadā dvayesu dhammesu,

pāragū hoti brāhmaṇo;

Athassa sabbe saṁyogā,

atthaṁ gacchanti jānato.

Māravatthu

Yassa pāraṁ apāraṁ vā,

pārāpāraṁ na vijjati;

Vītaddaraṁ visaṁyuttaṁ,

tamahaṁ brūmi brāhmaṇaṁ.

Aññatarabrāhmaṇavatthu

Jhāyiṁ virajamāsīnaṁ,

katakiccamanāsavaṁ;

Uttamatthamanuppattaṁ,

tamahaṁ brūmi brāhmaṇaṁ.

Ānandattheravatthu

Divā tapati ādicco,

rattimābhāti candimā;

Sannaddho khattiyo tapati,

jhāyī tapati brāhmaṇo;

Atha sabbamahorattiṁ,

buddho tapati tejasā.

Aññatarabrāhmaṇapabbajitavatthu

Bāhitapāpoti brāhmaṇo,

Samacariyā samaṇoti vuccati;

Pabbājayamattano malaṁ,

Tasmā “pabbajito”ti vuccati.

Sāriputtattheravatthu

Na brāhmaṇassa pahareyya,

nāssa muñcetha brāhmaṇo;

Dhī brāhmaṇassa hantāraṁ,

tato dhī yassa muñcati.

Na brāhmaṇassetadakiñci seyyo,

Yadā nisedho manaso piyehi;

Yato yato hiṁsamano nivattati,

Tato tato sammatimeva dukkhaṁ.

Mahāpajāpatigotamīvatthu

Yassa kāyena vācāya,

manasā natthi dukkaṭaṁ;

Saṁvutaṁ tīhi ṭhānehi,

tamahaṁ brūmi brāhmaṇaṁ.

Sāriputtattheravatthu

Yamhā dhammaṁ vijāneyya,

sammāsambuddhadesitaṁ;

Sakkaccaṁ taṁ namasseyya,

aggihuttaṁva brāhmaṇo.

Jaṭilabrāhmaṇavatthu

Na jaṭāhi na gottena,

na jaccā hoti brāhmaṇo;

Yamhi saccañca dhammo ca,

so sucī so ca brāhmaṇo.

Kuhakabrāhmaṇavatthu

Kiṁ te jaṭāhi dummedha,

kiṁ te ajinasāṭiyā;

Abbhantaraṁ te gahanaṁ,

bāhiraṁ parimajjasi.

Kisāgotamīvatthu

Paṁsukūladharaṁ jantuṁ,

kisaṁ dhamanisanthataṁ;

Ekaṁ vanasmiṁ jhāyantaṁ,

tamahaṁ brūmi brāhmaṇaṁ.

Ekabrāhmaṇavatthu

Na cāhaṁ brāhmaṇaṁ brūmi,

yonijaṁ mattisambhavaṁ;

Bhovādi nāma so hoti,

sace hoti sakiñcano;

Akiñcanaṁ anādānaṁ,

tamahaṁ brūmi brāhmaṇaṁ.

Uggasenaseṭṭhiputtavatthu

Sabbasaṁyojanaṁ chetvā,

yo ve na paritassati;

Saṅgātigaṁ visaṁyuttaṁ,

tamahaṁ brūmi brāhmaṇaṁ.

Dvebrāhmaṇavatthu

Chetvā naddhiṁ varattañca,

sandānaṁ sahanukkamaṁ;

Ukkhittapalighaṁ buddhaṁ,

tamahaṁ brūmi brāhmaṇaṁ.

Akkosakabhāradvājavatthu

Akkosaṁ vadhabandhañca,

aduṭṭho yo titikkhati;

Khantībalaṁ balānīkaṁ,

tamahaṁ brūmi brāhmaṇaṁ.

Sāriputtattheravatthu

Akkodhanaṁ vatavantaṁ,

sīlavantaṁ anussadaṁ;

Dantaṁ antimasārīraṁ,

tamahaṁ brūmi brāhmaṇaṁ.

Uppalavaṇṇāttherīvatthu

Vāri pokkharapatteva,

āraggeriva sāsapo;

Yo na limpati kāmesu,

tamahaṁ brūmi brāhmaṇaṁ.

Aññatarabrāhmaṇavatthu

Yo dukkhassa pajānāti,

idheva khayamattano;

Pannabhāraṁ visaṁyuttaṁ,

tamahaṁ brūmi brāhmaṇaṁ.

Khemābhikkhunīvatthu

Gambhīrapaññaṁ medhāviṁ,

maggāmaggassa kovidaṁ;

Uttamatthamanuppattaṁ,

tamahaṁ brūmi brāhmaṇaṁ.

Pabbhāravāsitissattheravatthu

Asaṁsaṭṭhaṁ gahaṭṭhehi,

anāgārehi cūbhayaṁ;

Anokasārimappicchaṁ,

tamahaṁ brūmi brāhmaṇaṁ.

Aññatarabhikkhuvatthu

Nidhāya daṇḍaṁ bhūtesu,

tasesu thāvaresu ca;

Yo na hanti na ghāteti,

tamahaṁ brūmi brāhmaṇaṁ.

Sāmaṇerānaṁvatthu

Aviruddhaṁ viruddhesu,

attadaṇḍesu nibbutaṁ;

Sādānesu anādānaṁ,

tamahaṁ brūmi brāhmaṇaṁ.

Mahāpanthakattheravatthu

Yassa rāgo ca doso ca,

māno makkho ca pātito;

Sāsaporiva āraggā,

tamahaṁ brūmi brāhmaṇaṁ.

Pilindavacchattheravatthu

Akakkasaṁ viññāpaniṁ,

giraṁ saccamudīraye;

Yāya nābhisaje kañci,

tamahaṁ brūmi brāhmaṇaṁ.

Aññatarattheravatthu

Yodha dīghaṁ va rassaṁ vā,

aṇuṁ thūlaṁ subhāsubhaṁ;

Loke adinnaṁ nādiyati,

tamahaṁ brūmi brāhmaṇaṁ.

Sāriputtattheravatthu

Āsā yassa na vijjanti,

asmiṁ loke paramhi ca;

Nirāsāsaṁ visaṁyuttaṁ,

tamahaṁ brūmi brāhmaṇaṁ.

Mahāmoggallānattheravatthu

Yassālayā na vijjanti,

aññāya akathaṅkathī;

Amatogadhamanuppattaṁ,

tamahaṁ brūmi brāhmaṇaṁ.

Revatattheravatthu

Yodha puññañca pāpañca,

ubho saṅgamupaccagā;

Asokaṁ virajaṁ suddhaṁ,

tamahaṁ brūmi brāhmaṇaṁ.

Candābhattheravatthu

Candaṁva vimalaṁ suddhaṁ,

vippasannamanāvilaṁ;

Nandībhavaparikkhīṇaṁ,

tamahaṁ brūmi brāhmaṇaṁ.

Sīvalittheravatthu

Yomaṁ palipathaṁ duggaṁ,

saṁsāraṁ mohamaccagā;

Tiṇṇo pāraṅgato jhāyī,

anejo akathaṅkathī;

Anupādāya nibbuto,

tamahaṁ brūmi brāhmaṇaṁ.

Sundarasamuddattheravatthu

Yodha kāme pahantvāna,

anāgāro paribbaje;

Kāmabhavaparikkhīṇaṁ,

tamahaṁ brūmi brāhmaṇaṁ.

Jaṭilattheravatthu

Yodha taṇhaṁ pahantvāna,

anāgāro paribbaje;

Taṇhābhavaparikkhīṇaṁ,

tamahaṁ brūmi brāhmaṇaṁ.

Jotikattheravatthu

Yodha taṇhaṁ pahantvāna,

anāgāro paribbaje;

Taṇhābhavaparikkhīṇaṁ,

tamahaṁ brūmi brāhmaṇaṁ.

Naṭaputtakattheravatthu

Hitvā mānusakaṁ yogaṁ,

dibbaṁ yogaṁ upaccagā;

Sabbayogavisaṁyuttaṁ,

tamahaṁ brūmi brāhmaṇaṁ.

Naṭaputtakattheravatthu

Hitvā ratiñca aratiñca,

sītibhūtaṁ nirūpadhiṁ;

Sabbalokābhibhuṁ vīraṁ,

tamahaṁ brūmi brāhmaṇaṁ.

Vaṅgīsattheravatthu

Cutiṁ yo vedi sattānaṁ,

upapattiñca sabbaso;

Asattaṁ sugataṁ buddhaṁ,

tamahaṁ brūmi brāhmaṇaṁ.

Yassa gatiṁ na jānanti,

devā gandhabbamānusā;

Khīṇāsavaṁ arahantaṁ,

tamahaṁ brūmi brāhmaṇaṁ.

Dhammadinnāttherīvatthu

Yassa pure ca pacchā ca,

majjhe ca natthi kiñcanaṁ;

Akiñcanaṁ anādānaṁ,

tamahaṁ brūmi brāhmaṇaṁ.

Aṅgulimālattheravatthu

Usabhaṁ pavaraṁ vīraṁ,

mahesiṁ vijitāvinaṁ;

Anejaṁ nhātakaṁ buddhaṁ,

tamahaṁ brūmi brāhmaṇaṁ.

Devahitabrāhmaṇavatthu

Pubbenivāsaṁ yo vedi,

saggāpāyañca passati;

Atho jātikkhayaṁ patto,

abhiññāvosito muni;

Sabbavositavosānaṁ,

tamahaṁ brūmi brāhmaṇaṁ.

Brāhmaṇavaggo chabbīsatimo.

Ettāvatā sabbapaṭhame yamakavagge cuddasa vatthūni, appamādavagge nava, cittavagge nava, pupphavagge dvādasa, bālavagge pannarasa, paṇḍitavagge ekādasa, arahantavagge dasa, sahassavagge cuddasa, pāpavagge dvādasa, daṇḍavagge ekādasa, jarāvagge nava, attavagge dasa, lokavagge ekādasa, buddhavagge nava, sukhavagge aṭṭha, piyavagge nava, kodhavagge aṭṭha, malavagge dvādasa, dhammaṭṭhavagge dasa, maggavagge dvādasa, pakiṇṇakavagge nava, nirayavagge nava, nāgavagge aṭṭha, taṇhāvagge dvādasa, bhikkhuvagge dvādasa, brāhmaṇavagge cattālīsāti pañcādhikāni tīṇi vatthusatāni.

Satevīsacatussatā,

catusaccavibhāvinā;

Satattayañca vatthūnaṁ,

pañcādhikaṁ samuṭṭhitāti.

Dhammapade vaggānamuddānaṁ

Yamakappamādo cittaṁ,

pupphaṁ bālena paṇḍito;

Arahanto sahassañca,

pāpaṁ daṇḍena te dasa.

Jarā attā ca loko ca,

buddho sukhaṁ piyena ca;

Kodho malañca dhammaṭṭho,

maggavaggena vīsati.

Pakiṇṇaṁ nirayo nāgo,

taṇhā bhikkhu ca brāhmaṇo;

Ete chabbīsati vaggā,

desitādiccabandhunā.

Gāthānamuddānaṁ

Yamake vīsati gāthā,

appamādamhi dvādasa;

Ekādasa cittavagge,

pupphavaggamhi soḷasa.

Bāle ca soḷasa gāthā,

paṇḍitamhi catuddasa;

Arahante dasa gāthā,

sahasse honti soḷasa.

Terasa pāpavaggamhi,

daṇḍamhi dasa satta ca;

Ekādasa jarā vagge,

attavaggamhi tā dasa.

Dvādasa lokavaggamhi,

buddhavaggamhi ṭhārasa;

Sukhe ca piyavagge ca,

gāthāyo honti dvādasa.

Cuddasa kodhavaggamhi,

malavaggekavīsati;

Sattarasa ca dhammaṭṭhe,

maggavagge sattarasa.

Pakiṇṇe soḷasa gāthā,

niraye nāge ca cuddasa;

Chabbīsa taṇhāvaggamhi,

tevīsa bhikkhuvaggikā.

Ekatālīsagāthāyo,

brāhmaṇe vaggamuttame;

Gāthāsatāni cattāri,

tevīsa ca punāpare;

Dhammapade nipātamhi,

desitādiccabandhunāti.

Dhammapadapāḷi samattā.