小部第787經（Milindapañha / Mahāvagga / 4. Anantakāyapañha）

Milindapañha

Mahāvagga

4. Anantakāyapañha

Atha kho milindassa rañño etadahosi—

“paṇḍito kho ayaṁ bhikkhu paṭibalo mayā saddhiṁ sallapituṁ, bahukāni ca me ṭhānāni pucchitabbāni bhavissanti, yāva apucchitāniyeva tāni ṭhānāni bhavissanti, atha sūriyo atthaṁ gamissati, yannūnāhaṁ sve antepure sallapeyyan”ti.

Atha kho rājā devamantiyaṁ etadavoca—

“tena hi tvaṁ, devamantiya, bhadantassa āroceyyāsi ‘sve antepure raññā saddhiṁ sallāpo bhavissatī’”ti.

Idaṁ vatvā milindo rājā uṭṭhāyāsanā theraṁ nāgasenaṁ āpucchitvā rathaṁ abhirūhitvā “nāgaseno nāgaseno”ti sajjhāyaṁ karonto pakkāmi.

Atha kho devamantiyo āyasmantaṁ nāgasenaṁ etadavoca—

“rājā, bhante, milindo evamāha—

‘sve antepure raññā saddhiṁ sallāpo bhavissatī’”ti.

“Suṭṭhū”ti thero abbhānumodi.

Atha kho tassā rattiyā accayena devamantiyo ca anantakāyo ca maṅkuro ca sabbadinno ca yena milindo rājā tenupasaṅkamiṁsu, upasaṅkamitvā rājānaṁ milindaṁ etadavocuṁ—

“āgacchatu, mahārāja, bhadanto nāgaseno”ti?

“Āma āgacchatū”ti.

“Kittakehi bhikkhūhi saddhiṁ āgacchatū”ti?

“Yattake bhikkhū icchati, tattakehi bhikkhūhi saddhiṁ āgacchatū”ti.

Atha kho sabbadinno āha—

“āgacchatu, mahārāja, dasahi bhikkhūhi saddhin”ti.

Dutiyampi kho rājā āha—

“yattake bhikkhū icchati, tattakehi bhikkhūhi saddhiṁ āgacchatū”ti.

Dutiyampi kho sabbadinno āha—

“āgacchatu, mahārāja, dasahi bhikkhūhi saddhin”ti.

Tatiyampi kho rājā āha—

“yattake bhikkhū icchati, tattakehi bhikkhūhi saddhiṁ āgacchatū”ti.

Tatiyampi kho sabbadinno āha—

“āgacchatu, mahārāja, dasahi bhikkhūhi saddhin”ti.

“Sabbo panāyaṁ sakkāro paṭiyādito, ahaṁ bhaṇāmi ‘yattake bhikkhū icchati, tattakehi bhikkhūhi saddhiṁ āgacchatū’ti.

Ayaṁ bhaṇe sabbadinno aññathā bhaṇati, kiṁ nu mayaṁ nappaṭibalā bhikkhūnaṁ bhojanaṁ dātun”ti?

Evaṁ vutte, sabbadinno maṅku ahosi.

Atha kho devamantiyo ca anantakāyo ca maṅkuro ca yenāyasmā nāgaseno tenupasaṅkamiṁsu, upasaṅkamitvā āyasmantaṁ nāgasenaṁ etadavocuṁ—

“rājā, bhante, milindo evamāha—

‘yattake bhikkhū icchati, tattakehi bhikkhūhi saddhiṁ āgacchatū’”ti.

Atha kho āyasmā nāgaseno pubbaṇhasamayaṁ nivāsetvā pattacīvaramādāya asītiyā bhikkhusahassehi saddhiṁ sāgalaṁ pāvisi.

Atha kho anantakāyo āyasmantaṁ nāgasenaṁ nissāya gacchanto āyasmantaṁ nāgasenaṁ etadavoca—

“bhante nāgasena, yaṁ panetaṁ brūsi ‘nāgaseno’ti, katamo ettha nāgaseno”ti?

Thero āha—

“ko panettha ‘nāgaseno’ti maññasī”ti?

“Yo so, bhante, abbhantare vāto jīvo pavisati ca nikkhamati ca, so ‘nāgaseno’ti maññāmī”ti.

“Yadi paneso vāto nikkhamitvā nappaviseyya, pavisitvā na nikkhameyya, jīveyya nu kho so puriso”ti?

“Na hi, bhante”ti.

“Ye panime saṅkhadhamakā saṅkhaṁ dhamenti, tesaṁ vāto puna pavisatī”ti?

“Na hi, bhante”ti.

“Ye panime vaṁsadhamakā vaṁsaṁ dhamenti, tesaṁ vāto puna pavisatī”ti?

“Na hi, bhante”ti.

“Ye panime siṅgadhamakā siṅgaṁ dhamenti, tesaṁ vāto puna pavisatī”ti?

“Na hi, bhante”ti.

“Atha kissa pana te na marantī”ti.

“Nāhaṁ paṭibalo tayā vādinā saddhiṁ sallapituṁ, sādhu, bhante, atthaṁ jappehī”ti.

“Neso jīvo, assāsapassāsā nāmete kāyasaṅkhārā”ti thero abhidhammakathaṁ kathesi.

Atha anantakāyo upāsakattaṁ paṭivedesīti.

Anantakāyapañho catuttho.