小部第803經（Milindapañha / Addhānavagga / 4. Paṭisandahanapuggalavediyanapañha）

Milindapañha

Addhānavagga

4. Paṭisandahanapuggalavediyanapañha

Rājā āha—

“bhante nāgasena, yo na paṭisandahati, vedeti so kiñci dukkhaṁ vedanan”ti?

Thero āha—

“kiñci vedeti, kiñci na vedetī”ti.

“Kiṁ vedeti, kiṁ na vedetī”ti?

“Kāyikaṁ, mahārāja, vedanaṁ vedeti, cetasikaṁ vedanaṁ na vedetī”ti.

“Kathaṁ, bhante, kāyikaṁ vedanaṁ vedeti, kathaṁ cetasikaṁ vedanaṁ na vedetī”ti?

“Yo hetu yo paccayo kāyikāya dukkhavedanāya uppattiyā, tassa hetussa tassa paccayassa anuparamā kāyikaṁ dukkhavedanaṁ vedeti, yo hetu yo paccayo cetasikāya dukkhavedanāya uppattiyā, tassa hetussa tassa paccayassa uparamā cetasikaṁ dukkhavedanaṁ na vedeti.

Bhāsitampetaṁ, mahārāja, bhagavatā—

‘so ekaṁ vedanaṁ vedeti kāyikaṁ na cetasikan’”ti.

“Bhante nāgasena, yo dukkhaṁ vedanaṁ vedeti, kasmā so na parinibbāyatī”ti?

“Natthi, mahārāja, arahato anunayo vā paṭigho vā, na ca arahanto apakkaṁ pātenti paripākaṁ āgamenti paṇḍitā.

Bhāsitampetaṁ, mahārāja, therena sāriputtena dhammasenāpatinā—

‘Nābhinandāmi maraṇaṁ,

nābhinandāmi jīvitaṁ;

Kālañca paṭikaṅkhāmi,

nibbisaṁ bhatako yathā.

Nābhinandāmi maraṇaṁ,

nābhinandāmi jīvitaṁ;

Kālañca paṭikaṅkhāmi,

sampajāno patissato’”ti.

“Kallosi, bhante nāgasenā”ti.

Paṭisandahanapuggalavediyanapañho catuttho.