小部第828經（Milindapañha / Nibbānavagga / 6. Nerayikaggiuṇhabhāvapañha）

Milindapañha

Nibbānavagga

6. Nerayikaggiuṇhabhāvapañha

Rājā āha—

“bhante nāgasena, tumhe bhaṇatha—

‘pākatikaaggito nerayiko aggi mahābhitāpataro hoti, khuddakopi pāsāṇo pākatike aggimhi pakkhitto divasampi paccamāno na vilayaṁ gacchati, kūṭāgāramattopi pāsāṇo nerayikaggimhi pakkhitto khaṇena vilayaṁ gacchatī’ti, etaṁ vacanaṁ na saddahāmi, evañca pana vadetha ‘ye ca tattha uppannā sattā, te anekānipi vassasahassāni niraye paccamānā na vilayaṁ gacchantī’ti, tampi vacanaṁ na saddahāmī”ti.

Thero āha—

“taṁ kiṁ maññasi, mahārāja, yā tā santi makariniyopi susumāriniyopi kacchapiniyopi moriniyopi kapotiniyopi, kiṁ nu tā kakkhaḷāni pāsāṇāni sakkharāyo ca khādantī”ti?

“Āma, bhante, khādantī”ti.

“Kiṁ pana tāni tāsaṁ kucchiyaṁ koṭṭhabbhantaragatāni vilayaṁ gacchantī”ti?

“Āma, bhante, vilayaṁ gacchantī”ti.

“Yo pana tāsaṁ kucchiyaṁ gabbho, sopi vilayaṁ gacchatī”ti?

“Na hi, bhante”ti.

“Kena kāraṇenā”ti?

“Maññāmi, bhante, kammādhikatena na vilayaṁ gacchatī”ti.

“Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṁ gacchanti.

Bhāsitampetaṁ, mahārāja, bhagavatā—

‘so na tāva kālaṁ karoti, yāva na taṁ pāpakammaṁ byantīhotī’”ti.

“Bhiyyo opammaṁ karohī”ti.

“Taṁ kiṁ maññasi, mahārāja, yā tā santi sīhiniyopi byagghiniyopi dīpiniyopi kukkuriniyopi, kiṁ nu tā kakkhaḷāni aṭṭhikāni maṁsāni khādantī”ti?

“Āma, bhante, khādantī”ti.

“Kiṁ pana tāni tāsaṁ kucchiyaṁ koṭṭhabbhantaragatāni vilayaṁ gacchantī”ti?

“Āma, bhante, vilayaṁ gacchantī”ti.

“Yo pana tāsaṁ kucchiyaṁ gabbho, sopi vilayaṁ gacchatī”ti?

“Na hi, bhante”ti.

“Kena kāraṇenā”ti?

“Maññāmi, bhante, kammādhikatena na vilayaṁ gacchatī”ti.

“Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṁ gacchantī”ti.

“Bhiyyo opammaṁ karohī”ti.

“Taṁ kiṁ maññasi, mahārāja, yā tā santi yonakasukhumāliniyopi khattiyasukhumāliniyopi brāhmaṇasukhumāliniyopi gahapatisukhumāliniyopi, kiṁ nu tā kakkhaḷāni khajjakāni maṁsāni khādantī”ti?

“Āma, bhante, khādantī”ti.

“Kiṁ pana tāni tāsaṁ kucchiyaṁ koṭṭhabbhantaragatāni vilayaṁ gacchantī”ti?

“Āma, bhante, vilayaṁ gacchantī”ti.

“Yo pana tāsaṁ kucchiyaṁ gabbho sopi vilayaṁ gacchatī”ti?

“Na hi, bhante”ti.

“Kena kāraṇenā”ti?

“Maññāmi, bhante, kammādhikatena na vilayaṁ gacchatī”ti.

“Evameva kho, mahārāja, kammādhikatena nerayikā sattā anekānipi vassasahassāni niraye paccamānā na vilayaṁ gacchanti.

Bhāsitampetaṁ, mahārāja, bhagavatā—

‘so na tāva kālaṁ karoti, yāva na taṁ pāpakammaṁ byantīhotī’”ti.

“Kallosi, bhante nāgasenā”ti.

Nerayikaggiuṇhabhāvapañho chaṭṭho.