相應部第135經（Saṁyutta Nikāya 3.24 / 3. Tatiyavagga / Issattasutta）

Saṁyutta Nikāya 3.24

3. Tatiyavagga

Issattasutta

Sāvatthinidānaṁ.

Ekamantaṁ nisinno kho rājā pasenadi kosalo bhagavantaṁ etadavoca:

“kattha nu kho, bhante, dānaṁ dātabban”ti?

“Yattha kho, mahārāja, cittaṁ pasīdatī”ti.

“Kattha pana, bhante, dinnaṁ mahapphalan”ti?

“Aññaṁ kho etaṁ, mahārāja, kattha dānaṁ dātabbaṁ, aññaṁ panetaṁ kattha dinnaṁ mahapphalanti?

Sīlavato kho, mahārāja, dinnaṁ mahapphalaṁ, no tathā dussīle.

Tena hi, mahārāja, taññevettha paṭipucchissāmi. Yathā, te khameyya, tathā naṁ byākareyyāsi.

Taṁ kiṁ maññasi, mahārāja,

idha tyassa yuddhaṁ paccupaṭṭhitaṁ saṅgāmo samupabyūḷho.

Atha āgaccheyya khattiyakumāro asikkhito akatahattho akatayoggo akatūpāsano bhīru chambhī utrāsī palāyī.

Bhareyyāsi taṁ purisaṁ, attho ca te tādisena purisenā”ti?

“Nāhaṁ, bhante, bhareyyaṁ taṁ purisaṁ, na ca me attho tādisena purisenā”ti.

“Atha āgaccheyya brāhmaṇakumāro asikkhito …pe…

atha āgaccheyya vessakumāro asikkhito …pe…

atha āgaccheyya suddakumāro asikkhito …pe…

na ca me attho tādisena purisenā”ti.

“Taṁ kiṁ maññasi, mahārāja,

idha tyassa yuddhaṁ paccupaṭṭhitaṁ saṅgāmo samupabyūḷho.

Atha āgaccheyya khattiyakumāro susikkhito katahattho katayoggo katūpāsano abhīru acchambhī anutrāsī apalāyī.

Bhareyyāsi taṁ purisaṁ, attho ca te tādisena purisenā”ti?

“Bhareyyāhaṁ, bhante, taṁ purisaṁ, attho ca me tādisena purisenā”ti.

“Atha āgaccheyya brāhmaṇakumāro …pe…

atha āgaccheyya vessakumāro …pe…

atha āgaccheyya suddakumāro susikkhito katahattho katayoggo katūpāsano abhīru acchambhī anutrāsī apalāyī.

Bhareyyāsi taṁ purisaṁ, attho ca te tādisena purisenā”ti?

“Bhareyyāhaṁ, bhante, taṁ purisaṁ, attho ca me tādisena purisenā”ti.

“Evameva kho, mahārāja, yasmā kasmā cepi kulā agārasmā anagāriyaṁ pabbajito hoti, so ca hoti pañcaṅgavippahīno pañcaṅgasamannāgato, tasmiṁ dinnaṁ mahapphalaṁ hoti.

Katamāni pañcaṅgāni pahīnāni honti?

Kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.

Imāni pañcaṅgāni pahīnāni honti.

Katamehi pañcahaṅgehi samannāgato hoti?

Asekkhena sīlakkhandhena samannāgato hoti, asekkhena samādhikkhandhena samannāgato hoti, asekkhena paññākkhandhena samannāgato hoti, asekkhena vimuttikkhandhena samannāgato hoti, asekkhena vimuttiñāṇadassanakkhandhena samannāgato hoti.

Imehi pañcahaṅgehi samannāgato hoti.

Iti pañcaṅgavippahīne pañcaṅgasamannāgate dinnaṁ mahapphalan”ti.

Idamavoca bhagavā …pe…

satthā:

“Issattaṁ balavīriyañca,

yasmiṁ vijjetha māṇave;

Taṁ yuddhattho bhare rājā,

nāsūraṁ jātipaccayā.

Tatheva khantisoraccaṁ,

dhammā yasmiṁ patiṭṭhitā;

Ariyavuttiṁ medhāviṁ,

hīnajaccampi pūjaye.

Kāraye assame ramme,

vāsayettha bahussute;

Papañca vivane kayirā,

dugge saṅkamanāni ca.

Annaṁ pānaṁ khādanīyaṁ,

vatthasenāsanāni ca;

Dadeyya ujubhūtesu,

vippasannena cetasā.

Yathā hi megho thanayaṁ,

vijjumālī satakkaku;

Thalaṁ ninnañca pūreti,

abhivassaṁ vasundharaṁ.

Tatheva saddho sutavā,

abhisaṅkhacca bhojanaṁ;

Vanibbake tappayati,

annapānena paṇḍito.

Āmodamāno pakireti,

detha dethāti bhāsati;

Taṁ hissa gajjitaṁ hoti,

devasseva pavassato;

Sā puññadhārā vipulā,

dātāraṁ abhivassatī”ti.