相應部第1447經（Saṁyutta Nikāya 47.47 / 5. Amatavagga / Duccaritasutta）

Saṁyutta Nikāya 47.47

5. Amatavagga

Duccaritasutta

Atha kho aññataro bhikkhu yena bhagavā tenupasaṅkami …pe…

“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.

“Tasmātiha tvaṁ, bhikkhu, ādimeva visodhehi kusalesu dhammesu.

Ko cādi kusalānaṁ dhammānaṁ?

Idha tvaṁ, bhikkhu, kāyaduccaritaṁ pahāya kāyasucaritaṁ bhāvessasi.

Vacīduccaritaṁ pahāya vacīsucaritaṁ bhāvessasi.

Manoduccaritaṁ pahāya manosucaritaṁ bhāvessasi.

Yato kho tvaṁ, bhikkhu, kāyaduccaritaṁ pahāya kāyasucaritaṁ bhāvessasi, vacīduccaritaṁ pahāya vacīsucaritaṁ bhāvessasi, manoduccaritaṁ pahāya manosucaritaṁ bhāvessasi, tato tvaṁ, bhikkhu, sīlaṁ nissāya sīle patiṭṭhāya cattāro satipaṭṭhāne bhāveyyāsi.

Katame cattāro?

Idha tvaṁ, bhikkhu, kāye kāyānupassī viharāhi ātāpī sampajāno satimā, vineyya loke abhijjhādomanassaṁ;

vedanāsu …pe…

citte …pe…

dhammesu dhammānupassī viharāhi ātāpī sampajāno satimā, vineyya loke abhijjhādomanassaṁ.

Yato kho tvaṁ, bhikkhu, sīlaṁ nissāya sīle patiṭṭhāya ime cattāro satipaṭṭhāne evaṁ bhāvessasi, tato tuyhaṁ, bhikkhu, yā ratti vā divaso vā āgamissati vuddhiyeva pāṭikaṅkhā kusalesu dhammesu, no parihānī”ti …pe…

aññataro ca pana so bhikkhu arahataṁ ahosīti.

Sattamaṁ.